1 I teienei, ’a ’ite ai Alama ē nō te mau parau a Amuleka i ha’amāmūhia ai Zeezeroma, i ’ite ho’i ’oia ē, ’ua ha’afifi Amuleka iāna i tāna ha’avarera’a ’e te tāmatara’a ho’i ’ia ha’apohe iāna, ’e te ’itera’a ho’i Alama ē, ’ua rurutaina ’oia i te ha’amana’ora’a i tāna ra hara, hāmama atu ra ’oia i tōna vaha ’e ’ua parau atu ra ’oia iāna, nō te fa’ati’a i te mau parau a Amuleka, ’e nō te ha’amāramarama atu ā, ’e nō te hōhora atu ho’i i te mau pāpa’ira’a mo’a ’ia rahi atu ā i tā Amuleka i ha’api’i atu.

2 I teienei, ’ua fa’aro’ohia e te mau ta’ata ē ’ati noa a’e te mau parau tā Alama i parau atu ia Zeezeroma ; e mea rahi roa te ta’ata, e teie tāna i parau atu :

3 I teienei, e Zeezeroma, ’ua ’itehia ho’i ’oe i roto i tā ’oe mau parau ha’avare ’e te ’ohipa tāviri ; ’aita ’oe i ha’avare i te ta’ata ana’e ra, ’ua ha’avare ato’a rā ’oe i te Atua ; inaha ho’i, ’ua ’ite ’oia i tō ’oe ato’a ra mau mana’o, ’e tē ’ite nei ho’i ’oe ē, ’ua fa’a’itehia mai tō ’oe nā mau mana’o ia māua nei nā roto i tōna ra Vārua ;

4 ’E tē ’ite nei ho’i ’oe ē, ’ua ’ite māua e mea ha’avarevare tā ’oe na ’ōpuara’a, mai te peu ha’avarevare a te diabolo, nō te ha’avare ’e nō te fa’ahema ho’i i teie nei mau ta’ata, ’ia ti’a ia ’oe ’ia fa’atupu i tō rātou riri ia māua, ’ia fa’a’ino mai rātou ia māua, ’e ’ia tīahi ’ē atu ho’i ia māua i rāpae—

5 I teienei, ’o tē ōpuara’a teie a tō ’oe enemi, ’e ’ua fa’a’ohipa ’oia i tōna mana i ni’a ia ’oe na. I teienei, tē hina’aro nei au ia ’oe ’ia ha’amana’o, i te parau ’o tā’u e parau atu nei ia ’oe na, tē parau atu nei ïa vau i te tā’āto’ara’a.

6 ’E inaha, tē parau atu nei au ia ’outou pā’āto’a, e mārei teie nā te ’enemi, ’o tāna i tu’u mai nō te haru i teie nei feiā, ’ia ti’a iāna ’ia ’ume ia ’outou i raro a’e iāna, ’ia ti’a iāna ’ia ru’uru’u ia ’outou i tāna ra mau fifi, ’ia ti’a iāna ’ia tā’amu ia ’outou i te fifi e tae atu ai i te pohe mure ’ore, mai te au i te mana nō tāna ra fa’atītīra’a.

7 I teienei, ’ia oti a’era tā Alama paraura’a i teie mau parau, ’ua rurutaina rahi roa ihora Zeezeroma, nō te mea ’ua ha’apāpū-roa-hia tōna mana’o i teie nei i te mana o te Atua ; ’e ’ua ha’apāpū-ato’a-hia ho’i tōna mana’o ē, ’ua fāri’i Alama ’e Amuleka i te ’ite i tōna huru, ’e ’ua ha’apāpūhia ho’i ’oia ē, ’ua ’ite ato’a rāua i te mau mana’o ’e te mau hina’aro o tōna ra ’ā’au ; ’e ’ua hōro’ahia te mana ia rāua ’ia ’ite i teie nei mau mea mai te au i te vārua nō te tohu.

