1 I teienei, tei roto i te ture a Mosia te parau ē, e mea ti’a roa i te mau ta’ata ato’a i mā’itihia ’ei ha’avā nō te ture, ’oia ho’i te mau ta’ata i fa’ata’ahia ’ei mau ha’avā, ’ia ’aufauhia mai te au i te taime tā rātou i fa’a’ohipa nō te ha’avā i te mau ta’ata i arata’ihia i mua ia rātou ’ia ha’avāhia.

2 I teienei, mai te mea e ’aitārahu te hō’ē ta’ata i te tahi atu, ’e ’aita ’oia i ’aufau i tāna tārahu, ’ua parihia ïa ’oia i mua i te ha’avā ; ’e nā te ha’avā e fa’ati’a i te ture, ’e nāna e tono atu i te mau ta’ata tōro’a ’ia ’āfa’i mai i taua ta’ata ra i mua iāna ; ’e nāna e ha’avā i taua ta’ata ra mai te au i te ture ’e te mau parau i fa’a’itehia iāna ra, ’e nō reira ’ua tītauhia ’oia ’ia ’aufau i tāna tārahu e ti’a ai, ’e ’aore rā e rave-’ē-hia tāna tao’a, ’e ’aore rā e ti’avaru-’ē-hia mai rotopū atu i te mau ta’ata ’ei ta’ata ’eiā ’e te haru tao’a.

3 ’E ’ua ’aufauhia te ha’avā mai te au i tōna ra taime—te hō’ē senine ’auro i te mahana hō’ē, ’e ’aore rā te hō’ē senuma ’ārio, ’o tei au i te hō’ē senine ’auro ; ’e ’ua au teie i te ture i ha’apa’ohia.

4 I teienei, teie te mau i’oa o tā rātou mau moni ’auro, ’e tā rātou mau moni ’ārio, mai te au i tō rātou faufa’a. ’E ’ua ma’irihia teie mau i’oa e te mau ’āti Nephi, nō te mea ’aita rātou i tai’o mai tā te mau ’āti Iuda i pārahi i Ierusalema ; ’e ’aita ho’i rātou i fāito mai tā te mau ’āti Iuda ; ’ua fa’ahuru ’ē rā rātou i tā rātou tai’ora’a ’e tō rātou fāito i terā u’i i terā u’i, ’ia au i te ferurira’a ’e te mau rāve’a a te mau ta’ata, ē tae roa mai i te fa’aterera’a a te mau ha’avā, ’e ’ua ha’amauhia na ho’i te reira e te ari’i ra ’o Mosia.

5 Tē nā ’ō nei te tai’ora’a—e senine ’auro, e seona ’auro, e suma ’auro, ’e e limena ’auro.

6 E senuma ’ārio, e amenora ’ārio, e ezeroma ’ārio, ’e e oneti ’ārio.

7 ’Ua au te hō’ē senuma ’ārio i te hō’ē senine ’auro, ’e ’ua au ho’i te hō’ē ’e ’aore rā te tahi i te hō’ē ho’ini kerite, ’e i te hō’ē ho’ini o te mau huru huero ato’a ra.

8 ’Ua au te seona ’auro i te faufa’a nō nā senine e piti ra.

9 ’E ’ua au te hō’ē suma ’auro i te faufa’a nō nā seona e piti ra.

10 ’E te hō’ē limena ’auro ra, ’ua au ïa tōna faufa’a i tō rātou pā’āto’a ’ia ’āmuihia.

11 ’E ’ua au te hō’ē amenora ’ārio i te faufa’a nō nā senuma e piti ra.

12 ’E ’ua au te hō’ē ezeroma ’ārio i te faufa’a nō nā senuma e maha ra.

13 ’E ’ua au te hō’ē oneti i taua mau fāito ato’a ra ’ia ’āmuihia.

