“18–14 ni Janueri: ‘Au na Lako ka Kitaka.’ 1 Nifai 1–5,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“8–14 ni Janueri. 1 Nifai 1–5,” Lako Mai, Mo Muri Au—Me Baleta na iTikotiko kei na Lotu: 2024 (2024)
E Lako Volekata Tiko o Liai na Wasa Damudamu, mai vei Gary Smith
8–14 ni Janueri: “Au na Lako ka Kitaka.”
1 Nifai 1–5
Na iVola i Momani e tekivu ena dua na itukutuku me baleta na veidredre dina e sotava e dua na vuvale dina. E a yaco ena 600 BNK, ia ena so na itukutuku oqo ena rogorogo tautauvata kei na veika era sotava na vuvale ena gauna nikua. Na matavuvale oqo e a bula tiko ena dua na vuravura sa tubu cake tikoga kina na ivalavala ca, ia a yalataka na Turaga vei iratou kevaka era na muri Koya, ena muataki ira ki na vanua taqomaki. Ena ilakolako oqori a tiko kina na veigauna vinaka kei na ca, era a vakila kina na veivakalougatataki kei na caka mana cecere, ia era a sotava talega e dua na iwase ni veiba kei na veileti. E vakavudua sara ena ivolanikalou na itukutuku matailalai ni dua na matavuvale e tovolea tiko me bulataka na kosipeli: era sasaga dredre tiko na itubutubu mera vakauqeta na vakabauta ena nodra matavuvale ka lomaleqataka na nodra taqomaki, era na vakatulewataka tiko na gone kevaka era na vakabauti ira na nodra itubutubu, kei ira na veitacini era sotava na vuvu kei na veileti—ka so na gauna era veivosoti vakai ira. Vakararaba, e tu na kaukauwa ena ivakaraitaki ni vakabauta ena matavuvale malumalumu oqo.
Vakasama eso ni Vuli ena iTikotiko vakakina ena Lotu
Na vosa ni Kalou sa “ka talei sara” vei au.
E dua na itukutuku kilai ena iVola i Momani o ya ni sa “ka talei sara” na vosa ni Kalou (1 Nifai 5:21). Ni o wilika na 1 Nifai 1–5, vakaraica na sala eso e vakalougatataki ratou kina na matavuvale nei Liai na vosa ni Kalou ena sala duidui eso (me ivakaraitaki, raica na 1:11–15; 3:19–20; 5:10–22). Na cava e vakavulica vei iko na veiwase oqo me baleta na vosa ni Kalou? Na cava beka o raica e vakauqeti iko mo vakasaqara na vosanikalou?
Raica talega na “Niu Qara na iVolatabu,” Serenilotu, naba 169; “Scriptures Legacy” (vidio), Gospel Library.
Au rawa ni rawata ka vaqaqacotaka na noqu ivakadinadina niu gole vua na Turaga.
E kilai o Nifai ni kaukauwa sara nona vakabauta na Turaga, ia a cakacakataka nona rawata na nona ivakadinadina—me vaka ga eda dau vakayacora taucoko. Na cava o wilika ena 1 Nifai 2 e vakaraitaka na vuna a rawa kina vei Nifai me rawata e dua na ivakadinadina ni dina na vosa nei tamana? Na cava e rau sega ni rawata kina na ivakadinadina oqo o Leimani kei Lemueli? (Raica talega na 1 Nifai 15:2–11). Na gauna cava o a vakila kina ni sa vakamalumalumutaka na yalomu na Turaga?
Raica talega na “The Lord Commands Lehi’s Family to Leave Jerusalem” (vidio), Gospel Library.
Ena vakarautaka na Kalou na sala meu vakayacora kina na Nona lewa.
Ena gauna a vakaroti iratou kina na luvei Liai na Turaga me ratou kauta mai na peleti parasa, e a sega ni solia o Koya na idusidusi matailalai e na sala me vakayacori kina na ivakaro oqo. E dau dina na ka oqo ki na ivakaro eso eda ciqoma mai vua na Kalou, ka rawa ni dau nanumi kina ni sa “rui dredre” na veika e gadreva o Koya (1 Nifai 3:5). Na cava e vakauqeti iko me baleta na veika e kaya o Nifai ena vuku ni ivakaro ni Turaga, e kune ena 1 Nifai 3:7, 15–16?
Ni o wilika na 1 Nifai 3–4, vakaraica na veimataqali dredre a sotava o Nifai. Ena sala cava a “vakarautaka rawa mada” na Turaga vei Nifai me “rawata kina na ka sa [vakarota]”? Na cava e bibi kina vei iko mo kila na ka e cakava na Turaga vei Nifai?
E dua na sala qaqa sa vakarautaki keda kina na Kalou meda muria na Nona ivakaro sai koya na nona talai Jisu Karisito me mai noda iVakabula. Sa rawa mo wilika na itukutuku nei Peresitedi Dallin H. Oaks “Na Cava sa Cakava na Noda iVakabula ena Vukuda?” (Liaona, Me 2021, 75–77). Sa vakarautaka vakacava o Jisu Karisito e dua na sala vei keda yadua? Na nomu kila ni sa uabaleta na ka kecega vei iko, na cava o vakauqeti kina mo “lako ka kitaka”?
Raica talega na “Nephi Is Led by the Spirit to Obtain the Plates of Brass” (vidio), Gospel Library; Gospel Topics, “Obedience,” Gospel Library.
Vakayagataka na italanoa kei na ivakaraitaki me vakavulici kina na ivakavuvuli ni kosipeli. Ni o vakavakarau mo veivakavulici, vakasamataka na veika o sa sotava ka rawa ni vakuria e dua tale na ivakadinadina ki na itukutuku ena ivolanikalou. Me ivakaraitaki, na gauna cava sa bau vakarautaka kina na Turaga e dua na sala mo cakava kina na Lomana?
