1 ’E i muri a’era, i muri iho i tō rātou fa’ati’ara’a i te ’ēkālesia i ni’a i taua fenua ra, ’ua hina’aro te ari’i ra ’o Lamoni ’ia haere atu ’o Amona nā muri iāna i te fenua ra nō Nephi, ’ia ti’a iāna ’ia fa’a’ite atu iāna i tōna ra metua tāne.

2 ’E ’ua tae mai ra te reo o te Fatu ia Amona, i te nā-’ō-ra’a mai ē : ’Eiaha ’oe e haere atu i ni’a, i te fenua ra nō Nephi ; inaha ho’i, e tītau te ari’i ’ia taparahi ia ’oe ; e haere rā ’oe i te fenua ra nō Midoni ; inaha ho’i, tei roto tō ’oe taea’e ’o Aarona, ’e ’o Muloki, ’e ’o ’Ama ato’a ho’i i te fare tāpe’ara’a.

3 I teienei, i muri a’era, ’ia fa’aro’o a’era Amona i te reira, ’ua nā ’ō atu ra ’oia ia Lamoni, Inaha, tei te fare tāpe’ara’a i Midoni tō’u iho taea’e, ’e tō’u mau taea’e, ’e e haere atu vau e fa’aora ia rātou.

4 I teienei, ’ua parau mai ra Lamoni ia Amona : ’Ua ’ite au ē, nā roto i te pūai o te Fatu e ti’a ia ’oe ’ia rave i te mau mea ato’a. Inaha rā, e haere atu vau nā muri ia ’oe i te fenua ra nō Midoni ; nō te mea e hoa nō’u te ari’i i te fenua ra nō Midoni, ’e ’o Anetiomono tōna ra i’oa ; nō reira e haere au i te fenua ra nō Midoni, nō te tāparu i te ari’i o taua fenua ra, ’e e tu’u mai ’oia i tō ’oe mau taea’e i rāpae i te fare tāpe’ara’a. I teienei, ’ua ui mai ra Lamoni iāna : Nā vai i fa’a’ite mai ia ’oe ē, tei te fare tāpe’ara’a tō ’oe mau taea’e ?

5 ’E ’ua nā ’ō atu ra Amona iāna : ’Aita e ta’ata i fa’a’ite mai iā’u, ’o te Atua rā ; ’e ’ua parau mai ra ’oia iā’u ē—’A haere ’e ’a fa’aora mai i tō ’oe mau taea’e, tei te fare tāpe’ara’a rātou i te fenua ra nō Midoni.

6 I teienei, ’ia fa’aro’o a’era Lamoni i te reira, ’ua fa’aue atu ra ’oia i tōna mau tāvini ’ia fa’aineine i tāna mau pua’ahorofenua ’e tōna mau pere’o’o.

7 ’E ’ua parau mai ra ’oia ia Amona : ’A haere mai, e haere au i raro nā muri ia ’oe i te fenua ra nō Midoni, ’e i reira e tāparu vau i te ari’i ’ia tu’u mai ’oia i tō ’oe mau taea’e i rāpae i te fare tāpe’ara’a.

8 ’E i muri a’era, ’a tere atu ai Amona rāua ’o Lamoni i reira, ’ua fārerei rāua i te metua tāne o Lamoni, ’o ’oia ho’i te ari’i i ni’a i te fenua tā’āto’a.

9 ’E inaha, ’ua parau mai ra te metua tāne o Lamoni iāna : Nō te aha ho’i ’aita ’oe i haere mai i te fa’a’amu’a rahi i taua mahana rahi ra, ’a fa’atupu ai au i te hō’ē tāmā’ara’a rahi nā tā’u ra mau tamari’i tamāroa, ’e nā tō’u ho’i mau ta’ata ?

10 ’E ’ua parau ato’a mai ra ’oia ē : Tē haere nei ’oe i hea nā muri i teie nei ’āti Nephi, te hō’ē o te mau tamari’i a te hō’ē ta’ata ha’avare ?

11 ’E i muri a’era, ’ua fa’a’ite atu ra Lamoni iāna i tōna tere, nō te mea ’ua mata’u ’oia ’ia fa’atupu atu i tōna riri.

12 ’E ’ua fa’a’ite atu ho’i ’oia iāna i te tumu i pārahi noa ai ’oia i tōna iho ra bāsileia, ’e i ’ore ai ’oia i tae atu ai i tōna ra metua tāne, i te fa’a’amu’a rahi tāna i fa’aineine.

