1 ’E i teienei, i muri a’era, i te piti ’ahuru ’e ma ono o te matahiti nō te fa’aterera’a a te mau ha’avā i ni’a i te mau ta’ata o Nephi, inaha, ’ia ara a’era te mau ’āti Lamana i te po’ipo’i mātāmua nō te ’āva’e mātāmua, inaha, ’ua ’ite a’era rātou ē, ’ua pohe roa ’Amalikia i roto i tōna ihora ti’ahapa ; ’e ’ua ’ite ato’a rātou ē, ’ua ineine Teanekuma nō te haere mai e ’aro ia rātou i taua mahana ra.

2 ’E i teienei, ’ia ’ite a’era te mau ’āti Lamana i te reira, ’ua mata’u roa ihora rātou ; ’e ’ua fa’a’ore ihora rātou i tā rātou ’ōpuara’a nō te haere ti’a atu i te fenua i te pae apato’erau, ’e ’ua ’ōtohe atu ra rātou ’e tō rātou mau nu’u fa’ehau ato’a i te ’oire ra nō Muleka, ’ia pāruruhia rātou i roto i tō rātou mau pā pa’ari.

3 ’E i muri a’era, ’ua mā’itihia te taea’e o ’Amalikia ’ei ari’i i ni’a i te mau ta’ata, ’e ’o Amorona tōna i’oa ; nō reira ’ua mā’itihia te ari’i ra o Amorona, ’oia te taea’e o te ari’i ra o ’Amalikia, nō te fa’atere ’ei mono nōna.

4 ’E i muri a’era, ’ua fa’aue atu ra ’oia, ’ia tāpe’a noa tōna mau ta’ata i te mau ’oire i haruhia e rātou nā roto i te ha’amani’ira’a toto ; ’aore ho’i rātou i haru mai i te hō’ē ’oire, maori rā ’ua pau rahi tō rātou toto.

5 ’E i teienei, ’ua ’ite ihora Teanekuma ē ’ua ’ōpua te mau ’āti Lamana ’ia tāpe’a noa i taua mau ’oire ra i haruhia mai e rātou, ’e taua mau tufa’a o te fenua ra i noa’a ia rātou, ’e i tōna ’itera’a atu i te rahi o tō rātou mau ta’ata, ’ua mana’o ihora Teanekuma e mea faufa’a ’ore ’ia tāmata i te ’aro atu ia rātou i roto i tō rātou mau ha’apūra’a.

6 ’Āre’a rā ’ua tāpe’a noa ’oia i tōna mau ta’ata i reira, mai te mea ra ē, tē fa’aineine ra ’oia nō te tama’i ; ’oia ïa, ’e ’oia mau tē fa’aineine ra ’oia nō te pāruru iāna iho ia rātou ra, nā roto i te hāmanira’a i te mau ’āua ē ’ati noa a’era, ’e te fa’aineinera’a i te mau vāhi ha’apūra’a.

7 ’E i muri a’era, ’ua nā reira noa ’oia i te fa’aineine nō te tama’i, ē tae noa atu ’ua tono mai Moroni e rave rahi mau ta’ata nō te ha’apūai i tōna ra nu’u fa’ehau.

8 ’E ’ua fa’atae ato’a mai ra Moroni i te mau fa’auera’a iāna, ’ia tāpe’a noa ’oia i te feiā mau-’āuri ato’a e ma’iri mai i roto i tōna rima ; nō te mea ’ua tāpe’a te mau ’āti Lamana e rave rahi mau ta’ata ’ei feiā mau-’āuri, e mea ti’a iāna ’ia tāpe’a ato’a i te mau mau-’āuri ato’a o te mau ’āti Lamana ’ei ho’o nō rātou ’o tei tāpe’ahia ’e te mau ’āti Lamana.

9 ’E ’ua fa’atae ato’a mai ra ’oia i te mau fa’auera’a iāna ’ia ha’apa’ari ’oia i te fenua ra nō ’Auhune, ’e ’ia rave mai ho’i i te fenua iti oaoa, ē tae atu ai i te fenua ra i te pae apato’erau, ’o te roa’a taua vāhi ra i te mau ’āti Lamana ’e ’o te roa’a ato’a te pūai ia rātou nō te ha’ape’ape’a mai ia rātou nā te mau pae ato’a ra.

10 ’E ’ua fa’aue ato’a mai ra Moroni iāna, ma te hina’aro iāna ’ia ha’apa’o maita’i ’oia i taua pae o te fenua ra, ’e ’ia ’imi ’oia i te mau rāve’a ato’a nō te ha’apau i te mau ’āti Lamana i taua vāhi ra, mai te au i tōna mana, penei a’e ’o te roa’a fa’ahou iāna nā roto i te rāmā ’e ’aore rā nā roto i te tahi rāve’a ’ē atu, taua mau ’oire ra i haruhia mai roto mai i tō rātou mau rima ; ’e ’ia pāruru ato’a ’e ’ia ha’apūai ho’i ’oia i te mau ’oire ē ’ati noa a’e, ’o tei ’ore i riro i roto i te rima o te mau ’āti Lamana.

