Te Buka a Alama
te Tamaiti a Alama

1 I teienei, i muri a’era, i te matahiti mātāmua nō te fa’aterera’a te mau ha’avā i ni’a i te mau ta’ata o Nephi, ’e mai teie taime atu, i haere na te ari’i ra ’o Mosia nā te ’ē’a i haerehia ’e tō te ao ato’a nei, i ’aro na ’oia i te tama’i maita’i, i haere na ’oia ma te parauti’a i mua i te Atua, ’e ’aita ’oia i vaiiho i te hō’ē ta’ata nō te fa’atere ’ei mono nōna ; ’āre’a rā ’ua fa’ati’a ’oia i te tahi mau ture, ’e ’ua fāri’ihia te reira e te mau ta’ata ; nō reira ’ua ti’a roa ia rātou ’ia ha’apa’o i te mau ture tāna i ha’amau.

2 ’E i muri a’era, i te matahiti mātāmua nō te fa’aterera’a a Alama i te pārahira’a ha’avā, ’ua ’āfa’ihia mai ra te hō’ē ta’ata i mua iāna ’ia ha’avāhia, e ta’ata rahi ’oia ’e te tu’iro’o ho’i nō tōna pūai rahi.

3 ’E ’ua haere ’oia i rotopū i te mau ta’ata i te a’ora’a atu ia rātou i tei parauhia e ana e parau nā te Atua, ’e te fa’a’inora’a i te ’ēkālesia ; ’e te paraura’a i te mau ta’ata e mea ti’a i te mau tahu’a ’e te mau ’orometua ato’a ’ia riro ’ei feiā auhia, ’e e ’ere i te mea ti’a ia rātou ’ia rave i te ’ohipa i tō rātou iho rima ; ’āre’a rā e mea ti’a ia rātou ’ia tauturuhia e te mau ta’ata.

4 ’E ’ua parau ato’a atu ’oia i te mau ta’ata, e fa’aorahia te mau ta’ata ato’a i te mahana hope’a, ’e ’eiaha rātou e mata’u ’e ’eiaha ho’i e rurutaina, ’ia fa’ateitei rā rātou i tō rātou upo’o i ni’a ma te ’oa’oa ; ’ua hāmani ho’i te Fatu i te mau ta’ata ato’a, ’e ’ua fa’aora ho’i i te mau ta’ata ato’a ; ’e i te hope’a ra, e noa’a i te mau ta’ata ato’a te ora mure ’ore.

5 ’E i muri a’era, ’ua ha’api’i ’oia i teie mau mea ’e e rave rahi tei ti’aturi i tāna mau parau, ’oia ïa e rave rahi tei ha’amata i te tauturu iāna ’e tei hōro’a atu i te moni nāna.

6 ’E ’ua ha’amata ihora ’oia i te fa’ateiteihia i te te’ote’o o tōna ’ā’au, ’e i te ’ō’omo i te mau ’ahu moni rahi, ’oia ïa, ’e ’ua ha’amata ihora ’oia i te fa’ati’a i te hō’ē ’ēkālesia i tei au i tāna i a’o ra.

7 ’E i muri a’era, ’a haere atu ai ’oia nō te a’o atu ia rātou ’o tei ti’aturi i tāna ra parau, ’ua fārerei a’era ’oia i te hō’ē ta’ata nō te ’ēkālesia a te Atua, ’oia ïa, i te hō’ē o tā rātou mau ’orometua ; ’e ’ua ha’amata ihora ’oia i te mārō ’ū’ana mai iāna, ’ia ti’a iāna ’ia arata’i ’ē atu i te mau ta’ata nō te ’ēkālesia ; ’ua pāto’i atu ra rā taua ta’ata ra iāna, ma te a’o atu iāna i te mau parau a te Atua.

8 I teienei ’o Gideona te i’oa o taua ta’ata ra ; ’e ’o ’oia ho’i tei riro na ’ei mauha’a i te rima o te Atua i te fa’aorara’a i te mau ta’ata o Limehi mai roto mai i te fa’atītīra’a.

