1 I teienei, i muri a’era, i tō Moroni fāri’ira’a i teie ’episetole, ’ua riri roa ihora ’oia, nō te mea ’ua ’ite ’oia ē, ’ua ’ite pāpū Amorona i tāna iho mau ’ohipa ha’avare ; ’oia ia, ’ua ’ite ’oia ē, ’ua ’ite na Amorona ē, e ’ere i te mea ti’a ’ia fa’atupu ’oia i te ’arora’a i te mau ta’ata o Nephi.

2 ’E ’ua parau atu ra ’oia : Inaha, e’ita roa vau e taui i te feiā mau-’āuri ia Amorona, maori rā ’ia fa’a’ore ’oia i tāna ra ’ōpuara’a, mai tā’u i fa’a’ite atu i roto i tā’u ’episetole ; ’e e’ita roa ho’i au e fa’ati’a ’ia roa’a rahi atu ā tōna mana, maori rā ’o tei roa’a iāna i teienei.

3 Inaha, ’ua ’ite au i te vāhi tā te mau ’āti Lamana e tāpe’a ra i tō’u mau ta’ata ’o tā rātou i rave ’ei feiā mau-’āuri ; ’e nō te mea ’aita Amorona i fa’ati’a i tā’u anira’a i roto i tā’u ’episetole, inaha, e rave au mai te au i tā’u ra mau parau ; ’oia ïa, e tītau vau ’ia taparahi ia rātou ē tae roa atu ’ua tītau mai rātou i te hau.

4 ’E i teienei, i muri a’era, ’ia oti a’era tā Moroni paraura’a atu i teie mau parau, ’ua fa’aue atu ra ’oia ’ia ’imihia i rotopū i tōna ra mau ta’ata, penei a’e ’o te ’itehia mai te hō’ē ta’ata e hua’ai nō Lamana i rotopū ia rātou ra.

5 ’E i muri a’era, ’ua ’itehia a’era te hō’ē ta’ata, ’o Lamana tōna i’oa ; ’e ’o ’oia te hō’ē o te mau tāvini o te ari’i i taparahihia e ’Amalikia.

6 I teienei ’ua fa’aue atu ra Moroni ia Lamana ’e te tahi pae iti o tōna ra mau ta’ata ’ia haere atu i te mau tīa’i ’o tē ha’apa’o ra i te mau ’āti Nephi.

7 I teienei ’ua tāpe’ahia te mau ’āti Nephi i roto i te ’oire ra nō Gida ; nō reira ’ua mā’iti Moroni ia Lamana ’e te tahi pae iti o tōna ra mau ta’ata ’ia haere rātou nā muri iho iāna.

8 ’E ’ia pō ihora, ’ua haere atu ra Lamana i te mau tīa’i e ha’apa’o ra i te mau ’āti Nephi, ’e inaha, ’ua ’ite mai ra rātou iāna i te haerera’a atu, ’e ’ua tuō mai ra rātou iāna ; ’e ’ua parau atu ra ’oia ia rātou : ’Eiaha e mata’u ; inaha, e ’āti Lamana vau. Inaha, ’ua ora mai nei mātou mai roto mai i te mau ’āti Nephi, ’e tē ta’oto ra rātou ; e inaha ; ’ua rave mātou i tā rātou uaina ’e ’ua hōpoi mai mātou i te reira nā muri ia mātou.

9 I teienei ’ia fa’aro’o a’era te mau ’āti Lamana i teie mau parau, ’ua fāri’i mai ra rātou iāna ma te ’oa’oa ; ’e ’ua parau mai ra rātou iāna : ’A hōro’a mai na i tā ’outou uaina, ’ia inu mātou ; ’ua māuruuru mātou i te mea ’ua hōpoi mai ’outou i te uaina ’e ’ua rohirohi ho’i mātou.

10 ’Āre’a rā ’ua parau atu ra Lamana ia rātou : E vaiiho noa tātou i tā tātou uaina ē tae roa atu ’ua haere atu tātou e ’aro i te mau ’āti Nephi. ’Ua fa’arahi atu rā teie parau i tō rātou hina’aro ’ia inu i te uaina.

11 ’E ’ua parau mai ra rātou : ’Ua rohirohi tātou, nō reira ’ia inu tātou i te uaina, e’ita e maoro e roa’a fa’ahou ia tātou te uaina nō tā tātou tufa’a, ’e nā te reira e ha’apūai ia tātou ’ia ’aro atu i te mau ’āti Nephi.

