ການເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນ
ການສະແຫວງຫາທີ່ຈະໄດ້ຮູ້ຈັກ ແລະ ຮັກພຣະຜູ້ຊ່ວຍໃຫ້ລອດ, ເຮົາແຍກຕົວເອງອອກຈາກໂລກ ຜ່ານທາງພັນທະສັນຍາກັບພຣະເຈົ້າ, ໂດຍການເປັນຄົນແຕກຕ່າງ, ບໍ່ທຳມະດາ, ແລະ ພິເສດ, ໂດຍທີ່ບໍ່ແຍກຕົວອອກຫ່າງຈາກຄົນອື່ນ ຜູ້ເຊື່ອຖືແຕກຕ່າງ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຄ່ຳຄືນນີ້ຂ້າພະເຈົ້າກ່າວກັບຜູ້ຕິດຕາມທີ່ຖ່ອມຕົວ ແລະ ອຸທິດຕົນຂອງພຣະເຢຊູຄຣິດ. ເມື່ອຂ້າພະເຈົ້າເຫັນຄວາມດີງາມໃນຊີວິດຂອງທ່ານ ແລະ ສັດທາຂອງທ່ານໃນພຣະຜູ້ຊ່ວຍໃຫ້ລອດຂອງເຮົາຢູ່ທີ່ນີ້ ໃນປະເທດນີ້ ແລະ ໃນປະເທດອື່ນໆຕະຫລອດທົ່ວໂລກ, ຂ້າພະເຈົ້າຮັກທ່ານຫລາຍຂຶ້ນ.
ໃນທ້າຍການປະຕິບັດສາດສະໜາກິດຂອງພຣະອົງ, ສານຸສິດຂອງພຣະເຢຊູໄດ້ຂໍໃຫ້ພຣະອົງບອກພວກເຂົາກ່ຽວກັບ “ໝາຍສຳຄັນເຖິງ [ການສະເດັດມາຄັ້ງທີສອງຂອງພຣະອົງ], ແລະ ເຖິງການສິ້ນສຸດຂອງໂລກ.”1
ພຣະເຢຊູໄດ້ບອກພວກເຂົາເຖິງສະພາບທີ່ຈະເກີດຂຶ້ນກ່ອນການສະເດັດກັບມາຂອງພຣະອົງ ແລະ ໄດ້ສະຫລຸບໂດຍການປະກາດວ່າ, “ເມື່ອພວກເຈົ້າເຫັນເຫດການເກີດຂຶ້ນ, [ພວກເຈົ້າຈະ] ຮູ້ໄດ້ວ່າ ເວລາໃກ້ເຂົ້າມາແລ້ວ.”2
ໃນກອງປະຊຸມໃຫຍ່ສາມັນຄັ້ງທີແລ້ວ, ຂ້າພະເຈົ້າໄດ້ຕັ້ງໃຈຈົດຈໍ່ຟັງຖ້ອຍຄຳຂອງປະທານເຮັນຣີ ບີ ໄອຣິງ ທີ່ວ່າ: “ເຮົາແຕ່ລະຄົນ,” ເພິ່ນກ່າວ, “ບໍ່ວ່າເຮົາຈະຢູ່ໃສ, ຕ່າງກໍຮູ້ວ່າ ເຮົາມີຊີວິດຢູ່ໃນຊ່ວງເວລາທີ່ອັນຕະລາຍຫລາຍຂຶ້ນເລື້ອຍໆ. … ຜູ້ໃດມີຕາເພື່ອເຫັນສັນຍານຂອງເວລາ ແລະ ມີຫູເພື່ອໄດ້ຍິນຖ້ອຍຄຳຂອງສາດສະດາ ກໍຮູ້ວ່າເປັນຄວາມຈິງ.”3
ພຣະຜູ້ຊ່ວຍໃຫ້ລອດໄດ້ຍົກຍ້ອງສານຸສິດທີ່ກ້າຫານຂອງພຣະອົງວ່າ: “ຕາ ຂອງພວກເຈົ້າ ກໍເປັນສຸກແລ້ວ, ເພາະພວກເຈົ້າໄດ້ເຫັນ: ແລະ ຫູ ຂອງພວກເຈົ້າ ກໍເປັນສຸກແລ້ວ, ເພາະໄດ້ຍິນ.”4 ຂໍໃຫ້ພອນນີ້ເປັນຂອງເຮົາ ເມື່ອເຮົາຮັບຟັງພຣະຄຳຂອງພຣະຜູ້ເປັນເຈົ້າຢ່າງໃກ້ຊິດ ຜ່ານທາງສາດສະດາຂອງພຣະອົງ ແລະ ຄົນອື່ນໆໃນກອງປະຊຸມໃຫຍ່ນີ້.
