1 I teienei, ’ia fa’ata’a ’ē atu Amona e tōna mau taea’e ia rātou iho i te mau ’ōti’a nō te fenua o te mau ’āti Lamana, inaha, ’ua haere atu ra Aarona i te fenua i parauhia ’e te mau ’āti Lamana, ’o Ierusalema, i ma’irihia ho’i i te i’oa o te fenua fānaura’a o tō rātou ra mau metua ; e tei te ātea ’ē taua fenua ra tāpiri i te mau ’ōti’a nō te fenua ra nō Moromona.

2 I teienei, ’ua fa’ati’a te mau ’āti Lamana, ’e te mau ’āti Amaleka, ’e te mau ta’ata o Amulona i te hō’ē ’oire rahi, ’e ’ua pi’ihia te reira o Ierusalema.

3 I teienei, e feiā ’ā’au ’eta’eta mau te mau ’āti Lamana, ’āre’a rā te mau ’āti Amaleka ’e te mau ’āti Amulona ’ua hau roa atu ïa tō rātou ’eta’eta, nō reira ’ua fa’a’eta’eta atu rātou i te ’ā’au o te mau ’āti Lamana, ’ia riro ato’a rātou ’ei feiā pūai i roto i te mau ’ohipa ’ī’ino ’e tā rātou mau ’ohipa vi’ivi’i.

4 ’E i muri a’era, ’ua haere atu ra Aarona i te ’oire ra nō Ierusalema, ’e ’ua ha’amata ihora ’oia nā mua i te a’o atu i te mau ’āti Amaleka. ’E ’ua ha’amata ’oia i te a’o atu ia rātou i roto i tō rātou mau sunago, ’e ’ua hāmani ho’i rātou i te mau sunago mai te au i te fa’anahora’a a tō Nehora ; ’e e rave rahi ho’i te mau ’āti Amaleka ’e te mau ’āti Amulona i roto i te fa’anahora’a a tō Nehora.

5 Nō reira, ’a tomo atu ai Aarona i roto i te hō’ē o tā rātou mau sunago nō te a’o atu i te mau ta’ata, ’e ’a paraparau atu ai ’oia ia rātou, inaha, ’ua ti’a mai ra te hō’ē ta’ata ’āti Amaleka ’e ’ua ha’amata mai ra i te mārō mai iāna, i te nā-’ō-ra’a mai ē : E aha tenā tā ’oe e fa’a’ite na ? ’Ua ’ite ānei ’oe i te hō’ē melahi ? Nō te aha ho’i ’aita te mau melahi e fā mai ia mātou nei ? Inaha, ’aita ānei teie nei mau ta’ata i au i te maita’i mai tō ’oe ra mau ta’ata ?

6 Tē parau ato’a mai nei ’oe ē, ’ia ’ore mātou ’ia tātarahapa, e pohe ïa mātou. Nāhea ’oe i ’ite ai i te mana’o ’e te hina’aro i roto i tō mātou nei ’ā’au ? Nāhea ’oe i ’ite ai ē, e mea ti’a ia mātou ’ia tātarahapa ? Nāhea ho’i ’oe i ’ite ai ē, e feiā parauti’a ’ore mātou ? Inaha, ’ua hāmani na ho’i mātou i te mau fare mo’a, ’e tē ha’aputuputu ’āmui nei mātou nō te ha’amori i te Atua. Tē ti’aturi nei ho’i mātou ē, e fa’aora te Atua i te mau ta’ata ato’a.

7 I teienei, ’ua nā ’ō atu ra Aarona iāna : Tē ti’aturi ra ānei ’oe ē, e tae mai te Tamaiti a te Atua nō te fa’aora i te ta’ata nei i tā rātou mau hara ?

8 ’E ’ua parau mai ra taua ta’ata ra iāna : ’Aita mātou i ti’aturi ē ’ua ’ite ’oe i te hō’ē mea mai te reira te huru. ’Aita mātou i ti’aturi i teie mau peu tumu ma’ama’a. ’Aita mātou i ti’aturi ē, ’ua ’ite ’oe i te mau mea e tupu a muri atu ; ’e ’aita ato’a ho’i mātou i ti’aturi ē, ’ua ’ite tō ’oe mau metua ’e tō mātou mau metua i te mau mea tā rātou i parau, ’oia ho’i i te mau mea e tupu a muri atu.

9 I teienei, ’ua ha’amata ihora Aarona i te ha’amāramarama atu i te mau pāpa’ira’a mo’a ia rātou nō ni’a i te taera’a mai o te Mesia, e nō ni’a ato’a i te ti’afa’ahoura’a o te feiā pohe ra, e aita te ta’ata nei e fāri’i i te fa’aorara’a, maori rā nā roto i te pohe ’e te mau mamae o te Mesia, ’e te tāra’ehara nō tōna ra toto.

10 ’E i muri a’era, ’a ha’amata atu ai ’oia i te ha’amāramarama atu i teie mau mea ia rātou, ’ua riri ihora rātou iāna, ’e ’ua ha’amata ihora i te tāhitohito mai iāna ; ’e ’aita atu ra rātou i hina’aro ’ia fa’aro’o i te mau parau tāna e parau ra.

