ພຣະເຢຊູຄຣິດເປັນຄວາມເຂັ້ມແຂງຂອງຊາວໜຸ່ມ
ໄວ້ວາງໃຈໃນພຣະເຢຊູຄຣິດ. ພຣະອົງຈະນຳພາທ່ານໄປໃນທາງທີ່ຖືກຕ້ອງ. ພຣະອົງເປັນຄວາມເຂັ້ມແຂງຂອງທ່ານ.
ໃນການກະກຽມສຳລັບຂ່າວສານນີ້ ໃນມື້ນີ້, ຂ້າພະເຈົ້າໄດ້ຮັບຄວາມປະທັບໃຈຢ່າງແຮງກ້າໃຫ້ກ່າວກັບກຸ່ມຊາຍໜຸ່ມ ແລະ ກຸ່ມຍິງໜຸ່ມ.
ຂ້າພະເຈົ້າກໍກຳລັງກ່າວກັບຜູ້ທີ່ເຄີຍເປັນໜຸ່ມ, ແມ່ນແຕ່ຜູ້ທີ່ບໍ່ສາມາດຈື່ຈຳມັນອີກແລ້ວ.
ແລະ ຂ້າພະເຈົ້າກໍກ່າວກັບທຸກຄົນທີ່ຮັກຄົນໜຸ່ມຂອງພວກເຮົາ ແລະ ຢາກໃຫ້ເຂົາເຈົ້າບັນລຸຄວາມສຳເລັດ.
ສຳລັບຄົນລຸ້ນໃໝ່, ຂ້າພະເຈົ້າມີຂ່າວສານພິເສດສຳລັບພວກເຈົ້າໂດຍສະເພາະ ຈາກພຣະຜູ້ຊ່ວຍໃຫ້ລອດຂອງພວກເຈົ້າ, ພຣະເຢຊູຄຣິດ.
ຂ່າວສານຂອງພຣະຜູ້ຊ່ວຍໃຫ້ລອດຕໍ່ທ່ານ
ເພື່ອນໜຸ່ມທີ່ຮັກແພງຂອງຂ້າພະເຈົ້າ, ຖ້າພຣະຜູ້ຊ່ວຍໃຫ້ລອດຢູ່ທີ່ນີ້ ໃນເວລານີ້, ພຣະອົງຈະກ່າວຫຍັງກັບທ່ານ?
ຂ້າພະເຈົ້າເຊື່ອວ່າ ພຣະອົງຈະເລີ່ມໂດຍການກ່າວເຖິງຄວາມຮັກທີ່ເລິກເຊິ່ງທີ່ພຣະອົງມີຕໍ່ທ່ານ. ພຣະອົງອາດກ່າວມັນດ້ວຍວາຈາ, ແຕ່ມັນອາດໄຫລອອກມາຢ່າງແຮງກ້າ—ພຽງຈາກການປະທັບຢູ່ຂອງພຣະອົງ—ຈົນຜິດພາດບໍ່ໄດ້, ວ່າມັນເຂົ້າເຖິງສ່ວນເລິກໃນຫົວໃຈຂອງທ່ານ, ເຕີມເຕັມຈິດວິນຍານທັງດວງຂອງທ່ານ!
ແລະ ແຕ່ປານນັ້ນ, ເພາະເຮົາທຸກຄົນອ່ອນແອ ແລະ ບໍ່ສົມບູນແບບ, ຄວາມກັງວົນບາງຢ່າງອາດຄືບຄານເຂົ້າມາໃນຈິດໃຈຂອງທ່ານໄດ້. ທ່ານອາດຈື່ຈຳຄວາມຜິດທີ່ທ່ານເຄີຍເຮັດ, ເວລາທີ່ທ່ານຍອມຕົນໃຫ້ກັບການລໍ້ລວງ, ສິ່ງທີ່ທ່ານເສຍໃຈທີ່ໄດ້ເຮັດ—ຫລື ຫວັງວ່າທ່ານຈະເຮັດໄດ້ດີກວ່າເກົ່າ.
