1 I teienei, e tā’u tamaiti, teie fa’ahou te tahi mau parau iti tā’u e parau atu ia ’oe ; ’ua ’ite ho’i au ē, ’ua tapitapi tō ’oe ferurira’a nō ni’a i te ti’afa’ahoura’a o te feiā pohe ra.

2 Inaha, tē parau atu nei au ia ’oe, ’aita e ti’afa’ahoura’a—’oia ho’i, tē parau atu nei au, e’ita roa teie tino tāhuti e riro ’ei tino tāhuti ’ore, ’e e’ita roa teie tino pohe noa e riro ’ei tino pohe ’ore—ē tae roa atu i te taera’a mai o te Mesia.

3 Inaha, e fa’atupu ’oia i te ti’afa’ahoura’a o te feiā pohe ra. Inaha rā, e tā’u tamaiti, ’aita ā te ti’afa’ahoura’a i tupu. I teienei, e tātara atu vau i te hō’ē parau ’aro i mua ia ’oe ; tē vai noa ra rā te mau parau ’aro e rave rahi ’o tei tāpe’ahia, ’e ’aita roa te hō’ē ta’ata i ’ite i te reira, maori rā ’o te Atua iho. E fa’a’ite atu rā vau ia ’oe i te hō’ē mea tā’u i ani māite i te Atua ’ia ’ite au—’e nō ni’a te reira i te ti’afa’ahoura’a.

4 Inaha, ’ua fa’ata’ahia te taime e ti’afa’ahou mai ai te ta’ata ato’a mai te pohe mai. I teienei, i te taera’a mai o taua taime ra, ’aita roa ïa te ta’ata i ’ite ; ’ua ’ite rā te Atua i te taime i fa’ata’ahia.

5 I teienei, hō’ē taime ānei, e piti taime ānei, ’e ’aore rā e toru taime ānei e ti’afa’ahou mai ai te ta’ata mai te pohe mai, ’aita e pe’ape’a i te reira ; ’ua ’itea ho’i i te Atua teie mau mea ato’a ; ’ua nava’i noa iā’u ’ia ’ite ē, e tupu iho ā te reira—’oia ho’i, ’ua fa’ata’ahia te taime e ti’afa’ahou mai ai te mau ta’ata ato’a mai te pohe mai.

6 I teienei, e mea ti’a ’ia vai te hō’ē tau i rōpū i te pohera’a ’e te ti’afa’ahoura’a.

7 ’E i teienei, e ui atu vau, tei hea te vaira’a o te mau vārua o te mau ta’ata mai taua taime pohera’a nei ē tae noa atu i te taime i fa’ata’ahia nō te ti’afa’ahoura’a ?

8 I teienei, hō’ē noa iho ānei taime i fa’ata’ahia nō te ti’afa’ahoura’a o te ta’ata, ’aita e pe’ape’a nō te reira vāhi ; ’aita ho’i te mau ta’ata ato’a i pohe i te taime hō’ē ra ; ’e ’aita ato’a e pe’ape’a nō te reira vāhi ; i roto i te tā’āto’ara’a nō te reira hō’ē noa iho ïa mahana i te Atua, ’e ’ua fāitohia te taime i te ta’ata ana’e ra.

9 Nō reira, ’ua fa’ata’ahia te hō’ē taime nō te ta’ata ’ia ti’afa’ahou mai rātou mai te pohe mai ; ’e tē vai ra te hō’ē tau i rōpū i te taime nō te pohera’a ’e te ti’afa’ahoura’a. ’E i teienei, nō ni’a i taua tau ra, tei hea roa ïa te vaira’a o te mau vārua o te mau ta’ata i reira, ’o te mea ïa ’o tā’u i ui māite atu i te Fatu ’ia ’ite ; ’e ’ua ’ite ho’i au i te parau nō taua mea ra.

