1 ’E i teienei, i muri a’era, ’ua haere atu ra te mau tamari’i tamāroa a Alama i rotopū i te mau ta’ata nō te poro atu i te parau ia rātou. ’E ’aita e ti’a ia Alama iho ’ia fa’aea noa, ’e ’ua haere ato’a atu ra ’oia.

2 I teienei, ’eiaha tātou e parau fa’ahou nō ni’a i tā rātou a’ora’a, maori rā ’ua a’o atu rātou i te parau, ’e te parau mau ho’i, mai te au i te vārua nō te tohu ’e te heheura’a ; ’e ’ua a’o atu rātou mai te au i te fa’anahora’a mo’a a te Atua i mā’itihia ai rātou ra.

3 ’E i teienei, e ho’i au i ni’a i te ’ā’amu nō te mau tama’i i rotopū i te mau ’āti Nephi ’e te mau ’āti Lamana, i te matahiti hō’ē ’ahuru ’e ma va’u nō te fa’aterera’a a te mau ha’avā.

4 Inaha ho’i, i muri a’era, ’ua riro mai te mau ’āti Zorama ’ei mau ’āti Lamana ; nō reira, i te ha’amatara’a nō te matahiti hō’ē ’ahuru ’e ma va’u ’ua ’ite atu ra te mau ’āti Nephi ē tē haere mai ra te mau ’āti Lamana e ’aro mai ia rātou, nō reira, ’ua fa’aineine rātou nō te ’arora’a ; ’oia ïa, ’ua ha’aputu rātou i tō rātou mau nu’u fa’ehau i roto i te fenua ra nō Ieresona.

5 ’E i muri a’era, ’ua haere mai ra te mau ’āti Lamana ’e tō rātou mau ta’ata e rave rahi tauatini ; ’e ’ua haere mai ra rātou i roto i te fenua ra nō Anetionuma, ’oia ho’i, i te fenua o te mau ’āti Zorama ; ’e tē vai ra te hō’ē ta’ata i ma’irihia te i’oa ’o Zerahemana, ’o tō rātou ïa ta’ata fa’atere.

6 ’E i teienei, nō te mea ’ua riro te mau ’āti Amaleka iho ’ei feiā parauti’a ’ore a’e ’e te hina’aro rahi a’e i te mau ’āti Lamana ’ia taparahi i te ta’ata, nō reira, ’ua mā’iti Zerahemana nō roto mai ia rātou i te mau ra’atira rahi nō te fa’atere i te mau ’āti Lamana, ’e e mau ’āti Amaleka ’e e mau ’āti Zorama ho’i ïa rātou ato’a ra.

7 I teienei ’ua nā reira ’oia ’ia vai noa tō rātou ’ino’ino i te mau ’āti Nephi, ’e ’ia ti’a iāna ’ia ’ume mai ia rātou i raro a’e i tāna fa’aterera’a nō te fa’atupu i tāna mau ’ōpuara’a.

8 Inaha ho’i, ’o teie tāna mau ’ōpuara’a, nō te fa’ati’arepu i te mau ’āti Lamana ’ia riri atu i te mau ’āti Nephi ; ’e ’ua nā reira ’oia i te haru i te mana rahi i ni’a ia rātou, ’e ’ia noa’a ato’a te mana iāna i ni’a i te mau ’āti Nephi nā roto i te fa’atītīra’a ia rātou.

9 ’E i teienei, ’o teie te ’ōpuara’a a te mau ’āti Nephi ; nō te pāruru i tō rātou mau fenua, ’e tō rātou mau fare, ’e tā rātou mau vahine, ’e tā rātou mau tamari’i, nō te fa’aora ia rātou i te rima o tō rātou mau ’enemi ; ’e ’oia ato’a nō te pāruru i tō rātou ti’ara’a ’e te mau mea e maita’i ai rātou, ’oia ïa, ’e tō rātou ti’amāra’a ato’a, ’ia ti’a ia rātou ’ia ha’amori i te Atua mai te au i tō rātou mau hina’aro.

