1 ’E i muri a’era, ’ua fa’aea ihora rātou ’e ’ua fa’anu’u ri’i mai ra i muri mai ia rātou ra. ’E ’ua parau atu ra Moroni ia Zerahemana : Inaha, e Zerahemana, ’aita mātou i hina’aro ’ia riro ’ei mau ta’ata ha’amani’i toto. Tē ’ite nei ’outou ē, tei roto ’outou i tō mātou nei rima, ’aita rā mātou i hina’aro ’ia taparahi ia ’outou.

2 Inaha, ’aita mātou i haere mai nō te ’aro atu ia ’outou nō te ha’amani’i i tō ’outou toto ’ia roa’a te mana ia mātou ; ’aita ato’a ho’i mātou i hina’aro ’ia ’ume ia ’outou i raro a’e i te zugo nō te fa’atītīra’a. ’O te tumu ho’i teie i haere mai ai ’outou nō te ’aro ia mātou nei ; ’oia ïa, ’e ’ua riri ’outou ia mātou nō tā mātou fa’aro’o.

3 ’E i teienei, tē ’ite nei ’outou ē, tei pīha’i iho te Fatu ia mātou ; ’e tē ’ite nei ho’i ’outou ē, ’ua tu’u mai ’oia ia ’outou i roto i tō mātou nei rima. ’E i teienei, tē hina’aro nei au ’ia ’ite ’outou ē, ’ua nā-reira-hia mātou nō tā mātou ha’apa’ora’a ’e tō mātou fa’aro’o i te Mesia. ’E i teienei, tē ’ite nei ’outou ē, ’aita roa e ti’a ia ’outou ’ia fa’a’ore i tō mātou nei fa’aro’o.

4 I teienei, tē ’ite nei ’outou ē, ’o te Atua te tumu nō teie fa’aro’o mau ; ’oia ïa, tē ’ite nei ’outou ē, e pāturu te Atua ia mātou, ’e e tīa’i, ’e e fa’aherehere ho’i ’oia ia mātou, mai te mea e ha’apa’o maita’i mātou i tōna hina’aro, ’e i tō mātou fa’aro’o, ’e i tā mātou ha’apa’ora’a ; ’e ’aita roa te Fatu e fa’aru’e noa ia mātou ’ia ha’amouhia, maori rā ’ua topa mātou i roto i te hara ’e ’ua huna i tō mātou fa’aro’o.

5 ’E i teienei, e Zerahemana, tē fa’aue atu nei au ia ’oe, nā roto te i’oa o taua Atua manahope ra, ’o tei ha’apūai i tō mātou mau rima ’ia roa’a ia mātou te mana i ni’a iho ia ’outou, nā roto i tō mātou fa’aro’o, ’e tā mātou ha’apa’ora’a, ’e tā mātou mau rāve’a ha’amorira’a, ’e tā mātou ’ēkālesia, ’e te pāturura’a mo’a tei au ia mātou ’ia fa’a’ite i tā mātou mau vahine ’e tā mātou mau tamari’i, ’e i taua ti’amā ra tei tā’amu ia mātou i tō mātou mau fenua ’e tō mātou nūna’a ; ’oia ïa, ’e ’oia ato’a nā roto i te fa’ahereherera’a i te parau mo’a a te Atua, ’e nō reira mai tō mātou ’oa’oa ato’a ; ’e i te mau mea ato’a i here-rahi-hia e mātou—

6 ’Oia ïa, e ’ere te reira ana’e ; tē fa’aue atu nei au ia ’outou, mai te au i tō ’outou ato’a ra hina’aro ’ia ora noa ; ’ia vaiiho mai ’outou i tā ’outou mau mauha’a tama’i ia mātou nei, ’e ’aita ïa mātou e ha’amani’i i tō ’outou toto, e fa’aora rā mātou ia ’outou, mai te mea e haere atu ’outou i tō ’outou haere’a ’e ’aita ’outou e ho’i fa’ahou mai nō te ’aro mai ia mātou.

7 ’E i teienei, ’ia ’ore ’outou ’ia nā reira, inaha, tei roto ïa ’outou i tō mātou nei rima, ’e e fa’aue au i tō’u ra mau ta’ata ’ia tā’iri ia ’outou, ’e ’ia ha’aputa i tō ’outou tino i te puta pohe ra, ’ia mou roa ’outou ; ’ei reira tātou e ’ite ai ē, tei ’ia vai te mana i ni’a iho i teie nei feiā ; ’oia ïa, e ’ite ïa tātou ē, ’o vai te fa’atītīhia ?

