ຄຸນນະທຳແຫ່ງພຣະຄຳ

ໂດຍ ແອວເດີ ມາກ ດີ ເອດດີ

ແຫ່ງສາວົກເຈັດສິບ

ມີຄຸນນະທຳໃນຖ້ອຍຄຳຂອງສາດສະດາໃນສະໄໝບູຮານ ແລະ ໃນສະໄໝປະຈຸບັນ, ເນື່ອງຈາກວ່າຖ້ອຍຄຳຂອງພວກເພິ່ນ ແມ່ນພຣະຄຳຂອງພຣະຜູ້ເປັນເຈົ້າຢ່າງແນ່ແທ້.

ໃນພຣະຄຳພີມໍມອນ, ເຮົາອ່ານກ່ຽວກັບການຕັດສິນໃຈຄັ້ງສຳຄັນຂອງສາດສະດາແອວມາ ໃນຂໍ້ພຣະຄຳພີໜຶ່ງອັນເປັນທີ່ຮັກ. ກ່ອນທີ່ຈະມາທົບທວນຖ້ອຍຄຳທີ່ຄຸ້ນເຄີຍເຫລົ່ານັ້ນ, ກະລຸນາພິຈາລະນານຳຂ້າພະເຈົ້າ ກ່ຽວກັບສະພາບການທີ່ຍາກລຳບາກ ພາຍໃຕ້ການຕັດສິນໃຈຄັ້ງນັ້ນ.

ຜູ້ຄົນກຸ່ມໜຶ່ງ, ທີ່ເອີ້ນຕົນເອງວ່າ ຊາວໂຊຣຳ, ໄດ້ແຍກໂຕອອກຈາກຊາວນີໄຟ¹ ແລະ ໄດ້ເຕົ້າໂຮມກັນຢູ່ຊາຍແດນຂອງແຜ່ນດິນໃກ້ກັບຊາວເລມັນ.² ຊາວນີໄຟຫາກໍໄດ້ເອົາຊະນະຊາວເລມັນໃນການຕໍ່ສູ້ທີ່ບໍ່ເຄີຍມີມາກ່ອນ ຊຶ່ງຄົນຫລາຍສິບພັນຄົນໄດ້ຖືກຂ້າຕາຍ,³ ແລະ ມັນເປັນຕາ “ຢ້ານທີ່ສຸດວ່າ ຊາວໂຊຣຳຈະເຂົ້າໄປຕິດຕໍ່ກັບຊາວເລມັນ, ແລະ ວ່າມັນອາດຈະເປັນທາງແຫ່ງການສູນເສຍອັນໃຫຍ່ຫລວງແກ່ຊາວນີໄຟ.”⁴ ນອກເໜືອຈາກຄວາມກັງວົນເລື່ອງສົງຄາມແລ້ວ, ແອວມາໄດ້ຮູ້ວ່າ ຊາວໂຊຣຳ, ຜູ້ທີ່ “ເຄີຍໄດ້ຮັບການສັ່ງສອນເຖິງພຣະຄຳຂອງພຣະເຈົ້າມາກ່ອນແລ້ວ,”⁵ ໄດ້ຫັນໄປຂາບໄຫວ້ຮູບບູຊາ ແລະ “ບິດເບືອນທາງຂອງພຣະຜູ້ເປັນເຈົ້າ.”⁶ ສິ່ງທັງໝົດນີ້ໄດ້ເຮັດໃຫ້ແອວມາໜັກໃຈຫລາຍ ແລະ ໄດ້ “ເປັນສາເຫດຂອງຄວາມເສົ້າສະຫລົດໃຈຫລາຍທີ່ສຸດ.”⁷

