“ວັນທີ 15–21 ເດືອນມັງກອນ: ‘ໄດ້ຮັບສ່ວນໝາກໄມ້.’ 1 ນີໄຟ 6–10,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 15–21 ເດືອນມັງກອນ. 1 ນີໄຟ 6–10,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
Lehi’s Dream [ຄວາມຝັນຂອງລີໄຮ], ໂດຍ ສະຕີບເວັນ ຫລອຍ ນຽວ
ວັນທີ 15–21 ເດືອນມັງກອນ: “ໄດ້ຮັບສ່ວນໝາກໄມ້”
1 ນີໄຟ 6–10
ຄວາມຝັນຂອງລີໄຮ—ພ້ອມທັງຮາວເຫລັກ, ໝອກແຫ່ງຄວາມມືດ, ອາຄານໃຫຍ່ ແລະ ກວ້າງຂວາງ, ແລະ ຕົ້ນໄມ້ກັບໝາກທີ່ “ຫວານທີ່ສຸດ”—ເປັນການເຊື້ອເຊີນທີ່ດົນໃຈ ໃຫ້ຮັບເອົາພອນແຫ່ງຄວາມຮັກ ແລະ ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ. ເຖິງຢ່າງໃດກໍຕາມ, ສຳລັບລີໄຮແລ້ວ ພາບນິມິດນີ້ແມ່ນກ່ຽວກັບຄອບຄົວຂອງເພິ່ນນຳອີກ: “ເພາະສິ່ງທີ່ພໍ່ເຫັນ, ພໍ່ຈຶ່ງມີເຫດຜົນທີ່ຈະປິຕິຍິນດີໃນພຣະຜູ້ເປັນເຈົ້າ ຍ້ອນນີໄຟ ແລະ ແຊມນຳອີກ. … ແຕ່ ຈົ່ງເບິ່ງ, ຍ້ອນພວກເຈົ້າ, ເລມັນ ແລະ ເລມູເອນ, ພໍ່ຈຶ່ງຢ້ານກົວຢ່າງຍິ່ງ” (1 ນີໄຟ 8:3–4). ເມື່ອລີໄຮໄດ້ເລົ່າພາບນິມິດຂອງເພິ່ນຈົບແລ້ວ, ເພິ່ນໄດ້ຂໍໃຫ້ເລມັນກັບເລມູເອນ “ເຊື່ອຟັງຄຳຂອງເພິ່ນ, ເພື່ອພຣະຜູ້ເປັນເຈົ້າອາດຈະເມດຕາ ແລະ ບໍ່ປະຖິ້ມພວກເຂົາ” (1 ນີໄຟ 8:37). ເຖິງແມ່ນຖ້າຫາກທ່ານໄດ້ສຶກສາພາບນິມິດຂອງລີໄຮຫລາຍເທື່ອແລ້ວກໍຕາມ, ແຕ່ເທື່ອນີ້ ໃຫ້ຄິດຄືກັນກັບທີ່ລີໄຮໄດ້ຄິດ—ຄິດເຖິງບາງຄົນທີ່ທ່ານຮັກ. ເມື່ອທ່ານເຮັດເຊັ່ນນັ້ນ, ຄວາມໝັ້ນຄົງຂອງຮາວເຫລັກ, ສິ່ງອັນຕະລາຍຂອງອາຄານໃຫຍ່ ແລະ ກວ້າງຂວາງ, ແລະ ຄວາມຫວານຂອງໝາກໄມ້ ຈະມີຄວາມໝາຍໃໝ່. ແລະ ທ່ານຈະເຂົ້າໃຈຢ່າງເລິກເຊິ່ງຫລາຍຂຶ້ນ ເຖິງ “ຄວາມຮູ້ສຶກທັງໝົດຂອງບິດາທີ່ປານີ” ຜູ້ໄດ້ຮັບພາບນິມິດທີ່ແປກປະຫລາດນັ້ນ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ເຮົາສາມາດໃຫ້ອະໄພຜູ້ອື່ນໄດ້.
