1 ’E i teienei, e tā’u tamaiti e Helamana, tē fa’aue atu nei au ia ’oe na ’ia rave ’oe i te mau pāpa’a parau i tu’uhia mai iā’u nei.

2 ’E tē fa’aue ato’a atu nei au ia ’oe ’ia pāpa’i ’oe i te hō’ē pāpa’a parau nō teie nei feiā mai tā’u i nā reira, i ni’a iho i te mau ’api a Nephi ra, ’e ’ia tāpe’a i teie mau mea ato’a ’o tā’u i ha’apa’o na ma te mo’a, ’oia ïa mai tā’u i ha’apa’o na i te reira ; ’e nō te hō’ē tumu pa’ari ho’i i ha’apa’ohia ai te reira.

3 ’E tei ni’a ho’i i teie nei mau ’api veo teie mau ’ō’otira’a, ’e tei roto i te reira te mau pāpa’a parau nō te mau pāpa’ira’a mo’a, tei roto ato’a i te reira te tuatāpapara’a o tō tātou mau hui tupuna mai te mātāmua mai ā—

4 Inaha, i tohuhia na e tō tātou mau metua ē e mea ti’a roa i te reira ’ia ha’apa’ohia ’e ’ia hōro’ahia ho’i i terā u’i ’e i terā u’i, ’e ’ia ha’apa’ohia ’e ’ia fa’ahereherehia ho’i e te rima o te Fatu ē tae noa atu i te tau e tu’uhia atu ai i tō te mau nūna’a ato’a, ’e tō te mau ’ōpū ato’a, ’e tō te mau reo ato’a, ’e i te mau ta’ata ato’a, ’ia ’ite rātou i te mau parau ’aro i roto ra.

5 ’E i teienei, inaha, mai te mea e ha’apa’ohia te reira, e mea ti’a roa ’ia vai noa tō rātou ’ana’ana ; ’oia ïa, e ’ana’ana noa mai ā te reira ; ’oia ïa, ’e te mau ’api ato’a i pāpa’ihia i te parau mo’a ra.

6 I teienei ’ua mana’o paha ’oe ē, e mea ma’ama’a te reira iā’u nei ; inaha rā, tē parau atu nei au ia ’oe, nā roto i te mau mea iti ’e te pāpū e fa’atupuhia ai te mau mea rarahi ; ’e nā te mau mea iti ho’i e fa’aha’amā pinepine atu i tei ’aravihi ra.

7 Tē ’ohipa noa nei ā te Fatu te Atua nā roto i te mau rāve’a nō te fa’atupu i tāna ra mau ’ōpuara’a rarahi ’e te mure ’ore ; ’e nā roto i te mau rāve’a iti roa e fa’aha’amā atu ai te Fatu i tei ’aravihi ra ’e e fa’atupu ai ho’i i te fa’aorara’a nō te mau ta’ata e rave rahi.

8 ’E i teienei, i mua a’enei ’ua hina’aro te Atua ’ia fa’ahereherehia teie nei mau mea ; inaha ho’i, ’ua fa’arahi te reira i te mēharo o teie nei feiā, ’oia ïa, ’e ’ua ha’apāpū mai ho’i ia rātou e rave rahi i tā rātou mau hapa, ’e ’ua arata’i mai ho’i ia rātou i te ’ite i tō rātou Atua ē tae noa atu i te fa’aorara’a o tō rātou vārua.

9 ’Oia ïa, tē parau atu nei au ia ’oe, ’āhiri ’aita teie nei mau mea i pāpa’ihia i roto i teie mau pāpa’a parau i ni’a i teie nei mau ’api, ’aita ïa e ti’a ia Amona ’e tōna ra mau taea’e ’ia fa’afāriu ’ē i te mau ’āti Lamana e rave rahi tauatini i te peu tumu tano ’ore a tō rātou mau metua ; ’oia ïa, nā teie nei mau pāpa’a parau ’e tā rātou mau parau ho’i i arata’i mai ia rātou i te tātarahapa ; ’oia ho’i, ’ua arata’ihia mai rātou i te ’ite i te Fatu, i tō rātou ra Atua, ’e ’ia ’oa’oa ho’i ia Iesu Mesia, i tō rātou Tāra’ehara.

