ຄືໃຫ້ພວກເຂົາຮູ້ຈັກພຣະອົງ

ໂດຍ ແອວເດີ ຈອນນາຕັນ ແອັສ ເຊີມິດ

ແຫ່ງສາວົກເຈັດສິບ

ຄວາມປາດຖະໜາອັນແຮງກ້າຂອງຂ້າພະເຈົ້າຄືໃຫ້ທ່ານມາຮູ້ຈັກພຣະເຢຊູໃນພຣະນາມຕ່າງໆຂອງພຣະອົງ ແລະ ທ່ານຈະກາຍເປັນເໝືອນດັ່ງພຣະອົງ.

ສອງສາມປີຜ່ານມາ, ຂ້າພະເຈົ້າໄດ້ມີປະສົບການທີ່ປ່ຽນແປງຊີວິດຢ່າງໜຶ່ງໃນລະຫວ່າງການປະຊຸມສິນລະລຶກໃນຫວອດທີ່ບ້ານຂອງພວກເຮົາໃນລັດອາຣິໂຊນາ. ໃນຂະນະທີ່ຄຳອະທິຖານສິນລະລຶກໄດ້ບົ່ງບອກເຖິງຄວາມເຕັມໃຈ “[ຂອງເຮົາ] ທີ່ຈະຮັບເອົາພຣະນາມຂອງ [ພຣະເຢຊູຄຣິດ],”¹ ພຣະວິນຍານບໍລິສຸດໄດ້ເຕືອນຂ້າພະເຈົ້າວ່າພຣະເຢຊູມີຫລາຍພຣະນາມ. ແລ້ວຄຳຖາມນີ້ກໍເຂົ້າມາໃນໃຈຂອງຂ້າພະເຈົ້າ: “ອາທິດນີ້ຂ້າພະເຈົ້າຄວນລະນຶກຫາພຣະນາມໃດ?”

ມີສາມພຣະນາມທີ່ເຂົ້າມາໃນໃຈຂອງຂ້າພະເຈົ້າ, ແລະ ຂ້າພະເຈົ້າໄດ້ຂຽນລົງໄວ້. ພຣະນາມແຕ່ລະຢ່າງໃນສາມພຣະນາມເຫລົ່ານັ້ນແມ່ນປະກອບດ້ວຍຄຸນລັກສະນະທີ່ເປັນເໝືອນພຣະຄຣິດທີ່ຂ້າພະເຈົ້າປາດຖະໜາທີ່ຈະພັດທະນາຢ່າງເຕັມທີ່ຫລາຍຂຶ້ນ. ອາທິດຕໍ່ມາ, ຂ້າພະເຈົ້າໄດ້ສຸມໃຈໃສ່ພຣະນາມທັງສາມເຫລົ່ານັ້ນ ແລະ ລອງເປີດໃຈຮັບເອົາຄຸນລັກສະນະ ແລະ ລັກສະນະຕ່າງໆທີ່ສອດຄ່ອງກັນ. ນັບແຕ່ເວລານັ້ນເປັນຕົ້ນມາ, ຂ້າພະເຈົ້າໄດ້ສືບຕໍ່ຖາມຄຳຖາມນັ້ນເປັນສ່ວນໜຶ່ງຂອງການນະມັດສະການສ່ວນຕົວຂອງຂ້າພະເຈົ້າ: “ພຣະນາມໃດຂອງພຣະເຢຊູທີ່ຂ້າພະເຈົ້າຄວນຮັບເອົາອາທິດນີ້?” ການຕອບຄຳຖາມນັ້ນ ແລະ ການພະຍາຍາມພັດທະນາຄຸນລັກສະນະຕ່າງໆທີ່ສອດຄ່ອງກັນກັບການເປັນເໝືອນພຣະຄຣິດໄດ້ເປັນພອນໃຫ້ກັບຊີວິດຂອງຂ້າພະເຈົ້າ.

