1 ’E i muri a’era, ’ia fa’aoti a’era te mau ’āti Nephi, ’o tei ’ore i taparahihia e te mau mauha’a tama’i, i te hunara’a i te feiā i taparahihia—i teie nei ’aita te feiā i taparahihia i tai’ohia, nō te mea e mea rahi roa rātou—’ia fa’aoti a’era rātou i te hunara’a i tō rātou feiā pohe, ’ua ho’i atu ra rātou pā’āto’a i tō rātou mau fenua, ’e i tō rātou mau fare, ’e i tā rātou mau vahine, ’e i tā rātou mau tamari’i.

2 I teienei e rave rahi mau vahine ’e mau tamari’i i taparahihia i te ’o’e, ’e ’oia ato’a tā rātou mau nana māmoe ’e tā rātou mau nana pua’atoro ; ’e ’oia ato’a ’ua ha’amouhia tā rātou mau ’āua sītona e rave rahi, ’e ’ua ta’ata’ahihia ho’i te reira e te mau ta’ata e rave rahi.

3 ’E i teienei te mau ta’ata o te mau ’āti Lamana ’e te mau ta’ata ho’i o te mau ’āti ’Amaliki i taparahihia i te hiti o te ’ānāvai Sidona ’ua hurihia ïa i roto i te mau pape nō Sidona ; e inaha tei roto tō rātou mau ivi i te mau hōhonura’a o te moana, ’e e rave rahi ho’i te reira.

4 ’E ’ua ta’a ’ē maita’i te mau ’āti ’Amaliki i te mau ’āti Nephi, nō te mea ’ua tāpa’o rātou ia rātou iho i te tāpa’o ’ute’ute i ni’a iho i tō rātou mau rae mai te au i te peu a te mau ’āti Lamana ; ’āre’a rā ’aita rātou i hahu i tō rātou mau upo’o mai tā te mau ’āti Lamana.

5 I teienei ’ua hahuhia te upo’o o te mau ’āti Lamana ; ’e tē taha’a noa ra ho’i rātou, maori rā tō rātou tau’upu i tātuahia i te ’iri pua’a, ’e ’ua tātuahia ho’i rātou i tā rātou mauha’a tama’i, ’oia ho’i tā rātou mau fana, ’e tā rātou mau te’a, ’e tā rātou mau ’ōfa’i, ’e tā rātou mau ma’a, ’e tē vai atu ra.

6 E ’iri huru ’ere’ere ho’i tō te mau ’āti Lamana, mai te au i te tāpa’o i tu’uhia mai i ni’a iho i tō rātou ra mau metua tāne, ’ei ’anatemara’a ia rātou nō tā rātou ’ōfatira’a i te ture ’e tā rātou ’ōrurera’a i tō rātou mau taea’e, ’oia ho’i, ’ia Nephi, Iakoba, Iosepha, ’e Samu ; e mau ta’ata parauti’a ’e te mo’a rātou.

7 ’E ’ua tītau tō rātou mau taea’e ’ia taparahi ia rātou, nō reira ’ua ’anatemahia rātou ; ’e ’ua tu’u mai ra te Fatu te Atua i te tahi tāpa’o i ni’a iho ia rātou, ’oia ïa, i ni’a iho ia Lamana ’e Lemuela, ’e i te mau tamaiti a Isema’ela, ’e te mau vahine nō te mau ’āti Isema’ela.

8 ’E ’ua nā-reira-hia ’ia ta’a ’ē maita’i tō rātou hua’ai i te hua’ai o tō rātou ra mau taea’e, ’ia ti’a i te Fatu te Atua ’ia fa’aherehere i tōna ra mau ta’ata, ’ia ’ore rātou ’ia ’āmui haere noa ia rātou ’e ’ia ti’aturi i te mau peu tumu hape i tu’uhia mai ’e ’o tē ha’amou ia rātou.

9 ’E i muri a’era, ’o ’oia ’o tei ’āmui i tōna ra hua’ai i tō te mau ’āti Lamana, ’ua ha’ama’iri mai ïa ’oia i taua ’anatemara’a i ni’a iho i tōna ihora hua’ai.

10 Nō reira, ’o ’oia ’o tē tu’u iāna iho ’ia arata’i-’ē-hia e te mau ’āti Lamana ra, ’ua parauhia ïa ’oia i te reira i’oa, ’e ’ua tu’uhia te tahi tāpa’o i ni’a iho iāna.

11 ’E i muri a’era, ’o ’oia ’o tē ’ore e ti’aturi i te peu tahito a te mau ’āti Lamana, ’āre’a rā ’o tei ti’aturi i te mau pāpa’a parau i hōpoihia mai mai te fenua mai ra mai Ierusalema, ’e i te peu tumu ato’a ho’i a tō rātou ra mau metua tāne, ’o tei riro ’ei parau mau, ’e ’o tei ti’aturi ’e tei ha’apa’o i te mau fa’auera’a a te Atua, ’ua parauhia ïa rātou e mau ’āti Nephi, ’oia ho’i te mau ta’ata o Nephi, mai te reira mai taime—

12 ’E ’o rātou ho’i tei pāpa’i i te mau pāpa’a parau, tei roto i te reira te parau mau nō tō rātou ihora mau ta’ata, ’e nō te mau ta’ata ato’a ho’i o te mau ’āti Lamana.