10 ’Ua ’ite ho’i rātou ē, ’ia ma’iri rātou i roto i te rima o te mau ’āti Lamana, e taparahi te mau ’āti Lamana ia rātou ato’a ’o tē ha’amori i te Atua, i te Atua mau ’e te ora, nā roto i te vārua ’e te parau mau.

11 ’Oia ïa, ’e ’ua ’ite ato’a rātou i te ’ino’ino rahi o te mau ’āti Lamana i tō rātou mau taea’e, ’oia ho’i, i te mau ta’ata o te Aneti-Nephi-Lehi, ’o tei parauhia te mau ta’ata o Amona—’e ’aita roa ho’i rātou e rave i tā rātou mau mauha’a tama’i ; ’oia ïa, ’ua fafau rātou i te hō’ē fafaura’a ’e ’aita rātou i hina’aro ’ia ’ōfati i te reira—nō reira, ’ia ma’iri ana’e rātou i roto i te rima o te mau ’āti Lamana, e taparahihia rātou.

12 ’E ’aita roa te mau ’āti Nephi i hina’aro ’ia taparahihia rātou ; nō reira ’ua hōro’a atu rātou i te tahi mau fenua ’ei ’āi’a nō rātou.

13 ’E ’ua hōro’a atu te mau ta’ata o Amona i te mau ’āti Nephi i te tahi tufa’a rahi nō tā rātou tao’a nō te tauturu i tō rātou mau nu’u fa’ehau ; ’e nō reira ’ua tama’i atu te mau ’āti Nephi ana’e i te mau ’āti Lamana, ’oia te mau ’āti Lamana ’e te mau ’āti Lemuela, ’e te mau tamari’i tamāroa a Isema’ela, ’e rātou ato’a tei tāiva mai roto atu i te mau ’āti Nephi ; ’oia ho’i te mau ’āti Amaleka ’e te mau ’āti Zorama, ’e te mau hua’ai o te mau tahu’a o Noa.

14 I teienei, ’ua fātata roa hō’ē ā huru te rahi o tō rātou hua’ai i te mau ’āti Nephi ; nō reira e mea ti’a i te mau ’āti Nephi ’ia ’aro atu i tō rātou mau taea’e ē tae noa atu i te ha’amani’ira’a i te toto.

15 ’E i muri a’era, ’a putuputu ai te mau nu’u fa’ehau o te mau ’āti Lamana i te fenua ra nō Anetionuma, inaha, ’ua ineine te mau nu’u fa’ehau o te mau ’āti Nephi ’ia ’aro atu ia rātou i te fenua ra nō Ieresona.

16 I teienei, te ta’ata fa’atere o te mau ’āti Nephi, ’oia ho’i te ta’ata i mā’itihia ’ei ra’atira rahi i ni’a i te mau ’āti Nephi—i teienei tei taua ra’atira rahi ra te fa’atere i te mau nu’u fa’ehau ato’a o te mau ’āti Nephi—’e ’o Moroni tōna i’oa.

17 ’E tei ia Moroni te mana ’e te fa’aterera’a i tā rātou mau tama’i. ’E e piti ’ahuru ma pae ana’e iho tōna matahiti i mā’itihia ai ’oia ’ei ra’atira rahi i ni’a i te mau nu’u fa’ehau o te mau ’āti Nephi.

18 ’E i muri a’era, ’ua ’aro ’oia i te mau ’āti Lamana i te mau ’ōti’a o Ieresona, ’e ’ua fa’aineinehia tōna ra mau ta’ata i te ’o’e, ’e te simetera, ’e te mau huru mauha’a tama’i ato’a.