ພຣະຜູ້ຊ່ວຍໃຫ້ລອດຈະສຳຜັດໄດ້, ແລະ ຂ້າພະເຈົ້າເຊື່ອວ່າ ພຣະອົງຈະຮັບຮອງທ່ານກັບພຣະຄຳທີ່ພຣະອົງໄດ້ກ່າວຢູ່ໃນພຣະຄຳພີວ່າ:
“ຢ່າສູ່ຢ້ານ.”1
“ຢ່າສົງໄສ.”2
“ຈົ່ງດີໃຈເຖີດ.”3
“ຢ່າວຸ້ນວາຍໄປ.”4
ຂ້າພະເຈົ້າບໍ່ຄິດວ່າ ພຣະອົງຈະແກ້ຕົວສຳລັບຄວາມຜິດພາດຂອງທ່ານ. ພຣະອົງຈະບໍ່ລົດມັນລົງ. ບໍ່ເລີຍ, ພຣະອົງຈະຂໍໃຫ້ທ່ານກັບໃຈ—ເພື່ອປະຖິ້ມບາບຂອງທ່ານໄວ້ຂ້າງຫລັງ, ເພື່ອປ່ຽນແປງ, ເພື່ອວ່າພຣະອົງຈະສາມາດອະໄພໃຫ້ທ່ານ. ພຣະອົງຈະເຕືອນທ່ານວ່າ ເມື່ອ 2,000 ປີກ່ອນ ພຣະອົງໄດ້ຮັບເອົາບາບເຫລົ່ານັ້ນໄວ້ກັບພຣະອົງເອງ ເພື່ອວ່າທ່ານຈະ ສາມາດ ກັບໃຈ. ນັ້ນຄືພາກສ່ວນຂອງແຜນແຫ່ງຄວາມສຸກ ທີ່ປະທານໃຫ້ເຮົາຈາກພຣະບິດາເທິງສະຫວັນທີ່ຊົງຮັກຂອງເຮົາ.
ພຣະເຢຊູອາດຈະຊີ້ບອກວ່າ ທ່ານໄດ້ເຮັດພັນທະສັນຍາກັບພຣະອົງ—ໄດ້ເຮັດເມື່ອທ່ານຮັບບັບຕິສະມາ ແລະ ຕໍ່ພັນທະສັນຍາທຸກເທື່ອທີ່ທ່ານຮັບສ່ວນສິນລະລຶກ—ໃຫ້ທ່ານມີຄວາມສຳພັນພິເສດກັບພຣະອົງ. ຄວາມສຳພັນອັນທີ່ພຣະຄຳພີບັນຍາຍວ່າ ເປັນການຊ່ວຍກັນທຽມແອກ, ດ້ວຍຄວາມຊ່ວຍເຫລືອຈາກພຣະອົງ, ທ່ານຈະສາມາດແບກຫາບພາລະໃດໆໄດ້.5
ຂ້າພະເຈົ້າເຊື່ອວ່າ ພຣະຜູ້ຊ່ວຍໃຫ້ລອດພຣະເຢຊູຄຣິດຈະຢາກໃຫ້ທ່ານເຫັນ, ຮູ້ສຶກ, ແລະ ຮູ້ວ່າ ພຣະອົງເປັນຄວາມເຂັ້ມແຂງຂອງທ່ານ. ດ້ວຍຄວາມຊ່ວຍເຫລືອຈາກພຣະອົງ, ມັນບໍ່ມີຂອບເຂດໃນສິ່ງທີ່ທ່ານສາມາດເຮັດໄດ້. ວ່າສັກກະຍະພາບຂອງທ່ານບໍ່ມີຂອບເຂດ. ພຣະອົງຈະຢາກໃຫ້ທ່ານເຫັນຕົວເອງໃນທາງທີ່ພຣະອົງເຫັນທ່ານ. ແລະ ນັ້ນແຕກຕ່າງຫລາຍຈາກວິທີທີ່ໂລກເຫັນທ່ານ.