8 ’E ’ua ha’amata ihora Zeezeroma i te uiui māite ia rāua, ’ia rahi atu ā tōna ’ite nō ni’a i te bāsileia o te Atua. ’E ’ua parau atu ra ’oia ia Alama : E aha te aura’a nō teie mea ’o tā Amuleka i parau iho nei nō ni’a i te ti’afa’ahoura’a o te feiā pohe ra, ’o tei nā ’ō mai ē, e ti’afa’ahou mai te mau ta’ata ato’a mai te pohe mai, te feiā parauti’a ’e te feiā parauti’a ’ore ato’a ho’i, e fa’ati’ahia rātou i mua i te Atua ’ia ha’avāhia mai te au i tā rātou mau ’ohipa ?

9 ’E i teienei, ’ua ha’amata ihora ’o Alama i te ha’amāramarama atu i teie nei mau mea iāna, i te nā-’ō-ra’a atu ē : ’Ua hōro’ahia i te mau ta’ata e rave rahi ’ia ’ite i te mau parau ’aro a te Atua ; ’ua hōro’ahia mai rā te reira ma te fa’aue pāpū maita’i, ’eiaha rātou e fa’a’ite noa atu, maori rā mai te au i te tufa’a nō tāna ra parau ’o tāna i hōro’a mai i te mau tamari’i a te ta’ata nei, mai te au i tō rātou itoito ’e te ’ana’anatae i te tītaura’a iāna.

10 ’E nō reira, ’o ’oia ’o tē fa’a’eta’eta i tōna ’ā’au, ’o ’oia ato’a ïa te fāri’i i te tufa’a iti nō te parau ; ’e ’o ’oia ’o tē ore e fa’a’eta’eta i tōna ’ā’au, e hōro’ahia ïa iāna te tufa’a rahi atu nō te parau, ē tae noa atu ’ua hōro’ahia iāna ’ia ’ite i te mau parau ’aro a te Atua ē tae noa atu ’ua ’ite ’oia i te ’īra’a nō te reira.

11 ’E ’o rātou ho’i ’o tē fa’a’eta’eta i tō rātou ’ā’au, e hōro’ahia ia rātou te tufa’a iti nō te parau ē tae noa atu ’aita rātou e ’ite fa’ahou i tāna ra mau parau ’aro ; ’e i reira rātou e rave-tītī-hia ai e te diabolo, ’e e arata’ihia ai ho’i e tōna ra hina’aro i raro i te pohe. I teienei, ’o te aura’a teie nō te mau fifi o hade ra.

12 ’E i parau pāpū atu na Amuleka nō ni’a i te pohera’a, ’e te fa’ati’a-fa’ahou-ra’a-hia mai o teie nei tino tāhuti ’ei tino tāhuti ’ore, ’e te hōpoira’ahia ho’i i mua i te ha’avāra’a a te Atua, ’ia ha’avāhia mai te au i tā tātou mau ’ohipa.

13 ’E mai te mea e fa’a’eta’etahia tō tātou ’ā’au, ’oia ïa, mai te mea e fa’a’eta’etahia tō tātou ’ā’au i te parau, ’e nō reira ’aita te reira i ’itehia i roto ia tātou, ’e i reira ’ua ’ino roa ïa tō tātou huru, ’e ’ei reira ho’i tātou e fa’ahapahia ai.

14 ’E nā tā tātou ho’i mau parau tātou e fa’ahapa mai, ’oia ïa, nā tā tātou mau ’ohipa ato’a tātou e fa’ahapa mai ; e ’ore roa tātou e ’itea ma te pōra’o ’ore ; ’e nā tō tātou mau mana’o ho’i tātou e fa’ahapa mai ; ’e i roto i teie huru ’ino tō tātou e ’ore e ti’a ia tātou ’ia hi’o atu i ni’a i tō tātou Atua ; ’e e ’oa’oa roa tātou mai te mea ē, e ti’a ia tātou ’ia parau atu i te mau mato ’e te mau mou’a ’ia ma’iri mai i ni’a iho ia tātou nō te huna ia tātou i tōna ra aro.