11 ’E ’ua parau ato’a atu ’oia iāna : E haere ato’a atu vau ia ’oe na, inaha rā, tē aro nei te mau ’āti Lamana ia mātou i te mau ’ōti’a nō te fenua i te pae miti i te pae tō’o’a o te rā ; ’e inaha, e haere atu vau e ’aro atu ia rātou, nō reira ’aita e ti’a iā’u ’ia haere atu ia ’oe na.

12 I teienei, ’ua fa’aru’e atu te ari’i (Amorona) i te fenua ra nō Zarahemela, ’e ’ua fa’a’ite atu ’oia i te ari’i vahine nō ni’a i te pohe o tōna ra taea’e, ’e ’ua ha’aputuputu ’oia i te mau ta’ata e rave rahi, ’e ’ua haere ti’a atu rātou e ’aro i te mau ’āti Nephi i te mau fenua i te pae miti nō te pae tō’o’a o te rā.

13 ’E ’ua nā reira ’oia i te tāmata i te ha’ape’ape’a i te mau ’āti Nephi, ’e i te huti i te tahi pae o tō rātou nu’u fa’ehau ’ia haere i taua pae o te fenua ra, ’e ’ua fa’aue atu ra ’oia i te mau ta’ata i vaiihohia i te mau ’oire i haruhia mai e ana, ’ia ha’ape’ape’a ato’a atu rātou i te mau ’āti Nephi i te mau fenua i te pae miti nō te pae hiti’a o te rā ; ’e ’ia haru rātou i tō rātou mau fenua mai te au i tō rātou mana, ’e mai te au i te mana o tō rātou mau nu’u fa’ehau.

14 ’E mai te reira te huru nō te mau ’ati rahi i fāri’ihia e te mau ’āti Nephi i te hope’a nō te piti ’ahuru ’e ma ono matahiti nō te fa’aterera’a a te mau ha’avā i ni’a i te mau ta’ata o Nephi.

15 Inaha rā, i muri a’era, ’ia tae a’era i te piti ’ahuru ’e ma hitu o te matahiti nō te fa’aterera’a a te mau ha’avā, ’ua fa’anahonaho Moroni i te mau nu’u fa’ehau ’ia pāruru i nā ’ōti’a o taua fenua ra i te pae apato’a ’e te pae tō’o’a o te rā, ’e ’ua ha’amata ihora ’oia i te haere atu i te fenua ra nō ’Auhune, ’ia ti’a iāna ’e tōna mau ta’ata ’ia tauturu atu ia Teanekuma ’ia haru fa’ahou mai i te mau ’oire i haruhia atu mai ia rātou ra—

16 ’E i muri a’era, ’ua fāri’i Teanekuma i te mau fa’auera’a ’ia ’aro atu i te ’oire ra nō Muleka, ’e ’ia haru fa’ahou mai i te reira mai te mea e ti’a ’ia nā reira.

17 ’E i muri a’era, ’ua fa’aineine ihora Teanekuma nō te ’aro atu i te ’oire ra nō Muleka, ’e ’ia haere ti’a atu e ’aro i te mau ’āti Lamana ; ’āre’a rā ’ua ’ite ’oia ē, ’aita roa e ti’a iāna ’ia ha’avī atu ia rātou ’a pārahi ai rātou i roto mai i tō rātou mau pā pa’ari ; nō reira ’ua fa’a’ore ihora ’oia i tāna mau ’ōpuara’a ’e ’ua ho’i fa’ahou mai ra i te ’oire ra nō ’Auhune, nō te tīa’i i te taera’a mai o Moroni, ’ia ti’a iāna ’ia fāri’i i te pūai nō tōna ra nu’u fa’ehau.

18 ’E i muri a’era, ’ua tae mai ra Moroni ’e tōna nu’u fa’ehau i te fenua ra nō ’Auhune, i te pae hope’a nō te piti ’ahuru ’e ma hitu matahiti nō te fa’aterera’a a te mau ha’avā i ni’a i te mau ta’ata o Nephi.

19 ’E i te ha’amatara’a nō te piti ’ahuru ’e ma va’u matahiti, ’ua fa’atupu ’o Moroni rāua ’o Teanekuma ’e te mau ra’atira rahi e rave rahi i te hō’ē ’āpo’ora’a ’arora’a—nō ni’a i te mau mea tā rātou e rave nō te fa’ahaere mai i te mau ’āti Lamana e ’aro ia rātou ; ’e ’aore rā ’ia ti’a ia rātou ’ia ha’avarevare atu ia rātou ’ia haere mai i rāpae i tō rātou mau ha’apūra’a pa’ari, ’ia ti’a ia rātou ’ia upo’oti’a i ni’a a’e ia rātou ’e ’ia haru fa’ahou mai i te ’oire ra nō Muleka.