19 ’E ’ia ’ite mai ra te mau nu’u fa’ehau o te mau ’āti Lamana ē, ’ua ineine te mau ’āti Nephi, ’oia ho’i ’ua fa’aineine Moroni i tōna ra mau ta’ata i te mau pāruru ’ōuma ’e te mau pāruru rima, ’oia ïa, ’e i te mau pāruru upo’o ato’a, ’e ’oia ato’a ’ua fa’a’ahuhia rātou i te mau ’ahu me’ume’u roa—

20 I teienei, ’aita roa te mau nu’u fa’ehau o Zerahemana i fa’aineinehia mai te reira te huru ; ’ua haere noa mai rātou ’e tā rātou mau ’o’e ana’e ’e tā rātou mau simetera, tā rātou mau fana ’e tā rātou mau te’a, tā rātou mau ’ōfa’i ’e tā rātou mā’a ; ’e ’ua vai taha’a noa rātou, maori rā ’ua tātuahia tō rātou tau’upu i te ’iri pua’a ; ’oia ïa, ’ua vai taha’a noa rātou ato’a, maori rā te mau ’āti Zorama ’e te mau ’āti Amaleka.

21 ’Aita rā rātou i fa’aineinehia i te pāruru ’ōuma, ’e i te mau pāruru—nō reira, ’ua mata’u roa rātou i te mau nu’u fa’ehau o te mau ’āti Nephi nō tō rātou ’ahu tama’i, noa atu ē ’ua rahi atu rātou i te mau ’āti Nephi.

22 Inaha, i teienei, i muri a’era, ’ua mata’u rātou ’ia ’aro atu i te mau ’āti Nephi i te mau ’ōti’a o Ieresona ra ; nō reira ’ua haere atu rātou i rāpae i te fenua ra nō Anetionuma, ’e tae atu ra i roto i te mēdēbara, ’e ’ua ha’a’ati a’era rātou i te mēdēbara tei ni’a i te ha’amatara’a o te ’ānāvai ra Sidona, ’ia ti’a ia rātou ’ia tae atu i te fenua ra nō Maniti, ’e ’ia rave i taua fenua ra ; nō te mea ’aita rātou i mana’o ē, e ’ite te mau nu’u fa’ehau o Moroni i te vāhi e haerehia atu e rātou.

23 ’E i muri a’era, i muri noa iho i tō rātou haerera’a atu i roto i te mēdēbara, ’ua tono atu ra Moroni i te mau ta’ata tāmoemoe i roto i te mēdēbara nō te hi’o i tō rātou pūhapara’a ; ’e ’ua ’ite ato’a Moroni i te mau parau tohu a Alama, ’e ’ua tono atu ra ’oia i te tahi mau ta’ata iāna ra, nō te tītau iāna ’ia ani atu ’oia i te Fatu i te vāhi tā te mau nu’u fa’ehau o te mau ’āti Nephi e ti’a ’ia haere nō te pāruru ia rātou iho i te mau ’āti Lamana.

24 ’E i muri a’era, ’ua tae mai ra te parau a te Fatu ia Alama, ’e ’ua fa’a’ite atu ra Alama i te mau ve’a a Moroni ē, tē ha’a’ati ra te mau nu’u fa’ehau o te mau ’āti Lamana i te mēdēbara, ’ia ti’a ia rātou ’ia haere atu i te fenua ra nō Maniti, nō te ha’amata i te ’aro atu i te hō’ē pae paruparu o te mau ta’ata. ’E ’ua haere atu ra taua mau ve’a ra ’e ’ua fa’a’ite atu ra i taua parau ra ia Moroni.

25 I teienei, ’ua vaiiho a’era Moroni i te tahi pae o tōna ra nu’u fa’ehau i te fenua ra nō Ieresona, penei a’e ’o te haere mai te tahi pae o te mau ’āti Lamana i taua fenua ra ’a haru ai i te ’oire, ’e ’ua rave ihora ’oia i te toe’a o tōna ra nu’u fa’ehau ’e ’ua haere atu ra i te fenua ra nō Maniti.

26 ’E ’ua fa’aue atu ra ’oia ’ia ha’aputuputu mai te mau ta’ata ato’a nō taua vāhi o te fenua ra, ’e ’ia ’aro atu i te mau ’āti Lamana nō te pāruru i tō rātou mau fenua ’e tō rātou nūna’a, ’e tō rātou mau ti’ara’a ’e tō rātou ti’amāra’a ; nō reira ’ua ineine rātou nō te taera’a mai o te mau ’āti Lamana.