13 ’E i teienei, i muri iho i tō Lamoni fa’a’itera’a atu iāna i teie mau mea ato’a, inaha, ’ua māere ihora ’oia nō te mea ’ua riri tōna metua tāne iāna, ’e ’ua nā ’ō mai ’oia : E Lamoni, tē haere nei ’oe e fa’aora i teie mau ’āti Nephi, ’oia ho’i i te mau tamari’i tamāroa a te ta’ata ha’avare. Inaha, ’ua ’eiā haru ’oia i tā tō tātou mau metua ; ’e i teienei, ’ua haere mai tāna mau tamari’i i rotopū ia tātou nei, ’ia ti’a ia rātou, nā roto i tō rātou ’aravihi ’e tā rātou mau ha’avare, ’ia fa’ahema ia tātou, ’e ’ia haru fa’ahou atu i tā tātou tao’a.

14 I teienei, ’ua fa’aue mai ra te metua tāne o Lamoni iāna ’ia taparahi ia Amona i te ’o’e. ’E ’ua fa’aue ato’a mai ra ’oia iāna ē ’eiaha roa ’oia e haere atu i te fenua ra nō Midoni, ’āre’a rā ’ia ho’i atu ’oia nā muri iho iāna i te fenua ra nō Isema’ela.

15 ’Āre’a rā ’ua parau atu ra Lamoni iāna : E’ita roa vau e taparahi ia Amona, ’e e’ita ato’a ho’i au e ho’i i te fenua ra nō Isema’ela, e haere rā vau i te fenua i Midoni nō te fa’aora i te mau taea’e o Amona, nō te mea ’ua ’ite au ē, e mau ta’ata parauti’a rātou, ’e e mau peropheta mo’a ho’i nā te Atua mau ra.

16 I teienei, ’ia fa’aro’o a’era tōna metua tāne i teie nei mau parau, ’ua riri ihora ’oia iāna, ’e ’ua tātara mai ra ’oia i tāna ’o’e nō te tā’iri iāna i raro i te fenua.

17 ’Āre’a rā ’ua ti’a mai ra Amona, ’e ’ua nā ’ō atu ra iāna : Inaha, ’eiaha roa ’oe e taparahi i tā ’oe tamaiti ; terā rā e mea maita’i a’e tōna pohe i tō ’oe ; inaha ho’i, ’ua tātarahapa ’oia i tāna ra mau hara ; ’ia pohe rā ’oe i teie nei taime i tō ’oe nā riri, e ’ore roa tō ’oe vārua e ti’a ’ia fa’aorahia.

18 ’E teie fa’ahou ā, e mea ti’a roa ia ’oe ’ia fa’a’oroma’i ; ’ia taparahi ’oe i tā ’oe tamaiti, e ta’ata hara ’ore ho’i ’oia, e ti’aoro atu tōna toto mai te repo atu i te Fatu tōna Atua, ’ia tae mai te utu’a tāho’o i ni’a ia ’oe ; ’e penei a’e paha e pohe tō ’oe vārua.

19 I teienei, ’ia oti a’era tā Amona paraura’a atu i teie mau parau iāna, ’ua pāhono mai ra ’oia iāna, i te nā-’ō-ra’a mai ē : ’Ua ’ite au ē, ’ia taparahi au i tā’u tamaiti, ’ua ha’amani’i au i te toto hara ’ore ; ’o ’oe ho’i tei tītau ’ia ha’apohe iāna.

20 ’E ’ua fa’atoro mai ra ’oia i tōna rima nō te taparahi ia Amona. ’Āre’a rā ’ua pāruru māite atu ra Amona i tāna mau tā’irira’a mai, ’e ’ua tā’iri atu ’oia i tōna rima ’e ’aita i ti’a iāna ’ia fa’a’ohipa fa’ahou i te reira.

21 I teienei, ’ia ’ite a’era te ari’i ē, ’ua ti’a ia Amona ’ia taparahi iāna, ’ua tāparu mai ra ’oia ia Amona ’ia fa’aora noa iāna.

22 ’Āre’a rā ’ua fa’ateitei a’era Amona i tāna ’o’e, ’e ’ua parau atu ra iāna : Inaha, e taparahi au ia ’oe, maori rā ’ia fa’ati’a ’oe ’ia tu’uhia mai tō’u mau taea’e i rāpae i te fare tāpe’ara’a.

23 I teienei, nō te mata’u o te ari’i ’o te pohe ’oia, ’ua parau mai ra ’oia : Mai te mea e fa’aora noa ’oe iā’u, e hōro’a atu vau ia ’oe i tā ’oe e ani mai, ē tae noa atu i te ’āfara’a o te bāsileia.