ພຣະຜູ້ຊ່ວຍໃຫ້ລອດຈະປະກາດ, ໃນພຣະຄຳທີ່ແນ່ນອນ, ວ່າທ່ານເປັນທິດາ ຫລື ເປັນບຸດຂອງພຣະເຈົ້າຜູ້ຊົງລິດອຳນາດຍິ່ງໃຫຍ່. ພຣະບິດາເທິງສະຫວັນຂອງທ່ານເປັນຜູ້ທີ່ຮຸ່ງໂລດທີ່ສຸດໃນຈັກກະວານ, ເຕັມໄປດ້ວຍຄວາມຮັກ, ຄວາມສຸກ, ຄວາມບໍລິສຸດ, ຄວາມສັກສິດ, ຄວາມສະຫວ່າງ, ພຣະຄຸນ, ແລະ ຄວາມຈິງ. ແລະ ໃນວັນໜຶ່ງ ພຣະອົງຈະຢາກໃຫ້ທ່ານຮັບມູນມໍລະດົກທັງໝົດທີ່ພຣະອົງມີ.6
ມັນຄືເຫດຜົນທີ່ທ່ານມາຢູ່ເທິງແຜ່ນດິນໂລກ—ເພື່ອຮຽນຮູ້, ເຕີບໂຕ, ແລະ ກ້າວໜ້າ ແລະ ກາຍເປັນທຸກສິ່ງທີ່ພຣະບິດາເທິງສະຫວັນໄດ້ສ້າງທ່ານໃຫ້ເປັນ.
ເພື່ອເຮັດໃຫ້ສິ່ງນີ້ເປັນໄປໄດ້, ພຣະອົງຈຶ່ງໄດ້ສົ່ງພຣະເຢຊູຄຣິດມາເປັນພຣະຜູ້ຊ່ວຍໃຫ້ລອດຂອງທ່ານ. ມັນເປັນຈຸດປະສົງໃນເບື້ອງຫລັງຂອງແຜນແຫ່ງຄວາມສຸກທີ່ຍິ່ງໃຫຍ່ຂອງພຣະອົງ, ສາດສະໜາຈັກຂອງພຣະອົງ, ຖານະປະໂລຫິດຂອງພຣະອົງ, ແລະ ພຣະຄຳພີ—ທັງໝົດນັ້ນ.
ນັ້ນ ຄືຈຸດໝາຍປາຍທາງຂອງທ່ານ. ນັ້ນ ຄືອະນາຄົດຂອງທ່ານ. ມັນເປັນການເລືອກຂອງທ່ານ!
ຄວາມຈິງ ແລະ ການເລືອກ
ຈຸດສູນກາງໃນແຜນຂອງພຣະເຈົ້າສຳລັບຄວາມສຸກຂອງທ່ານ ແມ່ນອຳນາດທີ່ຈະເລືອກຂອງທ່ານ.7 ແນ່ນອນ, ພຣະບິດາເທິງສະຫວັນຂອງທ່ານຢາກໃຫ້ທ່ານເລືອກຄວາມສຸກນິລັນດອນຮ່ວມກັບພຣະອົງ, ແລະ ພຣະອົງຈະຊ່ວຍທ່ານບັນລຸມັນ, ແຕ່ພຣະອົງຈະບໍ່ເຄີຍບັງຄັບໃຫ້ທ່ານຮັບເອົາ.
ສະນັ້ນ ພຣະອົງຈຶ່ງອະນຸຍາດໃຫ້ທ່ານເລືອກ: ຄວາມສະຫວ່າງ ຫລື ຄວາມມືດ? ຄວາມດີ ຫລື ຄວາມຊົ່ວ? ຄວາມສຸກ ຫລື ຄວາມທຸກທໍລະມານ? ຊີວິດນິລັນດອນ ຫລື ຄວາມຕາຍທາງວິນຍານ?8
ເມື່ອຟັງເບິ່ງ ມັນເປັນການເລືອກທີ່ງ່າຍໆ, ແມ່ນບໍ? ແຕ່ເຖິງຢ່າງໃດ, ຢູ່ເທິງໂລກນີ້, ເບິ່ງຄືຊັບຊ້ອນຫລາຍກວ່າທີ່ຄວນຈະເປັນ.
