1 ’E i teienei, i muri a’era, ’ia oti a’era tā Alama paraura’a atu i teie nei mau parau ia rātou, ’ua pārahi ihora ’oia i raro i ni’a i te repo, ’e ’ua ti’a a’era Amuleka i ni’a ’e ’ua ha’amata ihora i te ha’api’i atu ia rātou, i te nā-’ō-ra’a atu ē :

2 E tō’u mau taea’e, ’ua mana’o vau ē, ’aita roa i ti’a ’ia ’ore ’outou ’ia ’ite i te mau mea i parauhia nō ni’a i te taera’a mai o te Mesia, ’o tei ha’api’ihia e mātou ē, ’o te Tamaiti a te Atua ; ’oia ïa, ’ua ’ite ho’i au ē, ’ua ha’api’i-rahi-hia teie nei mau mea ia ’outou na, hou tō ’outou tāivara’a ia mātou nei.

3 E nō te mea ’ua hina’aro ’outou ’ia fa’a’ite atu tō’u nei taea’e here ia ’outou i te mea e au ia ’outou ’ia rave nō tō ’outou mau ’ati ; ’e nō reira ’ua parau ri’i atu ’oia ia ’outou nō te fa’aineine i tō ’outou ferurira’a, ’ua fa’aitoito atu ’oia ia ’outou nō ni’a i te fa’aro’o e te fa’a’oroma’i—’

4 ’Oia ïa, ’ia rahi ho’i tō ’outou fa’aro’o ’e ’ia tanu ’outou i te parau i roto i tō ’outou ’ā’au, ’e ’ia tāmata ’outou i tō te reira maita’i.

5 ’E ’ua ’ite mātou ē, te uira’a rahi i roto i tō ’outou ’ā’au na, teie ïa, tei roto ānei i te Tamaiti a te Atua taua parau ra, ’e ’aita ānei e Mesia e vai ra.

6 ’E ’ua ’ite ato’a ’outou ē, ’ua fa’a’ite pāpū atu tō’u nei taea’e ia ’outou i te mau vāhi e rave rahi, ’e tei roto ïa te parau i te Mesia e tae atu i te fa’aorara’a.

7 ’Ua fa’ahiti atu tō’u nei taea’e i te mau parau a Zenosa, ’oia ho’i, e tae mai te fa’aorara’a nā roto i te Tamaiti a te Atua, ’e ’ua fa’ahiti ato’a atu ’oia i te mau parau a Zenoke ; ’e ’oia ato’a ’ua fa’ahiti atu ’oia i te mau parau a Mose nō te fa’a’ite pāpū ē, e parau mau teie nei mau mea.

8 ’E i teienei, inaha, tē fa’a’ite pāpū atu nei au iho ia ’outou ē, e parau mau teie mau mea. Inaha, tē parau atu nei au ia ’outou ē, ’ua ’ite au ē, e tae mai te Mesia i rotopū i te mau tamari’i a te ta’ata nei, nō te rave i ni’a iāna iho i te mau hara a tōna ra mau ta’ata, ’e ’ia riro ’oia ’ei tāra’ehara nō tō te ao nei ; ’e nā te Fatu te Atua i parau mai i te reira.

9 ’E e mea ti’a roa ho’i ’ia fa’ati’ahia te hō’ē tāra’ehara ; e mai te au ho’i i te ’ōpuara’a rahi a te Atua mure ’ore ra, e mea ti’a roa ’ia fa’ati’ahia te hō’ē tāra’ehara, ’e mai te mea ē ’aita, e pohe ïa te mau ta’ata ato’a ; ’oia ïa, ’ua ’eta’eta te ta’ata ato’a ; ’oia ïa, ’ua hi’a te ta’ata ato’a ’e ’ua mo’e rātou, ’e ’ia pohe rātou e ti’a ai, maori rā nā roto i te tāra’ehara ’o tē mea ti’a roa ’ia fa’ati’ahia.

10 ’E e mea ti’a roa ho’i ’ia vai te hō’ē tusia rahi ’e te hope’a ; ’oia ïa, ’eiaha rā te tusia ta’ata, ’eiaha te ’ānimara, ’e ’eiaha te mau huru manu ato’a ; nō te mea e ’ore te reira e riro ’ei tusia ta’ata ; ’ia riro rā te reira ’ei tusia fāito ’ore ’e te mure ’ore e ti’a ai.

