ມື້ນີ້

ໂດຍ ແອວເດີ ຣອນໂນ ເອ ແຣັສ໌ແບນ

ແຫ່ງກຸ່ມອັກຄະສາວົກສິບສອງ

ສາດສະດາທີ່ມີຊີວິດຢູ່ຂອງເຮົາກຳລັງເຮັດພາກສ່ວນຂອງເພິ່ນ ເພື່ອຈະເຮັດໃຫ້ໂລກເຕັມໄປດ້ວຍພຣະຄຳພີມໍມອນ. ເຮົາຕ້ອງເຮັດຕາມຕົວຢ່າງຂອງເພິ່ນ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຢູ່ໃນພຣະຄຳພີມໍມອນ ວະລີ “ມື້ນີ້”¹ ແມ່ນຖືກໃຊ້ຊ້ຳແລ້ວຊ້ຳອີກເພື່ອຮຽກຮ້ອງຄວາມສົນໃຈມາສູ່ຄຳແນະນຳ, ຄຳສັນຍາ, ແລະ ຄຳສອນ. ໃນຄຳປາໄສຄັ້ງສຸດທ້າຍຂອງກະສັດເບັນຢາມິນ, ເພິ່ນໄດ້ຕັກເຕືອນຜູ້ຄົນຂອງເພິ່ນວ່າ “ພວກທ່ານຈະໄດ້ຍິນຂໍ້ຄວາມຂອງຂ້າພະເຈົ້າໄດ້ ຊຶ່ງຂ້າພະເຈົ້າຈະເວົ້າກັບພວກທ່ານໃນມື້ນີ້; … ເປີດຫູຂອງພວກທ່ານເພື່ອພວກທ່ານຈະໄດ້ຍິນ, ແລະ ເປີດໃຈຂອງພວກທ່ານເພື່ອພວກທ່ານຈະເຂົ້າໃຈ, ແລະ ເປີດຈິດໃຈຂອງພວກທ່ານເພື່ອຄວາມລຶກລັບຂອງພຣະເຈົ້າຈະເປີດເຜີຍອອກຕໍ່ສາຍຕາຂອງພວກທ່ານ.”² ກອງປະຊຸມໃຫຍ່ສາມັນກໍມີບັນຍາກາດຄ້າຍຄືກັນນີ້. ເຮົາມາຮັບຟັງຄຳແນະນຳສຳລັບ “ມື້ນີ້,” ເພື່ອວ່າເຮົາຈະເປັນຄົນທີ່ “ເອົາການເອົາງານຢູ່ຕະຫລອດວັນເວລາ”³ ຕໍ່ພຣະຜູ້ເປັນເຈົ້າ ແລະ ພຣະກິດຕິຄຸນຂອງພຣະອົງ. ໃນ “ມື້ນີ້” ຂ້າພະເຈົ້າຮູ້ສຶກຢ່າງແຮງກ້າເຖິງຄວາມສຳຄັນຂອງການຕໍ່ຄຳໝັ້ນສັນຍາຂອງເຮົາກັບພຣະຄຳພີມໍມອນ, ຊຶ່ງໂຈເຊັບ ສະມິດ ໄດ້ເອີ້ນວ່າ “ເປັນພຣະຄຳພີທີ່ຖືກຕ້ອງທີ່ສຸດໃນໂລກ.”⁴