ໃນຄຳອະທິຖານວິງວອນອັນຍິ່ງໃຫຍ່ຂອງພຣະອົງ, ພຣະເຢຊູໄດ້ສະແດງຄວາມຈິງທີ່ສຳຄັນຄື: “ນີ້ແມ່ນຊີວິດນິລັນດອນ, ຄືໃຫ້ ພວກເຂົາຮູ້ຈັກພຣະອົງ ຜູ້ເປັນພຣະເຈົ້າທ່ຽງແທ້ແຕ່ອົງດຽວ, ແລະ ຮູ້ຈັກພຣະເຢຊູຄຣິດຜູ້ທີ່ພຣະອົງໃຊ້ມາ.”² ມື້ນີ້ຂ້າພະເຈົ້າປາດຖະໜາທີ່ຈະແບ່ງປັນກັບທ່ານເຖິງພອນ ແລະ ອຳນາດທີ່ມາຈາກການຮູ້ຈັກພຣະເຢຊູຄຣິດຜ່ານພຣະນາມຕ່າງໆຂອງພຣະອົງ.

ວິທີງ່າຍໆອີກວິທີໜຶ່ງໃນການຮູ້ຈັກຄົນໃດຄົນໜຶ່ງຄືການຮຽນຮູ້ຊື່ຂອງເຂົາເຈົ້າ. ດັ່ງທີ່ໄດ້ຖືກກ່າວໄວ້ວ່າ “ຊື່ຂອງຄົນຜູ້ໜຶ່ງຄືສຽງເອີ້ນທີ່ສຳຄັນ ແລະ ມ່ວນທີ່ສຸດໃນພາສາໃດໜຶ່ງ.”³ ທ່ານເຄີຍມີປະສົບການ ທີ່ໄດ້ເອີ້ນຊື່ຄົນໃດຄົນໜຶ່ງຜິດ ຫລື ລືມຊື່ຂອງເຂົາບໍ? ພັນລະຍາຂອງຂ້າພະເຈົ້າ, ອາເລກຊີ, ແລະ ຂ້າພະເຈົ້າ, ມີຄັ້ງໜຶ່ງທີ່, ເອີ້ນຊື່ລູກຄົນໜຶ່ງຂອງພວກເຮົາວ່າ “ໂລລາ.” ພໍດີ, ອາດຈະເປັນດັ່ງທີ່ທ່ານຄິດໄວ້, ໂລລາຄືໝາຂອງພວກເຮົາ! ບໍ່ວ່າຈະດີ ຫລື ຮ້າຍ, ການລືມຊື່ຄົນໃດຄົນໜຶ່ງຈະເປັນການບອກກັບຄົນນັ້ນວ່າທ່ານອາດຈະບໍ່ສະໜິດກັບຄົນນັ້ນດີປານໃດ.

ພຣະເຢຊູຮູ້ຈັກ ແລະ ເອີ້ນຜູ້ຄົນຕາມຊື່. ຕໍ່ຜູ້ຄົນອິດສະຣາເອນໃນສະໄໝບູຮານ, ພຣະຜູ້ເປັນເຈົ້າໄດ້ກ່າວວ່າ, “ຢ່າຢ້ານກົວເລີຍ: ເຮົາໄດ້ໄຖ່ເຈົ້າໃຫ້ພົ້ນແລ້ວ, ພວກເຈົ້າເປັນຂອງເຮົາ ຈຶ່ງເອີ້ນພວກເຈົ້າຕາມຊື່.”⁴ ໃນມື້ເຊົ້າຂອງວັນອີດສະເຕີ, ການເປັນພະຍານຂອງມາຣີເຖິງການຟື້ນຄືນພຣະຊົນຂອງພຣະຄຣິດໝັ້ນຄົງແຂງແກ່ນເມື່ອພຣະເຢຊູເອີ້ນນາງຕາມຊື່.⁵ ໃນທຳນອງດຽວກັນ, ພຣະເຈົ້າໄດ້ເອີ້ນໂຈເຊັບ ສະມິດ ຕາມຊື່ ໃນການຕອບຄຳອະທິຖານດ້ວຍສັດທາຂອງເພິ່ນ.⁶

