1 I teienei, i muri a’era, ’ia hope a’era te mau ’arora’a e rave rahi tā te mau ’āti Lamana i ’aro atu i te mau ’āti Nephi nō te ha’amou ia rātou, ’ua ’ite a’era rātou ē, e mea faufa’a ’ore ’ia tītau ’ia ha’amou ia rātou, ’ua ho’i fa’ahou a’era rātou i te fenua ra nō Nephi.

2 ’E i muri a’era, ’ua riri roa a’era te mau ’āti Amaleka nō tō rātou pau rahi. ’E ’ia ’ite a’era rātou ē, ’aita roa e ti’a ia rātou ’ia tāho’o i te mau ’āti Nephi, ’ua ha’amata ihora rātou i te fa’ati’arepu i te mau ta’ata ’ia riri atu i tō rātou mau taea’e, i te mau ta’ata o Aneti-Nephi-Lehi ; nō reira ’ua ha’amata fa’ahou ihora rātou i te taparahi ia rātou.

3 I teienei, ’ua pāto’i fa’ahou teie feiā ’ia rave i tā rātou mau mauha’a tama’i, ’e ’ua vaiiho noa rātou ia rātou iho ’ia taparahihia mai te au i te hina’aro o tō rātou ra mau ’enemi.

4 I teienei, ’ia ’ite a’era Amona ’e tōna ra mau taea’e i te ’ohipa taparahira’a e ravehia ra i rotopū i te feiā i here-rahi-hia e rātou ra, ’e te feiā ho’i i here rahi mai ia rātou—’e ’ua hāmani-maita’i-hia ho’i rātou mai te mea ē, e mau melahi rātou i tonohia mai nō ’ō mai i te Atua ra nō te fa’aora ia rātou i te pohe mure ’ore—no reira, ’ia ’ite a’era Amona ’e tōna mau taea’e i taua ’ohipa taparahira’a rahi ra, ’ua tupu ihora tō rātou aroha i roto ia rātou, ’e ’ua nā ’ō atu ra rātou i te ari’i :

5 E ha’aputuputu ’āmui mai tātou i teie nei mau ta’ata o te Fatu, e haere atu tātou i raro i te fenua ra nō Zarahemela, i tō tātou ra mau taea’e i te mau ’āti Nephi, ’e ’ia ma’ue ’ē atu i te rima o tō tātou ra mau ’enemi, ’ia ’ore tātou ’ia taparahihia.

6 ’Āre’a rā ’ua parau mai ra te ari’i ia rātou : Inaha, e ha’amou te mau ’āti Nephi ia mātou, nō te mau hara ’e te taparahira’a ta’ata tā mātou i rave ia rātou ra.

7 ’E ’ua parau atu ra Amona : E haere au e ani atu i te Fatu, ’e mai te mea e parau mai ’oia ia tātou, ’a haere atu i raro i tō tātou ra mau taea’e, e haere mai ānei ’outou ?

8 ’E ’ua parau mai ra te ari’i iāna : ’Ē, mai te mea e parau mai te Fatu ia mātou ’ia haere, e haere ïa mātou i raro i tō tātou ra mau taea’e, ’e e fa’ariro mātou ia mātou ’ei tītī nā rātou ē tae noa atu ’ua fa’a’āfaro mātou i te mau ’ohipa taparahira’a ta’ata e rave rahi ’e te mau hara e rave rahi tā mātou i rave i ni’a iho ia rātou.

9 ’Āre’a rā ’ua parau atu ra Amona iāna : ’Aita teie i au i te ture a tō tātou mau taea’e, ’o tei fa’ati’ahia e tō’u ra metua tāne, ’oia ho’i, ’ia vai tītī te ta’ata i rotopū ia rātou ; nō reira, e haere tātou i raro ma te ti’aturi i te aroha o tō tātou mau taea’e.

10 ’Āre’a rā ’ua parau mai ra te ari’i iāna : ’A ani atu i te Fatu, ’e mai te mea e parau mai ’oia ia mātou ’ia haere, e haere ïa mātou, ’e ’ia ’ore ’ia nā-reira-hia, e pohe ïa mātou i te fenua nei.