ຮູບພາບ

ພຣະຄຳພີມໍມອນຂອງແອວເດີ ແຣັສ໌ແບນ

ຢູ່ໃນມືຂອງຂ້າພະເຈົ້າແມ່ນພຣະຄຳພີມໍມອນ. ນີ້ແມ່ນສະບັບເກົ່າປີ 1970 ຂອງຂ້າພະເຈົ້າ, ແລະ ມັນລ້ຳຄ່າສຳລັບຂ້າພະເຈົ້າ. ຕາມທີ່ເຫັນ ມັນເບິ່ງຄືວ່າເກົ່າ ແລະ ຊຸດໂຊມ, ແຕ່ບໍ່ມີໜັງສືອື່ນໃດທີ່ສຳຄັນຕໍ່ຊີວິດ ແລະ ປະຈັກພະຍານຂອງຂ້າພະເຈົ້າເທົ່າກັບໜັງສືເຫລັ້ມນີ້. ຈາກການອ່ານ, ຂ້າພະເຈົ້າໄດ້ຮັບປະຈັກພະຍານຈາກພຣະວິນຍານວ່າ ພຣະເຢຊູຄຣິດເປັນພຣະບຸດຂອງພຣະເຈົ້າ,⁵ ວ່າພຣະອົງເປັນພຣະຜູ້ຊ່ວຍໃຫ້ລອດຂອງຂ້າພະເຈົ້າ,⁶ ວ່າພຣະຄຳພີເຫລົ່ານີ້ແມ່ນພຣະຄຳຂອງພຣະເຈົ້າ,⁷ ແລະ ວ່າພຣະກິດຕິຄຸນໄດ້ຖືກຟື້ນຟູແລ້ວ.⁸ ຄວາມຈິງເຫລົ່ານີ້ໄດ້ຝັງເລິກໃນຕົວຂ້າພະເຈົ້າ. ດັ່ງທີ່ສາດສະດານີໄຟໄດ້ກ່າວ, “ຈິດວິນຍານຂອງຂ້າພະເຈົ້າເບີກບານໃນເລື່ອງຂອງພຣະຜູ້ເປັນເຈົ້າ.”⁹

ຊ້າຍຫາຂວາ: ແອວເດີ ຣອນໂນ ເອ ແຣັສ໌ແບນ, ຜູ້ສອນສາດສາດສະໜາໜຸ່ມ; ປະທານແຮໂຣນ ວິວກິນສັນ, ປະທານເຂດເຜີຍແຜ່ສະຫະລັດພາກຕາເວັນອອກ, ແລະ ແອວເດີ ມາຣີອອນ ດີ ແຮ້ງສ໌, ສາວົກເຈັດສິບ.

ນີ້ຄືປະຫວັດຂອງພຣະຄຳພີເຫລັ້ມນີ້. ຕອນເປັນຜູ້ສອນສາດສະໜາໜຸ່ມ, ຂ້າພະເຈົ້າໄດ້ຮັບເອົາຄຳແນະນຳຂອງແອວເດີ ມາຣີອອນ ດີ ແຮ້ງສ໌, ທີ່ໄດ້ຢ້ຽມຢາມພວກເຮົາໃນເຂດເຜີຍແຜ່ສະຫະລັດພາກຕາວັນອອກ. ເພິ່ນໄດ້ເປັນອະດີດປະທານເຜີຍແຜ່ເຂດອັງກິດ, ແລະ ຜູ້ສອນສາດສະໜາຂອງເພິ່ນສອງຄົນກໍຢູ່ເທິງເວທີນີ້ໃນມື້ນີ້: ແອວເດີ ແຈັບຟະຣີ ອາ ຮໍແລນ ແລະ ແອວເດີ ຄວິນຕິນ ແອວ ຄຸກ ອ້າຍນ້ອງທີ່ຮັກແພງຂອງຂ້າພະເຈົ້າ.¹⁰ ດັ່ງທີ່ເພິ່ນໄດ້ທ້າທາຍຜູ້ສອນສາດສະໜາຂອງເພິ່ນຢູ່ປະເທດອັງກິດ, ເພິ່ນກໍໄດ້ທ້າທາຍພວກເຮົາໃຫ້ອ່ານພຣະຄຳພີມໍມອນທີ່ຍັງບໍ່ມີໝາຍເຫດໃດໆວ່າຢ່າງໜ້ອຍສອງເທື່ອ. ຂ້າພະເຈົ້າກໍໄດ້ຮັບເອົາການທ້າທາຍນັ້ນ. ການອ່ານເທື່ອທຳອິດຂ້າພະເຈົ້າຕ້ອງໝາຍເຫດ ຫລື ຂີດໝາຍຢູ່ກ້ອງທຸກສິ່ງທີ່ແນະນຳໃຫ້ເອົາໃຈໃສ່ ຫລື ເປັນພະຍານເຖິງພຣະເຢຊູຄຣິດ. ຂ້າພະເຈົ້າໄດ້ໃຊ້ສໍສີແດງ, ແລະ ຂ້າພະເຈົ້າໄດ້ຂີດໝາຍຢູ່ກ້ອງຫລາຍໆຂໍ້. ເທື່ອທີສອງ, ແອວເດີ ແຮ້ງສ໌ ໄດ້ເວົ້າວ່າໃຫ້ໝາຍຫລັກທຳ ແລະ ຄຳສອນຂອງພຣະກິດຕິຄຸນດ້ວຍສີ, ແລະ ເທື່ອນີ້ຂ້າພະເຈົ້າໄດ້ໃຊ້ສໍສີຟ້າຂີດໝາຍພຣະຄຳພີ. ຂ້າພະເຈົ້າໄດ້ອ່ານພຣະຄຳພີມໍມອນສອງເທື່ອ, ດັ່ງທີ່ຖືກແນະນຳ, ແລະ ແລ້ວອີກສອງເທື່ອ, ໂດຍການໃຊ້ສີເຫລືອງ ແລະ ສີດຳໝາຍຂໍ້ທີ່ສຳຄັນສຳລັບຂ້າພະເຈົ້າ.¹¹ ຕາມທີ່ທ່ານເຫັນໄດ້, ຂ້າພະເຈົ້າໄດ້ໝາຍເຫດໄວ້ຫລາຍໆບ່ອນ.

