1 ’E inaha, i teienei, i muri a’era, ’ua rahi roa te riri o taua mau ’āti Lamana ra nō te mea ’ua taparahi rātou i tō rātou mau taea’e ; nō reira ’ua tapu ihora ’ia tāho’o atu i te mau ’āti Nephi ; ’e ’aita a’era rātou i tāmata fa’ahou ’ia taparahi i te mau ta’ata o te Aneti-Nephi-Lehi i taua taime ra.

2 ’Āre’a rā ’ua arata’i mai ra rātou i tō rātou mau nu’u fa’ehau i te mau hiti nō te fenua ra nō Zarahemela, ’e ’ua ’aro atu ra rātou i te mau ta’ata e pārahi ra i te fenua ra nō Amoniha ’e ’ua ha’amou ia rātou.

3 ’E i muri iho i te reira, e rave rahi tā rātou mau tama’ira’a i te mau ’āti Nephi, ’e ’ua ti’avaruhia ’e ’ua taparahihia ho’i rātou.

4 ’E i rotopū i te mau ’āti Lamana i taparahihia, nō roto mai ïa te pae rahi roa i te hua’ai o Amulona ’e tōna ra mau taea’e, ’e e mau tahu’a ho’i rātou nā Noa, ’e ’ua taparahihia rātou e te rima o te mau ’āti Nephi.

5 ’E ’ua horo atu ra te toe’a ’o rātou i te mēdēbara i te hiti’a o te rā, ’e i muri iho i tō rātou harura’a i te mana ’e te ha’amanara’a i ni’a a’e i te mau ’āti Lamana, ’ua ha’amou ihora rātou i te mau ’āti Lamana e rave rahi i te auahi nō tō rātou ti’aturira’a—

6 Nō te pae rahi ho’i o rātou, i muri iho i tō rātou mau pau rahi ’e te mau ’ati e rave rahi ho’i, ’ua tūra’ihia rātou ’ia ha’amana’o i te mau parau tā Aarona ’e tōna ra mau taea’e i a’o atu ia rātou i tō rātou ra fenua ; nō reira ’ua tupu ihora tō rātou ti’aturi ’ore i te mau peu tumu a tō rātou ra mau metua, ’e ’ia ti’aturi i te Fatu, ’e nāna i hōro’a mai i te mana rahi i te mau ’āti Nephi ; ’e nō reira e rave rahi tō rātou tei fa’afāriuhia i roto i te mēdēbara.

7 ’E i muri a’era, ’ua fa’aue atu ra rātou, ’oia ho’i te mau tāvana nō te toe’a nō te hua’ai o te mau tamari’i a Amulona ra, ’ia taparahihia rātou, ’oia ïa, te mau ta’ata ato’a i ti’aturi i taua mau mea nei.

8 I teienei, nā taua taparahira’a ra i fa’ati’arepu i te riri i roto i tō rātou mau taea’e e rave rahi ; ’e ’ua tupu ihora te mārōra’a i roto i te mēdēbara ; ’e ’ua ha’amata ihora te mau ’āti Lamana i te ’imi i te hua’ai o Amulona ’e tōna ra mau taea’e ’e ’ua ha’amata ihora i te taparahi ia rātou, ’e ’ua horo atu ra rātou i roto i te mēdēbara i te hiti’a o te rā.

9 ’E inaha, ’ua ’imihia rātou e te mau ’āti Lamana i teie nei mahana. Nō reira ’ua tupu mau atu ra te mau parau a Abinadi, ’o tāna i parau nō ni’a i te hua’ai o te mau tahu’a ’o tei tītau ’ia ha’apohe iāna i te auahi.

10 ’Ua parau ho’i ’oia ia rātou : Tā ’outou e rave mai iā’u nei, e taipe ïa nō te mau mea e tupu a muri atu.

11 ’E i teienei, ’o Abinadi te ta’ata mātāmua i pohe i te auahi nō tōna ti’aturi i te Atua ; i teienei o teie te aura’a nō tāna parau, ’e e rave rahi te ta’ata e pohe i te auahi mai iāna i pohe ra.

12 ’E ’ua parau atu ’oia i te mau tahu’a o Noa, ’e nā tō rātou hua’ai e taparahi i te mau ta’ata e rave rahi mai iāna e taparahihia ra, ’e e ha’apurara-roa-hia rātou ’e e taparahihia ho’i, mai te māmoe tīa’i ’ore i a’ua’uhia ’e i taparahihia ho’i e te mau ’ānimara taehae ra ; ’e i teienei, inaha, ’ua tupu mau atu ra taua mau parau nei, ’ua ti’avaruhia rātou e te mau ’āti Lamana, ’e ’ua a’ua’uhia, ’e ’ua taparahihia.

13 ’E i muri a’era, ’ia ’ite a’era te mau ’āti Lamana ē, ’aita roa e ti’a ia rātou ’ia ha’avī atu i te mau ’āti Nephi, ’ua ho’i fa’ahou atu ra rātou i tō rātou iho fenua ; ’e e rave rahi tō rātou tei haere mai e pārahi i te fenua ra nō Isema’ela, ’e i te fenua ra nō Nephi ; ’e ’ua ’āmui mai rātou i te mau ta’ata o te Atua, ’oia ho’i i te mau ta’ata nō Aneti-Nephi-Lehi.

14 ’E ’ua tanu ato’a ihora rātou i tā rātou mau mauha’a tama’i, mai tā tō rātou mau taea’e i nā reira, ’e ’ua riro a’era rātou ’ei feiā parauti’a ; ’e ’ua haere rātou nā te ’ē’a o te Fatu, ’e ’ua ha’apa’o ho’i i tāna mau fa’auera’a ’e tāna mau ture.

15 ’Oia ïa, ’ua ha’apa’o rātou i te ture a Mose ; ’e e mea ti’a roa ho’i ia rātou ’ia ha’apa’o noa i te ture a Mose, nō te mea ’aita ā te reira i fa’atupuhia. ’E ’a vai noa ai rātou i raro a’e i te ture a Mose, tē hi’o ra rātou i mua i te taera’a mai o te Mesia, i te mana’ora’a ē, e taipe te ture a Mose nō tōna taera’a mai, ’e i te ti’aturira’a ē, ’ia ha’apa’o ā rātou i taua mau ’ohipa ra e ’itehia e te mata e ti’a ai, ē tae noa atu i te tau e fa’a’itehia mai ai ’oia ia rātou ra.

16 I teienei, ’aita rātou i mana’o ē, e tae mai te fa’aorara’a nā roto i te ture a Mose ; ’āre’a rā ’ua ha’apūai te ture a Mose i tō rātou fa’aro’o i te Mesia ; ’e nō te reira ’ua tāpe’a rātou i te ti’aturi nā roto i te fa’aro’o ē tae noa atu i te fa’aorara’a mure ’ore, ma te ti’aturi i te vārua nō te tohu, ’o tei fa’a’ite mai i te mau mea e tupu a muri atu.

17 ’E i teienei, inaha, ’ua ’oa’oa rahi roa Amona, ’e Aarona, ’e Omonera, ’e Himeni, ’e tō rātou mau taea’e, nō te ’ohipa manuia tā rātou i rave i rotopū i te mau ’āti Lamana, i te ’itera’a ē, ’ua hōro’a mai te Fatu ia rātou i tei au i tā rātou mau pure, ’e ’ua fa’atupu mau ho’i ’oia i tāna parau ia rātou i roto i te mau mea ato’a.