1 ’Āhiri au e melahi, ’e e roa’a mai ho’i iā’u te hina’aro o tō’u nei ’ā’au, e ti’a ai iā’u ’ia haere ’e ’ia parau ma te pū a te Atua ra, ’e ma te reo e rurutaina ai te fenua nei, ’e ’ia a’o atu i te parau nō te tātarahapa i te mau ta’ata ato’a !

2 ’Oia ïa, e fa’a’ite māite atu vau i te mau ta’ata tāta’itahi ato’a, ma te reo o te pātiri i te parau nō te tātarahapa ’e te ’ōpuara’a nō te fa’aorara’a, ’ia tātarahapa rātou ’e ’ia haere mai i tō tātou Atua, ’ia ’ore roa te ’oto ’ia vai fa’ahou nā roto i te ao ato’a nei.

3 Inaha rā, e ta’ata noa vau nei, ’e tē hara nei au i roto i tō’u nei hina’aro ; e mea ti’a ho’i iā’u ’ia māuruuru i te mau mea tā te Fatu i hōro’a mai iā’u nei.

4 E’ita roa ho’i i te mea ti’a iā’u nei ’ia fa’aahoaho i tō’u nei mau hina’aro i te fa’auera’a mana a te Atua parauti’a, ’e ’ua ’ite au ē, ’ua hōro’a mai ’oia i te ta’ata nei i tei au i tō rātou hina’aro, i te pohe ’e ’aore rā i te ora ; ’oia ïa, ’ua ’ite au ē, ’ua hōro’a mai ’oia i te ta’ata nei, ’oia ïa, ’ua hōro’a ’oia i te mau fa’auera’a mana ia rātou ’o tē ’ore e ti’a ’ia fa’ahuru-’ē-hia, mai te au i tō rātou mau hina’aro, te fa’aorara’a ’e ’aore rā te pohe.

5 ’Oia ïa, ’ua ’ite au ē, ’ua tae mai te maita’i ’e te ’ino i mua i te mau ta’ata ato’a ; ’o ’oia ’o tē ’ore e ’ite i te maita’i ’e te ’ino ra, e ’ore roa ïa ’oia e fa’ahapahia ; ’o ’oia rā ’o tē ite i te maita’i ’e te ’ino, e hōro’ahia mai ïa iāna i tei au i tōna mau hina’aro, i te maita’i ’e ’aore rā i te ’ino, i te ora ’e ’aore rā i te pohe, i te ’oa’oa ’e ’aore rā i te ’ā’au taiā.

6 I teienei, nō te mea ’ua ’ite mau vau i teie mau mea, nō te aha ïa vau i hina’aro rahi atu ai i te tahi atu ā, i te ’ore e rave noa i te ’ohipa i pi’ihia ai au ra ?

7 Nō te aha vau e hina’aro ai ’ia riro ’ei melahi, ’ia ti’a iā’u ’ia parau atu i te mau hope’a ato’a o te fenua nei ?

8 Inaha ho’i, tē hōro’a ra te Fatu i te mau nūna’a ato’a, te ta’ata nō roto i tō rātou iho nūna’a ’e tō rātou iho reo, ’ia ha’api’i atu i tāna ra parau ; ’oia ïa, ’o te mau mea ato’a tāna e mana’o i roto i tōna pa’ari e au ia rātou ; nō reira tē ’ite nei tātou ē, tē feruri ra te Fatu ma te pa’ari i tei au i tā te parauti’a ’e te parau mau.

9 ’Ua ’ite au i tā te Fatu i fa’aue mai iā’u ra, ’e tē ’oa’oa nei au i te reira. ’Aita vau i ’oa’oa iā’u iho, tē ’oa’oa nei rā vau i tā te Fatu i fa’aue mai iā’u ; ’oia ïa, ’e ’o teie ïa tō’u ’oa’oa, penei a’e ’o te riro vau ’ei mauha’a i te rima o te Atua nō te arata’i i te tahi mau ta’ata i te tātarahapara’a ; ’e ’o te reira ïa tō’u ’oa’oara’a.

10 ’E inaha, ’ia ’ite au i tō’u ra mau taea’e e rave rahi ma te ’ā’au tātarahapa mau ra, ’e i te haerera’a mai i te Fatu tō rātou Atua, ’ua ’ī roa ihora tō’u ’ā’au i te ’oa’oa i reira ; ’e ’ua ha’amana’o ihora ho’i au i tā te Fatu i rave nō’u ; ’oia ïa, ’ua fa’aro’o mai ’oia i tā’u ra pure ; ’oia ïa, ’e i reira ’ua ha’amana’o ihora vau i tōna ra rima aroha i fa’atorohia mai iā’u nei ra.

11 ’Oia ïa, ’e ’ua ha’amana’o ato’a vau i te fa’atītīra’ahia tō’u ra mau metua ; ’e ’ua ’ite pāpū ho’i au ē, ’ua fa’aora te Fatu ia rātou i te fa’atītīra’a, ’e nā roto i te reira ’oia i fa’ati’a ai i tāna ’ēkālesia ; ’oia ïa, nā te Fatu te Atua, te Atua nō Aberahama, te Atua nō Isaaka, ’e te Atua ho’i nō Iakoba, i fa’aora ia rātou i te fa’atītīra’a.

12 ’Oia ïa, ’ua ha’amana’o noa vau i te fa’atītīra’ahia tō’u ra mau metua ; ’e nā taua ato’a iho Atua i fa’aora ia rātou i te rima o tō ’Aiphiti i fa’aora ato’a ia rātou i te fa’atītīra’a.

13 ’Oia ïa, nā taua ato’a iho Atua ra i fa’ati’a i tāna ’ēkālesia i rotopū ia rātou ; ’oia ïa, ’e nā taua ato’a iho Atua ra i pi’i iā’u i teie nei pi’ira’a mo’a, ’ia a’o atu i te parau i teie nei feiā ; ’e ’ua ha’amanuia maita’i mai ’oia iā’u, ’e i roto i te reira i ’ī ai tō’u ’oa’oa.

14 ’Āre’a rā ’aita vau i ’oa’oa nō tō’u ana’e iho manuiara’a, ’ua rahi atu ā rā tō’u nei ’oa’oa nō te manuiara’a ato’a o tō’u ra mau taea’e, ’o tei haere atu i ni’a i te fenua ra nō Nephi.

15 Inaha, ’ua rave itoito rātou i te ’ohipa, ’e ’ua fa’ahotu mai i te hotu rahi ; ’e ’ua rahi ho’i tā rātou utu’a maita’i !

16 I teienei, ’ia ha’amana’o ana’e au i te manuia o tō’u ra mau taea’e, ’ua hōpoi-’ē-hia ïa tō’u ra vārua, ’e ’ua riro ïa mai te mea ra ē, ’ua ta’a ’ē te tino i te vārua, nō te rahi o tō’u ra ’oa’oa.

17 ’E i teienei, ’ia ha’amaita’i mai te Atua i tō’u ra mau taea’e, ’ia pārahi rātou i roto i te bāsileia o te Atua ; ’oia ïa, ’e te mau ta’ata ato’a ho’i tā rātou i fa’afāriu mai nā roto i tā rātou mau ’ohipa ’e ’ia ’ore rātou ’ia haere fa’ahou i rāpae, ’ia ’ārue rā rātou iāna ē a muri noa atu. ’E ’ia fa’ati’a mai ho’i te Atua ’ia ravehia te reira mai te au i tā’u ra mau parau, ’oia ïa, mai tā’u i parau ra. ’Āmene.