9 I teienei, nō te mea ’ua pāto’i atu Gideona iāna ma te fa’a’ohipa i te mau parau a te Atua, ’ua riri ihora ’oia ia Gideona, ’e ’ua rave ihora ’oia i tāna ’o’e ’e ’ua ha’amata ihora i te tā’iri iāna. I teienei nō te mea ’ua ruhiruhiā roa Gideona, nō reira ’aita atu ra i ti’a iāna ’ia pāruru atu i tāna ra mau tā’irira’a, nō reira ’ua pohe ihora ’oia i te ’o’e.

10 ’E ’ua ravehia atu te ta’ata i taparahi iāna ’e te mau ta’ata o te ’ēkālesia, ’e ’ua ’āfa’ihia atu ’oia i mua ia Alama, ’ia ha’avāhia ’oia mai te au i te mau hara tāna i rave.

11 ’E i muri a’era, ’ua ti’a atu ra ’oia i mua ia Alama ’e ’ua pāruru iāna iho ma te mata’u ’ore.

12 ’Ua parau atu ra rā Alama iāna : Inaha, ’o teie te taime mātāmua i tupu ai te mau ’ohipa ha’avare a te mau tahu’a i rotopū i teie mau ta’ata. ’E inaha, e ’ere ’oe i te tahu’a ha’avare ana’e ra, ’ua tāmata rā ’oe i te ha’apūai i te ’ohipa ha’avare a te mau tahu’a ma te fa’a’ohipa i te ’o’e ; ’e ’ia ha’apūaihia te ’ohipa ha’avare a te mau tahu’a i rotopū i teie nei mau ta’ata, e ha’amou-roa-hia rātou.

13 ’E ’ua ha’amani’i ho’i ’oe i te toto o te hō’ē ta’ata parauti’a, ’oia ïa, te hō’ē ta’ata ’o tei rave i te ’ohipa maita’i e rave rahi i rotopū i teie nei mau ta’ata ; ’e ’ia fa’aora noa mātou ia ’oe na, e iri mai ïa tōna toto i ni’a ia mātou ’ei tāho’ora’a.

14 Nō reira ’ua fa’autu’ahia ’oe ’ia pohe, mai te au i te ture i hōro’ahia mai ia tātou e Mosia, ’oia tō tātou ari’i hope’a ; ’e ’ua fāri’ihia te reira e teie nei mau ta’ata ; nō reira e mea ti’a roa i teie nei mau ta’ata ’ia ha’apa’o i taua ture ra.

15 ’E i muri a’era, ’ua rave atu ra rātou iāna ; ’o Nehora tōna i’oa ; ’e ’ua hōpoi atu ra rātou iāna i ni’a i te tupua’i ’āivi i Maniti ra, ’e i reira ’ua tītauhia ’oia ’ia fā’i, ’e ’ua fā’i mai ’oia i mua i te mau ra’i ’e te fenua ē, e mea au ’ore tāna i ha’api’i i te mau ta’ata i tā te Atua ra parau ; ’e i reira ’oia i pohe ai i te hō’ē pohe ha’amā.

16 ’Āre’a rā, ’aita te reira i fa’a’ore i te ha’apararera’a i te ’ohipa ha’avare a te mau tahu’a i ni’a i te fenua ē ’ati noa a’e ; e rave rahi ho’i tei au i te mau mea faufa’a ’ore o te ao nei, ’e ’ua haere atu rātou ma te a’o haere i te mau ha’api’ira’a ha’avare ; ’e ’ua nā reira rātou ’ia noa’a te tao’a e te tura.

17 ’Āre’a rā, ’aita i ti’a ia rātou ’ia ha’avare noa, i mata’u ho’i rātou i te ture, mai te mea e ’itehia, ’ua fa’autu’ahia te mau ta’ata ha’avare ; nō reira ’ua fa’ahua a’o noa rātou mai te au i tō rātou ti’aturira’a ; ’e i teienei ’aita tō te ture e mana i ni’a i te hō’ē ta’ata nō tōna ti’aturira’a.