11 ’E i muri a’era, ’ua haere atu ra Amona, ’e ’ua ani atu ra i te Fatu, ’e ’ua parau mai ra te Fatu iāna :

12 ’A arata’i ’ē atu i teie nei feiā i rāpae i teie nei fenua, ’ia ’ore rātou ’ia pohe ; nō te mea ’ua mau māite Sātane i te ’ā’au o te mau ’āti Amaleka, ’o tei fa’ati’arepu i te mau ’āti Lamana ’ia riri atu i tō rātou mau taea’e nō te taparahi ia rātou ; nō reira, ’a haere ’ē atu ’outou i rāpae i teie nei fenua ; e ao ho’i tō teie nei feiā i teie nei u’i, ’e nā’u ho’i rātou e fa’aora.

13 ’E i teienei, i muri a’era, ’ua ho’i mai ra Amona ’e ’ua fa’a’ite atu ra i te ari’i i te mau parau ato’a tā te Fatu i parau mai iāna ra.

14 ’E ’ua ha’aputuputu ihora rātou i tō rātou ra mau ta’ata ato’a ; ’oia ïa, te mau ta’ata ato’a o te Fatu, ’e ’ua ha’aputuputu ato’a rātou i tā rātou mau nana māmoe ato’a ’e te mau nana pua’atoro ato’a, ’e ’ua haere atu ra i rāpae i taua fenua ra, ’e ’ua tae atu ra i roto i te mēdēbara, tei fa’ata’a ’ē i te fenua ra nō Nephi i te fenua ra nō Zarahemela, ē tae roa atu ra i te mau hiti o taua fenua ra.

15 ’E i muri a’era, ’ua parau atu ra Amona ia rātou : Inaha, e haere au ’e tō’u nei mau taea’e i te fenua ra nō Zarahemela, ’e e fa’aea noa ’outou i’ō nei ē tae noa atu ’ua ho’i mai mātou ; ’e e tāmata mātou i te ’ā’au o tō mātou mau taea’e, mai te mea e fa’ati’a rātou ’ia haere mai ’outou i tō rātou ra fenua.

16 ’E i muri a’era, ’a haere atu ai Amona i taua fenua ra, ’ua fārerei atu ra ’oia ’e tōna mau taea’e ia Alama, i te vāhi i parauhia i mua a’enei ; ’e inaha, e fārereira’a ’oa’oa rahi te reira.

17 I teienei, ’ua ’ī roa ihora Amona i te ’oa’oa rahi, ’oia ïa, ’ua horomi’ihia ’oia i roto i te ’oa’oa i tōna ra Atua, ē tae noa atu ’ua pau roa tōna ra pūai ; ’e ’ua ma’iri fa’ahou ihora ’oia i raro i te repo.

18 I teienei, e ’ere ānei teie i te ’oa’oa rahi ? Inaha, ’o te ’oa’oa teie ’o tei ’ore roa i roa’a i te ta’ata nei, maori rā i te ta’ata tātarahapa mau ’e te ta’ata tītau ha’eha’a i te ’oa’oa.

19 I teienei, ’ua rahi roa tō Alama ’oa’oa i te fārereira’a i tōna ra mau taea’e, ’e mai te reira ato’a te ’oa’oa o Aarona, o Omonera, ’e o Himeni ; inaha rā ’aita tō rātou ’oa’oa i hau atu i tō rātou pūai.

20 ’E i muri a’era, ’ua arata’i mai ra Alama i tōna ra mau taea’e i te fenua ra nō Zarahemela, i tōna ihora fare. ’E ’ua haere atu ra rātou ’e ’ua fa’a’ite atu ra i te ha’avā rahi i te mau mea ato’a i tupu i ni’a ia rātou i te fenua ra nō Nephi, i rotopū i tō rātou mau taea’e, i te mau ’āti Lamana.

21 ’E i muri a’era, ’ua ha’aparare atu ra te ha’avā rahi i te hō’ē fa’auera’a i te fenua ē ’ati noa a’e, i te tītaura’a ’ia ’ite i te reo o te mau ta’ata nō te fāri’i mai i tō rātou mau taea’e, ’oia ho’i i te mau ta’ata nō Aneti-Nephi-Lehi.

22 ’E i muri a’era, ’ua tae mai ra te reo o te mau ta’ata, i te nā-’ō-ra’a mai ē : Inaha, e hōro’a atu tātou i te fenua ra nō Ieresona, i te pae i te hiti’a o te rā i te pae miti, i tū’atihia atu i te fenua ra nō ’Auhune i te pae apato’a o te fenua ra nō ’Auhune ; ’e teie fenua ra nō Ieresona ’o tā tātou ïa e hōro’a atu i tō tātou mau taea’e ’ei fenua ’āi’a nō rātou.