Rau sa Vakasinaiti ena Reki, mai vei Walter Rane
Niu vakananuma na cakacaka ni Kalou ena rawa ni solia vei au na vakabauta meu talairawarawa ki na Nona ivakaro.
Ena gauna rau dau via vosa kudrukudru se veileti kina o Leimani kei Lemueli, e dau tiko voleka o Nifai kei Liai me rau veivakauqeti ka vunauci rau. Ni ko sa via vosa kudrukudru, e rawa ni veivuke mo wilika na vosa i Nifai kei Liai. Erau tovolea vakacava o Nifai kei Liai me rau vukea eso mera tara cake nodra vakabauta na Kalou? (raica na 1 Nifai 4:1–3; 5:1–8; raica talega na 1 Nifai 7:6–21). Na cava o vulica ka na rawa ni vukei iko ena gauna tale o temaki kina mo vosa kudrukudru se veileti?
“Sa liutaki au tiko na Yalotabu.”
Ena 1 Nifai 4:5–18, na cava e vakauqeti iko me baleta nona rawata o Nifai me kila ka muria na Yalotabu? Sa rawa mo vulica na itukutuku nei Peresitedi Russell M. Nelson “iVakatakila ki na Lotu, iVakatakila ki na Noda Bula” (Liaona, Me 2018, 93–96) mo vulica vakalevu na veika baleta na ciqomi ni ivakatakila mai vua na Turaga.
Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.
Vakatutu baleta Nodra Tuberi na Gonelalai
E rawa ni dua na noqu ivakadinadina vakataki au.
-
A kila vakacava o Nifai ni dina na veika a vakavulica o tamana? Vukei ira na luvemu me ra kunea na isau ni taro e tiko ena 1 Nifai 2:16, 19. Era na marautaka talega me ra vola na veika e cakava o Nifai ena buloko se iyaya tale eso ka qai tara e dua na ka ena iyaya oqo. Oqo ena rawa ni veimuataki ki na dua na veivosaki ena sala e vukei keda kina na ivalavala oqo meda tara cake e dua na ivakadinadina.
-
E rawa ni o vakaraitaka vei ira na luvemu na iyaloyalo se iyaya eso e matataka na veika era rawa ni vakasaqara e dua na kena ivakadinadina, me vaka e dua na ilavelave ni iVola i Momani se dua na iyaloyalo kei Jisu Karisito, dua na valetabu, se na parofita bula. Sureti ira me ra digia e dua ka wasea na nodra ivakadinadina me baleta na ka oqori. E rawa talega ni o tukuna vei ira na luvemu na sala o a rawata kina na nomu ivakadinadina. Na cava na vuna eda gadreva kina na noda dui ivakadinadina?
Ena vukei au na Kalou meu muria Nona ivunau.
-
Sa rawa mo vakayagataka e dua se sivia na ivurevure oqo me vukei ira na luvemu me ra veivosakitaka na sala a vukei Nifai kina na Kalou me kauta mai na peleti parasa: 1 Nifai 3–4; tabana ni itaviqaravi ni macawa oqo; “Nephi’s Courage” (Nodra Sere na Lalai, 120–21); kei na “Chapter 4: The Brass Plates” (ena Book of Mormon Stories, 8–12).
-
Dou na rawa ni marautaka kei ira na luvemu na dramataka na 1 Nifai 3:2–7. E rawa ni o vakatakarakarataka me o Liai ka kerei ira na luvemu me ra lesu tale ki Jerusalemi me ra laki kauta mai na peleti parasa. Sureti ira me ra sauma ena nodra vosa ga vakataki ira me vaka ni o ira o Leimani kei Lemueli se Nifai. Na cava eso na ka e vakarota vei keda na Tamada Vakalomalagi me da cakava? (raica na yaloyalo 103–15 ena Gospel Art Book se Mosaia 18:8–10 me baleta na vakasama eso). Eda na rawa vakacava ni vakataki Nifai?
E dua na iyau levu na ivolanikalou.
-
A bibi sara na ivolanikalou ki na matavuvale nei Liai. Me kena ivakaraitaki, sureti ira na gone me ra vukei iko mo tukuna se matanataka na veika eratou a cakava o Nifai kei iratou na tuakana me ratou kauta mai kina na peleti parasa: eratou a lakova e dua na vanua balavu, solia nodratou koula kei na siliva, ka vuni ena dua na qara me ratou bula. Mo qai wilika na 1 Nifai 5:21 ka veivosakitaka na vuna sa rui yaga sara kina vakalevu na ivolanikalou ki na matavuvale nei Liai. Cava na vuna era sa rui bibi kina vei keda? Ena sala cava meda na mareqeta kina na ivolanikalou ni sa iyau talei?
Eratou vakila na kena yaga vakalevu na ivolanikalou o Nifai kei na nona vuvale.
Ena tuberi au na Yalo Tabu niu segata meu cakava na loma ni Turaga.
-
Ni oti na nodratou railesuva vata ena 1 Nifai 3 na sala eratou a tovolea kina o Nifai kei iratou na tuakana me ratou kauta mai na peleti parasa, wilika vata kei ira na luvemu na 1 Nifai 4:6 me raici kina na ka a cakava o Nifai ka yaco kina vua me rawata. Me ra qai cakava na luvemuni e dua na lisi ni veika e vinakata na Kalou me ra cakava. E rawa ni vukei keda vakacava na Yalo Tabu ena ituvaki vakaoqo?
Me baleta na vakasama tale eso, raica na ilavelave ni mekasini ni vula oqo ena iTokani .
Au Talairawarawa ki na Domo ni Yalotabu, mai vei Walter Rane