1 ’E i teienei, i muri a’era, ’aita Moroni i fa’aea i te fa’aineine nō te ’arora’a, ’e ’aore rā nō te pāruru i tōna mau ta’ata nō te ’aro atu i te mau ’āti Lamana ; ’ua fa’aue ’oia i tōna mau nu’u fa’ehau ’ia ha’amata, i te ha’amatara’a nō te piti ’ahuru o te matahiti nō te fa’aterera’a a te mau ha’avā, ’ia ’ō ’e ’ia ha’apu’e i te repo ’ei ’āua i te mau ’oire ato’a i roto i te mau fenua ato’a e pārahihia ra e te mau ’āti Nephi.

2 ’E ’ua fa’aue ’oia ’ia tu’uhia te mau rā’au i ni’a i taua mau ’āua repo ra ; ’oia ïa, ’ia hāmanihia te mau ’āua rā’au mai te roa o te hō’ē ta’ata i te teitei, ’e ’ia ’āuahia te mau ’oire.

3 ’E ’ua fa’aue ’oia ’ia hāmanihia te tahi mau rā’au ’oe’oe ’e ’ia ha’amauhia te reira i ni’a i te mau ’āua rā’au ē ’ati noa a’e ; ’ei mea pa’ari ’e te teitei.

4 ’E ’ua fa’aue ’oia ’ia hāmanihia te mau pare ma te fāriu atu i ni’a i te mau ’āua rā’au ’oe’oe, ’e ’ua fa’aue ’oia ’ia hāmanihia te mau vāhi pāruruhia i ni’a i taua mau pare ra, ’ia ’ore te mau ’ōfa’i ’e te mau te’a a te mau ’āti Lamana e ha’apēpē ia rātou.

5 ’E ’ua ineine rātou ’e ’ua ti’a ia rātou ’ia ma’a i te mau ’ōfa’i mai ni’a mai i te reira, mai te au i tō rātou hina’aro ’e tō rātou pūai, ’e ’ia taparahi i te ta’ata e tāmata ra i te ha’afātata mai i te mau patu o te ’oire.

6 ’E ’ua nā reira Moroni i te fa’aineine i te mau ha’apūra’a pa’ari i roto i te mau ’oire ato’a i te mau fenua ē ’ati noa a’e, nō te taera’a mai o tō rātou mau ’enemi.

7 ’E i muri a’era, ’ua fa’aue atu ra Moroni i tōna mau nu’u fa’ehau ’ia haere i te hiti’a o te rā nō te mēdēbara ; ’oia ïa, ’ua haere rātou ’e ’ua tīahi atu ra i te mau ’āti Lamana ato’a i te hiti’a o te rā nō te mēdēbara i roto i tō rātou iho mau fenua, ’e tei te pae apato’a te reira i te fenua nō Zarahemela.

8 ’E te fenua ra nō Nephi, ’ua haere ’āfaro noa tōna ’ōti’a mai te miti i te hiti’a o te rā ē tae noa atu i te tō’o’a o te rā.

9 ’E i muri a’era, i tō Moroni tīahira’a atu i te mau ’āti Lamana pā’āto’a i rāpae i te mēdēbara nō te hiti’a o te rā, ’e tei te pae apato’erau te reira i tō rātou iho mau fenua, ’ua fa’aue atu ra ’oia ’ia haere atu te mau ta’ata nō te fenua ra nō Zarahemela e tō te fenua ē ’ati noa a’e i roto i te mēdēbara nō te hiti’a o te rā, e tae atu i te mau fenua i te hiti o te miti ra, ’e ’ia rave mai i taua fenua ra.

10 ’E ’ua tu’u ato’a atu ra ’oia i tōna mau nu’u fa’ehau i te pae apato’a, i te mau fenua i te hiti nō tō rātou mau fenua, ’e ’ua fa’aue atu ra ia rātou ’ia patu i te mau pā pa’ari ’ia ti’a ia rātou ’ia pāruru i tō rātou mau nu’u fa’ehau ’e tō rātou ta’ata i te rima o tō rātou mau ’enemi.

11 ’E ’ua nā reira ’oia i te tāpe’a i te mau ha’apūra’a pa’ari o te mau ’āti Lamana i roto i te mēdēbara nō te hiti’a o te rā, ’oia ïa, ’e tō te pae ato’a nō te tō’o’a o te rā, ma te ha’apa’ari i te ’ōti’a o te fenua i rōpū i te mau ’āti Nephi ’e te mau ’āti Lamana, i rōpū i te fenua nō Zarahemela e te fenua nō Nephi ; mai te miti i te tō’o’a o te rā, ma te haere nā te vāhi tumu o te ’ānāvai ra Sidona—’e tei te mau ’āti Nephi ra te mau fenua tā’āto’a i te pae apato’erau ; ’oia ïa, ’e te mau fenua tā’āto’a i te pae apato’erau i ’Auhune, mai te au i tō rātou hina’aro.