11 I teienei, ’aita roa e ti’a i te hō’ē ta’ata ’ia fa’atusia i tōna iho toto ’ia riro ’ei tāra’ehara nō te mau hara a te tahi ’ē atu ta’ata. I teienei, ’ia taparahi te ta’ata i te ta’ata, inaha, e tītau ānei tā tātou ture, ’o tei riro ’ei mea parauti’a, i te ora o tōna ra taea’e ? Tē parau atu nei au ia ’outou, ’Aita roa ïa.

12 Tē tītau nei rā te ture i te ora o taua ta’ata i taparahi i te ta’ata ; nō reira ’aita roa e ti’a i te hō’ē mea i iti iho i te tāra’ehara fāito ’ore ’ia fa’a’ore i te mau hara a tō te ao ato’a nei.

13 Nō reira, e mea ti’a roa ’ia vai te hō’ē tusia rahi ’e te hope’a ; ’e i reira e fa’aea ai, ’e ’aore rā e mea ti’a roa ’ia fa’aea te ha’amani’ira’a toto ; ’e i reira ho’i e fa’ati’ahia ai te ture a Mose ; ’oia ïa, e fa’ati’ahia ai te reira ē hope roa a’e ; ’e e ’ore roa te hō’ē iota ’e te hō’ē vāhi iti e mou.

14 ’E inaha, teie te aura’a tā’āto’a nō te ture ; ’e tē fa’a’ite ātea nei ho’i te tā’āto’ara’a nō te reira i taua tusia rahi ’e te hope’a ; ’e taua tusia rahi ’e te hope’a ra, ’o te Tamaiti ïa a te Atua, ’oia ïa, e mea fāito ’ore ’e te mure ’ore ho’i.

15 ’E nā reira ’oia i te fa’atae mai i te fa’aorara’a ia rātou ato’a ’o tē ti’aturi i tōna ra i’oa ; ’o teie ïa te tumu nō teie tusia hope’a, nō te fa’atupu i te aroha rahi, ’o tei mana i ni’a a’e i te parauti’a, ’e ’o tei fa’atae ato’a ho’i i te rāve’a i te ta’ata nei e ti’a ai ia rātou ’ia fāri’i i te fa’aro’o e tae atu ai i te tātarahapara’a.

16 ’E nō reira, e ti’a ai i te aroha ’ia fa’atupu i te mau tītaura’a nō te parauti’a, ’e ’ia ha’a’ati i te ta’ata i te rima nō te hau, ’āre’a rā ’o ’oia ’o tē ’ore e fa’a’ohipa i te fa’aro’o e tae atu ai i te tātarahapara’a, e tu’uhia ïa ’oia i te ture tā’āto’a nō te mau tītaura’a nō te parauti’a ; nō reira ’o ’oia ana’e e fa’aro’o tōna i te tātarahapara’a ’o ’oia ïa te fāri’i i te ’ōpuara’a rahi ’e te mure ’ore nō te fa’aorara’a.

17 Nō reira, ’ia fa’ati’a mai te Atua ia ’outou, e tō’u mau taea’e, ’ia ha’amata ’outou i te fa’a’ohipa i te fa’aro’o e tae atu ai i te tātarahapara’a, ’ia ha’amata ’outou i te ti’aoro atu i tōna ra i’oa mo’a, ’ia aroha mai ’oia ia ’outou.

18 ’Oia ïa, ’a ti’aoro atu ’outou iāna ’ia aroha mai ; e pūai rahi ho’i tōna nō te fa’aora mai.

19 ’Oia ïa, ’a fa’aha’eha’a ’outou ia ’outou iho, ’e ’a tāmau noa i te pure atu iāna.

20 ’A ti’aoro atu iāna ’a haere atu ai ’outou i roto i tā ’outou mau fa’a’apu ; ’oia ïa, i ni’a ato’a i tā ’outou mau nana.

21 ’A ti’aoro atu iāna i roto i tō ’outou mau fare, ’oia ïa, nō tō ’outou ’utuāfare tā’āto’a, i te po’ipo’i, i te avatea, ’e i te ahiahi ato’a ho’i.

22 ’Oia ïa, ’a ti’aoro atu iāna ’ia pāruruhia ’outou i te mana o tō ’outou mau ’enemi.

23 ’Oia ïa, ’a ti’aoro atu iāna ’ia pāruruhia ’outou i te diabolo, ’oia ho’i i te ’enemi o te parauti’a ato’a ra.