ແມ່ນຫຍັງທີ່ປະທັບໃຈທ່ານກ່ຽວກັບຕົວຢ່າງຂອງນີໄຟຢູ່ໃນ 1 ນີໄຟ 7:6–21? ເຮົາໄດ້ຮັບພອນແນວໃດ ເມື່ອເຮົາ “ຍົກໂທດໃຫ້ [ກັນແລະກັນ] ຢ່າງເຕັມໃຈ”? ວິດີໂອ “The Lord Delivers Nephi from His Rebellious Brothers” (ຫ້ອງສະໝຸດພຣະກິດຕິຄຸນ) ສາມາດເປັນປະໂຫຍດຕໍ່ການສຶກສາຂອງທ່ານໄດ້.
The Lord Delivers Nephi from His Rebellious Brothers | 1 Nephi 7:6–22
1 Nephi 7:6–22 | Laman and Lemuel rebel against Nephi and bind him with cords. Nephi is miraculously saved and the brothers reunite.
ການຈັບພຣະຄຳຂອງພຣະເຈົ້າໄວ້ໃຫ້ແໜ້ນ ນຳພາເຮົາໄປຫາພຣະຜູ້ຊ່ວຍໃຫ້ລອດ ແລະ ຊ່ວຍໃຫ້ເຮົາຮູ້ສຶກເຖິງຄວາມຮັກຂອງພຣະອົງ.
ພາບນິມິດຂອງລີໄຮສະເໜີຄຳເຊື້ອເຊີນໃຫ້ຄຳນຶງວ່າ ທ່ານຢູ່ໃສໃນການເດີນທາງສ່ວນຕົວຂອງທ່ານ ເພື່ອທີ່ຈະກາຍເປັນເໝືອນດັ່ງພຣະຄຣິດ. ປະທານບອຍ ເຄ ແພ໊ກເກີ ໄດ້ກ່າວວ່າ: “ທ່ານຢູ່ໃນນັ້ນ; ເຮົາທຸກຄົນຢູ່ໃນນັ້ນ. ຄວາມຝັນ ຫລື ພາບນິມິດຂອງລີໄຮ ກ່ຽວກັບຮາວເຫລັກ ມີທຸກສິ່ງໃນນັ້ນ … ໄພ່ພົນຍຸກສຸດທ້າຍຕ້ອງເຂົ້າໃຈການທົດສອບຂອງຊີວິດ” (“Lehi’s Dream and You,” New Era, Jan. 2015, 2).
ຂະນະທີ່ທ່ານສຶກສາ, ໃຫ້ຄິດທີ່ຈະບັນທຶກມັນໄວ້ຢູ່ໃນຕາຕະລາງ ທີ່ຄືກັນກັບອັນນີ້.
|
ເຄື່ອງໝາຍຈາກພາບນິມິດຂອງລີໄຮ |
ຄວາມໝາຍ |
ຄຳຖາມໃຫ້ໄຕ່ຕອງ |
|---|---|---|
ເຄື່ອງໝາຍຈາກພາບນິມິດຂອງລີໄຮ ຕົ້ນໄມ້ ແລະ ໝາກຂອງມັນ (1 ນີໄຟ 8:10–12) | ຄວາມໝາຍ | ຄຳຖາມໃຫ້ໄຕ່ຕອງ ເຮົາກຳລັງເຮັດຫຍັງ ເພື່ອເຊື້ອເຊີນຄົນອື່ນໃຫ້ມາຮັບເອົາຄວາມຮັກຂອງພຣະເຈົ້າ? |
ເຄື່ອງໝາຍຈາກພາບນິມິດຂອງລີໄຮ ແມ່ນ້ຳ (1 ນີໄຟ 8:13) | ຄວາມໝາຍ | ຄຳຖາມໃຫ້ໄຕ່ຕອງ |
ເຄື່ອງໝາຍຈາກພາບນິມິດຂອງລີໄຮ ຮາວເຫລັກ (1 ນີໄຟ 8:19–20, 30) | ຄວາມໝາຍ | ຄຳຖາມໃຫ້ໄຕ່ຕອງ |
