1 ’E i teienei, i muri a’era, i te ha’amatara’a nō te piti ’ahuru ’e ma iva o te matahiti nō te mau ha’avā, ’ua tono mai ra Amorona i te ve’a ia Moroni ma te ani atu iāna ’ia taui ’oia i te feiā mau-’āuri.

2 ’E i muri a’era, ’ua māuruuru roa ihora Moroni i tā Amorona anira’a iāna, ’ua hina’aro ’oia i te mā’a ’o tāna e hōro’a nā te feiā mau-’āuri ’āti Lamana, ’ei tauturu nō tōna iho mau ta’ata ; ’e ’ua hina’aro ato’a ’oia i tōna iho mau ta’ata nō te ha’apūai i tōna nu’u fa’ehau.

3 I teienei, ’ua rave atu te mau ’āti Lamana i te mau vahine e rave rahi ’e te mau tamari’i e rave rahi, ’e ’aita roa te hō’ē a’e vahine ’e te hō’ē a’e tamari’i i rotopū i te feiā mau-’āuri ato’a a Moroni, ’e ’aore rā i te feiā mau-’āuri tei ravehia e Moroni ; nō reira, ’ua ’ōpua ihora Moroni i te hō’ē rāve’a ’ia roa’a mai e rave rahi feiā mau-’āuri o te mau ’āti Nephi nō ’ō mai i te mau ’āti Lamana ra, mai te mea e ti’a ’ia nā reira.

4 Nō reira ’ua pāpa’i ’oia i te hō’ē ’episetole, ’e ’ua hāpono atu ra i te reira nā roto i tōna tāvini ra ia Amorona, taua iho tāvini ra ’o tei ’āfa’i mai i te ’episetole ia Moroni ra. I teienei, ’o teie te mau parau tāna i pāpa’i ia Amorona, i te nā-’ō-ra’a atu ē :

5 Inaha, e Amorona, ’ua pāpa’i poto noa atu vau ia ’oe na nō ni’a i teie nei ’arora’a tā ’oe i aro mai i tō’u nei mau ta’ata ; ’e ’aore rā ’o tā tō ’oe tua’ana i ’aro mai ia rātou, ’e tā ’oe ho’i e ’ōpua noa nei ā ’ia rave i muri mai i tōna ra pohera’a.

6 Inaha, e fa’a’ite poto noa atu vau ia ’oe na nō ni’a i tō te Atua ra parauti’a, ’e te ’o’e nō tōna ra riri ’ū’ana manahope ’o tē tautau ra i ni’a a’e ia ’oe na, maori rā ’ia tātarahapa ’oe ’e ’ia fa’aho’i ’ē atu i tō ’oe mau nu’u fa’ehau i roto i tō ’outou iho mau fenua, ’e ’aore rā i te fenua tei roa’a ia ’outou, ’oia ho’i te fenua nō Nephi.

7 ’Oia ïa, e fa’a’ite atu vau i teie mau mea ia ’oe na, mai te mea e ti’a ia ’oe ’ia ha’apa’o i te reira ; ’oia ïa, e fa’a’ite atu vau ia ’oe na nō ni’a i taua hade ri’ari’a ra ’o tē tīa’i ra nō te fāri’i mai i te feiā taparahi ta’ata mai ia ’oe na ’e tō ’oe tua’ana te huru, maori rā ’ia tātarahapa ’outou ’e ’ia fa’a’ore i tā ’outou mau ’ōpuara’a taparahi ta’ata, ’e ’ia ho’i atu ’e tō ’outou ra mau nu’u fa’ehau i tō ’outou iho mau fenua.

8 ’E nō te mea ’ua pāto’i atu ’outou i teie mau mea, ’e ’ua ’aro mai ho’i i te mau ta’ata o te Fatu ra, ’ua mana’o ïa vau e nā reira fa’ahou ā ’outou.

9 ’E i teienei, inaha, ’ua ineine mātou nō te fārerei ia ’outou na ; ’oia ïa, ’ia ’ore ’outou ’ia fa’a’ore i tā ’outou ra mau ’ōpuara’a, inaha, e fa’atae mai ’outou i ni’a ia ’outou i te riri ’ū’ana o taua Atua ra ’o tā ’outou i pāto’i atu, ē tae noa atu ho’i ’ua ha’amouhia ’outou.

10 ’Āre’a rā, mai te Fatu e ora nei, e tae mau atu tō mātou mau nu’u fa’ehau i ni’a ia ’outou, ’e ’ia ’ore ’outou ’ia fa’aātea ’ē atu, ’e e tāho’o-vave-hia ’outou e te pohe, nō te mea e tāpe’a noa mātou i tō mātou mau ’oire ’e tō mātou mau fenua ; ’oia ïa, e tāpe’a māite mātou i tā mātou ha’apa’ora’a ’e te ’ohipa a tō mātou Atua.

11 Inaha rā, ’ua mana’o a’era vau ē, e mea faufa’a ’ore tā’u nei mau parau ia ’oe na ; ’ua mana’o a’era ho’i au ē, e tamari’i ’oe nō hade ; nō reira e fa’aoti au i tā’u nei ’episetole i te fa’a’itera’a atu ia ’oe na ē, e’ita roa vau e taui i te feiā mau-’āuri, maori rā ’ua ti’a ’ia fa’aho’i mai ’outou i te hō’ē tāne ’e tāna vahine ’e tāna mau tamari’i, nō te hō’ē ta’ata mau-’āuri ; ’e mai te mea e nā reira ’oe, e taui ïa vau i reira.