23 ’E inaha, e tu’u atu tātou i tō tātou mau nu’u fa’ehau i rōpū i te fenua ra nō Ieresona ’e te fenua ra nō Nephi, ’ia ti’a ia tātou ’ia pāruru i tō tātou mau taea’e i te fenua ra nō Ieresona ; e teie tā tātou e rave nō tō tātou mau taea’e, nō te mea ’ua mata’u rātou ’ia rave fa’ahou i te mau mauha’a tama’i nō te ’aro atu i tō rātou mau taea’e ’o te hara rātou ; ’e ’ua tae mai teie mata’u rahi nō tā rātou tātarahapara’a rahi i rave, nō tā rātou mau taparahira’a ta’ata ’e tā rātou mau ’ohipa ’ī’ino rahi.

24 ’E i teienei, inaha, teie tā tātou e rave nō tō tātou mau taea’e, ’ia ti’a ia rātou ’ia pārahi i te fenua ra nō Ieresona ; ’e nā tō tātou mau nu’u fa’ehau e pāruru ia rātou i tō rātou mau ’enemi, mai te mea e hōro’a mai rātou i te tahi tufa’a nō tā rātou mau tao’a nō te tauturu ia tātou ’ia ti’a ia tātou ’ia tāpe’a noa i tō tātou mau nu’u fa’ehau.

25 I teienei, i muri a’era, ’ia fa’aro’o a’era Amona i te reira, ’ua ho’i atu ra ’oia ’e ’o Alama ato’a i te mau ta’ata nō Aneti-Nephi-Lehi i roto i te mēdēbara, i te vāhi tā rātou i fa’ati’a i tō rātou mau ti’ahapa, ’e ’ua fa’a’ite atu ra ia rātou i taua mau mea ra. ’E ’ua fa’a’ite ato’a atu ra Alama ia rātou i tōna fa’afāriura’ahia mai, ’e tō Amona, ’e tō Aarona, ’e tō tōna ato’a ra mau taea’e.

26 ’E i muri a’era, ’ua tupu ihora te ’oa’oa rahi i rotopū ia rātou. ’E ’ua haere atu ra rātou i raro i te fenua ra nō Ieresona, ’e ’ua pārahi ihora i taua fenua ra nō Ieresona ; ’e ’ua parauhia rātou e te mau ’āti Nephi, te mau ta’ata o Amona ; nō reira ’ua ’itehia rātou i taua i’oa ra mai te reira atu taime.

27 ’E tei rotopū rātou i te mau ta’ata o Nephi, ’e ’ua tai’o-ato’a-hia mai rātou i rotopū i te mau ta’ata o te ’ēkālesia a te Atua. ’Ua ’itea-ato’a-hia rātou nō tō rātou itoito i tā te Atua, ’e i tā te ta’ata ho’i ; e feiā parauti’a mau ’e te ha’apa’o maita’i ho’i rātou i te mau mea ato’a ra ; ’e ’ua tāmau māite rātou i te fa’aro’o i te Mesia, ē tae noa atu i te hope’a.

28 ’E ’ua hi’o atu rātou i te ha’amani’ira’a i te toto o tō rātou mau taea’e ’ei mea au ’ore rahi ; ’e ’aita roa i ti’a ia rātou ’ia rave fa’ahou i te mau mauha’a tama’i nō te ’aro atu i tō rātou mau taea’e ; ’e ’aita roa rātou i hi’o atu i te pohe ma te hō’ē vāhi iti ri’ari’a a’e, nō te mea tē vai ra tō rātou ti’aturira’a ’e te fa’aro’o i te Mesia ’e te ti’afa’ahoura’a ; nō reira ’ua horomi’ihia te pohe nō rātou nā roto i te rē i roa’a i te Mesia ra.

29 Nō reira, e fāri’i rātou i te pohe ma te ri’ari’a rahi ’e te māuiui rahi ’o tē tu’uhia mai i ni’a ia rātou e tō rātou ra mau taea’e, nā mua rātou e rave ai i te ’o’e ’e te simetera nō te taparahi mai ia rātou.

30 ’E ’ua riro rātou ’ei feiā itoito ’e te herehia, ’e ’ei feiā ha’amaita’i-rahi-hia ho’i e te Fatu.