ຮູບພາບ

ພຣະຄຳພີມໍມອນທີ່ມີຮອຍໝາຍ

ການອ່ານຂອງຂ້າພະເຈົ້າມີຄວາມໝາຍຫລາຍກວ່າພຽງແຕ່ການຂີດໝາຍພຣະຄຳພີເທົ່ານັ້ນ. ແຕ່ລະເທື່ອທີ່ໄດ້ອ່ານພຣະຄຳພີມໍມອນ, ຕັ້ງແຕ່ຕົ້ນຈົນຈົບ, ຂ້າພະເຈົ້າໄດ້ຮູ້ສຶກເຕັມໄປດ້ວຍຄວາມຮັກທີ່ເລິກເຊິ່ງຕໍ່ພຣະຜູ້ເປັນເຈົ້າ. ຂ້າພະເຈົ້າຮູ້ສຶກເຖິງພະຍານທີ່ຈຳເປັນ ແລະ ເລິກເຊິ່ງເຖິງຄວາມຈິງຂອງຄຳສອນຂອງພຣະອົງ ແລະ ວ່າມັນກ່ຽວຂ້ອງກັບ “ມື້ນີ້” ແນວໃດ. ໜັງສືເຫລັ້ມນີ້ເໝາະສົມດີກັບຊື່ຂອງມັນ, “ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ.”¹² ດ້ວຍການສືກສານັ້ນ ແລະ ການເປັນພະຍານທາງວິນຍານທີ່ຂ້າພະເຈົ້າໄດ້ຮັບ, ຂ້າພະເຈົ້າໄດ້ກາຍເປັນຜູ້ສອນສາດສະໜາຂອງພຣະຄຳພີມໍມອນ ແລະ ສານຸສິດຂອງພຣະເຢຊູຄຣິດ.¹³

ໃນ “ມື້ນີ້,” ຜູ້ສອນສາດສະໜາຂອງພຣະຄຳພີມໍມອນທີ່ຍິ່ງໃຫຍ່ທີ່ສຸດແມ່ນ ປະທານຣະໂຊ ເອັມ ແນວສັນ. ຕອນເພິ່ນຫາກໍຖືກເອີ້ນເປັນອັກຄະສາວົກ, ເພິ່ນໄດ້ກ່າວປາໄສຢູ່ທີ່ເມືອງອັກຄຣາ, ປະເທດການາ.¹⁴ ຢູ່ໃນງານນັ້ນມີເຈົ້າໜ້າທີ່ຜູ້ມີກຽດເຂົ້າຮ່ວມດ້ວຍ, ລວມທັງກະສັດຊົນເຜົ່າອາຟຣີກາທ່ານໜຶ່ງ, ທີ່ເພິ່ນໄດ້ໂອ້ລົມຜ່ານທາງນາຍແປພາສາ. ກະສັດທ່ານນັ້ນເປັນນັກສຶກສາພຣະຄຣິສຕະທຳຄຳພີຢ່າງຈິງຈັງ ແລະ ເພິ່ນຮັກພຣະຜູ້ເປັນເຈົ້າ. ຫລັງຈາກການປາໄສຂອງປະທານແນວສັນ, ກະສັດໄດ້ເຂົ້າມາຫາເພິ່ນ, ໄດ້ຖາມເປັນພາສາອັງກິດທີ່ຄ່ອງແຄ້ວທີ່ສຸດວ່າ, “ທ່ານເປັນໃຜກັນແນ່?” ປະທານແນວສັນໄດ້ອະທິບາຍວ່າເພິ່ນເປັນອັກຄະສາວົກທີ່ຖືກແຕ່ງຕັ້ງຂອງພຣະເຢຊູຄຣິດ.¹⁵ ກະສັດຖາມຕໍ່ວ່າ “ເຈົ້າສາມາດສອນຫຍັງແດ່ໃຫ້ຂ້ອຍ ກ່ຽວກັບພຣະເຢຊູຄຣິດ?”¹⁶

