1 ’E i teienei, i muri a’era, i muri noa mai i te roa’ara’a mai ia ’Amalikia te bāsileia, ’ua fa’atupu ihora ’oia i te riri i roto i te ’ā’au o te mau ’āti Lamana i te mau ’āti Nephi, ’oia ïa, ’ua mā’iti ihora ’oia i te tahi mau ta’ata nō te parau atu i te mau ’āti Lamana nā ni’a mai i tō rātou mau pare ’ia fa’ahapa atu i te mau ’āti Nephi.

2 ’E ’ua nā reira ’oia i te fa’atupu i te riri i roto i tō rātou ’ā’au i te mau ’āti Nephi, ’e nō reira i te pae hope’a nō te ’ahuru ’e ma iva o te matahiti nō te fa’aterera’a a te mau ha’avā, ’ua manuia tāna mau ’ōpuara’a, ’oia ïa, nō te mea ’ua riro ’oia ’ei ari’i i ni’a i te mau ’āti Lamana, ’ua tītau ato’a ihora ’oia ’ia fa’atere i ni’a i te fenua tā’āto’a, ’oia ïa, ’e i te mau ta’ata ato’a i ni’a iho i te fenua, te mau ’āti Nephi ’e te mau ’āti Lamana ato’a ho’i.

3 Nō reira, ’ua manuia tāna ’ōpuara’a, ’e ’ua fa’a’eta’eta ’oia i te ’ā’au o te mau ’āti Lamana ’e ’ua ha’apōiri i tō rātou mana’o, ’e ’ua fa’atupu i tō rātou riri, ’e nō reira ’ua ha’aputuputu ihora ’oia i te tahi nu’u fa’ehau rahi nō te haere atu e ’aro i te mau ’āti Nephi.

4 ’E nō te rahi ho’i o tōna mau ta’ata, ’ua ’ōpua ’oia ’ia ha’avī i te mau ’āti Nephi ’e ’ia ’āfa’i ia rātou i raro a’e i te fa’atītīra’a.

5 ’E nō reira ’ua mā’iti ihora ’oia i te tahi mau ra’atira rahi nō roto i te mau ’āti Zorama, ’o rātou ho’i tei ’ite maita’i i te pūai o te mau ’āti Nephi, ’e tō rātou mau vāhi ha’apūra’a, ’e te mau vāhi paruparu roa o tō rātou mau ’oire ; nō reira ’ua mā’iti ’oia ia rātou ’ei mau ra’atira rahi nō tōna ra mau nu’u fa’ehau.

6 ’E i muri a’era, ’ua rave ihora rātou i tō rātou pūhapara’a, ’e ’ua fa’anu’u atu ra i te fenua ra nō Zarahemela i roto i te mēdēbara.

7 I teienei, i muri a’era, ’a roa’a ai ia ’Amalikia te mana nā roto i te ’ohipa ha’avare ’e te fa’ahemara’a, tē fa’aineine ra ïa Moroni i te ’ā’au o te mau ta’ata ’ia ha’apa’o maita’i i te hina’aro o te Fatu tō rātou Atua.

8 ’Oia ïa, tē ha’apūai ra ’oia i te mau nu’u fa’ehau o te mau ’āti Nephi, ’e tē hāmani ra ho’i i te mau ha’apūra’a iti, ’oia ho’i i te mau vāhi ha’apūra’a ; ma te ha’apu’e fa’ateitei i te ’āua repo ē ’ati noa a’e nō te ’āua i tōna mau nu’u fa’ehau, ’e ma te patu ato’a i te mau ’āua ’ōfa’i nō te ha’a’ati roa ia rātou ’e tō rātou mau ’oire ’e te mau ’ōti’a ho’i o tō rātou mau fenua ; ’oia ïa, ē hope roa a’e tō rātou mau fenua.

9 ’E i tō rātou mau pā paruparu roa, ’ua tu’u rahi ’oia i te mau ta’ata i reira ; ’e ’ua nā reira ’oia i te ha’apa’ari ’e i te ha’apūai i te fenua e pārahihia ra e te mau ’āti Nephi.

