1 ’E i muri a’era, i te ’ahuru ma hō’ē o te matahiti, i te pae o te mahana ’e te piti o te ’āva’e, nō te fa’aterera’a a te mau ha’avā i ni’a i te mau ta’ata o Nephi, ’ua vai noa te hau rahi i ni’a i te fenua nō Zarahemela, ’aita te mau ’arora’a ’e te mau mārōra’a i tupu nō te tahi mau matahiti te maoro, ’e ’ia tae a’era i te pae o te mahana nō te piti o te ’āva’e i te ’ahuru ma hō’ē o te matahiti, ’ua fa’aro’ohia ihora te parau nō te ’arora’a ē ’ati noa a’e te fenua.

2 Inaha ho’i, ’ua tae mai te mau nu’u fa’ehau ’āti Lamana nā te pae i te mēdēbara, i te mau ’ōti’a o te fenua, ē tae roa mai i te ’oire ra nō Amoniha, ’e ’ua ha’amata ihora i te taparahi i te mau ta’ata ’e i te ha’amou ho’i i te ’oire.

3 ’E i teienei, i muri a’era, nā mua i ti’a ai i te mau ’āti Nephi ’ia ha’aputuputu i te hō’ē nu’u fa’ehau nava’i maita’i nō te ti’avaru atu ia rātou i rāpae i te fenua, ’ua ha’amou rātou i te mau ta’ata e pārahi ra i te ’oire nō Amoniha, ’e te tahi pae ato’a ho’i i te ’ōti’a nō te fenua ra nō Noa, ’e ’ua hōpoi tītī atu ho’i i te tahi pae i roto i te mēdēbara.

4 I teienei, i muri a’era, ’ua hina’aro te mau ’āti Nephi ’ia roa’a fa’ahou mai te mau ta’ata i hōpoi-tītī-hia i roto i te mēdēbara.

5 Nō reira, tei rotopū ia rātou te hō’ē ta’ata i fa’ata’ahia ’ei ra’atira rahi i ni’a i te mau nu’u fa’ehau o te mau ’āti Nephi, (’e ’o Zorama tōna i’oa, ’e tē vai ra tāna e piti tamaiti, ’o Lehi ’e ’o Aha)—i teie nei ’ua ’ite Zorama ’e tāna nā tamaiti to’opiti e tahu’a rahi ’o Alama i ni’a a’e i te ’ēkālesia, ’e i tō rātou fa’aro’ora’a ē, tei iāna te vārua nō te tohu, nō reira ’ua haere mai ra rātou iāna, ’e ’ua hina’aro rātou ’ia ’ite ē, ’ua ti’a ānei i te Fatu ’ia haere atu rātou i roto i te mēdēbara nō te ’imi i tō rātou mau taea’e, ’o tei hōpoi-tītī-hia ’e te mau ’āti Lamana.

6 ’E i muri a’era, ’ua ani atu ra Alama i te Fatu nō ni’a i taua mea ra. ’E ’ua ho’i mai ra Alama ’e ’ua nā ’ō atu ra ia rātou : Inaha, e haere te mau ’āti Lamana i terā pae mai o te ’ānāvai ra Sidona, i te pae apato’a i te mēdēbara, i’ō roa atu i te mau ’ōti’a o te fenua ra nō Maniti. ’E inaha, i reira ’outou e ’aro atu ai ia rātou, i te pae i te hiti’a o te rā i te ’ānāvai ra Sidona, ’e i reira ho’i te Fatu e tu’u mai ai ia ’outou i tō ’outou mau taea’e i hōpoi-tītī-hia e te mau ’āti Lamana.

7 ’E i muri a’era, ’ua haere atu ra Zorama ’e tāna nā tamaiti ’e tō rātou mau nu’u fa’ehau ato’a i terā pae mai o te ’ānāvai ra Sidona, ’e ’ua haere ti’a atu ra i’ō roa atu i te mau ’ōti’a o te fenua ra nō Maniti ē tae roa atu i te mēdēbara i te pae apato’a, ’oia i te pae hiti’a o te rā i te ’ānāvai ra Sidona.

8 ’E ’ua ’aro atu ra rātou i te mau nu’u fa’ehau o te mau ’āti Lamana, ’e ’ua ha’apurarahia ’e ’ua ti’avaruhia ho’i te mau ’āti Lamana i roto i te mēdēbara ; ’e ’ua rave mai ra rātou i tō rātou mau taea’e i hōpoi-tītī-hia e te mau ’āti Lamana, ’e ’aita roa te hō’ē ’o rātou ’o tei hōpoi-tītī-hia i mo’e. ’E ’ua arata’ihia mai ra rātou e tō rātou mau taea’e i tō rātou ihora mau fenua.

9 ’E ’o te hope’a te reira nō te ’ahuru ma hō’ē o te matahiti nō te fa’aterera’a a te mau ha’avā, ’ua ti’avaruhia te mau ’āti Lamana i rāpae i te fenua, ’e ’ua ha’amouhia te mau ta’ata o Amoniha ; ’oia ïa, ’ua ha’amouhia te mau ta’ata ora ato’a nō te mau ’āti Amoniha, ’e tō rātou ato’a ’oire rahi ’o tā rātou i parau ē, e’ita roa e ti’a i te Atua ’ia ha’amou, nō te rahi o te reira.

10 Inaha rā, i roto i te hō’ē noa iho mahana ’ua vai ano noa te reira, ’e ’ua ’amuhia te mau tino pohe ’e te mau ’ūrī ’e te mau ’ānimara taehae nō te mēdēbara.

