ການສ້າງຊີວິດໃຫ້ທົນທານຕໍ່ຜູ້ປໍລະປັກ
ຂ້າພະເຈົ້າອະທິຖານວ່າເຮົາຈະສ້າງຊີວິດຂອງເຮົາຕໍ່ໄປຕາມແຜນ ແລະ ຂໍ້ກຳນົດທາງເຕັກນິກຂອງການອອກແບບຈາກສະຫວັນໂດຍພຣະບິດາເທິງສະຫວັນຂອງເຮົາ.
ຕະຫລອດຫລາຍປີຜ່ານມາຈາກແທ່ນປາໄສທີ່ສວຍງາມໃນສູນກາງປະຊຸມໃຫຍ່ແຫ່ງນີ້, ເຮົາໄດ້ຮັບຄຳປຶກສາ, ການດົນໃຈ, ຄຳແນະນຳ, ແລະ ການເປີດເຜີຍອັນດີເລີດ. ບາງຄັ້ງ, ຜູ້ປາໄສໄດ້ໃຊ້ການປຽບທຽບທີ່ກ່ຽວຂ້ອງກັບຄວາມຮູ້ ແລະ ປະສົບການຂອງຕົນເພື່ອສະແດງໃຫ້ເຫັນຢ່າງຈະແຈ້ງ ແລະ ເຕັມໄປດ້ວຍພະລັງເຖິງຫລັກທຳພຣະກິດຕິຄຸນຂອງພຣະເຢຊູຄຣິດ.
ໃນວິທີນີ້, ຕົວຢ່າງເຊັ່ນ, ເຮົາໄດ້ຮຽນຮູ້ກ່ຽວກັບຍົນ ແລະ ການບິນຕ່າງໆ ຊຶ່ງການຫັນທິດທາງພຽງເລັກນ້ອຍສາມາດນຳເຮົາໄປສູ່ສະຖານທີ່ຫ່າງໄກຈາກຈຸດໝາຍປາຍທາງດັ້ງເດີມຂອງເຮົາໄດ້.1 ແລະ ໃນວິທີນີ້, ເຮົາໄດ້ຮຽນຮູ້ຈາກການປຽບທຽບວິທີທີ່ຫົວໃຈຂອງເຮົາທຳງານກັບການປ່ຽນແປງຈິດໃຈອັນເຕັມໄປດ້ວຍພະລັງ ທີ່ຮຽກຮ້ອງໃຫ້ຕອບຮັບຄຳເຊື້ອເຊີນຂອງພຣະຜູ້ເປັນເຈົ້າ ເພື່ອຕິດຕາມພຣະອົງ.2
ໃນເວລານີ້, ຂ້າພະເຈົ້າປາດຖະໜາດ້ວຍຄວາມຖ່ອມຕົນ ທີ່ຈະເພີ່ມເຕີມການປຽບທຽບທີ່ໄດ້ຮັບການດົນໃຈຈາກອາຊີບຂອງຂ້າພະເຈົ້າ. ຂ້າພະເຈົ້າອ້າງເຖິງໂລກຂອງວິສະວະກຳໂຍທາ. ຈາກການເລີ່ມຕົ້ນຂອງການສຶກສາມະຫາວິທະຍາໄລຂອງຂ້າພະເຈົ້າ, ຂ້າພະເຈົ້າຝັນເຖິງມື້ທີ່ຂ້າພະເຈົ້າຈະສຳເລັດຫ້ອງຮຽນຕ່າງໆຕາມຂໍ້ກຳນົດ ແລະ ແລ້ວສາມາດເອົາຫ້ອງທີ່ສິດສອນຂ້າພະເຈົ້າເຖິງວິທີອອກແບບເຄຫາສະຖານ ແລະ ອາຄານໂຄງສ້າງອື່ນໆທີ່ຖືວ່າເປັນການສ້າງ “ຕໍ່ຕ້ານແຜ່ນດິນໄຫວ.”