8 ’E i teienei, i muri a’era, ’ia fa’aro’o a’era Zerahemana i teie mau parau, ’ua ti’a mai ra ’oia e hōro’a mai ra i tāna ’o’e ’e tāna simetera, ’e tāna fana i roto i te rima o Moroni, ’e ’ua parau mai ra iāna : Inaha, teie tā mātou mau mauha’a tama’i ; tē hōro’a atu nei mātou i te reira ia ’outou, ’e ’aita rā mātou e fa’aoti i te hō’ē tapura’a ia ’outou na, ’ua ’ite ho’i mātou ē, e ’ōfatihia te reira e mātou, ’e e tā mātou ato’a mau tamari’i ; ’a rave rā ’outou i tā mātou mau mauha’a tama’i, ’e ’a tu’u ia mātou ’ia haere atu i roto i te mēdēbara ; ’e ’aore rā e tāpe’a mātou i tā mātou mau ’o’e, ’e e pau mātou ’e ’aore ïa e upo’oti’a.

9 Inaha, e ’ere mātou nō tā ’outou fa’aro’o ; ’aita mātou i ti’aturi ē nā te Atua mātou i tu’u atu i roto i tō ’outou rima ; ’ua ti’aturi rā mātou ē, nā roto i tā ’outou mau rāve’a ha’avare i fa’aorahia ai ’outou i tā mātou mau ’o’e. Inaha, nā tā ’outou mau pāruru ’ōuma ’e tā ’outou mau pāruru tama’i ho’i i fa’aora ia ’outou.

10 ’E i teienei, ’ia fa’aoti a’era Zerahemana i te paraura’a i teie mau parau, ’ua fa’aho’i atu ra Moroni i te ’o’e ’e te mau mauha’a tama’i ’o tāna i fāri’i ia Zerahemana ra, i te nā-’ō-ra’a atu ē : Inaha, e fa’aoti tātou i te tama’i.

11 I teienei, ’aita e ti’a iā’u ’ia fa’a’ore i te mau parau ’o tā’u i parau iho nei, nō reira, mai te Fatu e ora ra, e’ita roa ’outou e ho’i atu, maori rā ’ia nā mua ’outou i te fa’aoti i te hō’ē tapura’a ē e’ita roa ’outou e ho’i fa’ahou mai nō te ’aro ia mātou. I teienei tei roto ’outou i tō mātou nei rima, ’e e ha’amani’i mātou i tō ’outou toto i ni’a i te repo, ’ia ’ore ’outou e ha’apa’o i te mau tītaura’a ’o tā’u i fa’aau atu.

12 ’E i teienei, ’ia oti a’era tā Moroni paraura’a atu i teie mau parau, ’ua tāpe’a ihora Zerahemana i tāna ’o’e, ’e ’ua riri mai ra ia Moroni, ’e ’ua haere rū mai ra ’oia nō te taparahi ia Moroni ; ’āre’a rā i tōna fa’ateiteira’a i tāna ’o’e, inaha, ’ua tā’irihia ihora te reira i raro i te repo e te hō’ē fa’ehau o Moroni, e fati ihora te tāpe’ara’a ; ’e ’ua tāpū ihora ho’i ’oia ia Zerahemana i tōna ra ’’iri upo’o ’e ’ua ma’iri ihora te reira i raro i te repo. ’E ’ua fa’aātea ’ē atu ra Zerahemana mai mua atu ia rātou ē tae atu ra i rotopū i tōna mau ra fa’ehau.

13 ’E i muri a’era, ’ua rave ihora te fa’ehau, ’o tei ti’a i pīha’i iho ’e tei tāpū ’ē atu i te ’’iri upo’o o Zerahemana, i taua ’’iri upo’o ra nā te rouru mai raro mai i te repo, ’e ’ua tu’u atu ra i ni’a i te muara’a o tāna ’o’e, ’e ’ua fa’atoro atu ra i mua ia rātou, ’e ’ua nā ’ō atu ra ia rātou ma te reo pūai :

14 Mai teie nei ’iri upo’o i ma’iri iho nei i raro i te repo, ’oia te ’iri upo’o o tō ’outou ra’atira, ’e mai te reira ho’i ’outou ’ia ma’iri i raro i te repo, maori rā ’ia hōro’a mai ’outou i tā ’outou mau mauha’a tama’i ’e ’a haere atu ai ma te fa’aoti i te hō’ē fafaura’a nō te hau.