18 ’E ’aita ato’a i ti’a ia rātou ’ia ’eiā, i mata’u ho’i rātou i te ture ; nō te mea ’ua fa’autu’ahia rātou ’o tei ’eiā ; ’e ’aita ho’i i ti’a ia rātou ’ia rave huna noa, ’aita ato’a ’ia taparahi i te ta’ata, nō te mea ’o ’oia ’o tei taparahi i te ta’ata ra, ’ua fa’autu’ahia ïa ’oia ’ia pohe.

19 ’Āre’a rā, i muri a’era, ’ua ha’amata ihora te feiā e ’ere i tō te ’ēkālesia a te Atua ’ia hāmani ’ino i te feiā i roto i te ’ēkālesia a te Atua, ’e ’ua rave ho’i rātou i te i’oa o te Mesia i ni’a iho ia rātou.

20 ’Oia ïa, ’ua hāmani ’ino rātou ia rātou, ’e ’ua fa’a’ino ia rātou i te mau huru parau ato’a ra, ’e tē nā-reira-hia ra rātou nō tō rātou ha’eha’a ; nō te mea ’aita rātou i te’ote’o i roto i tō rātou iho ’ā’au, ’e nō te mea ho’i ’ua ha’api’i atu rātou i te parau a te Atua, te tahi i te tahi, ma te moni ’ore e ma te ho’o ’ore.

21 I teienei tē vai ra te hō’ē ture ’eta’eta i rotopū i te mau ta’ata nō te ’ēkālesia, ’oia ho’i ’eiaha te hō’ē ta’ata nō te ’ēkālesia e ti’a mai nō te hāmani ’ino i te feiā i rāpae i te ’ēkālesia, e ’eiaha ho’i te hāmani-’ino-ra’a ’ia tupu i rotopū ia rātou iho.

22 ’Āre’a rā, tē vai ra e rave rahi i rotopū ia rātou ’o tei ha’amata i te fa’ate’ote’o, ’e tei ha’amata i te mārō ’ū’ana atu i tō rātou mau ’enemi, ē tae noa atu i te motora’a, ’oia ïa, e moto atu rātou te tahi i te tahi i tō rātou rima.

23 I teienei teie te piti o te matahiti nō te fa’aterera’a a Alama, ’o te tumu ïa nō te ’ati rahi o te ’ēkālesia ; ’oia ïa, ’o te tumu ïa nō te tāmatara’a rahi i roto i te ’ēkālesia.

24 ’Ua ’eta’eta ho’i te ’ā’au o te mau ta’ata e rave rahi, ’e ’ua paraihia tō rātou mau i’oa, ’e ’aita atu ra rātou i ha’amana’o-fa’ahou-hia i rotopū i te mau ta’ata o te Atua. ’E e rave rahi ho’i tei fa’aātea ’ē atu ia rātou mai rotopū atu ia rātou.

25 I teienei, e tāmatara’a rahi teie nō rātou ’o tei mau pāpū i te fa’aro’o ; ’āre’a rā ’ua fa’aitoito noa rātou ’e ’ua tāmau māite ho’i i te ha’apa’o i te mau fa’auera’a a te Atua, ’e ’ua fa’a’oroma’i rātou i te hāmani-’ino-ra’a i ha’apu’ehia i ni’a iho ia rātou ra.

26 ’E ’ia vaiiho te mau tahu’a i tā rātou ’ohipa nō te ha’api’i atu i te parau a te Atua i te mau ta’ata, ’ua vaiiho ato’a te mau ta’ata i tā rātou ’ohipa nō te fa’aro’o i te parau a te Atua. ’E ’ia oti a’era te tahu’a i te fa’a’ite atu i te parau a te Atua ia rātou, ’ua ho’i fa’ahou atu ra rātou ato’a i tā rātou mau ’ohipa ma te itoito ; ’e ’aita te tahu’a i mana’o ē, e mea maita’i a’e ’oia i tei fa’aro’o mai iāna, e ’ere ho’i te ta’ata a’o i te mea maita’i a’e i tei fa’aro’o mai iāna, e ’ere ato’a te ’orometua i te mea maita’i a’e i te ta’ata e ha’api’ihia ra ; e hō’ē ā fāito tō rātou ato’a, ’e ’ua rave rātou ato’a i te ’ohipa, te ta’ata tāta’itahi mai te au i tōna ra pūai.

