1 ’E i teienei, i muri a’era, ’ua fāri’i au i te hō’ē ’episetole nō ’ō mai i te ari’i ra ia Amorona, ’o tei nā ’ō mai ē, mai te mea e tu’u atu vau i te feiā mau-’āuri tau tama’i i haruhia mai e mātou i roto i te ’arora’a, e hōro’a mai ïa ’oia i te ’oire ra nō Anetipara ia mātou.

2 ’Āre’a rā ’ua hāpono atu vau i te hō’ē ’episetole i te ari’i, i te nā-’ō-ra’a atu ē, ’ua ’ite pāpū mātou ē, ’ua nava’i tō mātou nu’u fa’ehau nō te haru mai i te ’oire ra nō Anetipara nā roto i tō mātou pūai ; ’e ’ia tu’u atu mātou i tā mātou feiā mau-’āuri ’ei taui nō taua ’oire ra, e riro mātou ’ei feiā pa’ari ’ore i tō mātou iho mana’ora’a, ’e ’aita mātou e tu’u atu i tā mātou feiā mau-’āuri, maori rā e tu’u mai rātou i tā rātou ’ei taui.

3 ’E ’ua pāto’i mai Amorona i tā’u ’episetole, ’e ’aita ho’i ’oia i hina’aro ’ia taui i te feiā mau-’āuri ; nō reira ’ua ha’amata mātou i te fa’aineine nō te haere atu e ’aro i te ’oire ra nō Anetipara.

4 ’Āre’a rā ’ua fa’aru’e te feiā o Anetipara i te ’oire, ’e ’ua horo atu ra i te tahi atu o tō rātou mau ’oire, ’o tei roa’a ia rātou, nō te ha’apa’ari i te reira ; ’e nō reira ’ua roa’a mai i roto i tō mātou rima te ’oire ra nō Anetipara.

5 ’E ’o te hope’a te reira nō te piti ’ahuru ’e ma va’u o te matahiti nō te fa’aterera’a a te mau ha’avā.

6 ’E i muri a’era, i te ha’amatara’a o te piti ’ahuru ’e ma iva o te matahiti, ’ua fāri’i mātou i te mā’a ’e te mau ta’ata nō tō mātou nu’u fa’ehau, nō te fenua mai o Zarahemela ; ’e nō te fenua mai ē ’ati noa a’e, ’oia ho’i, e ono tauatini ta’ata, ta’a ’ē noa atu te ono ’ahuru tamari’i tamāroa nō te mau ’āti Amona ra, ’o tei haere mai nō te ’āmui mai i tō rātou mau taea’e, i tā’u pupu fa’ehau iti e piti tauatini. ’E i teienei, inaha, e mea pūai roa mātou, ’oia ïa, ’e ’ua rahi te mā’a i hōpoihia mai ia mātou.

7 ’E i muri a’era, ’ua hina’aro mātou ’ia ’aro atu i te nu’u fa’ehau i fa’ata’ahia nō te pāruru i te ’oire ra nō Kumeni.

8 ’E i teienei, inaha, e fa’a’ite atu vau ia ’oe ē, ’ua ’oi’oi roa tō mātou hina’aro i te manuia ; ’oia ïa, ma tō mātou nu’u fa’ehau rahi, ’oia ho’i i te tahi tufa’a nō tō mātou nu’u fa’ehau rahi, ’ua ha’a’ati mātou i te ’oire ra nō Kumeni i te pō, nā mua noa a’e rātou i fāri’i ai i te mā’a.

9 ’E i muri a’era, ’ua pūhapa ihora mātou ē ’ati noa a’e te ’oire i te mau pō e rave rahi ; ’āre’a rā ’ua ta’oto mātou ’e tā mātou mau ’o’e i pīha’i iho ia mātou, ’e ’ua fa’ata’ahia te mau tīa’i, ’ia ’ore te mau ’āti Lamana e haere mai i ni’a ia mātou i te pō nō te taparahi ia mātou, ’e ’ua tāmata rātou e rave rahi taime ; ’āre’a rā i te mau taime e rave rahi tā rātou i tāmata, ’ua ha’amani’ihia tō rātou toto.