ໃນທີ່ສຸດມື້ນັ້ນກໍມາເຖິງ ຫ້ອງຮຽນທຳອິດຂອງຂ້າພະເຈົ້າສຳລັບວິຊານີ້. ຄຳເວົ້າທຳອິດຈາກອາຈານສອນຄື: “ແນ່ນອນວ່າທຸກຄົນກະຕືລືລົ້ນໃນການເລີ່ມຫລັກສູດນີ້ ແລະ ຮຽນຮູ້ວິທີການອອກແບບໂຄງສ້າງເຄຫາສະຖານຕໍ່ຕ້ານແຜ່ນດິນໄຫວ,” ຊຶ່ງຫລາຍຄົນໃນພວກເຮົາໄດ້ງຶກໜ້າຕອບຮັບຢ່າງກະຕືລືລົ້ນ. ຈາກນັ້ນອາຈານສອນໄດ້ເວົ້າວ່າ, “ຂ້ອຍເສຍໃຈທີ່ຕ້ອງບອກພວກເຈົ້າວ່າມັນເປັນໄປບໍ່ໄດ້, ເພາະຂ້ອຍບໍ່ສາມາດສອນພວກເຈົ້າໃຫ້ອອກແບບອາຄານທີ່ຕໍ່ຕ້ານ, ຄຳວ່າ ‘ຕໍ່ຕ້ານ’ ຫລື ຕ້ານແຜ່ນດິນໄຫວໄດ້. ສິ່ງນີ້ບໍ່ສົມເຫດສົມຜົນ,” ເພິ່ນເວົ້າ, “ເພາະວ່າແຜ່ນດິນໄຫວຈະເກີດຂຶ້ນຢູ່ແລ້ວ, ບໍ່ວ່າເຮົາຈະມັກຫລືບໍ່ກໍຕາມ.”
ແລ້ວເພິ່ນກໍເວົ້າຕໍ່, “ສິ່ງທີ່ຂ້ອຍສາມາດສອນພວກເຈົ້າໄດ້ຄືການອອກແບບໂຄງສ້າງເຄຫາສະຖານທີ່ທົນທານຕໍ່ແຜ່ນດິນໄຫວ, ໂຄງສ້າງເຄຫາສະຖານທີ່ສາມາດທົນທານຕໍ່ແຮງທີ່ມາຈາກແຜ່ນດິນໄຫວໄດ້, ສະນັ້ນໂຄງສ້າງເຄຫາສະຖານຍັງຄົງຢືນຢູ່ໂດຍບໍ່ມີຄວາມເສຍຫາຍຮ້າຍແຮງ ແລະ ຕໍ່ຈາກນັ້ນຍັງສາມາດນຳໃຊ້ໄດ້ຢູ່ເຖິງແມ່ນວ່າຈະຖືກຜົນກະທົບມາແລ້ວກໍຕາມ.”
ວິສະວະກອນເຮັດການຄິດໄລ່ທີ່ບົ່ງບອກຂະໜາດ, ຄຸນນະພາບ, ແລະ ລັກສະນະຂອງພື້ນຖານ, ເສົາ, ຄານ, ແຜ່ນຄອນກີດ, ແລະ ອົງປະກອບໂຄງສ້າງເຄຫາສະຖານອື່ນໆທີ່ໄດ້ຮັບການອອກແບບ. ຜົນໄດ້ຮັບເຫລົ່ານີ້ຖືກແປອອກມາເປັນແຜນການ ແລະ ຂໍ້ກຳນົດທາງເຕັກນິກ, ຊຶ່ງຈຳເປັນຕ້ອງປະຕິບັດຕາມຢ່າງເຂັ້ມງວດໂດຍຜູ້ກໍ່ສ້າງເພື່ອໃຫ້ວຽກງານອອກມາຕາມທີ່ວາງແຜນ ແລະ ດັ່ງນັ້ນຈຶ່ງບັນລຸຈຸດປະສົງທີ່ໄດ້ຮັບການອອກແບບ ແລະ ສ້າງຂຶ້ນ.