ປະທານແນວສັນໄດ້ຢິບເອົາພຣະຄຳພີມໍມອນອອກມາ ແລະ ໄດ້ເປີດໄປຫາ 3 ນີໄຟ 11. ນຳກັນ ປະທານແນວສັນ ແລະ ກະສັດໄດ້ອ່ານຄຳເທດສະໜາຂອງພຣະຜູ້ຊ່ວຍໃຫ້ລອດຕໍ່ຊາວນີໄຟວ່າ: “ຈົ່ງເບິ່ງ, ເຮົາຄືພຣະເຢຊູຄຣິດ, ຜູ້ທີ່ສາດສະດາໄດ້ໃຫ້ຖ້ອຍຄຳວ່າຈະມາຍັງໂລກນີ້. … ເຮົາເປັນຄວາມສະຫວ່າງ ແລະ ຊີວິດຂອງໂລກ.”¹⁷

ປະທານແນວສັນໄດ້ມອບພຣະຄຳພີມໍມອນສະບັບນັ້ນໃຫ້ແກ່ກະສັດ, ແລະ ກະສັດໄດ້ເວົ້າວ່າ, “ຖ້າເຈົ້າເອົາເພັດພອຍໃຫ້ຂ້ອຍ, ກໍບໍ່ມີຄ່າເທົ່າກັບການເພີ່ມເຕີມຄວາມຮູ້ກ່ຽວກັບອົງພຣະເຢຊູຄຣິດເຈົ້າໃຫ້ຂ້ອຍ.”¹⁸

ນີ້ບໍ່ໄດ້ເປັນຕົວຢ່າງດຽວທີ່ສາດສະດາທີ່ຮັກແພງຂອງເຮົາແບ່ງປັນພຣະຄຳພີມໍມອນ. ເພິ່ນໄດ້ມອບພຣະຄຳພີມໍມອນໃຫ້ຫລາຍຮ້ອຍຄົນ, ສະແດງການເປັນພະຍານຂອງເພິ່ນເຖິງພຣະເຢຊູຄຣິດສະເໝີ. ເມື່ອປະທານແນວສັນພົບປະກັບແຂກຄົນ, ປະທານ, ກະສັດ, ເຈົ້າໜ້າທີ່, ແລະ ຜູ້ນຳທຸລະກິດ ແລະ ອົງການ ແລະ ສາດສະໜາອື່ນໆທີ່ຫລາກຫລາຍ, ບໍ່ວ່າຢູ່ທີ່ສຳນັກງານຂອງສາດສະໜາຈັກ ຫລື ຢູ່ທີ່ສະຖານທີ່ຂອງພວກເພິ່ນກໍຕາມ, ເພິ່ນຈະມອບປຶ້ມພຣະຄຳພີທີ່ເປີດເຜີຍເຫລັ້ມນີ້ໃຫ້ດ້ວຍຄວາມຄາລະວະ. ເພິ່ນສາມາດມອບສິ່ງອື່ນໆຫລາຍຢ່າງຫໍ່ດ້ວຍໂບ ທີ່ສາມາດວາງໄວ້ທີ່ໂຕະ ຫລື ທີ່ວາງຂອງເພື່ອເປັນການເຕືອນໃຈເຖິງການຢ້ຽມຢາມຂອງເພິ່ນ. ແຕ່, ເພິ່ນມອບສິ່ງທີ່ລ້ຳຄ່າທີ່ສຸດສຳລັບເພິ່ນ, ເໜືອກວ່າເພັດພອຍ, ດັ່ງທີ່ກະສັດຊົນເຜົ່າໄດ້ບັນຍາຍ.