ເມື່ອພົບຕົນເອງຢູ່ໃນສະພາບການທີ່ຊັບຊ້ອນ ແລະ ທ້າທາຍເຫລົ່ານີ້, ແອວມາໄດ້ໄຕ່ຕອງກ່ຽວກັບສິ່ງທີ່ເພິ່ນຄວນເຮັດ. ໃນການຕັດສິນໃຈຂອງເພິ່ນ ເຮົາໄດ້ອ່ານຖ້ອຍຄຳທີ່ໄດ້ຖືກເກັບຮັກສາໄວ້ ເພື່ອດົນໃຈ ແລະ ຊີ້ນຳເຮົາ ໃນຂະນະທີ່ເຮົາເດີນທາງໄປຕາມສະພາບການທີ່ຊັບຊ້ອນ ແລະ ທ້າທາຍໃນວັນເວລາຂອງເຮົາ.⁸

“ແລະ ບັດນີ້, ເມື່ອການສັ່ງສອນພຣະຄຳອັນຍິ່ງໃຫຍ່ນີ້ໄດ້ນຳພາຜູ້ຄົນມາເຮັດໃນສິ່ງທີ່ຖືກຕ້ອງແລ້ວ—ແທ້ຈິງແລ້ວ, ມັນໄດ້ໃຫ້ຜົນທີ່ມີອຳນາດແກ່ຈິດໃຈຂອງຜູ້ຄົນຍິ່ງກວ່າດາບ, ຫລື ເໜືອກວ່າສິ່ງໃດໆທີ່ໄດ້ເກີດຂຶ້ນກັບພວກເຂົາ—ສະນັ້ນ ແອວມາຈຶ່ງຄິດວ່າ ມັນສົມຄວນແລ້ວທີ່ພວກເພິ່ນຈະ ທົດລອງຄຸນນະທຳແຫ່ງພຣະຄຳຂອງພຣະເຈົ້າ.”⁹

ໃນທ່າມກາງຫລາຍໆວິທີແກ້ໄຂບັນຫາທີ່ເປັນໄປໄດ້, ສັດທາຂອງແອວມາໄດ້ນຳພາພວກເຂົາໃຫ້ອາໄສອຳນາດຂອງພຣະຄຳ. ນີ້ບໍ່ແມ່ນເລື່ອງບັງເອີນ ທີ່ຄຳເທດສະໜາທີ່ມີພະລັງທີ່ສຸດບາງອັນທີ່ພົບເຫັນໄດ້ທຸກບ່ອນໃນພຣະຄຳພີ ໄດ້ຖືກສັ່ງສອນທັນທີຫລັງຈາກການຕັດສິນໃຈນັ້ນ. ໃນແອວມາ ບົດທີ 32 ແລະ 33 ເຮົາໄດ້ອ່ານສຸນທອນພົດທີ່ຊ່ຽວຊານ ເລື່ອງສັດທາໃນອົງພຣະເຢຊູຄຣິດເຈົ້າ, ແລະ ໃນບົດທີ 34 ເຮົາພົບຄຳສອນທີ່ມີອິດທິພົນຂອງແອມມິວເລັກກ່ຽວກັບການຊົດໃຊ້ຂອງພຣະເຢຊູຄຣິດ.

ພາບປະກອບຂອງຄຸນນະທຳແຫ່ງພຣະຄຳ

ແນ່ນອນ, ຕະຫລອດທົ່ວພຣະຄຳພີ ເຮົາໄດ້ອ່ານເຖິງພອນອັນອັດສະຈັນທີ່ໄດ້ຫລັ່ງໄຫລມາສູ່ຜູ້ທີ່ເລືອກທີ່ຈະທົດລອງຄຸນນະທຳແຫ່ງພຣະຄຳຂອງພຣະເຈົ້າ ໃນຊີວິດຂອງເຂົາເຈົ້າ.¹⁰ ຂ້າພະເຈົ້າຂໍເຊື້ອເຊີນໃຫ້ພວກທ່ານໄຕ່ຕອງກ່ຽວກັບຕົວຢ່າງສາມອັນກັບຂ້າພະເຈົ້າ ໃນຂະນະທີ່ເຮົາສຸມໃຈໃສ່ທີ່ພຣະຄຳພີມໍມອນ—ປຶ້ມທີ່ປະທານຣະໂຊ ເອັມ ແນວສັນ ໄດ້ບັນຍາຍວ່າເປັນ “ປຶ້ມຄູ່ມືຊ່ວຍໃຫ້ລອດໃນ ຍຸກສຸດທ້າຍ ຂອງເຮົາ.”¹¹