ບັນຫາຄື ເຮົາບໍ່ຫລຽວເຫັນສິ່ງຕ່າງໆຢ່າງແຈ່ມແຈ້ງ ເທົ່າທີ່ເຮົາຕ້ອງການ. ອັກຄະສາວົກໂປໂລໄດ້ປຽບທຽບມັນໃສ່ກັບການ “ເຫັນພໍມົວໆ, ເໝືອນເບິ່ງໃນແວ່ນ.”9 ມັນມີຄວາມສັບສົນຢ່າງຫລວງຫລາຍຢູ່ໃນໂລກກ່ຽວກັບສິ່ງທີ່ຖືກ ແລະ ຜິດ. ຄວາມຈິງຖືກບິດເບືອນເພື່ອໃຫ້ຄວາມຊົ່ວເບິ່ງຄືວ່າດີ ແລະ ຄວາມດີເບິ່ງຄືວ່າຊົ່ວ.10
ແຕ່ເມື່ອທ່ານສະແຫວງຫາຄວາມຈິງຢ່າງຈິງຈັງ—ຄວາມຈິງນິລັນດອນທີ່ບໍ່ປ່ຽນແປງ—ການເລືອກຂອງທ່ານຈະແຈ່ມແຈ້ງຫລາຍຂຶ້ນ. ແມ່ນແລ້ວ, ທ່ານຍັງຈະປະສົບກັບການລໍ້ລວງ ແລະ ການທົດລອງ. ສິ່ງບໍ່ດີຍັງຈະເກີດຂຶ້ນ. ສິ່ງທີ່ເຮັດໃຫ້ງົງ. ສິ່ງທີ່ໂສກເສົ້າ. ແຕ່ທ່ານສາມາດຈັດການໄດ້ ເມື່ອທ່ານຮູ້ວ່າທ່ານເປັນໃຜ, ເປັນຫຍັງທ່ານຈຶ່ງມາຢູ່ທີ່ນີ້, ແລະ ເມື່ອທ່ານໄວ້ວາງໃຈໃນພຣະເຈົ້າ.
ສະນັ້ນ ທ່ານຈະຫາຄວາມຈິງໄດ້ຢູ່ໃສ?
ມັນບັນຈຸຢູ່ໃນພຣະກິດຕິຄຸນຂອງພຣະເຢຊູຄຣິດ. ແລະ ຄວາມສົມບູນຂອງພຣະກິດຕິຄຸນນັ້ນໄດ້ຖືກສິດສອນໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ພຣະເຢຊູຄຣິດໄດ້ກ່າວວ່າ, “ເຮົານີ້ແຫລະເປັນທາງນັ້ນ, ເປັນຄວາມຈິງ, ແລະ ເປັນຊີວິດ: ບໍ່ມີຜູ້ໃດມາເຖິງພຣະບິດາເຈົ້າໄດ້, ນອກຈາກມາທາງເຮົາ.”11
ເມື່ອທ່ານຕ້ອງໄດ້ຕັດສິນໃຈເຮັດສິ່ງທີ່ສຳຄັນ, ພຣະເຢຊູຄຣິດ ແລະ ພຣະກິດຕິຄຸນທີ່ຖືກຟື້ນຟູຂອງພຣະອົງເປັນການເລືອກທີ່ດີທີ່ສຸດ. ເມື່ອທ່ານມີຄຳຖາມ, ພຣະເຢຊູຄຣິດ ແລະ ພຣະກິດຕິຄຸນທີ່ຖືກຟື້ນຟູຂອງພຣະອົງຈະເປັນຄຳຕອບທີ່ດີທີ່ສຸດ. ເມື່ອທ່ານຮູ້ສຶກອ່ອນແອ, ພຣະເຢຊູຄຣິດຈະເປັນຄວາມເຂັ້ມແຂງຂອງທ່ານ.
ພຣະອົງໄດ້ປະທານພະລັງໃຫ້ແກ່ຄົນອ່ອນເພຍ; ແລະ ແກ່ຜູ້ທີ່ບໍ່ມີກຳລັງ, ພຣະອົງຈະເພີ່ມຄວາມເຂັ້ມແຂງໃຫ້.