ເຂົ້າດີ ແລະ ເຂົ້ານົກ
ພຣະຜູ້ເປັນເຈົ້າໄດ້ອະທິບາຍວ່າ ໃນຄັ້ງສຸດທ້າຍກ່ອນພຣະອົງຈະກັບຄືນມາ, “ເຂົ້າດີ,” ທີ່ພຣະອົງບັນຍາຍວ່າເປັນ “ປະຊາຊົນແຫ່ງອານາຈັກ,”5 ຈະເຕີບໂຕຂຶ້ນກັບ “ເຂົ້ານົກ,” ຫລື ຜູ້ທີ່ບໍ່ຮັກພຣະເຈົ້າ ແລະ ບໍ່ຮັກສາພຣະບັນຍັດຂອງພຣະອົງ. ທັງສອງ “ຈະເຕີບໂຕ,”6 ໄປນຳກັນ.
ນີ້ຈະເປັນໂລກຂອງເຮົາຈົນກວ່າພຣະຜູ້ຊ່ວຍໃຫ້ລອດຈະກັບຄືນມາ, ຊຶ່ງມີຫລາຍສິ່ງທີ່ດີ ແລະ ຫລາຍສິ່ງທີ່ຊົ່ວຮ້າຍຢູ່ຮອບດ້ານ.7
ບາງເທື່ອທ່ານອາດບໍ່ຮູ້ສຶກເປັນເຂົ້າດີທີ່ເຂັ້ມແຂງ ແລະ ໃຫຍ່ພໍ. ຈົ່ງມີຄວາມອົດທົນກັບຕົວທ່ານເອງ! ພຣະຜູ້ເປັນເຈົ້າກ່າວວ່າ ເຂົ້າດີອາດລວມທັງ ພວມປົ່ງໃບອ່ອນ.8 ເຮົາທຸກຄົນເປັນໄພ່ພົນຍຸກສຸດທ້າຍຂອງພຣະອົງ, ແລະ ເຖິງແມ່ນວ່າເຮົາຍັງບໍ່ແມ່ນທຸກຢ່າງທີ່ຢາກເປັນ, ແຕ່ເຮົາຈິງຈັງໃນຄວາມປາດຖະໜາຂອງເຮົາທີ່ຈະເປັນສານຸສິດທີ່ແທ້ຈິງຂອງພຣະອົງ.
ເສີມສ້າງສັດທາຂອງເຮົາໃນພຣະເຢຊູຄຣິດ
ເຮົາຮັບຮູ້ວ່າ ເມື່ອຄວາມຊົ່ວຮ້າຍມີເພີ່ມຫລາຍຂຶ້ນຢູ່ໃນໂລກ, ຄວາມຢູ່ລອດທາງວິນຍານຂອງເຮົາ, ແລະ ຄວາມຢູ່ລອດທາງວິນຍານຂອງຄົນທີ່ເຮົາຮັກ, ຈະຮຽກຮ້ອງໃຫ້ເຮົາຫລໍ່ລ້ຽງ, ປ້ອງກັນ, ແລະ ໃຫ້ຄວາມເຂັ້ມແຂງແກ່ຮາກແຫ່ງສັດທາຂອງເຮົາໃນພຣະເຢຊູຄຣິດຫລາຍຂຶ້ນ. ອັກຄະສາວົກໂປໂລໄດ້ແນະນຳເຮົາໃຫ້ຢັ່ງຮາກ,9 ຄົງທີ່, ແລະ ຍຶດໝັ້ນ10 ໃນຄວາມຮັກຂອງເຮົາທີ່ມີຕໍ່ພຣະຜູ້ຊ່ວຍໃຫ້ລອດ ແລະ ຄວາມຕັ້ງໃຈຂອງເຮົາທີ່ຈະຕິດຕາມພຣະອົງ. ມື້ນີ້ ແລະ ໃນວັນຂ້າງໜ້າ ຈະຮຽກຮ້ອງຄວາມພະຍາຍາມທີ່ມີສະມາທິ ແລະ ຄວາມຕັ້ງໃຈຫລາຍຂຶ້ນ, ໃນການປ້ອງກັນຈາກການຫັນປ່ຽນ ແລະ ການບໍ່ສົນໃຈ.11
ແຕ່ເຖິງແມ່ນອິດທິພົນທາງໂລກມີເພີ່ມຂຶ້ນຮອບຕົວເຮົາ, ແຕ່ເຮົາບໍ່ຈຳເປັນຕ້ອງຢ້ານ. ພຣະຜູ້ເປັນເຈົ້າຈະບໍ່ເຄີຍປະຖິ້ມຜູ້ຄົນແຫ່ງພັນທະສັນຍາຂອງພຣະອົງ. ມັນມີພະລັງຊົດເຊີຍຂອງປະທານທາງວິນຍານ ແລະ ການຊີ້ນຳຈາກສະຫວັນສຳລັບຄົນຊອບທຳ.12 