1 ’E i muri a’era, i te ha’amatara’a nō te pae o te matahiti nō tā rātou fa’aterera’a ’ua tupu te hō’ē mārōra’a i rotopū i te mau ta’ata ; tē vai ra te hō’ē ta’ata ’o tei parauhia o ’Amaliki ; e ta’ata ha’avare ’oia, ’oia ïa, e ta’ata ’aravihi i te pa’ari o teie nei ao, ’ia au i te fa’aterera’a a te ta’ata i taparahi ia Gideona i te ’o’e, ’e ’o tei taparahihia mai te au i te ture—

2 I teienei nā roto i te ha’avare a teie nei ta’ata ’o ’Amaliki, ’ua ’ume atu ’oia i te mau ta’ata e rave rahi ’ia pe’e atu iāna ; ’e nō tō rātou rahi ’ua riro ihora rātou ’ei mea pūai roa ; ’e ’ua tāmata ihora rātou ’ia fa’ati’a ia ’Amaliki ’ei ari’i i ni’a i te mau ta’ata.

3 I teienei ’ua pe’ape’a a’era te mau ta’ata o te ’ēkālesia, ’e te mau ta’ata ato’a ho’i ’o tei ’ore i arata’i-’ē-hia ’e te mau ’umera’a a ’Amaliki ; nō te mea ’ua ’ite rātou mai te au i tā rātou ra ture ē, e mea ti’a i teie mau mea ’ia fa’ati’ahia e te reo o te mau ta’ata e ti’a ai.

4 Nō reira, ’āhiri ’ua ti’a ia ’Amaliki ’ia fāri’i i te reo o te mau ta’ata nō te mā’iti iāna, e riro ïa ’oia i te tāpe’a i tō rātou ti’amāra’a ’e te mau mea e maita’i ai rātou i tā te ’ēkālesia ; ’e nō te mea e ta’ata parauti’a ’ore ’oia, ’ua hina’aro ’oia ’ia ha’amou i te ’ēkālesia a te Atua.

5 ’E i muri a’era, ’ua ha’aputuputu mai ra te mau ta’ata ato’a nō te mau fenua ato’a ē ’ati noa a’e, te ta’ata tāta’itahi mai te au i tōna ihora hina’aro, i roto e piti pupu ta’a ’ē, tei hina’aro ia ’Amaliki ’e i tei ’ore i hina’aro iāna, ’e ’ua mārō atu ra rātou te tahi i te tahi i te mau mārōra’a māere rahi roa.

6 ’E ’ua nā reira rātou i te ha’aputuputu mai ia rātou iho nō te fa’a’ite mai i tō rātou mau mana’o nō ni’a i taua mea ra ; ’e ’ua tu’uhia atu te reira i mua i te mau ha’avā.

7 ’E i muri a’era, ’ua pāto’i te reo o te mau ta’ata ia ’Amaliki, ’e nō reira ’aita ’oia i fa’arirohia ’ei ari’i i ni’a a’e i te mau ta’ata.

8 I teienei ’ua rahi roa atu ra te ’oa’oa o te ’ā’au o te mau ta’ata i ’ore i hina’aro iāna ; ’āre’a rā ’ua fa’ati’arepu atu ra ’o ’Amaliki i te mau ta’ata i au iāna ’ia riri atu i te feiā i ’ore i au mai iāna.

9 ’E i muri a’era, ’ua ha’aputuputu ’āmui a’era rātou ia rātou iho, ’e ’ua fa’atāhinu atu ra ia ’Amaliki ’ei ari’i nō rātou.

10 I teienei i muri iho i tō ’Amaliki fa’arirora’ahia ’ei ari’i i ni’a a’e ia rātou, ’ua fa’aue atu ra ’oia ia rātou ’ia rave i te mau mauha’a tama’i nō te ’aro atu i tō rātou mau taea’e ; ’e ’ua nā reira ’oia ’ia ti’a iāna ’ia tu’u mai ia rātou i raro a’e iāna.