ຜູ້ທີ່ລໍຖ້າພຣະຜູ້ເປັນເຈົ້າຈະໄດ້ຮັບການຟື້ນຟູດ້ວຍພະລັງຂອງພຣະອົງ.12
ສຳລັບຄວາມເຂັ້ມແຂງຂອງຊາວໜຸ່ມ
ເພື່ອຊ່ວຍໃຫ້ທ່ານພົບເຫັນທາງນັ້ນ ແລະ ຊ່ວຍໃຫ້ທ່ານເຮັດໃຫ້ຄຳສອນຂອງພຣະຄຣິດມີອິດທິພົນເຍືອງທາງໃນຊີວິດຂອງທ່ານ, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໄດ້ກະກຽມແຫລ່ງຊ່ວຍເຫລືອໃໝ່, ສະບັບປັບປຸງຂອງ ສຳລັບຄວາມເຂັ້ມແຂງຂອງຊາວໜຸ່ມ.
ເປັນເວລາຫລາຍກວ່າ 50 ປີ, ສຳລັບຄວາມເຂັ້ມແຂງຂອງຊາວໜຸ່ມ ໄດ້ເປັນສິ່ງນຳທາງສຳລັບຫລາຍລຸ້ນຄົນຂອງຊາວໜຸ່ມໄພ່ພົນຍຸກສຸດທ້າຍ. ຂ້າພະເຈົ້າໄດ້ເກັບຫົວໜຶ່ງໄວ້ໃນຖົງເສື້ອຂອງຂ້າພະເຈົ້າສະເໝີ, ແລະ ຂ້າພະເຈົ້າໄດ້ແບ່ງປັນມັນກັບຜູ້ທີ່ຢາກຮູ້ກ່ຽວກັບມາດຕະຖານຂອງພວກເຮົາ. ມັນຖືກອັບເດດ ແລະ ແກ້ໄຂໃຫ້ເຂົ້າກັບການທ້າທາຍ ແລະ ການລໍ້ລວງໃນວັນເວລາຂອງເຮົາໄດ້ດີກວ່າເກົ່າ. ປຶ້ມ ສຳລັບຄວາມເຂັ້ມແຂງຂອງຊາວໜຸ່ມ ຫົວໃໝ່ນີ້ ມີໃຫ້ບໍລິການທາງອອນລາຍໃນ 50 ພາສາທີ່ແຕກຕ່າງກັນ ແລະ ຈະມີເປັນປຶ້ມໃຫ້ໃຊ້ນຳອີກ. ມັນຈະຊ່ວຍໄດ້ດີຫລາຍໃນການເຮັດການເລືອກໃນຊີວິດຂອງທ່ານ. ຈົ່ງມີມັນເປັນຂອງຕົວເອງ ແລະ ແບ່ງປັນມັນໃຫ້ກັບໝູ່ເພື່ອນຂອງທ່ານ.
ປຶ້ມ ສຳລັບຄວາມເຂັ້ມແຂງຂອງຊາວໜຸ່ມ ຫົວໃໝ່ນີ້ມີຄຳບັນຍາຍ ຄຳແນະນຳສຳລັບການເລືອກ.
ຖ້າຈະເວົ້າແຈ້ງໆແລ້ວ, ຜູ້ແນະນຳທີ່ດີທີ່ສຸດເມື່ອທ່ານເຮັດການເລືອກຄື ພຣະເຢຊູຄຣິດ. ພຣະເຢຊູຄຣິດ ເປັນ ຄວາມເຂັ້ມແຂງຂອງຊາວໜຸ່ມ.