ເຖິງຢ່າງໃດກໍຕາມ, ພອນເພີ່ມເຕີມຂອງພະລັງທາງວິນຍານນີ້, ບໍ່ໄດ້ມາສູ່ເຮົາພຽງແຕ່ ເພາະວ່າເຮົາເປັນພາກສ່ວນໃນຄົນລຸ້ນນີ້ເທົ່ານັ້ນ. ມັນມາເຖິງເມື່ອເຮົາເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາໃນອົງພຣະເຢຊູຄຣິດເຈົ້າ ແລະ ຮັກສາພັນທະສັນຍາຂອງພຣະອົງ, ເມື່ອເຮົາມາຮູ້ຈັກພຣະອົງ ແລະ ຮັກພຣະອົງ. “ນີ້ແມ່ນຊີວິດນິລັນດອນ,” ພຣະເຢຊູໄດ້ອະທິຖານ, “ຄືໃຫ້ພວກເຂົາຮູ້ຈັກພຣະອົງ ຜູ້ເປັນພຣະເຈົ້າທ່ຽງແທ້ແຕ່ອົງດຽວ, ແລະ ຮູ້ຈັກພຣະເຢຊູຄຣິດຜູ້ທີ່ພຣະອົງໃຊ້ມາ.”13
ດັ່ງທີ່ເຮົາຮູ້ຈັກດີ, ການມີສັດທາໃນພຣະເຢຊູຄຣິດ ແລະ ການເປັນສານຸສິດທີ່ແທ້ຈິງແມ່ນຫລາຍກວ່າການຕັດສິນໃຈຄັ້ງດຽວ—ຫລາຍກວ່າເຫດການທີ່ເກີດຂຶ້ນພຽງຄັ້ງດຽວ. ມັນເປັນຂະບວນການສັກສິດທີ່ດຳເນີນຢູ່ ທີ່ເຕີບໂຕ ແລະ ຂະຫຍາຍຕະຫລອດລະດູການໃນຊີວິດຂອງເຮົາ, ສືບຕໍ່ຈົນເຮົາໄດ້ນັ່ງຄຸເຂົ່າຢູ່ທີ່ພຣະບາດຂອງພຣະອົງ.
ຂະນະທີ່ເຂົ້າດີເຕີບໂຕທ່າມກາງເຂົ້ານົກຢູ່ໃນໂລກ, ເຮົາຈະເຮັດໃຫ້ຄວາມມຸ່ງໝັ້ນຂອງເຮົາເລິກເຊິ່ງ ແລະ ເຂັ້ມແຂງຕໍ່ພຣະຜູ້ຊ່ວຍໃຫ້ລອດ ໃນວັນຂ້າງໜ້າໄດ້ແນວໃດ?
ນີ້ຄືແນວຄິດສາມຢ່າງ:
ສຶກສາກ່ຽວກັບພຣະຊົນຊີບຂອງພຣະເຢຊູ
ທຳອິດ, ເຮົາສາມາດສຶກສາຢ່າງລະອຽດກ່ຽວກັບພຣະຊົນຊີບຂອງພຣະເຢຊູ, ຄຳສອນຂອງພຣະອົງ, ສະຫງ່າລາສີຂອງພຣະອົງ, ອຳນາດຂອງພຣະອົງ, ແລະ ການເສຍສະລະຊົດໃຊ້ຂອງພຣະອົງ. ພຣະຜູ້ຊ່ວຍໃຫ້ລອດໄດ້ກ່າວວ່າ “ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ.”14 ອັກຄະສາວົກໂຢຮັນເຕືອນເຮົາວ່າ, “ຝ່າຍເຮົາທັງຫລາຍໄດ້ຮັກ, ເພາະພຣະອົງຊົງຮັກພວກເຮົາກ່ອນ.”15 ເມື່ອເຮົາປະສົບກັບຄວາມຮັກຂອງພຣະອົງຫລາຍຂຶ້ນ, ເຮົາກໍຈະຮັກພຣະອົງຫລາຍກວ່າເກົ່າ ແລະ, ຕາມທຳມະຊາດ, ຈະເຮັດຕາມແບບຢ່າງຂອງພຣະອົງດ້ວຍຄວາມຮັກ ແລະ ການດູແລຄົນທີ່ຢູ່ອ້ອມຮອບເຮົາ. ດ້ວຍການເຄື່ອນໄຫວທີ່ຊອບທຳຕໍ່ພຣະອົງ, ເຮົາເຫັນພຣະອົງແຈ້ງຊັດຫລາຍຂຶ້ນ.16 ເຮົາຮັກພຣະອົງ ແລະ ເຮົາພະຍາຍາມໃນທາງທີ່ເລັກນ້ອຍຂອງເຮົາ ທີ່ຈະຮຽນແບບພຣະອົງ.17