24 I teienei, ’ia ’ite a’era Amona ē, ’ua marū mai te ari’i ruhiruhiā iāna mai te au i tōna hina’aro, ’ua parau atu ra ’oia iāna : Mai te mea e fa’ati’a ’oe ’ia tu’uhia mai tō’u mau taea’e i rāpae i te fare tāpe’ara’a, ’e ’ia tāpe’a noa ho’i Lamoni i tōna ra bāsileia, ’e ’eiaha ’oe e ’ino’ino iāna, e fa’ati’a rā ’oe ’ia rave ’oia i tei au i tōna ra mau hina’aro i roto i te mau mea ato’a tāna e mana’o ra, ’ei reira e fa’aora noa vau ia ’oe ; ’ia ’ore rā ’oe e nā reira, e tā’iri au ia ’oe i raro i te repo.

25 I teienei, ’ia oti a’era tā Amona paraura’a i teie mau parau, ’ua ’oa’oa ihora te ari’i nō tōna ora.

26 ’E i tōna ’itera’a ē, ’aita ’o Amona i hina’aro ’ia taparahi iāna, ’e i tōna ato’a ’itera’a i tōna here rahi i tāna ra tamaiti ia Lamoni, ’ua māere roa ihora ’oia, ’e ’ua nā ’ō mai ra ’oia : Nō te mea ’o teie ana’e iho tā ’oe i hina’aro, ’ia fa’aora vau i tō ’oe mau taea’e, ’e ’ia fa’ati’a ato’a vau ’ia tāpe’a noa tā’u tamaiti ’o Lamoni i tōna ra bāsileia ; inaha, e fa’ati’a vau ia ’oe ’ia tāpe’a noa tā’u tamaiti i tōna ra bāsileia mai teie atu taime ē a muri noa atu ; ’e ’aita vau e fa’atere fa’ahou iāna—

27 E fa’ati’a ato’a vau ia ’oe ’ia tu’uhia mai tō ’oe mau taea’e i rāpae i te fare tāpe’ara’a, ’e e ti’a ho’i ia ’oe e tō ’oe mau taea’e ato’a ’ia haere noa mai iā’u, i roto i tō’u bāsileia ; nō te mea e hina’aro rahi tō’u ia fārerei ia ’oe. ’Ua māere roa ho’i te ari’i i te mau parau tāna i parau mai, ’e i te mau parau ato’a tā tāna tamaiti tā Lamoni i parau mai, nō reira ’ua hina’aro roa ’oia ’ia ha’api’i i te reira.

28 ’E i muri a’era, ’ua haere atu ra Amona rāua ’o Lamoni i tō rāua tere i te fenua ra nō Midoni. ’E ’ua fa’ahereherehia Lamoni i mua i te mata o te ari’i o taua fenua ra ; nō reira ’ua arata’ihia mai te mau taea’e o Amona i rāpae i te fare tāpe’ara’a.

29 ’E i tō Amona fārereira’a ia rātou ’ua ’oto roa a’era ’oia, inaha ho’i, ’ua taha’a noa rātou, ’e ’ua motumotu roa tō rātou ’iri nō te mea ’ua ru’uru’uhia rātou i te taura pa’ari. ’E ’ua māuiui ato’a rātou i te po’ia, ’e te po’ihā, ’e te mau huru ’ati ato’a ; ’āre’a rā ’ua fa’a’oroma’i noa rātou i tō rātou ra mau ’ati ato’a.

30 ’Ē, mai tei tupu, ’ua ma’iri rātou i roto i te rima o te hō’ē feiā ’ā’au pa’ari ’e te ’ā’au ’eta’eta ; nō reira ’aita roa rātou i hina’aro ’ia fa’aro’o mai i tā rātou mau parau, ’e ’ua ti’avaru rātou ia rātou i rāpae, ’e ’ua tā’iri ia rātou, ’e ’ua tīahi ia rātou i terā fare ’e i terā fare, ’e i terā vāhi ’e i terā vāhi, ē tae noa atu ’ua tae rātou i te fenua ra nō Midoni ; ’e i reira ’ua ravehia rātou ’e ’ua hurihia i roto i te fare tāpe’ara’a, ’e ’ua ru’uru’uhia i te mau taura pa’ari, ’e ’ua tāpe’ahia i roto i te fare tāpe’ara’a e rave rahi mau mahana, ’e ’ua fa’aorahia rātou e Lamoni rāua ’o Amona.