ສະນັ້ນ ຈຸດປະສົງຂອງ ສຳລັບຄວາມເຂັ້ມແຂງຂອງຊາວໜຸ່ມ ຄືການຊີ້ໃຫ້ທ່ານໄປຫາພຣະອົງ. ມັນສິດສອນທ່ານເຖິງຄວາມຈິງນິລັນດອນຂອງພຣະກິດຕິຄຸນທີ່ຖືກຟື້ນຟູຂອງພຣະອົງ—ຄວາມຈິງກ່ຽວກັບຕົວທ່ານ, ພຣະອົງເປັນໃຜ, ແລະ ສິ່ງທີ່ທ່ານສາມາດບັນລຸດ້ວຍພະລັງຂອງພຣະອົງ. ມັນສິດສອນວິທີທີ່ທ່ານເຮັດການເລືອກທີ່ຊອບທຳ ອີງຕາມຄວາມຈິງນິລັນດອນຂອງມັນ.13
ມັນກໍສຳຄັນທີ່ຈະຮູ້ເຖິງສິ່ງທີ່ ສຳລັບຄວາມເຂັ້ມແຂງຂອງຊາວໜຸ່ມ ບໍ່ເຮັດນຳອີກ. ມັນບໍ່ໄດ້ຕັດສິນໃຈເພື່ອທ່ານ. ມັນບໍ່ໄດ້ຕອບທ່ານວ່າ “ແມ່ນ” ຫລື “ບໍ່ແມ່ນ” ກ່ຽວກັບທຸກການເລືອກທີ່ທ່ານອາດປະເຊີນ. ສຳລັບຄວາມເຂັ້ມແຂງຂອງຊາວໜຸ່ມ ສຸມໃສ່ພື້ນຖານສຳລັບການເລືອກຂອງທ່ານ. ມັນສຸມໃສ່ຄຸນຄ່າ, ຫລັກທຳ, ແລະ ຄຳສອນ ແທນທີ່ຈະສຸມໃສ່ພຶດຕິກຳສະເພາະທຸກຢ່າງ.
ພຣະຜູ້ເປັນເຈົ້າ, ຜ່ານທາງສາດສະດາຂອງພຣະອົງ, ໄດ້ນຳພາເຮົາໃນທິດທາງນັ້ນສະເໝີ. ເພິ່ນໄດ້ຂໍໃຫ້ເຮົາເພີ່ມ “ຄວາມສາມາດທາງວິນຍານ [ຂອງເຮົາ] ທີ່ຈະຮັບເອົາການເປີດເຜີຍ.”14 ເພິ່ນເຊື້ອເຊີນເຮົາວ່າ “ຈົ່ງຟັງພຣະອົງ.”15 ເພິ່ນເອີ້ນເຮົາໃຫ້ຕິດຕາມພຣະອົງໃນທາງທີ່ສຸງກວ່າ ແລະ ບໍລິສຸດກວ່າ.16 ແລະ ເຮົາກຳລັງຮຽນຮູ້ວິທີທີ່ຄ້າຍຄືກັນນັ້ນທຸກອາທິດໃນປຶ້ມ ຈົ່ງຕາມເຮົາມາ.
ຂ້າພະເຂົ້າຄິດວ່າ ປຶ້ມຄູ່ມືສາມາດໃຫ້ລາຍການຍາວໆກ່ຽວກັບເສື້ອຜ້າທີ່ທ່ານບໍ່ຄວນນຸ່ງ, ຄຳເວົ້າທີ່ທ່ານບໍ່ຄວນເວົ້າ, ແລະ ໜັງເລື່ອງທີ່ທ່ານບໍ່ຄວນເບິ່ງ. ແຕ່ມັນຈະເປັນປະໂຫຍດແທ້ໆບໍສຳລັບສາດສະໜາຈັກທີ່ຢູ່ທົ່ວໂລກ? ວິທີການເຊັ່ນນັ້ນຈະຊ່ວຍກະກຽມທ່ານໃຫ້ພ້ອມສຳລັບການດຳລົງຊີວິດເໝືອນພຣະຄຣິດຕະຫລອດຊີວິດຫລືບໍ່?