ເຮັດພັນທະສັນຍາກັບພຣະຜູ້ເປັນເຈົ້າ
ຕໍ່ໄປ, ເມື່ອເຮົາມາຮູ້ຈັກ ແລະ ຮັກພຣະຜູ້ຊ່ວຍໃຫ້ລອດຫລາຍຂຶ້ນ, ເຮົາຈະປາດຖະໜາຫລາຍຂຶ້ນທີ່ຈະສັນຍາກັບພຣະອົງວ່າ ເຮົາຈະຈົງຮັກພັກດີ ແລະ ໄວ້ວາງໃຈໃນພຣະອົງ. ເຮົາເຮັດພັນທະສັນຍາກັບພຣະອົງ. ເຮົາເລີ່ມຕົ້ນດ້ວຍຄຳສັນຍາເມື່ອຮັບບັບຕິສະມາ, ແລະ ເຮົາຢືນຢັນຄຳສັນຍາເຫລົ່ານີ້ ແລະ ອື່ນໆ ເມື່ອເຮົາກັບໃຈທຸກວັນ, ທູນຂໍການໃຫ້ອະໄພ, ແລະ ຕັ້ງຕາລໍຄອຍທີ່ຈະຮັບສິນລະລຶກທຸກອາທິດ. ເຮົາປະຕິຍານວ່າຈະ “ລະນຶກເຖິງພຣະອົງຕະຫລອດເວລາ ແລະ ຮັກສາພຣະບັນຍັດຂອງພຣະອົງ.”18
ເມື່ອເຮົາພ້ອມ, ເຮົາຮັບເອົາພິທີການ ແລະ ພັນທະສັນຍາຂອງພຣະວິຫານ. ຄວາມຮູ້ສຶກເຖິງອິດທິພົນນິລັນດອນໃນຊ່ວງເວລາທີ່ສັກສິດ ແລະ ງຽບສະຫງັດຂອງເຮົາໃນບ້ານຂອງພຣະຜູ້ເປັນເຈົ້າ, ເຮົາຍິນດີເຮັດພັນທະສັນຍາກັບພຣະເຈົ້າ ແລະ ເສີມສ້າງຄວາມຕັ້ງໃຈຂອງເຮົາທີ່ຈະຮັກສາພັນທະສັນຍາເຫລົ່ານັ້ນ.
ການເຮັດ ແລະ ການຮັກສາພັນທະສັນຍາອະນຸຍາດໃຫ້ຄວາມຮັກຂອງພຣະຜູ້ຊ່ວຍໃຫ້ລອດຝັງເລິກໃນໃຈເຮົາຫລາຍຂຶ້ນ. ໃນວາລະສານ Liahona, ເດືອນນີ້, ປະທານຣະໂຊ ເອັມ ແນວສັນ ໄດ້ກ່າວວ່າ: “ພັນທະສັນຍາ [ຂອງເຮົາ] ຈະນຳພາເຮົາໃຫ້ເຂົ້າໃກ້ຊິດກັບພຣະອົງຫລາຍຂຶ້ນເລື້ອຍໆ. … ພຣະເຈົ້າຈະບໍ່ປະຖິ້ມຄວາມສຳພັນຂອງພຣະອົງກັບຜູ້ທີ່ໄດ້ສ້າງຄວາມຜູກພັນເຊັ່ນນັ້ນກັບພຣະອົງ.”19 ແລະ ດັ່ງທີ່ປະທານແນວສັນໄດ້ກ່າວຢ່າງສວຍງາມໃນເຊົ້າມື້ນີ້ວ່າ, “ດ້ວຍການອຸທິດຂອງພຣະວິຫານໃໝ່ໃນແຕ່ລະແຫ່ງ, ອຳນາດຂອງພຣະເຈົ້າໄດ້ເພີ່ມເຂົ້າມາໃນໂລກນີ້ ເພື່ອເຮັດໃຫ້ເຮົາເຂັ້ມແຂງຂຶ້ນ ແລະ ຕໍ່ຕ້ານຄວາມພະຍາຍາມທີ່ຮຸນແຮງຂອງຜູ້ປໍລະປັກ.”20
ເຮົາເຫັນບໍ່ວ່າເປັນຫຍັງພຣະຜູ້ເປັນເຈົ້າຈຶ່ງຊີ້ນຳໃຫ້ສາດສະດາຂອງພຣະອົງນຳພຣະວິຫານທີ່ສັກສິດມາຕັ້ງຢູ່ໃກ້ເຮົາຫລາຍຂຶ້ນ ແລະ ອະນຸຍາດໃຫ້ເຮົາໄດ້ຢູ່ໃນບ້ານຂອງພຣະອົງເລື້ອຍກວ່າເກົ່າ?