“ຄວາມຈິງຂອງພຣະຄຳພີມໍມອນ,” ປະທານແນວສັນໄດ້ກ່າວ, “ມີ ພະລັງ ທີ່ຈະປິ່ນປົວ, ປອບໂຍນ, ຟື້ນຟູ, ຊ່ວຍເຫລືອ, ເພີ່ມຄວາມເຂັ້ມແຂງ, ເຮັດໃຫ້ສະບາຍໃຈຂຶ້ນ, ແລະ ເປັນກຳລັງໃຈໃຫ້ຈິດວິນຍານຂອງເຮົາ.”¹⁹ ຂ້າພະເຈົ້າໄດ້ເຫັນພຣະຄຳພີມໍມອນເຫລົ່ານີ້ຖືກຈັບໄວ້ໃຫ້ແໜ້ນໃນມືຂອງຜູ້ຄົນທີ່ໄດ້ຮັບມັນຈາກສາດສະດາຂອງພຣະເຈົ້າຂອງເຮົາ. ຈະບໍ່ມີຂອງຂວັນທີ່ດີກວ່ານີ້ເລີຍ.

ຮູບພາບ

ປະທານແນວສັນກັບພັນລະຍາຂອງປະທານປະເທດແກມບີ

ເມື່ອບໍ່ດົນມານີ້ເພິ່ນໄດ້ພົບກັບພັນລະຍາຂອງປະທານປະເທດແກມບີ ຢູ່ທີ່ຫ້ອງທຳງານຂອງເພິ່ນ ແລະ ເພິ່ນໄດ້ມອບພຣະຄຳພີມໍມອນໃຫ້ແກ່ຍານາງດ້ວຍຄວາມຖ່ອມຕົນ. ເພິ່ນບໍ່ໄດ້ຢຸດຢູ່ພຽງເທົ່ານັ້ນ. ເພິ່ນໄດ້ເປີດອ່ານກັບຍານາງ, ເພື່ອສິດສອນ ແລະ ເປັນພະຍານເຖິງພຣະເຢຊູຄຣິດ, ການຊົດໃຊ້ຂອງພຣະອົງ, ແລະ ເຖິງຄວາມຮັກຂອງພຣະອົງທີ່ມີຕໍ່ລູກໆຂອງພຣະເຈົ້າທຸກໆຄົນ—ໃນທຸກບ່ອນ.

ສາດສະດາທີ່ມີຊີວິດຢູ່ຂອງເຮົາກຳລັງເຮັດພາກສ່ວນຂອງເພິ່ນ ເພື່ອຈະເຮັດໃຫ້ໂລກເຕັມໄປດ້ວຍພຣະຄຳພີມໍມອນ.²⁰ ແຕ່ເພິ່ນຈະເຮັດສິ່ງນີ້ຄົນດຽວບໍ່ໄດ້. ເຮົາຕ້ອງເຮັດຕາມຕົວຢ່າງຂອງເພິ່ນ.

ໂດຍໄດ້ຮັບການດົນໃຈຈາກຕົວຢ່າງຂອງເພິ່ນ, ຂ້າພະເຈົ້າໄດ້ພະຍາຍາມດ້ວຍຄວາມຖ່ອມຕົນ ແລະ ຢ່າງແຮງກ້າຫລາຍຂຶ້ນທີ່ຈະແບ່ງປັນພຣະຄຳພີມໍມອນ.