10 Ē maoro a’era, ’ua tae mai ra tā rātou mā’a, ’e tē tomo ra rātou i roto i te ’oire i te pō. ’E ’o mātou nei rā, e ’ere ïa i te mau ’āti Lamana, e mau ’āti Nephi ; nō reira ’ua rave mai atu ra mātou ia rātou ’e tā rātou mau mā’a.

11 ’E noa atu ā ’ua tāpūhia te mau ’āti Lamana i tā rātou tauturura’a mai teie te huru, ’ua hina’aro rātou ’ia tāpe’a noa i te ’oire ; nō reira ’ua ti’a roa ia mātou ’ia rave i taua mau mā’a ra ’e ’ia hāpono atu i te reira i Iudea, ’e ’ia tono atu ho’i i tā mātou feiā mau-’āuri i te fenua ra nō Zarahemela.

12 ’E i muri a’era, ’aita i rahi te mau mahana i ma’iri i muri, ’ua paruparu a’era tō te mau ’āti Lamana mana’o nō te fāri’i i te tauturura’a ; nō reira ’ua tu’u mai ra rātou i te ’oire i roto i tō mātou rima ; ’e nō reira ’ua manuia a’era tā mātou mau ’ōpuara’a ’ia noa’a mai ia mātou te ’oire ra nō Kumeni.

13 ’Āre’a rā i muri a’era, ’ua rahi roa tā mātou feiā mau-’āuri, e noa atu ā ho’i te rahi o tō mātou mau ta’ata, ’ua ti’a roa ’ia fa’a’ohipahia tō mātou nu’u fa’ehau tā’āto’a nō te tīa’i ia rātou, ’e ’aore rā nō te taparahi ia rātou.

14 Inaha ho’i, e riro e rave rahi i te ora atu, ’e i te ’aro mai ma te fa’a’ohipa i te mau ’ōfa’i, ’e te mau rā’au tā’iri, ’e te mau mea e ti’a ia rātou ’ia rave i tō rātou rima ; ’e nō reira ho’i ’ua taparahi mātou e piti tauatini ti’ahapa ta’ata i muri iho i tō rātou tu’ura’a mai ia rātou iho ’ei feiā mau-’āuri tau tama’i.

15 Nō reira ’ua tītau-roa-hia ia mātou ’ia taparahi ia rātou ; ’e ’aore rā ’ia tīa’i ia rātou ma te ’o’e i te rima ’a arata’ihia ai rātou i raro i te fenua ra nō Zarahemela ; ’e ’aita ho’i i nava’i tā mātou mā’a nā tō mātou iho mau ta’ata, ta’a ’ē noa atu ā te mā’a ’o tā mātou i rave mai nō ’ō mai i te mau ’āti Lamana ra.

16 ’E i teienei, i taua mau taime fifi rahi roa ra, ’ua fifi rahi ato’a te mana’o nō ni’a i tā mātou e rave i taua feiā mau-’āuri tau tama’i ra, ’āre’a rā ’ua fa’aoti mātou ’ia arata’i ia rātou i raro i te fenua ra nō Zarahemela ; nō reira ’ua mā’iti mātou i te tahi pae o tō mātou ta’ata, ’e ’ua fa’ariro ia rātou ’ei tīa’i i tā mātou feiā mau-’āuri e arata’ihia ra i raro i te fenua ra nō Zarahemela.

17 ’Āre’a rā, i muri a’era, ’ia po’ipo’i a’e ’ua ho’i mai ra rātou. ’E i teienei, inaha, ’aita mātou i ui atu ia rātou nō ni’a i te feiā mau-’āuri ; inaha ho’i, ’ua ho’i mai rātou i te taime tano nō te fa’aora ia mātou ’ia ’ore ’ia ma’iri atu i roto i te rima o te mau ’āti Lamana ’o tei tae mai i ni’a ia mātou. Inaha ho’i, ’ua fa’atae atu Amorona i te tufa’a mā’a ’āpī nō te tauturu ia rātou, ’e te hō’ē ato’a nu’u ta’ata rahi.