14 I teienei, teie te fāito nō te mau nūmera ri’i nō tō rātou tai’ora’a—

15 Te sibelona, ’o te ’āfa ïa nō te senuma ; nō reira, ’ua au te sibelona i te ’āfa nō te ho’ini kerite.

16 ’E te sibuluma, ’o te ’āfara’a ïa nō te sibelona.

17 ’E te lea, ’o te ’āfara’a ïa nō te sibuluma.

18 I teienei, teie tō rātou nūmera mai te au i tō rātou tai’ora’a.

19 I teienei, ’ua au te hō’ē anetiona ’auro i nā sibelona e toru.

20 I teienei, nō te hina’aro o te mau ha’avā ’ia roa’a tā rātou faufa’a, ’e nō te mea ho’i e roa’a ia rātou te faufa’a mai te au i te rahi o tā rātou ’ohipa e rave, nō reira ’ua fa’ati’arepu rātou i te mau ta’ata ’ia ’ōrurehau, ’e ’ua fa’atupu ho’i i te mau huru ti’arepu ato’a ’e te mau ’ohipa ’ī’ino ato’a, ’ia fa’arahihia tā rātou tufa’a ’ohipa, ’e ’ia roa’a rahi ia rātou te moni nō te mau parau parira’a i ’āfa’ihia i mua ia rātou ; nō reira ’ua fa’ati’arepu rātou i te mau ta’ata ia ’ino’ino atu ia Alama rāua ’o Amuleka.

21 ’E ’ua ha’amata ihora teie Zeezeroma i te uiui ia Amuleka, i te nā-’ō-ra’a ē : E pāhono mai ānei ’oe iā’u nei i te tahi mau uira’a iti ’o tā’u e ui atu ia ’oe na ? I teienei e ta’ata ’aravihi o Zeezeroma i te mau rāve’a a te diabolo, ’ia ti’a iāna ’ia fa’a’ore i te mea maita’i ; nō reira, ’ua parau mai ’oia ia Amuleka ē : E pāhono mai ānei ’oe i te mau uira’a ’o tā’u e tu’u atu i mua ia ’oe na ?

22 ’Ua parau atu ra Amuleka iāna : ’Ē, mai te mea ē ’ua au te reira i tā te Vārua o te Fatu i roto iā’u nei ; e ’ore roa ho’i au e parau i te hō’ē mea au ’ore i te Vārua o te Fatu. ’E ’ua parau mai ra Zeezeroma iāna : Inaha, teie te mau oneti ’ārio e ono, ’e e hōro’a atu vau i teie mau mea ato’a nā ’oe mai te mea e huna ’oe ē ’aita te hō’ē o Tei Teitei Roa e ora nei.

23 ’Ua parau atu ra Amuleka : E te tamaiti o hade ē, e aha ho’i ’oe e fa’ahema mai ai iā’u nei ? ’Ua ’ite ānei ’oe ē, ’aita roa te feiā parauti’a e auraro i taua mau huru fa’ahemara’a ra ?

24 Tē ti’aturi ra ānei ’oe ē, ’aita e Atua ? Tē parau atu nei au ia ’oe na ē, ’Aita roa ; ’ua ’ite pāpū ho’i ’oe ē, tē vai ra te Atua, ’āre’a rā ’ua rahi roa atu tō ’oe hina’aro i taua tao’a ti’a ’ore ra i tō ’oe hina’aro iāna.

25 ’E i teienei, ’ua ha’avare ’oe iā’u nei i mua i te aro o te Atua. ’Ua parau mai ’oe iā’u—’A hi’o na i teie mau oneti e ono, e moni rahi te reira, ’e e hōro’a atu vau nā ’oe—i roto rā i tō ’oe ’ā’au ’ua ’ōpua ’oe ’ia tāpe’a noa i te reira ’e ’eiaha e hōro’a mai iā’u nei ; tō ’oe noa hina’aro ’ia huna vau i te Atua ora ’e te parau mau, ’ia roa’a ia ’oe te parira’a nō te ha’amou iā’u. ’E i teienei, inaha, nō taua ’ohipa ’ino rahi ra, e fāri’i ’oe i tā ’oe utu’a.