11 I teienei ’ua ma’irihia te i’oa o te mau ta’ata o ’Amaliki i te i’oa o ’Amaliki, ’oia ho’i ’ua parauhia rātou e mau ’āti ’Amaliki ; e tei toe ra ’ua parauhia ïa e mau ’āti Nephi, ’oia ho’i te mau ta’ata o te Atua.

12 Nō reira ’ua ’ite te mau ta’ata nō te mau ’āti Nephi i te ’ōpuara’a a te mau ’āti ’Amaliki, ’e nō reira ’ua fa’aineine ihora rātou nō te ’aro ia rātou ; ’oia ïa, ’ua rave rātou i te mau ’o’e ’e te mau simetera, ’e te mau fana, ’e te mau te’a, ’e te mau ’ōfa’i, ’e te mau ma’a, ’e te mau huru mauha’a tama’i ato’a.

13 ’E ’ua nā reira rātou i te fa’aineine nō te ’aro atu i te mau ’āti ’Amaliki i te taime nō tō rātou taera’a mai. ’E ’ua fa’ata’ahia te mau ra’atira, ’e te mau ra’atira teitei a’e, ’e te mau ra’atira rahi mai te au i tō rātou rahi.

14 ’E i muri a’era, ’ua hōro’a atu ’Amaliki i tōna mau ta’ata i te mau huru mauha’a tama’i ato’a ; ’e ’ua fa’ata’a ato’a ho’i ’oia i te mau tāvana ’e te feiā fa’atere i ni’a a’e i tōna ra mau ta’ata, nō te arata’i ia rātou ’ia ’aro atu i tōna mau taea’e.

15 ’E i muri a’era, ’ua haere mai ra te mau ’āti ’Amaliki i ni’a i te ’āivi ra nō Amenihu, tei te pae i te hiti’a o te rā nō te ’ānāvai Sidona ra, ’o tē tahe ra nā te pae fenua ra nā Zarahemela, ’e i reira rātou i ha’amata ai nō te ’aro atu i te mau ’āti Nephi.

16 I teienei ’o Alama te ha’avā rahi ’e te tāvana ho’i o te mau ta’ata o Nephi, nō reira ’ua haere atu ra ’oia i ni’a ma tōna ra mau ta’ata, ’oia ïa, ’e tōna ato’a ra mau ra’atira, ’e te mau ra’atira rahi, ’oia ïa, ’o ’oia te upo’o fa’atere o tōna mau nu’u fa’ehau nō te haere atu e ’aro i te mau ’āti ’Amaliki.

17 ’E ’ua ha’amata ihora rātou i te taparahi i te mau ’āti ’Amaliki i ni’a i te ’āivi i te pae hiti’a o te rā i Sidona ra. ’E ’ua tama’i mai ra te mau ’āti ’Amaliki i te mau ’āti Nephi ma te pūai rahi, ’e nō reira ’ua pohe te mau ’āti Nephi e rave rahi i mua i te mau ’āti ’Amaliki.

18 Noa atu rā ’ua ha’apūai te Fatu i te rima o te mau ’āti Nephi, ’e ’ua taparahi ihora rātou i te mau ’āti ’Amaliki e rave rahi, ’e ’ua ha’amata ihora rātou i te horo ’ē atu mai mua atu ia rātou ra.

19 ’E i muri a’era, ’ua a’ua’u atu ra te mau ’āti Nephi i te mau ’āti ’Amaliki i taua mahana tā’āto’a ra, ’e ’ua taparahi ia rātou e rave rahi, ’e nō reira, hō’ē ’ahuru ’e ma piti tauatini e pae hānere ’e toru ’ahuru ’e ma piti mau ’āti ’Amaliki i taparahihia ; ’e tō te mau ’āti Nephi i taparahihia ra, e ono tauatini ’e pae hānere ’e ono ’ahuru ’e ma piti ïa ta’ata.