ໃນບາງກໍລະນີ, ພຣະເຢຊູໄດ້ຕັ້ງຊື່ໃໝ່ໃຫ້ກັບເຫລົ່າສາວົກຂອງພຣະອົງ ຊຶ່ງບົ່ງບອກເຖິງລັກສະນະ, ຄວາມສາມາດ, ແລະ ສັກກະຍະພາບຂອງເຂົາເຈົ້າ. ພຣະເຢໂຮວາໄດ້ປ່ຽນຊື່ໃໝ່ໃຫ້ກັບຢາໂຄບເປັນອິດສະຣາເອນ, ຊຶ່ງມີຄວາມໝາຍວ່າ “ຜູ້ທີ່ໄຊຊະນະກັບພຣະເຈົ້າ” ຫລື “ຂໍໃຫ້ພຣະເຈົ້າໄຊຊະນະ.”⁷ ພຣະເຢຊູໄດ້ປ່ຽນຊື່ຢາໂກໂບ ແລະ ໂຢຮັນມາເປັນ ໂບອະເນເຄ, ຊຶ່ງໝາຍຄວາມວ່າ “ລູກຟ້າຮ້ອງ.”⁸ ໂດຍທີ່ຫລິງເຫັນຄວາມເປັນຜູ້ນຳໃນຕົວລາວ, ພຣະເຢຊູໄດ້ປ່ຽນຊື່ຂອງຊີໂມນມາເປັນເກຟາ ຫລື ເປໂຕ, ຊຶ່ງໝາຍຄວາມວ່າຫີນ.⁹

ເຊັ່ນດຽວກັນກັບທີ່ພຣະເຢຊູຮູ້ຈັກຊື່ຂອງເຮົາແຕ່ລະຄົນ, ວິທີໜຶ່ງທີ່ເຮົາສາມາດຮູ້ຈັກພຣະເຢຊູໄດ້ດີຂຶ້ນຄືການຮຽນຮູ້ພຣະນາມຕ່າງໆຂອງພຣະອົງ. ດັ່ງດຽວກັນກັບຊື່ຂອງອິດສະຣາເອນ ແລະ ເປໂຕ, ພຣະນາມຕ່າງໆຂອງພຣະເຢຊູເປັນພຣະນາມທີ່ຊ່ວຍໃຫ້ເຮົາເຂົ້າໃຈພາລະກິດ, ຈຸດປະສົງ, ລັກສະນະ, ແລະ ຄຸນລັກສະນະຕ່າງໆຂອງພຣະອົງ. ເມື່ອເຮົາຮູ້ຈັກພຣະນາມຕ່າງໆຂອງພຣະເຢຊູ, ເຮົາຈະມາເຂົ້າໃຈຫລາຍຂຶ້ນກ່ຽວກັບພາລະກິດອັນສູງສົ່ງຂອງພຣະອົງ ແລະ ຄຸນລັກສະນະທີ່ບໍ່ເຫັນແກ່ຕົວຂອງພຣະອົງ. ການທີ່ຮູ້ຈັກພຣະນາມຕ່າງໆຂອງພຣະອົງຍັງຊ່ວຍເປັນແຮງຈູງໃຈເຮົາໃຫ້ກາຍເປັນເໝືອນພຣະອົງຫລາຍຂຶ້ນ—ເພື່ອພັດທະນາຄຸນລັກສະນະໃຫ້ເປັນເໝືອນດັ່ງພຣະຄຣິດທີ່ນຳເອົາຈຸດປະສົງ ແລະ ຄວາມຊື່ນຊົມມາສູ່ຊີວິດຂອງເຮົາ.

ສອງສາມປີກ່ອນ, ປະທານຣະໂຊ ເອັມ ແນວສັນ ໄດ້ສຶກສາພຣະຄຳພີທຸກຂໍ້ທີ່ກ່ຽວກັບພຣະເຢຊູຄຣິດ ຢູ່ໃນ Topical Guide.¹⁰ ແລ້ວເພິ່ນກໍໄດ້ເຊື້ອເຊີນໃຫ້ຜູ້ໃຫຍ່ໜຸ່ມສຶກສາຂໍ້ພຣະຄຳພີທີ່ຄືກັນເຫລົ່ານີ້. ກ່ຽວກັບພຣະນາມຕ່າງໆຂອງພຣະເຢຊູ, ປະທານແນວສັນໄດ້ກ່າວວ່າ, “ໃຫ້ຮຽນຮູ້ທຸກສິ່ງທຸກຢ່າງທີ່ພຣະເຢຊູຄຣິດ ເປັນຢູ່ ໂດຍການອະທິຖານ ແລະ ສະແຫວງຫາຄວາມເຂົ້າໃຈຢ່າງຈິງຈັງວ່າພຣະນາມຕ່າງໆມີຄວາມໝາຍແຕ່ລະຢ່າງແນວໃດຕໍ່ທ່ານເປັນການ ສ່ວນຕົວ.”¹¹