ເຖິງແມ່ນວ່າເວລາຈະຜ່ານມາ 40 ກວ່າປີຕັ້ງແຕ່ມື້ທຳອິດຂອງຫ້ອງຮຽນດ້ານວິສະວະກຳ ທົນທານຕໍ່ແຜ່ນດິນໄຫວ, ຂ້າພະເຈົ້າຍັງຈື່ຈຳເປັນຢ່າງດີໃນຕອນທີ່ຂ້າພະເຈົ້າເລີ່ມທີ່ຈະໄດ້ຮັບຄວາມເຂົ້າໃຈຢ່າງເລິກເຊິ່ງ, ເຖິງຄວາມຈຳເປັນຂອງຄວາມສຳຄັນວ່າແນວຄິດນີ້ຈະປະກົດໃນໂຄງສ້າງທີ່ຂ້າພະເຈົ້າໄດ້ອອກແບບໃນຊີວິດຂອງການເຮັດວຽກໃນອະນາຄົດຂອງຂ້າພະເຈົ້າ. ບໍ່ພຽງແຕ່ເທົ່ານັ້ນ, ແຕ່ສິ່ງທີ່ສຳຄັນກວ່າ—ຄືມັນຈະຄົງຢູ່ຕະຫລອດໄປໃນການຫລໍ່ຫລອມຊີວິດຂອງຂ້າພະເຈົ້າເອງ ແລະ ຜູ້ທີ່ຂ້າພະເຈົ້າອາດຈະໃຊ້ອິດທິພົນໃນທາງບວກ.
ເຮົາໄດ້ຮັບພອນຫລາຍພຽງໃດທີ່ໄດ້ເພິ່ງພາຄວາມຮູ້ຂອງແຜນແຫ່ງຄວາມລອດທີ່ຖືກສ້າງຂຶ້ນໂດຍພຣະບິດາເທິງສະຫວັນຂອງເຮົາ, ທີ່ມີພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດ, ແລະ ເພິ່ງພາການນຳທາງທີ່ໄດ້ຮັບການດົນໃຈຈາກສາດສະດາທີ່ມີຊີວິດຢູ່! ທີ່ກ່າວມາທັງໝົດຖືເປັນການອອກແບບ “ແຜນການ” ແລະ “ຂໍ້ກຳນົດທາງເຕັກນິກ” ຈາກສະຫວັນ ທີ່ສິດສອນເຮົາຢ່າງຊັດເຈນເຖິງວິທີສ້າງຊີວິດທີ່ມີຄວາມສຸກ—ຊີວິດທີ່ທົນທານຕໍ່ຄວາມຜິດບາບ, ທົນທານຕໍ່ການລໍ້ລວງ, ທົນທານຕໍ່ການໂຈມຕີຈາກຊາຕານ, ຜູ້ທີ່ພະຍາຍາມຢ່າງໜັກໃນການຂັດຂວາງເສັ້ນທາງນິລັນດອນຂອງເຮົາຮ່ວມກັບພຣະບິດາເທິງສະຫວັນຂອງເຮົາ ແລະ ກັບຄອບຄົວທີ່ຮັກຂອງເຮົາ.
ພຣະຜູ້ຊ່ວຍໃຫ້ລອດພຣະອົງເອງ, ໃນຕອນຕົ້ນຂອງການປະຕິບັດສາດສະໜາກິດຂອງພຣະອົງ, “ຖືກປ່ອຍໃຫ້ຖືກລໍ້ລວງຈາກມານ.”3 ແຕ່ພຣະເຢຊູໄດ້ປະສົບຜົນສຳເລັດໃນການທົດລອງຄັ້ງຍິ່ງໃຫຍ່ນັ້ນ. ການມີທັດສະນະຄະຕິຂອງການຕໍ່ຕ້ານຊາຕານ ຫລື ຕໍ່ຕ້ານການລໍ້ລວງໄດ້ຊ່ວຍພຣະອົງແນວໃດ? ສິ່ງທີ່ເຮັດໃຫ້ພຣະເຢຊູໄດ້ຮັບໄຊຊະນະຈາກຊ່ວງເວລາທີ່ຍາກລຳບາກທີ່ສຸດເຫລົ່ານີ້ຄືການກຽມພ້ອມທາງວິນຍານຂອງພຣະອົງ, ຊຶ່ງໃຫ້ພຣະອົງຢູ່ໃນສະພາບທີ່ຈະທົນທານຕໍ່ການລໍ້ລວງຂອງຜູ້ປໍລະປັກໄດ້.
