ຊົມຊື່ນຍິນດີແທນທີ່ຈະໂສກເສົ້າ: ຂັ້ນຕອນປິ່ນປົວຂອງການໃຫ້ອະໄພ
ເພື່ອຈະດຳລົງຊີວິດໃນວິທີທາງທີ່ທ່ານເປັນຜູ້ມອບໃຫ້ ຊົມຊື່ນຍິນດີແທນທີ່ຈະໂສກເສົ້າໃນຊີວິດຂອງທ່ານ ແມ່ນການກະທຳແຫ່ງສັດທາ ທີ່ຕິດຕາມພຣະຜູ້ຊ່ວຍໃຫ້ລອດ.
ພຣະທຳ1 ຊາມູເອນ ແມ່ນລວມດ້ວຍເລື່ອງລາວທີ່ບໍ່ຄ່ອຍມີຄົນຮູ້ຈັກຫລາຍກ່ຽວກັບດາວິດ, ກະສັດໃນອະນາຄົດຂອງອິດສະຣາເອນ, ແລະ ຜູ້ຍິງຄົນໜຶ່ງຊື່ອາບີກາຍ.
ຫລັງຈາກການເສຍຊີວິດຂອງຊາມູເອນ, ດາວິດ ແລະ ຄົນຂອງເພິ່ນໄດ້ໜີໄປຈາກກະສັດຊາອູນ, ຜູ້ທີ່ຢາກເອົາຊີວິດຂອງດາວິດ. ເຂົາເຈົ້າໄດ້ດູແລຝູງແກະ ແລະ ເປັນຄົນຮັບໃຊ້ຂອງຊາຍຮັ່ງມີຄົນໜຶ່ງຊື່ນາບານ, ຜູ້ທີ່ເປັນຄົນໃຈແຂງ ແລະ ໂຫດຮ້າຍ. ດາວິດໄດ້ສົ່ງຊາຍໜຸ່ມສິບຄົນນຳເອົາຄວາມຢື້ຢາມຖາມຂ່າວ ໄປຫານາບານ ແລະ ຂໍອາຫານ ແລະ ສະບຽງທີ່ຈຳເປັນດ້ວຍ.
ນາບານໄດ້ຕອບຄຳຮ້ອງຂໍຂອງດາວິດດ້ວຍການດູຖູກ ແລະ ໄດ້ສົ່ງຄົນຮັບໃຊ້ຂອງເພິ່ນກັບຄືນໄປດ້ວຍມືເປົ່າ.
ໂດຍທີ່ໃຈຮ້າຍ, ດາວິດໄດ້ກະກຽມຄົນຂອງເພິ່ນເພື່ອຂຶ້ນໄປຕໍ່ສູ້ກັບນາບານ ແລະ ຄອບຄົວຂອງລາວ, ໂດຍກ່າວວ່າ, “ອັນນີ້ບໍ ຄືການຕອບແທນໃນສິ່ງທີ່ຂ້ອຍໃຫ້ການຊ່ວຍເຫລືອແກ່ລາວ.”1 ຄົນຮັບໃຊ້ໄດ້ບອກນາງອາບີກາຍ, ເມຍຂອງນາບານ, ກ່ຽວກັບການປະຕິບັດທີ່ຮ້າຍກາດຂອງຜົວຂອງນາງຕໍ່ຄົນຂອງດາວິດ. ນາງອາບີກາຍໄດ້ຟ້າວຕຽມອາຫານ ແລະ ສະບຽງທີ່ຈຳເປັນ ແລະ ໄດ້ອອກໄປໄກ່ເກ່ຍແທນ.