ທຳອິດ, ໂດຍທີ່ກຳລັງເຕືອນຜູ້ຄົນຂອງເພິ່ນວ່າ ພຣະຜູ້ເປັນເຈົ້າໄດ້ປົດປ່ອຍບັນພະບຸລຸດຂອງພວກເຂົາແນວໃດ, ແອວມາໄດ້ສິດສອນວ່າ: “ຈົ່ງເບິ່ງ, ພຣະອົງໄດ້ປ່ຽນໃຈຂອງເຂົາເຈົ້າ; ແທ້ຈິງແລ້ວ, ພຣະອົງໄດ້ປຸກໃຫ້ເຂົາເຈົ້າຕື່ນຈາກການນອນຫລັບສະໜິດ, ແລະ ເຂົາເຈົ້າໄດ້ຕື່ນຂຶ້ນມາຫາພຣະເຈົ້າ. ຈົ່ງເບິ່ງ, ເຂົາເຈົ້າຢູ່ໃນທ່າມກາງຄວາມມືດ; ເຖິງຢ່າງໃດກໍຕາມ, ຈິດວິນຍານຂອງເຂົາເຈົ້າຍັງສະຫວ່າງສະໄຫວດ້ວຍຄວາມສະຫວ່າງຂອງພຣະຄຳອັນເປັນນິດ.”¹² ບາງເທື່ອທ່ານອາດຮູ້ສຶກຄືກັບວ່າ ທ່ານຢູ່ໃນທ່າມກາງຄວາມມືດ. ຈິດວິນຍານຂອງທ່ານມີຄວາມປາດຖະໜາຢ່າງແຮງກ້າເຖິງແສງສະຫວ່າງບໍ່? ຖ້າເປັນເຊັ່ນນັ້ນ, ກະລຸນາທົດລອງຄຸນນະທຳແຫ່ງພຣະຄຳຂອງພຣະເຈົ້າ.

ສອງ, ໂດຍທີ່ກຳລັງສະທ້ອນຄິດເຖິງການປ່ຽນໃຈເຫລື້ອມໃສຂອງຊາວເລມັນຕໍ່ພຣະຜູ້ເປັນເຈົ້າ, ຊຶ່ງເພິ່ນໄດ້ເປັນພະຍານໃນຖານະຜູ້ສອນສາດສະໜາ, ອຳໂມນໄດ້ກ່າວວ່າ, “ຈົ່ງເບິ່ງ, ພີ່ນ້ອງຂອງເຮົາມີຈັກພັນຄົນແລ້ວທີ່ພຣະອົງໄດ້ປົດປ່ອຍອອກຈາກຄວາມເຈັບປວດແຫ່ງນະລົກ ແລະ ນຳມາຮ້ອງສັນລະເສີນຕໍ່ຄວາມຮັກທີ່ໄຖ່, ແລະ ນີ້ເປັນເພາະອຳນາດຂອງພຣະຄຳຂອງພຣະອົງ ຊຶ່ງຢູ່ກັບເຮົາ.”¹³ ອ້າຍເອື້ອຍນ້ອງທັງຫລາຍ, ມີຫລາຍຄົນທ່າມກາງພວກເຮົາທີ່ກຳລັງໂຫຍຫາຄົນທີ່ເຮົາຮັກ ໃຫ້ມາຮ້ອງສັນລະເສີນຕໍ່ຄວາມຮັກທີ່ໄຖ່. ໃນຄວາມພະຍາຍາມທັງໝົດຂອງເຮົາ, ຂໍໃຫ້ເຮົາຈື່ຈຳທີ່ຈະທົດລອງຄຸນນະທຳແຫ່ງພຣະຄຳຂອງພຣະເຈົ້າ.