12 ’E ’ua parau atu ra Lamana ia rātou : ’A rave mai te au i tō ’outou mau hina’aro.

13 ’E i muri a’era, ’ua inu noa ihora rātou i te uaina ; ’e e mea au roa ho’i i tō rātou inura’a, nō reira ’ua inu rahi noa rātou ; ’e e mea pūai te reira, ’e ’ua fa’arahi-roa-hia ho’i tōna pūai.

14 ’E i muri a’era, ’ua inu rātou ’e ’ua ’ārearea, ’e ’aita i maoro ’ua ta’ero roa ihora rātou pā’āto’a.

15 ’E i teienei, ’ia ’ite a’era Lamana ’e tōna mau ta’ata ē ’ua ta’ero rātou pā’āto’a, ’e ’ua ro’ohia ho’i i te ta’oto rahi, ’ua ho’i mai ra rātou ia Moroni ra ’e ’ua fa’a’ite mai ra iāna i te mau mea ato’a i tupu.

16 ’E i teienei, ’ua au te reira i tā Moroni ’ōpuara’a. ’E ’ua fa’aineine Moroni i tōna mau ta’ata i te mau mauha’a tama’i ; ’e ’ua haere atu ra ’oia i te ’oire ra nō Gida, ’a ro’ohia ai te mau ’āti Lamana i te ta’oto rahi ’e te ta’ero ho’i, ’e ’ua hōro’a atu i te mau mauha’a tama’i i te feiā mau-’āuri, ’e nō reira ho’i ’ua fāri’i rātou pā’āto’a i te mau mauha’a tama’i.

17 ’Oia ïa, ’e tae noa atu i tā rātou mau vahine ’e te mau tamari’i pā’āto’a ’o tei ti’a ’ia fa’a’ohipa i te mauha’a tama’i, i te taime ’a hōro’a atu ai Moroni i te mauha’a tama’i i te feiā mau-’āuri pā’āto’a ; ’e ’ua ravehia taua mau mea ato’a ra ma te māniania ’ore.

18 ’Āre’a rā ’āhiri rātou i fa’aara i te mau ’āti Lamana, inaha ’ua ta’ero rātou ’e ’ua ti’a i te mau ’āti Nephi ’ia taparahi ia rātou.

19 Inaha rā, e ’ere te reira i tō Moroni hina’aro ; ’aita ho’i ’oia i ’oa’oa i te taparahi i te ta’ata ’e ’aore rā i te ha’amani’i toto, ’ua ’oa’oa rā ’oia i te fa’aora i tōna mau ta’ata i te pohe ; ’e nō teie tumu ’aita ’oia i fa’atae mai i te parauti’a ’ore i ni’a iāna, ’aita ato’a ho’i ’oia i haere atu e taparahi i te mau ’āti Lamana i roto i tō rātou ta’ero.

20 ’Āre’a rā ’ua manuia tōna mau hina’aro ; ’ua hōro’a ’oia i te mau mauha’a tama’i i te feiā mau-’āuri o te mau ’āti Nephi ’o tei tāpe’ahia i roto i te ’āua o te ’oire, ’e ’ua hōro’a atu ’oia i te mana ia rātou ’ia haru i taua mau tufa’a i roto i te mau ’āua.

21 ’E i reira ’ua fa’aue atu ra ’oia i tōna mau ta’ata ’ia fa’aātea ’ē ri’i atu ia rātou, ’e ’ia ha’a’ati i te mau nu’u fa’ehau o te mau ’āti Lamana.

22 I teienei, inaha, ’ua ravehia teie i te taime pō, ’e ’ia ara a’era te mau ’āti Lamana i te po’ipo’i, ’ua ’ite a’era rātou ē, ’ua ha’a’atihia rātou e te mau ’āti Nephi i rāpae mai, ’e ’ua fāri’i tā rātou feiā mau-’āuri i roto mai i te mauha’a tama’i.

23 ’E nō reira ’ua ’ite ihora rātou ē, e mana tō te mau ’āti Nephi i ni’a ia rātou ; ’e i roto i taua mau ’ati ra, ’ua ’ite ihora rātou ē, e mea faufa’a ’ore ’ia tama’i atu i te mau ’āti Nephi ; nō reira ’ua tītau atu tō rātou mau ra’atira rahi ’ia hōpoihia mai tā rātou mau mauha’a tama’i, ’e ’ua hōpoi mai rātou i te reira ’e ’ua huri mai ra i te pae ’āvae o te mau ’āti Nephi, ma te ani mai ’ia aroha atu ia rātou.