10 ’E ’o vai ho’i tē ’ite ē, e ’ore ānei te reira e riro ’ei rāve’a e arata’ihia mai ai rātou e rave rahi tauatini, ’oia ïa, ’e rātou ato’a e rave rahi tauatini o tō tātou mau taea’e ’ā’au ’eta’eta ra, ’oia ho’i te mau ’āti Nephi, ’o tē fa’a’eta’eta noa nei ā i tō rātou ’ā’au i roto i te hara ’e te mau ’ohipa ’ī’ino, i te ’ite i tō rātou ra Tāra’ehara ?

11 I teienei, ’aita ā teie nei mau parau ’aro i fa’a’ite-pāpū-hia mai iā’u nei ; nō reira ’ātīrā ïa i reira.

12 ’E ’ua nava’i noa ’ia parau ana’e au ē, nō te ’ōpuara’a pa’ari i pāpa’ihia ai te reira, ’e tei te Atua ana’e ho’i te ’ite i taua ’ōpuara’a ra ; ’e tē feruri ra ho’i ’oia ma te pa’ari i ni’a i tāna mau ’ohipa ato’a, ’e e mea tītī’aifaro tōna mau ’ē’a, ’e e mea mure ’ore tōna haere’a.

13 ’A ha’amana’o na, ’a ha’amana’o, e tā’u tamaiti e Helamana, e mea papu māite te mau fa’auera’a a te Atua. ’E tē nā ’ō ra ho’i ’oia : Mai te mea e ha’apa’o ’outou i tā’u mau fa’auera’a, e manuia ïa ’outou i ni’a i te fenua nei—ia ’ore rā ’outou e ha’apa’o i tāna ra mau fa’auera’a, e tāpū-’ē-hia ïa ’outou i tōna ra aro.

14 ’E i teienei, ’a ha’amana’o na, e tā’u tamaiti, nā te Atua i hōro’a mai i teie nei mau mea ia ’oe na, ’e e mea mo’a te reira, ’e ’ua ha’apa’o noa na ’oia i te reira ma te mo’a, ’e ’oia ato’a, e ha’apa’o ’e e fa’aherehere ’oia i te reira nō te hō’ē ’ōpuara’a pa’ari iāna ra, ’ia ti’a iāna ’ia fa’a’ite mai i tōna ra mana i te mau u’i a muri atu.

15 ’E i teienei, inaha, tē parau atu nei au ia ’oe nā roto i te vārua nō te tohu, mai te mea e ’ōfati ’oe i te mau fa’auera’a a te Atua, inaha, e rave-’ē-hia atu teie nei mau mea mo’a ia ’oe na e te mana o te Atua, ’e e tu’uhia atu ’oe ia Sātane ra, ’e e ha’apuehu ’oia ia ’oe mai te ota e puehu ’ē atu i te mata’i ra.

16 ’Ia ha’apa’o rā ’oe i te mau fa’auera’a a te Atua, ’e ’ia rave ho’i i teie nei mau mea mo’a mai tā te Fatu e fa’aue mai ia ’oe na, (e mea ti’a ho’i ia ’oe ’ia ani atu i te Fatu i te mau mea ato’a tā ’oe e rave i taua mau mea ra) inaha, ’aita roa e ti’a i te mana o te fenua ’e ’aore rā i tō hade ’ia rave atu i te reira ia ’oe na, tei te Atua ho’i te mana nō te fa’atupu i tāna ra mau parau ato’a.

