1 ’E i muri a’era, ’ia fa’aoti a’era ’oia i tāna paraura’a atu i te mau ta’ata, e rave rahi tei ti’aturi i tāna mau parau, ’e ’ua ha’amata ihora i te tātarahapa, ’e i te ’imi i te mau pāpa’ira’a mo’a.

2 ’Ua hina’aro rā te tahi pae rahi o rātou i te taparahi ia Alama rāua ’o Amuleka : ’ua riri ho’i rātou ia Alama, nō te pāpū o tāna mau parau ia Zeezeroma ; ’e ’ua parau ato’a rātou ē, ’ua ha’avare Amuleka ia rātou, ’e ’ua fa’a’ino i tā rātou ture, ’e tō rātou mau pāruru ture ’e te mau ha’avā.

3 ’E ’ua riri ato’a rātou ia Alama rāua ’o Amuleka ; ’e nō te mea ’ua fa’a’ite pāpū rāua nō ni’a i tā rātou mau ’ohipa ’ī’ino, ’ua tītau atu ra rātou ’ia taparahi huna ia rāua.

4 ’E i muri a’era, ’aita rātou i nā reira ; ’ua rave rā rātou ia rāua ’e ’ua ru’uru’u ia rāua i te taura pa’ari, ’e ’ua hōpoi atu ra ia rāua i mua i te ha’avā rahi o te fenua.

5 ’E ’ua haere atu ra te mau ta’ata ’e ’ua pari atu ra ia rāua—ma te fa’a’ite atu ē, ’ua fa’a’ino rāua i te ture, ’e tō rātou mau pāruru ture ’e te mau ha’avā o te fenua, ’e te mau ta’ata ato’a o te fenua ; ’e ’ua fa’a’ite mai rāua ē, hō’ē noa iho Atua, ’e e tono mai ’oia i tāna Tamaiti i rotopū i te mau ta’ata, ’āre’a rā ’aita ’oia e fa’aora ia rātou ; ’e e rave rahi te mau mea mai te reira te huru tā te mau ta’ata i pari atu ia Alama rāua ’o Amuleka. I teienei ’ua ravehia teie i mua i te ha’avā rahi o te fenua.

6 ’E i muri a’era, ’ua māere roa ihora Zeezeroma i te mau parau i parauhia ; ’e ’ua ’ite ato’a ’oia i te pōiri o te mana’o o tāna i fa’atupu i rotopū i te mau ta’ata nā roto i tāna mau parau ha’avare ; ’e ’ua ha’amata ihora tōna vārua i te ahoaho ’a ha’amana’o ai ’oia i tāna ihora hara ; ’oia ïa, ’e ’ua ha’amata ato’a ’oia i te ha’a’atihia e te mau māuiui o hade.

7 ’E i muri a’era, ’ua ti’aoro atu ra ’oia i te mau ta’ata, i te nā-’ō-ra’a ē : Inaha, ’ua hara vau, ’e e mea pōra’o ’ore teie nā ta’ata i mua i te Atua. ’E ’ua ha’amata ihora ’oia ’ia pāruru atu ia rāua mai taua atu taime ra ; ’āre’a rā ’ua fa’a’ino mai ra rātou iāna, i te nā-’ō-ra’a mai ē : ’Ua uru-ato’a-hia ānei ’oe e te diabolo ? ’E ’ua tūtuha mai ra rātou i ni’a iāna, ’e ’ua ti’avaru atu ra iāna i rāpae mai rotopū atu ia rātou, ’e rātou ato’a ho’i ’o tei ti’aturi i te mau parau i parauhia e Alama rāua ’o Amuleka ; ’e ’ua ti’avaru atu ra rātou ia rātou i rāpae, ’e ’ua tono atu ra i te mau ta’ata ’ia pēhi ia rātou i te ’ōfa’i.