27 ’E ’ua ’ōpere rātou i te tahi tufa’a nō tā rātou tao’a, te ta’ata tāta’itahi mai te au i tei noa’a iāna, i te feiā veve ’e i te ta’ata nava’i ’ore, ’e i te feiā ma’i, ’e i tei ro’ohia i te ’ati ra ; ’e ’aita rātou i ’ō’omo i te mau ’ahu moni rahi, e feiā mā ’e te nehenehe ho’i rātou.

28 ’E ’ua nā reira rātou i te fa’anahonaho i te mau ’ohipa a te ’ēkālesia ; ’e ’ua ha’amata fa’ahou te hau i te vai tāmau noa ; noa atu ā te mau hāmani-’ino-ra’a ato’a.

29 ’E i teienei, nō tō te ’ēkālesia itoito i ha’amata ai rātou ’ia riro ’ei feiā tao’a rahi, ’e ’ua noa’a te mau mea ato’a i hina’arohia e rātou ra—e rave rahi mau nana māmoe ’e mau nana pua’atoro, ’e te mau huru fanau’a ’ānimara poria ato’a, ’e ’ua rahi tā rātou sītona, ’e te ’auro, ’e te ’ārio, ’e te mau mea tao’a rahi ato’a ra, ’e ’ua rahi tā rātou tirita ’e te ’ahu paruai maita’i roa, ’e te mau huru ’ahu maita’i ato’a ’o tei ’ore i fa’a’una’unahia.

30 ’E nō reira, i roto i tō rātou huru manuia rahi, ’aita rātou i tu’u ’ē atu i tei taha’a noa, ’e tei poia, ’e tei po’ihā, ’e tei pohehia i te ma’i, ’e tei ’ore i fa’a’amuhia i te mā’a ; ’e ’aita rātou i ha’amau i tō rātou ’ā’au i ni’a i te mau tao’a rahi ; nō reira ’ua hōro’a noa rātou nā te mau ta’ata ato’a, i te ta’ata pa’ari ’e te ta’ata ’āpī ato’a ho’i, i te tītī ’e te ti’amā, i te tāne ’e te vahine, i te feiā i roto i te ’ēkālesia ’e tei rāpae ho’i i te ’ēkālesia ; ’aita rātou e ha’apa’o i te huru o te ta’ata i ’ere i te maita’i.

31 ’E nō reira ’ua manuia maita’i rātou ’e ’ua riro rātou ’ei feiā tao’a rahi roa atu i te feiā i rāpae i te ’ēkālesia.

32 Nō te feiā ho’i i rāpae i te ’ēkālesia ’ua rave noa rātou i te mau ’ohipa tahutahu, ’e te ha’amori ’īdolo, ’e te fa’atau, ’e te mau parau ri’i paieti ’ore, ’e te mi’imi’i, ’e te mārō ; ’e tē ’ō’omo ra rātou i te mau ’ā’ahu moni rahi ; ’e tē fa’ateiteihia ra i roto i te te’ote’o o tō rātou iho ’ā’au ; i te hāmani-’ino-ra’a, te ha’avarera’a, te ’eiāra’a, te harura’a i te tao’a, te tai’atara’a, te taparahira’a i te ta’ata, ’e te ravera’a i te mau huru ’ohipa ’ī’ino ato’a ; ’āre’a rā, ’ua fa’autu’ahia e te ture rātou ato’a ’o tei ’ōfati i te reira, mai te mea ’ua ti’a ’ia nā-reira-hia.

33 ’E i muri a’era, nā roto i te fa’autu’ara’a a te ture i ni’a ia rātou, ’ua fāri’i te ta’ata tāta’itahi i te fa’autu’ara’a nō te ’ohipa tāna i rave, ’ua fa’aea ri’i ihora rātou, ’e ’aita atu ra rātou i hina’aro ’ia rave fa’a’ite mai i tā rātou mau ’ohipa ’ī’ino ; nō reira ’ua tupu te hau rahi i rotopū i te mau ta’ata o Nephi ē tae noa atu i te pae o te matahiti nō te fa’aterera’a a te mau ha’avā.