26 ’E ’ua parau mai ra Zeezeroma iāna : Tē parau ra ānei ’oe ē, tē vai ra te hō’ē Atua ora ’e te parau mau ?

27 ’E ’ua parau atu ra Amuleka : ’Ē, tē vai ra te hō’ē Atua ora ’e te parau mau.

28 ’E ’ua ui mai ra Zeezeroma : E rave rahi ānei Atua e vai nei ?

29 ’E ’ua pāhono atu ra ’oia. ’Aita.

30 I teienei, ’ua ui fa’ahou mai ra Zeezeroma iāna : E mea nāhea tō ’oe ’itera’a i teie mau mea ?

31 ’E ’ua nā ’ō atu ra ’oia : Nā te hō’ē melahi te reira i fa’a’ite mai iā’u nei.

32 ’E ’ua ui fa’ahou mai ra Zeezeroma : ’O vai ’oia ’o tē haere mai ? ’O te Tamaiti ānei a te Atua ?

33 ’Ua parau atu ra ’oia iāna, ’Ē.

34 ’E ’ua parau fa’ahou mai ra Zeezeroma : E fa’aora ānei ’oia i tōna mau ta’ata i roto i tā rātou mau hara ? ’E ’ua pāhono atu ra Amuleka ’e nā ’ō atu ra iāna : Tē parau atu nei au ia ’oe na, ’aita roa ’oia e nā reira, e’ita roa ho’i e ti’a iāna ’ia huna i tāna parau.

35 I teienei, ’ua parau mai ra Zeezeroma i te mau ta’ata : ’Ia ha’amana’o ’outou i teie mau mea ; i parau na ho’i ’oia ē, hō’ē noa iho Atua ; ’e ’oia ato’a i parau na ho’i ’oia ē, e tae mai te Tamaiti a te Atua, ’āre’a rā ’aita ’oia e fa’aora i tōna mau ta’ata—mai te mea ra ē, e ha’amanara’a tōna nō te fa’aue i te Atua.

36 I teienei ’ua parau fa’ahou atu ra Amuleka iāna : Inaha, ’ua ha’avare ’oe, i parau na ’oe ē, ’ua parau atu vau, mai te mea ra ē, e ha’amanara’a tō’u ’ia fa’aue i te Atua, nō te mea i parau na vau ē, e ’ore roa ’oia e fa’aora i tōna mau ta’ata i roto i tā rātou mau hara.

37 ’E tē parau fa’ahou atu nei au ia ’oe na, e’ita roa e ti’a iāna ’ia fa’aora ia rātou i roto i tā rātou mau hara ; e’ita roa ho’i au e huna i tāna ra parau, ’e ’ua parau ho’i ’oia ē, e ’ore roa te hō’ē mea vi’ivi’i e ō i te bāsileia o te ao ra ; nō reira, nāhea ’outou e fa’aorahia ai, maori rā ’ia roa’a ia ’outou te bāsileia o te ao ra ? Nō reira, e’ita roa ’outou e fa’aorahia i roto i tā ’outou mau hara.

38 I teienei ’ua parau fa’ahou mai ra Zeezeroma iāna : ’Ua riro ānei te Tamaiti a te Atua ’ei Metua mure ’ore ?

39 ’E ’ua parau atu ra Amuleka iāna : ’Ē, ’o ’oia mau te Metua mure ’ore nō te ao ra ’e nō te fenua nei, ’e te mau mea ato’a i roto ra ; ’o ’oia te mātāmeha’i ’e te fa’ahope’a, ’o ’oia te ha’amatara’a ’e te hope’a.