27 ’E i muri a’era, ’ua huna ihora Moroni i tōna ra nu’u fa’ehau i roto i te peho i pīha’i iho i te pae o te ’ānāvai ra Sidona, tei te pae hiti i te tō’o’a o te rā i te ’ānāvai ra Sidona i roto i te mēdēbara.

28 ’E ’ua tono atu ra Moroni i te mau ta’ata tāmoemoe ē ’ati noa a’e te fenua, ’ia ’ite ’oia i te taera’a mai o te pūhapara’a o te mau ’āti Lamana.

29 ’E i teienei, ’ua ’ite Moroni i te ’ōpuara’a a te mau ’āti Lamana, ’e tā rātou ’ōpuara’a nō te ha’amou ïa i tō rātou mau taea’e, ’e ’aore rā nō te ha’avī ia rātou ’e nō te fa’atītī ia rātou, ’ia ti’a ia rātou ’ia fa’ati’a i te hō’ē bāsileia nō rātou iho i ni’a i te fenua tā’āto’a.

30 ’E ’ua ’ite ato’a ho’i ’oia ē, ’o te hina’aro hō’ē roa o te mau ’āti Nephi te pāruru-noa-ra’a i tō rātou mau fenua, ’e tō rātou ti’amāra’a, ’e tā rātou ’ēkālesia, nō reira ’ua mana’o ’oia ē, e ’ere ïa i te hara ’ia pāruru ’oia ia rātou nā roto i te rāmā ; nō reira, ’ua ’itea iāna, nā roto i tōna ra mau ta’ata tāmoemoe te ’ē’a e haerehia ’e te mau ’āti Lamana.

31 Nō reira, ’ua vāhi ’oia i tōna ra nu’u fa’ehau, ’e ’ua arata’i atu ra ’oia i te tahi pae i roto i te peho, ’e ’ua fa’atāpuni atu ra ia rātou i te pae i te hiti’a o te rā, ’e i te pae apato’a ho’i nō te ’āivi ra o Ripala.

32 ’E ’ua fa’atāpuni atu ra ’oia i te toe’a i roto i te peho i te tō’o’a o te rā, tei te pae i te tō’o’a o te rā i te ’ānāvai ra Sidona, ’e tei raro i te mau ’ōti’a o te fenua ra nō Maniti.

33 ’E ’ua fa’atāpuni ’oia i tōna nu’u fa’ehau mai te au i tōna hina’aro, ’e ’ua ineine ’oia nō te ’aro atu ia rātou.

34 ’E i muri a’era, ’ua haere mai ra te mau ’āti Lamana nā te pae apato’erau o taua ’āivi i fa’atāpunihia ai te tahi pae o te nu’u fa’ehau o Moroni.

35 ’E ’a ma’iri ai te mau ’āti Lamana i te ’āivi ra o Ripala, ’e ’a tae atu ai rātou i roto i te peho, ’e ’a ha’amata ai rātou i te haere nā roto i te ’ānāvai Sidona, ’ua haere mai ra te nu’u fa’ehau, ’o tei fa’atāpunihia i te pae apato’a o te ’āivi, ’e tei arata’ihia e te hō’ē ta’ata o Lehi tōna i’oa, ’e ’ua ha’a’ati a’era tōna nu’u fa’ehau i te mau ’āti Lamana i te pae hiti’a o te rā, nā muri atu ia rātou.

36 ’E i muri a’era, ’ia ’ite a’era te mau ’āti Lamana ē tei muri te mau ’āti Nephi ia rātou, ’ua fāriu atu ra rātou ’e ’ua ha’amata ihora i te ’aro atu i te nu’u fa’ehau o Lehi.

37 ’E ’ua ha’amata ihora te ’ohipa nō te pohe i nā pae e piti ato’a ra, ’ua hau rā te pohe i rotopū i te mau ’āti Lamana, ’e nō tō rātou vai-taha’a-noa-ra’a ’ua tā’iri-’ōhie-hia rātou i te mau tā’iri ha’apohe a te mau ’āti Nephi i tā rātou mau ’o’e ’e tā rātou mau simetera ho’i.

