1 Inaha, i teie nei, i muri a’era, i muri noa iho i tō Moroni hāponora’a atu i tāna ’episetole i te tāvana rahi, ’ua fāri’i ’oia i te hō’ē ’episetole nō ’ō mai ia Pahorana, te tāvana rahi. ’E teie te mau parau tāna i fāri’i :

2 ’O vau, ’o Pahorana, te tāvana rahi nō teie nei hau fenua, ’e te hāpono atu nei au i teie nei mau parau ia Moroni, te ra’atira rahi i ni’a a’e i te nu’u fa’ehau. Inaha, tē parau atu nei au ia ’oe, e Moroni, ’aita vau i ’oa’oa i tō ’outou mau ’ati rahi ; ’oia ïa, ’ua ’oto roa tō’u ’ā’au i te reira.

3 Inaha rā, tē vai ra te feiā ’o tei ’oa’oa i tō ’outou mau ’ati ; ’oia ïa, ’e nō reira ho’i ’ua ti’a mai rātou i ni’a nō te ’ōrure mai iā’u nei, ’e i te feiā-ti’amā ho’i o tō’u ra mau ta’ata, ’oia ïa, e mea rahi roa ho’i rātou ’o tei ’ōrure mai.

4 ’E ’o te feiā teie tei tītau ’ia rave ’ē atu i te pārahira’a ha’avāra’a iā’u ’e ’o tei fa’atupu i teie mau ’ohipa ’ī’ino rahi ; ’e ’ua fa’a’ohipa rātou i te parau tāvaimanino rahi, ’e ’ua arata’i ’ē atu rātou i te ’ā’au o te mau ta’ata e rave rahi, ’e nā te reira i fa’atupu i te ’ati rahi i rotopū ia tātou ; ’ua tāpe’a ho’i rātou i tā mātou mā’a, ’e ’ua ha’amata’u ho’i i tō mātou feiā-ti’amā, ’e nō reira ’aita rātou i tae atu ia ’outou na.

5 ’E inaha, ’ua tīahi rātou iā’u mai mua atu ia rātou, ’e ’ua horo atu vau i te fenua ra nō Gideona, ’e te mau ta’ata ato’a ho’i tei hina’aro i te pe’e mai iā’u ra.

6 ’E inaha, ’ua hāpono atu vau i te hō’ē fa’auera’a ē ’ati noa a’e teie tufa’a o te fenua ; ’e inaha, tē ta’iruru mai ra rātou i pīha’i iho ia mātou i te mau mahana ato’a, i tā rātou mau mauha’a tama’i, nō te pāruru i tō rātou fenua ’e tō rātou ti’amāra’a, ’e nō te tāho’o atu i te hape i ravehia i ni’a ia mātou.

7 ’E ’ua tae mai ra rātou ia mātou nei, ’e nō reira ho’i, ’o rātou ’o tei ti’a mai nō te ’ōrure mai ia mātou nei, ’ua matapū’a’ahia rātou, ’oia ïa, ’e nō reira ho’i ’ua mata’u rātou ia mātou ’e ’aita ho’i rātou i haere mai nō te ’aro mai ia mātou.

8 ’E ’ua roa’a ia rātou te fenua, ’oia ho’i te ’oire ra nō Zarahemela ; ’ua fa’ata’a rātou i te hō’ē ari’i i ni’a ia rātou, ’e ’ua pāpa’i atu ’oia i te ari’i o te mau ’āti Lamana, ’e ’ua fa’aau atu ’oia i te parau iāna ; ’e i roto taua fa’aaura’a ra, ’ua fa’aoti ’oia e tāpe’a noa i te ’oire ra nō Zarahemela, ’e nā roto i te tāpe’a-noa-ra’a i te reira, ’ua mana’o ’oia ē, e ti’a i te mau ’āti Lamana ’ia ha’avī i te toe’a o te fenua, ’e i reira ’oia e fa’ata’ahia ai ’ei ari’i i ni’a i teie nei feiā, ’ia ha’avīhia rātou i raro a’e i te mau ’āti Lamana.

9 ’E i teienei, i roto i tā ’oe ’episetole ’ua fa’ahapa mai ’oe iā’u, ’ātīrā atu ïa ; ’aita vau i riri, tē ’oa’oa nei rā vau i te aroha rahi o tō ’oe na ’ā’au. ’Aita vau, ’o Pahorana, e tītau nei i te mana nō’u, maori rā ’ia tāpe’a noa i tō’u pārahira’a ha’avāra’a, ’ia ti’a iā’u ’ia pāruru noa i te mana ’e te ti’amāra’a o tō’u nei mau ta’ata. Tē tāmau māite nei ā tō’u ’ā’au i roto i taua ti’amāra’a ra i fa’ati’amāhia ai tātou e te Atua.