ສາມ, ໃນໜັງສືຮີລາມັນ ເຮົາອ່ານວ່າ, “ແທ້ຈິງແລ້ວ, ເຮົາຈຶ່ງເຫັນໄດ້ວ່າ ຜູ້ໃດກໍຕາມທີ່ ຕັ້ງໃຈ ຍຶດຖື ພຣະຄຳຂອງພຣະເຈົ້າ, ຊຶ່ງມີຊີວິດ ແລະ ມີພະລັງ, ຊຶ່ງຈະແຍກເລ່ຫລ່ຽມ ແລະ ບ້ວງ ແລະ ກົນອຸບາຍຂອງມານອອກໄປ, ແລະ ນຳເອົາຄົນຂອງພຣະຄຣິດໄປໃນທາງຄັບ ແລະ ແຄບ ຂ້າມເຫວເລິກແຫ່ງຄວາມທຸກທໍລະມານອັນເປັນນິດ … ແລະ ຈະນຳເອົາຈິດວິນຍານຂອງພວກເຂົາມາວາງໄວ້ … ທາງເບື້ອງຂວາພຣະຫັດຂອງພຣະເຈົ້າໃນອານາຈັກສະຫວັນ.”¹⁴ ທ່ານກຳລັງສະແຫວງຫາທີ່ຈະຕັດຜ່ານເລ່ຫລ່ຽມ ແລະ ບ້ວງ ແລະ ກົນອຸບາຍຂອງມານ ທີ່ແຜ່ຫລາຍໃນປັດຊະຍາຂອງວັນເວລາຂອງເຮົາຢູ່ຫລືບໍ່? ທ່ານປາດຖະໜາທີ່ຈະຝ່າຟັນຜ່ານເມກໝອກແຫ່ງຄວາມສັບສົນ ອັນເປັນເຫດຈາກຂໍ້ມູນທີ່ຫລາຍເກີນໄປ ເພື່ອຈະໄດ້ສຸມໃຈໃສ່ຕໍ່ເສັ້ນທາງແຫ່ງພັນທະສັນຍາຫລາຍຂຶ້ນຫລືບໍ່? ກະລຸນາທົດລອງຄຸນນະທຳແຫ່ງພຣະຄຳຂອງພຣະເຈົ້າ.

ໃນຖານະຄົນໜຶ່ງທີ່ໄດ້ຮັບການປ່ຽນແປງໂດຍອຳນາດຂອງພຣະຄຳ, ຂ້າພະເຈົ້າຂໍເປັນພະຍານດ້ວຍຕົວເອງເຖິງຄວາມຈິງນີ້ ທີ່ໄດ້ຖືກສິດສອນຢ່າງງົດງາມ ໂດຍສາດສະດາທີ່ຮັກແພງຂອງພວກເຮົາ, ປະທານຣະໂຊ ເອັມ ແນວສັນ: “ສຳລັບຂ້າພະເຈົ້າແລ້ວ, ພະລັງຂອງພຣະຄຳພີມໍມອນແມ່ນຊັດເຈນທີ່ສຸດໃນການປ່ຽນແປງອັນຍິ່ງໃຫຍ່ທີ່ມາສູ່ຊີວິດຂອງຜູ້ທີ່ອ່ານມັນ ‘ດ້ວຍໃຈຈິງ, ດ້ວຍເຈດຕະນາອັນແທ້ຈິງ, ໂດຍມີສັດທາໃນພຣະຄຣິດ.’ ຜູ້ປ່ຽນໃຈເຫລື້ອມໃສຫລາຍຄົນໄດ້ປະຖິ້ມສິ່ງທີ່ເຂົາເຄີຍຮັກຫລາຍ ເພື່ອຈະໄດ້ປະຕິບັດຕາມກົດເກນຂອງປຶ້ມນັ້ນ. … ມັນຈະເປັນເຄື່ອງມືທີ່ມີປະສິດທິພາບທີ່ສຸດໃນການນຳຈິດວິນຍານທັງຫລາຍມາຫາພຣະເຢຊູຄຣິດ.”¹⁵

ແຫລ່ງຂອງຄຸນນະທຳ

ໃນຕົວຢ່າງເຫລົ່ານີ້ ແລະ ຕົວຢ່າງອື່ນໆ, ເຮົາໄດ້ເປັນພະຍານເຖິງຄຸນນະທຳແຫ່ງພຣະຄຳຂອງພຣະເຈົ້າ ໃນຊີວິດຂອງລູກໆຂອງພຣະອົງ. ທ່ານອາດຖາມວ່າ, ແມ່ນຫຍັງຄືແຫລ່ງຂອງຄຸນນະທຳ ຫລື ອຳນາດນັ້ນ?

