1 E tā’u tamaiti, ’a fa’aro’o mai na tō tari’a i tā’u nei mau parau, ’e tē parau atu nei au ia ’oe mai tā’u ho’i i parau atu ia Helamana ra, mai te mea e ha’apa’o māite ’oe i te mau fa’auera’a a te Atua, e manuia ’oe i ni’a i te fenua nei ; ’e ’ia ’ore ’oe ’ia ha’apa’o māite i te mau fa’auera’a a te Atua, e tāpū-’ē-hia atu ’oe i tōna ra aro.

2 ’E i teienei, e tā’u tamaiti, tē ti’aturi nei au ē, e noa’a mai tō’u ’oa’oa rahi i roto ia ’oe na, nō tō ’oe ’āueue ’ore ’e tō ’oe ha’apa’o maita’i i tā te Atua ; inaha ho’i nō te mea ’ua ha’amata ’oe i tō ’oe ’āpīra’a ’ia ti’aturi atu i te Fatu ra i tō ’oe Atua, tē ti’aturi nei ho’i au ē, e tāmau noa ’oe i te ha’apa’o i tāna ra mau fa’auera’a ; e ao ho’i tōna ’o tē tāpe’a māite ē tae roa atu i te hope’a.

3 Tē parau atu nei au ia ’oe, e tā’u tamaiti, ’ua fāri’i na vau i te ’oa’oa rahi nō roto mai ia ’oe na, nō tō ’oe ha’apa’o maita’i ’e tō ’oe itoito, ’e nō tō ’oe marū ’e tō ’oe fa’a’oroma’i roa ho’i i rotopū i te mau ta’ata o te mau ’āti Zorama.

4 ’E ’ua ’ite ho’i au ē, ’ua tāpe’ahia ’oe ra ; ’oia ïa, ’ua ’ite ato’a vau ē, ’ua pēhihia ’oe i te ’ōfa’i nō te parau ; ’e ’ua fa’a’oroma’i ’oe i teie mau mea ato’a nei ma te marū nō te mea tei pīha’i iho te Fatu ia ’oe ; ’e i teienei, ’ua ’ite ’oe ē, ’ua fa’aora te Fatu ia ’oe.

5 ’E i teienei, e tā’u tamaiti, e Sibelona, ’ua hina’aro vau ’ia ha’amana’o ’oe ē, ’ia ti’aturi ’oe i te Atua, e fa’aora ïa ’oia ia ’oe i roto i tō ’oe ra mau ’ati, ’e tō ’oe ra mau pe’ape’a, ’e tō ’oe ra mau fifi, ’e e fa’ateiteihia ’oe i te mahana hope’a ra.

6 I teienei, e tā’u tamaiti, ’aita vau i hina’aro ’ia mana’o ’oe ē, ’ua ’ite au i teie nei mau mea nā roto iā’u iho, nā roto rā i te Vārua o te Atua i roto iā’u nei ’o tei fa’a’ite mai i teie nei mau mea iā’u ; nō te mea ’āhiri ’aita vau i fānauhia i te Atua ra, ’aita ïa vau i ’ite i teie nei mau mea.

7 Inaha rā, ’ua tono mai te Fatu, nā roto i tōna aroha rahi, i tāna melahi nō te fa’a’ite mai iā’u ē, e mea ti’a roa iā’u ’ia fa’aea i te ’ohipa ha’amoura’a i rotopū i tōna ra mau ta’ata ; ’oia ïa, ’ua ’ite mata atu vau i te hō’ē melahi te mata ’e te mata, ’e ’ua parau mai ’oia iā’u, ’e mai te pātiri tōna ra reo, ’e ’ua fa’a’āueue te reira i te fenua tā’āto’a.

8 ’E i muri a’era, i roto i nā mahana e toru ’e nā pō e toru ra, ’ua fāri’i au i te māuiui rahi ’e te mamae rahi o te vārua ; ’e ’aita roa vau i fāri’i i te ha’amatarara’a nō tā’u ra mau hara ē tae roa ’ua ti’aoro atu vau i te Fatu ra ia Iesu Mesia ’ia aroha mai. ’E inaha, ’ua ti’aoro atu vau iāna, ’e ’ua fāri’i au i te hau i tō’u ra vārua.

9 ’E i teienei, e tā’u tamaiti, ’ua fa’a’ite atu vau i teie ia ’oe na ’ia ’ite ’oe i te pa’ari, ’ia ’ite ho’i ’oe nā roto atu iā’u nei ē, ’aita atu e rāve’a e fa’aorahia ai te ta’ata, maori rā nā roto i te Mesia. Inaha, ’o ’oia te ora ’e te māramarama o te ao nei. Inaha, ’o ’oia te parau mau ’e te parauti’a.

10 ’E i teienei, nō te mea ’ua ha’amata ’oe i te ha’api’i atu i te parau, ’ua hina’aro vau ’ia tāmau noa ’oe i te ha’api’i atu i te reira ; ’e ’ua hina’aro ato’a vau ’ia itoito ’e ’ia hitahita ’ore ’oe i roto i te mau mea ato’a.

11 Hi’o māite ē ’aita ’oe e fa’ateiteihia i te te’ote’o ; ’oia ïa, ’a hi’o māite ē ’aita ’oe e fa’aahaaha i tō ’oe iho na pa’ari, ’e ’aita ho’i i tō ’oe iho pūai.

12 ’A fa’a’ohipa i te mata’u ’ore, ’eiaha rā te ahaaha ; ’e ’a hi’o māite ē ’ua tāvaha ’oe i tō ’oe mau hina’aro pae tino ato’a, ’ia fa’a’īhia ’oe i te aroha ; ’e ’a hi’o ē ’aita ’oe e fa’atau.

13 ’Eiaha ’oe e pure mai tā te mau ’āti Zorama e nā reira ra, nō te mea ’ua ’ite ’oe ē, tē pure ra rātou ’ia fa’aro’ohia e te ta’ata, ’e ’ia ’āruehia nō tō rātou ’aravihi.

14 ’Eiaha ’oe e parau atu ē : E te Atua, tē ha’amāuruuru nei au ia ’oe nō te mea e mea maita’i a’e mātou i tō mātou mau taea’e ; ’ia parau atu rā ’oe ē : E te Fatu, ’a fa’a’ore mai i tō’u ti’amā ’ore, ’e ’a ha’amana’o i tō’u mau taea’e ma te aroha—’oia ïa, ’a fa’a’ite atu i tō ’oe ti’amā ’ore i mua i te Atua i te mau taime ato’a.

15 ’E ’ia ha’amaita’i mai te Fatu i tō ’oe vārua, ’e ’ia fāri’i mai ’oia ia ’oe i roto i tōna ra bāsileia ’ia tae i te mahana hope’a ra, nō te pārahi i raro ma te hau. ’E i teienei, ’a haere, e tā’u tamaiti, ’e ’a ha’api’i atu i te parau i teie nei feiā. ’Ei ta’ata pāpū ’oe. E tā’u tamaiti, ’a pārahi.