1 Inaha, i teienei, i muri a’era, ’ua fa’atae atu ra te ari’i o te mau ’āti Lamana i te hō’ē fa’auera’a i rotopū i tōna mau ta’ata ato’a, i te nā-’ō-ra’a ē, ’eiaha tō rātou rima e rave noa atu ia Amona, ’e ia Aarona, ’e ia Omonera, ’e ia Himeni, ’e i tō rātou ato’a ho’i mau taea’e, ’o tē poro haere i te parau a te Atua, i te mau vāhi ato’a tā rātou e haere ē hope roa a’e tō rātou fenua.

2 ’Oia ïa, ’ua fa’atae atu ’oia i te hō’ē fa’auera’a mana ia rātou, ’eiaha tō rātou rima e rave noa atu ia rātou nō te ru’uru’u ia rātou, ’e ’aore rā nō te huri ia rātou i roto i te fare tāpe’ara’a ; ’eiaha ato’a rātou e tūtuha i te huare i ni’a iho ia rātou, ’eiaha e tā’iri ia rātou, ’eiaha e huri ia rātou i rāpae i tō rātou mau sunago, ’eiaha e papa’i ia rātou, ’eiaha ho’i e pēhi ia rātou i te ’ōfa’i, ’ia vaiihohia rā rātou ’ia haere noa i roto i tō rātou mau fare, ’e tō rātou mau hiero, ’e tō rātou mau fare mo’a ho’i.

3 ’Ia ti’a ia rātou ’ia haere ’e ’ia poro haere i te parau mai te au i tō rātou mau hina’aro, inaha ’ua fa’afāriuhia te ari’i i te Fatu, ’e tōna ’utuāfare pā’āto’a ; nō reira ’ua fa’atae atu ’oia i tāna fa’auera’a i tōna mau ta’ata ē ’ati noa a’e taua fenua ra, ’eiaha roa ’ia pāto’ihia te parau a te Atua, ’ia ha’apararehia rā te reira ē ’ati noa a’e taua fenua ato’a ra, ’ia ’ite pāpū tōna mau ta’ata i te mau peu tumu parauti’a ’ore a tō rātou mau metua, ’e ’ia ’ite pāpū ato’a rātou ē, e mau taea’e ana’e rātou pā’āto’a, ’e ’eiaha roa rātou ’ia taparahi i te ta’ata, ’ia haru, ’ia ’eiā, ’ia fa’aturi, ’e ’ia rave noa atu ho’i i te mau huru ’ohipa parauti’a ’ore ato’a.

4 ’E i teienei, i muri a’era, i tō te ari’i fa’ataera’a atu i teie fa’auera’a, ’ua haere atu ra Aarona ’e tōna mau taea’e i terā ’oire ’e i terā ’oire, ’e i terā fare purera’a ’e i terā fare purera’a, i te fa’ati’ara’a i te mau ’ēkālesia, ’e i te fa’ata’ara’a i te mau tahu’a ’e te mau ’orometua i rotopū i te mau ’āti Lamana ē ’ati noa a’e te fenua, nō te a’o ’e nō te ha’api’i i te parau a te Atua i rotopū ia rātou ; ’e ’ua ha’amata rātou i te manuia rahi.

5 ’E e rave rahi tauatini tei fa’afāriuhia mai i te ’ite i te Fatu, ’oia ïa, e rave rahi tauatini tei fa’afāriuhia ’ia ti’aturi i te mau peu tumu a te mau ’āti Nephi ; ’e ’ua ha’api’ihia rātou i te mau pāpa’a parau ’e te mau parau tohu i tu’uhia mai ē tae roa mai i taua taime ra.

6 ’E tē ora mau nei te Fatu, ’e ’o rātou e rave rahi ’o tei ti’aturi, ’e ’o rātou e rave rahi ’o tei fa’afāriuhia mai i te ’ite i te parau mau ra, nā roto i te a’ora’a a Amona ’e tōna ra mau taea’e, mai te au i te vārua nō te heheura’a ’e nō te tohu, ’e te mana ho’i o te Atua tei rave i te mau semeio i roto ia rātou ra—’oia ïa, tē parau atu nei au ia ’outou, tē ora mau nei te Fatu, ’e te mau ’āti Lamana ato’a ’o tei ti’aturi i tā rātou a’ora’a, ’e tei fa’afāriuhia i te Fatu ra, ’aita roa ïa rātou i tāiva.