ເມື່ອເຮົາເຂົ້າໄປໃນພຣະວິຫານ, ເຮົາເປັນອິດສະລະຊົ່ວໄລຍະໜຶ່ງຈາກອິດທິພົນຂອງໂລກ ທີ່ບຽດບຽນເຮົາ ຂະນະທີ່ເຮົາຮຽນຮູ້ເຖິງຈຸດປະສົງຂອງເຮົາໃນຊີວິດ ແລະ ຂອງປະທານນິລັນດອນທີ່ສະເໜີມອບໃຫ້ແກ່ເຮົາຜ່ານທາງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ.
ປ້ອງກັນຂອງປະທານແຫ່ງພຣະວິນຍານບໍລິສຸດ
ສຸດທ້າຍ, ແນວຄິດຢ່າງທີສາມຂອງຂ້າພະເຈົ້າ: ໃນການສະແຫວງຫາອັນສັກສິດນີ້, ເຮົາທະນຸຖະໜອມ, ປົກປ້ອງ, ຮັກສາ, ແລະ ປ້ອງກັນຂອງປະທານແຫ່ງພຣະວິນຍານບໍລິສຸດ. ທັງປະທານເອັມ ຣະໂຊ ບາເລີດ ໃນຕອນບ່າຍມື້ນີ້ ແລະ ແອວເດີ ແຄວິນ ດັບເບິນຢູ ເພຍສັນ ທີ່ຫາກໍກ່າວມື້ກີ້ນີ້ ໄດ້ອ້າງເຖິງຄຳເຕືອນຂອງສາດສະດາ ຈາກປະທານແນວສັນ ຊຶ່ງຂ້າພະເຈົ້າຈະກ່າວລຶ້ມຄືນອີກວ່າ: “ມັນເປັນໄປບໍ່ໄດ້ທີ່ເຮົາຈະປອດໄພທາງວິນຍານ ຖ້າປາດສະຈາກການນຳພາ, ການຊີ້ນຳ, ການປອບໂຍນ, ແລະ ອິດທິພົນຂອງພຣະວິນຍານບໍລິສຸດຢູ່ສະເໝີ.”21 ມັນແມ່ນຂອງປະທານທີ່ເກີນກວ່າລາຄາ. ເຮົາເຮັດດີທີ່ສຸດເພື່ອປົກປ້ອງປະສົບການປະຈຳວັນຂອງເຮົາ ເພື່ອວ່າອິດທິພົນຂອງພຣະວິນຍານບໍລິສຸດຈະຍັງຄົງຢູ່ກັບເຮົາ. ເຮົາເປັນແສງສະຫວ່າງໃຫ້ໂລກ, ແລະ ເມື່ອຈຳເປັນ ເຮົາເຕັມໃຈທີ່ຈະເລືອກເປັນຄົນແຕກຕ່າງຈາກຄົນອື່ນ. ເມື່ອບໍ່ດົນມານີ້ປະທານດາລິນ ເອັຈ ໂອກສ໌ ໄດ້ຖາມກຸ່ມຜູ້ໃຫຍ່ໜຸ່ມວ່າ: “[ພວກທ່ານ] ‘ກ້າທີ່ຈະແຕກຕ່າງບໍ່?’ … ທີ່ສຳຄັນ [ໂດຍສະເພາະ] ຄື … ການເລືອກທີ່ພວກທ່ານຕ້ອງເຮັດໃນຊີວິດສ່ວນຕົວຂອງພວກທ່ານ. … ພວກທ່ານຈະດຳເນີນໄປໜ້າຂັດກັບການຕໍ່ຕ້ານຂອງໂລກບໍ?”22
ເລືອກທີ່ຈະແຕກຕ່າງຈາກໂລກ
ໃນໂພດສື່ສັງຄົມເມື່ອບໍ່ດົນມານີ້, ຂ້າພະເຈົ້າໄດ້ຂໍໃຫ້ສານຸສິດແບ່ງປັນການເລືອກທີ່ເຂົາເຈົ້າໄດ້ເຮັດ ທີ່ຮຽກຮ້ອງໃຫ້ເຂົາເຈົ້າແຕກຕ່າງຈາກຊາວໂລກ. ຂ້າພະເຈົ້າໄດ້ຮັບຫລາຍຮ້ອຍຄຳຕອບ.23 ນີ້ເປັນພຽງສ່ວນນ້ອຍໜຶ່ງ:
ອາແມນດາ: ຂ້ານ້ອຍເປັນນາງພະຍາບານ ເຮັດວຽກຢູ່ຄຸກໃນຕົວເມືອງ. ຂ້ານ້ອຍພະຍາຍາມດູແລຄົນໂທດດັ່ງທີ່ພຣະຄຣິດຈະເຮັດ.
