“ວັນທີ 22–28 ເດືອນມັງກອນ: ‘ມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າ.’ 1 ນີໄຟ 11–15,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)
“ວັນທີ 22–28 ເດືອນມັງກອນ. 1 ນີໄຟ 11–15,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)
The Love of God [ຄວາມຮັກຂອງພຣະເຈົ້າ], ໂດຍ ຊາບຣິນາ ສະກວາຍສ໌
ວັນທີ 22–28 ເດືອນມັງກອນ: “ມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າ”
1 ນີໄຟ 11–15
ເມື່ອພຣະເຈົ້າມີວຽກງານທີ່ສຳຄັນໃຫ້ສາດສະດາຂອງພຣະອົງເຮັດ, ພຣະອົງມັກຈະມອບພາບນິມິດທີ່ສຳຄັນໃຫ້ສາດສະດາຄົນນັ້ນ. ໂມເຊ, ໂຢຮັນ, ລີໄຮ, ແລະ ໂຈເຊັບ ສະມິດ ທຸກຄົນໄດ້ເຫັນພາບນິມິດແບບນັ້ນ—ພາບນິມິດທີ່ໄດ້ຂະຫຍາຍຄວາມຄິດຂອງພວກເພິ່ນ ແລະ ໄດ້ຊ່ວຍພວກເພິ່ນໃຫ້ເຫັນວ່າວຽກງານຂອງພຣະເຈົ້ານັ້ນແມ່ນຍິ່ງໃຫຍ່ ແລະ ໜ້າດົນໃຈຂະໜາດໃດ.
ນີໄຟກໍໄດ້ເຫັນພາບໜຶ່ງໃນຈຳນວນພາບນິມິດທີ່ປ່ຽນແປງຊີວິດເຫລົ່ານີ້. ເພິ່ນໄດ້ເຫັນການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດ, ໄດ້ເຫັນລູກຫລານຂອງລີໄຮໃນອະນາຄົດ ຢູ່ໃນແຜ່ນດິນແຫ່ງຄຳສັນຍາ, ແລະ ໄດ້ເຫັນຈຸດໝາຍປາຍທາງຍຸກສຸດທ້າຍຂອງວຽກງານຂອງພຣະເຈົ້າ. ຫລັງຈາກພາບນິມິດນີ້, ນີໄຟກໍໄດ້ກຽມພ້ອມຫລາຍຂຶ້ນສຳລັບວຽກງານທີ່ຢູ່ຂ້າງໜ້າ. ແລະ ການອ່ານກ່ຽວກັບພາບນິມິດນີ້ສາມາດຊ່ວຍກະກຽມທ່ານຄືກັນ—ເພາະພຣະເຈົ້າກໍມີວຽກງານໃຫ້ທ່ານເຮັດຢູ່ໃນອານາຈັກຂອງພຣະອົງເຊັ່ນກັນ. ທ່ານເປັນຜູ້ໜຶ່ງໃນບັນດາ “ໄພ່ພົນຂອງສາດສະໜາຈັກຂອງພຣະເມສານ້ອຍ” ທີ່ນີໄຟໄດ້ເຫັນ, “ຊຶ່ງກະຈັດກະຈາຍໄປຕາມຜືນແຜ່ນດິນໂລກ; ແລະ ພວກເຂົາມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່” (1 ນີໄຟ 14:14).
ເບິ່ງ “Nephi Sees a Vision of Future Events” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະເຈົ້າໄດ້ສົ່ງພຣະເຢຊູຄຣິດມາ ເພື່ອສະແດງໃຫ້ເຫັນເຖິງຄວາມຮັກຂອງພຣະອົງ.
ເມື່ອນີໄຟໄດ້ທູນຖາມທູດກ່ຽວກັບຄວາມໝາຍຂອງຕົ້ນໄມ້ທີ່ຢູ່ໃນພາບນິມິດຂອງລີໄຮ, ທູດອົງນັ້ນສາມາດກ່າວພຽງແຕ່ວ່າ, “ມັນເປັນຕົວແທນໃຫ້ແກ່ຄວາມຮັກຂອງພຣະເຈົ້າ” ກໍໄດ້. ແຕ່, ທູດອົງນັ້ນໄດ້ສະແດງໃຫ້ນີໄຟເຫັນລຳດັບຂອງສັນຍາລັກ ແລະ ເຫດການຕ່າງໆຈາກພຣະຊົນຊີບຂອງພຣະຜູ້ຊ່ວຍໃຫ້ລອດ. ໃຫ້ຊອກຫາສັນຍາລັກເຫລົ່ານີ້ ຂະນະທີ່ທ່ານອ່ານ ແລະ ໄຕ່ຕອງ 1 ນີໄຟ 11. ທ່ານພົບເຫັນຫຍັງແດ່ທີ່ຊ່ວຍໃຫ້ທ່ານເຂົ້າໃຈວ່າ ເປັນຫຍັງພຣະເຢຊູຄຣິດ ຈຶ່ງເປັນການສະແດງອັນສຸດຍອດເຖິງຄວາມຮັກຂອງພຣະເຈົ້າ?