ໂຈເຊັບ ສະມິດ ໄດ້ກ່າວວ່າ, “ຂ້າພະເຈົ້າສິດສອນຫລັກທຳທີ່ຖືກຕ້ອງໃຫ້ເຂົາເຈົ້າ, ແລະ ໃຫ້ເຂົາເຈົ້າປົກຄອງຕົນເອງ.”17
ແລະ ກະສັດເບັນຢາມິນໄດ້ບອກຜູ້ຄົນຂອງເພິ່ນໃນພຣະຄຳພີມໍມອນວ່າ, “ຂ້າພະເຈົ້າບອກພວກທ່ານບໍ່ໄດ້ທຸກເລື່ອງ ໂດຍການທີ່ພວກທ່ານຈະກະທຳບາບ; ເພາະມີທາງ ແລະ ວິທີຕ່າງໆຊຶ່ງມີຫລາຍຈົນຂ້າພະເຈົ້ານັບບໍ່ໄດ້.”18
ກະສັດເບັນຢາມິນໄດ້ກ່າວຕື່ມວ່າ, “ແຕ່ຂ້າພະເຈົ້າບອກພວກທ່ານ, … ລະວັງຕົວ ແລະ ຄວາມນຶກຄິດ ຂອງພວກທ່ານ, ແລະ ຄຳເວົ້າຂອງພວກທ່ານ, ແລະ ການກະທຳຂອງພວກທ່ານ, ແລະ ຍຶດຖືພຣະບັນຍັດຂອງພຣະເຈົ້າ, ແລະ ດຳເນີນໄປດ້ວຍສັດທາເຖິງ … ພຣະຜູ້ເປັນເຈົ້າຂອງພວກເຮົາ, ເຖິງແມ່ນຈົນເຖິງທີ່ສຸດແຫ່ງຊີວິດຂອງພວກທ່ານ.”19
ມັນຜິດບໍທີ່ຈະມີກົດ? ບໍ່ຜິດ. ເຮົາທຸກຄົນຕ້ອງການມັນທຸກວັນ. ແຕ່ຜິດທີ່ຈະສຸມໃຈໃສ່ພຽງແຕ່ກົດ ແທນທີ່ຈະສຸມໃຈໃສ່ທີ່ພຣະຜູ້ຊ່ວຍໃຫ້ລອດ. ທ່ານຈຳເປັນຕ້ອງຮູ້ສາເຫດ ແລະ ວິທີ ແລະ ແລ້ວພິຈາລະນາຜົນສະທ້ອນຂອງການເລືອກຂອງທ່ານ. ທ່ານຕ້ອງໄວ້ວາງໃຈໃນພຣະເຢຊູຄຣິດ. ພຣະອົງຈະນຳພາທ່ານໄປໃນທາງທີ່ຖືກຕ້ອງ. ພຣະອົງເປັນຄວາມເຂັ້ມແຂງຂອງທ່ານ.20
ພະລັງຂອງຄຳສອນທີ່ແທ້ຈິງ
ສຳລັບຄວາມເຂັ້ມແຂງຂອງຊາວໜຸ່ມ ກ້າປະກາດຄຳສອນຂອງພຣະເຢຊູຄຣິດ. ມັນກ້າໃນການເຊື້ອເຊີນທ່ານໃຫ້ເຮັດການເລືອກອີງຕາມຄຳສອນຂອງພຣະຄຣິດ. ແລະ ມັນກ້າໃນການບັນຍາຍພອນທີ່ພຣະເຢຊູຄຣິດສັນຍາກັບຜູ້ທີ່ຕິດຕາມທາງຂອງພຣະອົງ.21
ປະທານຣະໂຊ ເອັມ ແນວສັນ ໄດ້ສິດສອນວ່າ: “ເມື່ອຄວາມປາດຖະໜາສູງສຸດຂອງທ່ານ ແມ່ນການຢາກໃຫ້ພຣະເຈົ້າໄຊຊະນະ [ໃນຊີວິດຂອງທ່ານ], … ການຕັດສິນໃຈຫລາຍໆຢ່າງຈະງ່າຍຂຶ້ນ. … ບັນຫາຫລາຍຢ່າງຈະໝົດໄປ! ທ່ານຈະຮູ້ຈັກວິທີແຕ່ງຕົວທີ່ຮຽບຮ້ອຍ. ທ່ານຈະຮູ້ຈັກວ່າຄວນເບິ່ງຫຍັງ ແລະ ອ່ານຫຍັງ, ວ່າຄວນໃຊ້ເວລາກັບສິ່ງໃດ, ແລະ ຄວນພົບປະສັງສັນກັບຄົນໃດ. ທ່ານຈະຮູ້ວ່າ ຢາກບັນລຸສິ່ງໃດ. ທ່ານຈະຮູ້ວ່າ ທ່ານ … ຢາກເປັນຄົນແບບໃດແທ້ໆ.”22
ມາດຕະຖານທີ່ສູງກວ່າ
ພຣະເຢຊູຄຣິດມີມາດຕະຖານທີ່ສູງຫລາຍສຳລັບຜູ້ຕິດຕາມພຣະອົງ. ແລະ ການເຊື້ອເຊີນໃຫ້ສະແຫວງຫາພຣະປະສົງຂອງພຣະອົງຢ່າງພາກພຽນ ແລະ ດຳລົງຊີວິດຕາມຄວາມຈິງຂອງພຣະອົງແມ່ນມາດຕະຖານທີ່ສູງສຸດເທົ່າທີ່ເປັນໄປໄດ້!