20 ’E i muri a’era, nō te mea ’aita i ti’a ia Alama ’ia a’ua’u fa’ahou atu i te mau ’āti ’Amaliki, ’ua fa’aue atu ra ’oia i tōna mau ta’ata ’ia fa’ati’a i tō rātou mau ti’ahapa i te peho ra nō Gideona, i ma’irihia ho’i taua peho ra i te i’oa o taua Gideona i taparahihia e te rima o Nehora i te ’o’e ; ’e i roto i teie peho ’ua fa’ati’a ihora te mau ’āti Nephi i tō rātou mau ti’ahapa i te ru’i.

21 ’E ’ua tono atu ra Alama i te mau ta’ata tāmoemoe nō te pe’e atu i te toe’a o te mau ’āti ’Amaliki, ’ia ’ite ’oia i tō rātou mau hina’aro, ’e tā rātou mau ’ōpuara’a huna ; ’ia ti’a iāna ’ia pāruru iāna iho ia rātou, ’e ’ia ti’a iāna ’ia fa’aora i tōna mau ta’ata ’ia ’ore rātou ’ia ha’amouhia.

22 I teienei, teie te i’oa o te mau ta’ata tāna i tono atu nō te hi’ohi’o i te pūhapara’a o te mau ’āti ’Amaliki, ’o Zerama, ’e Amenora, ’e Maniti, ’e Limahera ; ’e ’o teie ïa te mau ta’ata i haere atu nā muri iho i te tahi atu mau ta’ata nō te hi’ohi’o i te pūhapara’a o te mau ’āti ’Amaliki.

23 ’E i muri a’era, ’ia po’ipo’i a’era, ’ua ho’i rū noa mai ra rātou i te pūhapara’a o te mau ’āti Nephi, nō te mea ’ua māere rahi roa rātou ’e ’ua mata’u rahi roa ho’i, i te nā-’ō-ra’a mai ē :

24 Inaha, ’ua pe’e atu mātou i te pūhapara’a o te mau ’āti ’Amaliki, ē tae atu i te fenua ra nō Minona, i ni’a a’e i te fenua ra nō Zarahemela, i te ’ē’a e tae atu ai te fenua ra nō Nephi, ’ua ’ite atu ra mātou ma te māere rahi i te hō’ē nu’u fa’ehau rahi o te mau ’āti Lamana ; ’e inaha, ’ua ’āmui atu te mau ’āti ’Amaliki ia rātou.

25 ’E tei ni’a mai ra rātou i tō tātou mau taea’e i taua fenua ra ; ’e tē horo ra rātou i mua ia rātou ’e tā rātou mau nana, ’e tā rātou mau vahine, ’e tā rātou mau tamari’i i tō tātou ’oire ; ’e ’ia ’ore tātou ’ia ha’avitiviti, e noa’a ïa tō tātou ’oire ia rātou, ’e e taparahihia ho’i tō tātou mau metua tāne, ’e tā tātou mau vahine, ’e tā tātou mau tamari’i.

26 ’E i muri a’era, ’ua rave ihora te mau ta’ata o Nephi i tō rātou mau ti’ahapa, ’e ’ua haere atu ra i rāpae i te peho nō Gideona i tō rātou ihora ’oire, ’oia ho’i i te ’oire ra nō Zarahemela.

27 ’E inaha, ’a haere atu ai rātou nā roto i te ’ānāvai Sidona, tei ni’a mai ra te mau ’āti Lamana ’e te mau ’āti ’Amaliki ia rātou nō te ha’amou roa ia rātou ; e mea rahi roa ho’i rātou, mai te one tahatai ra ho’i rātou i te rahi ’ia tai’ohia.

28 ’Āre’a rā, ’ua ha’apūaihia te mau ’āti Nephi e te rima o te Fatu, ’e ’ua pure ’ū’ana atu ho’i rātou iāna ’ia fa’aora mai ’oia ia rātou i te rima o tō rātou ra mau ’enemi, nō reira ’ua fa’aro’o mai te Fatu i tā rātou ra mau ti’aorora’a, ’e ’ua ha’apūai mai ra ia rātou, ’e ’ua pohe te mau ’āti Lamana ’e te mau ’āti ’Amaliki i mua ia rātou.