ມີປັດໃຈຫຍັງແດ່ທີ່ຊ່ວຍໃຫ້ພຣະຜູ້ຊ່ວຍໃຫ້ລອດພ້ອມສຳລັບຊ່ວງເວລາສຳຄັນນັ້ນ?
ສິ່ງທຳອິດ, ພຣະອົງໄດ້ຖືສິນອົດເຂົ້າເປັນເວລາ 40 ມື້ ແລະ 40 ຄືນ, ການຖືສິນອົດເຂົ້າທີ່ມາພ້ອມກັບການອະທິຖານຢ່າງຕໍ່ເນື່ອງ. ສະນັ້ນ, ເຖິງແມ່ນວ່າພຣະກາຍຂອງພຣະອົງຈະອ່ອນເພຍ, ແຕ່ພຣະວິນຍານຂອງພຣະອົງເຂັ້ມແຂງທີ່ສຸດ. ເຖິງແມ່ນວ່າ, ໂຊກດີຫລາຍທີ່, ເຮົາບໍ່ໄດ້ຖືກຮ້ອງຂໍໃຫ້ຖືສິນອົດເຂົ້າເປັນເວລາດັ່ງກ່າວ—ແຕ່ພຽງ 24 ຊົ່ວໂມງ ແລະ ເດືອນລະຄັ້ງ—ການຖືສິນອົດເຂົ້າຈະເຮັດໃຫ້ເຮົາມີພະລັງທາງວິນຍານ ແລະ ກຽມເຮົາໃຫ້ພ້ອມເພື່ອທົນທານຕໍ່ການທົດລອງຂອງຊີວິດນີ້.
ອັນດັບທີສອງຄື, ໃນເລື່ອງລາວຂອງການລໍ້ລວງທີ່ພຣະຜູ້ຊ່ວຍໃຫ້ລອດໄດ້ປະເຊີນ, ເຮົາເຫັນໄດ້ວ່າພຣະອົງຕອບກັບຊາຕານດ້ວຍການມີພຣະຄຳພີໃນຈິດໃຈຂອງພຣະອົງຕະຫລອດ, ໂດຍອ້າງອີງເຖິງ, ແລະ ນຳໃຊ້ມັນໃນເວລາທີ່ເໝາະສົມ.
ເມື່ອຊາຕານລໍ້ລວງພຣະອົງໃຫ້ປ່ຽນກ້ອນຫີນມາເປັນເຂົ້າຈີ່ເພື່ອວ່າພຣະອົງຈະຊົງສະໜອງຄວາມຫິວໂຫຍຈາກການຖືສິນອົດເຂົ້າເປັນເວລາດົນນານຂອງພຣະອົງ, ພຣະຜູ້ເປັນເຈົ້າໄດ້ກ່າວວ່າ, “ມີຄຳຂຽນໄວ້ໃນພຣະຄຳພີວ່າ, ມະນຸດຈະບໍ່ລ້ຽງຊີວິດດ້ວຍອາຫານສິ່ງດຽວ, ແຕ່ລ້ຽງດ້ວຍພຣະຄຳທຸກຂໍ້ທີ່ອອກມາຈາກພຣະໂອດຂອງພຣະເຈົ້າ.”4 