ເຄື່ອງໝາຍຈາກພາບນິມິດຂອງລີໄຮ ໝອກແຫ່ງຄວາມມືດ (1 ນີໄຟ 8:23) | ຄວາມໝາຍ | ຄຳຖາມໃຫ້ໄຕ່ຕອງ |
ເຄື່ອງໝາຍຈາກພາບນິມິດຂອງລີໄຮ ອາຄານໃຫຍ່ ແລະ ກວ້າງຂວາງ (1 ນີໄຟ 8:26–27, 33) | ຄວາມໝາຍ | ຄຳຖາມໃຫ້ໄຕ່ຕອງ |
ທ່ານຍັງສາມາດຄົ້ນຫາຂໍ້ພຣະຄຳພີດັ່ງຕໍ່ໄປນີ້ ເພື່ອຮຽນຮູ້ກ່ຽວກັບຄົນສີ່ກຸ່ມທີ່ລີໄຮໄດ້ເຫັນ: 1 ນີໄຟ 8:21–23, 24–28, 30, ແລະ 31–33. ທ່ານສັງເກດເຫັນຄວາມແຕກຕ່າງຫຍັງແດ່ລະຫວ່າງກຸ່ມເຫລົ່ານີ້? ເປັນຫຍັງບາງຄົນຈຶ່ງໜີໄປຫລັງຈາກທີ່ໄປຮອດຕົ້ນໄມ້ ແລະ ໄດ້ຊີມໝາກໄມ້ແລ້ວ (ເບິ່ງ ຂໍ້ທີ 24–28)? ທ່ານຮຽນຮູ້ຫຍັງແດ່ຈາກປະສົບການນີ້?
ເບິ່ງ Kevin W. Pearson, “Stay by the Tree,” Liahona, May 2015, 114–16; “Lehi Sees a Vision of the Tree of Life” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ສຳລັບປະສົບການທີ່ຕອບໂຕ້ ເພື່ອຊ່ວຍທ່ານຮຽນຮູ້ກ່ຽວກັບພາບນິມິດຂອງລີໄຮ, ກົດບ່ອນນີ້.
Lehi Sees a Vision of the Tree of Life | 1 Nephi 8
1 Nephi 8 | Lehi has a vision filled with symbolism. Central to his vision is the tree of life and the eating of its fruit.
ໃຫ້ຜູ້ຮຽນແບ່ງປັນການຄົ້ນພົບຂອງຕົນເອງ. ໃຫ້ຄິດທີ່ຈະເຊື້ອເຊີນຜູ້ຮຽນໃຫ້ຄົ້ນຫາຂໍ້ພຣະຄຳພີດ້ວຍຕົນເອງ ເພື່ອຊອກຫາຄວາມຈິງທີ່ເຂົາເຈົ້າພົບ. ຍົກຕົວຢ່າງ, ທ່ານສາມາດເຊື້ອເຊີນໃຫ້ເຂົາເຈົ້າຄົ້ນຫາການອ້າງອີງຈາກພຣະຄຳພີ ໃນຕາຕະລາງທີ່ຢູ່ຂ້າງເທິງດ້ວຍຕົວເຂົາເຈົ້າເອງ ຫລື ເປັນກຸ່ມນ້ອຍໆ. ເຂົາເຈົ້າຈະຈົດຈຳ ແລະ ທະນຸຖະໜອມຄວາມຈິງທີ່ເຂົາເຈົ້າໄດ້ຄົ້ນພົບ.
Common Thread [ລັກສະນະທົ່ວໄປ], ໂດຍ ແຄວຊີ ແລະ ແຈຊີ ແບແຣັດ
ສາດສະດາໃນສະໄໝບູຮານຮູ້ເຖິງພາລະກິດຂອງພຣະເຢຊູຄຣິດ ແລະ ໄດ້ເປັນພະຍານເຖິງພຣະອົງ.