ໃນຂະນະທີ່ເຮົາພິຈາລະນາຄຳຖາມນີ້, ເຮົາຈຳເປັນຕ້ອງຈື່ຈຳໄວ້ວ່າ ວະລີທີ່ວ່າ “ພຣະຄຳ,” ຕາມທີ່ໃຊ້ໃນພຣະຄຳພີ, ມີຄວາມໝາຍຢ່າງຕໍ່າສອງຄວາມໝາຍ. ແອວເດີ ເດວິດ ເອ ແບ໊ດນາ ໄດ້ສິດສອນເມື່ອບໍ່ດົນມານີ້ວ່າ “ໜຶ່ງໃນພຣະນາມຂອງພຣະເຢຊູຄຣິດແມ່ນ ‘ພຣະທຳ’” ແລະ ວ່າ “ຄຳສອນຂອງພຣະຜູ້ຊ່ວຍໃຫ້ລອດ, ດັ່ງທີ່ມີບັນທຶກຢູ່ໃນພຣະຄຳພີສັກສິດ, ແມ່ນ ‘ພຣະທຳ.’”¹⁶

ສາດສະດານີໄຟ ໄດ້ສະແດງໃຫ້ເຫັນເຖິງຄວາມສຳພັນລະຫວ່າງສອງຄວາມໝາຍນີ້ ເມື່ອເພິ່ນຂຽນວ່າ: “ຈົ່ງເຊື່ອຟັງຂໍ້ຄວາມເຫລົ່ານີ້ ແລະ ເຊື່ອໃນພຣະຄຣິດ; ແລະ ຖ້າຫາກພວກທ່ານບໍ່ເຊື່ອໃນຂໍ້ຄວາມເຫລົ່ານີ້ກໍຈົ່ງໃຫ້ເຊື່ອໃນພຣະຄຣິດ. ແລະ ຖ້າຫາກພວກທ່ານ ຈະ ເຊື່ອໃນພຣະຄຣິດ ພວກທ່ານຈະເຊື່ອໃນຂໍ້ຄວາມເຫລົ່ານີ້, ເພາະມັນເປັນພຣະຄຳຂອງພຣະຄຣິດ, ແລະ ພຣະອົງໄດ້ປະທານໃຫ້ຂ້າພະເຈົ້າ.”¹⁷ ດ້ວຍເຫດນີ້, ເຮົາຈຶ່ງຮຽນຮູ້ວ່າ ມີຄຸນນະທຳໃນຖ້ອຍຄຳຂອງສາດສະດາໃນສະໄໝບູຮານ ແລະ ໃນສະໄໝປະຈຸບັນ, ເນື່ອງຈາກວ່າຖ້ອຍຄຳຂອງພວກເພິ່ນ ແມ່ນພຣະຄຳຂອງພຣະຜູ້ເປັນເຈົ້າ ຢ່າງແນ່ແທ້.¹⁸ ໝູ່ເພື່ອນທີ່ຮັກແພງຂອງຂ້າພະເຈົ້າ, ການຍອມຮັບຄວາມຈິງທີ່ເປັນນິລັນດອນນີ້ ເປັນສິ່ງສຳຄັນຫລາຍຕໍ່ຄວາມຢູ່ລອດຂອງຈິດວິນຍານຂອງເຮົາໃນຍຸກສຸດທ້າຍນີ້¹⁹ ດັ່ງທີ່ໄດ້ມີທຳນາຍໄວ້, ເມື່ອມີ “ການອຶດຢາກເກີດຂຶ້ນໃນແຜ່ນດິນ, ປະຊາຊົນຈະຫິວເຂົ້າ ແຕ່ບໍ່ແມ່ນຫິວເຂົ້າຈີ່; ພວກເຂົາຈະຄໍແຫ້ງ ແຕ່ບໍ່ແມ່ນກະຫາຍນໍ້າ; ພວກເຂົາຈະຫິວກະຫາຍຖ້ອຍຄຳທັງຫລາຍຂອງ [ພຣະຜູ້ເປັນເຈົ້າ].”²⁰