ຈາກນັ້ນ, ເມື່ອພຣະຜູ້ເປັນເຈົ້າປະທັບຢູ່ເທິງຍອດພຣະວິຫານ, ມານພະຍາຍາມລໍ້ລວງພຣະອົງໃຫ້ສະແດງອຳນາດຂອງພຣະອົງ, ຊຶ່ງພຣະຜູ້ເປັນເຈົ້າໄດ້ຕອບດ້ວຍສິດອຳນາດວ່າ, “ມີຄຳຂຽນໄວ້ໃນພຣະຄຳພີອີກວ່າ, ຢ່າທົດລອງອົງພຣະຜູ້ເປັນເຈົ້າພຣະເຈົ້າຂອງເຈົ້າ.”5 ແລະ ສຳລັບຄວາມພະຍາຍາມຄັ້ງທີສາມຂອງຊາຕານ, ພຣະຜູ້ເປັນເຈົ້າໄດ້ຕອບວ່າ, “ມີຄຳຂຽນໄວ້ໃນພຣະຄຳພີວ່າ, ຈົ່ງຂາບໄຫວ້ນະມັດສະການອົງພຣະຜູ້ເປັນເຈົ້າຂອງເຈົ້າ, ແລະ ປະຕິບັດແຕ່ພຣະອົງຜູ້ດຽວ.”6
ເຫດການແຜ່ນດິນໄຫວໄດ້ປະຮ່ອງຮອຍຂອງມັນໄວ້ກັບໂຄງສ້າງເຄຫາສະຖານ ແມ່ນແຕ່ຖືກອອກແບບ ແລະ ສ້າງຂຶ້ນຢ່າງຖືກຕ້ອງ—ຜົນທີ່ຕາມມາເຊັ່ນບາງທີອາດມີຮອຍແຕກແຫງ, ການເພພັງຂອງເຄື່ອງເຟີນິເຈີ ຫລື ເພດານຕ່າງໆ, ແລະ ການເພພັງຂອງປ່ອງຢ້ຽມ. ແຕ່ສິ່ງປຸກສ້າງທີ່ອອກແບບມາຢ່າງດີ ແລະ ສ້າງຂຶ້ນເປັນຢ່າງດີຈະບັນລຸຈຸດປະສົງຂອງການປົກປ້ອງຜູ້ຢູ່ອາໄສ, ແລະ ດ້ວຍການສ້ອມແປງຈຳນວນໜຶ່ງ, ກໍຈະເຮັດໃຫ້ມັນຄືນສູ່ສະພາບເດີມ.
ໃນທຳນອງດຽວກັນ, ການກະທົບຂອງຜູ້ປໍລະປັກສາມາດເຮັດໃຫ້ເກີດ “ຮອຍແຕກແຫງ,” ຫລື ຄວາມເສຍຫາຍບາງສ່ວນໃນຊີວິດເຊັ່ນກັນທ່າມກາງຄວາມພະຍາຍາມຂອງເຮົາໃນການສ້າງຊີວິດຂອງເຮົາໄປຕາມແບບແຜນທີ່ສົມບູນຈາກສະຫວັນ. “ຮອຍແຕກແຫງ” ເຫລົ່ານີ້ ສາມາດປະກົດຜ່ານທາງຄວາມຮູ້ສຶກຂອງຄວາມໂສກເສົ້າ ຫລື ສຳນຶກຜິດສຳລັບການເຮັດຄວາມຜິດພາດ ແລະ ສຳລັບການທີ່ບໍ່ໄດ້ເຮັດທຸກສິ່ງທຸກຢ່າງດ້ວຍຄວາມສົມບູນແບບ, ຫລື ກັບຄວາມຮູ້ສຶກທີ່ວ່າເຮົາຍັງບໍ່ດີເທົ່າທີ່ເຮົາຕ້ອງການ.
