1 ’E i teienei, i muri a’era, ’ia tae a’era i te ’ahuru ma hō’ē o te ’āva’e, nō te ’ahuru ma iva o te matahiti, i te ’ahuru o te mahana nō te ’āva’e, ’ua ’itehia te mau nu’u fa’ehau o te mau ’āti Lamana i te tāpirira’a mai i te fenua ra nō Amoniha.

2 ’E inaha, ’ua patu-fa’ahou-hia te ’oire, ’e ’ua ha’apārahi Moroni i te hō’ē nu’u fa’ehau i te mau ’ōti’a o te ’oire, ’e ’ua ha’apu’e ho’i rātou i te repo ē ’ati noa a’e nō te pāruru ia rātou i te mau te’a ’e te mau ’ōfa’i a te mau ’āti Lamana ; inaha ho’i, tē tama’i ra rātou ma te fa’a’ohipa i te mau ’ōfa’i ’e te mau te’a.

3 Inaha, ’ua parau na vau ē, ’ua patu-fa’ahou-hia te ’oire nō Amoniha. Tē parau atu nei au ia ’outou, ’oia ïa, ’ua patu-fa’ahou-hia te tahi tufa’a ; ’e nō te mea ’ua vāvāhi te mau ’āti Lamana i te reira i te hō’ē taime nō te mau ’ohipa ’ī’ino a te mau ta’ata, ’ua mana’o rātou ē, e mea ’ōhie ia rātou ’ia haru fa’ahou i te reira.

4 Inaha rā, ’ua māere roa rātou ; inaha ho’i, ’ua ’ō te mau ’āti Nephi i te repo nō te ’āua ha’a’ati ia rātou, ’e e mea teitei roa te reira ’e ’aita atu ra i ti’a i te mau ’āti Lamana ’ia ma’a mai i tā rātou mau ’ōfa’i ’e ’ia te’a mai i tā rātou mau te’a nō te ha’apēpē ia rātou, ’e ’aita ato’a i ti’a ia rātou ’ia haere mai e ’aro ia rātou, maori rā nā roto i tō rātou vāhi tomora’a mai.

5 I teienei, i teie taime, ’ua māere roa te mau ra’atira rahi o te mau ’āti Lamana, nō te ’aravihi o te mau ’āti Nephi i te fa’aineinera’a i tō rātou mau vāhi nō te pāruru ia rātou.

6 I teienei, ’ua mana’o te feiā fa’atere o te mau ’āti Lamana ē, nō te rahi o tō rātou mau ta’ata, ’oia ïa, ’ua mana’o rātou ē, e upo’oti’a rātou ’ia haere atu e ’aro i te mau ’āti Nephi mai tā rātou i nā reira i te mātāmua ra ; ’oia ïa, ’e ’ua hāmani ato’a rātou i te mau pāruru, ’e te mau pāruru ’ōuma ; ’e ’ua fa’aineine rātou nō rātou iho i te mau ’ahu ’iri ’ānimara, ’oia ïa, e mau ’ahu me’ume’u roa nō te tāpo’i i tō rātou tino vai taha’a noa.

7 ’E nō te mea ’ua fa’aineinehia mai te reira, ’ua mana’o ihora rātou ē, e ha’avī ’ōhie ’e e hōpoi tītī ’ōhie rātou i tō rātou mau taea’e i raro a’e i te zugo nō te fa’atītīra’a, ’e ’aore rā e taparahi ’ino ha’apohe roa ia rātou mai te au i tō rātou hina’aro.

8 Inaha rā, ’ua māere roa rātou i te mea ē ’ua ineine te mau ’āti Nephi nō te ’aro mai ia rātou, ’ia au i te huru ’o tei ’ore roa i ’itea na i rotopū i te mau tamari’i a Lehi. I teienei, ’ua ineine rātou nō te ’aro atu i te mau ’āti Lamana, ’ia au i te huru nō te mau arata’ira’a a Moroni.

9 ’E i muri a’era, ’ua māere roa te mau ’āti Lamana, ’oia ho’i te mau ’āti ’Amalikia i te huru nō tā rātou fa’aineinera’a nō te ’arora’a.

10 I teienei, ’āhiri te ari’i ’Amalikia i haere mai i raro i te fenua ra nō Nephi, ’ei upo’o fa’atere nō tōna nu’u fa’ehau, ’ua riro paha ïa ’oia i te fa’aue atu i te mau ’āti Lamana ’ia ’aro atu i te mau ’āti Nephi i te ’oire ra nō Amoniha, inaha ho’i, ’aita ’oia e tāu’a ra ’ia pohe tōna mau ta’ata.