ໂດຍການປະຕິບັດຕາມຄຳເຊື້ອເຊີນຂອງປະທານແນວສັນ, ຂ້າພະເຈົ້າໄດ້ເລີ່ມສ້າງລາຍການພຣະນາມຂອງພຣະເຢຊູຂອງຂ້າພະເຈົ້າເອງ. ລາຍການພຣະນາມສ່ວນຕົວຂອງຂ້າພະເຈົ້າປະຈຸບັນມີຫລາຍກວ່າ 300 ພຣະນາມ, ແລະ ຂ້າພະເຈົ້າແນ່ໃຈວ່າຍັງມີອີກຫລາຍທີ່ຂ້າພະເຈົ້າຍັງບໍ່ທັນຄົ້ນພົບເທື່ອ.

ຂະນະທີ່ມີພຣະນາມຂອງພຣະເຢຊູບາງຈຳນວນທີ່ຖືກສະຫງວນໄວ້ໃຊ້ກັບພຣະອົງເທົ່ານັ້ນ,¹² ຂ້າພະເຈົ້າຢາກແບ່ງປັນຫ້າພຣະນາມ ແລະ ຕຳແໜ່ງທີ່ກ່ຽວຂ້ອງກັບເຮົາແຕ່ລະຄົນ. ຂ້າພະເຈົ້າເຊື້ອເຊີນທ່ານໃຫ້ສ້າງລາຍການຂອງຕົນເອງເມື່ອທ່ານມາຮູ້ຈັກກັບພຣະເຢຊູໂດຍພຣະນາມຕ່າງໆຂອງພຣະອົງ. ໃນການເຮັດເຊັ່ນນັ້ນ, ທ່ານຈະພົບວ່າຍັງມີພຣະນາມອື່ນໆ—ພ້ອມຄຸນລັກສະນະທີ່ສອດຄ່ອງກັນໃນການເປັນເໝືອນດັ່ງພຣະຄຣິດ—ທີ່ທ່ານຈະຕ້ອງການຮັບໄວ້ໃນຖານະສານຸສິດໃນພັນທະສັນຍາຂອງພຣະເຢຊູ.¹³

ພຣະນາມທີໜຶ່ງ, ພຣະເຢຊູຄື ຜູ້ລ້ຽງແກະທີ່ດີ.¹⁴ ຕົວຢ່າງເຊັ່ນ, ພຣະເຢຊູຮູ້ຈັກແກະຂອງພຣະອົງ,¹⁵ “ເພິ່ນເອີ້ນແກະຂອງເພິ່ນຕາມຊື່,”¹⁶ ແລະ, ໃນຖານະພຣະເມສານ້ອຍ, ໄດ້ມອບພຣະຊົນຊີບຂອງພຣະອົງເພື່ອລູກແກະຂອງພຣະອົງ.¹⁷ ໃນທຳນອງດຽວກັນ, ພຣະເຢຊູປາດຖະໜາໃຫ້ເຮົາເປັນຜູ້ລ້ຽງແກະທີ່ດີ, ໂດຍສະເພາະຢ່າງຍິ່ງໃນຄອບຄົວຂອງເຮົາ ແລະ ໃນຖານະອ້າຍເອື້ອຍນ້ອງຜູ້ປະຕິບັດສາດສະໜາກິດ. ອີກວິທີໜຶ່ງທີ່ເຮົາສາມາດສະແດງຄວາມຮັກຂອງເຮົາຕໍ່ພຣະເຢຊູຄືການລ້ຽງຮັກສາແກະຂອງພຣະອົງ.¹⁸ ສຳລັບແກະທີ່ອາດຈະຫລົງທາງໄປ, ຄົນລ້ຽງແກະທີ່ດີຈະເຂົ້າໄປໃນຖິ່ນແຫ້ງແລ້ງກັນດານເພື່ອຊອກຫາແກະໂຕທີ່ເສຍໄປ ແລະ ແລ້ວຈະຢູ່ກັບພວກມັນຈົນກວ່າຈະກັບຄືນມາດ້ວຍຄວາມປອດໄພ.¹⁹ ໃນຖານະຜູ້ລ້ຽງແກະທີ່ດີ ແລະ ອີງຕາມສະພາບທ້ອງຖິ່ນເອື້ອອຳນວຍ, ເຮົາຄວນສະແຫວງຫາການໃຊ້ເວລາໃນການປະຕິບັດສາດສະໜາກິດກັບຜູ້ຄົນທີ່ບ້ານຂອງເຂົາເຈົ້າໃຫ້ຫລາຍຂຶ້ນ. ໃນການປະຕິບັດສາດສະໜາກິດຂອງເຮົາ, ການສົ່ງຂໍ້ຄວາມຫາ ແລະ ເທັກໂນໂລຈີຄວນໃຊ້ເປັນຕົວຊ່ວຍເສີມ, ບໍ່ແມ່ນແທນທີ່, ການຕິດຕໍ່ແບບໜ້າຕໍ່ໜ້າ.²⁰