17 ’E e fa’atupu ho’i ’oia i tāna mau parau ato’a ’o tāna e fafau atu ia ’oe na, ’e ’ua fa’atupu ho’i ’oia i tāna mau parau ’o tāna i fafau atu i tō tātou ra mau metua.

18 ’E ’ua fafau atu ho’i ’oia ia rātou ē, e fa’aherehere ’oia i teie nei mau mea nō te hō’ē ’ōpuara’a pa’ari iāna ra, ’ia ti’a iāna ’ia fa’a’ite mai i tōna ra mana i te mau u’i a muri atu.

19 ’E i teienei, inaha, ’ua fa’atupu ’oia i te tahi ’ōpuara’a, ’oia ho’i ’ua fa’aho’i fa’ahou ’oia i te mau ’āti Lamana e rave rahi tauatini ’ia ’ite i te parau mau ; ’e ’ua fa’a’ite ato’a mai ’oia i tōna ra mana nā roto i teie mau mea, ’e e fa’a’ite mai ā ho’i ’oia i tōna ra mana nā roto i te reira i te mau u’i a muri atu ; nō reira e fa’ahereherehia te reira.

20 Nō reira, tē fa’aue atu nei au ia ’oe na, e tā’u tamaiti, e Helamana, ’ia fa’aitoito ’oe i te fa’atupura’a i tā’u ato’a ra mau parau, ’e ’ia fa’aitoito ato’a ho’i ’oe i te ha’apa’ora’a i te mau fa’auera’a a te Atua mai te au i tei pāpa’ihia ra.

21 ’E i teienei, e parau atu vau ia ’oe nō ni’a i te mau ’api e piti ’ahuru ’e ma maha ra, ’ia ha’apa’o ’oe i te reira, ’ia fa’a’itehia i teie nei feiā te mau parau ’aro, ’e te mau ’ohipa pōiri, ’e tā rātou mau ’ohipa huna, ’oia ho’i te mau ’ohipa huna a taua feiā i ha’amouhia ra ; ’oia ïa, ’ia fa’a’itehia tā rātou mau taparahira’a ta’ata, ’e tā rātou ’eiāra’a, ’e tā rātou mau harura’a, ’e tā rātou mau ’ohipa ’ī’ino ato’a ’e te mau ’ohipa vi’ivi’i ato’a, i teie nei feiā ; ’oia ïa, ’e ’ia fa’aherehere ho’i ’oe i teie nei mau ’īriti parau.

22 Inaha ho’i, ’ua ’ite mai te Fatu ē, tē ha’amata ra tōna mau ta’ata i te rave i te ’ohipa pōiri, ’oia ïa, i te rave huna ho’i i te ’ohipa taparahi ta’ata ’e te mau ’ohipa vi’ivi’i ; nō reira, ’ua parau mai te Fatu ē, ’ia ’ore rātou ’ia tātarahapa, e ha’amouhia rātou mai ni’a atu i te fenua nei.

23 ’E ’ua parau mai ra te Fatu : E fa’aineine au i te hō’ē ’ōfa’i nā tō’u tāvini ra nā Gazelema, ’o tē ’ana’ana mai i roto i te pōiri ’ia māramarama, ’ia fa’a’ite atu vau i tō’u ra mau ta’ata i tāvini mai iā’u nei, ’ia fa’a’ite atu vau ia rātou i te mau ’ohipa a tō rātou ra mau taea’e ; ’oia ïa, tā rātou mau ’ohipa huna, ’e tā rātou mau ’ohipa pōiri, ’e tā rātou mau ’ohipa ’ī’ino ’e te mau ’ohipa vi’ivi’i.