20 ’E i muri a’era, ’ua tono atu ra rātou i te tahi mau ve’a i te nu’u fa’ehau o te mau ’āti Lamana, ’o tei pāruru i te ’oire ra nō Muleka, ’oia ho’i i tō rātou ta’ata fa’atere o Iakoba tōna i’oa, ’e ’ua tītau atu ra iāna ’ia haere mai ’oia e tōna mau nu’u fa’ehau i rāpae nō te ’aro mai ia rātou i ni’a i te mau fenua pāpū, i rōpū i nā ’oire e piti ra. Inaha rā, ’aita roa ’o Iakoba, te hō’ē ta’ata ’āti Zorama, i haere mai i rāpae ’e tōna nu’u fa’ehau nō te ’aro mai ia rātou i ni’a i te mau fenua pāpū.

21 ’E i muri a’era, nō te mea ’aita Moroni i manuia nō te ’aro atu ia rātou i ni’a i te hō’ē vāhi pāpū maita’i, nō reira ’ua fa’atupu ihora ’oia i te hō’ē ’ōpuara’a nō te fa’ahaere mai i te mau ’āti Lamana i rāpae i tō rātou mau ha’apūra’a pa’ari.

22 Nō reira, ’ua fa’aue atu ra ’oia ia Teanekuma ’ia rave i te tahi pae iti o te mau ta’ata ’e ’ia haere atu i raro ma te ha’afātata i te pae miti ; ’e i te pō ’ua haere atu Moroni ’e tōna nu’u fa’ehau i roto i te mēdēbara i te pae tō’o’a o te rā nō te ’oire ra nō Muleka ; ’e ’ia po’ipo’i a’e, ’ia ’ite mai te mau tīa’i o te mau ’āti Lamana ia Teanekuma, ’ua horo atu ra rātou, ’e ’ua fa’a’ite atu ra ia Iakoba, tō rātou ta’ata fa’atere.

23 ’E inaha, ’ua haere mai ra te mau nu’u fa’ehau o te mau ’āti Lamana e ’aro mai ia Teanekuma, i mana’o ho’i rātou ē, nō tō rātou rahi e vī Teanekuma ia rātou nō te mea e mea iti rātou. ’E ’ia ’ite atu ra Teanekuma i te mau nu’u fa’ehau o te mau ’āti Lamana i te haerera’a mai nō te ’aro iāna, ’ua ha’amata ’oia i te ’ōtohe atu i raro i te hiti o te miti, i te pae apato’erau.

24 ’E i muri a’era, ’ia ’ite a’era te mau ’āti Lamana iāna i te ’ōtohera’a, ’ua itoito ihora rātou ’e ’ua tāpapa mai ra ia rātou ma te pūai. ’E ’a arata’i ’ē atu ai Teanekuma i te mau ’āti Lamana i tāpapa noa mai ia rātou ma te faufa’a ’ore, inaha, ’ua fa’aue atu ra Moroni i te tahi pae o tōna ra nu’u fa’ehau i pīha’i iho iāna ra ’ia haere atu i roto i te ’oire ’e ’ia haru mai i te reira.

25 ’E ’ua nā reira rātou, ’e ’ua taparahi i te mau ta’ata ato’a i vaiihohia mai nō te pāruru i te ’oire ; ’oia ïa, i te mau ta’ata ato’a ’o tē ’ore e fa’aru’e i tā rātou mau mauha’a tama’i.

26 E mea nā reira te roa’ara’a mai te ’oire nō Muleka ia Moroni ’e i te tahi pae o tōna ra nu’u fa’ehau, ’a haere atu ai ’oia ’e te toe’a o tōna nu’u fa’ehau nō te ’aro i te mau ’āti Lamana ’a ho’i mai ai rātou mai tā rātou a’ua’ura’a ia Teanekuma.

27 ’E i muri a’era, ’ua a’ua’u atu ra te mau ’āti Lamana ia Teanekuma ē tae noa atu ’ua fātata rātou i te ’oire nō ’Auhune, ’e i muri iho ’ua ’arohia mai rātou e Lehi ’e te tahi nu’u fa’ehau iti i vaiihohia nō te pāruru i te ’oire ra nō ’Auhune.

