1 ’E i muri a’era, ’ua fa’auehia mai ra Alama rāua ’o Amuleka ’ia haere i rāpae i te ’oire ; ’e ’ua reva atu ra rāua, ’e ’ua tae roa atu ra i te fenua ra nō Sidoma ; ’e inaha, i reira ’ua ’itehia ia rāua te mau ta’ata ato’a ’o tei fa’aru’e atu i te fenua ra nō Amoniha, ’o tei ti’avaruhia ’e tei pēhihia ho’i i te ’ōfa’i, nō te mea ’ua ti’aturi rātou i te mau parau a Alama.

2 ’E ’ua fa’a’ite atu ra rāua ia rātou i te mau mea ato’a i tupu i ni’a i tā rātou mau vahine ’e te mau tamari’i, ’e nō ni’a ato’a ia rāua iho, ’e i ni’a ato’a i tō rāua mana i fa’aorahia ai rāua.

3 ’E ’o Zeezeroma ato’a, te tārava ra ’oia ma te ma’i i Sidoma, e fīva rahi tōna, ’e ’ua tupu te reira nā roto i te mau fifi rahi o tōna mana’o nō tāna mau ’ohipa ’ī’ino ; ’e ’ua mana’o ho’i ’oia ē, ’ua pohe ’o Alama rāua ’o Amuleka ; ’ua mana’o ’oia ē ’ua taparahihia rāua nō tāna mau ’ohipa ’ī’ino. ’E nō teie hara rahi, ’e te tahi atu o tāna mau hara e rave rahi, ’ua ahoaho roa tōna ’ā’au ē tae roa atu ’ua rahi roa tōna ahoaho, ’aita e rāve’a nō te fa’aora ; nō reira ’ua tupuhia ’oia i te fīva rahi ’e te ve’ave’a rahi.

4 I teienei, i tōna fa’aro’ora’a ē tei te fenua ra nō Sidoma ’o Alama rāua ’o Amuleka, ’ua itoito a’era tōna ’ā’au ; ’e ’ua fa’atae ’oi’oi ihora ’oia i te hō’ē parau anira’a ia rāua, ma te tītau ia rāua ’ia haere mai iāna ra.

5 ’E i muri a’era, ’ua haere ’oi’oi atu ra rāua, mai te au i te parau anira’a i fa’ataehia ia rāua ; ’e ’ua tomo atu ra rāua i roto i te fare i’ō Zeezeroma, ’e ’ua ’ite atu rāua iāna i ni’a i tōna ro’i, ’ua ma’ihia, ’e ’ua paruparu roa ho’i i te fīva rahi ; ’e ’ua ahoaho roa tōna mana’o nō tāna mau ’ohipa ’ī’ino ; ’e i tōna ’itera’a mai ia rāua, ’ua fa’atoro mai ra ’oia i tōna rima, ’e ’ua ani mai ra ia rāua ’ia fa’aora rāua iāna.

6 ’E i muri a’era, ’ua nā ’ō atu ra Alama iāna, ma te rave mai i tōna rima : ’Ua ti’aturi ānei ’oe i te mana o te Mesia e tae atu ai i te fa’aorara’a ?

7 ’E ’ua pāhono mai ra ’oia ’e nā ’ō mai ra : ’Ē, ’ua ti’aturi au i te mau parau ato’a tā ’oe i ha’api’i mai.

8 ’Ua nā ’ō atu ra Alama : Mai te mea e ti’aturi ’oe i te fa’aorara’a a te Mesia, e ti’a ia ’oe ’ia fa’aorahia.

9 ’Ua nā ’ō mai ra ’oia : ’Ē, e ti’aturi au mai te au i tā ’oe mau parau.

10 ’E i reira ’ua ti’aoro atu ra Alama i te Fatu, i te nā-’ō-ra’a ē : E te Fatu tō mātou Atua, ’a hi’o aroha mai i teie nei ta’ata, ’e ’a fa’aora mai iāna mai te au i tōna fa’aro’o i roto i te Mesia.