10 ’E ’ia tae i te tau e ti’afa’ahou mai ai te mau ta’ata ato’a, ’ei reira rātou e ’ite ai ē, ’ua ’ite te Atua i te mau tau ato’a i fa’ata’ahia nō te ta’ata.

11 I teienei, nō ni’a i te vaira’a o te vārua ta’ata i rōpū i te pohera’a ’e te ti’afa’ahoura’a—Inaha, ’ua fa’a’itehia mai ïa iā’u e te hō’ē melahi, ’o tei nā ’ō mai iā’u ē, ’ia reva atu te mau vārua o te mau ta’ata i teie tino tāhuti nei ; ’oia ïa, te mau vārua o te mau ta’ata ato’a ra, te mea maita’i ’e te mea ’ino ato’a ho’i, e ’āfa’ihia ïa rātou i mua i taua Atua ra ’o tei hōro’a mai i te ora nō rātou.

12 ’E i reira, a muri a’era, e fāri’ihia te mau vārua o te feiā parauti’a i roto i te hō’ē vāhi ’oa’oa, ’o tei parauhia e pāradaiso, te hō’ē vāhi fa’afa’aeara’a, te hō’ē vāhi hau, ’e i reira rātou e fa’afa’aea ai i tō rātou pe’ape’a ’e te mau ’ati ato’a, ’e te ’oto ho’i.

13 ’E i reira, a muri a’era, te mau vārua o te feiā parauti’a ’ore, ’oia ïa, ’o tei riro ’ei mea vi’ivi’i—inaha ho’i, ’aita tā rātou e tufa’a ’e e vāhi i te Vārua o te Fatu ; inaha ho’i, ’ua mā’iti rātou i te mau ’ohipa vi’ivi’i ’aita i te maita’i ; nō reira ’ua tomo te vārua o te diabolo i roto ia rātou, ’e ’ua rave i tō rātou ti’ahapa—’e e hurihia ïa rātou i rāpae i roto i te pōiri ta’ota’o ; tei reira te ’oto, ’e te ’auē, ’e te ’au’aura’a niho ; ’e ’ua tupu te reira nō tā rātou iho mau ’ohipa ’ī’ino, ’e ’ua arata’i-tītī-hia ho’i rātou e te hina’aro o te diabolo.

14 I teienei, ’o te vaira’a teie o te mau vārua o te feiā parauti’a ’ore ; ’oia ïa, i roto i te pōiri, ’e te hō’ē vaira’a ri’ari’a, ’e te mata’u, ’e te ferurira’a i te riri ’ū’ana o te Atua ’o tē tae i ni’a ia rātou ; ’e ’ua nā reira noa rātou i te vaira’a, ’e tei reira ato’a te vaira’a o te feiā parauti’a i roto i te pāradaiso, ē tae roa atu i te taime nō tō rātou ti’afa’ahoura’a.

15 I teienei, ’ua mana’o te tahi pae ē, teie vaira’a nō te ’oa’oa ’e teie vaira’a nō te mamae o te vārua hou te ti’afa’ahoura’a, ’o tē ti’afa’ahoura’a mātāmua ïa. ’Oia ïa, ’ua ti’a iā’u ’ia parauhia te reira e ti’afa’ahoura’a ; ’oia te fa’ati’ara’a i te vārua ’e te tu’ura’a i te reira i te vaira’a nō te ’oa’oa ’e ’aore rā i te vaira’a nō te mamae, mai te au i te mau parau i parauhia ra.

16 ’E inaha, ’ua fa’a’itehia mai ē, tē vai ra te ti’afa’ahoura’a mātāmua, te ti’afa’ahoura’a ho’i ïa o rātou ato’a ’o tei vai na, ’e tē vai nei, ’e tē vai a muri atu, ē tae noa atu i tō te Mesia ti’afa’ahoura’a mai te pohe mai ra.

