1 I teienei, ’o te mau parau teie tā Amuleka i a’o atu i te mau ta’ata i te fenua ra nō Amoniha, i te nā-’ō-ra’a atu ē :

2 ’O vau nei ’o Amuleka ; e tamaiti au nā Gidona, te tamaiti a Isema’ela, ’oia te hua’ai nō Aminadi ; ’e nā taua Aminadi ra i ’īriti i te aura’a nō te pāpa’ira’a i ni’a iho i te papa’i o te hiero, ’o tei pāpa’ihia e te rima o te Atua.

3 ’E e hua’ai ’o Aminadi nō Nephi, te tamaiti a Lehi, ’o tei haere mai mai te fenua mai ra mai Ierusalema, ’e e hua’ai ’oia nō Manase, te tamaiti a Iosepha, ’o tei ho’ohia atu i ’Aiphiti e te rima o tōna ra mau taea’e.

4 ’E inaha, e ta’ata ro’o rahi au i rotopū ia rātou ato’a ’o tei ’ite iā’u nei ; ’oia ïa, ’e inaha, e rave rahi tō’u fēti’i ’e mau hoa, ’e ’ua fāri’i au i te mau tao’a rahi nā roto i te itoito o tō’u ra rima.

5 ’Āre’a rā, hope noa atu ā teie mau mea ato’a, ’aita vau i ’ite rahi i te mau ’ē’a o te Fatu, ’e tāna ra mau parau ’aro ’e tōna mana māere. ’Ua parau atu vau ē, e ’ere tō’u ’ite i te mea rahi i teie mau mea ; inaha rā, ’ua hape au, ’ua ’ite ho’i au i te mea rahi nō tāna ra mau parau ’aro ’e tōna mana māere ; ’oia ïa, i te fa’aorara’a i teie nei mau ta’ata.

6 ’Āre’a rā, ’ua fa’a’eta’eta vau i tō’u ’ā’au, ’e ’ua pi’ihia vau i te mau taime e rave rahi, ’aita rā vau i fa’aro’o ; nō reira ’ua ’ite au i teie mau mea ; ’aita rā vau i hina’aro i taua ’ite ra, nō reira ’ua tāmau noa vau i te ’aro atu i te Atua nā roto i te parauti’a ’ore o tō’u ra ’ā’au, ē tae roa atu i te maha o te mahana ’e te hitu o te ’āva’e, ’oia ho’i i te ’ahuru o te matahiti nō te fa’aterera’a a te mau ha’avā.

7 ’A rātere ai au nō te fārerei i te hō’ē fēti’i piri roa, inaha, ’ua fā mai ra te hō’ē melahi a te Fatu iā’u ’e ’ua nā ’ō mai ra : E Amuleka, ’a ho’i i tō ’oe na fare, ’e ’a fa’a’amu i te hō’ē peropheta a te Fatu ; ’oia ïa, i te hō’ē ta’ata mo’a, ’oia ho’i i te hō’ē ta’ata i mā’itihia e te Atua ; ’ua ha’apae ho’i ’oia i te mā’a e rave rahi mahana nō te mau hara a teie nei feiā, ’e ’ua po’ia roa ’oia, ’e e fāri’i mai ’oe iāna i roto i tō ’oe ’utuāfare ē e fa’a’amu ho’i iāna, ’e e ha’amaita’i ’oia ia ’oe ’e tō ’oe ra ’utuāfare ; ’e e tae mai te ha’amaita’ira’a a te Fatu i ni’a ia ’oe ’e tō ’oe ’utuāfare.

8 ’E i muri a’era, ’ua ha’apa’o vau i te parau a taua melahi ra, ’e ’ua ho’i atu ra vau i tō’u fare. ’E ’a haere atu ai au i reira, ’ua fārerei au i te ta’ata tā te melahi i parau mai iā’u, i te nā-’ō-ra’a mai ē : E fāri’i ’oe iāna i roto i tō ’oe ’utuāfare—’e inaha o taua ta’ata iho ā rā teie ’o tei parau atu ia ’outou i te mau mea nō ni’a i te Atua.

9 ’E ’ua parau mai ra te melahi iā’u, e ta’ata mo’a ’oia ; nō reira ’ua ’ite au ē, e ta’ata mo’a ’oia, nō te mea ’ua parauhia te reira e te hō’ē melahi a te Atua.

10 ’E teie fa’ahou ā, ’ua ’ite au ē, e parau mau roa te mau mea tāna i fa’a’ite mai ; inaha ho’i tē parau atu nei au ia ’outou na, tē ora ra te Fatu, ’e ’ua tono mai ’oia i tāna ra melahi nō te fa’a’ite mai i teie mau mea iā’u ; ’e ’ua nā reira ’oia ’a pārahi ai teie Alama i tō’u ra fare.