10 ’E ’ua nā reira ’oia i te fa’aineine nō te pāruru i tō rātou ti’amāra’a, tō rātou mau fenua, tā rātou mau vahine, ’e tā rātou mau tamari’i, ’e tō rātou hau, ’ia ora rātou i te Fatu ra i tō rātou Atua, ’e ’ia fa’ati’a noa ho’i rātou i tei parauhia e tō rātou mau ’enemi te ’ohipa a te mau Cherisetiano.

11 E ta’ata pūai ’e te mana ho’i ’o Moroni ; e ta’ata ’ite mau ; ’oia ïa, e ta’ata ’aita roa i ’oa’oa i te ha’amani’ira’a toto ; e ta’ata ’ā’au ’oa’oa ho’i i te ti’amāra’a ’e te hau maita’i ho’i o tōna ra fenua, ’e te ti’amāra’a e te tītī ’ore ho’i o tōna ra mau taea’e.

12 ’Oia ïa, e ta’ata ’ā’au ’ī i te ha’amaita’i i tōna Atua, nō te mau maita’i ’e te ha’amaita’ira’a e rave rahi tāna i hōro’a mai i tōna ra mau ta’ata ; e ta’ata itoito ho’i i te ’ohipa nō te maita’i ’e te pārurura’a i tōna ra mau ta’ata.

13 ’Oia ïa, e ta’ata mau māite ’oia i te fa’aro’o i te Mesia, ’e ’ua hōreo ’oia ma te tapu ē, e pāruru ’oia i tōna mau ta’ata, tōna ti’amāra’a, ’e tōna fenua, ’e tāna ha’apa’ora’a ē tae noa atu i te tahera’a o tōna ra toto.

14 I teienei, ’ua ha’api’ihia te mau ’āti Nephi ’ia pāruru ia rātou iho i tō rātou mau ’enemi, e tae roa atu i te ha’amani’ira’a toto mai te mea e tītauhia ; ’oia ïa, ’ua ha’api’i-ato’a-hia ho’i rātou ē, ’eiaha roa e fa’a’ino, ’oia ïa, ’e ’eiaha roa ho’i e fa’a’ohipa i te ’o’e maori rā nō te pāto’i atu i te ’enemi, ’e nō te pāruru ia rātou iho.

15 ’E teie tō rātou fa’aro’o, ’e ’ia nā reira rātou e ha’amanuia te Atua ia rātou i ni’a i te fenua nei ; ’oia ho’i, ’ia itoito rātou i te ha’apa’ora’a i te mau fa’auera’a a te Atua, e ha’amanuia ’oia ia rātou i ni’a i te fenua nei ; ’oia ïa, e fa’aara ’oia ia rātou ’ia horo ’ē atu, ’e ’aore rā ’ia fa’aineine nō te ’arora’a, mai te au i tō rātou ati.

16 ’E ’oia ato’a, e fa’a’ite te Atua ia rātou i te vāhi tā rātou e haere atu nō te pāruru ia rātou iho i tō rātou mau ’enemi ; ’e ’ia nā reira rātou, e fa’aora te Fatu ia rātou ; ’e ’o tē fa’aro’o ïa te reira o Moroni, ’e ’ua ’oa’oa ho’i tōna ’ā’au i te reira, ’eiaha i te ha’amani’ira’a toto, i te ravera’a rā i te maita’i, ’e i te fa’aorara’a i tōna ra mau ta’ata ; ’oia ïa, i te ha’apa’ora’a i te mau fa’auera’a a te Atua, ’e i te pāto’ira’a i te mau ’ohipa ’ī’ino.

17 ’Oia ïa, ’oia mau, ’oia mau, tē parau atu nei au ia ’outou na, ’āhiri te mau ta’ata ato’a i ora na, ’e tē ora nei, ’e tē ora a muri atu mai ia Moroni ra te huru, inaha, ’ua ’āueue ’ē nā ïa te mana o hade ē a muri noa atu, ’oia ïa, e ’ore roa ïa tō te diabolo e mana i ni’a i te ’ā’au o te mau tamari’i a te ta’ata nei.