24 ’A ti’aoro atu iāna nō ni’a i tā ’outou mau fa’a’apu mā’a, ’ia manuia ’outou i te reira.

25 ’A ti’aoro atu nō ni’a i tā ’outou mau nana i roto i tā ’outou mau ’āua, ’ia rahi rātou ra.

26 E ’ere rā i te reira ana’e ; e mea ti’a ia ’outou ’ia nīni’i atu i tō ’outou vārua i roto i tō ’outou mau piha, ’e i roto i tō ’outou mau vāhi mo’emo’e, ’e i roto i tō ’outou mēdēbara.

27 ’Oia ïa, ’ia ’ore ’outou ’ia ti’aoro atu i te Fatu, ’ia ’ī ïa tō ’outou ’ā’au i te pure tu’utu’u ’ore iāna ’ia maita’i ’outou, ’e ’ia maita’i ato’a rātou tei pīha’i iho ia ’outou.

28 ’E i teienei, inaha, e tō’u mau taea’e here, tē parau atu nei au ia ’outou, ’eiaha ’outou e mana’o ē, ’ua nava’i te reira ; nō te mea i muri iho i tō ’outou ravera’a i teie nei mau mea ato’a, ’e ’ia fa’aru’e ’outou i te feiā veve, ’e tei taha’a noa, ’e ’ia ’ore ’outou ’ia utuutu i te feiā ma’i, ’e tei ro’ohia i te ’ati, ’e ’ia ’ore ’outou ’ia ’ōpere i tā ’outou tao’a, mai te mea ē tē vai ra tā ’outou, i te feiā veve—tē parau atu nei au ia ’outou, mai te mea ē ’aita ’outou e rave i taua mau mea nei, inaha, ’ua riro tā ’outou pure ’ei mea ma’ama’a ’e te faufa’a ’ore, ’e ’ua riro ’outou ’ei feiā ha’avare ’o tei huna i te fa’aro’o.

29 Nō reira, ’ia ’ore ’outou ’ia fa’atupu i te aroha ma te hōro’a ato’a, ’ua riro ïa ’outou mai te ota ’o tē fa’aru’ehia e te mau ta’ata tāmā moni, (e mea faufa’a ’ore ho’i te reira) ’e e tāta’ahihia e te ’āvae ta’ata.

30 ’E i teienei, e tō’u mau taea’e, i muri iho i tō ’outou fāri’ira’a i te mau fa’a’itera’a pāpū e rave rahi, nō te mea ’ua fa’a’ite pāpū mai te mau pāpa’ira’a mo’a i teie nei mau mea, ’ua hina’aro vau ’ia haere mai ’outou ’e ’ia fa’atupu i te ’ohipa e au i te tātarahapa.

31 ’Oia ïa, ’ua hina’aro vau ’ia haere mai ’outou, ’e ’ia ’ore ’outou ’ia fa’a’eta’eta ā i tō ’outou ’ā’au ; inaha ho’i, ’o te taime teie ’e te mahana ho’i nō tō ’outou fa’aorara’a ; ’e nō reira, ’ia tātarahapa ’outou ’e ’ia ’ore ho’i ’ia fa’a’eta’eta i tō ’outou ’ā’au, e fa’atae-vave-hia mai te ’ōpuara’a rahi nō te fa’aorara’a ia ’outou na.

32 Inaha ho’i, ’o teie nei orara’a te taime ’ia fa’aineine te ta’ata nō te fārerei atu i te Atua ; ’oia ïa, inaha, ’o te mahana nō teie nei orara’a ’o te mahana ïa ’ia rave te ta’ata i tā rātou mau ’ohipa.

33 ’E i teienei, mai tā’u i parau atu ia ’outou i te mātāmua, nō te mea ’ua tae mai te mau fa’a’itera’a pāpū e rave rahi ia ’outou, nō reira, tē a’o atu nei au ia ’outou, ’eiaha roa ’outou e fa’atāere i te mahana nō tā ’outou tātarahapara’a ē tae roa i te hope’a ; nō te mea i muri iho i teie nei mahana nō te orara’a, ’o tei hōro’ahia mai ia tātou nō te fa’aineine nō te tau mure ’ore ra, inaha, ’ia ’ore tātou ’ia fa’a’ohipa māite i tō tātou taime a ora ai tātou i te ao nei, i reira e tae mai ai te pō nō te pōiri rahi e ’aore roa te hō’ē ’ohipa e ti’a ’ia ravehia.

