1 ’E i teienei, ’ua fa’auehia vau, ’o Alama, ’e te Atua ’ia rave au ia Amuleka ’e ’ia haere atu e a’o fa’ahou atu i taua feiā nei, ’e ’aore rā i te mau ta’ata e pārahi ra i te ’oire nō Amoniha, ’e i muri a’era, ’a ha’amata ai au i te a’o atu ia rātou, ’ua mārō mai ra rātou iā’u, nā ’ō mai ra :

2 ’O vai ’oe ? ’Ua mana’o ānei ’oe ē, e ti’aturi mātou i te ’itera’a pāpū o te hō’ē noa iho ta’ata, noa atu ā e a’o mai ’oia ia mātou ē, e mou te fenua nei ?

3 I teienei, ’aita rātou i māramarama i te mau parau tā rātou i parau, nō te mea ’aita rātou i ’ite ē, e mou iho ā ā te fenua nei.

4 ’E ’ua parau ato’a mai ra rātou : E’ita roa mātou e ti’aturi i tā ’oe mau parau mai te mea e tohu mai ’oe ē, e ha’amouhia teie nei ’oire rahi i te hō’ē ana’e iho mahana.

5 I teienei ’aita rātou i ’ite ē, e ti’a i te Atua ’ia rave i te mau ’ohipa māere mai te reira te huru ; nō te mea e feiā ’ā’au pa’ari rātou ’e e feiā ’ā’au ’eta’eta.

6 ’E ’ua parau mai ra rātou : ’O vai ho’i te Atua ’o tei ’ore i tono rahi mai i tāna ha’amanara’a, maori rā i te hō’ē ana’e ta’ata i rotopū i teie nei feiā, nō te fa’a’ite mai ia rātou i te parau mau nō taua mau mea rahi ’e te māere ra ?

7 ’E ’ua haere ti’a mai ra rātou nō te haru iā’u ; inaha rā, ’aita i ti’a ia rātou. ’E ’ua ti’a ihora vau ma te mata’u ’ore nō te a’o atu ia rātou, ’oia ïa, ’ua a’o māite atu vau ia rātou ma te mata’u ’ore, i te nā-’ō-ra’a atu ē :

8 Inaha, ’auē ho’i ’outou e te u’i parauti’a ’ore ’e te ha’api’o ē, nāhea i mo’e ai ia ’outou te mau peu tumu a tō ’outou mau metua ; ’oia ïa, ’ua mo’e ’oi’oi ia ’outou te mau fa’auera’a a te Atua.

9 ’Aita ānei ’outou i ha’amana’o ē, ’ua arata’ihia mai tō tātou metua tāne ’o Lehi mai Ierusalema mai e te rima o te Atua ? ’E ’aita ānei ’outou i ha’amana’o ē, ’ua arata’ihia rātou e ana nā roto i te mēdēbara ?

10 ’E ’ua mo’e vave ānei ia ’outou te mau tau e rave rahi tāna i fa’aora i tō tātou mau metua i te rima o tō rātou ra mau ’enemi, ’e i fa’aherehere ho’i ia rātou ’ia ’ore rātou ’ia ha’amouhia i te rima o tō rātou ihora mau taea’e ?

11 ’Oia ïa, ’e ’āhiri ’aita tōna mana fāito ’ore, ’e tōna aroha, ’e tōna fa’a’oroma’i ia tātou, ’ua tāpū-’ē-hia na ïa tātou mai ni’a atu i te fenua nei, hou roa i teie nei tau ; ’e e mea pāpū ato’a paha ē ’ua tu’uhia tātou i roto i te vāhi nō te mamae hope ’ore ’e te ’oto hope ’ore.