18 ’E i muri a’era, ’ua tae mai taua mau ta’ata tā mātou i tono atu nō te tīa’i i te feiā mau-’āuri ra, i te taime tano, nō te tāpe’a atu ia rātou ’a fātata ai rātou i te ha’avī mai ia mātou.

19 Inaha rā, ’ua ’aro ’ū’ana atu tā’u pupu fa’ehau iti, ’oia ho’i te mau ta’ata e piti tauatini ’e e ono ’ahuru ; ’oia ïa, e mea pūai roa rātou i mua i te mau ’āti Lamana, ’e ’ua taparahi atu ia rātou ato’a ’o tei aro mai ia rātou.

20 ’E ’a fātata ai te toe’a o tō mātou nu’u fa’ehau i te ’ōtohe i mua i te mau ’āti Lamana, inaha, ’ua ’aro pūai noa teie mau ta’ata e piti tauatini ’e e ono ’ahuru ma te mata’u ’ore.

21 ’Oia ïa, ’ua auraro ’e ’ua ha’apa’o maita’i rātou i te mau parau ’e te mau fa’auera’a ato’a ma te hapa ’ore ; ’oia ïa, ’e mai te au i tō rātou fa’aro’o i te ravera’ahia i ni’a ia rātou ; ’e ’ua ha’amana’o ihora vau i te mau parau tā rātou i parau mai iā’u, ’o tā tō rātou mau metua vahine i ha’api’i mai ia rātou.

22 ’E i teienei, inaha, nā roto i tā’u mau tamari’i tamāroa nei, ’e taua mau ta’ata ato’a ho’i i mā’itihia nō te arata’i atu i te feiā mau-’āuri, i upo’oti’a ai mātou ; ’e nā rātou ho’i i ha’avī atu i te mau ’āti Lamana ; nō reira ’ua tūra’ihia atu rātou i muri i te ’oire ra nō Maniti.

23 ’E ’ua tāpe’a noa mātou i tō tātou ’oire ra nō Kumeni, ’e ’aita ho’i mātou pā’āto’a i pau roa i te ’o’e ; ’āre’a rā e rave rahi tō mātou i pau.

24 ’E i muri a’era, i te horora’a atu te mau ’āti Lamana, ’ua hōro’a ’oi’oi atu ra vau i te tahi mau fa’auera’a ’ia ravehia tō’u mau ta’ata i puta mai roto mai i te feiā pohe, ’e ’ia fa’ate’ahia tō rātou ra mau puta.

25 ’E i muri a’era, tē vai ra e piti hānere ta’ata i roto i tō’u mau ta’ata e piti tauatini ’e e ono ’ahuru ’o tei matapōirihia nō te pau rahi o tō rātou toto ; ’āre’a rā nā roto i te hāmani maita’i o te Atua ’aita roa te hō’ē noa a’e o rātou i pohe ; ’e i tō mātou māere rahi, ’e ’oia ato’a i te ’oa’oa o tō mātou nu’u fa’ehau pā’āto’a, ’oia ïa, ’aita ato’a ho’i te hō’ē ta’ata i rotopū ia rātou ’o tei ’ore i puta i te mau puta e rave rahi.

26 ’E i teienei, tō rātou fa’aorara’ahia, e mea māere rahi roa ïa i tō mātou nu’u fa’ehau ato’a, ’oia ïa, ’ua ora rātou, ’a taparahihia ai tō mātou mau taea’e hō’ē tauatini. ’E ’ua ti’a roa tā mātou parau ē, nō te mana ta’a ’ē o te Atua ïa te reira, ’e nō tō rātou fa’aro’o rahi ’ia ti’aturi i tei ha’api’ihia ia rātou—’oia ho’i, tē vai ra te Atua parauti’a ; ’e ’o rātou ’o tē ’ore e fē’a’a, e fa’aorahia rātou e tōna mana ta’a ’ē.