ເມື່ອນາງອາບີກາຍໄດ້ພົບເພິ່ນ, ນາງໄດ້ “ກົ້ມຂາບລົງດິນ,
“ຂາບລົງທີ່ຕີນຂອງດາວິດ ແລະ ເວົ້າວ່າ, ທ່ານເອີຍ ກະລຸນາຟັງຂ້ານ້ອຍກ່ອນທ້ອນ ໃຫ້ຂ້ານ້ອຍຮັບເອົາຄວາມຜິດທັງໝົດນັ້ນສາ. …
“ທ່ານເອີຍ, … ພຣະເຈົ້າໄດ້ຫ້າມທ່ານບໍ່ໃຫ້ແກ້ແຄ້ນ ແລະ ຂ້າສັດຕູຂອງທ່ານ. …
“… ຂໍທ່ານກະລຸນາຮັບເອົາຂອງຂວັນທີ່ຂ້ານ້ອຍນຳມາໃຫ້ທ່ານ ແລະ ແຈກຢາຍໃຫ້ຄົນຂອງທ່ານກິນເຖີດ. …
“ຂໍໂຜດກະລຸນາຍົກໂທດໃນສິ່ງໃດໆທີ່ຂ້ານ້ອຍໄດ້ເຮັດຜິດໄປນັ້ນສາ. …
“ດາວິດເວົ້າກັບນາງວ່າ, ສັນລະເສີນພຣະເຈົ້າ ພຣະເຈົ້າຂອງຊາດອິດສະຣາເອນ ທີ່ໄດ້ສົ່ງເຈົ້າມາພົບຂ້ອຍໃນວັນນີ້:
“ຂອບຄຸນພຣະເຈົ້າໃນຄວາມສະຫລາດຂອງເຈົ້າ ແລະ ຕໍ່ສິ່ງທີ່ເຈົ້າເຮັດໃນວັນນີ້ ຄືປ້ອງກັນຂ້ອຍຈາກໂທດຂ້າຄົນ ແລະ ຈາກໂທດທີ່ລົງມືແກ້ແຄ້ນໂດຍຕົນເອງ. …
“ແລ້ວດາວິດກໍຮັບເອົາເຄື່ອງຂອງທີ່ນາງນຳມານັ້ນ ແລະ ກ່າວແກ່ນາງວ່າ, ໃຫ້ເຈົ້າກັບເມືອສາ ຢ່າໄດ້ກັງວົນເລີຍ ຂ້ອຍຈະເຮັດຕາມທີ່ເຈົ້າຕ້ອງການ.”2
ທັງສອງໄດ້ຈາກໄປໃນຄວາມສັນຕິສຸກ.
ໃນເລື່ອງນີ້, ຈະເຫັນນາງອາບີກາຍໄດ້ວ່າເປັນຕົ້ນແບບ ຫລື ສັນຍາລັກທີ່ມີພະລັງຂອງພຣະເຢຊູຄຣິດ.3 ຜ່ານທາງການເສຍສະລະຊົດໃຊ້ຂອງພຣະອົງ, ພຣະອົງສາມາດປົດປ່ອຍເຮົາຈາກບາບ ແລະ ຄວາມໜັກໜ່ວງຂອງຄວາມບາດໝາງໃນໃຈ ແລະ ຈັດຫາສະບຽງທີ່ເຮົາຕ້ອງການໃຫ້ແກ່ເຮົາ.4
ດັ່ງທີ່ນາງອາບີກາຍເຕັມໃຈຈະຮັບເອົາບາບຂອງນາບານ, ພຣະຜູ້ຊ່ວຍໃຫ້ລອດ—ໃນທາງທີ່ເກີນກວ່າຈະເຂົ້າໃຈໄດ້—ກໍໄດ້ຮັບເອົາບາບຂອງເຮົາ ແລະ ບາບຂອງຜູ້ຄົນທີ່ໄດ້ເຮັດໃຫ້ເຮົາເຈັບປວດ ຫລື ເຄືອງໃຈ.5 ຢູ່ທີ່ເຄັດເຊມາເນ ແລະ ຢູ່ເທິງໄມ້ກາງແຂນ, ພຣະອົງໄດ້ຮັບເອົາບາບເຫລົ່ານີ້. ພຣະອົງໄດ້ຈັດຫາທາງໃຫ້ເຮົາປ່ອຍວາງຄວາມແຄ້ນໃຈ. “ທາງ” ນັ້ນແມ່ນຜ່ານທາງການໃຫ້ອະໄພ—ຊຶ່ງສາມາດເປັນສິ່ງທີ່ຍາກທີ່ສຸດທີ່ເຮົາເຄີຍເຮັດ ແລະ ເປັນສິ່ງທີ່ສູງສົ່ງທີ່ສຸດທີ່ເຮົາຈະປະສົບ. ຢູ່ໃນຂັ້ນຕອນຂອງການໃຫ້ອະໄພ, ອຳນາດແຫ່ງການຊົດໃຊ້ຂອງພຣະເຢຊູຄຣິດສາມາດຫລັ່ງໄຫລເຂົ້າມາໃນຊີວິດຂອງເຮົາ ແລະ ເລີ່ມປິ່ນປົວຄວາມເຈັບປວດທີ່ໜັກໜ່ວງຂອງຫົວໃຈ ແລະ ຈິດວິນຍານ.