ທ່ານອາດພິຈາລະນາທີ່ຈະເບິ່ງວິດີໂອພຣະຄຣິສຕະທຳຄຳພີຢູ່ໃນຫ້ອງສະໝຸດພຣະກິດຕິຄຸນທີ່ກົງກັບເຫດການທີ່ນີໄຟໄດ້ເຫັນ. ພຣະຜູ້ຊ່ວຍໃຫ້ລອດໄດ້ຊ່ວຍໃຫ້ທ່ານຮູ້ສຶກເຖິງຄວາມຮັກຂອງພຣະບິດາເທິງສະຫວັນຂອງທ່ານແນວໃດ?
ເບິ່ງ Susan H. Porter, “God’s Love: The Most Joyous to the Soul,” Liahona, Nov. 2021, 33–35 ນຳອີກ.
ເຮົາສາມາດ “ມີອາວຸດຄືຄວາມຊອບທຳ” ແລະ ອຳນາດ.
ນີໄຟຈະບໍ່ມີຊີວິດຢູ່ຈົນເຫັນຫລາຍສິ່ງທີ່ເພິ່ນໄດ້ເຫັນຢູ່ໃນພາບນິມິດຂອງເພິ່ນເກີດເປັນຈິງ. ທ່ານຄິດວ່າເປັນຫຍັງມັນຈຶ່ງສຳຄັນຕໍ່ນີໄຟທີ່ຈະຮູ້ກ່ຽວກັບສິ່ງເຫລົ່ານີ້? ເປັນຫຍັງມັນຈຶ່ງສຳຄັນຕໍ່ທ່ານທີ່ຈະຮູ້ສິ່ງເຫລົ່ານີ້? ຖາມຄຳຖາມເຫລົ່ານີ້ທຸກໆເທື່ອ ທີ່ທ່ານອ່ານກ່ຽວກັບບາງສິ່ງທີ່ນີໄຟໄດ້ເຫັນ ຢູ່ໃນພາບນິມິດຂອງເພິ່ນ (ເບິ່ງ 1 ນີໄຟ 12–14). ທ່ານໄດ້ຮັບການປະທັບໃຈຢ່າງໃດແດ່ກ່ຽວກັບບົດບາດຂອງທ່ານຢູ່ໃນ “ວຽກງານອັນຍິ່ງໃຫຍ່ ແລະ … ໜ້າອັດສະຈັນໃຈ” ຂອງພຣະຜູ້ເປັນເຈົ້າ? (1 ນີໄຟ 14:7). ມີສິ່ງທີ່ຍິ່ງໃຫຍ່ ແລະ ໜ້າອັດສະຈັນໃຈໃດແດ່ ທີ່ພຣະອົງໄດ້ກະທຳເພື່ອທ່ານ?
ໃຫ້ພິຈາລະນາໂດຍສະເພາະຄຳສັນຍາທີ່ຢູ່ໃນ 1 ນີໄຟ 14:14. ພຣະຜູ້ຊ່ວຍໃຫ້ລອດໄດ້ເຮັດໃຫ້ຄຳສັນຍານີ້ເກີດເປັນຈິງໃນຊີວິດຂອງທ່ານແນວໃດ? (ສຳລັບບາງຕົວຢ່າງ, ໃຫ້ເບິ່ງ David A. Bednar, “With the Power of God in Great Glory,” Liahona, Nov. 2021, 28–30, ໂດຍສະເພາະສອງພາກສຸດທ້າຍ.)
ແມ່ນຫຍັງຄື “ສາດສະໜາຈັກໃຫຍ່ ແລະ ໜ້າກຽດຊັງ” ທີ່ນີໄຟໄດ້ເຫັນ?