11 Nō reira, ’ia ’ite a’era ’oia ē, ’aita rātou i hina’aro ’ia fa’aro’o i tāna mau parau, ’ua fa’aru’e atu ra ’oia i tō rātou sunago, ’e ’ua haere atu ra i te hō’ē ’oire iti i parauhia ’o Ani-Aneti, ’e i reira ’ua ’ite atu ra ’oia ia Muloki, ’e ’ia ’Ama ato’a ’e tōna mau taea’e, i te a’ora’a atu i te parau ia rātou. ’E tē mārō ra rātou i te mau ta’ata e rave rahi nō ni’a i te parau.

12 ’E i muri a’era, ’ia ’ite a’era rātou ē, ’ua fa’a’eta’eta te mau ta’ata i tō rātou ’ā’au, nō reira ’ua reva ’ē atu ra rātou ’e ’ua tae atu ra i te fenua ra nō Midoni. ’E ’ua a’o atu rātou i te parau i te mau ta’ata e rave rahi, ’e e mea iti roa tei ti’aturi i te mau parau tā rātou i ha’api’i atu.

13 ’Āre’a rā, ’ua ravehia Aarona e te tahi pae o tōna mau taea’e ’e ’ua hurihia i roto i te fare tāpe’ara’a, ’e ’ua horo ’ē atu te toe ’o rātou i te fenua ra nō Midoni, e haere atu ra nā te mau retioni i reira.

14 ’E ’ua fāri’i rātou ’o tei hurihia i roto i te fare tāpe’ara’a i te mau ’ati e rave rahi, ’e ’ua fa’aorahia rātou e te rima o Lamoni rāua ’o Amona, ’e ’ua fa’a’amuhia ’e ’ua fa’a’ahuhia ho’i rātou.

15 ’E ’ua haere fa’ahou atu rātou nō te fa’a’ite haere i te parau ; ’e ’ua nā reira rātou i te fa’aorahia i te taime mātāmua mai roto atu i te fare tāpe’ara’a ; ’e te reira ïa te huru nō tō rātou mau ’ati.

16 ’E ’ua haere atu rātou i te mau vāhi ato’a ’o tā te Vārua o te Fatu i arata’i ia rātou, i te porora’a atu i te parau a te Atua i roto i te mau sunago ato’a o te mau ’āti Amaleka, ’e i roto ato’a ho’i i te mau ’āmuira’a ato’a o te mau ’āti Lamana i fa’ati’ahia ia rātou ’ia tomo atu.

17 ’E i muri a’era, ’ua ha’amaita’i mai te Fatu ia rātou, ’e nō reira e rave rahi tā rātou i fa’afāriu mai i te ’ite i te parau mau ; ’oia ïa, ’ua ha’apāpū maita’i atu rātou i te mau ta’ata e rave rahi i tā rātou iho mau hara, ’e i te mau peu tumu tano ’ore a tō rātou ra mau metua.

18 ’E i muri a’era, ’ua ho’i mai ra Amona rāua ’o Lamoni mai te fenua mai ra mai Midoni i te fenua ra nō Isema’ela, ’oia ho’i, i tō rātou ra fenua ’āi’a.

19 ’E ’aita te ari’i ra ’o Lamoni i fa’ati’a ’ia tāvini mai Amona iāna, ’e ’aore rā ’ia riro ’ei tāvini nōna.

20 ’Āre’a rā ’ua fa’aue ’oia ’ia hāmanihia te mau sunago i te fenua ra nō Isema’ela ; ’e ’ua tītau ’oia i tōna mau ta’ata ’e i te mau ta’ata i raro a’e i tāna fa’aterera’a ’ia ha’aputuputu ’āmui mai ia rātou.

21 ’E ’ua ’oa’oa ihora ’oia ia rātou, ’e ’ua ha’api’i atu ’oia ia rātou i te mau mea e rave rahi. ’E ’ua fa’a’ite ato’a atu ’oia ia rātou ē, e feiā rātou i raro a’e iāna, ’e e feiā ti’amā ho’i rātou, ’e ’ua ti’amā rātou i te mau hāmani-’ino-ra’a a te ari’i, tōna metua tāne ; ’e ’ua hōro’a mai ho’i tōna metua tāne i te fa’aterera’a iāna i ni’a a’e i te mau ta’ata i te fenua ra nō Isema’ela, ’e te mau fenua ato’a ē ’ati noa a’e.

22 ’E ’ua fa’a’ite ato’a atu ’oia ia rātou ē, e ti’amāra’a tō rātou ’ia ha’amori atu i te Fatu tō rātou Atua mai te au i tō rātou mau hina’aro, ’e i te mau vāhi ato’a tā rātou e pārahi, mai te mea ē tei roto rātou i te fenua i raro a’e i te fa’aterera’a a te ari’i ra ’o Lamoni.

23 ’E ’ua a’o atu Amona i te mau ta’ata o te ari’i ra ’o Lamoni ; ’e i muri a’era, ’ua ha’api’i atu ra ’oia ia rātou i te mau mea ato’a nō ni’a i te parauti’a. ’E ’ua a’o atu ’oia ia rātou i te mau mahana ato’a, ma te itoito ; ’e ’ua fa’aro’o rātou i tāna parau, ’e ’ua itoito ho’i rātou i te ha’apa’ora’a i te mau fa’auera’a a te Atua.