12 ’E ’ua nā reira Moroni ’e tōna mau nu’u fa’ehau i te ’imira’a i te tāpū ’ē atu i te pūai ’e te mana o te mau ’āti Lamana i ni’a i tō rātou ato’a ra mau fenua, ’ia ’ore tō rātou mana i ni’a i tō rātou ato’a ra mau fenua, ’e ’ua tupu tōna ra mau nu’u fa’ehau i te rahi i te mau mahana ato’a nā roto i te pāpūra’a te pārurura’a i fa’atupuhia nā roto i tāna ra mau ’ohipa.

13 ’E i muri a’era, ’ua ha’amata te mau ’āti Nephi i te niu o te hō’ē ’oire, ’e ’ua ma’iri rātou i tō te ’oire i’oa ’o Moroni ; ’e tei te pae miti nō te hiti’a o te rā te reira ; ’e tei te pae apato’a i te ’ōti’a nō te mau fenua o te mau ’āti Lamana.

14 ’E ’ua ha’amata ato’a rātou i te niu nō te hō’ē ’oire i rōpū i te ’oire nō Moroni e te ’oire nō Aarona, ma te tū’ati atu i te mau hiti ’ōti’a o nā ’oire ra nō Aarona ’e o Moroni ; ’e ’ua ma’iri rātou i te i’oa o te ’oire, ’e ’aore rā tō te fenua i’oa, ’o Nephiha.

15 ’E ’ua ha’amata ato’a rātou i taua iho matahiti ra i te patu i te mau ’oire e rave rahi i te pae apato’erau ; ’e te tahi e mea ta’a ’ē roa tōna huru ’o tā rātou i ma’iri i tōna i’oa ’o Lehi, ’e tei te pae apato’erau i pīha’i iho i te mau fenua i te hiti nō te pae miti.

16 ’E ’o te hope’a te reira nō te piti ’ahuru o te matahiti.

17 ’E mai teie te huru nō te manuia rahi o te mau ta’ata o Nephi i te ha’amatara’a nō te piti ’ahuru ’e ma hō’ē o te matahiti nō te fa’aterera’a a te mau ha’avā i ni’a i te mau ta’ata o Nephi.

18 ’E ’ua manuia rahi rātou, ’e ’ua rahi roa tā rātou faufa’a ; ’oia ïa, ’ua fānau rahi rātou ’e ’ua pūai roa ho’i rātou i ni’a i te fenua.

19 ’E nō reira tē ’ite nei tātou i te aroha ’e te parauti’a o te mau ’ohipa a te Fatu, nō te fa’atupu i tāna ra mau parau ato’a i te mau tamari’i a te ta’ata nei ; ’oia ïa, ’ua ’ite tātou i teienei ē ’ua tupu mau tāna mau parau, ’o tāna i parau atu ia Lehi, i te nā-’ō-ra’a ē :

20 E ao tō ’oe ’e tō tā ’oe ra mau tamari’i ; ’e e ha’amaita’ihia rātou, ’e mai te mea e ha’apa’o rātou i tā’u mau fa’auera’a e manuia ïa rātou i ni’a te fenua nei. ’Āre’a rā ’a ha’amana’o, mai te mea ē ’aita rātou e ha’apa’o i tā’u mau fa’auera’a, e tāpū-’ē-hia rātou mai mua atu i te aro o te Fatu.

21 ’E tē ’ite nei tātou ē, ’ua tupu mau taua mau parau ra i te mau ta’ata o Nephi ; ’e nō tā rātou mau tātama’ira’a ’e tā rātou mau mārōra’a, ’oia ïa, tā rātou mau taparahira’a ta’ata, ’e tā rātou mau harura’a, ’e tā rātou ha’amorira’a ’īdolo, ’e tā rātou mau ’ohipa tai’ata, ’e tā rātou mau ’ohipa vi’ivi’i i rotopū ia rātou iho, i tupu ai tā rātou mau tama’i ’e tō rātou mau pau.