ທ່ານຄິດວ່າເປັນຫຍັງພຣະຜູ້ເປັນເຈົ້າຈຶ່ງຢາກໃຫ້ຄອບຄົວຂອງລີໄຮ—ແລະ ເຮົາທຸກຄົນ—ຮູ້ຈັກຄວາມຈິງທີ່ພົບເຫັນຢູ່ໃນ 1 ນີໄຟ 10:2–16? ໃຫ້ພິຈາລະນາວ່າ ທ່ານຈະສາມາດຊ່ວຍໃຫ້ຄົນທີ່ທ່ານຮັກເຊື້ອເຊີນພຣະຜູ້ຊ່ວຍໃຫ້ລອດໃຫ້ເຂົ້າມາໃນຊີວິດຂອງເຂົາເຈົ້າແນວໃດ.
ພຣະເຈົ້າຈະເປີດເຜີຍຄວາມຈິງຕໍ່ເຮົາ ໂດຍອຳນາດແຫ່ງພຣະວິນຍານບໍລິສຸດ.
ທ່ານຈະຕອບຮັບແນວໃດ ເມື່ອທ່ານຖືກຂໍໃຫ້ດຳລົງຊີວິດຕາມຫລັກທຳພຣະກິດຕິຄຸນ ທີ່ທ່ານບໍ່ເຂົ້າໃຈ? ໃນຂໍ້ພຣະຄຳພີດັ່ງຕໍ່ໄປນີ້, ໃຫ້ສັງເກດເບິ່ງຄວາມແຕກຕ່າງລະຫວ່າງການຕອບຮັບຂອງນີໄຟຕໍ່ພາບນິມິດຂອງລີໄຮ (ເບິ່ງ 1 ນີໄຟ 10:17–19; 11:1) ແລະ ການຕອບຮັບຂອງເລມັນກັບເລມູເອນ (ເບິ່ງ 1 ນີໄຟ 15:1–10). ຄວາມຈິງຢ່າງໃດແດ່ທີ່ນີໄຟເຂົ້າໃຈ ທີ່ໄດ້ນຳພາເພິ່ນໃຫ້ຕອບເຊັ່ນນັ້ນ?
ໂດຍມີຕົວຢ່າງຂອງນີໄຟໃນໃຈ, ໃຫ້ເຮັດລາຍການຫລັກທຳພຣະກິດຕິຄຸນທີ່ທ່ານຢາກເຂົ້າໃຈຫລາຍຂຶ້ນ. ທ່ານສາມາດເຮັດຫຍັງໄດ້ແດ່ ເພື່ອຊອກຫາຄຳຕອບໃຫ້ກັບຕົນເອງ? (ເບິ່ງ “ຄວາມຈິງຈະເຮັດໃຫ້ເຈົ້າເປັນອິດສະລະ” ໃນ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 30–33 ນຳອີກ.)
ດັ່ງທີ່ນີໄຟໄດ້ຄົ້ນພົບດ້ວຍຕົວຂອງເພິ່ນເອງວ່າ ຄຳເວົ້າຂອງບິດາຂອງເພິ່ນນັ້ນເປັນຄວາມຈິງ, ເຮົາກໍສາມາດເຮັດຢ່າງດຽວກັນ ເມື່ອເຮົາໄດ້ຍິນຖ້ອຍຄຳຂອງບັນດາສາດສະດາ ແລະ ອັກຄະສາວົກສະໄໝໃໝ່. ບັນດາສາດສະດາ ແລະ ອັກຄະສາວົກໄດ້ສິດສອນຫຍັງແດ່ໃຫ້ແກ່ເຮົາໃນກອງປະຊຸມໃຫຍ່ສາມັນຄັ້ງລ່າສຸດນີ້? ທ່ານໄດ້ຮັບປະຈັກພະຍານສ່ວນຕົວເຖິງສິ່ງທີ່ພວກເພິ່ນໄດ້ສິດສອນແນວໃດ?