15 ’Aita rā teie e ti’a ; e mea ti’a ia tātou ’ia fa’ati’ahia ’e ’ia ti’a atu i mua i tōna ra hanahana, ’e i mua i tōna ra mana, ’e tōna ra pūai, te hinuhinu, ’e te hau, e fā’i atu i tō tātou ha’amā mure ’ore ē e mea parauti’a ana’e tāna ra mau ha’avāra’a ; ’e e mea parauti’a ’oia i roto i tāna ato’a ra mau ’ohipa, ’e te hāmani maita’i i te mau tamari’i a te ta’ata nei, ’e tei iāna te mana ato’a nō te fa’aora i te mau ta’ata ato’a e ti’aturi i tōna ra i’oa ’e ’o tē fa’atupu i te ’ohipa e au i te tātarahapa.

16 ’E i teienei, inaha, tē parau atu nei au ia ’outou, ’e i reira e tae mai ai te pohe, ’oia te pohe piti, ’oia ho’i te pohe pae vārua ; ’e ’o te ta’ata i pohe i roto i tāna ra mau hara, i te pohe tāhuti nei, e pohe ato’a ïa ’oia i te pohe pae vārua ; ’oia ïa, e pohe mau ’oia i te mau mea o te parauti’a.

17 ’E i reira e riro ai tō rātou mau ’ati rahi mai te roto auahi ’e te gopheri ra, tōna ura tē tae roa i ni’a ē a muri ē a muri noa atu ; ’e te reira tau e tā’amuhia ai rātou i te fifi i raro i te pohe mure ’ore, mai te au i te mana ’e te fa’atītīra’a a Sātane ra, ’e ’ua ha’avī ho’i ’oia ia rātou mai te au i tōna ra hina’aro.

18 ’E i reira, tē parau atu nei au ia ’outou na, e vai atu ā rātou mai te mea ra ē, ’aita roa e fa’aorara’a i ha’apa’ohia ; e ’ore roa ho’i rātou e fa’aorahia mai te au i tā te Atua ra parauti’a ; ’e ’aita roa ho’i rātou e pohe, nō te mea ’aita e mea tāhuti.

19 I teienei, i muri a’era, ’ia oti a’era tā Alama paraura’a i teie mau parau, ’ua rahi roa atu ra te māere o te mau ta’ata.

20 ’Āre’a rā tē vai ra te hō’ē ta’ata ’o Anetiona i reira, e tāvana rahi ’oia i rotopū ia rātou, ’e ’ua haere ti’a mai ra ’oia ’e ’ua parau mai ra iāna : E aha teie tā ’oe i parau iho nei, e ti’afa’ahou mai ānei te ta’ata mai te pohe mai, ’e ’a fa’arirohia ai teie nei tino tāhuti nei ’ei tino tāhuti ’ore, ’e e ’ore roa te vārua e pohe ?

21 E aha ho’i te aura’a nō te pāpa’ira’a mo’a ’o tei nā ’ō mai ē, ’ua tu’u ihora te Atua i te mau kerubi ’e te ’o’e ura i te pae hiti’a o te rā i te ’ō i Edene ra, ’o te tomo atu tō tātou nā metua mātāmua i roto ’e ’a rave ai i te mā’a nō te tumu rā’au nō te ora, ’e ’a ora noa ai ē a muri noa atu ? ’E nō reira ’ua ’ite tātou ē, ’aita roa e rāve’a e ora ai rāua ē a muri noa atu.

22 I teienei, ’ua parau atu ra Alama iāna : Teie te mea tā’u i fātata i te ha’amāramarama atu ia ’outou na. I teienei tē ’ite nei tātou ē ’ua hi’a Adamu nā roto i te ravera’a i te mā’a hotu i rāhuihia, mai te au i te parau a te Atua ; ’e nō reira tē ’ite nei tātou ē, nō tōna ra hi’ara’a i mo’e ai ’e i hi’a ai te mau ta’ata ato’a ra.