ພຣະນາມທີສອງ, ພຣະເຢຊູ ເປັນມະຫາປະໂລຫິດສຳລັບສິ່ງປະເສີດ ຊຶ່ງມາເຖິງແລ້ວ.²¹ ໂດຍທີ່ຮູ້ວ່າການຄຶງຂອງພຣະອົງຈະມາຮອດໃນອີກບໍ່ເທົ່າໃດຊົ່ວໂມງ, ພຣະເຢຊູໄດ້ກ່າວວ່າ: “ເຮົາບອກເລື່ອງນີ້ແກ່ເຈົ້າທັງຫລາຍ, ເພື່ອພວກເຈົ້າຈະມີຄວາມສະຫງົບສຸກໃນເຮົາ. ໃນໂລກນີ້ພວກເຈົ້າຈະມີຄວາມທຸກລຳບາກ: ແຕ່ຈົ່ງຊື່ນໃຈເທາະ; ເພາະຝ່າຍເຮົາໄດ້ຊະນະໂລກແລ້ວ.”²² ປະຈຸບັນນີ້, ຂະນະທີ່ໂລກຂອງເຮົາມັກຈະມີການຈຳແນກຄວາມແຕກຕ່າງ ແລະ ແບ່ງແຍກກັນ, ມີຄວາມຈຳເປັນຢ່າງຍິ່ງທີ່ເຮົາຕ້ອງສັ່ງສອນ ແລະ ຝຶກຝົນໃນດ້ານບວກ, ການເບິ່ງໂລກໃນແງ່ດີ, ແລະ ມີຄວາມຫວັງ. ເຖິງວ່າຈະມີການທ້າທາຍໃນອະດີດຂອງເຮົາ, ສັດທາຍ່ອມຊີ້ໄປຫາອະນາຄົດສະເໝີ,²³ ເຕັມໄປດ້ວຍຄວາມຫວັງ, ເພື່ອເຮັດໃຫ້ເຮົາບັນລຸການເຊື້ອເຊີນຈາກພຣະຜູ້ຊ່ວຍໃຫ້ລອດທີ່ວ່າຈົ່ງເບີກບານເຖີດ.²⁴ ການດຳລົງຊີວິດຕາມພຣະກິດຕິຄຸນຢ່າງມີຄວາມສຸກຊ່ວຍໃຫ້ເຮົາກາຍເປັນ ສານຸສິດແຫ່ງສິ່ງດີທີ່ຈະມາເຖິງ.