ປະທານດາລິນ ເອັຈ ໂອກສ໌ ໄດ້ອະທິບາຍວ່າ “ສາດສະໜາຈັກໃຫຍ່ ແລະ ໜ້າກຽດຊັງ” ທີ່ນີໄຟໄດ້ບັນຍາຍ ເປັນຕົວແທນໃຫ້ແກ່ “ທິດສະດີ ຫລື ອົງການໃດໆ ທີ່ຕໍ່ຕ້ານຄວາມເຊື່ອຖືໃນພຣະເຈົ້າ. ແລະ ‘ການເປັນຊະເລີຍ’ ທີ່ ‘ສາດສະໜາຈັກ’ ນີ້ປະສົງຈະນຳມາສູ່ໄພ່ພົນຂອງພຣະເຈົ້າຈະບໍ່ແມ່ນການເປັນຊະເລີຍທາງຮ່າງກາຍ ແຕ່ເປັນຊະເລີຍໃນຄວາມຄິດຜິດ” (“Stand as Witnesses of God,” Ensign, Mar. 2015, 32). ພຣະຜູ້ຊ່ວຍໃຫ້ລອດຊ່ວຍໃຫ້ທ່ານຫລີກລ້ຽງ—ແລະ ໜີຈາກ—ການເປັນຊະເລີຍຂອງແນວຄິດຜິດແນວໃດ?
ພຣະເຈົ້າຈະຕອບເຮົາ ຖ້າຫາກເຮົາທູນຖາມດ້ວຍສັດທາ.
ທ່ານເຄີຍຮູ້ສຶກວ່າ ທ່ານບໍ່ໄດ້ຮັບການເປີດເຜີຍສ່ວນຕົວບໍ—ວ່າພຣະເຈົ້າບໍ່ໄດ້ກ່າວກັບທ່ານບໍ? ນີໄຟໄດ້ໃຫ້ຄຳແນະນຳຢ່າງໃດແດ່ກັບພວກອ້າຍຂອງເພິ່ນ ເມື່ອເຂົາເຈົ້າໄດ້ຮູ້ສຶກເຊັ່ນນີ້? ເບິ່ງ 1 ນີໄຟ 15:1–11. ທ່ານຈະນຳໃຊ້ຄຳແນະນຳຂອງນີໄຟໃນຊີວິດຂອງທ່ານໄດ້ແນວໃດ?
![]()
ຮູບພາບໄອຄອນຫ້ອງຮຽນສາດສະໜາ
ນີໄຟມັກຈະມີເລື່ອງຮີບຮ້ອນທີ່ຈະກ່າວກັບພວກອ້າຍຂອງເພິ່ນ. ແຕ່ເພິ່ນເບິ່ງຄືວ່າມີຄວາມກະຕືລືລົ້ນເປັນພິເສດກ່ຽວກັບສິ່ງທີ່ເພິ່ນໄດ້ບອກເຂົາເຈົ້າຢູ່ໃນ 1 ນີໄຟ 15:23–25. ແມ່ນຫຍັງຄືຂ່າວສານຂອງນີໄຟ, ແລະ ເປັນຫຍັງທ່ານຈຶ່ງຄິດວ່າເພິ່ນໄດ້ຮູ້ສຶກຢ່າງແຮງກ້າກ່ຽວກັບຂ່າວສານນັ້ນ?
ແອວເດີ ເດວິດ ເອ ແບ໊ດນາ ໄດ້ສິດສອນວ່າ “ພຣະຄຳຂອງພຣະເຈົ້າ” ສາມາດອ້າງເຖິງພຣະຄຳພີ, ເຖິງຖ້ອຍຄຳຂອງສາດສະດາທີ່ມີຊີວິດຢູ່, ແລະ ເຖິງພຣະເຢຊູຄຣິດພຣະອົງເອງ. ທ່ານຄິດວ່າ “ການຍຶດໝັ້ນ” ຕໍ່ພຣະຄຳພີ ແລະ ຖ້ອຍຄຳຂອງສາດສະດາທີ່ມີຊີວິດຢູ່ໝາຍຄວາມວ່າແນວໃດ? “ການຍຶດໝັ້ນ” ຕໍ່ພຣະເຢຊູຄຣິດອາດໝາຍຄວາມວ່າແນວໃດ? ທ່ານອາດຊອກຫາຄຳຕອບທີ່ເປັນໄປໄດ້ຕໍ່ຄຳຖາມເຫລົ່ານີ້ຢູ່ໃນຂ່າວສານຂອງແອວເດີ ແບ໊ດນາ “But We Heeded Them Not” (Liahona, May 2022, 14–16).