11 Inaha rā, ’aita ’Amalikia iho i haere mai i raro nō te tama’i. ’E inaha, ’aita roa tōna mau ra’atira rahi i hina’aro ’ia ’aro atu i te mau ’āti Nephi i te ’oire ra nō Amoniha, nō te mea ’ua fa’ahuru ’ē Moroni i te fa’aterera’a i te mau ’ohipa i rotopū i te mau ’āti Nephi, ’e nō reira ho’i ’ua ’oto roa te mau ’āti Lamana nō tō rātou mau vāhi tāpunira’a, ’e ’aita ho’i i ti’a ia rātou ’ia haere atu e ’aro ia rātou.

12 Nō reira ’ua ’ōtohe atu ra rātou i roto i te mēdēbara, ’e ’ua hōpoi atu ra ho’i i tō rātou pūhapara’a, e haere atu ra nā te ’ē’a e tae atu ai i te fenua ra nō Noa, nō te mea ’ua mana’o rātou ē, ’o te reira te piti o te vāhi maita’i roa nō te haere atu e ’aro i te mau ’āti Nephi.

13 ’Aita ho’i rātou i ’ite ē, ’ua ha’apa’ari ’e ’ua hāmani Moroni i te mau ha’apūra’a i pāruru-maita’i-hia, nō te mau ’oire ato’a ē ’ati noa a’e te fenua ; nō reira, ’ua haere ti’a atu ra rātou i te fenua nō Noa ma te ’ōpuara’a pāpū ; ’oia ïa, ’ua haere mai ra tō rātou mau ra’atira rahi ma te tapu ē, e ha’amou rātou i te mau ta’ata o taua ’oire ra.

14 Inaha rā, ’ua māere roa rātou nō te mea e mea paruparu roa te ’oire nō Noa i te mātāmua, ’e i teienei nā roto i te mau rāve’a a Moroni, ’ua riro te reira ’ei mea pa’ari roa ; ’oia ïa, ’ua hau tōna pa’ari i tō te ’oire nō Amoniha.

15 ’E i teienei, inaha, tei roto ia Moroni te pa’ari ; ’e ’ua mana’o ho’i ’oia ē, e mata’u rātou i te ’oire ra nō Amoniha ; ’e nō te mea ’o te ’oire ra nō Noa te tufa’a paruparu roa a’e o te fenua i te mātāmua, nō reira e haere atu rātou i reira nō te ’aro atu ; ’e nō reira ’ua tupu mau atu ra mai te au i tōna mau hina’aro.

16 ’E inaha, ’ua mā’iti Moroni ia Lehi ’ei ra’atira rahi i ni’a i te mau ta’ata i taua ’oire ra ; ’e ’o taua iho ā Lehi tei aro atu i te mau ’āti Lamana i roto i te peho nō te hiti’a o te rā i te ’ānāvai ra Sidona.

17 ’E i teienei, inaha, i muri a’era, ’ia ’ite a’era te mau ’āti Lamana ē, ’o Lehi te ra’atira rahi o taua ’oire ra, ’ua ’oto fa’ahou ihora rātou, nō te mea ’ua rahi tō rātou mata’u ia Lehi ; ’āre’a rā ’ua hōreo tō rātou mau ra’atira rahi ma te tapu ’ia haru atu i taua ’oire ra ; nō reira, ’ua ’āfa’i atu rātou i tō rātou mau nu’u fa’ehau.

18 I teienei, inaha, ’aita roa i ti’a i te mau ’āti Lamana ’ia tomo nā te tahi vāhi ’ē atu i roto i tō rātou mau ha’apūra’a i pāruru-maita’i-hia, maori rā nā roto i te ’ūputa tomora’a, nō te teitei o te ’āua i patuhia, ’e te hōhonu ho’i o te ’āpo’o i heruhia ē ’ati noa a’e, maori rā nā te ’ūputa.

19 ’E ’ua nā reira te mau ’āti Nephi i te fa’aineine nō te ha’amou i te mau ta’ata ato’a e tāmata i te pa’uma i ni’a nō te tomo mai i roto i te ha’apūra’a ’eiaha nā te tahi atu ’ē’a, nā roto i te ma’ara’a i te mau ’ōfa’i ’e te te’ara’a i te mau te’a i ni’a ia rātou.

20 ’E nō reira ’ua ineine rātou, ’oia ïa, te tahi pae o tō rātou mau ta’ata pūai roa, ’e tā rātou mau ’o’e ’e tā rātou mau ma’a, nō te taparahi i te mau ta’ata ato’a e tāmata i te tomo mai i roto i tō rātou vāhi ha’apūra’a nā te ’ūputa ; ’e nō reira ’ua ineine rātou nō te pāruru ia rātou iho i te mau ’āti Lamana.