ແຕ່ສິ່ງທີ່ກ່ຽວຂ້ອງຢ່າງແທ້ຈິງຄືການປະຕິບັດຕາມແຜນ ແລະ ຂໍ້ກຳນົດທີ່ຖືກອອກແບບຈາກສະຫວັນ, ທີ່ວ່າ, ພຣະກິດຕິຄຸນຂອງພຣະເຢຊູຄຣິດ, ພວກເຮົາຍັງຄົງຢືນຢູ່ຕໍ່ໄປ. ໂຄງສ້າງຊີວິດຂອງເຮົາບໍ່ໄດ້ຖືກທຳລາຍຍ້ອນຄວາມພະຍາຍາມຂອງຜູ້ປໍລະປັກ ຫລື ສະພາບການທີ່ຍາກທີ່ເຮົາຕ້ອງໄດ້ປະເຊີນໜ້າກັບມັນ, ກົງກັນຂ້າມ, ເຮົາພ້ອມທີ່ຈະກ້າວໄປຂ້າງໜ້າ.
ຄວາມສຸກທີ່ຖືກສັນຍາໄວ້ໃນພຣະຄຳພີ ຊຶ່ງເປັນຈຸດປະສົງຂອງການມີຊີວິດຂອງເຮົາ7 ບໍ່ຄວນຖືກເຂົ້າໃຈວ່າ ເຮົາຈະບໍ່ມີຄວາມຫຍຸ້ງຍາກ ຫລື ຄວາມໂສກເສົ້າ, ວ່າເຮົາຈະບໍ່ມີ “ຮອຍແຕກແຫງ” ອັນເປັນຜົນຈາກການລໍ້ລວງ, ຈາກຜູ້ປໍລະປັກ, ຫລື ຈາກການທົດລອງຕົວຈິງໃນຊີວິດຢູ່ໃນໂລກຂອງເຮົາ.
ຄວາມສຸກນີ້ກ່ຽວຂ້ອງກັບມຸມມອງຂອງນີໄຟທີ່ໄດ້ກ່າວວ່າ, “ໂດຍທີ່ເຫັນຄວາມທຸກຫລາຍຢ່າງໃນວັນເວລາຂອງຂ້າພະເຈົ້າ, ເຖິງຢ່າງໃດກໍຕາມ ໂດຍເປັນທີ່ໂປດປານຂອງພຣະຜູ້ເປັນເຈົ້າຕະຫລອດວັນເວລາຂອງຂ້າພະເຈົ້າ.”8 ຕະຫລອດວັນເວລາຂອງເພິ່ນ! ແມ່ນແຕ່ມື້ທີ່ນີໄຟທົນທຸກລະຫວ່າງຄວາມບໍ່ເຂົ້າໃຈ ແລະ ການປະຕິເສດຂອງພວກອ້າຍຂອງເພິ່ນເອງ, ແມ່ນແຕ່ເວລາທີ່ພວກເຂົາມັດເພິ່ນໃນເຮືອ, ແມ່ນແຕ່ເວລາທີ່ພໍ່ຂອງເພິ່ນ, ລີໄຮ, ເສຍຊີວິດ, ແມ່ນແຕ່ເວລາທີ່ເລມັນ ແລະ ເລມູເອນກາຍເປັນສັດຕູຮ້າຍຂອງຜູ້ຄົນຂອງເພິ່ນ. ແມ່ນແຕ່ມື້ທີ່ຫຍຸ້ງຍາກເຫລົ່ານັ້ນ, ນີໄຟໄດ້ຮູ້ສຶກເປັນທີ່ໂປດປານຂອງພຣະຜູ້ເປັນເຈົ້າ.