8 ’E ’ua ha’aputuputu mai ra rātou i tā rātou mau vahine ’e mau tamari’i i te vāhi hō’ē, ’e ’o rātou ato’a ’o tei ti’aturi ’e ’aore rā ’o tei ha’api’ihia ’ia ti’aturi i te parau a te Atua, ’ua hurihia ïa rātou i roto i te auahi ; ’e ’ua ’āfa’i ato’a mai ra rātou i tā rātou mau pāpa’a parau ’e tei roto i te reira te mau pāpa’ira’a mo’a, ’e ’ua huri ato’a atu ra i te reira i roto i te auahi, ’ia ’ama ’e ’ia pau i te auahi.

9 ’E i muri a’era, ’ua rave atu ra rātou ia Alama rāua ’o Amuleka, ’e ’ua hōpoi mai ra ia rāua i te vāhi taparahira’a, ’ia ’ite atu rāua i te pohe ’o tei pau i te auahi.

10 ’E ’ia ’ite a’era Amuleka i te māuiui o te mau vahine ’e te mau tamari’i i te ’amara’a i te auahi, ’ua māuiui ato’a ihora ’oia ; ’e ’ua parau atu ra ’oia ia Alama : Nāhea e ti’a ai ia taua ’ia hi’o i teie nei mea ri’ari’a ? Nō reira, e fa’atoro atu taua i tō taua rima, ma te fa’a’ohipa i te mana o te Atua e vai nei i roto ia taua, ’e e fa’aora ia rātou i te auahi.

11 ’Āre’a rā ’ua parau atu ra Alama iāna : ’Ua fa’ahepohia vau e te Vārua ē ’eiaha vau e fa’atoro atu i tō’u rima ; inaha ho’i, e fāri’i mai te Fatu ia rātou iāna ra i roto i te hanahana ; ’e ’ua fa’ati’a ’oia ’ia nā reira rātou i te rave i teie mea, ’e ’aore rā ’ia rave te mau ta’ata i teie mea i ni’a ia rātou, mai te au i te ’eta’eta o tō rātou ’ā’au, ’e te mau ha’avāra’a tāna e fa’atae mai i ni’a ia rātou i roto i tōna riri ’ū’ana e mea ti’a ïa ; ’e e riro te toto o te feiā hara ’ore ’ei ’ite nō te fa’ahapa ia rātou, ’oia ïa, e pi’i fa’ahapa mai te reira ia rātou i te mahana hope’a ra.

12 I teienei, ’ua nā ’ō atu ra Amuleka ia Alama : Inaha, e riro paha rātou i te tūtu’i ato’a ia taua.

13 ’E ’ua nā ’ō mai ra Alama : ’A vaiiho noa ’ia au i te hina’aro o te Fatu. Inaha rā, ’aita tā taua ’ohipa i oti ; nō reira e’ita roa e ti’a ia rātou ’ia tūtu’i ia taua.

14 I teienei, i muri a’era, ’ia pau a’era te mau tino o te feiā i hurihia i roto i te auahi, ’e te mau pāpa’a parau ato’a i hurihia e rātou ato’a i roto i te auahi ra, ’ua haere mai ra te ha’avā rahi o te fenua ’e ’ua ti’a mai ra i mua ia Alama rāua ’o Amuleka ’a ru’uru’uhia ai rāua i te taura ra ; ’e ’ua po’ara mai ra i tō rāua nā pāpāri’a i tōna rima, ’e ’ua nā ’ō mai ra ia rāua : I muri iho i teie mau mea tā ’ōrua i ’ite, e a’o fa’ahou ānei ’ōrua i teie nei feiā, ’e ’a hurihia atu ai rātou i roto i te hō’ē roto auahi ’e te gopheri ?

15 Inaha, tē ’ite nei ’ōrua ē, ’aita tō ’ōrua e mana ’ia fa’aora i te feiā i hurihia i roto i te auahi ; ’aita ato’a te Atua i fa’aora ia rātou, noa atu hō’ē ā tā rātou fa’aro’o ’e tā ’ōrua. ’E ’ua po’ara fa’ahou mai ra te ha’avā i tō rāua nā pāpāri’a, ma te ani mai : E aha tā ’ōrua parau nō ni’a ia ’ōrua iho na ?