ປະທານຣະໂຊ ເອັມ ແນວສັນ ໄດ້ສິດສອນວ່າ ພຣະຜູ້ຊ່ວຍໃຫ້ລອດສະເໜີມອບຄວາມສາມາດໃຫ້ເຮົາເພື່ອຈະໃຫ້ອະໄພ:
“ຜ່ານທາງການຊົດໃຊ້ອັນເປັນນິດຂອງພຣະອົງ, ທ່ານສາມາດໃຫ້ອະໄພຄົນທີ່ໄດ້ເຮັດໃຫ້ທ່ານເຈັບປວດ ແລະ ຄົນທີ່ບໍ່ເຄີຍຍອມຮັບເອົາຄວາມຮັບຜິດຊອບສຳລັບຄວາມຮ້າຍກາດທີ່ເຂົາໄດ້ເຮັດກັບທ່ານ.
“ມັນເປັນສິ່ງງ່າຍທີ່ຈະໃຫ້ອະໄພແກ່ຄົນທີ່ສະແຫວງຫາການໃຫ້ອະໄພຈາກທ່ານດ້ວຍຄວາມຈິງໃຈ ແລະ ດ້ວຍຄວາມຖ່ອມຕົນ. ແຕ່ພຣະຜູ້ຊ່ວຍໃຫ້ລອດຈະປະທານຄວາມສາມາດໃຫ້ທ່ານ ເພື່ອຈະໃຫ້ອະໄພຄົນທີ່ໄດ້ເຮັດຜິດຕໍ່ທ່ານ ບໍ່ວ່າຈະເປັນໃນຮູບແບບໃດກໍຕາມ. ແລ້ວການກະທຳອັນເຈັບປວດຂອງເຂົາຈະບໍ່ລົບກວນຈິດວິນຍານຂອງທ່ານອີກຕໍ່ໄປ.”6
ການທີ່ນາງອາບີກາຍນຳອາຫານ ແລະ ສະບຽງຢ່າງຫລວງຫລາຍມາໃຫ້ ສາມາດສິດສອນເຮົາວ່າ ພຣະຜູ້ຊ່ວຍໃຫ້ລອດກໍສະເໜີມອບໃຫ້ແກ່ຜູ້ທີ່ຖືກເຮັດໃຫ້ເຈັບປວດ ແລະ ຖືກບາດເຈັບ ສະບຽງທີ່ຈຳເປັນ ແລະ ຄວາມຊ່ວຍເຫລືອທີ່ເຮົາຕ້ອງການເພື່ອຈະໄດ້ຮັບການປິ່ນປົວ ແລະ ຖືກເຮັດໃຫ້ຫາຍດີ.7 ເຮົາບໍ່ໄດ້ຖືກປະຖິ້ມໃຫ້ຮັບມືກັບຜົນສະທ້ອນຂອງການກະທຳຂອງຄົນອື່ນດ້ວຍຕົວເຮົາເອງ; ເຮົາສາມາດຖືກເຮັດໃຫ້ຫາຍດີຄືກັນ ແລະ ໄດ້ຮັບໂອກາດທີ່ຈະລອດພົ້ນຈາກຄວາມໜັກໜ່ວງຂອງຄວາມບາດໝາງໃນໃຈ ແລະ ການກະທຳໃດໆທີ່ອາດຈະຕາມມາ.
ພຣະຜູ້ເປັນເຈົ້າໄດ້ກ່າວວ່າ, “ເຮົາ, ພຣະຜູ້ເປັນເຈົ້າ, ຈະໃຫ້ອະໄພຜູ້ທີ່ເຮົາຈະໃຫ້ອະໄພ, ແຕ່ພວກເຈົ້າຖືກຮຽກຮ້ອງໃຫ້ອະໄພແກ່ມະນຸດທັງປວງ.”8 ພຣະຜູ້ເປັນເຈົ້າຮຽກຮ້ອງໃຫ້ເຮົາໃຫ້ອະໄພເພື່ອຄວາມດີຂອງເຮົາເອງ.9 ແຕ່ພຣະອົງບໍ່ໄດ້ຮຽກຮ້ອງໃຫ້ເຮົາເຮັດສິ່ງນັ້ນປາດສະຈາກຄວາມຊ່ວຍເຫລືອຂອງພຣະອົງ, ຄວາມຮັກ, ຄວາມເຂົ້າໃຈຂອງພຣະອົງ. ຜ່ານທາງພັນທະສັນຍາຂອງເຮົາກັບພຣະຜູ້ເປັນເຈົ້າ, ເຮົາແຕ່ລະຄົນສາມາດໄດ້ຮັບອຳນາດທີ່ເສີມພະລັງ, ການຊີ້ນຳ, ແລະ ຄວາມຊ່ວຍເຫລືອທີ່ເຮົາຕ້ອງການ ທັງຈະໃຫ້ອະໄພ ແລະ ໄດ້ຮັບການໃຫ້ອະໄພ.