12 Inaha, i teienei tē parau atu nei au ia ’outou ē, ’ua fa’aue mai ’oia ia ’outou ’ia tātarahapa ; ’e ’ia ’ore ’outou ’ia tātarahapa, e ’ore roa ’outou e ō i te bāsileia o te Atua ra. Inaha rā, e ’ere ïa te reira ana’e—’ua fa’aue mai ’oia ia ’outou ’ia tātarahapa, ’e ’ia ’ore ’outou ’ia tātarahapa, e ha’amou roa ’oia ia ’outou mai ni’a atu i te fenua nei ; ’oia ïa, e tāho’o ’oia ia ’outou i tōna ra riri, ’e i roto i tōna riri rahi tāho’o e ’ore roa ’oia e fa’afāriu ’ē atu.

13 Inaha, ’aita ānei ’outou e ha’amana’o ra i te mau parau tāna i parau mai ia Lehi, i te nā-’ō-ra’a mai ē : Mai te mea e ha’apa’o ’outou i tā’u mau fa’auera’a, e manuia ïa ’outou i ni’a i te fenua nei ? ’E ’oia ato’a ’ua nā-’ō-hia mai ē : Mai te mea ē ’aita ’outou e ha’apa’o i tā’u mau fa’auera’a e tāpū-’ē-hia atu ïa ’outou i te aro o te Fatu.

14 I teienei, ’ua hina’aro vau ’ia ha’amana’o ’outou ē, nō te mea ’aita te mau ’āti Lamana i ha’apa’o i te mau fa’auera’a a te Atua, ’ua tāpū-’ē-hia rātou i te aro o te Fatu. I teienei tē ’ite nei tātou ē, ’ua tupu mau te parau a te Fatu i taua mea nei, ’e ’ua tāpū-’ē-hia atu te mau ’āti Lamana i tōna ra aro, mai te ha’amatara’a mai ā nō tā rātou mau ’ōfatira’a i te mau ture i ni’a i te fenua nei.

15 ’Āre’a rā, tē parau atu nei au ia ’outou, e ti’a ia rātou ’ia fa’a’oroma’i a’e ia ’outou i te mahana ha’avāra’a, mai te mea e vai noa ’outou i roto i tā ’outou mau hara, ’oia ïa, e ti’a ato’a ia rātou ’ia fa’a’oroma’i a’e ia ’outou i roto i teie nei orara’a, maori rā ’ia tātarahapa ’outou.

16 E rave rahi ho’i fafaura’a i fa’ataehia atu i te mau ’āti Lamana ; nō te mau peu tumu a tō rātou mau metua i pārahi noa ai rātou i roto i te pōiri ; nō reira e aroha mai te Fatu ia rātou ’e e ha’amaoro ho’i i tō rātou pu’e mahana i te fenua nei.

17 ’E tē vai ra te tau e riro ai rātou i te ti’aturi i tāna ra parau, ’e i te ’ite ho’i i te tano ’ore nō te mau peu tumu a tō rātou mau metua ; ’e e rave rahi ho’i tō rātou e fa’aorahia, ’e e aroha mai ho’i te Fatu i te mau ta’ata ato’a ’o tē ti’aoro atu i tōna ra i’oa.

18 Inaha rā, tē parau atu nei au ia ’outou, mai te mea e rave tāmau ā ’outou i tā ’outou mau ’ohipa ’ī’ino, e ’ore roa tō ’outou pu’e mahana e ha’amaorohia i ni’a i te fenua nei, e tonohia atu ho’i te mau ’āti Lamana nō te ’aro ia ’outou ; ’e ’ia ’ore ’outou ’ia tātarahapa, e tae mai ïa rātou i te hō’ē taime mana’o-’ore-hia e ’outou na, ’e e ro’ohia ’outou i te ha’amoura’a rahi roa ; ’e e tupu ho’i ïa te reira mai te au i te riri rahi tāho’o o te Fatu.