ຮູບພາບ

ແອວເດີ ແຣັສ໌ແບນ ກັບປະທານປະເທດໂມຊຳບິກ

ເມື່ອບໍ່ດົນມານີ້ຂ້າພະເຈົ້າໄດ້ໄປປະຕິບັດໜ້າທີ່ມອບໝາຍຢູ່ທີ່ປະເທດໂມຊຳບິກ. ປະຊາຊົນຂອງປະເທດທີ່ສວຍງາມແຫ່ງນີ້ກຳລັງດີ້ນລົນຢູ່ກັບຄວາມທຸກຍາກ, ສຸຂະພາບທີ່ຊຸດໂຊມ, ການຕົກງານ, ພະຍຸ, ແລະ ຄວາມວຸ້ນວາຍທາງດ້ານການເມືອງ. ຂ້າພະເຈົ້າໄດ້ຮັບກຽດທີ່ໄດ້ພົບກັບທ່ານຟີລິບ ໄນຢູຊີ, ປະທານປະເທດ. ຕາມທີ່ເພິ່ນໄດ້ຂໍຮ້ອງ, ຂ້າພະເຈົ້າໄດ້ອະທິຖານເພື່ອເພິ່ນ ແລະ ປະເທດຂອງເພິ່ນ; ຂ້າພະເຈົ້າໄດ້ບອກເພິ່ນວ່າ ພວກເຮົາກຳລັງສ້າງພຣະວິຫານຂອງພຣະເຢຊູຄຣິດ²¹ ໃນປະເທດຂອງເພິ່ນ. ໃນທ້າຍການຢ້ຽມຢາມຂອງພວກເຮົາ, ຂ້າພະເຈົ້າໄດ້ມອບພຣະຄຳພີມໍມອນເຫລັ້ມໜຶ່ງໃຫ້ເພິ່ນເປັນພາສາປອກຕຸຍການ, ທີ່ເປັນພາສາຂອງເພິ່ນ. ຂະນະທີ່ເພິ່ນໄດ້ຮັບເອົາພຣະຄຳພີດ້ວຍຄວາມກະຕັນຍູ, ຂ້າພະເຈົ້າໄດ້ເປັນພະຍານເຖິງຄວາມຫວັງ ແລະ ຄຳສັນຍາສຳລັບຜູ້ຄົນຂອງເພິ່ນ, ທີ່ພົບເຫັນຢູ່ໃນພຣະຄຳຂອງພຣະຜູ້ເປັນເຈົ້າຢູ່ໃນພຣະຄຳພີນັ້ນ.²²

ຮູບພາບ

ແອວເດີ ແຣັສ໌ແບນ ກັບກະສັດ ແລະ ລາຊີນີຂອງປະເທດເລໂຊໂຕ

ໃນອີກໂອກາດໜຶ່ງ, ເມລານີ, ພັນລະຍາຂອງຂ້າພະເຈົ້າ ແລະ ຂ້າພະເຈົ້າໄດ້ພົບກະສັດ ເລັດຊີ ອົງທີສາມ ຂອງປະເທດເລໂຊໂຕ ແລະ ພັນລະຍາຂອງເພິ່ນ ຢູ່ທີ່ບ້ານຂອງພວກເພິ່ນ.²³ ສຳລັບພວກເຮົາ, ຈຸດເດັ່ນຂອງການຢ້ຽມຢາມແມ່ນການມອບພຣະຄຳພີມໍມອນໃຫ້ພວກເພິ່ນ ແລະ ແລ້ວແບ່ງປັນປະຈັກພະຍານຂອງຂ້າພະເຈົ້າ. ເມື່ອຂ້າພະເຈົ້າຫວນຄິດເຖິງປະສົບການນັ້ນ ແລະ ປະສົບການອື່ນໆ, ຂ້າພະເຈົ້າກໍຄິດເຖິງຂໍ້ພຣະຄຳພີຍຸກສຸດທ້າຍທີ່ວ່າ: “ເພື່ອຄວາມສົມບູນແຫ່ງພຣະກິດຕິຄຸນຂອງເຮົາຈະຖືກປ່າວປະກາດໂດຍຄົນທີ່ອ່ອນແອ ແລະ ຄົນທີ່ຕ່ຳຕ້ອຍຈົນເຖິງທີ່ສຸດຂອງໂລກ, ແລະ ຕໍ່ບັນດາກະສັດ ແລະ ຜູ້ປົກຄອງ.”²⁴