ຂໍໃຫ້ຮູ້ໄວ້ວ່າ ການໃຫ້ອະໄພຄົນບາງຄົນບໍ່ໄດ້ໝາຍຄວາມວ່າທ່ານຈະວາງຕົວເອງຢູ່ໃນສະພາບການ ບ່ອນທີ່ທ່ານຈະໄດ້ຮັບບາດເຈັບຕໍ່ໄປ. “ເຮົາສາມາດພະຍາຍາມໃຫ້ອະໄພຄົນໃດຄົນໜຶ່ງ ແລະ ຍັງຮູ້ສຶກກະຕຸ້ນໂດຍພຣະວິນຍານວ່າໃຫ້ຢູ່ຫ່າງໆຈາກຄົນເຫລົ່ານັ້ນ.”10
ດັ່ງທີ່ນາງອາບີກາຍໄດ້ຊ່ວຍດາວິດບໍ່ໃຫ້ “ເສຍໃຈ”11 ແລະ ໄດ້ຮັບຄວາມຊ່ວຍເຫລືອທີ່ເພິ່ນຕ້ອງການ, ພຣະຜູ້ຊ່ວຍໃຫ້ລອດກໍຈະຊ່ວຍທ່ານຄືກັນ. ພຣະອົງຮັກທ່ານ, ແລະ ພຣະອົງຈະພົບທ່ານດ້ວຍ “ການປິ່ນປົວ” ຢູ່ໃນເສັ້ນທາງຂອງທ່ານ.12 ພຣະອົງປະສົງໃຫ້ທ່ານໄດ້ຮັບສັນຕິສຸກ.
ຂ້າພະເຈົ້າໄດ້ເຫັນການມະຫັດສະຈັນຂອງພຣະຄຣິດປິ່ນປົວຄວາມບາດໝາງໃນໃຈຂອງຂ້າພະເຈົ້າເອງ. ໂດຍໄດ້ຮັບອະນຸຍາດຈາກພໍ່ຂອງຂ້າພະເຈົ້າ, ຂ້າພະເຈົ້າຂໍແບ່ງປັນວ່າ ຂ້າພະເຈົ້າໄດ້ເຕີບໂຕມາໃນຄອບຄົວທີ່ຂ້າພະເຈົ້າບໍ່ໄດ້ຮູ້ສຶກປອດໄພເພາະຖືກກະທຳຜິດຕໍ່ທາງອາລົມ ແລະ ວາຈາ. ໃນໄວໜຸ່ມ ແລະ ຕອນເປັນຜູ້ໃຫຍ່ໜຸ່ມ, ຂ້າພະເຈົ້າຄຽດແຄ້ນໃຫ້ພໍ່ຂອງຂ້າພະເຈົ້າ ແລະ ໄດ້ມີຄວາມໂກດຮ້າຍໃນໃຈຈາກຄວາມເຈັບປວດນັ້ນ.
ໃນໄລຍະຫລາຍປີທີ່ຜ່ານມາ ແລະ ໃນຄວາມພະຍາຍາມຂອງຂ້າພະເຈົ້າທີ່ຈະໄດ້ພົບສັນຕິສຸກ ແລະ ການປິ່ນປົວຢູ່ໃນຂັ້ນຕອນຂອງການໃຫ້ອະໄພ, ຂ້າພະເຈົ້າໄດ້ມາຮັບຮູ້ຢ່າງເລິກເຊິ່ງວ່າ ພຣະບຸດຂອງພຣະເຈົ້າອົງດຽວກັນທີ່ໄດ້ຊົດໃຊ້ແທນບາບຂອງຂ້າພະເຈົ້າ ກໍເປັນພຣະຜູ້ໄຖ່ອົງດຽວກັນທີ່ຈະຊ່ວຍຜູ້ຄົນທີ່ໄດ້ເຮັດໃຫ້ຂ້າພະເຈົ້າເຈັບປວດຫລາຍຄືກັນ. ຂ້າພະເຈົ້າບໍ່ສາມາດເຊື່ອຄວາມຈິງຂໍ້ທຳອິດໄດ້ປາດສະຈາກການເຊື່ອຂໍ້ທີສອງ.