22 ’E rātou ato’a ’o tei itoito i te ha’apa’o i te mau fa’auera’a a te Fatu, ’ua fa’aorahia rātou i te mau tau ato’a ; ’a fa’autu’ahia ai e rave rahi tauatini o tō rātou mau taea’e parauti’a ’ore i te fa’atītīra’a, ’e ’aore rā i te pohe i te ’o’e ; ’e ’aore rā i te paruparura’a te fa’aro’o, ’e i te ’āmuira’a i te mau ’āti Lamana.

23 Inaha rā, ’aita atu e taime ’oa’oa roa atu i rotopū i te mau ta’ata o Nephi, mai te mau mahana mai o Nephi ē tae noa atu i te mau mahana o Moroni ; ’oia ïa, ē tae noa mai i teie taime, ’oia te matahiti e piti ’ahuru ’e ma hō’ē nō te fa’aterera’a a te mau ha’avā.

24 ’E i muri a’era, ’ua hope ato’a a’era te piti ’ahuru ’e ma piti matahiti nō te fa’aterera’a a te mau ha’avā ma te hau ; ’oia ïa, ’e ’oia ato’a te piti ’ahuru ’e ma toru o te matahiti.

25 ’E i muri a’era, i te ha’amatara’a nō te piti ’ahuru ’e ma maha o te matahiti nō te fa’aterera’a a te mau ha’avā, ’ua vai noa ato’a ïa te hau i rotopū i te mau ta’ata o Nephi, ’āhiri ’aita te mārōra’a i tupu i rotopū ia rātou nō ni’a i te fenua nō Lehi, ’e te fenua nō Morianetona, ’o tei tū’atihia i ni’a i te mau hiti fenua nō Lehi ; ’e tei te pae tahatai nā fenua ato’a e piti ra.

26 Inaha ho’i, ’ua tītau te feiā i fāri’i i te fenua ra nō Morianetona, i te hō’ē tufa’a nō te fenua ra nō Lehi ; nō reira ’ua tupu ihora te hō’ē mārōra’a rahi i rotopū ia rātou, ’e nō reira ho’i ’ua rave ihora te mau ta’ata o Morianetona i te mauha’a tama’i nō te ’aro atu i tō rātou mau taea’e, ’e ’ua fa’aoti rātou ’ia taparahi atu ia rātou i te ’o’e.

27 Inaha rā, ’ua horo atu ra te feiā i fāri’i i te fenua ra nō Lehi i te pūhapara’a o Moroni, ’e ’ua ani atu iāna nō te tauturura’a ; ’e inaha e ’ere ho’i rātou tei hapa.

28 ’E i muri a’era, ’ia ’ite a’era te mau ta’ata o Morianetona, ’o tei arata’ihia e te hō’ē ta’ata ’o Morianetona tōna i’oa ē, ’ua horo atu te mau ta’ata o Lehi i te pūhapara’a o Moroni, ’ua mata’u rahi roa a’era rātou ’o te haere mai tō Moroni nu’u fa’ehau e ha’amou ia rātou.

29 Nō reira, ’ua fa’atupu ihora Morianetona i te mana’o i roto i tō rātou ’ā’au ’ia horo atu rātou i te fenua i te pae apato’erau, ’e e rave rahi tō reira mau pape rarahi, ’e ’ia rave i te fenua i te pae apato’erau.

30 ’E inaha, e rave fa’aoti rātou i teie ’ōpuara’a, (’o tē riro ho’i ’ei tumu e tupu ai te ’oto) inaha rā, nō te mea e ta’ata ’iriā ’ōhie noa ’o Morianetona, nō reira ’ua tupu ihora tōna riri i te hō’ē o tōna ra mau tāvini vahine, ’e ’ua fa’atae atu ra ’oia i tōna rima i ni’a iāna ’e ’ua taparahi roa ihora iāna.

31 ’E i muri a’era, ’ua horo atu ra taua tāvini vahine ra, ’e ’ua tae atu ra i te pūhapara’a o Moroni, ’e ’ua fa’a’ite atu ra ia Moroni i te mau mea ato’a i tupu, ’e nō ni’a ato’a i tā rātou mau ’ōpuara’a nō te horo atu i te fenua i te pae apato’erau.

32 I teienei, inaha, ’ua mata’u ihora te mau ta’ata i ’Auhune, ’o Moroni iho ā rā, ’o te fa’aro’o atu rātou i te mau parau a Morianetona ’e ’o te ’āmui atu ho’i rātou i tōna ra mau ta’ata, ’e nā roto i te reira e roa’a ai iāna taua mau tufa’a fenua ra, ’o tē fa’atupu i te mau pe’ape’a rahi i rotopū i te mau ta’ata o Nephi ; ’oia ïa, ’e nā roto i taua mau pe’ape’a ra e mou ai tō rātou ti’amāra’a.