19 E’ita ho’i ’oia e fa’ati’a ia ’outou ’ia pārahi noa i roto i tā ’outou mau ’ohipa ’ī’ino, nō te ha’amou i tōna mau ta’ata. Tē parau atu nei au ia ’outou na ē, ’Aita roa ; e mea ti’a a’e iāna ’ia fa’ati’a atu i te mau ’āti Lamana ’ia ha’amou i tōna ato’a ra mau ta’ata ’o tei parauhia e mau ta’ata nō Nephi, mai te mea e topa atu rātou i roto i te hara ’e e ’ōfati i te ture, i muri a’e i tō rātou fāri’ira’a i te māramarama rahi ’e te ’ite rahi i hōro’ahia mai ia rātou e te Fatu tō rātou Atua.

20 ’Oia ïa, i muri a’e i tō rātou fa’arirora’ahia ’ei feiā ha’amaita’i-rahi-hia e te Fatu ; ’oia ïa, i muri a’e i tō rātou fa’arirora’ahia ’ei mea maita’i a’e i te tahi atu mau nūna’a, mau ’ōpū, mau reo, e mau ta’ata ; ’e i muri a’e ho’i i te fa’a’itera’ahia mai te mau mea ato’a ia rātou, i tei vai na, ’e tē vai nei, ’e tē vai ē a muri noa atu, mai te au i tō rātou mau hina’aro, ’e tō rātou fa’aro’o, ’e tā rātou ho’i mau pure.

21 I muri a’e i tō rātou fārereira’ahia mai e te Vārua o te Atua ; ’e i te paraparaura’a atu i te mau melahi, ’e i te paraura’ahia mai e te reo o te Fatu ; ’e i te fāri’ira’a ho’i i te vārua nō te tohu, ’e te vārua nō te heheura’a, ’e te mau hōro’a e rave rahi, ’oia ho’i te hōro’a nō te parau i te mau reo ’e’ē, ’e te hōro’a nō te a’o, ’e te hōro’a a te Vārua Maita’i, ’e te hōro’a nō te ’īriti i te parau.

22 ’Oia ïa, i muri a’e i tō rātou fa’aorara’ahia e te Atua i te fenua nō Ierusalema nā roto i te rima o te Fatu ; ’e i te fa’aorara’ahia i te o’e, ’e i te ma’ira’ahia, ’e te mau huru ma’i ato’a ; ’e i tō rātou fa’arirora’ahia ’ei feiā pūai i roto i te ’arora’a, ’ia ’ore rātou ’ia pau ; ’e i te arata’ira’ahia ho’i i rāpae i te fa’atītīra’a i terā tau i terā tau, ’e i te ha’apa’ora’ahia ’e i te fa’ahereherera’ahia ho’i rātou ē tae roa mai i teienei ; ’e i te ha’amanuiara’ahia ho’i rātou ē tae roa ’ua riro rātou ’ei feiā tao’a rahi i te mau mea ato’a ra—

23 ’E i teienei, inaha, tē parau atu nei au ia ’outou, mai te mea e hapa teie nei feiā, ’o tei fāri’i i te mau ha’amaita’ira’a e rave rahi nō ’ō mai i te rima o te Fatu ra, i te ravera’a i te mea au ’ore i te māramarama ’e te ’ite i roa’a mai ia rātou ra, tē parau atu nei au ia ’outou, mai te mea e nā reira rātou i te topa atu i roto i te hapa, e mea ti’a a’e te mau ’āti Lamana ia rātou.

24 Inaha ho’i, ’ua fa’ataehia te mau fafaura’a a te Fatu i te mau ’āti Lamana, ’e ’aita rā ia ’outou na mai te mea e ’ōfati ’outou i te ture ; ’e ’aita ānei ho’i te Fatu i fa’aue pāpū mai ’e i fa’aau māite mai i te parau ē, ’ia mārō atu ’outou iāna, e ha’amou-roa-hia ïa ’outou mai ni’a atu i te fenua nei ?