28 ’E i teienei, inaha, ’ia ’ite a’era te mau ra’atira rahi o te mau ’āti Lamana ia Lehi ’e tōna nu’u fa’ehau i te haerera’a mai nō te ’aro ia rātou, ’ua horo ’ē atu ra rātou ma te ’āhuehue rahi, ma te pe’ape’a ’o te ’ore te ’oire nō Muleka e roa’a ia rātou nā mua rātou e roa’ahia ai ia Lehi ; ’e ’ua rohirohi ho’i rātou nō tō rātou haere-noa-ra’a, ’āre’a rā te mau ta’ata o Lehi ra ’ua itoito ïa rātou.

29 I teienei, ’aita te mau ’āti Lamana i ’ite ē, tei muri mai ia rātou ’o Moroni ’e tōna nu’u fa’ehau ; ’e ’o tā rātou i mata’u ’o Lehi ïa ’e tōna mau ta’ata.

30 I teienei, ’aita Lehi i hina’aro ’ia roa’a rātou iāna ē tae roa atu ’ua fārerei rātou ia Moroni ’e tōna nu’u fa’ehau.

31 ’E i muri a’era, nā mua te mau ’āti Lamana i ’ōtohe ai i muri roa, ’ua ha’a’atihia rātou e te mau ’āti Nephi, ’e te mau ta’ata o Moroni i te hō’ē pae, ’e te mau ta’ata o Lehi i te tahi pae, ’e ’ua itoito ’e ’ua pūai maita’i ho’i rātou ato’a i reira ; ’āre’a rā te mau ’āti Lamana, ’ua rohirohi ïa rātou nō te maoro o tō rātou haere-noa-ra’a.

32 ’Ua fa’aue atu ra Moroni i tōna mau ta’ata ’ia ’aro atu ia rātou ē tae roa atu ’ua hōro’a mai rātou i tā rātou mau mauha’a tama’i.

33 ’E i muri a’era, ’ua arata’i mai ra Iakoba, tō rātou ta’ata fa’atere, e ’āti Zorama ’oia, ’e e ta’ata ’ā’au vī ’ore ho’i, i te mau ’āti Lamana ma te riri ’ū’ana nō te ’aro mai ia Moroni.

34 Nō te mea tei mua iho Moroni ia rātou i tō rātou ’ē’a haerera’a, nō reira ’ua ’ōpua ihora Iakoba ’ia taparahi ia rātou, ’e ’ia rave i taua ’ē’a ra e tae atu ai i te ’oire ra nō Muleka. Inaha rā, e mea pūai roa a’e Moroni ’e tōna mau ta’ata ; nō reira ’aita roa atu rātou i ’ōtohe i mua i te mau ’āti Lamana.

35 ’E i muri a’era, ’ua ’aro ihora rātou nā pae e piti ato’a ra ma te riri ’ū’ana rahi ; ’e e rave rahi tei taparahihia i nā pae e piti ato’a ra ; ’oia ïa, ’e ’ua puta ihora Moroni ’e ’ua taparahi-pohe-roa-hia ihora Iakoba.

36 ’E ’ua ’aro mai ra Lehi ’e tōna mau ta’ata pūai ia rātou nā te pae i muri ma te riri ’ū’ana rahi, ’e ’ua hōpoi mai ra te mau ’āti Lamana nō te pae i muri i tā rātou mau mauha’a tama’i ; ’e nō te ’āhuehue rahi ’aita atu ra te toe’a ’o rātou i ’ite ē, e horo ānei rātou ’e ’aore rā e ’aro atu ānei rātou.

37 I teienei, i tō Moroni ’itera’a i tō rātou ’āhuehue, ’ua nā ’ō atu ra ’oia ia rātou : Mai te mea e hōpoi mai ’outou i tā ’outou mau mauha’a tama’i, inaha, e fa’aea mātou i te ha’amani’i i tō ’outou toto i reira.

38 ’E i muri a’era, ’ia fa’aro’o a’era te mau ’āti Lamana i teie mau parau, ’ua haere mai ra tō rātou mau ra’atira rahi ato’a ’o tei ’ore i taparahihia, ’e ’ua taora mai ra i tā rātou mau mauha’a tama’i i raro i te pae ’āvae o Moroni, ’e ’ua fa’aue ato’a atu ra i tō rātou mau ta’ata ’ia nā reira ato’a.

39 Inaha rā, e rave rahi tei ’ore i nā reira ; ’e ’o rātou ’o tei ’ore i hōpoi mai i tā rātou mau ’o’e, ’ua haruhia ’e ’ua ruru’uhia rātou, ’e ’ua ravehia ho’i tā rātou mau mauha’a tama’i mai ia rātou mai, ’e ’ua ha’avīhia rātou ’ia haere nā muri i tō rātou mau taea’e i te fenua ra nō ’Auhune.

40 ’E i teienei, ’ua rahi atu te feiā mau-’āuri i noa’a mai i tei taparahihia ; ’oia ïa, ’ua rahi atu rātou i tei pohe i nā pae e piti ato’a ra.