ຣາເຊັນ: ຂ້ານ້ອຍເປັນນັກຮ້ອງໂອປະຣ່າ, ແລະ ມັກຈະຖືກມອງຂ້າມ ແບບວ່າຂ້ານ້ອຍຕ້ອງນຸ່ງຊຸດໃດກໍຕາມທີ່ນຳມາໃຫ້ຂ້ານ້ອຍນຸ່ງ, ໂດຍບໍ່ຄຳນຶງເຖິງຄວາມສຸພາບຮຽບຮ້ອຍ. [ເພາະຂ້ານ້ອຍໄດ້ຮັບຂອງປະທານສັກສິດແລ້ວ,] ຂ້ານ້ອຍຈຶ່ງໄດ້ບອກ [ຜູ້ກຳກັບ] ວ່າຊຸດເສື້ອຜ້າຕ້ອງ [ສຸພາບຮຽບຮ້ອຍ]. ພວກເຂົາບໍ່ພໍໃຈ … ແຕ່ໄດ້ທຳການປ່ຽນແປງຢ່າງບໍ່ເຕັມໃຈ. ຂ້ານ້ອຍຈະບໍ່ແລກປ່ຽນສັນຕິສຸກທີ່ມາຈາກການຢືນເປັນພະຍານຂອງພຣະຄຣິດຕະຫລອດເວລາ.
ຄຣິສ: ຂ້ານ້ອຍເປັນຄົນຕິດເຫລົ້າ (ກຳລັງຮັບການປິ່ນປົວ), ມີຄ່າຄວນສຳລັບພຣະວິຫານ, ເປັນສະມາຊິກຂອງສາດສະໜາຈັກ. ຂ້ານ້ອຍບໍ່ງຽບກ່ຽວກັບປະສົບການຕິດແສດຂອງຂ້ານ້ອຍ ແລະ ການມີປະຈັກພະຍານເຖິງການຊົດໃຊ້ [ຂອງພຣະເຢຊູຄຣິດ].
ລໍເຣນ: ຂ້ານ້ອຍກຳລັງຂຽນເລື່ອງຕະຫລົກກັບເພື່ອນຫ້ອງຮຽນຊັ້ນມັດທະຍົມ. ພວກເຂົາຢາກໃຫ້ຕົວລະຄອນທີ່ງຽບຂຶມຄືຂ້ານ້ອຍ ສະແດງຄວາມຫຍາບຄາຍອອກມາໃນທັນທີທັນໃດ. ພວກເຂົາໄດ້ກົດດັນຂ້ານ້ອຍ, ແຕ່ຂ້ານ້ອຍປະຕິເສດ ແລະ ຍຶດໝັ້ນ.
ອາດາມ: ຫລາຍຄົນບໍ່ເຊື່ອຂ້ານ້ອຍ ເມື່ອຂ້ານ້ອຍເວົ້າວ່າຂ້ານ້ອຍຮັກສາກົດພົມມະຈັນ ແລະ ເລືອກທີ່ຈະຫລີກເວັ້ນຈາກຮູບພາບລາມົກ. ພວກເຂົາບໍ່ເຂົ້າໃຈຂໍ້ດີຂອງຄວາມສຸກ ແລະ ຄວາມອຸ່ນໃຈທີ່ສິ່ງນີ້ນຳມາໃຫ້ຂ້ານ້ອຍ.
ແອວລາ: ພໍ່ຂອງຂ້ານ້ອຍເປັນສະມາຊິກຂອງຊຸມຊົນ LGBTQ. ຂ້ານ້ອຍພະຍາຍາມນຶກເຖິງຄວາມຮູ້ສຶກຂອງຄົນອື່ນຢູ່ສະເໝີ ຂະນະທີ່ຢືນເປັນພະຍານເຖິງພຣະຄຣິດ ແລະ ຊື່ຕົງຕໍ່ສິ່ງທີ່ຂ້ານ້ອຍເຊື່ອ.
ອານດະເຣດ: ຂ້ານ້ອຍໄດ້ຕັດສິນໃຈໄປໂບດເໝືອນເດີມ ເຖິງແມ່ນຄອບຄົວຂອງຂ້ານ້ອຍຕັດສິນໃຈບໍ່ໄປອີກແລ້ວ.