18 Inaha, e ta’ata ’oia mai ia Amona ra te huru, ’oia ho’i te tamaiti a Mosia, ’oia ïa, e mai te tahi atu mau tamaiti a Mosia ra ; ’oia ïa, e mai ia Alama ho’i ’e tāna mau tamaiti, e mau ta’ata ho’i rātou ato’a nō te Atua.

19 I teienei, inaha, ’aita tā Helamana ’e tā tōna mau taea’e tauturura’a i te mau ta’ata i iti iho i tā Moroni ; ’ua a’o ato’a ho’i rātou i te parau a te Atua, ’e ’ua bāpetizo ho’i rātou i te mau ta’ata ato’a e tae atu ai i te tātarahapara’a, ’oia i te mau ta’ata ato’a i fa’aro’o i tā rātou mau parau.

20 ’E ’ua nā reira rātou i te rave i te ’ohipa, ’e ’ua fa’aha’eha’a te mau ta’ata ia rātou iho nō tā rātou ra mau parau, ’e nō reira ho’i ’ua ha’amaita’ihia rātou e te Fatu, ’e ’aita a’era te mau ’arora’a ’e te mau mārōra’a i tupu i rotopū ia rātou, ’oia ïa, nō te ārea e maha matahiti te maoro.

21 ’Āre’a rā, mai tā’u i parau, ’ia tae a’era i te pae hope’a nō te ’ahuru ’e ma iva o te matahiti, ’oia ïa, noa atu ā tō rātou hau i rotopū ia rātou iho, ’ua tūra’ihia rā rātou ma tō rātou hina’aro ’ore, ’ia ’aro atu i tō rātou mau taea’e i te mau ’āti Lamana.

22 ’Oia ïa, ’aita roa tā rātou mau tama’ira’a i te mau ’āti Lamana i fa’aea nō te ārea e rave rahi matahiti te maoro, noa atu ā tō rātou hina’aro ’ore ’ia nā reira.

23 I teienei, ’ua ’oto rātou ’ia rave i te mau mauha’a tama’i nō te ’aro atu i te mau ’āti Lamana, nō te mea ’aita rātou i ’oa’oa ’ia ha’amani’i i te toto ; ’oia ïa, e ’ere i te reira ana’e—ua ’oto rātou i te mea ē, ’ua riro rātou ’ei mauha’a nō te tono atu i tō rātou mau taea’e e rave rahi i rāpae i teie nei ao i roto i te hō’ē ao mure ’ore, ma te ineine ’ore ’ia fārerei i tō rātou Atua.

24 ’Āre’a rā, ’aita roa e ti’a ia rātou ’ia vaiiho noa ’ia taparahihia rātou, nō te mea e taparahihia tā rātou mau vahine ’e tā rātou mau tamari’i i te pohe ri’ari’a ’ino roa ’e te mau ta’ata ’o tei riro na ’ei mau taea’e nō rātou i te mātāmua, ’oia ïa, ’e ’o tei tāiva ’ē atu i tā rātou ’ēkālesia, ’e tei fa’aru’e mai ia rātou ’e tei ’āmui atu i te mau ’āti Lamana nō te ha’amou ia rātou.

25 ’Oia ïa, ’aita roa e ti’a ia rātou ’ia fa’a’oroma’i i te mea tē ’oa’oa ra tō rātou mau taea’e i te taparahira’a i te mau ’āti Nephi, ’a vai noa ai te tahi mau ta’ata ’o tē ha’apa’o ra i te mau fa’auera’a a te Atua, nō te mea ’o teie ho’i te fafaura’a a te Fatu, mai te mea e ha’apa’o rātou i tāna mau fa’auera’a e manuia ïa rātou i ni’a i te fenua nei.