11 ’E ’ia oti a’era teie mau parau i te parauhia e Alama, ’ua ’ōu’a tā’ue noa mai ra Zeezeroma i ni’a i tōna nā ’āvae, ’e ’ua ha’amata ihora i te haere ; ’e ’ua māere roa atu ra te mau ta’ata ato’a ; ’e ’ua parare atu ra te ro’o o taua mea ra ē ’ati noa a’e te fenua ato’a o Sidoma.

12 ’E ’ua bāpetizo ihora Alama ia Zeezeroma i te Fatu ; ’e ’ua ha’amata ihora ’oia mai taua taime atu i te a’o haere atu i te mau ta’ata.

13 ’E ’ua fa’ati’a ihora Alama i te hō’ē ’ēkālesia i te fenua ra nō Sidoma, ’e ’ua fa’atōro’a ’oia i te mau tahu’a ’e te mau ’orometua, ’ia bāpetizo i te mau ta’ata ato’a i hina’aro ’ia bāpetizohia i te Fatu.

14 ’E i muri a’era, e rave rahi o rātou ; ’e ’ua ta’iruru mai rātou i Sidoma mai te fenua ē ’ati noa a’era, ’e ’ua bāpetizohia ihora rātou.

15 ’Āre’a rā te mau ta’ata i te fenua ra nō Amoniha, ’ua vai noa rātou ’ei feiā ’ā’au pa’ari ’e ’ei feiā ’ā’au ’eta’eta ; ’e ’aita rātou i tātarahapa i tā rātou mau hara, ’e ’ua parau ho’i rātou ē, nō te diabolo tō Alama rāua ’o Amuleka mana ; nō te ha’apa’ora’a ho’i a Nehora rātou, ’e ’aita rātou i ti’aturi nō ni’a i te tātarahapara’a i tā rātou mau hara.

16 ’E i muri a’era, ’o Alama rāua ’o Amuleka, nō te parau a te Atua i fa’aru’e ai Amuleka i tāna ’auro, ’e te ’ārio, ’e te mau tao’a faufa’a rahi nāna ra i te fenua ra nō Amoniha ; ’ua pāto’ihia ’oia e te feiā i riro na ’ei mau hoa nōna, ’e nā tōna metua tāne ato’a, ’e nā tōna mau fēti’i ato’a ho’i.

17 Nō reira, i muri iho i tō Alama fa’ati’ara’a i te ’ēkālesia i Sidoma, tē ’ite ra ’oia i te tāpe’ara’a rahi ; ’oia ïa, tē ’ite ra ’oia ē, ’ua tāpe’ahia te mau ta’ata i te te’ote’o o tō rātou ra ’ā’au, ’e tē fa’aha’eha’a ra rātou ia rātou iho i mua i te Atua, ’e tē ha’amata ra rātou i te ha’aputuputu ia rātou iho i tō rātou mau vāhi mo’a nō te ha’amori i te Atua i mua i te fata, ma te tīa’i ’e te pure tāmau noa, ’ia fa’aorahia rātou mai ia Sātane mai, ’e mai te pohe mai, ’e mai te ha’amoura’a mai—

18 I teienei, mai tā’u i parau, ’ua ’ite Alama i teie nei mau mea ato’a, nō reira ’ua rave ’oia ia Amuleka ’e ’ua haere mai i te fenua ra nō Zarahemela, ’e ’ua arata’i atu iāna i tōna ihora fare, ’e ’ua tauturu iāna i roto i tōna ra mau ’ati, ’e ’ua ha’apūai i tōna fa’aro’o i te Fatu.

19 ’E ’o te hope’a te reira nō te ’ahuru o te matahiti nō te fa’aterera’a a te mau ha’avā i ni’a i te mau ta’ata o Nephi.