ຂະນະທີ່ຄວາມຮັກຂອງຂ້າພະເຈົ້າຕໍ່ພຣະຜູ້ຊ່ວຍໃຫ້ລອດມີຫລາຍຂຶ້ນ, ຂ້າພະເຈົ້າກໍປາດຖະໜາທີ່ຈະເອົາຫວ້ານຢາປິ່ນປົວຂອງພຣະອົງມາປິ່ນປົວຄວາມເຈັບປວດ ແລະ ຄວາມໂກດຮ້າຍຂອງຂ້າພະເຈົ້າຄືກັນ. ມັນໄດ້ເປັນຂັ້ນຕອນເປັນເວລາຫລາຍປີ, ທີ່ຮຽກຮ້ອງຄວາມກ້າຫານ, ຄວາມອ່ອນໄຫວ, ຄວາມມານະອົດທົນ, ແລະ ການຮຽນຮູ້ທີ່ຈະໄວ້ວາງໃຈໃນອຳນາດແຫ່ງສະຫວັນຂອງພຣະຜູ້ຊ່ວຍໃຫ້ລອດທີ່ຈະຊ່ວຍໃຫ້ລອດ ແລະ ປິ່ນປົວ. ຂ້າພະເຈົ້າຍັງຕ້ອງພະຍາຍາມຕໍ່ໄປ, ແຕ່ຫົວໃຈຂອງຂ້າພະເຈົ້າກໍບໍ່ຮູ້ສຶກໂກດຮ້າຍ ແລະ ຢາກແກ້ແຄ້ນອີກເລີຍ. ຂ້າພະເຈົ້າໄດ້ຮັບ “ຈິດໃຈໃໝ່”13—ຈິດໃຈທີ່ໄດ້ຮູ້ສຶກຄວາມຮັກທີ່ເລິກເຊິ່ງ ແລະ ທົນທານຂອງພຣະຜູ້ຊ່ວຍໃຫ້ລອດສ່ວນຕົວ, ພຣະອົງທີ່ໄດ້ສະຖິດຢູ່ຄຽງຂ້າງຂ້າພະເຈົ້າ, ທີ່ໄດ້ນຳພາຂ້າພະເຈົ້າດ້ວຍຄວາມອ່ອນໂຍນ ແລະ ຄວາມອົດທົນໄປສູ່ບ່ອນທີ່ດີກວ່າ, ທີ່ໄດ້ຮ້ອງໄຫ້ນຳຂ້າພະເຈົ້າ, ທີ່ໄດ້ຮູ້ຈັກຄວາມໂສກເສົ້າຂອງຂ້າພະເຈົ້າ.
ພຣະຜູ້ເປັນເຈົ້າໄດ້ສົ່ງພອນຊົດເຊີຍມາໃຫ້ຂ້າພະເຈົ້າດັ່ງທີ່ນາງອາບີກາຍໄດ້ນຳສິ່ງທີ່ດາວິດຕ້ອງການມາໃຫ້. ພຣະອົງໄດ້ສົ່ງທີ່ປຶກສາເຂົ້າມາໃນຊີວິດຂອງຂ້າພະເຈົ້າ. ແລະ ທີ່ຫວານຊື່ນ ແລະ ປ່ຽນແປງຫລາຍທີ່ສຸດກໍແມ່ນຄວາມສຳພັນຂອງຂ້າພະເຈົ້າກັບພຣະບິດາເທິງສະຫວັນຂອງຂ້າພະເຈົ້າ. ຜ່ານທາງພຣະອົງ, ດ້ວຍຄວາມກະຕັນຍູ ຂ້າພະເຈົ້າໄດ້ຮູ້ຈັກຄວາມຮັກທີ່ອ່ອນໂຍນ, ປົກປ້ອງ, ແລະ ນຳພາຂອງພຣະບິດາທີ່ດີພ້ອມ.