ຮູບພາບ

ແອວເດີ ແຣັສ໌ແບນ ກັບທ່ານທູດແພນດີ

ຮູບພາບ

ຜູ້ນຳຂອງສາດສະໜາຈັກກັບຄຸນພໍ່ບັດຕາໂລມິວ

ຂ້າພະເຈົ້າໄດ້ມອບພຣະຄຳພີມໍມອນໃຫ້ແກ່ທ່ານທູດ ອິນດຣາ ມານີ ແພນດີ ຂອງປະເທດອິນເດຍ, ທີ່ປະຈຳຕຳແໜ່ງທີ່ສະຫະປະຊາຊາດທີ່ເມືອງເຈນີວາ²⁵; ກັບຄຸນພໍ່ບັດຕາໂລມິວ²⁶ ຈາກໂບດໂອຕະດອກສ໌ພາກຕາເວັນອອກ, ແລະ ຫລາຍໆທ່ານຕື່ມອີກ. ຂ້າພະເຈົ້າໄດ້ຮູ້ສຶກພຣະວິນຍານຂອງພຣະຜູ້ຊ່ວຍໃຫ້ລອດສະຖິດຢູ່ກັບພວກເຮົາຂະນະທີ່ຂ້າພະເຈົ້າຍື່ນ “ຫລັກສີລາສຳຄັນຂອງສາດສະໜາຂອງພວກເຮົາ” ນີ້ໃຫ້ແກ່ພວກເພິ່ນ²⁷ ແລະ ໄດ້ກ່າວເປັນພະຍານເຖິງພຣະເຢຊູຄຣິດທີ່ເປັນ, ຫີນເສົາເອກຂອງສັດທາຂອງເຮົາ.²⁸

ບັດນີ້, ອ້າຍເອື້ອຍນ້ອງທັງຫລາຍ, ທ່ານບໍ່ຈຳເປັນຕ້ອງໄປທີ່ປະເທດໂມຊຳບິກ ຫລື ປະເທດອິນເດຍ ຫລື ພົບປະກັບກະສັດ ຫລື ຜູ້ປົກຄອງ ເພື່ອຈະມອບໜັງສືທີ່ມີຄຳສອນ ແລະ ຄຳສັນຍາສັກສິດເຫລັ້ມນີ້ໃຫ້ຄົນໃດຄົນໜຶ່ງ. ຂ້າພະເຈົ້າຂໍເຊື້ອເຊີນທ່ານໃນ, ມື້ນີ້, ໃຫ້ມອບພຣະຄຳພີມໍມອນໃຫ້ໝູ່ເພື່ອນ ແລະ ຄອບຄົວຂອງທ່ານ, ເພື່ອນຮ່ວມງານຂອງທ່ານ, ຄູສອນການເຕະບານຂອງທ່ານ, ຫລື ພໍ່ຄ້າຂາຍໝາກໄມ້ຢູ່ທີ່ຕະຫລາດ. ເຂົາເຈົ້າຕ້ອງການພຣະຄຳຂອງພຣະຜູ້ເປັນເຈົ້າທີ່ພົບເຫັນຢູ່ໃນໜັງສືເຫລັ້ມນີ້. ເຂົາເຈົ້າຕ້ອງການຄຳຕອບຕໍ່ຄຳຖາມຂອງຊີວິດປະຈຳວັນ ແລະ ຊີວິດນິລັນດອນທີ່ຈະມາເຖິງ. ເຂົາເຈົ້າຕ້ອງການຈະຮູ້ເຖິງເສັ້ນທາງແຫ່ງພັນທະສັນຍາ ທີ່ຖືກວາງໄວ້ຕໍ່ໜ້າເຂົາເຈົ້າ ແລະ ຄວາມຮັກອັນຍືນຍົງຂອງພຣະຜູ້ເປັນເຈົ້າທີ່ມີຕໍ່ເຂົາເຈົ້າ. ມັນເຕັມຢູ່ໃນພຣະຄຳພີມໍມອນນີ້.