ອີກຊື່ໜຶ່ງຂອງພຣະເຢຊູຄື ເພາະພຣະອົງເປັນ ເໝືອນກັນ ເຊັ່ນ, ມື້ວານນີ້, ມື້ນີ້, ແລະ ຕະຫລອດການ.²⁵ ຄວາມສະໝ່ຳສະເໝີຄືຄຸນລັກສະນະຂອງການເປັນເໝືອນພຣະຄຣິດ. ພຣະເຢຊູຊົງປະຕິບັດຕາມພຣະປະສົງຂອງພຣະບິດາສະເໝີ,²⁶ ແລະ ພຣະພາຫາຂອງພຣະອົງຈະເດ່ອອກໄປເພື່ອຊ່ວຍໃຫ້ລອດ, ຊ່ວຍເຫລືອ, ແລະ ປິ່ນປົວເຮົາຢູ່ສະເໝີ.²⁷ ເມື່ອເຮົາດຳລົງຊີວິດຕາມພຣະກິດຕິຄຸນຢ່າງສະໝ່ຳສະເໝີຫລາຍຂຶ້ນ, ເຮົາກໍຈະກາຍເປັນເໝືອນພຣະເຢຊູຫລາຍຂຶ້ນ.²⁸ ເຖິງແມ່ນວ່າໂລກຈະປະສົບກັບຄວາມປັ່ນປ່ວນຄັ້ງໃຫຍ່ຕາມຄວາມນິຍົມທີ່ແກ່ວງໄປມາຂະນະທີ່ຜູ້ຄົນຖືກພັດໄປມາ ແລະ ຫອບໄປດ້ວຍລົມແຫ່ງຄຳສອນທຸກປະການ,²⁹ ການດຳລົງຊີວິດຕາມພຣະກິດຕິຄຸນຢ່າງສະໝ່ຳສະເໝີຈະຊ່ວຍໃຫ້ເຮົາແນ່ວແນ່ ແລະ ບໍ່ຫວັ່ນໄຫວໃນລະຫວ່າງພະຍຸແຫ່ງຊີວິດ.³⁰ ເຮົາສາມາດສະແດງຄວາມໝັ້ນຄົງໄດ້ເຊັ່ນກັນໂດຍການຍອມຮັບຄຳເຊື້ອເຊີນຂອງປະທານແນວສັນທີ່ວ່າ “ຈົ່ງຫາເວລາໃຫ້ພຣະຜູ້ເປັນເຈົ້າ.”³¹ ຄວາມເຂັ້ມແຂງທາງວິນຍານທີ່ຍິ່ງໃຫຍ່ມາຈາກເລື່ອງເລັກນ້ອຍ ແລະ ລຽບງ່າຍ³² ເຊັ່ນການພັດທະນາ “ນິໄສບໍລິສຸດ ແລະ ກິດຈະວັດທີ່ຊອບທຳ”³³ ຂອງການອະທິຖານປະຈຳວັນ, ການກັບໃຈ, ການສຶກສາພຣະຄຳພີ, ແລະ ຮັບໃຊ້ຄົນອື່ນ.

ຢ່າງທີສີ່ຄື, ພຣະຄຣິດຄື ພຣະຜູ້ບໍລິສຸດຂອງອິດສະຣາເອນ.³⁴ ພຣະຊົນຊີບຂອງພຣະເຢຊູໄດ້ເປັນແບບແຜນແຫ່ງຄວາມບໍລິສຸດ. ເມື່ອເຮົາຕິດຕາມພຣະເຢຊູ, ເຮົາຈະກາຍເປັນຜູ້ບໍລິສຸດ ໃນ ອິດສະຣາເອນ.³⁵ ເຮົາເພີ່ມພູນໃນຄວາມບໍລິສຸດເມື່ອເຮົາໄປພຣະວິຫານເປັນປະຈຳ, ຊຶ່ງຈາລຶກ “ບໍລິສຸດແດ່ພຣະຜູ້ເປັນເຈົ້າ” ຢູ່ເທິງທາງເຂົ້າທຸກບ່ອນ. ທຸກຄັ້ງທີ່ເຮົານະມັດສະການໃນພຣະວິຫານ, ເຮົາອອກມາຈາກທີ່ນັ້ນດ້ວຍຂອງປະທານສັກສິດພ້ອມກັບອຳນາດທີ່ຍິ່ງໃຫຍ່ທີ່ຈະເຮັດໃຫ້ບ້ານຂອງເຮົາເປັນສະຖານທີ່ບໍລິສຸດ.³⁶ ສຳລັບຜູ້ທີ່ຍັງບໍ່ມີໃບຮັບຮອງໃນປະຈຸບັນເພື່ອເຂົ້າໄປໃນພຣະວິຫານສັກສິດ, ຂ້າພະເຈົ້າເຊື້ອເຊີນໃຫ້ທ່ານພົບກັບອະທິການຂອງທ່ານ ແລະ ກຽມຕົວຂອງທ່ານໃນການເຂົ້າໄປ ຫລື ກັບຄືນໄປຫາສະຖານທີ່ສັກສິດນັ້ນ. ເວລາໃນພຣະວິຫານຈະຊ່ວຍເພີ່ມພູນຄວາມບໍລິສຸດໃນຊີວິດຂອງເຮົາ.