24 ’E i teienei, e tā’u tamaiti, ’ua fa’aineinehia teie mau ’īriti parau nō te fa’atupu i te parau a te Atua, ’o tāna i parau mai, i te nā-’ō-ra’a mai ē :

25 E hōpoi au i tā rātou mau ’ohipa huna ato’a ’e tā rātou mau ’ohipa vi’ivi’i ato’a mai roto mai i te pōiri i te māramarama ; ’e ’ia ’ore rātou ’ia tātarahapa, e ha’amou ïa vau ia rātou mai ni’a atu i te fenua nei ; ’e e fa’a’ite atu vau i tā rātou mau ’ohipa huna ato’a ’e te mau ’ohipa vi’ivi’i ato’a i te mau nūna’a ato’a ’o tē fāri’i i teie nei fenua a muri atu.

26 ’E i teienei, e tā’u tamaiti, ’ua ’ite taua ē, ’aita rātou i tātarahapa, nō reira ’ua ha’amouhia rātou, ’e nō reira ē tae roa a’enei i teienei ’ua fa’atupuhia te parau a te Atua ra ; ’oia ïa, ’ua hōpoihia tā rātou mau ’ohipa huna ’e te vi’ivi’i nō roto mai i te pōiri ’e ’ua fa’a’itehia mai ia tātou nei.

27 ’E i teienei, e tā’u tamaiti, tē fa’aue atu nei au ia ’oe na ’ia tāpe’a ’oe i tā rātou ato’a ra mau tapura’a, ’e tā rātou mau fafaura’a, ’e tā rātou mau parau fa’aau i roto i tā rātou mau ’ohipa huna ’e te vi’ivi’i ; ’oia ïa, ’e tā rātou ato’a ra mau tāpa’o ’e tā rātou ato’a ra mau piri, ’eiaha ’oe e fa’a’ite noa atu i teie nei feiā, ’ia ’ore rātou ’ia ’ite i te reira, ’o te ma’iri ato’a rātou i roto i te pōiri ’e ’a ha’amouhia ai.

28 Inaha ho’i, tē vai nei te ’anatemara’a i ni’a iho i teie nei fenua tā’āto’a ; e tae mai te ha’amoura’a i ni’a iho i te mau ta’ata ato’a e rave i te ’ohipa pōiri i te taime ’ua ’ī roa rātou i te reira, mai te au i te mana o te Atua ; nō reira, tē hina’aro nei au ’ia ’ore teie nei feiā ’ia ha’amouhia.

29 Nō reira, e tāpe’a noa ’oe i teie mau ’ōpuara’a huna nō tā rātou ra mau tapura’a ’e tā rātou mau fafaura’a i teie nei feiā, ’e teie ana’e tā ’oe e fa’a’ite atu ia rātou, ’oia ho’i, tā rātou mau ’ohipa ’ī’ino ’e tā rātou mau taparahira’a ta’ata ’e tā rātou mau ’ohipa vi’ivi’i ; ’e e ha’api’i atu ho’i ’oe ia rātou ’ia fa’aru’e atu i taua mau ’ohipa ’ī’ino ra ’e te mau ’ohipa vi’ivi’i ’e te mau taparahira’a ta’ata ; ’e e ha’api’i ato’a atu ’oe ia rātou ē, ’ua ha’amouhia teie mau ta’ata nō tā rātou mau ’ohipa ’ī’ino ’e te mau ’ohipa vi’ivi’i ’e tā rātou mau taparahira’a ta’ata.

30 Inaha ho’i, ’ua taparahi rātou i te mau peropheta ato’a a te Fatu i haere mai i rotopū ia rātou ra nō te fa’a’ite atu ia rātou i tā rātou mau ’ohipa ’ī’ino ; ’e tē pi’i atu ra te toto o te feiā i taparahihia i te Fatu tō rātou Atua, ’ia tāho’ohia tei taparahi mai ia rātou ra ; ’e nō reira ’ua tae mai te mau ha’avāra’a a te Atua i ni’a iho i taua feiā i rave i te ’ohipa pōiri ’e te mau pupu ’ohipa huna.