11 Inaha ho’i, ’ua ha’amaita’i ’oia i tō’u ’utuāfare, ’e ’ua ha’amaita’i ato’a ’oia iā’u, ’e tā’u mau vahine, e tā’u mau tamari’i, ’e tō’u metua tāne, ’e tō’u mau fēti’i ; ’oia ïa, ’e ’ua ha’amaita’i ’oia i tō’u ra mau fēti’i ato’a, ’e ’ua vai noa te ha’amaita’ira’a a te Fatu i ni’a iho ia mātou mai te au i te mau parau tāna i parau mai.

12 ’E i teienei, ’ia oti a’era tā Amuleka paraura’a atu i teie mau parau, ’ua ha’amata ihora te mau ta’ata i te māere, i te mea ē ’ua hau atu i te hō’ē ana’e ’ite ’o tei fa’a’ite mai i te mau mea i parihia ai rātou ra, ’e i te mau mea ho’i e tupu a muri atu, mai te au i te vārua nō te tohu i roto ia rāua.

13 ’Āre’a rā, tei rotopū ia rātou te tahi pae ’o tei hina’aro ’ia uiui ia rāua, ’ei rāmāra’a ia rāua i tā rāua ra mau parau, nā roto i tā rātou mau rāve’a ha’avare, ’ia noa’a ia rātou te tahi fa’ahapara’a ia rāua, ’ia ti’a ia rātou ’ia tu’u atu ia rāua i tō rātou mau ha’avā, ’ia ha’avāhia rāua mai te au i te ture, ’e ’ia taparahihia rāua ’e ’aore rā ’ia hurihia i roto i te fare tāpe’ara’a, mai te au i te hara tā rātou i fa’ariro ’ei hara ’e ’ei parira’a ho’i ia rāua.

14 I teienei, teie te mau ta’ata ’o tei hina’aro ’ia ha’apohe ia rāua, ’oia ho’i te mau pāruru ture, ’o tei tārahuhia ’e ’aore rā tei fa’ata’ahia ’e te mau ta’ata, nō te fa’atere i te ture i te mau taime nō tō rāua ha’avāra’a, ’e ’aore rā nō te mau ha’avāra’a i mua i te mau ha’avā, nō te mau hapa a te mau ta’ata.

15 I teienei, ’ua ha’api’ihia teie mau pāruru ture i te mau huru ’ohipa ato’a ’e te mau rāve’a ha’avare ato’a a te ta’ata nei ; ’ia roa’a tō rātou ’aravihi i te ravera’a i te ’ohipa nō tō rātou tōro’a.

16 ’E i muri a’era, ’ua ha’amata ihora rātou i te uiui ia Amuleka, ’ia ti’a ia rātou ’ia ha’afifi iāna i tāna ra mau parau, ’e ’aore rā ’ia fa’ahapa i te mau parau tāna e parau.

17 I teienei, ’aita rātou i ’ite ē, ’ua ti’a ia Amuleka ’ia ’ite i tā rātou mau ’ōpuara’a. ’Āre’a rā, i muri a’era, ’a ha’amata ai rātou i te uiui atu iāna, ’ua ’ite ihora ’oia i tō rātou mana’o, ’e ’ua parau atu ra ’oia ia rātou : ’Auē ho’i ’outou e te u’i parauti’a ’ore ’e te ha’api’o ē, ’e te mau pāruru ture ’e te feiā fa’ahua paieti ē, tē ha’amau na ho’i ’outou i te mau niu nō te diabolo ; tē tu’u ra ho’i ’outou i te mau herepata ’e te mau mārei nō te haru i te feiā mo’a o te Atua.

18 Tē fa’atupu na ’outou i te mau ’ōpuara’a nō te ha’api’o i te mau ’ē’a o te parauti’a, ’e nō te fa’atae mai i te riri ’ū’ana o te Atua i ni’a iho i tō ’outou upo’o, ē tae noa atu i te ha’amou-roa-ra’a o teie nei mau ta’ata.

19 ’Oia ïa, ’ua tano roa tā Mosia parau, ’oia tō tātou ari’i hope’a, ’a fātata ai ’oia i te vaiiho atu i te bāsileia, nō te mea ’aita tōna e mono, ’e ’a fa’ati’a ai ’oia ’ia tāvanahia tōna ra mau ta’ata mai te au i tā rātou iho parau—’oia ïa, ’ua tano roa tāna parau, ’a nā ’ō atu ai ’oia ē, ’ia tae i te tau e mā’iti ai te reo o teie mau ta’ata i te mau ’ohipa ’ī’ino, ’oia ho’i, ’ia tae i te tau e topa ai teie nei feiā i roto i te hapa, ’ei reira e ineine ai rātou nō te ha’amoura’a.

20 ’E i teienei, tē parau atu nei au ia ’outou na, e mana’o ti’a roa tō te Fatu nō te ha’avā i tā ’outou mau ’ohipa ’ī’ino ; ’ua tano roa tāna paraura’a atu i teie nei mau ta’ata nā roto i te reo o tāna ra mau melahi, i te nā-’ō-ra’a atu ē : ’A tātarahapa ’outou, ’a tātarahapa, tē fātata mai nei ho’i te bāsileia o te ao ra.