12 ’E inaha, mai te mea ē ’aita ’outou e nā reira, e haere atu vau ’e tō’u ra mau nu’u fa’ehau e ’aro ia ’outou ; ’oia ïa, e fa’a’ahu vau i tā’u mau vahine ’e tā’u mau tamari’i i te mauha’a tama’i, ’e e haere atu vau e ’aro atu ia ’outou, ’e e tāpapa atu vau ia ’outou ē tae roa atu i tō ’outou iho fenua, ’oia tō tātou fenua ’āi’a mātāmua ; ’oia ïa, e riro ’ei toto nō te toto, ’ei ora nō te ora ; ’e e ’aro atu mātou ia ’outou ē tae roa atu ’ua ha’amou-roa-hia ’outou mai ni’a atu i te fenua nei.

13 Inaha, tei roto vau nei i tō’u riri, ’e mai te reira ato’a tō’u nei mau ta’ata ; ’ua tītau ’outou ’ia taparahi ia mātou, ’e ’ua tītau noa rā mātou ’ia pāruru ia mātou iho. Inaha rā, mai te mea ē ’ua tītau ā ’outou ’ia ha’amou ia mātou nei, ’ei reira mātou e tītau ai ’ia ha’amou ia ’outou na ; ’oia ïa, e tītau ā mātou i tō mātou fenua, te fenua nō tō mātou ’āi’a mātāmua.

14 I teienei, tē fa’aoti nei au i tā’u ’episetole. ’O Moroni au ; ’o vau te ta’ata fa’atere nō te mau ta’ata o te mau ’āti Nephi.

15 I teienei, i muri a’era, ’ia fāri’i a’era Amorona i teie ’episetole, ’ua riri ihora ’oia, ’e ’ua pāpa’i fa’ahou mai ra ’oia i te tahi ’episetole ia Moroni, ’e teie te mau parau tāna i pāpa’i mai, i te nā-’ō-ra’a ē :

16 ’O Amorona vau, te ari’i o te mau ’āti Lamana ; ’o vau te teina o ’Amalikia tā ’outou i taparahi. Inaha, e tāho’o atu vau i tōna ra toto i ni’a iho ia ’outou, ’oia ïa, e haere atu vau ’e tō’u ra mau nu’u fa’ehau e ’aro ia ’outou, ’e ’aita ho’i au e mata’u i tā ’outou mau parau ha’amata’u.

17 Inaha ho’i, ’ua hāmani ’ino tō ’outou mau metua i tō rātou ra mau taea’e, ’e nō reira ho’i ’ua fa’a’ere rātou ia rātou i tō rātou ti’amāra’a nō te hau fenua ’e ’o rātou ho’i tei ti’a mau ’ia fāri’i i te reira.

18 ’E i teienei, inaha, mai te mea e ha’apae ’outou i tā ’outou mau mauha’a tama’i, ’e ’a auraro ai i te feiā ’o tē tano mau ’ia fāri’i i te hau fenua, ’ei reira vau e fa’aue ai i tō’u mau ta’ata ’ia ha’apae i tā rātou mau mauha’a tama’i ’e ’eiaha roa e ’aro fa’ahou.

19 Inaha, ’ua parau mai ’oe i te mau parau ha’amata’u e rave rahi i ni’a iā’u e i tō’u nei mau ta’ata ; inaha rā ’aita roa mātou i mata’u i tā ’oe mau parau ha’amata’u.

20 ’Āre’a rā, e fa’ati’a vau ma te ’oa’oa ’ia taui i te feiā mau-’āuri mai te au i tā ’oe anira’a, ’ia ti’a iā’u ’ia fa’aherehere i tā’u mā’a nā tō’u mau fa’ehau ; ’e e fa’atupu mātou i te hō’ē ’arora’a ’o tē riro ’ei mea mure ’ore, ē tae noa atu ’ua auraro te mau ’āti Nephi i tō mātou mana fa’atere ’e ’aore rā ’ua fāri’i i tō rātou ha’amoura’a mure ’ore.

21 ’E nō ni’a i taua Atua ra ’o tā ’oe i parau ē, ’ua pāto’ihia e mātou nei, inaha, ’aita roa mātou i ’ite i te reira huru ta’ata, ’aita ato’a ho’i ’outou i ’ite ; ’āre’a rā mai te mea ē tē vai ra te reira ra huru ta’ata, ’aita roa ïa mātou i ’ite, ’āre’a rā penei a’e nāna i hāmani ia mātou ’e ia ’outou ato’a ho’i.

22 ’E mai te mea ho’i ē tē vai ra te diabolo ’e te hade, inaha, ’aita ānei ’oia e tono atu ia ’oe i reira, ’ia pārahi i pīha’i iho i tō’u ra tua’ana ’o tā ’outou i taparahi, ’e ’o tei parauhia e ’oe ē, ’ua haere atu ’oia i taua vāhi ra ? Inaha rā, ’aita tō teie mau mea e faufa’a.

23 ’O Amorona vau, ’e e hua’ai au nō Zorama, ’o tei ha’avīhia e tō ’outou mau metua ’e tei hōpoihia mai ho’i mai Ierusalema mai.

24 ’E inaha, i teienei, e ta’ata ’āti Lamana mata’u ’ore au ; inaha, ’ua fa’atupuhia ho’i teie nei ’arora’a nō te tāho’o i tō rātou mau hāmani-’ino-ra’a-hia, ’e nō te tāpe’a noa ’e nō te fāri’i i tō rātou ti’amāra’a nō te hau fenua ; ’e tē fa’aoti nei au i tā’u nei ’episetole ia Moroni.