ການຍຶດໝັ້ນຕໍ່ພຣະຄຳຂອງພຣະເຈົ້າຊ່ວຍໃຫ້ທ່ານຕ້ານທານຜູ້ປໍລະປັກແນວໃດ? ການປະກອບຕາຕະລາງທີ່ຄ້າຍຄືກັນກັບອັນນີ້ ສາມາດຊ່ວຍໃຫ້ທ່ານຈັດລະບຽບຄວາມຄິດຂອງທ່ານໄດ້:
|
… ຊ່ວຍໃຫ້ເຮົາເອົາຊະນະຄວາມມືດຂອງການລໍ້ລວງ? (ເບິ່ງ 1 ນີໄຟ 12:17) |
… ຊ່ວຍໃຫ້ເຮົາ “ບໍ່ຫົວຊາ” ນຳຄວາມບໍ່ມີປະໂຫຍດ ແລະ ຄວາມທະນົງໃຈຂອງໂລກ? (1 ນີໄຟ 12:18) | |
|
ການຍຶດໝັ້ນຕໍ່ພຣະຄຳພີ ແລະ ຖ້ອຍຄຳຂອງສາດສະດາທີ່ມີຊີວິດຢູ່ … | ||
|
ການຍຶດໝັ້ນຕໍ່ພຣະຜູ້ຊ່ວຍໃຫ້ລອດ … |
ເບິ່ງ “ພື້ນໝັ້ນຄົງໜັກໜາ,” ເພງສວດ ແລະ ເພງຂອງເດັກນ້ອຍ, 6; Jorge F. Zeballos, “Building a Life Resistant to the Adversary,” Liahona, Nov. 2022, 50–52 ນຳອີກ.
ພຣະຄຳພີແມ່ນຄ້າຍຄືຮາວເຫລັກທີ່ນຳເຮົາໄປຫາຕົ້ນໄມ້ແຫ່ງຊີວິດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະບິດາເທິງສະຫວັນໄດ້ສົ່ງພຣະເຢຊູຄຣິດມາເພາະພຣະອົງຮັກເຮົາ.
-
ເພື່ອສິດສອນນີໄຟກ່ຽວກັບຄວາມຮັກຂອງພຣະເຈົ້າ, ທູດອົງໜຶ່ງໄດ້ສະແດງເຫດການຕ່າງໆຈາກພຣະຊົນຊີບຂອງພຣະຜູ້ຊ່ວຍໃຫ້ລອດໃຫ້ນີໄຟເຫັນ. ທ່ານສາມາດເຮັດແບບດຽວກັນສຳລັບລູກໆຂອງທ່ານ—ເອົາຮູບພາບຈາກເຫດການທີ່ນີໄຟໄດ້ເຫັນຢູ່ໃນ 1 ນີໄຟ 11:20, 24, 27, 31 ໃຫ້ພວກເຂົາເບິ່ງ, ແລະ 33 (ເບິ່ງ ປຶ້ມຮູບພຣະກິດຕິຄຸນ, ເລກທີ 30, 35, 39, 42, 57). ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຊ່ວຍລູກໆຂອງທ່ານຊອກຫາຮູບພາບທີ່ເປັນຄູ່ກັນກັບຮູບພາບນັ້ນ. ເຮົາຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຈາກຂໍ້ພຣະຄຳພີ ແລະ ຮູບພາບເຫລົ່ານີ້?
-
ການຮ້ອງເພງເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດຊ່ວຍໃຫ້ລູກໆຂອງທ່ານຮູ້ສຶກເຖິງຄວາມຮັກຂອງພຣະເຈົ້າ. ຫລັງຈາກພວກທ່ານຮ້ອງເພງແລ້ວ, ໃຫ້ຖາມລູກໆຂອງທ່ານວ່າພວກເຂົາຮຽນຮູ້ຫຍັງແດ່ຈາກເພງນັ້ນ. ເຮົາຮຽນຮູ້ຫຍັງອີກແດ່ກ່ຽວກັບຄວາມຮັກຂອງພຣະເຈົ້າ ຈາກ 1 ນີໄຟ 11:22–23?
ໃຊ້ສິລະປະເພື່ອຊ່ວຍໃຫ້ເດັກນ້ອຍຮຽນຮູ້. ເມື່ອທ່ານສິດສອນເດັກນ້ອຍເຖິງເລື່ອງລາວຈາກພຣະຄຳພີ, ຊ່ວຍໃຫ້ພວກເຂົາວາດພາບເຫັນເລື່ອງລາວນັ້ນ. ທ່ານສາມາດໃຊ້ຮູບພາບ, ວິດີໂອ, ຫຸ່ນຕຸກກະຕາ, ເຄື່ອງແຕ່ງຕົວ, ແລະ ອື່ນໆ.
ພຣະຄຳພີມໍມອນສິດສອນຄວາມຈິງທີ່ມີຄ່າ.
