1 I teienei, ’ia fa’aoti a’era Alama i te parau i teie mau parau, ’ua tono mai ra rātou i te hō’ē ve’a iāna nō tō rātou hina’aro ’ia ’ite e mea ti’a ānei ia rātou ’ia ti’aturi i te hō’ē noa iho Atua, ’ia roa’a mai ia rātou teie hotu ’o tāna i parau na, ’e nāhea ho’i rātou ’ia tanu i te huero, ’oia ho’i te parau o tāna i parau, ’o tāna ho’i i parau ē, ’ia tanuhia te reira i roto i tō rātou ’ā’au e ti’a ai ; ’oia ho’i, nāhea rātou ’ia fa’a’ohipa i tō rātou fa’aro’o.

2 ’E ’ua parau atu ra Alama ia rātou : Inaha, ’ua parau mai ’outou ē, ’aita e ti’a ia ’outou ’ia ha’amori i tō ’outou Atua, nō te mea ’ua hurihia ’outou i rāpae i tō ’outou mau sunago. Inaha rā, tē parau atu nei au ia ’outou na, mai te mea tē mana’o na ’outou ē, ’aita e ti’a ia ’outou ’ia ha’amori i te Atua, e hape rahi ïa tō ’outou i reira, ’e e mea ti’a ho’i ’ia ’imi ’outou i te mau pāpa’ira’a mo’a ; ’e mai te mea tē mana’o na ’outou ē nā rātou i ha’api’i mai i te reira ia ’outou, ’aita ïa ’outou i māramarama.

3 Tē ha’amana’o ra ānei ’outou i te tai’ora’a i tā Zenosa, te peropheta tahito, i parau nō ni’a i te pure ’e te ha’amorira’a ?

4 I nā ’ō na ho’i ’oia ē : E aroha tō ’oe, e te Atua, ’e ’ua fa’aro’o mai ho’i ’oe i tā’u ra pure, ’a pārahi ai au i roto i te mēdēbara ra ; ’oia ïa, ’ua aroha mai ’oe iā’u, ’a pure atu ai au nō tō’u ra mau ’enemi, ’e ’ua fa’afāriu mai ho’i ’oe ia rātou iā’u nei.

5 ’Oia ïa, e te Atua, ’ua aroha mai ’oe iā’u ’a ti’aoro atu ai au ia ’oe i roto tā’u ra ’āua, ’e ’a ti’aoro atu ai au ia ’oe nā roto i tā’u ra pure, ’ua fa’aro’o mai ’oe iā’u.

6 ’E teie fa’ahou ā, e te Atua, ’ia ho’i atu vau i tō’u ra fare, ’ua fa’aro’o mai ’oe i tā’u ra pure.

7 ’E ’ia tomo a’era vau i roto i tō’u ra piha, ’e ’ia pure atu ia ’oe, e te Fatu, ’ua fa’aro’o mai ’oe iā’u.

8 ’Oia ïa, tē aroha mai ra ’oe i tā ’oe ra mau tamari’i, ’ia ti’aoro atu rātou ia ’oe, ’ia fa’aro’ohia rātou e ’oe ’eiaha rā e te ta’ata nei, ’e ’ua fa’aro’o ïa ’oe ia rātou.

9 ’Oia ïa, e te Atua, ’ua aroha mai ’oe iā’u, ’e ’ua fa’aro’o mai ho’i i tā’u mau ti’aorora’a i rotopū i tō ’oe ra mau ’āmuira’a.

10 ’Oia ïa, ’ua fa’aro’o ato’a mai ’oe iā’u ’a hurihia atu ai au i rāpae ’e ’a ’ino’inohia ai ho’i au e tō’u ra mau ’enemi ; ’oia ïa, ’ua fa’aro’o mai ’oe i tā’u ra mau ti’aorora’a, ’e ’ua riri ho’i i tō’u ra mau ’enemi, ’e ’ua tāho’o ’oi’oi mai ’oe ia rātou i roto i tō ’oe ra riri nā roto i te ha’amoura’a.

11 ’E ’ua fa’aro’o mai ’oe iā’u nō tō’u ra mau ’ati ’e nō tō’u ra ’ā’au ha’avare ’ore, ’e nō tā ’oe Tamaiti i nā reira ai ’oe i te aroha mai iā’u ; nō reira e ti’aoro atu vau ia ’oe i roto i tō’u mau ’ati ato’a, ’e tei roto ho’i ia ’oe tō’u ra ’oa’oa ; ’e ’ua fa’afāriu ’ē atu ’oe i tā ’oe mau ha’avāra’a iā’u nei, nā roto i tā ’oe ra Tamaiti.

12 ’E i teienei, ’ua parau atu ra Alama ia rātou : Tē ti’aturi ra ānei ’outou i taua mau pāpa’ira’a mo’a ra i pāpa’ihia e te feiā i tahito ra ?