ແອວເດີ ຣິເຈີດ ຈີ ສະກາດ ໄດ້ກ່າວວ່າ: “ທ່ານບໍ່ສາມາດ ລົບລ້າງສິ່ງທີ່ຖືກກະທຳໄປແລ້ວ, ແຕ່ທ່ານສາມາດໃຫ້ອະໄພ.14 ການໃຫ້ອະໄພປິ່ນປົວບາດແຜທີ່ຮ້າຍກາດ ແລະ ໂສກເສົ້າ, ເພາະມັນອະນຸຍາດໃຫ້ຄວາມຮັກຂອງພຣະເຈົ້າມາກຳຈັດສານພິດຂອງຄວາມກຽດຊັງອອກໄປຈາກຫົວໃຈ ແລະ ຈິດໃຈຂອງທ່ານ. ມັນຊຳລະລ້າງຈິດສຳນຶກທີ່ປາດຖະໜາຈະແກ້ແຄ້ນຂອງທ່ານ. ມັນຈະໃຫ້ພື້ນທີ່ສຳລັບຄວາມຮັກທີ່ຊຳລະໃຫ້ບໍລິສຸດ, ທີ່ປິ່ນປົວ, ທີ່ຟື້ນຟູຂອງພຣະຜູ້ເປັນເຈົ້າ.”15
ເມື່ອບໍ່ດົນມານີ້ ພໍ່ເທິງໂລກຂອງຂ້າພະເຈົ້າໄດ້ມີການປ່ຽນແປງໃນໃຈຢ່າງມະຫັດສະຈັນຄືກັນ ແລະ ໄດ້ຫັນໄປຫາພຣະຜູ້ເປັນເຈົ້າ—ສິ່ງທີ່ຂ້າພະເຈົ້າບໍ່ໄດ້ຄາດຄິດເລີຍໃນຊີວິດນີ້. ນີ້ກໍເປັນປະຈັກພະຍານຕໍ່ຂ້າພະເຈົ້າອີກຢ່າງໜຶ່ງເຖິງອຳນາດທີ່ສົມບູນ ແລະ ປ່ຽນແປງຂອງພຣະເຢຊູຄຣິດ.
ຂ້າພະເຈົ້າຮູ້ວ່າພຣະອົງສາມາດປິ່ນປົວຄົນບາບ ແລະ ຜູ້ທີ່ຖືກກະທຳບາບຕໍ່. ພຣະອົງເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງໂລກ, ອົງທີ່ໄດ້ສະລະພຣະຊົນຊີບຂອງພຣະອົງເພື່ອວ່າເຮົາຈະໄດ້ມີຊີວິດອີກຄັ້ງ. ພຣະອົງໄດ້ກ່າວວ່າ, “ພຣະວິນຍານຂອງພຣະຜູ້ເປັນເຈົ້າສະຖິດຢູ່ເທິງຂ້ານ້ອຍ, ເພາະພຣະອົງໄດ້ຫົດສົງແຕ່ງຕັ້ງຂ້ານ້ອຍໄວ້ໃຫ້ປະກາດຂ່າວປະເສີດແກ່ຄົນຍາກຈົນ; ພຣະອົງໃຊ້ຂ້ານ້ອຍໄປ ປິ່ນປົວຫົວໃຈທີ່ຊອກຊ້ຳ, ປະກາດອິດສະລະພາບແກ່ຄົນທັງຫລາຍທີ່ຖືກຈຳຈອງ, ແລະ ຄົນຕາບອດຈະເຫັນຮຸ່ງອີກ, ປົດປ່ອຍຜູ້ຖືກກົດຂີ່ໃຫ້ເປັນອິດສະລະ.”16
ຕໍ່ທຸກຄົນທີ່ມີຫົວໃຈທີ່ຊອກຊ້ຳ, ຖືກຈຳຈອງ, ຖືກກົດຂີ່, ແລະ ບາງເທື່ອບໍ່ເຫັນຮຸ່ງຍ້ອນຄວາມເຈັບປວດ ຫລື ບາບ, ພຣະອົງສະເໜີມອບການປິ່ນປົວ, ການຟື້ນຕົວ, ແລະ ການປົດປ່ອຍໃຫ້ແກ່ທ່ານ. ຂ້າພະເຈົ້າເປັນພະຍານວ່າ ການປິ່ນປົວ ແລະ ການຟື້ນຕົວທີ່ພຣະອົງສະເໜີມອບໃຫ້ນັ້ນມີຈິງ. ວັນເວລາຂອງການປິ່ນປົວນັ້ນເປັນເລື່ອງສ່ວນບຸກຄົນ, ແລະ ເຮົາບໍ່ສາມາດຕັດສິນວັນເວລາຂອງຄົນອື່ນໄດ້. ມັນສຳຄັນທີ່ຈະໃຫ້ເວລາທີ່ຈຳເປັນແກ່ຕົວເຮົາເອງ ທີ່ຈະໄດ້ຮັບການປິ່ນປົວ ແລະ ໃຫ້ມີເມດຕາກັບຕົວເຮົາເອງໃນຂັ້ນຕອນນີ້. ພຣະຜູ້ຊ່ວຍໃຫ້ລອດມີເມດຕາ ແລະ ໃສ່ໃຈສະເໝີ ແລະ ພ້ອມທີ່ຈະໃຫ້ຄວາມຊ່ວຍເຫລືອທີ່ເຮົາຕ້ອງການ.17
ຢູ່ໃນຂັ້ນຕອນຂອງການໃຫ້ອະໄພ ແລະ ການປິ່ນປົວ ຍັງມີທາງເລືອກທີ່ຈະບໍ່ສືບຕໍ່ໃນວົງຈອນ ຫລື ຄວາມສຳພັນທີ່ບໍ່ດີນີ້ໃນຄອບຄົວ ຫລື ບ່ອນອື່ນໃດ. ຕໍ່ທຸກຄົນທີ່ຢູ່ພາຍໃຕ້ອິດທິພົນຂອງເຮົາ, ເຮົາສາມາດສະເໜີມອບຄວາມເມດຕາແທນຄວາມໂຫດຮ້າຍ, ຄວາມຮັກແທນຄວາມກຽດຊັງ, ຄວາມອ່ອນນ້ອມແທນຄວາມຫຍາບຄາຍ, ຄວາມປອດໄພແທນຄວາມຍາກລຳບາກ, ແລະ ສັນຕິສຸກແທນການຂັດແຍ້ງ.