ການເລືອກທາງໂລກ ແລະ ທາງວິນຍານທີ່ສຳຄັນ ບໍ່ຄວນຂຶ້ນຢູ່ກັບຄວາມມັກຊອບສ່ວນຕົວ ຫລື ສິ່ງທີ່ສະດວກ ຫລື ເປັນທີ່ນິຍົມ.23 ພຣະຜູ້ເປັນເຈົ້າ ບໍ່ ໄດ້ກ່າວວ່າ, “ຢາກເຮັດຫຍັງກໍເຮັດໂລດ.”
ພຣະອົງກ່າວວ່າ, “ຂໍໃຫ້ພຣະເຈົ້າໄຊຊະນະ.”
ພຣະອົງກ່າວວ່າ, “ຈົ່ງຕາມເຮົາມາ.”24
ພຣະອົງກ່າວວ່າ, “ດຳລົງຊີວິດໃນທາງທີ່ບໍລິສຸດກວ່າ, ສູງກວ່າ, ເປັນຜູ້ໃຫຍ່ກວ່າ.”
ພຣະອົງກ່າວວ່າ, “ຈົ່ງຮັກສາພຣະບັນຍັດຂອງເຮົາ.”
ພຣະເຢຊູຄຣິດເປັນຕົວຢ່າງທີ່ສົມບູນແບບ, ແລະ ເຮົາກໍພະຍາຍາມຈົນສຸດພະລັງຂອງຈິດວິນຍານຂອງເຮົາທີ່ຈະຕິດຕາມພຣະອົງ.
ເພື່ອນທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍຍ້ຳອີກຄັ້ງ, ຖ້າພຣະຜູ້ຊ່ວຍໃຫ້ລອດຢືນຢູ່ທີ່ນີ້ ໃນວັນນີ້, ພຣະອົງຈະສະແດງຄວາມຮັກອັນບໍ່ມີສິ້ນສຸດຕໍ່ທ່ານ, ຄວາມໝັ້ນໃຈຢ່າງເຕັມທີ່ໃນຕົວທ່ານ. ພຣະອົງຈະບອກທ່ານວ່າ ທ່ານສາມາດເຮັດໄດ້. ທ່ານສາມາດສ້າງຊີວິດທີ່ຊື່ນຊົມ ແລະ ມີຄວາມສຸກໄດ້ເພາະພຣະເຢຊູຄຣິດເປັນຄວາມເຂັ້ມແຂງຂອງທ່ານ. ທ່ານສາມາດພົບຄວາມໝັ້ນໃຈ, ສັນຕິສຸກ, ຄວາມປອດໄພ, ຄວາມສຸກ, ແລະ ການເປັນພາກສ່ວນໃນເວລານີ້ ແລະ ຊົ່ວນິລັນດອນ, ເພາະທ່ານຈະພົບທັງໝົດນັ້ນໃນພຣະເຢຊູຄຣິດ, ໃນພຣະກິດຕິຄຸນຂອງພຣະອົງ, ແລະ ໃນສາດສະໜາຈັກຂອງພຣະອົງ.
ຂ້າພະເຈົ້າເປັນພະຍານເຖິງເລື່ອງນີ້ໃນຖານະອັກຄະສາວົກຂອງອົງພຣະເຢຊູຄຣິດເຈົ້າ ແລະ ຂໍມອບພອນຈາກໃຈຈິງໃນຄວາມຮູ້ບຸນຄຸນຢ່າງເລິກເຊິ່ງ ແລະ ຄວາມຮັກຕໍ່ທ່ານ, ໃນພຣະນາມຂອງພຣະເຢຊູຄຣິດ, ອາແມນ.