ແລະ ທ້າຍສຸດ, ຈາກແຊຣີ: ພວກເຮົາໄດ້ໄປຮ່ວມງານທີ່ຄະລືຫາດຂອງເຈົ້າລັດ. ເຂົາເຈົ້າເລີ່ມຢາຍຈອກເຫລົ້າເພື່ອຍົກ “ໄຊໂຍ.” ຂ້ານ້ອຍໄດ້ຂໍເອົານ້ຳ, ເຖິງແມ່ນພະນັກງານເວົ້າວ່າ ອາດເປັນເລື່ອງຜິດໃຈ. ພວກເຮົາໄດ້ຍົກໄຊໂຍເຈົ້າລັດ, ແລະ ຂ້ານ້ອຍໄດ້ຍົກຈອກນ້ຳຂອງຂ້ານ້ອຍຂຶ້ນສູງ! ເຈົ້າລັດບໍ່ໄດ້ຜິດໃຈ.
ປະທານແນວສັນໄດ້ກ່າວວ່າ, “ແມ່ນແລ້ວ, ພວກເຈົ້າມີຊີວິດຢູ່ໃນໂລກ, ແຕ່ພວກເຈົ້າມີມາດຕະຖານທີ່ແຕກຕ່າງຈາກໂລກ ເພື່ອຊ່ວຍພວກເຈົ້າຫລີກເວັ້ນຈາກຄວາມດ່າງພ້ອຍຂອງໂລກ.”24
ອານາສະຕາເຊຍ, ແມ່ໜຸ່ມຄົນໜຶ່ງໃນປະເທດອູກະແລນ ຢູ່ໂຮງໝໍຄອດລູກຜູ້ຊາຍ ເມື່ອລະເບີດເລີ່ມຖະຫລົ່ມເມືອງຄຽບ ໃນເດືອນກຸມພາຜ່ານມານີ້. ນາງພະຍາບານເປີດປະຕູຫ້ອງໂຮງໝໍ ແລະ ເວົ້າດ້ວຍນ້ຳສຽງຮີບຮ້ອນວ່າ, “ອູ້ມເອົາລູກເຈົ້າ, ຫໍ່ໃສ່ຜ້າຫົ່ມ, ແລະ ອອກໄປຫາຫ້ອງໂຖງ—ດຽວນີ້!”
ຕໍ່ມາ, ອານາສະຕາເຊຍ ໄດ້ເວົ້າວ່າ:
“ຂ້ານ້ອຍບໍ່ຄິດເລີຍວ່າ ມື້ທຳອິດຂອງການເປັນແມ່ຈະຍາກຂະໜາດນີ້, … ແຕ່ … ຂ້ານ້ອຍຈົດຈໍ່ຢູ່ທີ່ … ພອນ ແລະ ການອັດສະຈັນທີ່ຂ້ານ້ອຍເຫັນ. …
“ໃນຕອນນີ້, ອາດເບິ່ງຄືວ່າ ເປັນໄປບໍ່ໄດ້ທີ່ຈະໃຫ້ອະໄພຜູ້ທີ່ກໍ່ໃຫ້ເກີດຄວາມພິນາດ ແລະ ອັນຕະລາຍຢ່າງຫລວງຫລາຍ … , ແຕ່ໃນຖານະສານຸສິດຂອງພຣະຄຣິດ, ຂ້ານ້ອຍມີສັດທາວ່າ ຂ້ານ້ອຍຈະສາມາດ [ໃຫ້ອະໄພ]. …
“ຂ້ານ້ອຍບໍ່ຮູ້ທັງໝົດທີ່ຈະເກີດຂຶ້ນໃນອະນາຄົດ … ແຕ່ຂ້ານ້ອຍຮູ້ວ່າ ການຮັກສາພັນທະສັນຍາຈະອະນຸຍາດໃຫ້ພຣະວິນຍານຢູ່ກັບຂ້ານ້ອຍຕະຫລອດເວລາ, … ອະນຸຍາດໃຫ້ຂ້ານ້ອຍຮູ້ສຶກຊື່ນຊົມ ແລະ ມີຄວາມຫວັງ, … ແມ່ນແຕ່ໃນຊ່ວງເວລາທີ່ຫຍຸ້ງຍາກ.”25
ຄຳສັນຍາຂອງຊີວິດນິລັນດອນ ແລະ ລັດສະໝີພາບຊັ້ນສູງ
ອ້າຍເອື້ອຍນ້ອງຂອງຂ້າພະເຈົ້າ, ຂ້າພະເຈົ້າໄດ້ຮັບພອນຢ່າງລົ້ນເຫລືອດ້ວຍການໄດ້ຮັບຄວາມຮັກຈາກພຣະຜູ້ຊ່ວຍໃຫ້ລອດທີ່ຊົງຮັກຂອງເຮົາ, ພຣະເຢຊູຄຣິດ. ຂ້າພະເຈົ້າຮູ້ວ່າພຣະອົງຊົງພຣະຊົນຢູ່ ແລະ ຊີ້ນຳວຽກງານທີ່ສັກສິດຂອງພຣະອົງ. ຂ້າພະເຈົ້າບໍ່ມີຄຳເວົ້າທີ່ຈະສະແດງຄວາມຮັກຂອງຂ້າພະເຈົ້າຕໍ່ພຣະອົງຢ່າງເຕັມທີ່.