16 I teienei, e ha’avā teie nō te fa’anahora’a nō te fa’aro’o a Nehora, ’oia tei taparahi ia Gideona.

17 ’E i muri a’era, ’aita roa ’o Alama rāua ’o Amuleka i pāhono noa atu iāna ; ’e ’ua po’ara fa’ahou mai ra ’oia ia rāua, ’e ’ua tu’u atu ra ia rāua i te feiā tōro’a ’ia hurihia i roto i te fare tāpe’ara’a.

18 ’E ’ia hope a’era nā mahana e toru i tō rāua vaira’a i roto i te fare tāpe’ara’a, ’ua haere mai ra e rave rahi mau pāruru ture, ’e te mau ha’avā, ’e te mau tahu’a, ’e te mau ’orometua, nō te ha’apa’ora’a a Nehora ; ’e ’ua haere mai ra rātou i roto i te fare tāpe’ara’a nō te hi’o ia rāua, ’e ’ua uiui mai ra rātou ia rāua i te mau parau e rave rahi ; ’aita rā rāua i pāhono atu ia rātou.

19 ’E i muri a’era, ’ua ti’a mai ra te ha’avā i mua ia rāua, ’e ’ua nā ’ō mai ra : Nō te aha ’aita ’ōrua i pāhono mai i te mau parau a teie nei feiā ? ’Aita ānei ’ōrua i ’ite ē, e mana tō’u ’ia tu’u atu ia ’ōrua i roto i te auahi ura ra ? ’E ’ua fa’aue atu ra ’oia ia rāua ’ia parau mai ; ’aita rā rāua i pāhono atu.

20 ’E i muri a’era, ’ua reva atu ra rātou ’e ’ua haere atu ra i tō rātou mau haere’a ; ’āre’a rā ’ua ho’i fa’ahou mai ra rātou i te po’ipo’i a’e, ’e ’ua po’ara fa’ahou mai ra te ha’avā ia rāua i ni’a i tō rāua nā pāpāri’a. ’E e rave rahi ato’a tei haere mai, ’e ’ua po’ara mai ra ia rāua, i te nā-’ō-ra’a mai ē : E ti’a fa’ahou mai ānei ’ōrua nō te fa’ahapa mai i teie nei feiā, ’e nō te fa’a’ino mai i tā mātou ture ? Mai te mea e mana rahi tō ’ōrua nō te aha ’aita ’ōrua i fa’aora ia ’ōrua iho ?

21 ’E e rave rahi te mau mea mai teie te huru tā rātou i parau atu ia rāua, ma te ’au’aura’a atu i tō rātou niho ia rāua, ’e te tūtuhara’a atu ho’i i ni’a ia rāua, i te nā-’ō-ra’a atu ē : E aha ïa tō mātou hi’ora’a ’ia fa’ahapahia mātou ?

22 ’E e rave rahi te mau mea mai te reira te huru, ’oia ïa, te mau mea ato’a mai te reira te huru, ’o tā rātou i parau atu ia rāua ; ’e i nā reira ho’i rātou i te tāhitohito atu ia rāua e rave rahi mau mahana. ’E ’ua tāpe’a rātou i te mā’a ’e te pape ia rāua, ’ia tupu tō rāua po’ia ’e te po’ihā ; ’e ’ua rave ato’a rātou i tō rāua mau ’ahu, ’ia vai taha’a noa rāua ; ’e ’ua ru’uru’uhia rāua i te mau taura pa’ari, ’e ’ua tāpe’ahia i roto i te fare tāpe’ara’a.

23 ’E i muri a’era, i muri iho i tō rāua fāri’ira’a i te ’ati e rave rahi mau mahana, (i te ’ahuru ma piti o te mahana, i te ’ahuru o te ’āva’e, i te ’ahuru o te matahiti nō te fa’aterera’a a te mau ha’avā i ni’a i te mau ta’ata o Nephi,) ’ua haere mai ra te ha’avā rahi o te fenua ra nō Amoniha, ’e e rave rahi o tō rātou mau ’orometua ’e tō rātou mau pāruru ture i roto i te fare tāpe’ara’a tei reira ’o Alama rāua ’o Amuleka i te ru’uru’ura’ahia i te mau taura.