ທ້າຍທີ່ສຸດ, ຄຸນນະທຳແຫ່ງພຣະຄຳຂອງພຣະເຈົ້າ ແມ່ນ ອົງພຣະເຢຊູຄຣິດເຈົ້າ.²¹ ເມື່ອເຮົາເຂົ້າໃຈສິ່ງນີ້ຢ່າງເຕັມທີ່ຫລາຍຂຶ້ນ, ເຮົາຈະສາມາດສ້າງຄວາມເຊື່ອມໂຍງທີ່ສຳຄັນຢ່າງຊົ່ວນິລັນດອນ ລະຫວ່າງບົດບາດຂອງສາດສະດາຂອງພຣະອົງ ແລະ ພຣະຜູ້ໄຖ່ພຣະອົງເອງ. ຄວາມຮັກຂອງເຮົາທີ່ມີຕໍ່ພຣະອົງ, ຄວາມປາດຖະໜາຂອງເຮົາໃນການຫຍັບເຂົ້າໃກ້ພຣະອົງຫລາຍຂຶ້ນ ແລະ ໃນການຕັ້ງຢູ່ໃນຄວາມຮັກຂອງພຣະອົງ,²² ຈະຈູງໃຈໃຫ້ເຮົາທົດລອງຄຸນນະທຳແຫ່ງພຣະຄຳໃນຊີວິດຂອງເຮົາ—ທັງຄຸນນະທຳທີ່ຫລັ່ງໄຫລມາຈາກພຣະອົງ ໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ສ່ວນຕົວຂອງເຮົາ²³ ແລະ ຄຸນນະທຳທີ່ຫລັ່ງໄຫລມາຈາກພຣະອົງຜ່ານຄຳຂອງ “ພາຊະນະທີ່ພຣະຜູ້ເປັນເຈົ້າເລືອກໄວ້.”²⁴ ແລ້ວເຮົາຈະແຍກແຍະໄດ້ວ່າ, ເຖິງແມ່ນວ່າແຫລ່ງຂໍ້ມູນອື່ນໆອາດເປັນປະໂຫຍດຕໍ່ການສຶກສາຂອງເຮົາກ່ຽວກັບພຣະຜູ້ຊ່ວຍໃຫ້ລອດ ແລະ ຖ້ອຍຄຳຂອງສາດສະດາຂອງພຣະອົງກໍຕາມ, ແຕ່ມັນຈະຕ້ອງບໍ່ມີວັນມາແທນທີ່ການສຶກສາຂອງເຮົາ ແລະ ຖ້ອຍຄຳຂອງພວກເພິ່ນ. ເຮົາຕ້ອງດື່ມດໍ່າຢ່າງເລິກເຊິ່ງ ແລະ ເລື້ອຍໆ²⁵ ໂດຍກົງຈາກແຫລ່ງ.²⁶