38 ’E ’ua ma’iri ato’a te tahi pae iti o te mau ta’ata i rotopū i te mau ’āti Nephi i terā taime ’e i terā taime nā roto i tā rātou mau ’o’e ’e te ha’amani’ira’a toto, nō te mea ’ua pāruruhia rātou e tā rātou mau pāruru ’ōuma, ’e tā rātou mau pāruru rima, ’e tā rātou mau pāruru upo’o i te mau vāhi e pohe ’ōhie ai te tino ’ia puta i te mau tā’irira’a a te mau ’āti Lamana ; ’e ’ua nā reira noa te mau ’āti Nephi i te rave i te ’ohipa taparahi ta’ata i rotopū i te mau ’āti Lamana.

39 ’E i muri a’era, ’ua tupu a’era tō te mau ’āti Lamana mata’u, nō te mea e pohe rahi tei rotopū ia rātou, ’e ’ua ha’amata ihora rātou i te horo atu i te ’ānāvai Sidona.

40 ’E ’ua a’ua’uhia atu ra rātou e Lehi ’e tōna ra mau ta’ata ; ’e ’ua hōparahia atu ra rātou e Lehi i roto i te mau pape nō Sidona, ’e ’ua haere roa rātou i te tahi atu pae nō te pape ra o Sidona. ’E ’ua tāpe’a Lehi i tōna mau nu’u fa’ehau i ni’a i te hiti o te ’ānāvai Sidona ’ia ’ore rātou ’ia haere i te tahi atu pae.

41 ’E i muri a’era, ’ua ’aro atu ra Moroni ’e tōna nu’u fa’ehau i te mau ’āti Lamana i roto i taua peho ra, i te tahi pae mai o te ’ānāvai Sidona, ’e ’ua ha’amata ihora i te ’aro ia rātou ’e i te taparahi ia rātou.

42 ’E ’ua horo ’ē fa’ahou atu ra te mau ’āti Lamana mai mua atu ia rātou, i te fenua ra nō Maniti ; ’e ’ua ’aro-fa’ahou-hia mai rātou e te mau nu’u fa’ehau o Moroni.

43 I teienei, ’ua ’aro ’ū’ana mai ra te mau ’āti Lamana ; ’oia ïa, ’ua ’aro mai ra te mau ’āti Lamana ma te pūai rahi ’e te mata’u ’ore, ’aita, ’e ’aita te reira huru i ’iteahia na mai te mātāmua mai ā.

44 ’E ’ua fa’aitoitohia rātou e te mau ’āti Zorama ’e e te mau ’āti Amaleka, ’o tei riro na ’ei mau ra’atira rahi ’e ’ei mau ta’ata fa’atere rahi nō rātou, ’e e Zerahemana ato’a, tō rātou ra’atira rahi, ’oia ho’i tō rātou ta’ata fa’atere rahi ’e ta’ata arata’i rahi ; ’oia ïa, ’ua ’aro rātou mai te mau teni ra, ’e ’ua taparahihia te mau ’āti Nephi e rave rahi e tō rātou ra rima, ’oia ïa, ’ua tāpū rātou i tō rātou mau pāruru upo’o e rave rahi nā rōpū, ’e ’ua pātia ato’a rātou i tō rātou mau pāruru ’ōuma e rave rahi, ’e ’ua tāpū rātou i tō rātou mau rima e rave rahi ; ’e ’ua nā reira te mau ’āti Lamana i te ’aro mai nā roto i tō rātou riri ’ū’ana rahi.

45 ’Āre’a rā, ’ua fa’aitoitohia te mau ’āti Nephi e te hō’ē mea maita’i a’e, ’aita rātou e ’aro ra ’ia roa’a te fa’aterera’a ’e te mana, tē aro ra rā rātou nō tō rātou mau ’utuāfare ’e tō rātou ti’amāra’a, ’e tā rātou mau vahine ’e tā rātou mau tamari’i, ’e tā rātou mau mea ato’a, ’oia ïa, nō tā rātou mau rāve’a ha’amorira’a ’e tā rātou ’ēkālesia.