24 ’E ’ua ti’a mai ra te ha’avā rahi i mua ia rāua, ’e ’ua po’ara fa’ahou mai ra ia rāua, ’e ’ua nā ’ō mai ra ia rāua : Mai te mea tei ia ’ōrua ra te mana o te Atua, ’a fa’aora ïa ia ’ōrua iho i teie mau tā’amura’a, ’e i reira mātou e ti’aturi ē, e ha’amou te Fatu i teie nei feiā mai te au i tā ’ōrua mau parau.

25 ’E i muri a’era, ’ua haere mai ra rātou pā’āto’a ’e ’ua tūpa’i mai ra ia rāua, ma te parau mai i te hō’ē ā mau parau, ē tae noa atu ho’i i te ta’ata hope’a ; ’e ’ia hope a’era tā te ta’ata hope’a paraura’a atu ia rāua, ’ua tae mai ra te mana o te Atua i ni’a iho ia Alama rāua ’o Amuleka, ’e ’ua ti’a a’era rāua i ni’a, ma te ti’a māite i ni’a i tō rāua ’āvae.

26 ’E ’ua ti’aoro atu ra Alama, i te nā-’ō-ra’a ē : E aha te maoro tā māua e fa’a’oroma’i i teie nei mau ’ati rahi, e te Fatu ? E te Fatu, ’a hōro’a mai na ’oe i te pūai ia māua mai te au i tō māua fa’aro’o i te Mesia, ē tae noa atu ’ua fa’aorahia. ’E ’ua motu ihora ia rāua te mau taura i ru’uru’uhia i ni’a ia rāua ; ’e ’ia ’ite a’era te mau ta’ata i te reira, ’ua ha’amata ihora rātou i te horo, nō te mata’u ’o tē tae mai te pohe i ni’a iho ia rātou.

27 ’E i muri a’era, nō te rahi o tō rātou mata’u, ’ua ma’iri ihora rātou i raro i te repo, ’e ’aita ho’i rātou i tae i te ’ūputa hope’a ē tae atu ai i rāpae’au i te fare tāpe’ara’a ; ’e ’ua ’āueue ’ū’ana ihora te fenua, ’e ’ua pararī ihora te mau papa’i o te fare tāpe’ara’a nā te ’āfara’a, ’e ’ua topa ihora te reira i raro i te repo ; ’e nā roto i te topara’a mai te reira, ’ua pohe ihora te ha’avā rahi, ’e te mau pāruru ture, ’e te mau tahu’a, ’e te mau ’orometua, ’o tei tūpa’i ia Alama rāua ’o Amuleka.

28 ’E ’ua haere mai ra Alama rāua ’o Amuleka i rāpae’au i te fare tāpe’ara’a, ’e ’aita roa rāua i pēpē ; ’e ’ua hōro’a mai ho’i te Fatu i te mana ia rāua, mai te au i tō rāua fa’aro’o i te Mesia. ’E ’ua haere ti’a mai rāua mai roto mai i te fare tāpe’ara’a ; ’e ’ua matara tō rāua mau tā’amura’a ; ’e ’ua marua taua fare tāpe’ara’a i raro i te repo, ’e ’ua pohe te mau ta’ata ato’a i roto, maori rā ’o Alama rāua ’o Amuleka ; ’e ’ua haere ti’a atu ra rāua i roto i te ’oire.

29 I teienei, ’ia fa’aro’o a’era te mau ta’ata i te haruru rahi, ’ua horo ’āmui mai ra rātou i roto i te mau pupu ta’ata ’ia ’ite i te tumu ; ’e ’ia ’ite a’era rātou ia Alama rāua ’o Amuleka i te haerera’a mai i rāpae i te fare tāpe’ara’a, ’o tei topa te mau papa’i i raro i te repo, ’ua ro’ohia ihora rātou i te mata’u rahi, ’e ’ua horo ’ē atu ra mai mua atu i te aro o Alama rāua ’o Amuleka, mai te pua’aniho e horo ra ’e tōna fanau’a mai mua atu i nā liona e piti ; ’e i nā reira rātou i te horo ’ē atu i te aro o Alama rāua ’o Amuleka.