27 I teienei, ’o teie ïa te fa’aro’o o rātou ’o tā’u i parau iho nei ; e mea ’āpī rātou, ’e e mea mau pāpū tō rātou mana’o, ’e ’ua tu’u tāmau noa rātou i tō rātou ti’aturira’a i ni’a i te Atua.

28 ’E i muri a’era, ’ia oti a’era tā mātou utuutura’a i tō mātou mau ta’ata i puta, ’e te hunara’a i tō mātou feiā pohe ’e te feiā pohe ato’a o te mau ’āti Lamana, ’e e rave rahi ho’i rātou, inaha, ’ua ui atu ra mātou ia Gida i te parau nō ni’a te feiā mau-’āuri tā rātou i ha’amata i te arata’i atu i raro i te fenua ra nō Zarahemela.

29 I teienei, ’o Gida te ra’atira rahi i ni’a i te pupu fa’ehau i mā’itihia nō te tīa’i ia rātou ’a arata’ihia ai rātou i taua fenua ra.

30 ’E i teienei, teie te mau parau tā Gida i parau mai iā’u : Inaha, ’ua ha’amata mātou i te haere i raro i te fenua ra nō Zarahemela ’e te feiā mau-’āuri. ’E i muri a’era, ’ua fārerei a’era mātou i te mau ta’ata tāmoemoe o tō tātou mau nu’u fa’ehau, ’o tei tonohia atu nō te hi’o i te pūhapara’a o te mau ’āti Lamana.

31 ’E ’ua pi’i mai ra rātou ia mātou, i te nā-’ō-ra’a ē : Inaha, tē haere ra te mau nu’u fa’ehau o te mau ’āti Lamana i te ’oire ra nō Kumeni ; ’e inaha, e ’aro atu rātou i tō Kumeni, ’oia ïa, e ha’amou i tō tātou mau ta’ata.

32 ’E i muri a’era, ’ua fa’aro’o ihora tā mātou feiā mau-’āuri i tā rātou pi’ira’a, ’e ’ua fa’atupu te reira i tō rātou itoito ; ’e ’ua ’ōrure mai ra rātou ia mātou.

33 ’E i muri a’era, nō tō rātou ’ōrurera’a ’ua tā’iri mātou ia rātou i tā mātou mau ’o’e. ’E i muri a’era, ’ua horo pupu noa mai ra rātou i ni’a i tā mātou mau ’o’e, ’e ’ua taparahihia ihora te pae rahi o rātou ; ’e ’ua ora atu ra te toe’a ’e ’ua horo ’ē atu mai roto atu ia mātou.

34 ’E inaha, i tō rātou horo-’ē-ra’a atu ’e ’aita rātou i roa’ahia ia mātou, ’ua haere ’oi’oi mai ra mātou i te ’oire nō Kumeni ; ’e inaha, ’ua tae mai mātou i te taime tano i ti’a ai ia mātou ’ia tauturu i tō tātou mau taea’e ’ia pāruru noa i te ’oire.

35 ’E inaha, ’ua ora fa’ahou tātou i te rima o tō tātou mau ’enemi. ’E ’ia ha’amaita’ihia te i’oa o tātou Atua ; inaha ho’i, nāna i fa’aora ia tātou ; ’oia ïa, nāna i rave i teie mea rahi nō tātou.

36 I teienei, i muri a’era, i to’u, ’o Helamana, fa’aro’ora’a i teie mau parau a Gida, ’ua ’ī roa a’era vau i te ’oa’oa rahi nō tō te Atua hāmani maita’i i te fa’aorara’a ia mātou, ’ia ’ore mātou ’ia pohe ; ’oia ïa, ’e tē ti’aturi nei au ē, ’ua ō atu te mau vārua ’o tei taparahihia i roto i te fa’aeara’a o tō rātou ra Atua.