1 Inaha, i teienei, i muri a’era, ’ua ’oa’oa roa te mau ta’ata o Nephi i te mea ē ’ua fa’aora te Fatu ia rātou i te rima o tō rātou mau ’enemi ; nō reira ’ua ha’amāuruuru rātou i te Fatu tō rātou Atua ; ’oia ïa, ’ua ha’apae rahi rātou i te mā’a, ’e ’ua pure rahi rātou, ’e ’ua ha’amori ho’i rātou i te Atua ma te ’oa’oa rahi roa.

2 ’E i muri a’era, i te ’ahuru ’e ma iva o te matahiti nō te fa’aterera’a a te mau ha’avā i ni’a i te mau ta’ata o Nephi, ’ua haere mai ra Alama i tāna tamaiti ra ia Helamana ’e ’ua nā ’ō atu ra iāna : Tē ti’aturi ra ānei ’oe i te mau parau tā’u i parau atu ia ’oe nō ni’a i taua mau pāpa’a parau ra i pāpa’ihia ?

3 ’E ’ua parau mai ra Helamana iāna : ’Ē, ’ua ti’aturi au.

4 ’E ’ua parau fa’ahou atu ra Alama : ’Ua ti’aturi ānei ’oe ia Iesu Mesia, ’o tē tae mai ?

5 ’E ’ua nā ’ō mai ra ’oia : ’Ē, ’ua ti’aturi au i te mau parau ato’a ’o tā ’oe i parau mai.

6 ’E ’ua parau fa’ahou atu ra Alama iāna : E ha’apa’o ānei ’oe i tā’u mau fa’auera’a ?

7 ’E ’ua parau mai ra ’oia : ’Ē, e ha’apa’o vau i tā ’oe mau fa’auera’a ma tō’u ’ā’au ato’a.

8 ’E ’ua parau atu ra Alama iāna : E ao tō ’oe ; ’e nā te Fatu e ha’amanuia mai ia ’oe i ni’a i teie nei fenua.

9 Inaha rā, e tohu ri’i tā’u ia ’oe na ; e tā’u e tohu ia ’oe na, ’eiaha roa ’oe e fa’a’ite haere noa atu ; ’oia ïa, ’o tā’u e tohu atu ia ’oe na ’eiaha roa ïa ’ia fa’a’ite-haere-hia, ē tae noa atu ’ua tupu taua tohura’a ra ; nō reira, ’a pāpa’i i te mau parau ’o tā’u e parau.

10 ’E ’o teie ïa taua mau parau ra : Inaha, tē ’ite nei au nā roto i te vārua nō te heheura’a i roto iā’u nei ē, e hope a’era te maha hānere o te matahiti i muri a’e i te tau e fa’a’ite mai ai Iesu Mesia iāna iho ia rātou ra, e paruparu ïa te fa’aro’o o teie nei feiā, ’oia ho’i, te mau ’āti Nephi.

11 ’Oia ïa, ’e i reira rātou e ’ite ai i te mau tama’i ’e te mau ma’i, ’oia ïa, i te o’e e te ha’amani’ira’a toto, ē tae roa atu ’ua ha’amou-roa-hia te mau ta’ata o Nephi—

12 ’Oia ïa, nō te mea e paruparu tō rātou fa’aro’o ’e e topa ho’i i roto i te mau ’ohipa pōiri, ’e te tai’ata, ’e te mau huru ’ohipa ’ino ato’a ; ’oia ïa, tē parau atu nei au ia ’oe, nō te mea e hara rātou i te māramarama rahi ’e i te ’ite rahi ; ’oia ïa, tē parau atu nei au ia ’oe, mai taua mahana ra, e ’ore ho’i e hope te maha o te u’i i te ma’iri atu, e tae mai ai taua mau ’ohipa ’ī’ino rahi ra.

13 ’E ’ia tae mai taua mahana rahi ra, inaha, ’ua fātata roa ho’i te tau e tae mai ai, ’aita roa ïa taua mau ta’ata ra ’e ’aore rā te hua’ai o taua mau ta’ata ra ’o tei tai’ohia i teie nei i rotopū i te mau ta’ata o Nephi, e tai’o-fa’ahou-hia i rotopū i te mau ta’ata o Nephi.

14 ’Āre’a te toe’a ’o tē ’ore e pau i taua mahana rahi ri’ari’a ra, e tai’ohia ïa rātou i rotopū i te mau ’āti Lamana, ’e e riro ho’i mai ia rātou te huru, maori rā te tahi pae iti ’o tē parauhia e mau pipi nā te Fatu ; ’e ’ua tāpapa atu te mau ’āti Lamana ia rātou ē tae roa ’ua pau roa rātou. ’E i teienei, nō te mau ’ohipa ’ī’ino, e tupu iho ā teie nei tohura’a.