ເພື່ອຈະໃຫ້ສິ່ງທີ່ທ່ານຖືກປະຕິເສດນັ້ນ ແມ່ນພາກສ່ວນຂອງການປິ່ນປົວທີ່ສູງສົ່ງ ທີ່ເປັນໄປໄດ້ຜ່ານທາງສັດທາໃນພຣະເຢຊູຄຣິດ. ເພື່ອຈະດຳລົງຊີວິດໃນວິທີທາງທີ່ທ່ານເປັນຜູ້ມອບໃຫ້, ດັ່ງທີ່ເອຊາຢາໄດ້ກ່າວ, ຊົມຊື່ນຍິນດີແທນທີ່ຈະໂສກເສົ້າໃນຊີວິດຂອງທ່ານ18 ແມ່ນການກະທຳແຫ່ງສັດທາ ທີ່ຕິດຕາມຕົວຢ່າງທີ່ສູງສຸດຂອງພຣະຜູ້ຊ່ວຍໃຫ້ລອດ ຜູ້ທີ່ໄດ້ທົນທຸກທໍລະມານທຸກສິ່ງເພື່ອວ່າພຣະອົງຈະໄດ້ຊ່ວຍເຫລືອທຸກຄົນ.
ໂຢເຊັບແຫ່ງເອຢິບໄດ້ດຳລົງຊີວິດດ້ວຍຄວາມໂສກເສົ້າ. ເພິ່ນຖືກພວກອ້າຍກຽດຊັງ, ຖືກທໍລະຍົດ, ຖືກຂາຍໄປເປັນຂ້າທາດ, ຖືກຈຳຄຸກຜິດ, ແລະ ຖືກລືມໄລໂດຍຜູ້ທີ່ໄດ້ສັນຍາວ່າຈະຊ່ວຍເຫລືອ. ແຕ່ເພິ່ນໄດ້ໄວ້ວາງໃຈໃນພຣະຜູ້ເປັນເຈົ້າ. “ພຣະຜູ້ເປັນເຈົ້າສະຖິດຢູ່ກັບໂຢເຊັບ”19 ແລະ ໄດ້ຖວາຍການທົດລອງຂອງເພິ່ນໃຫ້ເປັນພອນ ແລະ ການເຕີບໂຕຂອງເພິ່ນ—ແລະ ໃນການຊ່ວຍຄອບຄົວຂອງເພິ່ນ ແລະ ເອຢິບທັງໝົດໃຫ້ລອດ.
