1 ’E i teienei, e tā’u tamaiti, e parau ri’i tā’u e parau atu ia ’oe nō ni’a i te fa’aho’ira’a mai i parauhia ra ; inaha ho’i, ’ua ruri ’ē te tahi pae i te mau pāpa’ira’a mo’a, ’e ’ua haere ’ē atu rātou nō teie nei mea. ’E tē ’ite nei au ē, i tapitapi na ho’i tō ’oe ’ā’au nō teie mea. Inaha rā, e ha’amāramarama atu vau i te reira ia ’oe na.

2 Tē parau atu nei au ia ’oe na, e tā’u tamaiti, ’ua tītauhia te ’ōpuara’a nō te fa’aho’ira’a mai e te parauti’a a te Atua ra ; e mea tītauhia ’ia fa’aho’ihia te mau mea ato’a i tō rātou huru nahonaho. Inaha, e mea tītauhia ho’i ’e te ti’a, mai te au i te mana ’e te ti’afa’ahoura’a o te Mesia, ’ia fa’aho’ihia te vārua o te ta’ata i tōna tino, ’e ’ia fa’aho’ihia te mau melo ato’a o te tino i tōna huru mau.

3 ’E ’ua tītauhia ho’i te reira ’ia au i tā te Atua ra parauti’a, ’ia ha’avāhia te mau ta’ata mai te au i tā rātou mau ’ohipa ; ’e mai te mea e mea maita’i tā rātou mau ’ohipa i roto i teie orara’a, ’e ’ua ti’a ho’i te mau hina’aro o tō rātou ’ā’au, e fa’aho’i-ato’a-hia ïa ia rātou te mea maita’i ’ia tae i te mahana hope’a ra.

4 ’E mai te mea e mea ’ino tā rātou mau ’ohipa, e fa’aho’ihia ïa te reira ’ei mea ’ino ia rātou ra. Nō reira, e fa’aho’ihia te mau mea ato’a i tō rātou huru nahonaho, te mau mea ato’a i tō rātou huru mau—te mea tāhuti ’ei mea tāhuti ’ore, te mea pohe noa ’ei mea pohe ’ore—’ia fa’ati’ahia i te ’oa’oa hope ’ore nō te fāri’i i te bāsileia o te Atua ra, ’e ’aore rā i te mamae hope ’ore nō te fāri’i i te bāsileia o te diabolo ra, te hō’ē i te hō’ē pae, te tahi atu i te tahi atu pae—

5 E fa’ati’ahia te hō’ē i te ’oa’oa mai te au i tōna mau hina’aro i te ’oa’oa, ’e ’aore rā i te maita’i mai te au i tōna mau hina’aro i te maita’i ; ’e te tahi pae i te ’ino mai te au i tōna mau hina’aro i te ’ino ; mai tāna ho’i i hina’aro i te rave i te ’ino mai te po’ipo’i ē pō noa a’e ; mai te reira ā ho’i e roa’a iāna tāna utu’a ’ino ’ia tae i te pō.

6 ’E mai te reira ā ho’i tō te tahi pae. Mai te mea ’ua tātarahapa ’oia i tāna mau hara, ’e ’ua tītau onoono atu ho’i i te parauti’a ē tae roa atu i te hope’a o tōna ra pu’e mahana, mai te reira iho ā ho’i ’oia i te fāri’i i te utu’a maita’i nō te parauti’a.

7 ’O rātou teie tei fa’aorahia e te Fatu ; ’oia ïa, ’o rātou teie i rave-’ē-hia, ’e tei fa’aorahia i taua pō hope ’ore o te pōiri ra ; e nā reira rātou i te ti’a ’e ’aore rā i te hi’a ; inaha ho’i, ’o rātou iho tō rātou ha’avā nō te rave i te mea maita’i ’e ’aore rā i te mea ’ino.

8 I teienei, ’aita roa e ti’a ’ia fa’ahuru ’ē haere noa i te mau fa’auera’a mana a te Atua, nō reira, ’ua fa’aineinehia te ’ē’a, ’e ’o ’oia ’o tē hina’aro ’ia pe’e i te reira, e fa’aorahia ïa.

9 ’E i teienei, inaha, e tā’u tamaiti, ’eiaha roa ’oe e rave i te hō’ē noa atu ā hapa i te Atua nō ni’a i taua mau ha’api’ira’a tumu nei, mai ’ati noa a’enei ’oe i te hara.

10 ’Eiaha roa ’oe e mana’o ē, nō te mea ’ua parauhia na nō ni’a i te fa’aho’ira’a ra, e fa’aho’ihia mai ïa ’oe mai roto mai i te hara i te ’oa’oa. Inaha, tē parau atu nei au ia ’oe na, e ’ere roa te ’ino i te ’oa’oa.

11 ’E i teienei, e tā’u tamaiti, e mea hi’a te huru o te mau ta’ata ato’a, ’oia ho’i, tei roto rātou i te huru pae tino, nō reira tei roto ïa rātou i te au ’ava’ava ’e i te mau ru’uru’ura’a nō te mau ’ohipa ’ī’ino ; ’ua ’ere rātou i te Atua i roto i te ao nei, ’e ’ua pāto’i rātou i te huru o te Atua ; nō reira, tē vai noa ra rātou i roto i te hō’ē vaira’a pāto’i i te huru mau o te ’oa’oa.

12 ’E i teienei, inaha, ’o te aura’a ānei teie o te parau ra e fa’aho’ira’a, te ravera’a i te mea i tōna ra huru mau ’e te fa’arirora’a i te reira ’ei mea au ’ore i tōna huru mau, ’e ’aore rā te fa’arirora’a i te reira ’ei mea huru ’ē i tōna ra huru mau ?

13 E tā’u tamaiti, ’aita roa ïa ; te aura’a ra o te parau fa’aho’ira’a, ’o te fa’aho’ira’ahia ïa te ’ino ’ei ’ino, te huru tāhuti ’ei huru tāhuti, ’e te huru diabolo ’ei huru diabolo—’e te maita’i ’ei maita’i ; ’e te parauti’a ’ei parauti’a ; te mea tano ’ei mea tano ; ’e te aroha ’ei aroha.

14 Nō reira, e tā’u tamaiti, ’ia aroha ’oe i tō ’oe mau taea’e ; ’a ha’apa’o ia vetahi ’ē ma te au maita’i, ’a ha’avā ma te parauti’a, ’e ’a rave i te maita’i ma te tu’utu’u ’ore ; ’e ’ia rave ’oe i teie nei mau mea, e roa’a ïa te utu’a maita’i ia ’oe ; ’oia ïa, e fa’aho’i-fa’ahou-hia te aroha ia ’oe ra ; e fa’aho’i-fa’ahou-hia te parauti’a ia ’oe ra ; e fa’aho’i-fa’ahou-hia mai te ha’avāra’a parauti’a ia ’oe ra, ’e e fāri’i fa’ahou ’oe i te utu’a maita’i.

15 Te mea ho’i ’o tā ’oe e hāpono atu, e ho’i fa’ahou mai ïa ia ’oe, ’e e fa’aho’ihia ïa ; nō reira, nā tē parau ra e fa’aho’ira’a, e fa’ahapa hope i te ta’ata hara, ’e e ’ore roa ’oia e fa’ati’a-noa-hia a’e.