ສຸມໃຈໃສ່ພຣະວິຫານ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ຂ້າພະເຈົ້າສັນຍາວ່າ ເວລາທີ່ເພີ່ມຂຶ້ນໃນພຣະວິຫານຈະເປັນພອນໃຫ້ແກ່ຊີວິດຂອງທ່ານ ໃນແບບທີ່ສິ່ງອື່ນບໍ່ສາມາດເຮັດໄດ້.

ອ້າຍເອື້ອຍນ້ອງທີ່ຮັກແພງ, ລະຫວ່າງກອງປະຊຸມໃຫຍ່ສາມັນທີ່ສະຫງ່າງາມຫ້າພາກນີ້, ພວກເຮົາເຫັນວ່າ ສະຫວັນໄດ້ເປີດອີກຄັ້ງ! ຂ້າພະເຈົ້າອະທິຖານວ່າ ທ່ານໄດ້ບັນທຶກຄວາມປະທັບໃຈຂອງທ່ານໄວ້ ແລະ ຈະເຮັດຕາມນັ້ນ. ພຣະບິດາເທິງສະຫວັນຂອງເຮົາ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ປະທັບຢູ່ພ້ອມແລ້ວທີ່ຈະຊ່ວຍເຫລືອທ່ານ. ຂ້າພະເຈົ້າຊຸກຍູ້ທ່ານໃຫ້ເພີ່ມຄວາມພະຍາຍາມທີ່ຈະສະແຫວງຫາການຊ່ວຍເຫລືອຈາກພວກພຣະອົງ.

ເມື່ອບໍ່ດົນມານີ້, ຊິດສະເຕີ ແນວສັນ ກັບຂ້າພະເຈົ້າໄດ້ມີໂອກາດຮັບຊົມ ວິດີໂອພຣະຄຳພີມໍມອນ ຊຸດໃໝ່ ປີທີສີ່ ກ່ອນອອກເຜີຍແຜ່.¹ ພວກເຮົາໄດ້ຮັບການດົນໃຈຈາກວິດີໂອເຫລົ່ານັ້ນ! ຂ້າພະເຈົ້າຂໍສາຍຕອນໜຶ່ງສັ້ນໆ ຈາກສາກທີ່ພັນລະນາກ່ຽວກັບພຣະຜູ້ຊ່ວຍໃຫ້ລອດປະກົດຕົວຕໍ່ຊາວນີໄຟ.

ມັນສຳຄັນທີ່ພຣະຜູ້ຊ່ວຍໃຫ້ລອດໄດ້ເລືອກທີ່ຈະປະກົດຕົວຕໍ່ຜູ້ຄົນຢູ່ທີ່ພຣະວິຫານ. ມັນເປັນບ້ານຂອງພຣະອົງ. ມັນເຕັມໄປດ້ວຍອຳນາດຂອງພຣະອົງ. ຂໍໃຫ້ເຮົາຢ່າເບິ່ງຂ້າມສິ່ງທີ່ພຣະຜູ້ເປັນເຈົ້າກຳລັງກະທຳເພື່ອເຮົາໃນເວລານີ້. ພຣະອົງເຮັດໃຫ້ພຣະວິຫານຂອງພຣະອົງ ສາມາດເຂົ້າເຖິງໄດ້ຫລາຍກວ່າເກົ່າ. ພຣະອົງກຳລັງເລັ່ງຄວາມໄວໃນການໃຫ້ພວກເຮົາສ້າງພຣະວິຫານ. ພຣະອົງກຳລັງເພີ່ມຄວາມສາມາດຂອງພວກເຮົາ ເພື່ອຊ່ວຍເຕົ້າໂຮມອິດສະຣາເອນ. ພຣະອົງກໍຍັງເຮັດໃຫ້ມັນງ່າຍຂຶ້ນສຳລັບເຮົາແຕ່ລະຄົນ ທີ່ຈະໄດ້ຮັບການຂັດເກົາທາງວິນຍານ. ຂ້າພະເຈົ້າສັນຍາວ່າ ເວລາທີ່ເພີ່ມຂຶ້ນໃນພຣະວິຫານຈະເປັນພອນໃຫ້ແກ່ຊີວິດຂອງທ່ານ ໃນແບບທີ່ສິ່ງອື່ນບໍ່ສາມາດເຮັດໄດ້.