ເມື່ອໂຢເຊັບໄດ້ພົບກັບພວກອ້າຍຂອງເພິ່ນໃນຖານະຜູ້ນຳທີ່ຍິ່ງໃຫຍ່ໃນເອຢິບ, ການໃຫ້ອະໄພ ແລະ ທັດສະນະຄະຕິທີ່ຖືກຫລໍ່ຫລອມຂອງເພິ່ນກໍຖືກສະແດງໃຫ້ປະຈັກ ໃນຖ້ອຍຄຳທີ່ມີເມດຕາທີ່ເພິ່ນໄດ້ກ່າວ:
“ບັດນີ້ ຢ່າເປັນທຸກໃຈ ຫລື ກ່າວໂທດຕົນເອງ ທີ່ໄດ້ຂາຍຂ້ອຍມາທີ່ນີ້, ແມ່ນພຣະເຈົ້າທີ່ໄດ້ສົ່ງຂ້ອຍມານີ້ກ່ອນ ເພື່ອຊ່ວຍຊີວິດມະນຸດ. …
“ດັ່ງນັ້ນ ຈຶ່ງບໍ່ແມ່ນພວກເຈົ້າທີ່ໄດ້ສົ່ງຂ້ອຍມາທີ່ນີ້, ແຕ່ແມ່ນພຣະເຈົ້າ.”20
ຜ່ານທາງພຣະຜູ້ຊ່ວຍໃຫ້ລອດ, ຊີວິດຂອງໂຢເຊັບກໍໄດ້ “ຊົມຊື່ນຍິນດີແທນທີ່ຈະໂສກເສົ້າ.”21
ແຄວິນ ເຈ ເວີດເຕັນ, ປະທານມະຫາວິທະຍາໄລບຣິກຳ ຢັງ, ໄດ້ກ່າວວ່າ ພຣະເຈົ້າ “ສາມາດເຮັດໃຫ້ຄວາມດີມີມາ … ບໍ່ພຽງແຕ່ຈາກຄວາມສຳເລັດຂອງເຮົາເທົ່ານັ້ນ ແຕ່ຈາກຄວາມລົ້ມເຫລວຂອງເຮົາ ແລະ ຄວາມລົ້ມເຫລວຂອງຄົນອື່ນທີ່ໄດ້ເຮັດໃຫ້ເຮົາເຈັບປວດນຳອີກ. ພຣະເຈົ້າແມ່ນເກັ່ງຂະໜາດ ແລະ ມີອຳນາດຂະໜາດນັ້ນ.”22
“ຂ້າພະເຈົ້າເປັນພະຍານວ່າ ຕົວຢ່າງແຫ່ງຄວາມຮັກ ແລະ ການໃຫ້ອະໄພທີ່ຍິ່ງໃຫຍ່ທີ່ສຸດແມ່ນວ່າ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ຜູ້ຢູ່ໃນຄວາມເຈັບປວດອັນຂົມຂື່ນໄດ້ກ່າວວ່າ, “ພຣະບິດາເຈົ້າເອີຍ, ໂຜດຍົກໂທດໃຫ້ພວກເຂົາດ້ວຍເຖີດ; ເພາະພວກເຂົາບໍ່ຮູ້ຈັກວ່າ ພວກເຂົາກຳລັງເຮັດຫຍັງ.”23
ຂ້າພະເຈົ້າຮູ້ວ່າພຣະບິດາຜູ້ສະຖິດຢູ່ໃນສະຫວັນຂອງເຮົາປະສົງຈະໃຫ້ຄວາມດີງາມ ແລະ ຄວາມຫວັງແກ່ລູກໆຂອງພຣະອົງທຸກຄົນ. ໃນພຣະທຳເຢເຣມີຢາ ເຮົາອ່ານວ່າ, “ເຮົາຜູ້ດຽວເທົ່ານັ້ນທີ່ຮູ້ແຜນການຂອງເຮົາສຳລັບພວກເຈົ້າ, ພຣະເຈົ້າກ່າວ, ຄືແຜນການທີ່ນຳຄວາມຈະເລີນຮຸ່ງເຮືອງມາສູ່ພວກເຈົ້າ.”24
ພຣະເຢຊູຄຣິດເປັນພຣະເມຊີອາສ່ວນຕົວຂອງທ່ານ, ພຣະຜູ້ໄຖ່ ແລະ ພຣະຜູ້ຊ່ວຍໃຫ້ລອດທີ່ຮັກຂອງທ່ານ, ຜູ້ຮູ້ຄຳອ້ອນວອນຂອງໃຈທ່ານ. ພຣະອົງປະສົງໃຫ້ທ່ານໄດ້ຮັບການປິ່ນປົວ ແລະ ມີຄວາມສຸກ. ພຣະອົງຮັກທ່ານ. ພຣະອົງກັນແສງນຳທ່ານໃນຄວາມໂສກເສົ້າຂອງທ່ານ ແລະ ປິຕິຍິນດີທີ່ຈະເຮັດໃຫ້ທ່ານຫາຍດີ. ຂໍໃຫ້ເຮົາຈົ່ງມີກຳລັງໃຈ ແລະ ຄວາມຫວັງ ແລະ ຈັບພຣະຫັດທີ່ປ່ຽມດ້ວຍຄວາມຮັກຂອງພຣະອົງທີ່ເດ່ອອກມາ25 ຂະນະທີ່ເຮົາກ້າວເດີນໄປຢູ່ໃນຂັ້ນຕອນປິ່ນປົວຂອງການໃຫ້ອະໄພ ນີ້ຄືຄຳທິຖານຂອງຂ້າພະເຈົ້າ ໃນພຣະນາມຂອງພຣະເຢຊູຄຣິດ, ອາແມນ.