31 ’Oia ïa, ’ia ’anatemahia te fenua nei ē a muri ē a muri noa atu i te feiā e rave i te ’ohipa i roto i te pōiri ’e te mau pupu ’ohipa huna, ē tae noa atu i te ha’amoura’a, maori rā ’ia tātarahapa rātou hou rātou e ’ī roa ai i te ’ino.

32 ’E i teienei, e tā’u tamaiti, ’a ha’amana’o ’oe i te mau parau tā’u i parau atu ia ’oe na ; ’eiaha e tu’u noa atu i taua mau ’ōpuara’a huna ra i teie nei feiā, ’a ha’api’i rā ia rātou ’ia au ’ore atu i te hara ’e te mau ’ohipa ’ī’ino.

33 ’A a’o atu ia rātou i te tātarahapa, ’e te fa’aro’o i te Fatu ra ia Iesu Mesia ; ’a ha’api’i atu ia rātou ’ia fa’aha’eha’a ia rātou iho, ’ia marū ’e ’ia ha’eha’a ho’i te ’ā’au ; ’a ha’api’i atu ho’i ia rātou ’ia pāto’i atu i te mau fa’ahemara’a ato’a a te diabolo, ma tō rātou fa’aro’o i te Fatu ra ia Iesu Mesia.

34 ’A ha’api’i atu ia rātou ’eiaha roa rātou e fiu i te mau ’ohipa maita’i, ’ia marū rā, ’e ’ia ha’eha’a te ’ā’au ; ’e e fāri’i rātou i te fa’afa’aeara’a nō tō rātou vārua.

35 ’A ha’amana’o, e tā’u tamaiti, ’e ’a ha’api’i mai i te pa’ari i tō ’oe ’āpīra’a ; ’oia ïa, ’a ha’api’i mai i roto i tō ’oe ’āpīra’a ’ia ha’apa’o i te mau fa’auera’a a te Atua.

36 ’Oia ïa, ’a ti’aoro atu i te Atua ’ia tauturu mai ’oia ia ’oe i te mau mea ato’a ra ; ’oia ïa, ’e te mau mea ato’a tā ’oe e rave ra, ’ia ravehia ïa nō te Fatu ra, ’e te mau vāhi tā ’oe e haere, ’ia haerehia ïa nā roto i te Fatu ra ; ’oia ïa, ’ia vai māite tō ’oe mau mana’o i te Fatu ra ; ’oia ïa, ’ia tu’uhia te aroha o tō ’ā’au i ni’a i te Fatu ra ē a muri noa atu.

37 ’A paraparau atu i te Fatu i te mau mea ato’a tā ’oe e rave ra, ’e nāna ho’i ’oe e arata’i i te maita’i ; ’oia ïa, ’ia ta’oto ’oe i te ru’i ra, ’a ta’oto ïa i te Fatu ra, ’ia tīa’i māite mai ’oia ia ’oe i tō ’oe nā ta’otora’a ; ’e ’ia ti’a mai ’oe i te po’ipo’i ra, ’ia ’ī tō ’oe ’ā’au i te ha’amaita’i i te Atua ra ; ’e ’ia rave ’oe i teie mau mea ra, e fa’ateiteihia ïa ’oe ’ia tae i te mahana hope’a ra.

38 ’E i teienei, e tā’u tamaiti, e parau ri’i tā’u e parau atu nō ni’a i te mea i parauhia e tō tātou mau metua e pōpō, ’e ’aore rā e ’avei’a—’e ’ua ma’iri tō tātou mau metua i te i’oa o te reira e Liahona, tōna aura’a ’ia ’īritihia e ’avei’a ïa ; ’e nā te Fatu ho’i i fa’aineine i te reira.

39 ’E inaha, ’aita roa e ti’a i te hō’ē ta’ata ’ia hāmani i te hō’ē ’ohipa mai te reira te huru o te fa’ahiahia. ’E inaha, ’ua hāmanihia te reira nō te fa’a’ite i tō tātou mau metua i te ’ē’a ’o tā rātou e haere atu nā roto i te mēdēbara.