-
ເພື່ອຊ່ວຍໃຫ້ລູກໆຂອງທ່ານເຫັນຄຸນຄ່າຂອງຄວາມຈິງທີ່ “ແຈ່ມແຈ້ງ ແລະ ມີຄ່າ” ຢູ່ໃນພຣະຄຳພີມໍມອນ, ທ່ານສາມາດແຕ້ມຮູບ ແລະ ເຊື້ອເຊີນລູກໆຂອງທ່ານໃຫ້ປ່ຽນ ຫລື ເອົາພາກສ່ວນຂອງຮູບອອກເພື່ອເຮັດໃຫ້ມັນເບິ່ງວ່າແຕກຕ່າງ. ທ່ານສາມາດນຳໃຊ້ສິ່ງນີ້ເພື່ອສິດສອນວ່າ ສິ່ງທີ່ຢູ່ໃນພຣະຄຣິສຕະທຳຄຳພີໄດ້ຖືກປ່ຽນແປງ ແລະ ເອົາອອກໄປເມື່ອເວລາຜ່ານໄປ. ອ່ານ 1 ນີໄຟ 13:40 ນຳກັນ ແລະ ເວົ້າລົມກັນກ່ຽວກັບວ່າ ພຣະຄຳພີມໍມອນ (“ບັນທຶກສະບັບຫລັງ”) ຊ່ວຍໃຫ້ເຮົາເຂົ້າໃຈ “ສິ່ງທີ່ແຈ່ມແຈ້ງ ແລະ ມີຄ່າ” ທີ່ໄດ້ສູນເສຍໄປຈາກ ພຣະຄຣິສຕະທຳຄຳພີ (ບັນທຶກ “ສະບັບທຳອິດ”) ແນວໃດ. ຄວາມຈິງທີ່ “ແຈ່ມແຈ້ງ ແລະ ມີຄ່າ” ໃດແດ່ທີ່ທ່ານໄດ້ຮຽນຮູ້ຈາກພຣະຄຳພີມໍມອນ?
-
ວິດີໂອຊື່ “The Book of Mormon—a Book from God” (ຫ້ອງສະໝຸດພຣະກິດຕິຄຸນ) ສາມາດຊ່ວຍລູກໆຂອງທ່ານໃຫ້ເຫັນວ່າ ເປັນຫຍັງມັນຈຶ່ງສຳຄັນທີ່ຈະມີທັງພຣະຄຣິສຕະທຳຄຳພີ ແລະ ພຣະຄຳພີມໍມອນ. ເດັກນ້ອຍອາດມັກແຕ້ມຮູບຄືນໃໝ່ຈາກວິດີໂອ.
ພຣະຄຳພີມໍມອນຟື້ນຟູຄວາມຈິງ ທີ່ໄດ້ສູນເສຍໄປລະຫວ່າງການປະຖິ້ມຄວາມເຊື່ອ.
ການຍຶດໝັ້ນຕໍ່ພຣະຄຳຂອງພຣະເຈົ້າຊ່ວຍໃຫ້ເຮົາມີພະລັງທີ່ຈະຕ້ານທານກັບການລໍ້ລວງ.
-
ໃຫ້ໂອກາດລູກໆຂອງທ່ານທີ່ຈະແບ່ງປັນສິ່ງທີ່ພວກເຂົາຈື່ຈຳກ່ຽວກັບພາບນິມິດຂອງລີໄຮ. ມັນອາດຈະຊ່ວຍໄດ້ທີ່ຈະໃຊ້ຮູບ, ຄືຮູບທີ່ຢູ່ໃນໂຄງຮ່າງສຳລັບອາທິດຜ່ານມາ. ແມ່ນຫຍັງໄດ້ກີດກັນຜູ້ຄົນບໍ່ໃຫ້ໄປເຖິງຕົ້ນໄມ້ນັ້ນ? ແມ່ນຫຍັງໄດ້ຊ່ວຍໃຫ້ເຂົາເຈົ້າໄປເຖິງມັນ? ທ່ານອາດຂໍໃຫ້ພວກເຂົາຊອກຫາຮາວເຫລັກຢູ່ໃນຮູບ. ອ່ານ 1 ນີໄຟ 15:23–24 ນຳກັນ ເພື່ອຈະເຫັນວ່າ ຮາວເຫລັກນັ້ນເປັນຕົວແທນໃຫ້ແກ່ຫຍັງ ແລະ ວ່າມັນຈະຊ່ວຍເຮົາໄດ້ແນວໃດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Nephi’s Vision of Mary [ພາບນິມິດຂອງນີໄຟກ່ຽວກັບນາງມາຣີ], ໂດຍ ເຈມສ໌ ຈອນສັນ