1 I teienei, i muri a’era, ’ia fa’aoti a’era Amuleka i teie nei mau parau, ’ua fa’aātea ’ē atu ra rātou i taua mau ta’ata e rave rahi ra ’e ’ua haere atu ra i te fenua ra nō Ieresona.

2 ’Oia ïa, ’e ’ia fa’aoti a’era te toe’a o te mau taea’e i te a’ora’a i te parau i te mau ’āti Zorama ra, ’ua haere ato’a mai ra rātou i te fenua ra nō Ieresona.

3 ’E i muri a’era, i muri iho i tō te pae rahi o te mau ta’ata tu’iro’o nō te mau ’āti Zorama paraparau-’āmui-ra’a nō ni’a iho i te mau parau i a’ohia atu ia rātou, ’ua riri ihora rātou i taua parau ra, nō te mea ’ua ha’afifi te reira i tā rātou ’ohipa ha’avare, nō reira ’aita rātou i hina’aro ’ia fa’aro’o atu i taua mau parau ra.

4 ’E ’ua ha’aputuputu ihora rātou i te mau ta’ata ato’a ē ’ati noa a’e taua fenua ra i te vāhi hō’ē, ’e ’ua ’āparau ihora rātou ia rātou nō ni’a i te mau parau i parauhia.

5 I teienei, ’aita tō rātou mau tāvana ’e tō rātou mau tahu’a ’e tō rātou mau ’orometua i fa’a’ite atu i te mau ta’ata i tō rātou mau hina’aro ; nō reira ’ua ’imi huna noa rātou i te mau mana’o o te mau ta’ata ato’a.

6 ’E i muri a’era, ’ia ’ite a’era rātou i te mau mana’o o te mau ta’ata ato’a, ’ua ti’avaru atu ra rātou i rāpae i taua fenua ra, i te mau ta’ata ato’a ’o tei fāri’i i te mau parau tā Alama ’e tōna mau taea’e i parau atu ia rātou ; ’e e rave rahi ho’i rātou ; ’e ’ua haere mai ra rātou i te fenua ra nō Ieresona.

7 ’E i muri a’era, ’ua ha’api’i atu ra Alama ’e tōna mau taea’e ia rātou.

8 I teienei, ’ua riri ihora te mau ’āti Zorama i te mau ta’ata o Amona i pārahi i Ieresona ra, e ta’ata parauti’a ’ore ho’i te tāvana rahi o te mau ’āti Zorama, ’e ’ua tono atu ra ’oia i te hō’ē ve’a i te mau ta’ata o Amona ma te fa’a’ite atu i tōna hina’aro ia rātou ’ia ti’avaru atu rātou mai rotopū atu ia rātou i te mau ta’ata ato’a i haere mai i tō rātou fenua.

9 ’E ’ua fa’ahiti atu ra ’oia i te mau parau ha’amata’u e rave rahi ia rātou. ’E i teienei, ’aita te mau ta’ata o Amona i mata’u i tā rātou mau parau ; nō reira, ’aita rātou i ti’avaru atu ia rātou i rāpae, ’ua fāri’i rā rātou i te mau ta’ata veve ato’a o te mau ’āti Zorama i haere mai ia rātou ra ; ’e ’ua pāturu atu ia rātou, ’e ’ua fa’a’ahu ia rātou, ’e ’ua hōro’a atu ho’i i te tahi mau fenua ’ei ’āi’a nō rātou ; ’e ’ua tauturu atu ho’i ia rātou mai te au i tō rātou mau hina’aro.

10 I teienei, ’ua fa’ati’arepu ihora te reira i te mau ’āti Zorama ’ia riri atu i te mau ta’ata o Amona, ’e ’ua ha’amata ihora rātou i te ’āmui atu i te mau ’āti Lamana ’e ’ia fa’atupu ato’a i tō rātou riri ia rātou ra.

11 ’E nō reira ’ua ha’amata ihora te mau ’āti Zorama ’e te mau ’āti Lamana ’ia fa’aineine nō te ’aro mai i te mau ta’ata o Amona, ’e i te mau ’āti Nephi ato’a ho’i.

12 ’E ’o te hope’a te reira nō te ’ahuru ma hitu o te matahiti nō te fa’aterera’a a te mau ha’avā i ni’a i te mau ta’ata o Nephi ra.

13 ’E ’ua reva atu ra te mau ta’ata o Amona i rāpae i te fenua ra nō Ieresona, ’e ’ua haere mai ra rātou i te fenua ra nō Meleke, ’e ’ua hōro’a atu ra i te fenua ra nō Ieresona nō te mau nu’u fa’ehau o te mau ’āti Nephi, ’ia ’aro atu rātou i te mau nu’u fa’ehau o te mau ’āti Lamana ’e te mau nu’u fa’ehau ho’i o te mau ’āti Zorama ; ’e ’ua ha’amata ihora te ’arora’a i rotopū i te mau ’āti Lamana ’e te mau ’āti Nephi i te ’ahuru ma va’u o te matahiti nō te fa’aterera’a a te mau ha’avā ; ’e e fa’a’itehia atu te ’ā’amu nō tā rātou mau ’arora’a i muri nei.

14 ’E ’ua ho’i atu Alama, ’e Amona, ’e tō rāua mau taea’e, ’e nā tamaiti to’opiti ho’i a Alama i te fenua ra nō Zarahemela, i riro na ho’i rātou ’ei mau mauha’a i te rima o te Atua i te arata’ira’a mai i te mau ’āti Zorama e rave rahi i te tātarahapa ; ’e te mau ta’ata ato’a i tātarahapa ra, ’ua ti’avaruhia ïa rātou i rāpae i tō rātou ra fenua ; e fenua ’āi’a rā tō rātou i te fenua ra nō Ieresona, ’e ’ua rave rātou i te mau mauha’a tama’i nō te pāruru ia rātou iho, ’e tā rātou mau vahine, ’e mau tamari’i, ’e tō rātou mau fenua.

15 I teienei, ’ua ’oto ihora Alama nō te mau ’ohipa ’ī’ino a tōna ra mau ta’ata, ’oia ïa, nō te mau tama’i, ’e te ha’amani’ira’a toto, ’e te mau mārōra’a ho’i i rotopū ia rātou ra ; ’e nō te mea ho’i ’ua haere ’oia nō te a’o atu i te parau, ’e ’ua tonohia ho’i ’oia nō te a’o atu i te parau i rotopū i te mau ta’ata ato’a i roto i te mau ’oire ato’a, ’e nō te mea ho’i ’ua ’ite ’oia i te ’ā’au ’eta’eta o te mau ta’ata, ’e ’ua ha’amata rātou i te riri nō te pāpū o te parau, ’ua pūai roa ihora te ’oto o tōna ’ā’au.

16 Nō reira, ’ua ha’aputuputu mai ra ’oia i tāna mau tamari’i tamāroa ato’a, ’ia ti’a iāna ’ia hōro’a atu i tāna parau poro’i ia rātou tāta’itahi, nō ni’a i te mau mea parauti’a. ’E tē vai ra te ’ā’amu nō tāna mau fa’auera’a, ’o tāna i tu’u atu ia rātou ra mai te au i tāna iho pāpa’a parau.