15 ’E i teienei, i muri a’era, ’ia oti a’era tā Alama paraura’a atu i teie mau mea ia Helamana, ’ua ha’amaita’i atu ra ’oia iāna, ’e i te tahi atu o tāna mau tamari’i tamāroa ; ’e ’ua ha’amaita’i ato’a ’oia i te fenua nō te maita’i o te feiā parauti’a.

16 ’E ’ua parau atu ra ’oia : Tē nā ’ō mai ra ho’i te Fatu te Atua—E ’anatemahia te fenua nei, ’oia ïa, teie nei fenua, i te mau nūna’a ato’a, i te mau ’ōpū ato’a, i te mau reo ato’a, ’e i te mau ta’ata ato’a, ’o tē rave i te parauti’a ’ore, ’e ’o tei ’ī roa i te reira, ’e e ha’amouhia ïa rātou ; ’e mai tā’u i parau a’enei, e nā-reira-hia ïa ; e ’anatemara’a ho’i teie ’e te ha’amaita’ira’a ho’i nā te Atua i ni’a i te fenua nei, ’e ’aita roa e ti’a i te Fatu ’ia hi’o noa atu i te hara ma te fa’ati’a i te hō’ē vāhi iti a’e nō te reira.

17 ’E i teienei, ’ia oti a’era tā Alama paraura’a i teie mau parau, ’ua ha’amaita’i atu ra ’oia i te ’ēkālesia, ’oia ïa, ’ia rātou ato’a ’o tei tāmau māite i te fa’aro’o, mai taua atu taime ra.

18 E fa’aoti a’era Alama i te reira, ’ua reva atu ra ’oia i rāpae i te fenua ra nō Zarahemela, mai te mea ra ē, tē haere atu ra ’oia i te fenua ra nō Meleke. ’E i muri a’era, ’aita e parau i fa’aro’o-fa’ahou-hia nō ni’a iāna ; ’aita ato’a mātou i ’ite i tōna pohera’a ’e tōna hunara’a.

19 Inaha, teie tā mātou i ’ite, e ta’ata parauti’a ’oia ; ’e ’ua parare atu ra te parau i roto i te ’ēkālesia ē ’ua ’āfa’i-’ē-hia atu ’oia e te Vārua, ’e ’aore rā ’ua hunahia e te rima o te Fatu mai ia Mose ra. Inaha rā, tē nā ’ō mai ra te mau pāpa’ira’a mo’a ē, ’ua rave ’ē atu te Fatu ia Mose iāna ihora ; ’e tē mana’o nei mātou ē, ’ua rave-ato’a-hia Alama e te vārua iāna ihora ; nō reira, ’aita roa mātou i ’ite nō ni’a i tōna pohera’a ’e tōna hunara’a.

20 ’E i teienei, i muri a’era, i te ha’amatara’a nō te ’ahuru ’e ma iva o te matahiti nō te fa’aterera’a a te mau ha’avā i ni’a i te mau ta’ata o Nephi, ’ua haere atu ra Helamana i rotopū i te mau ta’ata ’e ’ua poro haere atu ra i te parau ia rātou.

21 Inaha ho’i, nō tā rātou mau ’arora’a i te mau ’āti Lamana ’e tā rātou mau mārōra’a ’e te mau ’ōrurehau ho’i i tupu i rotopū i te mau ta’ata, ’ua ti’a roa ’ia a’ohia atu te parau a te Atua i rotopū ia rātou, ’oia ïa, ’e ’ia fa’atupuhia te fa’a’āfarora’a i roto i te ’ēkālesia tā’āto’a.

22 Nō reira, ’ua haere atu ra Helamana e tōna mau taea’e e fa’ati’a fa’ahou i te ’ēkālesia i roto i te mau fenua ato’a, ’oia ïa, i roto i te mau ’oire ato’a ē ’ati noa a’e te fenua i pārahihia ’e te mau ’āti Nephi. ’E i muri a’era, ’ua mā’iti rātou i te mau tahu’a ’e te mau ’orometua ē ’ati noa a’e te fenua i roto i te mau ’āma’a ato’a o te ’ēkālesia.

23 ’E i teienei, i muri a’era, ’ia fa’aoti a’era Helamana ’e tōna ra mau taea’e i te mā’iti i te mau tahu’a ’e te mau ’orometua i roto i te mau ’āma’a o te ’ēkālesia, ’ua tupu te ’āmahamahara’a i rotopū ia rātou, ’e ’aita rātou i ha’apa’o i te mau parau a Helamana ’e tā tōna ra mau taea’e.

24 ’Āre’a rā ’ua tupu rahi tō rātou te’ote’o, ’e ’ua fa’ateitei ihora rātou i tō rātou ’ā’au nō tā rātou mau tao’a rahi roa ; nō reira ’ua riro rātou ’ei feiā tao’a rahi i tō rātou iho hi’ora’a, ’e ’aita ho’i rātou i ha’apa’o i tā rātou mau parau, ’e i haere ma te parauti’a i mua i te Atua.