11 ’Āre’a rā, ’ia hope a’era te mau mahana e rave rahi, ’ua ha’apu’ehia tō rātou mau tino pohe i ni’a i te fenua nei, ’e ’ua tāpo’ihia te reira i te tāpo’i rairai. ’E i teienei, nō te rahi o te hau’a ’ino i reira, ’aita atu ra te mau ta’ata i ho’i atu e pārahi i te fenua ra nō Amoniha e rave rahi matahiti. ’E ’ua parauhia taua vāhi ra te Pau o tō Nehora ; nō te mea e pipi rātou tei taparahihia e Nehora ; ’e ’ua vai ano noa tō rātou fenua.

12 E ’aita te mau ’āti Lamana i haere fa’ahou mai nō te ’aro i te mau ’āti Nephi, ē tae noa atu i te ’ahuru ma maha o te matahiti nō te fa’aterera’a a te mau ha’avā i ni’a i te mau ta’ata o Nephi. ’E nō reira e toru matahiti ’ua vai tāmau noa te hau i rotopū i te mau ta’ata o Nephi i ni’a i te fenua.

13 ’E ’ua haere atu ra Alama rāua ’o Amuleka i te poro-haere-ra’a i te tātarahapa i te mau ta’ata i roto i tō rātou mau hiero, ’e tō rātou mau fare mo’a, ’e i roto ato’a i tō rātou mau sunago, tei hāmanihia mai te au i tā te mau ’āti Iuda.

14 ’E te mau ta’ata ato’a ’o tei hina’aro ’ia fa’aro’o mai i tā rātou mau parau, ’o tā rātou ïa i ha’api’i atu i te parau a te Atua ma te fa’aea ’ore, ’e ma te ha’apa’o ’ore i te huru o te ta’ata.

15 ’E nō reira, ’ua haere atu ra Alama rāua ’o Amuleka, ’e e rave rahi atu ā ’o tei mā’itihia nō taua ’ohipa ra, nō te poro haere i te parau ē ’ati noa a’e te fenua. ’E ’ua fa’ati’ahia te ’ēkālesia i ni’a i te fenua tā’āto’a, ’e i roto i te retioni pā’āto’a ē ’ati noa a’e, ’e i rotopū ho’i i te mau ta’ata ato’a o te mau ’āti Nephi.

16 ’E ’aita te hō’ē mea ’aifāito ’ore i rotopū ia rātou ; ’ua nīni’i mai te Fatu i tōna Vārua i ni’a i te fenua tā’āto’a nō te fa’aineine i te mana’o o te mau tamari’i a te ta’ata, ’oia ho’i, nō te fa’aineine i tō rātou ’ā’au ’ia fāri’i i te parau e ha’api’ihia ia rātou i te taime nō tōna taera’a mai—

17 ’Ia ’ore rātou ’ia fa’a’eta’eta atu i te parau, ’e ’ia ’ore ho’i rātou ’ia riro ’ei feiā ti’aturi ’ore, ’e ’a ha’amouhia ai, ’ia fāri’i rā rātou i te parau ma te ’oa’oa, ’e mai te ’āma’a ra, ’ia poihia rātou i roto i te vine mau ra, ’ia ti’a ia rātou ’ia tomo atu i roto i te fa’aeara’a o te Fatu tō rātou Atua.

18 I teienei, taua mau tahu’a ra ’o tei hāhaere atu i rotopū i te mau ta’ata, ’ua a’o atu ra ïa rātou, ’eiaha e ha’avare, ’eiaha e fa’ahema, ’eiaha e fe’i’i, ’eiaha e mārō, ’eiaha e ’ino’ino, ’eiaha e fa’a’ino, ’e ’eiaha e ’eiā, ’eiaha e rave fa’atāpuni, ’eiaha e ’eiā haru, ’eiaha e taparahi i te ta’ata, ’eiaha e fa’aturi, ’e ’eiaha ho’i e rave i te mea faufau ; ma te ti’aoro ē, e mea au ’ore teie mau mea—

19 ’E tē fa’a’ite atu ra i te mau mea i fātata i te tupu mai ; ’oia ïa, tē fa’a’ite atu ra i te taera’a mai o te Tamaiti a te Atua, ’e tōna mau mamae ’e tōna pohera’a, ’e te ti’afa’ahoura’a o te feiā pohe ra.

20 ’E e rave rahi ta’ata i ui mai i te vāhi e tae mai ai te Tamaiti a te Atua ; ’e ’ua ha’api’ihia ho’i rātou ē e fā mai ’oia ia rātou i muri a’e i tōna ti’afa’ahoura’a ; ’e ’ua fa’aro’o mai te mau ta’ata i te reira ma te pōpou rahi ’e te ’oa’oa.

21 ’E i teienei, i muri iho i te fa’ati’ara’ahia o te ’ēkālesia i ni’a i te fenua ē ’ati noa a’e—’e te roa’ara’a te rē i ni’a a’e i te diabolo, ’e te a’ora’ahia te parau a te Atua i tōna huru mau i tō te mau fenua ato’a, ’e tō te Fatu nīni’ira’a mai i tāna mau ha’amaita’ira’a i ni’a iho i te mau ta’ata—’e teie te hope’a nō te ’ahuru ma maha o te matahiti nō te fa’aterera’a a te mau ha’avā i ni’a i te mau ta’ata o Nephi.