13 I teienei, e parau fa’ahou tātou nō ni’a i te mau ’āti ’Amaliki, nō te mea ’ua tu’u-ato’a-hia te hō’ē tāpa’o i ni’a ia rātou, ’oia ïa, ’ua tu’u rātou i te tāpa’o i ni’a ia rātou iho ; ’oia ïa, te hō’ē tāpa’o ’ute’ute i ni’a iho i tō rātou mau rae.

14 ’Ua nā reira te parau a te Atua i te tupu, ’e teie ho’i te mau parau tāna i parau atu ia Nephi : Inaha, ’ua ’anatema vau i te mau ’āti Lamana, ’e e tu’u atu ho’i au i te hō’ē tāpa’o i ni’a iho ia rātou, ’ia ta’a ’ē rātou e tō rātou hua’ai ia ’oe ’e i tō ’oe ra hua’ai, mai teie nei atu taime ē a muri noa atu, maori rā ’ia tātarahapa rātou i tā rātou mau ’ohipa ’ī’ino ’e ’ia fāriu mai iā’u, ’ia aroha atu vau ia rātou.

15 ’E teie fa’ahou ā : E tu’u atu vau i te hō’ē tāpa’o i ni’a iho iāna ’o tē ’āmui atu i tōna hua’ai i tō ’oe ra mau taea’e, ’ia ’anatema-ato’a-hia rātou.

16 ’E teie fa’ahou ā : E tu’u atu vau i te hō’ē tāpa’o i ni’a iho iāna ’o tē aro mai ia ’oe ’e tō ’oe ra hua’ai.

17 ’E teie fa’ahou ā, e parau atu vau ē, ’o tē fa’aru’e mai ia ’oe na e ’ore roa ’oia e parau-fa’ahou-hia e hua’ai nō ’oe ; ’e e ha’amaita’i au ia ’oe ’e te mau ta’ata ato’a ’o tē parauhia e hua’ai nō ’oe, mai teie nei atu ē a muri noa atu ; ’e ’o teie tā te Fatu mau fafaura’a ia Nephi ’e i tōna ra hua’ai.

18 I teienei ’aita te mau ’āti ’Amaliki i ’ite ē, tē fa’atupu ra rātou i te mau parau a te Atua i tō rātou ha’amatara’a i te tāpa’o ia rātou iho i ni’a i tō rātou mau rae ; ’āre’a rā ’ua pāto’i ïa rātou i te Atua, nō reira e mea ti’a roa ’ia ma’iri mai te ’anatemara’a i ni’a iho ia rātou.

19 I teienei, ’ua hina’aro vau ’ia ’ite ’outou ē, nā rātou iho i fa’atae mai i te ’anatemara’a i ni’a iho ia rātou ; ’e ’oia ato’a ’ua nā reira te ta’ata tāta’itahi i ’anatemahia i te fa’atae mai i tōna iho pohe i ni’a iāna iho.

20 I teienei, i muri a’era, ’aita i rahi te mahana i ma’iri i muri iho i te ’arora’a i tupu i te fenua ra nō Zarahemela, i rotopū i te mau ’āti Lamana ’e te mau ’āti ’Amaliki, ’ua haere mai ra te tahi atu ā nu’u fa’ehau nō te mau ’āti Lamana i ni’a i te mau ta’ata o Nephi, i taua ihora vāhi i ’aro ai te nu’u fa’ehau mātāmua i te mau ’āti ’Amaliki.

21 ’E i muri a’era, ’ua tonohia mai te tahi nu’u fa’ehau nō te ti’avaru ia rātou i rāpae i tō rātou fenua.

22 I teienei nō te mea ’ua pēpē Alama i te hō’ē puta, ’aita atu ra ’oia i haere e ’aro atu i te mau ’āti Lamana ;

23 ’Āre’a rā ’ua tono atu ’oia i te tahi nu’u fa’ehau rahi roa nō te ’aro atu ia rātou ; ’e ’ua haere atu rātou ’e ’ua taparahi i te mau ’āti Lamana e rave rahi, ’e ’ua ti’avaru atu i te toe’a o rātou i rāpae i te mau ’ōti’a o tō rātou fenua.

24 ’E i reira ’ua ho’i fa’ahou mai rātou ’e ’ua ha’amata ihora i te fa’atupu i te hau i ni’a i te fenua, ’e ’aita a’era rātou i ha’ape’ape’a-fa’ahou-hia e tō rātou mau ’enemi.

25 I teienei ’ua tupu teie mau mea ato’a, ’oia ïa, ’ua ha’amatahia ’e ’ua fa’aotihia teie mau tama’i ’e te mau mārōra’a i te pae o te matahiti nō te fa’aterera’a a te mau ha’avā.

26 ’E i roto i taua matahiti hō’ē ra, ’ua tauatini, ’e ’ua ’ahuru noa atu te tauatinira’a o te mau ta’ata i tonohia atu i te ao mure ’ore, ’ia roa’a ia rātou tā rātou mau utu’a mai te au i tā rātou mau ’ohipa, mai te mea e mea maita’i te reira ’e ’aore rā mai te mea e mea ’ino te reira, ’ia roa’a ia rātou te ’oa’oa mure ’ore ’e ’aore rā te mamae mure ’ore, mai te au i te vārua tā rātou i ha’apa’o ra, mai te mea e mea maita’i taua vārua ra ’e ’aore rā e mea ’ino te reira.

27 E fa’autu’ahia ho’i te ta’ata ato’a ’o tei ha’apa’ohia e ana ra, e au ho’i teie i te mau parau nō te vārua nō te tohu ; nō reira, ’ia au te reira i te parau mau ra. ’E ’o te hope’a teie nō te pae o te matahiti nō te fa’aterera’a a te mau ha’avā.