34 E ’ore ho’i e ti’a ia ’outou ’ia parau, ’a arata’ihia ai ’outou i taua tau ’ati ri’ari’a ra, ’e e tātarahapa vau, ’e e ho’i atu vau i tō’u Atua. ’Aita roa ïa, ’aita roa e ti’a ia ’outou ’ia parau i te reira ; nō te mea taua vārua ra ’o tei pārahi i roto i tō ’outou tino i te mahana ’a fa’aru’e mai ’outou i teie nei orara’a, e mana ato’a ïa tō taua vārua ra ’ia pārahi i roto i tō ’outou tino i taua ao mure ’ore.

35 Inaha ho’i, mai te mea ē ’ua fa’atāere ’outou i te mahana nō tō ’outou tātarahapara’a ē tae noa atu i te pohera’a, inaha, tei raro a’e ïa ’outou i te mana o te vārua o te diabolo, ’e e tā’ati ’oia ia ’outou nōna iho ; nō reira ’ua fa’aātea ’ē atu te Vārua o te Fatu ia ’outou, ’e ’aita atu ra tōna e vāhi i roto ia ’outou, ’e tei te diabolo ra ho’i te tā’āto’ara’a nō te mana i ni’a ia ’outou ; ’e ’o te huru hope’a teie o te feiā parauti’a ’ore.

36 ’E ’ua ’ite au i te reira, nō te mea ’ua parau mai te Fatu ē, e ’ore roa ’oia e pārahi i roto i te mau hiero vi’ivi’i, ’āre’a rā e pārahi ’oia i roto i te ’ā’au o te feiā parauti’a ; ’oia ïa, ’ua parau ato’a mai ’oia ē, e pārahi te feiā parauti’a i roto i tōna ra bāsileia, ’e ’aita rātou e haere fa’ahou i rāpae ē a muri noa atu ; e fa’ateateahia rā tō rātou mau ’ahu nā roto i te toto o te ’Ārenio.

37 ’E i teienei, e tō’u mau taea’e here, ’ua hina’aro vau ’ia ha’amana’o ’outou i teie nei mau mea, ’e ’ia rave ’outou i te ’ohipa nō tō ’outou fa’aorara’a ma te mata’u i mua i te Atua, e ’eiaha roa ’outou e huna fa’ahou i te taera’a mai o te Mesia.

38 ’Eiaha ho’i e pāto’i fa’ahou i te Vārua Maita’i, ’ia fāri’i rā ’outou iāna, ’e ’ia rave i te i’oa o te Mesia i ni’a ia ’outou iho ; ’e ’ia fa’aha’eha’a ’outou ia ’outou iho i raro i te repo, ’e ’ia ha’amori i te Atua ma te vārua ’e te parau mau i te mau vāhi ato’a e pārahihia e ’outou ; ’e ’ia pārahi ’outou ma te ha’amaita’i iāna i te mau mahana ato’a ra, nō te aroha ’e te mau ha’amaita’ira’a e rave rahi tāna i nīni’i mai i ni’a ia ’outou na.

39 ’Oia ïa, tē fa’aitoito atu nei ho’i au ia ’outou, e tō’u mau taea’e, ’ia ara ’outou ma te pure tu’utu’u ’ore, ’ia ’ore ’outou ’ia arata’i-’ē-hia e te mau fa’ahemara’a a te diabolo, ’ia ’ore ’oia ’ia ha’avī ia ’outou, ’ia ’ore ’outou ’ia riro ’ei mau tāvini nōna i te mahana hope’a ra ; inaha ho’i, ’aita roa e utu’a maita’i tāna e hōro’a mai nā ’outou.

40 ’E i teienei, e tō’u mau taea’e here, tē fa’aitoito atu nei au ia ’outou ’ia fa’a’oroma’i, ’e ’ia fa’a’oroma’i ’outou i te mau huru ’ati ato’a ; ’e ’eiaha ’outou e fa’a’ino ia rātou ’o tei ti’avaru atu ia ’outou i rāpae nō tō ’outou veve rahi, ’o te riro ho’i ’outou ’ei feiā hara mai ia rātou ato’a ra.

41 ’Ia fa’a’oroma’i rā ’outou, ’e ’ia fa’a’oroma’i i teie nei mau ’ati, ma te ti’aturi pāpū ē tē vai ra te mahana e rave-’ē-hia atu tō ’outou mau ’ati ato’a.