24 I teienei, inaha, ’o teie te hina’aro o Moroni. ’Ua rave ihora ’oia ia rātou ’ei feiā mau-’āuri tau tama’i, ’e ’ua rave ato’a ho’i i taua ’oire ra, ’e ’ua fa’ati’amā ihora i te feiā mau-’āuri ’āti Nephi pā’āto’a ; ’e ’ua ’āmui mai ra rātou i roto i te nu’u fa’ehau o Moroni, ’e ’ua riro rātou ’ei pūai rahi nō tōna ra nu’u fa’ehau.

25 ’E i muri a’era, ’ua fa’aue atu ra ’oia i te mau ’āti Lamana ’o tāna i rave mai ’ei feiā mau-’āuri, ’ia ha’amata rātou i te rave i te ’ohipa nō te fa’a’eta’eta i te mau pā pa’ari ē ’ati noa a’e te ’oire ra nō Gida.

26 ’E i muri a’era, ’ia fa’aoti a’era ’oia i te ha’apa’ari i te ’oire ra nō Gida, mai te au i tōna ra mau hina’aro, ’ua fa’aue atu ra ’oia ’ia arata’ihia tāna feiā mau-’āuri i te ’oire ra nō ’Auhune ; ’e ’ua pāruru ato’a ’oia i taua ’oire ra i te hō’ē nu’u fa’ehau pūai roa.

27 ’E i muri a’era, ’ua nā reira rātou, noa atu ā te mau ’ohipa ha’avarevare a te mau ’āti Lamana, ’ua tāpe’a ’e ’ua pāruru rātou i te feiā mau-’āuri ato’a ’o tā rātou i rave mai, ’e ’ua tāpe’a noa ato’a rātou i te mau fenua ato’a ’e te mau mea ato’a ho’i i roa’a ia rātou ra.

28 ’E i muri a’era, ’ua ha’amata fa’ahou ihora te mau ’āti Nephi i te upo’oti’a, ’e i te fāri’i fa’ahou i tō rātou ti’amāra’a ’e te mau mea e maita’i ai rātou.

29 E rave rahi taime ’ua tāmata te mau ’āti Lamana ’ia ha’a’ati ia rātou i te pō, ’āre’a rā i roto i teie mau tāmatara’a, e rave rahi fa’ahou ā tō rātou i riro mai ’ei feiā mau-’āuri.

30 ’E e rave rahi taime ’ua tāmata rātou ’ia fa’ainu i te mau ’āti Nephi i tā rātou uaina, ’ia ti’a ia rātou ’ia ha’apohe ia rātou i te mea ta’ero ’e ’aore rā ’ia fa’ata’erohia i te ’ava.

31 Inaha rā, ’aita roa te mau ’āti Nephi i tō’aru’aru i te ha’amana’o i te Fatu tō rātou Atua i roto i tō rātou taime ati. ’Aita roa rātou i topa i roto i tā rātou mau mārei ; ’oia ïa, ’aita rātou e inu i tā rātou uaina, maori rā ’ua hōro’a rātou i te tahi nā mua i te feiā mau-’āuri ’āti Lamana.

32 ’E ’ua nā reira rātou i te hi’o māite ’ia ’ore te hō’ē mea ta’ero ’ia fa’ainuhia ia rātou ; ’i te mea ho’i, mai te mea e fa’ata’ero tā rātou uaina i te hō’ē ta’ata ’āti Lamana, e fa’ata’ero ato’a ïa te reira i te hō’ē ta’ata ’āti Nephi ; ’e ’ua nā reira rātou i te hi’opo’a i tā rātou mau huru ’ava ato’a.

33 ’E i teienei, i muri a’era, e mea ti’a roa ia Moroni ’ia fa’aineine nō te haru i te ’oire ra nō Morianetona ; inaha ho’i, nā roto i tā rātou iho mau ’ohipa, ’ua ha’apa’ari te mau ’āti Lamana i te ’oire ra nō Morianetona ē tae noa atu ’ua riro te reira ’ei ha’apūra’a pa’ari roa.

34 ’E ’ua tāmau noa rātou i te ’āfa’i mai i te feiā tama’i ’āpī i roto i taua ’oire ra, ’e i te mau mā’a ’āpī ato’a ho’i.

35 ’E ’o te hope’a te reira nō te piti ’ahuru ’e ma iva o te matahiti nō te fa’aterera’a a te mau ha’avā i ni’a i te mau ta’ata o Nephi.