21 ’E i muri a’era ’ua arata’i mai ra te mau ra’atira o te mau ’āti Lamana i tō rātou mau nu’u fa’ehau i mua i te vāhi tomora’a, ’e ’ua ha’amata ihora i te ’aro atu i te mau ’āti Nephi, nō te tomo atu i roto i tō rātou vāhi pāruru-maita’i-hia ; inaha rā, ’ua tūra’ihia rātou i muri i terā taime ’e i terā taime, ’e nō reira e rave rahi rātou tei taparahihia.

22 I teienei, ’ia ’ite a’era rātou ē, ’aita rātou e upo’oti’a ’ia ha’avī i te mau ’āti Nephi nā te ’ūputa, ’ua ha’amata ihora rātou i te ha’apararī i te ’āua repo, ’ia ti’a ia rātou ia fa’atomo i tō rātou mau nu’u fa’ehau, ’ia ’aifāito tō rātou ti’ara’a i tō te mau ’āti Nephi nō te tama’i ; inaha rā, i roto i teie mau tāmatara’a, ’ua pau ïa rātou i te mau ’ōfa’i i patahia mai ’e i te mau te’a i te’ahia mai i ni’a ia rātou ; ’aita rātou i fa’a’ī i te mau ’āpo’o nā roto i te repo nō te ’āua tā rātou e ha’apararī ra, ’ua ’ī rā te reira i tō rātou mau tino pohe ’e tei puta ra.

23 ’E ’ua roa’a te mana ato’a i te mau ’āti Nephi i ni’a i tō rātou mau ’enemi ; ’ua nā reira noa te mau ’āti Lamana i te tāmata i te ha’amou i te mau ’āti Nephi ē tae noa atu ’ua taparahihia tō rātou mau ra’atira rahi ato’a ; ’oia ïa, ’ua hau atu i te tauatini o te mau ’āti Lamana i taparahihia ; ’āre’a rā te mau ’āti Nephi, ’aita roa te hō’ē ’o rātou i taparahihia.

24 ’Ua fātata i te pae ’ahuru tei pēpē ’e tei puta i te mau te’a a te mau ’āti Lamana i te ’ūputa, ’āre’a rā ’ua pāruruhia rātou ’e tā rātou mau pāruru, ’e tā rātou mau pāruru ’ōuma, ’e tā rātou mau pāruru upo’o, ’e nō reira ’ua puta tō rātou ’āvae ana’e, ’e e mea ’ino roa te tahi pae o te mau puta.

25 ’E i muri a’era, ’ia ’ite a’era te mau ’āti Lamana ē, ’ua taparahihia tō rātou mau ra’atira rahi, ’ua horo atu ra rātou i roto i te mēdēbara. ’E i muri a’era, ’ua ho’i atu ra rātou i te fenua ra nō Nephi, nō te fa’a’ite atu i te ari’i ra ia ’Amalikia, e ’āti Nephi ho’i ’oia i te fānaura’ahia, i tō rātou pau rahi.

26 ’E i muri a’era, ’ua riri roa ihora ’oia i tōna ra mau ta’ata, nō te mea ’aita i roa’a te mea tāna i hina’aro i ni’a i te mau ’āti Nephi ; ’aita ho’i ’oia i manuia ’ia tu’u ia rātou i raro a’e i te zugo nō te fa’atītīra’a.

27 ’Oia ïa, ’ua riri roa ’oia, ’e ’ua tuhi atu ra ho’i ’oia i te Atua ’e ia Moroni ato’a ho’i, ’e ’ua hōreo ’oia ma te tapu ē, e inu ’oia i tōna toto ; ’e ’ua nā reira ’oia nō te mea ’ua ha’apa’o Moroni i te mau fa’auera’a a te Atua i te fa’aineinera’a ’ia pāruruhia tōna ra mau ta’ata.

28 ’E i muri a’era, ’ua ha’amāuruuru te mau ’āti Nephi i te Fatu tō rātou Atua, nō tōna mana fāito ’ore i te fa’aorara’a ia rātou i te rima o tō rātou mau ’enemi.

29 ’E ’ua hope a’era te ’ahuru ’e ma iva o te matahiti nō te fa’aterera’a a te mau ha’avā i ni’a i te mau ta’ata o Nephi.

30 ’Oia ïa, ’e ’ua vai noa te hau i rotopū ia rātou, ’e ’ua tupu te manuia rahi i roto i te ’ēkālesia nō tō rātou itoito ’e te ha’apa’o maita’i i te ha’apa’ora’a i te parau a te Atua, ’o tei fa’a’itehia mai ia rātou e Helamana, e Sibelona, e Korianetona, e Amona, ’e e tōna ra mau taea’e, ’oia ïa, ’e nā roto i te mau ta’ata ato’a ho’i ’o tei fa’atōro’ahia e te fa’anahora’a mo’a a te Atua ra, ’e tei bāpetizohia nō te tātarahapara’a, ’e tei tonohia ho’i nō te a’o atu i rotopū i te mau ta’ata.