ເມື່ອທ່ານຍື່ນພຣະຄຳພີມໍມອນໃຫ້ເຂົາເຈົ້າ, ທ່ານກຳລັງເປີດຄວາມຄິດ ແລະ ໃຈຂອງເຂົາເຈົ້າຕໍ່ພຣະຄຳຂອງພຣະເຈົ້າ. ທ່ານບໍ່ຈຳເປັນຕ້ອງຖືພຣະຄຳພີເປັນປຶ້ມໄປຕິດຕົວ. ທ່ານສາມາດແບ່ງປັນມັນໄດ້ງ່າຍໆຈາກໂທລະສັບມືຖືຂອງທ່ານ ຈາກພາກພຣະຄຳພີໃນແອັບຫ້ອງສະໝຸດພຣະກິດຕິຄຸນ.²⁹

ໃຫ້ຄິດເຖິງຄົນທີ່ຈະໄດ້ຮັບພອນຈາກພຣະກິດຕິຄຸນໃນຊີວິດຂອງເຂົາເຈົ້າ, ແລະ ແລ້ວໃຫ້ສົ່ງພຣະຄຳພີມໍມອນຈາກໂທລະສັບມືຖືຂອງທ່ານໄປໃຫ້ເຂົາເຈົ້າ. ຢ່າລືມຮວມປະຈັກພະຍານຂອງທ່ານໃສ່ນຳ ແລະ ວິທີທີ່ໜັງສືເຫລັ້ມນີ້ໄດ້ເປັນພອນໃຫ້ແກ່ຊີວິດຂອງທ່ານແນວໃດ.

ເພື່ອນທີ່ຮັກແພງຂອງຂ້າພະເຈົ້າ, ໃນຖານະອັກຄະສາວົກຂອງພຣະຜູ້ເປັນເຈົ້າ, ຂ້າພະເຈົ້າເຊື້ອເຊີນທ່ານໃຫ້ເຮັດຕາມຕົວຢ່າງຂອງສາດສະດາທີ່ຮັກແພງຂອງເຮົາ, ປະທານແນວສັນ, ໃນການເຮັດໃຫ້ແຜ່ນດິນໂລກເຕັມໄປດ້ວຍພຣະຄຳພີມໍມອນ. ຄວາມຕ້ອງການກໍມີຫລາຍ; ເຮົາຕ້ອງລົງມືກະທຳໃນເວລານີ້. ຂ້າພະເຈົ້າສັນຍາວ່າທ່ານຈະເປັນພາກສ່ວນໃນ “ວຽກງານ ທີ່ຍິ່ງໃຫຍ່ທີ່ສຸດ ຢູ່ເທິງແຜ່ນດິນໂລກ,” ການເຕົ້າໂຮມອິດສະຣາເອນ,³⁰ ຂະນະທີ່ທ່ານໄດ້ຮັບການດົນໃຈທີ່ຈະເອື້ອມອອກໄປຫາຜູ້ຄົນທີ່ “ຖືກກີດກັນຈາກຄວາມຈິງ ເພາະພວກເຂົາບໍ່ຮູ້ວ່າຈະຊອກຫາມັນໄດ້ຢູ່ບ່ອນໃດ.”³¹ ເຂົາເຈົ້າຕ້ອງການປະຈັກພະຍານ ແລະ ການເປັນພະຍານຂອງທ່ານວ່າ ໜັງສືເຫລັ້ມນີ້ໄດ້ປ່ຽນຊີວິດຂອງທ່ານ ແລະ ໄດ້ນຳທ່ານມາໃກ້ຊິດກັບພຣະເຈົ້າ, ຄວາມສັນຕິສຸກຂອງພຣະອົງ³² ແລະ “ຂ່າວແຫ່ງຄວາມປິຕິຍິນດີອັນຍິ່ງໃຫຍ່” ຂອງພຣະອົງແນວໃດ.³³

ຂ້າພະເຈົ້າເປັນພະຍານວ່າ ຕາມພຣະປະສົງແຫ່ງສະຫວັນ ພຣະຄຳພີມໍມອນໄດ້ຖືກກະກຽມໄວ້ທີ່ອະເມຣິກາສະໄໝບູຮານ ເພື່ອໃຫ້ອອກມາປະກາດພຣະຄຳຂອງພຣະເຈົ້າ, ເພື່ອນຳຈິດວິນຍານມາຫາອົງພຣະເຢຊູຄຣິດເຈົ້າ ແລະ ພຣະກິດຕິຄຸນທີ່ຟື້ນຟູຂອງພຣະອົງໃນ “ມື້ນີ້.” ໃນພຣະນາມຂອງພຣະເຢຊູຄຣິດ, ອາແມນ.