40 ’E e haere mai ’oia i te ao nei nō te fa’aora i tōna ra mau ta’ata ; ’e e rave ’oia i ni’a iho iāna i te mau hapa a te feiā i ti’aturi i tōna ra i’oa ; ’e ’o rātou teie ’o tē fāri’i i te ora mure ’ore, ’e ’aita roa te fa’aorara’a e tae mai ia vetahi ’ē atu.

41 Nō reira tē vai noa nei te feiā parauti’a ’ore mai te mea ra ē, ’aita te fa’aorara’a i ravehia nō rātou, maori rā ’o te tātarara’a i te mau tā’amu nō te pohe ; inaha ho’i, tē vai ra te mahana e ti’afa’ahou mai ai te mau ta’ata pā’āto’a mai te pohe mai nō te ti’a atu i mua i te Atua, ’e ’ia ha’avāhia mai te au i tā rātou ra mau ’ohipa.

42 I teienei, tē vai nei te hō’ē pohe i parauhia te pohe pae tino nei ; ’e nā te pohe o te Mesia e ha’amatara i te mau tā’amu nō teie pohe pae tino nei, ’ia ti’a i te mau ta’ata pā’āto’a ’ia ti’afa’ahou mai mai teie pohe pae tino nei.

43 E tā’ati-fa’ahou-hia te vārua ’e te tino i tō rāua huru mau ; ’e e fa’aho’ihia te mau melo ’e te mau ponaivi ato’a i tō rātou vāhi mau, mai tō tātou huru i teienei ; ’e e fa’ati’ahia atu tātou i mua i te Atua, ma te ’ite mai tā tātou e ’ite nei i teienei, ’e ma te ha’amana’o pāpū maita’i i tā tātou ato’a ra mau hara.

44 I teienei, e tae mai teie fa’aho’ira’a i te mau ta’ata ato’a, i te ta’ata pa’ari ’e te ta’ata ’āpī, i te tītī ’e te ti’amā, i te tāne ’e te vahine, i te feiā parauti’a ’ore ’e te feiā parauti’a ; e ’ore roa ho’i te hō’ē ’i’o rouru iti a’e o tō rātou upo’o e mo’e ; e fa’aho’ihia rā te mau mea ato’a i tō rātou iho huru mau, mai tō rātou huru i teienei, ’oia ho’i i roto i te tino, ’e e arata’ihia ïa ’e e ha’avāhia ho’i i mua i te ha’avāra’a a te Mesia te Tamaiti, ’e te Atua te Metua, ’e te Vārua Mo’a, ’oia ho’i te hō’ē Atua mure ’ore, ’ia ha’avāhia mai te au i tā rātou ra mau ’ohipa, mai te mea e mea maita’i te reira ’e ’aore rā mai te mea e mea ’ino te reira.

45 I teienei, inaha, ’ua parau iho nei au ia ’outou nō ni’a i te pohe o te tino tāhuti nei, ’e ’oia ato’a nō ni’a i te ti’afa’ahoura’a o te tino tāhuti nei. Tē parau atu nei au ia ’outou na, e fa’ati’ahia mai teie tino tāhuti nei mai te pohe mai ’ei tino tāhuti ’ore, ’oia ho’i mai te pohe mātāmua i te ora, ’e’ aita te reira e pohe fa’ahou ; e tū’atihia tō rātou vārua i tō rātou tino, ’e ’aita te reira e fa’ata’a-’ē-fa’ahou-hia ; ’e ’ua riro te reira ’ei mea vārua ’e te tāhuti ’ore, ’e ’aita rātou e ’ite fa’ahou i te pohe.

46 I teienei, ’ia fa’aoti a’era Amuleka i teie mau parau, ’ua māere fa’ahou ihora te mau ta’ata, ’e ’oia ato’a ’ua rurutaina ihora Zeezeroma. ’E ’o te hope’a teie o te mau parau a Amuleka, ’oia ho’i teie te tā’āto’ara’a o te mau mea tā’u i pāpa’i.