23 ’E i teienei, inaha, tē parau atu nei au ia ’outou na ē, ’āhiri ’ua ti’a ia Adamu ’ia rave noa atu i te mā’a nō te tumu rā’au nō te ora i taua taime ra, ’ua ’ore roa ïa te pohe, ’e ’ua ha’afaufa’a-’ore-hia te parau, ’e ’ua fa’arirohia ïa te Atua ’ei mea ha’avare, nō te mea i parau na ho’i ’oia ē : Mai te mea e ’amu ’oe i te reira, e pohe mau ā ïa ’oe.

24 ’E ’ua ’ite tātou ē, e tae mai te pohe i ni’a i te mau ta’ata ato’a, ’oia ïa, te pohe i parauhia e Amuleka, ’oia ho’i te pohe tāhuti ; ’āre’a rā ’ua hōro’ahia mai te hō’ē taime i te ta’ata ’ia ti’a iāna ’ia tātarahapa, nō reira i riro ai teie nei orara’a ’ei taime tāmatara’a ; ’e ’ei taime nō te fa’aineine ’ia fārerei atu i te Atua ; ’ei taime nō te fa’aneineine nō taua huru hope ’ore ra i parauhia e māua, ’e ’o tē tupu i muri iho i te ti’afa’ahoura’a o te feiā pohe ra.

25 I teienei, ’āhiri ē ’aita te ’ōpuara’a nō te fa’aorara’a, ’o tei ha’apa’ohia mai te ha’amatara’a mai ā o te ao nei, ’aita roa ïa e ti’afa’ahoura’a nō te feiā pohe ; ’āre’a rā tē vai ra te hō’ē ’ōpuara’a nō te fa’aorara’a i ha’apa’ohia, ’e nā te reira e fa’atupu i te ti’afa’ahoura’a o te feiā pohe ra, mai tei parauhia mai ra.

26 ’E i teienei, inaha, ’āhiri ’ua ti’a i tō tātou nā metua mātāmua ’ia haere atu ’e ’ia ’amu i tō te tumu rā’au nō te ora, tei roto ïa rāua i te ’ati mure ’ore, ’e ’aita tō rāua e taime fa’aineinera’a ; ’e nō reira ’ua morohi roa atu te ’ōpuara’a nō te fa’aorara’a, ’e ’ua fa’a’orehia ïa te parau a te Atua, ’e ’ua faufa’a ’ore ïa.

27 Inaha rā, ’aore i nā-reira-hia ; ’āre’a rā ’ua ha’apa’ohia te pohe nō te ta’ata ato’a ra ; ’e i muri iho i te pohe, e mea ti’a ia rātou ’ia ha’avāhia, ’e ’o taua ha’avāra’a ho’i ïa tā māua i parau na, ’e ’o te hope’a ïa.

28 ’E i muri iho i tō te Atua fa’ata’ara’a i teie mau mea ’ia tae mai i ni’a i te ta’ata, inaha, ’ua ’ite ihora ’oia ē, e mea ti’a roa i te ta’ata nei ’ia ’ite i te mau mea tāna i fa’ata’a nō rātou ra ;

29 Nō reira, ’ua tono mai ’oia i te mau melahi ’ia paraparau ia rātou, ’e ’ia fa’a’ite i te mau ta’ata i te hō’ē tufa’a nō tōna ra hanahana.

30 ’E ’ua ha’amata rātou mai te reira atu taime ’ia ti’aoro atu i tōna ra i’oa ; nō reira ’ua paraparau mai te Atua i te mau ta’ata, ’e ’ua fa’a’ite mai ia rātou i te ’ōpuara’a nō te fa’aorara’a, ’o tei fa’aineinehia mai te ha’amatara’a mai ā o te ao nei ; ’e ’ua fa’a’ite ’oia i teie ia rātou mai te au i tō rātou fa’aro’o ’e te tātarahapa, ’e tā rātou mau ’ohipa mo’a.