7 ’E ’ua riro ho’i rātou ’ei feiā parauti’a ; ’ua vaiiho rātou i tā rātou mau mauha’a tama’i nō te ’ōrurehau i raro, ’e ’aita rātou i tama’i fa’ahou i te Atua, ’e ’aita ato’a i tō rātou mau taea’e.

8 I teienei, ’o rātou teie tei fa’afāriuhia i te Fatu :

9 Te mau ta’ata o te mau ’āti Lamana i pārahi na i te fenua ra nō Isema’ela ;

10 ’E te mau ta’ata ato’a o te mau ’āti Lamana i pārahi na i te fenua ra nō Midoni ;

11 ’E te mau ta’ata ato’a o te mau ’āti Lamana i pārahi na i te ’oire ra nō Nephi ;

12 ’E te mau ta’ata ato’a o te mau ’āti Lamana i pārahi na i te fenua ra nō Siloma, ’e tei pārahi na ho’i i te fenua ra nō Semelona, ’e i te ’oire ra nō Lemuela, ’e i te ’oire ra ho’i nō Simaniloma.

13 ’E teie te mau i’oa o te mau ’oire o te mau ’āti Lamana tei fa’afāriuhia mai i te Fatu ; ’e ’o rātou ho’i teie tei vaiiho i tā rātou mau mauha’a tama’i nō te ’ōrurehau i raro, ’oia ïa, i tā rātou mau mauha’a tama’i ato’a ; ’e e mau ’āti Lamana ana’e ho’i rātou ato’a.

14 ’E ’aita te mau ’āti Amaleka i fa’afāriuhia mai, maori rā hō’ē noa iho ; ’e ’aita ato’a te hō’ē o te mau ’āti Amulona ; ’ua fa’a’eta’eta rā rātou i tō rātou ’ā’au, ’e te ’ā’au ato’a ho’i o te mau ’āti Lamana i taua tufa’a nō te fenua i pārahihia e rātou ra ; ’oia ïa, tō rātou mau ’oire ri’i pā’āto’a ’e tō rātou mau ’oire rarahi pā’āto’a.

15 Nō reira, ’ua fa’ahiti mātou i te i’oa o te mau ’oire ato’a o te mau ’āti Lamana ’o tei tātarahapa ’e tei fāri’i i te ’ite nō te parau mau, ’e tei fa’afāriuhia mai.

16 ’E i teienei, i muri a’era, ’ua hina’aro ihora te ari’i ’e te mau ta’ata ato’a ho’i tei fa’afāriuhia mai ’ia fāri’i i te hō’ē i’oa, ’ia ta’a-maita’i-hia rātou i tō rātou mau taea’e ; nō reira ’ua paraparau atu te ari’i ia Aarona ’e i tō rātou mau tahu’a e rave rahi, nō ni’a i te i’oa ’o tā rātou e ma’iri i ni’a iho ia rātou, ’ia ta’a-maita’i-hia rātou e te tahi atu mau ta’ata.

17 ’E i muri a’era, ’ua ma’iri ihora rātou i tō rātou i’oa o Aneti-Nephi-Lehi ; ’e ’ua parauhia rātou i taua i’oa ra, ’e ’aita atu ra rātou i parau-fa’ahou-hia e mau ’āti Lamana.

18 ’E ’ua riro a’era rātou ’ei feiā itoito ; ’oia ïa, ’e ’ua riro rātou ’ei hoa nō te mau ’āti Nephi ; nō reira, ’ua ha’amata ihora rātou i te fa’ahoa ia rātou, ’e ’aita roa te ’anatemara’a a te Atua i ma’iri fa’ahou mai i ni’a ia rātou.