17 I teienei, ’aita tātou e mana’o nei ē, teie ti’afa’ahoura’a mātāmua i parauhia a’enei, ’o te fa’ati’a-fa’ahou-ra’a ïa o te mau vārua ’e tō rātou tu’ura’ahia i te vaira’a nō te ’oa’oa ’e ’aore rā i te vaira’a nō te mamae. ’Eiaha roa ’oe ’ia mana’o ē, ’o te reira ïa te aura’a.

18 Inaha, tē parau atu nei au ia ’oe na ē, ’Aita roa ; ’o teie rā te aura’a, ’oia ho’i te ’āmui-fa’ahou-ra’a o te vārua i te tino, o te mau ta’ata mai te mahana mai o Adamu ē tae noa atu i te ti’afa’ahoura’a o te Mesia.

19 I teienei, e ’āmui-fa’ahou-hia ānei te mau vārua ’e te mau tino o te feiā i parauhia a’enei i te hō’ē ā taime, tō te feiā parauti’a ’ore ’e tō te feiā parauti’a, ’aita tā’u e parau i te reira ; ’ātīrā na, tē parau atu nei au ē, e hope roa rātou i te ti’afa’ahou mai ; ’oia ho’i, e nā mua tō rātou ti’afa’ahoura’a i te ti’afa’ahoura’a o te feiā i pohe i muri mai i te ti’afa’ahoura’a o te Mesia.

20 I teienei, e tā’u tamaiti, ’aita vau i parau ē, e ti’afa’ahou mai rātou ’ia tae i te ti’afa’ahoura’a o te Mesia ra ; inaha rā, ’ua mana’o vau ē, e ’āmui-fa’ahou-hia te mau vārua ’e te mau tino o te mau ta’ata parauti’a i te ti’afa’ahoura’a o te Mesia ’e tōna revara’a atu i ni’a i te ra’i.

21 ’Aita rā vau e parau ē, e tupu te reira i tōna ti’afa’ahoura’a ’e ’aore rā i muri a’e ; tē parau atu nei rā vau ē, tē vai nei te hō’ē tau i rōpū i te pohera’a ’e te ti’afa’ahoura’a o te tino, ’e te hō’ē vaira’a ato’a o te vārua i roto i te ’oa’oa ’e ’aore rā i te mamae ē tae roa atu i te tau i fa’ata’ahia e te Atua e ti’afa’ahou mai ai te feiā pohe ra, ’e e tāhō’ēhia ai te vārua ’e te tino, ’e e ’āfa’ihia atu ai i mua i te Atua, ’e ’ia ha’avāhia mai te au i tā rātou ra mau ’ohipa.

22 ’Oia ïa, nā teie e fa’atupu i te fa’aho’ira’a o te mau mea ato’a i parauhia e te vaha o te mau peropheta ra.

23 ’E e fa’aho’ihia te vārua i te tino, ’e te tino i te vārua ; ’oia ïa, e fa’aho’ihia te ’āvae ’e te rima ’e te mau ponaivi ato’a i tōna tino ; ’oia ïa, e ’ore ho’i te hō’ē ’i’o rouru o te upo’o e mo’e, e fa’aho’ihia rā te mau mea ato’a ra i tō rātou iho vāhi tano mau.

24 ’E i teienei, e tā’u tamaiti, ’o te fa’aho’ira’a teie i parauhia e te vaha o te mau peropheta—

25 ’E i reira te feiā parauti’a e ’ana’ana atu ai i roto i te bāsileia o te Atua.

26 Inaha rā, e tae mai te hō’ē pohe ri’ari’a i ni’a iho i te feiā parauti’a ’ore ; e pohe ho’i rātou i tā te parauti’a ; nō te mea e mea vi’ivi’i rātou, ’e ’aita roa ho’i e ti’a i te hō’ē mea vi’ivi’i ’ia ō i te bāsileia o te Atua ra ; e ti’avaruhia rā rātou i rāpae, ’e e vaiihohia ’ia ’amu i te mau hotu nō tā rātou ra mau ’ohipa, ’oia ho’i i te mea ’ino ; ’e e inu rātou i te mau ota nō te ’āu’a ’ava’ava ra.