40 ’E ’ua arata’i te reira ia rātou mai te au i tō rātou fa’aro’o i te Atua ; nō reira, mai te mea e fa’aro’o tō rātou nō te ti’aturi ē e ti’a i te Atua ’ia fa’atano i nā nira i te ’ē’a e haerehia e rātou ra, inaha, ’ua nā-reira-hia ihora ; nō reira, ’ua fāri’i rātou i teie semeio, ’e e rave rahi atu ā mau semeio i ravehia e te mana o te Atua, i terā mahana ’e i terā mahana.

41 ’Āre’a rā, nō te mea ’ua ravehia taua mau semeio ra nā roto i te rāve’a iti ra, i fa’a’itehia mai ai te ’ohipa ’ūmere rahi ia rātou ra. E mea fa’atau rātou, ’e ’ua mo’ehia ia rātou ’ia fa’a’ohipa i tō rātou fa’aro’o ’e te itoito, ’e nō reira ’ua fa’a’orehia taua mau ’ohipa ’ūmere ra, ’e ’ua ha’amaorohia tō rātou tere.

42 Nō reira, ’ua pārahi maoro rātou i roto i te mēdēbara, ’e ’aita rātou i haere ’āfaro atu, ’e ’ua ha’afifihia rātou e te po’ia ’e te po’ihā nō tā rātou mau hara.

43 ’E i teienei, e tā’u tamaiti, ’ua hina’aro vau ’ia ’ite ’oe ē, e ’ere te reira i te mea faufa’a ’ore ; nō te fa’atau ho’i o tō tātou mau metua i te ha’apa’o i te arata’ira’a a teie nei ’avei’a (e mau mea teie o te tino nei) i ’ore ai rātou i manuia ; ’oia ato’a i tā te vārua.

44 Inaha ho’i, e mea ’ōhie ’ia ha’apa’o i te parau a te Mesia, ’o tē fa’a’ite mai ia ’oe i te ’ē’a tītī’aifaro e tae atu ai i te ’oa’oa mure ’ore ra, ’oia ato’a e mea ’ōhie tā tō tātou mau metua ha’apa’ora’a i te arata’ira’a a teie ’avei’a, ’o tei fa’a’ite mai ia rātou i te ’ē’a tītī’aifaro e tae atu ai i te fenua i fafauhia ra.

45 ’E i teienei, tē parau atu nei au, ’aita ānei tō teie mea e taipe ? Mai tā teie ’avei’a ho’i i arata’i mai i tō tātou mau metua, nā roto i tō rātou pe’era’a i te ’ē’a i fa’a’itehia mai e te reira, e tae atu ai i te fenua i fafauhia ra, ’e nā reira ato’a te mau parau a te Mesia i te arata’i ia tātou, mai te mea e pe’e tātou i te reira, e tae atu ai i te tahi pae mai nō teie nei peho nō te ’oto i roto i te tahi fenua maita’i roa a’e i fafauhia mai.

46 E tā’u tamaiti, ’eiaha tātou e fa’atau noa nō te ’ōhie o te ’ē’a ; ’e ’ua nā reira ho’i tō tātou mau metua ; ’e ’ua tu’uhia mai ho’i te rāve’a ia rātou, ’e ’ia hi’o noa atu rātou, e ora ïa rātou ; e mai te reira ato’a ho’i ia tātou nei. ’Ua fa’aineinehia te ’ē’a, ’e ’ia hi’o noa atu tātou, e ora ïa tātou ē a muri noa atu.

47 ’E i teienei, e tā’u tamaiti, ’a ha’apa’o maita’i ’oe i teie mau mea mo’a ; ’oia ïa, ’a hi’o atu i te Atua ’e ’a ora. ’A haere atu i teie nei feiā ’e ’a fa’a’ite atu i te parau ma te ha’apa’o maita’i. E tā’u tamaiti, ’a pārahi.