ເຮົາສາມາດມີຄວາມສະຫງົບໄດ້ເມື່ອຮູ້ວ່າພຣະຜູ້ເປັນເຈົ້າຈະບໍ່ມີວັນປ່ອຍໃຫ້ເຮົາຖືກລໍ້ລວງເກີນກວ່າທີ່ເຮົາຈະທົນທານໄດ້. ແອວມາໄດ້ເຊື້ອເຊີນໃຫ້ເຮົາ “ເຝົ້າເບິ່ງ ແລະ ອະທິຖານສະເໝີ, ເພື່ອ [ເຮົາ] ຈະບໍ່ຖືກລໍ້ລວງຈົນເກີນກວ່າທີ່ [ເຮົາ] ຈະອົດທົນໄດ້, ແລະ ຖືກພຣະວິນຍານອັນສັກສິດນຳພາໄປ, ເພື່ອກາຍເປັນຄົນຖ່ອມຕົວ, ອ່ອນໂຍນ, ສອນງ່າຍ, ອົດທົນ, ເຕັມໄປດ້ວຍຄວາມຮັກ ແລະ ຄວາມອົດກັ້ນອັນຍາວນານ.”9
ທີ່ກ່າວມານັ້ນສາມາດນຳໄປໃຊ້ກັບການທົດລອງຂອງຊີວິດໄດ້. ອຳໂມນໄດ້ເຕືອນເຮົາເຖິງພຣະຄຳຂອງພຣະຜູ້ເປັນເຈົ້າທີ່ວ່າ: “ຈົ່ງອອກໄປ … ຈົ່ງຮັບເອົາຄວາມທຸກຂອງພວກເຈົ້າດ້ວຍຄວາມອົດທົນ, ແລະ ເຮົາຈະມອບຄວາມສຳເລັດໃຫ້ແກ່ພວກເຈົ້າ.”10
ພຣະຜູ້ເປັນເຈົ້າຈະຈັດຫາຄວາມຊ່ວຍເຫລືອໃຫ້ກັບເຮົາສະເໝີ ເມື່ອເຮົາປະເຊີນໜ້າກັບຄວາມຍາກລຳບາກ, ການລໍ້ລວງ, ຄວາມບໍ່ເຂົ້າໃຈ, ຄວາມອ່ອນແອ, ແລະ ແມ່ນແຕ່ຄວາມຕາຍ. ພຣະອົງໄດ້ກ່າວວ່າ, “ແລະ ບັດນີ້, ຕາມຄວາມຈິງແລ້ວ ເຮົາກ່າວກັບພວກເຈົ້າ, ແລະ ສິ່ງໃດກໍຕາມທີ່ເຮົາກ່າວກັບຄົນໜຶ່ງ ກໍຄືກັນກັບເຮົາກ່າວກັບທຸກຄົນ, ຈົ່ງເບີກບານເຖີດ, ເດັກນ້ອຍໆເອີຍ; ເພາະເຮົາຢູ່ໃນທ່າມກາງພວກເຈົ້າ, ແລະ ເຮົາຈະບໍ່ປະຖິ້ມພວກເຈົ້າ.”11 ພຣະອົງຈະບໍ່ມີວັນປະຖິ້ມເຮົາ!
ຂ້າພະເຈົ້າອະທິຖານວ່າເຮົາຈະສ້າງຊີວິດຂອງເຮົາຕໍ່ໄປຕາມແຜນ ແລະ ຂໍ້ກຳນົດທາງເຕັກນິກຂອງການອອກແບບຈາກສະຫວັນໂດຍພຣະບິດາເທິງສະຫວັນຂອງເຮົາ ແລະ ໄດ້ບັນລຸເປົ້າໝາຍຜ່ານທາງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ດັ່ງນັ້ນ, ຍ້ອນພຣະຄຸນທີ່ມາເຖິງເຮົາຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດຂອງເຮົາ, ເຮົາຈະປະສົບຄວາມສຳເລັດໃນການສ້າງຊີວິດເພື່ອໃຫ້ທົນທານຕໍ່ຄວາມຜິດບາບ, ທົນທານຕໍ່ການລໍ້ລວງ, ແລະ ເຂັ້ມແຂງໃນການອົດທົນຕໍ່ຄວາມໂສກເສົ້າ, ໃນເວລາແຫ່ງຄວາມຫຍຸ້ງຍາກໃນຊີວິດຂອງເຮົາ. ແລະ ນອກຈາກນີ້, ເຮົາຈະຢູ່ໃນສະພາບທີ່ຈະເຂົ້າເຖິງພອນທີ່ຖືກສັນຍາໄວ້ທຸກປະການຜ່ານທາງຄວາມຮັກຂອງພຣະບິດາ ແລະ ພຣະຜູ້ຊ່ວຍໃຫ້ລອດຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.