15 I teienei, ’ia fa’aro’o a’era te mau ta’ata e rave rahi i teie mau parau ’e ’ia ’ite a’era ho’i rātou i te ’iri upo’o i ni’a iho i te ’o’e, ’ua mata’u ihora rātou ; ’e ’ua haere mai ra e rave rahi mau ta’ata ’e ’ua taora mai ra i tā rātou mau mauha’a tama’i i te pae ’āvae o Moroni, ’e ’ua fa’aoti ihora i te hō’ē fafaura’a nō te hau. ’E ’ua tu’u atu ra rātou i te mau ta’ata i fa’aoti i te fafaura’a ’ia haere atu i roto i te mēdēbara.

16 I teienei, i muri a’era, ’ua riri roa a’era Zerahemana, ’e ’ua fa’ati’arepu ihora ’oia i te toe’a o tōna ra mau fa’ehau ’ia riri, ’e ’ia ’aro pūai roa atu i te mau ’āti Nephi.

17 ’E i teienei, ’ua riri ihora Moroni nō te mana’o ’eta’eta o te mau ’āti Lamana ; nō reira, ’ua fa’aue atu ra ’oia i tōna mau ta’ata ’ia ’aro atu ia rātou ’e ’ia taparahi ia rātou. ’E i muri a’era, ’ua ha’amata ihora rātou i te taparahi atu ia rātou ; ’oia ïa, ’e ’ua ’aro mai te mau ’āti Lamana ma te fa’a’ohipa i tā rātou mau ’o’e ’e tō rātou pūai.

18 Inaha rā, ’aita e pāruru nō tō rātou ra mau ’iri vai taha’a ’e tō rātou mau upo’o tāpo’i-’ore-hia, ’e ’ua ’ōhie te reira ’ia tāpūhia e te mau ’o’e ’oi a te mau ’āti Nephi ; ’oia ïa, inaha ’ua puta rātou ’e ’ua tāpūhia, ’oia ïa, ’e ’ua pohe ’oi’oi ihora rātou i te mau ’o’e a te mau ’āti Nephi ; ’e ’ua ha’amata rātou i te tā’irihia i raro mai tei tohuhia e te fa’ehau o Moroni.

19 I teienei, ’ia ’ite a’era Zerahemana ē ’ua fātata roa rātou i te pau, ’ua ti’aoro ’ū’ana mai ra ’oia ia Moroni, ma te parau mai ē, e fafau ’oia ’e tōna ato’a ra mau ta’ata i te hō’ē fafaura’a ia rātou, mai te mea e fa’aora noa rātou i te toe’a o rātou, ē e’ita roa rātou e ho’i fa’ahou mai nō te ’aro mai ia rātou.

20 ’E i muri a’era, ’ua fa’aoti ihora Moroni ’ia fa’aea te ’ohipa taparahira’a i rotopū i te mau ta’ata. ’E ’ua rave atu ra ’oia i te mau mauha’a tama’i a te mau ’āti Lamana ; ’e i muri a’e i tō rātou fafaura’a i te fafaura’a nō te hau iāna ra, ’ua fa’ati’ahia atu ra rātou ’ia haere atu i roto i te mēdēbara.

21 I teienei, ’aita te rahira’a o tō rātou feiā pohe i tai’ohia nō te rahi o te reira ; ’oia ïa, ’ua rahi roa ho’i tō rātou feiā pohe, tō te mau ’āti Nephi ’e tō te mau ’āti Lamana ato’a ho’i.

22 ’E i muri a’era, ’ua huri atu ra rātou i tō rātou feiā pohe i roto i te mau pape nō Sidona ra, ’e ’ua pāinu noa atu ra rātou ē tae roa atu ra i roto i te mau vāhi hōhonu nō te moana.

23 ’E ’ua ho’i atu ra te mau nu’u fa’ehau o te mau ’āti Nephi, ’oia ho’i tō Moroni, i tō rātou mau ’utuāfare ’e tō rātou mau fenua.

24 ’E ’ua hope ihora te ’ahuru ’e ma va’u o te matahiti nō te fa’aterera’a a te mau ha’avā i ni’a iho i te mau ta’ata o Nephi. ’E ’o te hope’a teie nō te pāpa’a parau a Alama, ’o tei pāpa’ihia i ni’a i te mau ’api a Nephi.