13 Inaha, mai te mea e nā reira ’outou, e ti’aturi ïa ’outou i tā Zenosa i parau mai ; inaha ho’i, tē nā ’ō ra ’oia : ’Ua fa’afāriu ’ē atu ’oe i tā ’oe mau ha’avāra’a nā roto i tā ’oe ra Tamaiti.

14 I teienei, inaha, e tō’u mau taea’e, e ui atu vau ē ’ua tai’o ānei ’outou i te mau pāpa’ira’a mo’a ? Mai te mea ē ’ua nā reira ’outou, nō te aha ïa ’aita ’outou i ti’aturi i te Tamaiti a te Atua ?

15 ’Aore ho’i i pāpa’ihia ē, ’o Zenosa ana’e tei parau mai i teie mau mea ; ’āre’a rā ’ua parau ato’a mai ’o Zenoke i teie mau mea—

16 Inaha ho’i, tē nā ’ō ra ’oia : ’Ua riri ’oe, e te Fatu, i teie nei feiā, nō te mea ’aita rātou i hina’aro ’ia ’ite i tō ’oe ra aroha, ’o tā ’oe i tu’u mai i ni’a ia rātou nā roto i tā ’oe ra Tamaiti.

17 ’E i teienei, e tō’u mau taea’e, ’ua ’ite ’outou ē, tē fa’a’ite pāpū mai nei te piti o te peropheta tahito nō ni’a i te Tamaiti a te Atua, ’e nō te mea ’aita te mau ta’ata i māramarama i tāna ra mau parau, ’ua pehi ihora rātou iāna i te ’ōfa’i ’e ’ua pohe roa.

18 Inaha rā, e ’ere te reira ana’e ; e ’ere ’o rāua ana’e tei parau mai nō ni’a i te Tamaiti a te Atua.

19 Inaha, ’ua parau ato’a Mose nō ni’a iāna, ’oia ïa, ’E inaha, ’ua fa’ateiteihia te hō’ē taipe i roto i te mēdēbara, ’e ’o ’oia ’o tē hi’o atu i ni’a i te reira e ora ïa. ’E e rave rahi ho’i tei hi’o atu ’e ’ua ora.

20 ’Āre’a rā e mea iti roa te ta’ata i ’ite i te aura’a nō taua mau mea ra, nō te ’eta’eta ïa o tō rātou ’ā’au. ’E e rave rahi ho’i tei ’ore i hi’o atu nō te ’eta’eta o tō rātou ’ā’au, nō reira ’ua pohe rātou. I teienei, te tumu ’aita rātou i hi’o atu, nō te mea ïa ’aita rātou i ti’aturi ē e fa’aora te reira ia rātou.

21 E tō’u mau taea’e ē, ’āhiri e fa’aorahia ’outou nā roto i te hi’o-noa-ra’a ’ia fa’aorahia ’outou, e’ita ānei ïa ’outou e hi’o ’oi’oi atu, ’e ’aore rā e fa’a’eta’eta ānei ’outou i tō ’outou ’ā’au i roto i te ti’aturi ’ore ’e te fa’atau, ’e e’ita atu ra ’outou e nānā atu i tō ’outou mata, ’ia pohe atu ’outou na ?

22 ’Ia nā reira ’outou, e tae mai te ’ati i ni’a ia ’outou ; ’ia ’ore rā ’outou ’ia nā reira, ’e ’ia nānā atu ’outou i tō ’outou mata, ’e ’ia ha’amata i te ti’aturi i te Tamaiti a te Atua ē, e haere mai ’oia nō te fa’aora i tōna ra mau ta’ata, ’e e ha’amāuiuihia ’oia ’e e pohe ho’i nō te ha’amatara i tā rātou mau hara ; ’e e ti’a fa’ahou mai ’oia mai te pohe mai, ’ia tupu te ti’afa’ahoura’a, ’e e ti’a atu te mau ta’ata ato’a i mua iāna, ’ia ha’avāhia i te mahana hope’a ’e te mahana ha’avāra’a, mai te au i tā rātou mau ’ohipa.

23 ’E i teienei, e tō’u mau taea’e, tē hina’aro nei au ’ia tanu ’outou i teie nei parau i roto i tō ’outou ’ā’au, ’e ’ia ha’amata a’era te reira i te ’oru, ’a ’atu’atu i te reira nā roto i tō ’outou fa’aro’o. ’E inaha, e riro te reira ’ei tumu rā’au, i te tupura’a i roto ia ’outou ē tae noa atu i te ora mure ’ore. ’E ’ia ha’amāmā mai te Atua i tā ’outou mau hōpoi’a, nā roto i te ’oa’oa i tāna ra Tamaiti. ’E e ti’a ia ’outou ’ia rave i teie mau mea ato’a mai te mea e hina’aro ’outou. ’Āmene.