ຂ້າພະເຈົ້າຂໍສະແດງຄວາມຮັກຕໍ່ທ່ານແຕ່ລະຄົນ, ອ້າຍເອື້ອຍນ້ອງທັງຫລາຍຂອງຂ້າພະເຈົ້າ. ໃນຄວາມຮັກນັ້ນ, ຂ້າພະເຈົ້າຂໍວິງວອນໃຫ້ທ່ານປະສົບກັບຄຸນນະທຳແຫ່ງພຣະຄຳຂອງພຣະເຈົ້າ, ໂດຍສະເພາະຢ່າງຍິ່ງ ຜ່ານທາງພຣະຄຳພີມໍມອນ, ທຸກໆມື້ໃນຊີວິດຂອງທ່ານ. ເມື່ອທ່ານເຮັດເຊັ່ນນັ້ນ, ທ່ານຈະປະສົບກັບຄຳສັນຍານີ້ຂອງສາດສະດາຈາກປະທານຣະໂຊ ເອັມ ແນວສັນ ທີ່ວ່າ: “ເມື່ອທ່ານສຶກສາພຣະຄຳພີມໍມອນດ້ວຍການອະທິຖານ ທຸກວັນ, ທ່ານຈະສາມາດຕັດສິນໃຈໄດ້ດີກວ່າເກົ່າ—ໃນທຸກວັນ. ຂ້າພະເຈົ້າສັນຍາວ່າ ເມື່ອທ່ານໄຕ່ຕອງສິ່ງທີ່ທ່ານສຶກສາ, ປະຕູສະຫວັນຈະເປີດອອກ, ແລະ ທ່ານຈະໄດ້ຮັບຄຳຕອບໃຫ້ແກ່ຄຳຖາມຂອງທ່ານ ແລະ ໄດ້ຮັບການຊີ້ນຳສຳລັບຊີວິດຂອງທ່ານເອງ. ຂ້າພະເຈົ້າສັນຍາວ່າ ເມື່ອທ່ານສຶກສາພຣະຄຳພີມໍມອນທຸກວັນ, ທ່ານຈະມີພູມຕ້ານທານສິ່ງຊົ່ວຮ້າຍທຸກວັນ.”²⁷

ຂ້າພະເຈົ້າເປັນພະຍານວ່າ ພຣະບິດາເທິງສະຫວັນໄດ້ປະທານພຣະຄຳໃຫ້ແກ່ເຮົາ ເພາະພຣະອົງຮັກເຮົາຢ່າງສົມບູນແບບ ແລະ ຢາກໃຫ້ເຮົາແຕ່ລະຄົນກັບຄືນບ້ານ ເພື່ອໄປຢູ່ກັບພຣະອົງຕະຫລອດໄປ. ຂ້າພະເຈົ້າເປັນພະຍານເຖິງ “ພຣະທຳ … [ທີ່] ເກີດເປັນມະນຸດ,”²⁸ ຄືພຣະເຢຊູຄຣິດ, ແລະ ອຳນາດຂອງພຣະອົງໃນການຊ່ວຍກູ້ ແລະ ໄຖ່ເຮົາ. ຂ້າພະເຈົ້າຮູ້ວ່າ ຄຸນນະທຳຂອງພຣະອົງຫລັ່ງໄຫລຜ່ານຖ້ອຍຄຳຂອງສາດສະດາຂອງພຣະອົງ, ທັງໃນອະດີດ ແລະ ປະຈຸບັນ.

ນີ້ແມ່ນຄຳອະທິຖານຈາກໃຈຂອງຂ້າພະເຈົ້າ ເພື່ອວ່າເຮົາຈະສາມາດມີສະຕິປັນຍາ ແລະ ຄວາມອ່ອນໂຍນໃນການຍຶດໝັ້ນ²⁹ ໃນພຣະຄຳຂອງພຣະເຈົ້າ ແລະ ຢູ່ໃນເສັ້ນທາງແຫ່ງພັນທະສັນຍາ ທີ່ນຳພາໄປສູ່ຄວາມສູງສົ່ງ ແລະ ຊີວິດນິລັນດອນ.³⁰ ຂໍໃຫ້ເຮົາສືບຕໍ່ປະສົບກັບການປ່ຽນແປງອັນຍິ່ງໃຫຍ່ ທີ່ມີໃຫ້ແກ່ເຮົາແຕ່ລະຄົນ ຜ່ານທາງຄຸນນະທຳແຫ່ງພຣະຄຳ.³¹ ໃນພຣະນາມຂອງພຣະເຢຊູຄຣິດ, ອາແມນ.