25 ’E i teienei, ’o teie te tumu, ’ia ’ore ’outou ’ia ha’amouhia, i tono mai ai te Fatu i tāna ra melahi i te tahi pae o tōna ra mau ta’ata, nō te fa’a’itera’a ia rātou ē, e mea ti’a ia rātou ’ia haere i mua ’e ’ia ti’aoro māite i teie nei feiā, i te nā-’ō-ra’a atu ē : ’A tātarahapa ’outou, tē fātata mai nei ho’i te bāsileia o te ao ra.

26 ’E ’aita i rahi te mahana toe e tae mai ai te Tamaiti a te Atua ma tōna ra hanahana ; ’e tōna hanahana ra, ’o te hanahana ïa o te Fānau tahi a te Metua, ’o tei ’ī i te maita’i, ’e te fāito ti’a, ’e te parau mau, ’e tei ’ī i te marū, ’e te aroha, ’e te fa’a’oroma’i, ’e te ’oi’oi i te fa’aro’o i te mau ti’aorora’a a tōna ra mau ta’ata ’e i te pāhono atu ho’i i tā rātou ra mau pure.

27 ’E inaha, e haere mai ’oia nō te fa’aora i te mau ta’ata ’o tē bāpetizohia nō te tātarahapara’a, nā roto i te fa’aro’o i tōna ra i’oa.

28 Nō reira, ’a fa’aineine ’outou i te ’ē’a o te Fatu, nō te mea tē fātata mai nei te tau e fāri’i ai te mau ta’ata ato’a i te utu’a nō tā rātou mau ’ohipa, mai te au i tā rātou ha’apa’ora’a—mai te mea e mea parauti’a rātou e fāri’i ïa rātou i te fa’aorara’a nō tō rātou vārua, mai te au i te mana ’e te fa’aorara’a a Iesu Mesia ; ’e mai te mea e mea vi’ivi’i rātou e fāri’i ïa rātou i te pohe i tō rātou vārua, mai te au i te mana ’e te fa’atītīra’a a te diabolo.

29 I teienei, inaha, ’o te reo teie o te melahi, i te ti’aorora’a i te mau ta’ata.

30 ’E i teienei, e tō’u mau taea’e here, e mau taea’e ho’i ’outou nō’u nei, ’e e mea ti’a ia ’outou ’ia herehia, ’e e mea ti’a ho’i ia ’outou ’ia rave i te mau ’ohipa e au nō te tātarahapa, nō te mea ’ua ’eta’eta roa ho’i tō ’outou ’ā’au i te parau a te Atua, ’e nō te mea ho’i e feiā mo’e ’e te hi’a ho’i ’outou.

31 I teienei, i muri a’era, ’ia parau atu vau, ’o Alama, i taua mau parau ra, inaha, ’ua riri roa mai ra te mau ta’ata iā’u, nō te mea ’ua parau atu vau ia rātou ē, e feiā ’ā’au pa’ari rātou ’e e feiā ’ā’au ’eta’eta.

32 ’E nō te mea ho’i ’ua parau atu vau ia rātou ē, e feiā mo’e ’e e feiā hi’a rātou, ’ua riri mai ra rātou iā’u, ’e ’ua tītau rātou ’ia haru iā’u, ’ia ti’a ia rātou ’ia huri atu iā’u i roto i te fare tāpe’ara’a.

33 ’Āre’a rā, i muri a’era, ’aita roa te Fatu i vaiiho ia rātou ’ia rave iā’u i taua taime ra ’e ’ia huri atu iā’u i roto i te fare tāpe’ara’a.

34 ’E i muri a’era, ’ua haere atu ra Amuleka ’e ’ua ti’a atu ra i mua, ’e ’ua ha’amata ihora i te a’o ato’a atu ia rātou. ’E i teienei, ’aita te mau parau ato’a a Amuleka i hope i te pāpa’ihia, ’ua pāpa’ihia rā te tahi tufa’a nō tāna ra mau parau i roto i teie nei buka.