29 ’E i muri a’era, ’ua ’aro atu ra Alama ia ’Amaliki i te ’o’e, te mata i te mata ; ’e ’ua ’aro ’ū’ana ihora rāua, te tahi i te tahi.

30 ’E i muri a’era, nō te mea e ta’ata ’o Alama nō te Atua, ’e nō te mea ho’i e mea rahi tōna fa’aro’o, ’ua ti’aoro atu ra ’oia i te nā-’ō-ra’a ē : E te Fatu ē, ’a aroha mai ’e ’a fa’aora mai iā’u nei, ’ia riro vau ’ei mauha’a i roto i tō ’oe nā rima nō te fa’aora ’e nō te fa’aherehere i teie nei feiā.

31 I teienei ’ia fa’aoti a’era Alama i teie nei mau parau, ’ua ’aro fa’ahou atu ra ’oia ia ’Amaliki ; ’e ’ua ha’apūaihia ’oia, ’e nō reira ’ua taparahi pohe roa ihora ’oia ia ’Amaliki i te ’o’e.

32 ’E ’ua ’aro ato’a atu ’oia i te ari’i o te mau ’āti Lamana ; ’āre’a rā ’ua horo ’ē atu te ari’i o te mau ’āti Lamana i muri mai mua atu ia Alama, ’e ’ua tono mai ra ’oia i tōna mau tīa’i nō te ’aro ia Alama.

33 ’Āre’a rā ’ua ’aro atu Alama ’e tōna mau tīa’i i te mau tīa’i o te ari’i o te mau ’āti Lamana, ē tae noa atu ’ua taparahi ’e ’ua tīahi ’oia ia rātou i muri.

34 ’E nō reira ’ua tāmā ihora ’oia i te fenua, i te pae hiti i te tō’o’a o te rā nō te ’ānāvai Sidona ra, ma te huri atu i te mau tino o te mau ’āti Lamana i taparahihia i roto i te mau pape nō Sidona ra, ’ia ateatea te tahi vāhi haerera’a nō tōna mau ta’ata i te tahi pae mai nō te ’aro atu i te mau ’āti Lamana ’e te mau ’āti ’Amaliki, i te pae i te tō’o’a o te rā i te ’ānāvai ra Sidona.

35 ’E i muri a’era, ’ia tae atu rātou pā’āto’a i te tahi pae mai nō te ’ānāvai Sidona, ’ua horo ’ē atu te mau ’āti Lamana ’e te mau ’āti ’Amaliki mai mua atu ia rātou, noa atu e mea rahi atu rātou ’e ’aita rātou e hope ’ia tai’ohia.

36 ’E ’ua horo atu rātou mai mua atu i te mau ’āti Nephi i roto i te mēdēbara i te tō’o’a o te rā ’e i te pae apato’erau, i te ātea ’ē roa atu i te mau ’ōti’a nō te fenua ; ’e ’ua a’ua’u atu ra te mau ’āti Nephi ia rātou ma tō rātou pūai, ’e ’ua taparahi ia rātou.

37 ’Oia ïa, ’ua ’arohia rātou i te mau vāhi ato’a, ’e ’ua taparahihia, ’e ’ua tīahihia, ē tae noa atu ’ua purara rātou i te pae tō’o’a o te rā, ’e i te pae apato’erau, ē tae noa atu ’ua tae rātou i te mēdēbara ’o tei parauhia ’o Heremounetesa ; ’o te pae ïa nō te mēdēbara ’o tei ’ī i te mau ’ānimara ’ōviri ’e te taehae.

38 ’E i muri a’era, e rave rahi tei pohe i roto i te mēdēbara nō tō rātou mau puta ; ’e ’ua ’amuhia rātou e taua mau ’ānimara ra ’e te mau manu taehae o te reva ; ’e ’ua ’itehia tō rātou mau ivi, ’e ’ua ha’apu’ehia i ni’a i te fenua.