33 Nō reira ’ua tono atu ra Moroni i te hō’ē nu’u fa’ehau ’e tō rātou mau pūhapara’a, ’ia tae nā mua roa mai i te mau ta’ata o Morianetona, nō te tāpe’a i tō rātou horora’a i te fenua ra i te pae apato’erau.

34 ’E i muri a’era, ’aita rātou i tae nā mua mai i te mau ta’ata o Morianetona ē tae roa atu ’ua tae rātou i te mau ’ōti’a nō te fenua ra nō Ano ; ’e i reira nā mua atu ra rātou i te mau ta’ata o Morianetona, nā te vāhi oaoa nā te pae miti e tae atu ai i te fenua i te pae apato’erau ; ’oia ïa, tei rōpū te reira i te miti, i te pae tō’o’a o te rā ’e te pae hiti’a o te rā.

35 ’E i muri a’era, ’ua ’aro ihora te nu’u fa’ehau i tonohia atu e Moroni, ’e ’o tei arata’ihia e te hō’ē ta’ata o Teanekuma tōna i’oa, i te mau ta’ata o Morianetona ; ’e nō te mana’o ’eta’eta o te mau ta’ata o Morianetona, (’o tei fa’aitoitohia e tāna iho mau ’ohipa ’ī’ino ’e te mau parau tāvaimanino) ’ua tupu ihora te hō’ē ’arora’a i rotopū ia rātou, ’e ’ua taparahi ihora Teanekuma ia Morianetona, ’e ’ua vī ihora tōna nu’u fa’ehau, ’e ’ua rave ihora ia rātou ’ei mau ’āuri, ’e ’ua ho’i atu ra i te pūhapara’a o Moroni. ’E ’o te hope’a te reira nō te piti ’ahuru ’e ma maha o te matahiti nō te fa’aterera’a a te mau ha’avā i ni’a i te mau ta’ata o Nephi.

36 ’E ’ua nā-reira-hia te fa’aho’ira’ahia mai o te mau ta’ata o Morianetona. ’E i muri iho i tō rātou fafaura’a i te fa’atupu noa i te hau, ’ua fa’aho’ihia rātou i te fenua ra nō Morianetona, ’e ’ua tupu ihora te hō’ē tāhō’ēra’a i roto ia rātou ’e te mau ta’ata o Lehi ; ’e ’ua fa’aho’i-ato’a-hia atu ra rātou i tō rātou mau fenua.

37 ’E i muri a’era, i taua iho matahiti ra ’a tupu fa’ahou ai te hau i rotopū i te mau ta’ata o Nephi, ’ua pohe ihora Nephiha, te piti o te ha’avā rahi, ’e ’ua rave māite ’oia i tōna ti’ara’a ha’avā ma te parauti’a i mua i te Atua.

38 ’Āre’a rā, ’aita ’oia i hina’aro ’ia fāri’i i te mau pāpa’a parau ’e te mau mea i hi’ohia e Alama ’e tōna mau metua ’ei mea mo’a roa ; nō reira ’ua hōro’a atu Alama i teie mau mea i tāna tamaiti ra ia Helamana.

39 Inaha, i muri a’era, ’ua mā’itihia te tamaiti a Nephiha ’ei ha’avā, nō te mono i tōna metua tāne ; ’oia ïa, ’ua mā’itihia ’oia ’ei ha’avā rahi ’e ’ei tāvana i ni’a a’e i te mau ta’ata, ma te hōreo ’e te fa’auera’a mo’a ’ia ha’avā ma te parauti’a, ’e ’ia fa’atupu noa i te hau ’e te ti’amāra’a o te mau ta’ata, ’e ’ia fa’ati’a ia rātou ’ia ha’apa’o i tō rātou mau ti’ara’a mo’a ’ia ha’amori i te Fatu tō rātou Atua ; ’oia ïa, ’ia pāturu ’e ’ia fa’ati’a i te ’ohipa a te Atua ē hope roa a’e tōna mau mahana, ’e ’ia fa’autu’a i te feiā parauti’a ’ore ’ia au i tā rātou hara.

40 I teienei, inaha, ’o Pahorana tōna i’oa. ’E ’ua riro Pahorana ’ei mono nō tōna metua tāne, ’e ’ua ha’amata ’oia i te fa’atere i te mau ta’ata o Nephi i te hope’a nō te piti ’ahuru ’e ma maha o te matahiti.