ພຣະນາມສຸດທ້າຍອີກພຣະນາມໜຶ່ງຂອງພຣະເຢຊູຄື ພຣະອົງຊົງ ສັດຊື່ ແລະ ທ່ຽງທຳ.³⁷ ດັ່ງເຊັ່ນທີ່ພຣະເຢຊູຊົງສັດຊື່ ແລະ ທ່ຽງທຳມາຕະຫລອດ, ຄວາມປາດຖະໜາອັນແຮງກ້າຂອງພຣະອົງຄືການທີ່ເຮົາສະແດງຄຸນລັກສະນະເຫລົ່ານີ້ໃນຊີວິດຂອງເຮົາ. ເມື່ອສັດທາຂອງເຮົາເສື່ອມລົງ, ເຮົາສາມາດຮ້ອງຫາພຣະເຢຊູໄດ້ວ່າ, “ພຣະອົງເຈົ້າເອີຍ, ຊ່ວຍຂ້ານ້ອຍແດ່ທ້ອນ,” ຄືກັນກັບເປໂຕທີ່ເພິ່ນກຳລັງຈົມລົງໃນທະເລທີ່ມີພະຍຸໃນຄາລີເລ.³⁸ ໃນມື້ນັ້ນ, ພຣະເຢຊູໄດ້ຢື້ລົງໄປເພື່ອຊ່ວຍເຫລືອສາວົກທີ່ກຳລັງຈະຈົມນ້ຳ. ພຣະອົງໄດ້ກະທຳແບບນັ້ນກັບຂ້າພະເຈົ້າ, ແລະ ພຣະອົງຈະກະທຳແບບດຽວກັນກັບທ່ານ. ຢ່າຍອມແພ້ໃນພຣະເຢຊູ—ພຣະອົງກໍຈະບໍ່ຍອມແພ້ໃນຕົວທ່ານ!

ເມື່ອເຮົາສັດຊື່ ແລະ ທ່ຽງທຳ, ເຮົາເຮັດຕາມການເອີ້ນຂອງພຣະເຢຊູທີ່ວ່າ “ຈົ່ງເຂົ້າສະໜິດຢູ່ໃນເຮົາ,” ຊຶ່ງມີຄວາມໝາຍເຊັ່ນກັນວ່າ “ຈົ່ງຢູ່ກັບເຮົາ.”³⁹ ເມື່ອເຮົາປະເຊີນໜ້າກັບຄຳຖາມ, ເມື່ອເຮົາຖືກເຍາະເຍີ້ຍຍ້ອນສັດທາຂອງເຮົາ, ເມື່ອບັນດາຜູ້ຄົນທີ່ຢູ່ໃນອາຄານໃຫຍ່ ແລະ ກວ້າງຂວາງຂອງໂລກຊີ້ມືມາໃສ່ເຮົາ, ໃຫ້ເຮົາຈົ່ງຍຶດໝັ້ນໃນຄວາມສັດຊື່ ແລະ ຢູ່ໃນຄວາມທ່ຽງທຳ. ໃນຊ່ວງເວລາເຫລົ່ານີ້, ໃຫ້ເຮົາລະນຶກເຖິງຄຳວິງວອນຂອງພຣະເຢຊູທີ່ວ່າ: “ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ; ຢ່າສົງໄສ, ຢ່າສູ່ຢ້ານ.”⁴⁰ ເມື່ອເຮົາກະທຳເຊັ່ນນັ້ນ, ພຣະອົງກໍຈະປະທານສັດທາ, ຄວາມຫວັງ, ແລະ ຄວາມເຂັ້ມແຂງໃຫ້ເຮົາ ເພື່ອຈະຢູ່ກັບພຣະອົງຕະຫລອດໄປ.⁴¹