ເຮົາທຸກຄົນເປັນ “ລູກແຫ່ງພັນທະສັນຍາ” ນັບເປັນລ້ານໆ, ແຜ່ຂະຫຍາຍໄປທົ່ວໂລກ ໃນປະເທດ ແລະ ວັດທະນະທຳ ໃນທຸກທະວີບ, ຂະນະທີ່ເຮົາລໍຄອຍການກັບມາອັນຮຸ່ງໂລດຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ. ໃນການສ່ອງແສງເປັນຄວາມສະຫວ່າງໃຫ້ແກ່ຄົນອ້ອມຂ້າງເຮົາ, ເຮົາໄດ້ປັບປ່ຽນຄວາມປາດຖະໜາ, ຄວາມຄິດ, ການເລືອກ, ແລະ ການກະທຳຂອງເຮົາຢ່າງມີສະຕິ. ໂດຍທີ່ສະແຫວງຫາດ້ວຍສຸດໃຈ ເພື່ອຈະໄດ້ຮູ້ຈັກ ແລະ ຮັກພຣະຜູ້ຊ່ວຍໃຫ້ລອດ, ເຮົາແຍກຕົວເອງອອກຈາກໂລກ ຜ່ານທາງພັນທະສັນຍາກັບພຣະເຈົ້າ, ໂດຍການເປັນຄົນແຕກຕ່າງ, ບໍ່ທຳມະດາ, ແລະ ພິເສດ, ຂະນະທີ່ເຮົາໃຫ້ກຽດພຣະອົງ ແລະ ຄຳສອນຂອງພຣະອົງ ໂດຍທີ່ບໍ່ແຍກຕົວອອກຫ່າງຈາກຄົນອື່ນ ຜູ້ເຊື່ອຖືແຕກຕ່າງ.
ມັນເປັນການເດີນທາງທີ່ມະຫັດສະຈັນ ທີ່ໄດ້ເປັນເຂົ້າດີໃນທ່າມກາງເຂົ້ານົກ, ບາງຄັ້ງເຕັມໄປດ້ວຍຄວາມເຈັບປວດໃຈ ແຕ່ສ່ວນຫລາຍຈະສະຫງົບດ້ວຍສັດທາທີ່ເຕີບໂຕເຕັມທີ່ ແລະ ໝັ້ນຄົງ. ເມື່ອທ່ານຍອມໃຫ້ຄວາມຮັກຂອງທ່ານທີ່ມີຕໍ່ພຣະຜູ້ຊ່ວຍໃຫ້ລອດ ແລະ ຄວາມຮັກຂອງພຣະອົງທີ່ມີຕໍ່ທ່ານຝັງເລິກຢູ່ໃນໃຈທ່ານ, ຂ້າພະເຈົ້າສັນຍາກັບທ່ານວ່າ ທ່ານຈະໄດ້ຮັບຄວາມໝັ້ນໃຈເພີ່ມເຕີມ, ສັນຕິສຸກ, ແລະ ຊື່ນຊົມໃນການປະເຊີນກັບການທ້າທາຍໃນຊີວິດຂອງທ່ານ. ແລະ ພຣະຜູ້ຊ່ວຍໃຫ້ລອດສັນຍາກັບເຮົາວ່າ: “ເຮົາ [ຈະ] ເຕົ້າໂຮມຜູ້ຄົນຂອງເຮົາ, ຕາມຄຳອຸປະມາເລື່ອງເຂົ້າດີ ແລະ ເຂົ້ານົກ, ເພື່ອວ່າເຂົ້າດີຈະຖືກເກັບໄວ້ໃນສາງເພື່ອຈະໄດ້ມີຊີວິດນິລັນດອນ, ແລະ ໄດ້ຮັບການສວມມຸງກຸດ ດ້ວຍລັດສະໝີພາບຂອງຊັ້ນສູງ.”26 ໃນພຣະນາມຂອງພຣະເຢຊູຄຣິດ, ອາແມນ.