ເບິ່ງ 1 ນີໄຟ 2:11–19; ຄຳສອນ ແລະ ພັນທະສັນຍາ 8:1–3; “ອະທິຖານຄອບຄົວ,” ເພງສວດ ແລະ ເພງຂອງເດັກນ້ອຍ, 73; Gospel Topics, “Revelation,” ຫ້ອງສະໝຸດພຣະກິດຕິຄຸນ ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ການຈັບພຣະຄຳຂອງພຣະເຈົ້າໃຫ້ແໜ້ນ ນຳພາເຮົາໄປຫາພຣະອົງ ແລະ ຊ່ວຍເຮົາໃຫ້ຮູ້ສຶກເຖິງຄວາມຮັກຂອງພຣະອົງ.
-
ລູກໆຂອງທ່ານອາດມັກແຕ້ມຮູບພາບນິມິດຂອງລີໄຮ ຂະນະທີ່ພວກທ່ານອ່ານ 1 ນີໄຟ 8 ນຳກັນ. ໃຫ້ພວກເຂົາແບ່ງປັນຮູບພາບຂອງພວກເຂົາ, ແລະ ຊ່ວຍໃຫ້ພວກເຂົາຄົ້ນພົບວ່າສັນຍາລັກຕ່າງໆໃນຄວາມຝັນນັ້ນເປັນຕົວແທນໃຫ້ສິ່ງໃດ (ເບິ່ງ 1 ນີໄຟ 11:21–22; 12:16–18; 15:23–33, 36 ແລະ ໜ້າກິດຈະກຳຂອງອາທິດນີ້). ຂໍໃຫ້ພວກເຂົາແບ່ງປັນຄຳຕອບໃຫ້ຫລາຍທີ່ສຸດເທົ່າທີ່ພວກເຂົາຈະເຮັດໄດ້ຕໍ່ຄຳຖາມນີ້: ເຮົາໄດ້ຮຽນຮູ້ຫຍັງແດ່ຈາກພາບນິມິດຂອງລີໄຮ?
-
ທ່ານມີບາງຢ່າງທີ່ສາມາດເປັນຕົວແທນໃຫ້ແກ່ຮາວເຫລັກໃນພາບນິມິດຂອງລີໄຮເຊັ່ນ ທໍ່ ຫລື ກິ່ງໄມ້ບໍ່? ໃຫ້ລູກໆຂອງທ່ານຈັບມັນໃຫ້ແໜ້ນ ຂະນະທີ່ທ່ານພາພວກເຂົາຍ່າງອ້ອມຫ້ອງໄປຫາຮູບຂອງພຣະຜູ້ຊ່ວຍໃຫ້ລອດ. ເປັນຫຍັງຮາວເຫລັກຈຶ່ງສຳຄັນໃນພາບນິມິດຂອງລີໄຮ? (ເບິ່ງ 1 ນີໄຟ 8:20, 24, 30). ຮາວເຫລັກເປັນເໝືອນດັ່ງພຣະຄຳຂອງພຣະເຈົ້າແນວໃດ?
-
ເຊື້ອເຊີນລູກໆຂອງທ່ານບາງຄົນໃຫ້ອ່ານ 1 ນີໄຟ 8:10–12 ແລະ ອະທິບາຍສິ່ງທີ່ລີໄຮໄດ້ເຫັນ. ຂໍໃຫ້ຄົນອື່ນທີ່ເຫລືອອ່ານ 1 ນີໄຟ 11:20–23 ແລະ ອະທິບາຍສິ່ງທີ່ນີໄຟໄດ້ເຫັນ. ເປັນຫຍັງທູດສະຫວັນຈຶ່ງສະແດງໃຫ້ນີໄຟເຫັນກຸມມານນ້ອຍເຢຊູເພື່ອສິດສອນເພິ່ນກ່ຽວກັບຄວາມຮັກຂອງພຣະເຈົ້າ? ເວົ້າລົມກັບລູກໆຂອງທ່ານກ່ຽວກັບວ່າ ພວກເຂົາເຄີຍຮູ້ສຶກເຖິງຄວາມຮັກຂອງພຣະເຈົ້າໃນຊີວິດຂອງພວກເຂົາແນວໃດ? ເພງເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດຊ່ວຍໃຫ້ພວກເຂົາຄິດອອກເຖິງຕົວຢ່າງໄດ້.