ອ້າຍເອື້ອຍນ້ອງທີ່ຮັກແພງ, ພຣະເຢຊູຢາກໃຫ້ເຮົາຮູ້ຈັກພຣະອົງຍ້ອນວ່າບໍ່ມີພຣະນາມອື່ນໃດຈະປະທານໃຫ້ພາຍໃຕ້ສະຫວັນອີກເລີຍ ຊຶ່ງໂດຍທາງນັ້ນເຮົາຈະລອດໄດ້.⁴² ພຣະເຢຊູເປັນທາງນັ້ນ, ເປັນຄວາມຈິງ, ແລະ ເປັນຊີວິດ—ບໍ່ມີຜູ້ໃດສາມາດກັບຄືນຫາພຣະບິດາໄດ້ ນອກຈາກມາທາງພຣະອົງ.⁴³ ພຣະເຢຊູຄືຫົນທາງດຽວ! ຍ້ອນເຫດຜົນນັ້ນ, ພຣະເຢຊູຈຶ່ງເອີ້ນຫາເຮົາວ່າ, “ຈົ່ງມາຫາເຮົາເຖີດ,”⁴⁴ “ຕິດຕາມເຮົາມາ,”⁴⁵ “ເດີນໄປກັບເຮົາ,”⁴⁶ ແລະ “ຈົ່ງຮຽນຮູ້ຈາກເຮົາ.”⁴⁷

ດ້ວຍສຸດຈິດສຸດໃຈຂອງຂ້າພະເຈົ້າ, ຂ້າພະເຈົ້າເປັນພະຍານເຖິງພຣະເຢຊູຄຣິດວ່າ—ພຣະອົງຊົງພຣະຊົນຢູ່, ພຣະອົງຮັກທ່ານ, ແລະ ວ່າພຣະອົງຮູ້ຈັກຊື່ທ່ານ. ພຣະອົງຄືພຣະບຸດຂອງພຣະເຈົ້າ,⁴⁸ ພຣະບຸດອົງດຽວທີ່ຖືກຳເນີດຂອງພຣະບິດາ.⁴⁹ ພຣະອົງຄືຫີນສີລາຂອງເຮົາ, ເປັນປ້ອມປ້ອງກັນເຮົາ, ເປັນດັ່ງໂລ້ປົກປ້ອງເຮົາ, ເປັນບ່ອນປ້ອງກັນໃຫ້ປອດໄພຂອງເຮົາ, ແລະ ເປັນຜູ້ປົດປ່ອຍຂອງເຮົາ.⁵⁰ ພຣະອົງຄືຄວາມສະຫວ່າງຊຶ່ງສ່ອງແສງຢູ່ໃນຄວາມມືດ.⁵¹ ພຣະອົງເປັນພຣະຜູ້ຊ່ວຍໃຫ້ລອດ⁵² ແລະ ພຣະຜູ້ໄຖ່ຂອງເຮົາ.⁵³ ພຣະອົງເປັນເຫດໃຫ້ຄົນທັງປວງເປັນຄືນມາ, ທັງເປັນຊີວິດ.⁵⁴ ຄວາມປາດຖະໜາອັນແຮງກ້າຂອງຂ້າພະເຈົ້າຄືໃຫ້ທ່ານມາຮູ້ຈັກພຣະເຢຊູໃນພຣະນາມຕ່າງໆຂອງພຣະອົງ ແລະ ທ່ານຈະກາຍເປັນເໝືອນດັ່ງພຣະອົງຂະນະທີ່ທ່ານເປັນແບບຢ່າງຄຸນລັກສະນະອັນສູງສົ່ງຂອງພຣະອົງໃນຊີວິດຂອງທ່ານ. ໃນພຣະນາມຂອງພຣະເຢຊູຄຣິດ, ອາແມນ.