31 Nō reira, ’ua hōro’a mai ’oia i te mau fa’auera’a i te ta’ata nei, ’ua ’ōfati na ho’i rātou i te fa’auera’a mātāmua i tō te pae tāhuti nei, ’e ’ia riro ’ei mau atua, i te ’ite i te maita’i ’e te ’ino, i ti’a ai ia rātou ’ia rave noa atu, ’oia ho’i i ti’a ai ia rātou ’ia rave noa atu mai te au i tō rātou mau hina’aro ’e mau mana’o, ’ia rave i te mea ’ino ’e ’aore rā ’ia rave i te mea maita’i—

32 Nō reira ’ua hōro’a mai te Atua i te mau fa’auera’a ia rātou, i muri iho i tōna fa’a’itera’a mai ia rātou i te ’ōpuara’a nō te fa’aorara’a, ’e ’eiaha roa rātou e rave i te ’ino, te utu’a nō te reira ’o te pohe piti ïa, ’oia ho’i te pohe mure ’ore i te mau mea nō te parauti’a ; ’e ’aita tō te ’ōpuara’a nō te fa’aorara’a e mana i ni’a i te reira, nō te mea ’aita roa e ti’a i te mau ’ohipa nō te parauti’a ’ia ha’amouhia, mai te au i te maita’i fāito ’ore o te Atua.

33 ’Āre’a rā ’ua parau mai te Atua i te mau ta’ata nā roto i te i’oa o tāna ra Tamaiti, (’o teie ho’i te ’ōpuara’a nō te fa’aorara’a i ha’apa’ohia) i te nā-’ō-ra’a mai ē : Mai te mea e tātarahapa ’outou, ’e ’aita ’outou e fa’a’eta’eta i tō ’outou ’ā’au, ’ei reira vau e aroha atu ai ia ’outou, nā roto i tā’u ra Tamaiti fānau tahi ;

34 Nō reira, ’o te ta’ata e tātarahapa, ’e ’aita e fa’a’eta’eta i tōna ’ā’au, e fāri’i ’oia i te aroha nā roto i tā’u ra Tamaiti fānau tahi, ’e te ha’amatarara’a nō tāna ra mau hara ; ’e ’o rātou teie ’o tē ō mai i tō’u fa’aeara’a.

35 ’E ’o ’oia ’o tē fa’a’eta’eta i tōna ra ’ā’au ’e ’o tē rave noa i te mau ’ohipa ’ī’ino, inaha, tē tapu nei au i roto i tō’u nei riri ’ū’ana ē, e ’ore roa ’oia e ō mai i roto i tō’u nei fa’aeara’a.

36 ’E i teienei, e tō’u mau taea’e, inaha tē parau atu nei au ia ’outou na, mai te mea e fa’a’eta’eta ’outou i tō ’outou ’ā’au, e ’ore roa ïa ’outou e ō i roto i te fa’aeara’a o te Fatu ; nō reira, nā tā ’outou mau ’ohipa ’ī’ino i fa’atupu i te riri i roto iāna, ’e ’ua fa’atae mai ’oia i tōna riri ’ū’ana i ni’a iho ia ’outou mai te au i tā ’outou fa’atupura’a riri mātāmua, ’oia ïa, mai te au i tāna ra parau i te fa’atupura’a riri hope’a ’e tō te mātāmua ato’a ho’i, i te pohe mure ’ore o tō ’outou vārua ; nō reira, mai te au i tāna ra parau i te pohe hope’a, ’e tō te mātāmua ato’a ho’i.

37 ’E i teienei, e tō’u mau taea’e, i te mea ho’i ē, tē ’ite nei tātou i teie mau mea, ’e e parau mau ho’i te reira, ’ia tātarahapa tātou, ’e ’eiaha ’ia fa’a’eta’eta i tō tātou ’ā’au, ’e ’ia ’ore tātou ’ia fa’atae mai i te riri ’ū’ana o te Fatu tō tātou ra Atua i ni’a iho ia tātou i roto i teie, te piti nō tāna ra mau fa’auera’a ’o tāna i hōro’a mai ia tātou ; ’ia tomo rā tātou i roto i te fa’aeara’a o te Atua, ’o tei fa’aineinehia mai te au i tāna ra parau.