ພຣະເຈົ້າຈະເປີດເຜີຍຄວາມຈິງຕໍ່ເຮົາ ໂດຍອຳນາດແຫ່ງພຣະວິນຍານບໍລິສຸດ.
-
ທ່ານຈະສາມາດຊ່ວຍລູກໆຂອງທ່ານໃຫ້ເຂົ້້າໃຈສິ່ງທີ່ນີໄຟໄດ້ສິດສອນໃນ 1 ນີໄຟ 10:19 ແນວໃດ? ບາງທີທ່ານອາດສາມາດສອດຮູບຂອງພຣະຜູ້ຊ່ວຍໃຫ້ລອດ ຫລື ວັດຖຸທີ່ພິເສດຢ່າງໜຶ່ງໄວ້ໃນຫລືບຜ້າຫົ່ມ ແລະ ເຊື້ອເຊີນໃຫ້ລູກໆຂອງທ່ານເປີດມັນອອກ. ຂະນະທີ່ທ່ານອ່ານ 1 ນີໄຟ 10:19, ພວກເຂົາສາມາດຍົກມືຂຶ້ນເມື່ອພວກເຂົາໄດ້ຍິນຄຳວ່າ “ຖືກເປີດອອກ” ແລະ “ພຣະວິນຍານບໍລິສຸດ.” ແລ້ວພວກທ່ານກໍສາມາດແບ່ງປັນປະສົບການຕອນທີ່ພຣະວິນຍານບໍລິສຸດໄດ້ຊ່ວຍໃຫ້ພວກທ່ານຄົ້ນພົບຄວາມຈິງ.
-
ຂໍໃຫ້ລູກໆຂອງທ່ານບອກກ່ຽວກັບສິ່ງທີ່ພວກເຂົາເຮັດເມື່ອພວກເຂົາພົບຄຳຕອບໃຫ້ກັບຄຳຖາມໜຶ່ງ. ນີໄຟອາດເວົ້າວ່າແນວໃດ ຖ້າຫາມີຄົນຖາມເພິ່ນກ່ຽວກັບວິທີຊອກຫາຄຳຕອບໃຫ້ກັບຄຳຖາມກ່ຽວກັບພຣະກິດຕິຄຸນ? ຊຸກຍູ້ໃຫ້ລູກໆຂອງທ່ານຊອກຫາຄຳຕອບໂດຍການອ່ານ 1 ນີໄຟ 10:17–19; 11:1.
-
ລູກໆຂອງທ່ານເຄີຍຮູ້ສຶກວ່າ ພຣະວິນຍານບໍລິສຸດໄດ້ຊ່ວຍໃຫ້ພວກເຂົາຮູ້ບາງຢ່າງທີ່ເປັນຄວາມຈິງຫລືບໍ່? ໃຫ້ພວກເຂົາແບ່ງປັນປະສົບການຂອງພວກເຂົາ. ເຮົາຈະເວົ້າວ່າແນວໃດຕໍ່ໝູ່ຄົນໜຶ່ງທີ່ຄິດວ່າລາວບໍ່ສາມາດໄດ້ຮັບຄຳຕອບຜ່ານທາງພຣະວິນຍານບໍລິສຸດ? ເຮົາພົບຫຍັງແດ່ຢູ່ໃນ 1 ນີໄຟ 10:17–19 ແລະ 11:1 ທີ່ສາມາດຊ່ວຍໝູ່ຄົນນັ້ນໄດ້?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
The Tree of Life [ຕົ້ນໄມ້ແຫ່ງຊີວິດ], ໂດຍ ເອວອນ ໂອກສັນ