10 ’E i teienei, inaha, e pāto’i atu tātou i te mau ’ohipa ’ī’ino ē tae roa atu i te ha’amani’ira’a i te toto. E’ita tātou e ha’amani’i i te toto o te mau ’āti Lamana ’āhiri e pārahi noa rātou i tō rātou iho fenua.

11 E’ita tātou e ha’amani’i i te toto o tō tātou mau taea’e ’āhiri ’aita rātou e ti’a mai i ni’a nō te ’ōrure mai ia tātou ma te rave i te ’o’e.

12 E tu’u tātou ia tātou iho i raro a’e i te zugo nō te fa’atītīra’a ’āhiri ē ’ua au te reira i te parauti’a a te Atua, ’e ’āhiri ē ’ua fa’aue mai ’oia ia tātou ’ia nā reira.

13 Inaha rā, ’aita ’oia i fa’aue mai ia tātou ’ia tu’u ia tātou i raro a’e i tō tātou mau ’enemi, ’ia ti’aturi rā tātou iāna, ’e nāna tātou e fa’aora.

14 Nō reira, e tō’u taea’e here, e Moroni, pāto’i ana’e i te ’ino, ’e te mau mea ’ino ’o tē ’ore e ti’a ia tātou ’ia pāto’i i tā tātou mau parau, ’oia ïa, mai te ’ōrure hau ’e te tāivara’a, pāto’i ana’e ïa i te reira i tā tātou mau ’o’e, ’ia ti’a ia tātou ’ia tāpe’a noa i tō tātou ti’amāra’a, ’ia ti’a ia tātou ’ia ’oa’oa noa i te tufa’a maita’i ’o tā tātou ’ēkālesia, ’e i te ’ohipa a tō tātou Tāra’ehara ’e tō tātou Atua.

15 Nō reira, ’a haere vave mai iā’u nei ’e te tahi pae o tō ’outou mau ta’ata, ’e ’a vaiiho i te toe’a ’ia ha’apa’ohia e Lehi rāua ’o Teanekuma ; ’a hōro’a atu i te mana ia rāua nō te fa’atere i te ’arora’a i taua tufa’a nō te fenua, mai te au i te Vārua o te Atua, ’oia ato’a ho’i te vārua nō te ti’amāra’a i roto ia rātou.

16 Inaha, ’ua hāpono atu vau i te mā’a ia rātou, ’ia ’ore rātou ’ia pohe ē tae noa atu ’ua tae mai ’oe iā’u nei.

17 ’A ha’aputuputu ’āmui i te mau ta’ata e roa’a ia ’oe ’a haere mai ai ’oe iā’u nei, ’e e haere vave atu tātou ma te pūai o tō tātou Atua nō te ’aro atu i taua feiā ’ōrurehau ra, mai te au i te fa’aro’o i roto ia tātou nei.

18 ’E e haru tātou i te ’oire ra nō Zarahemela, ’ia roa’a mai ia tātou te mā’a nō te hāpono atu ia Lehi rāua ’o Teanekuma ; ’oia ïa, e haere atu tātou nō te ’aro ia rātou ma te pūai o te Fatu, ’e e fa’a’ore roa tātou i teie nei mau ’ohipa ’ī’ino rahi.

19 ’E i teienei, e Moroni, tē ’oa’oa nei au i te fāri’ira’a i tā ’oe ra ’episetole, i tapitapi ri’i ho’i au nō ni’a i te mau mea tā mātou e rave, e ’ohipa ti’a ānei ho’i ia mātou ’ia haere atu e ’aro i tō tātou mau taea’e.

20 ’Āre’a rā ’ua parau mai ’oe : ’Ia ’ore rātou e tātarahapa, ’ua fa’aue mai te Fatu ia ’oe ’ia haere atu e ’aro atu ia rātou.

21 Hi’o ē ’ua ha’apūai ’oe i te fa’aro’o o Lehi ’e Teanekuma i te Fatu ; ’a parau atu ia rāua ’eiaha e mata’u, nā te Atua rāua e fa’aora ; ’oia ïa, ’e ’o rātou ato’a tei tāmau māite i roto i taua ti’amāra’a ra i fa’ati’amāhia ai rātou e te Atua. ’E i teienei, tē fa’aoti nei au i tā’u ’episetole i tō’u taea’e here, ’o Moroni.