21 ’Oia ïa, ’ua tano roa tāna pi’ira’a atu nā roto i te reo o tōna ra mau melahi, i te nā-’ō-ra’a atu ē : E haere mai au i raro i rotopū i tō’u ra mau ta’ata ma te parau fāito ti’a ’e te parauti’a i roto i tō’u ra rima.

22 ’Oia ïa, tē parau atu nei au ia ’outou na, ’āhiri ’aita te mau pure a te feiā parauti’a ’o tē pārahi nei i ni’a i te fenua i teienei, ’ua ha’amou-roa-hia ïa ’outou i teienei ; e ’ere rā nā roto i te diluvi, mai te feiā i te ’anotau o Noa ra, nā roto rā i te o’e, ’e te ma’i rahi, ’e te ’o’e.

23 ’Āre’a rā nā roto i te mau pure a te feiā parauti’a i fa’aorahia ai ’outou na ; nō reira i teienei, ’ia ti’avaru ’outou i te feiā parauti’a i rāpae mai rotopū atu ia ’outou na, i reira e’ita roa te Fatu e fa’aherehere ia ’outou ; ’āre’a rā nā roto i tōna riri ’ū’ana e haere mai ’oia nō te fa’autu’a ia ’outou ; ’e i reira e tā’irihia ’outou i te o’e, ’e te ma’i rahi, ’e te ’o’e ; ’e tē fātata mai nei taua tau ra, maori rā ’ia tātarahapa ’outou.

24 ’E i teienei, i muri a’era, ’ua rahi roa atu ra te riri o te mau ta’ata ia Amuleka, ’e ’ua pi’i a’era rātou i te nā-’ō-ra’a ē : Tē fa’a’ino mai ra teie nei ta’ata i tā tātou mau ture ti’a, ’e i tō tātou mau pāruru ture ’aravihi ’o tā tātou i mā’iti.

25 ’Āre’a rā ’ua fa’atoro atu ra Amuleka i tōna rima, ’e ’ua pi’i māite atu ra ia rātou, i te nā-’ō-ra’a atu ē : ’Auē ho’i ’outou e te u’i parauti’a ’ore ’e te ha’api’o ē, nō te aha ho’i i noa’a ai ia Sātane te mana rahi i ni’a i tō ’outou ’ā’au ? Nō te aha ’outou e auraro ai iāna, ’ia noa’a iāna te mana i ni’a ia ’outou, nō te ha’amatapō i tō ’outou mata, ’ia ’ore ’outou ’ia māramarama i te mau parau i parauhia ra, mai te au i tō te reira parau mau ra ?

26 Inaha ho’i, ’ua fa’ahapa atu ānei au i tā ’outou ture ? ’Aita ’outou i māramarama ; tē parau mai nei ho’i ’outou ē, ’ua fa’ahapa vau i tā ’outou ture ; ’āre’a rā ’aita vau i nā reira, ’ua parau rā vau i tei au i tā ’outou ture, ’e ’ua fa’ahapahia ’outou i te reira.

27 ’E i teienei, inaha, tē parau atu nei au ia ’outou na, tē ha’amatahia ra te tumu nō te ha’amoura’a i teie nei feiā i te fa’ati’ahia e te parauti’a ’ore a tō ’outou mau pāruru ture ’e tō ’outou mau ha’avā.

28 ’E i teienei, i muri a’era, ’ia oti a’era tā Amuleka paraura’a atu i teie nei mau parau, ’ua fa’ahapa pūai mai ra te mau ta’ata iāna i te nā-’ō-ra’a ē : ’Ua ’ite tātou ē, e tamari’i teie nei ta’ata nā te diabolo, ’ua ha’avare mai ho’i ’oia ia tātou, ’e ’ua fa’ahapa mai ho’i ’oia i tā tātou ture. ’E i teienei, tē parau mai nei ’oia ē, ’aita ’oia i fa’ahapa mai i te reira.

29 ’E teie fa’ahou ā, ’ua fa’a’ino noa ’oia i tō tātou mau pāruru ture, ’e tō tātou mau ha’avā.

30 ’E i muri a’era, ’ua tu’u ihora te mau pāruru ture i te reira i roto i tō rātou iho ’ā’au, ’ia ha’amana’o noa rātou iho i te reira ’ei fa’ahapara’a iāna.

31 ’E tei rotopū ia rātou te hō’ē ta’ata ’o Zeezeroma tōna i’oa. I teienei ’o ’oia te mātāmua i pari ia Amuleka ’e ia Alama, e ta’ata ’aravihi roa ’oia i rotopū ia rātou, ’e e ’ohipa rahi ho’i tāna i rotopū i te mau ta’ata.

32 I teienei, teie te hina’aro o te mau pāruru ture, ’ia noa’a ïa te tao’a rahi ia rātou ; ’e e noa’a te tao’a rahi ia rātou mai te au i tā rātou ’ohipa i rave.