46 ’E tē rave ra rātou i te mea i mana’ohia e rātou e ’ohipa nā rātou i tō rātou Atua ; nō te mea ’ua parau mai ho’i te Fatu ia rātou ’e i tō rātou ato’a mau metua i te nā-’ō-ra’a ē : Mai te mea ē ’aita ’outou i hape i te hape mātāmua, ’e ’aita ato’a i te piti, ’eiaha ïa ’outou e fa’ati’a ia ’outou ’ia taparahihia e te rima o tō ’outou ra mau ’enemi.

47 ’E teie fa’ahou ā, ’ua parau mai te Fatu ē : ’Ia pāruru ’outou i tō ’outou mau ’utuāfare e tae roa atu i te ha’amani’ira’a toto. Nō reira, ’o te tumu ho’i te reira i ’aro atu ai te mau ’āti Nephi i te mau ’āti Lamana, nō te pāruru ia rātou iho, ’e tō rātou mau ’utuāfare, ’e tō rātou mau fenua, ’e tō rātou nūna’a, ’e tō rātou ti’ara’a, ’e tā rātou ha’apa’ora’a.

48 ’E i muri a’era, ’ia ’ite a’era te mau ta’ata o Moroni i te ’ōviri rahi ’e te riri ’ū’ana o te mau ’āti Lamana, ’ua fātata ihora rātou i te fa’ae’e ’e i te horo ’ē atu mai mua atu ia rātou. ’E ’ia ’ite a’era Moroni i tā rātou ’ōpuara’a, ’ua fa’atupu ihora ’oia i teie nei mau mana’o i roto i tō rātou ’ā’au—’oia ïa, i te mau mana’o nō ni’a i tō rātou mau fenua, i tō rātou ti’amāra’a, ’oia ïa, tō rātou ti’amāra’a i te fa’atītīra’a.

49 ’E i muri a’era, ’ua fāriu atu ra rātou nō te ’aro i te mau ’āti Lamana, ’e ’ua ti’aoro atu ra rātou ma te reo hō’ē i te Fatu tō rātou Atua, nō tō rātou ti’amā ’e tō rātou ti’amāra’a ho’i i te fa’atītīra’a.

50 ’E ’ua ’aro atu ra rātou i te mau ’āti Lamana ma te pūai, ’e i taua iho hora ra i ti’aoro atu ai rātou i te Fatu nō tō rātou ti’amāra’a, ’ua ha’amata ihora te mau ’āti Lamana i te horo ’ē atu mai mua atu ia rātou ; ’e ’ua horo atu ra rātou ē tae roa atu ra i te mau pape nō Sidona.

51 I teienei, ’ua rahi atu te mau ’āti Lamana, ’oia ïa, ’ua tāta’ipiti atu tō rātou rahi i tō te mau ’āti Nephi ; ’āre’a rā ’ua tīahihia atu rātou ’e nō reira ’ua ha’aputuputuhia rātou i roto i te hō’ē pupu ta’ata i roto i te peho, i te hiti nō te ’ānāvai Sidona.

52 Nō reira ’ua ha’a’ati atu te mau nu’u fa’ehau o Moroni ia rātou, ’oia ïa, i nā pae e piti o te ’ānāvai pape, inaha ho’i, tei te pae i te hiti’a o te rā te mau ta’ata o Lehi.

53 Nō reira ’ia ’ite atu Zerahemana i te mau ta’ata o Lehi i te pae nō te hiti’a o te rā nō te ’ānāvai Sidona, ’e te mau nu’u fa’ehau o Moroni i te pae tō’o’a o te rā nō te ’ānāvai Sidona, ’e ’ua ha’a’atihia rātou ’e te mau ’āti Nephi, ’ua tupu ihora tō rātou mata’u rahi.

54 I teienei, ’ia ’ite a’era Moroni i tō rātou ra mata’u rahi, ’ua fa’aue atu ra ’oia i tōna mau ta’ata ’ia fa’aea rātou i te ha’amani’i i tō rātou toto.