ປະຈຸບັນນີ້ພວກເຮົາມີພຣະວິຫານທີ່ເປີດບໍລິການ 168 ແຫ່ງ ແລະ ມີພຣະວິຫານໃໝ່ 53 ແຫ່ງ ທີ່ກຳລັງຢູ່ໃນຂັ້ນຕອນການສ້າງ ແລະ ອີກ 54 ແຫ່ງ ທີ່ຢູ່ໃນຂັ້ນຕອນການວາງແຜນທີ່ຈະສ້າງ!² ຂ້າພະເຈົ້າຍິນດີທີ່ຈະປະກາດແຜນການຂອງພວກເຮົາ ທີ່ຈະສ້າງພຣະວິຫານໃໝ່ໃນສະຖານທີ່ດັ່ງຕໍ່ໄປນີ້: ບູຊານ, ເກົາຫລີ; ນາກາ, ຟີລິບປິນ; ຊານຕີອາໂກ, ຟີລິບປິນ; ເອເກັດ, ນີເຊເຣຍ; ຈິຄະລາໂຢ, ເປຣູ; ບວຍໂນສ໌ ອາເຣສ໌ ຊີທີ ເຊັນເທີ, ອາກຊັງຕິນ; ລອນດຣິນາ, ບຣາຊິນ; ຣິເບຍຣາວ ປະເຣໂຕ, ບຣາຊິນ; ຮວຍຮວຍເຕນັງໂກ, ກົວເຕມາລາ; ແຈ໊ກສັນວຽວ, ຟລໍຣິດາ; ແກຣນ ແຣປິສ, ມິຊິກັນ; ພອສ ຊະເປີ, ເທັກຊັດ; ໂລນ ມາວເທນ, ນີວາດາ; ແລະ ທາໂຄມາ, ວໍຊິງຕັນ.

ພວກເຮົາກໍກຳລັງວາງແຜນທີ່ຈະສ້າງພຣະວິຫານຫລາຍແຫ່ງໃນພື້ນທີ່ຕົວເມືອງໃຫຍ່ ບ່ອນທີ່ການເດີນທາງ ແລະ ພຣະວິຫານເປັນເລື່ອງທ້າທາຍຫລາຍ. ສະນັ້ນ, ຂ້າພະເຈົ້າຈຶ່ງຍິນດີທີ່ຈະປະກາດສະຖານທີ່ສີ່ແຫ່ງຕື່ມອີກ ທີ່ຕັ້ງຢູ່ໃກ້ເມືອງ ແມັກຊິໂກ ຊີທີ ບ່ອນທີ່ພຣະວິຫານໃໝ່ຈະຖືກສ້າງຂຶ້ນໃນເມືອງຄວານາວາກາ, ປາຈູກາ, ໂທລູກາ, ແລະ ທູລາ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂໍໃຫ້ທ່ານຈົ່ງສຸມໃຈໃສ່ພຣະວິຫານ ໃນແບບທີ່ທ່ານບໍ່ເຄີຍເຮັດມາກ່ອນ. ຂ້າພະເຈົ້າຂໍອວຍພອນທ່ານໃຫ້ເຂົ້າໃກ້ພຣະເຈົ້າ ແລະ ພຣະເຢຊູຄຣິດຫລາຍຂຶ້ນ ໃນແຕ່ລະວັນ. ຂ້າພະເຈົ້າຮັກທ່ານ. ຂໍໃຫ້ພຣະເຈົ້າຈົ່ງສະຖິດຢູ່ກັບທ່ານຈົນກວ່າພວກເຮົາຈະພົບກັນອີກ, ຂ້າພະເຈົ້າອະທິຖານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.