ການຊ່ວຍຄົນຍາກຈົນ ແລະ ຜູ້ເດືອດຮ້ອນ

ໂດຍ ປະທານດາລິນ ເອັຈ ໂອກສ໌

ທີ່ປຶກສາທີໜຶ່ງໃນຝ່າຍປະທານສູງສຸດ

ສາດສະໜາຈັກຂອງພຣະເຢຊູຄຣິດມຸ່ງໝັ້ນທີ່ຈະຮັບໃຊ້ຄົນຂັດສົນ, ແລະ ມຸ່ງໝັ້ນທີ່ຈະຮ່ວມມືກັບຄົນອື່ນໃນຄວາມພະຍາຍາມນັ້ນ.

ອ້າຍເອື້ອຍນ້ອງທັງຫລາຍ, ປະທານຣະໂຊ ເອັມ ແນວສັນ ທີ່ຮັກແພງຂອງພວກເຮົາ ຈະກ່າວກັບພວກເຮົາທີຫລັງໃນພາກນີ້. ເພິ່ນໄດ້ຂໍໃຫ້ຂ້າພະເຈົ້າເປັນຜູ້ກ່າວປາໄສຄົນທຳອິດ.

ຫົວຂໍ້ຂອງຂ້າພະເຈົ້າໃນມື້ນີ້ແມ່ນກ່ຽວກັບວ່າສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແລະ ສະມາຊິກຂອງສາດສະໜາຈັກໄດ້ມອບ ແລະ ເຮັດເພື່ອຄົນຍາກຈົນ ແລະ ຜູ້ເດືອດຮ້ອນແນວໃດ. ຂ້າພະເຈົ້າຈະກ່າວເຖິງການໃຫ້ ທີ່ຄ້າຍຄືກັນນີ້ໂດຍຄົນດີອື່ນໆນຳອີກ. ການໃຫ້ແກ່ຄົນຂັດສົນເປັນຫລັກທຳໃນສາດສະໜາອັບຣາຮາມ ແລະ ໃນສາດສະໜາອື່ນໆເຊັ່ນກັນ.

ສອງສາມເດືອນຜ່ານມານີ້, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໄດ້ລາຍງານເປັນຄັ້ງທຳອິດເຖິງຂອບເຂດວຽກງານຊ່ວຍເຫລືອມະນຸດສະທຳທົ່ວໂລກ.¹ ຄ່າໃຊ້ຈ່າຍຂອງພວກເຮົາໃນປີ 2021 ສຳລັບຄົນຂັດສົນໃນ 188 ປະເທດທົ່ວໂລກ ລວມຈຳນວນເງິນ $906 ລ້ານໂດລາ—ເກືອບເຖິງ ໜຶ່ງພັນລ້ານໂດລາ. ນອກຈາກນີ້, ສະມາຊິກຂອງພວກເຮົາໄດ້ອາສາສະໝັກຫລາຍກວ່າ 6 ລ້ານຊົ່ວໂມງ ໃນວຽກງານອຸດົມການດຽວກັນນັ້ນ.

ແນ່ນອນ, ຕົວເລກເຫລົ່ານີ້ເປັນການລາຍງານທີ່ບໍ່ສົມບູນ ກ່ຽວກັບການໃຫ້ ແລະ ການຊ່ວຍເຫລືອຂອງພວກເຮົາ. ມັນບໍ່ໄດ້ລວມທັງການຮັບໃຊ້ສ່ວນຕົວຂອງສະມາຊິກເປັນສ່ວນບຸກຄົນ ໃນຂະນະທີ່ປະຕິບັດສາດສະໜາກິດຕໍ່ກັນແລະກັນ ໃນຕຳແໜ່ງການເອີ້ນ ແລະ ການອາສາສະໝັກຂອງສະມາຊິກຕໍ່ສະມາຊິກດ້ວຍກັນ. ແລະ ການລາຍງານຂອງພວກເຮົາໃນປີ 2021 ກໍບໍ່ໄດ້ກ່າວເຖິງສິ່ງທີ່ສະມາຊິກແຕ່ລະຄົນເຮັດຜ່ານທາງອົງການກຸສົນ ທີ່ນັບບໍ່ຖ້ວນ ຊຶ່ງບໍ່ໄດ້ເຊື່ອມໂຍງກັບສາດສະໜາຈັກຂອງພວກເຮົາຢ່າງເປັນທາງການ. ຂ້າພະເຈົ້າຈະເລີ່ມຕົ້ນກັບສິ່ງເຫລົ່ານີ້.

ໃນປີ 1831, ໜ້ອຍກວ່າສອງປີຫລັງຈາກສາດສະໜາຈັກທີ່ຖືກຟື້ນຟູໄດ້ຖືກຈັດຕັ້ງຂຶ້ນ, ພຣະຜູ້ເປັນເຈົ້າໄດ້ມອບການເປີດເຜີຍໃຫ້ເພື່ອນຳພາສະມາຊິກ ແລະ, ຂ້າພະເຈົ້າເຊື່ອ, ວ່າແມ່ນກ່ຽວກັບລູກໆທຸກຄົນຂອງພຣະອົງທົ່ວໂລກ ດັ່ງນີ້:

“ຈົ່ງເບິ່ງ, ມັນບໍ່ສົມຄວນທີ່ເຮົາຈະບັນຊາໃນທຸກສິ່ງ; ເພາະຄົນໃດທີ່ຖືກບັງຄັບໃນທຸກສິ່ງ, ຄົນໆນັ້ນເປັນຜູ້ຮັບໃຊ້ທີ່ກຽດຄ້ານ ແລະ ບໍ່ສະຫລາດ; ດັ່ງນັ້ນ ເຂົາຈຶ່ງບໍ່ໄດ້ຮັບລາງວັນເລີຍ. …

“ຕາມຈິງແລ້ວ ເຮົາກ່າວວ່າ ມະນຸດຄວນທຸ້ມເທຢ່າງກະຕືລືລົ້ນໃນອຸດົມການດີ, ແລະ ເຮັດຫລາຍສິ່ງຫລາຍຢ່າງດ້ວຍຄວາມສະໝັກໃຈຂອງຕົນເອງ, ແລະ ເຮັດໃຫ້ເກີດຄວາມຊອບທຳຢ່າງຫລວງຫລາຍ;

“ເພາະ ພະລັງຢູ່ໃນຕົວເຂົາ, ຊຶ່ງໃນການນີ້ເຂົາເປັນຕົວແທນອິດສະລະພາບຂອງຕົນເອງ. ແລະ ຕາບໃດທີ່ມະນຸດເຮັດຄວາມດີ ເຂົາຈະບໍ່ມີທາງສູນເສຍລາງວັນຂອງຕົນໄປຈັກເທື່ອ.”²

ຫລາຍກວ່າ 38 ປີ ໃນຖານະອັກຄະສາວົກ ແລະ ຫລາຍກວ່າ 30 ປີ ໃນອາຊີບການງານ, ຂ້າພະເຈົ້າໄດ້ເຫັນຄວາມພະຍາຍາມຢ່າງຫລວງຫລາຍຂອງອົງການ ແລະ ບຸກຄົນໃນລັກສະນະທີ່ການເປີດເຜີຍບັນຍາຍວ່າເປັນ “ອຸດົມການດີ” ແລະ “[ກຳລັງ] ເຮັດໃຫ້ເກີດຄວາມຊອບທຳຢ່າງຫລວງຫລາຍ.” ມີຕົວຢ່າງຈົນນັບບໍ່ຖ້ວນຂອງການຮັບໃຊ້ມະນຸດສະທຳຕະຫລອດທົ່ວໂລກ, ເກີນຂອບເຂດຂອງເຮົາເອງ ແລະ ເໜືອຄວາມຮູ້ທົ່ວໄປຂອງເຮົາ. ເມື່ອພິຈາລະນາເຖິງເລື່ອງນີ້, ຂ້າພະເຈົ້າຄິດເຖິງສາດສະດາ/ກະສັດ ເບັນຢາມິນໃນພຣະຄຳພີມໍມອນ, ຜູ້ຊຶ່ງຄຳເທດສະໜາຂອງເພິ່ນລວມຄວາມຈິງນິລັນດອນທີ່ວ່າ: “ເມື່ອພວກທ່ານຮັບໃຊ້ເພື່ອນມະນຸດດ້ວຍກັນ ພວກທ່ານກໍຮັບໃຊ້ພຣະເຈົ້າຂອງພວກທ່ານນັ້ນເອງ.”³

ການຮັບໃຊ້ດ້ານສະຫວັດດີການ ແລະ ການຮັບໃຊ້ມະນຸດສະທຳຢ່າງຫລວງຫລາຍຕໍ່ເພື່ອນມະນຸດດ້ວຍກັນຂອງເຮົາ ໄດ້ຖືກສິດສອນ ແລະ ປະຕິບັດໂດຍສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແລະ ໂດຍພວກເຮົາໃນຖານະສະມາຊິກຂອງສາດສະໜາຈັກ. ຍົກຕົວຢ່າງ, ພວກເຮົາຖືສິນອົດເຂົ້າທຸກຕົ້ນເດືອນ ແລະ ບໍລິຈາກຢ່າງໜ້ອຍເທົ່າກັບອາຫານທີ່ບໍ່ໄດ້ກິນ ເພື່ອຊ່ວຍເຫລືອຄົນຂັດສົນໃນໝູ່ສະມາຊິກຂອງເຮົາເອງ. ສາດສະໜາຈັກກໍຍັງບໍລິຈາກຢ່າງຫລວງຫລາຍສຳລັບການຮັບໃຊ້ມະນຸດສະທຳ ແລະ ການຮັບໃຊ້ອື່ນໆຕະຫລອດທົ່ວໂລກນຳອີກ.

ເຖິງແມ່ນສາດສະໜາຈັກຂອງພວກເຮົາເຮັດສິ່ງເຫລົ່ານັ້ນທັງໝົດໂດຍກົງ, ແຕ່ການຮັບໃຊ້ມະນຸດສະທຳສ່ວນຫລາຍຕໍ່ລູກໆຂອງພຣະເຈົ້າທົ່ວໂລກຖືກດຳເນີນການໂດຍບຸກຄົນ ແລະ ອົງການທີ່ບໍ່ມີສ່ວນກ່ຽວຂ້ອງຢ່າງເປັນທາງການກັບສາດສະໜາຈັກຂອງພວກເຮົາ. ດັ່ງທີ່ອັກຄະສາວົກທ່ານໜຶ່ງຂອງພວກເຮົາໄດ້ສັງເກດ: “ພຣະເຈົ້າກຳລັງໃຊ້ຜູ້ຄົນຢ່າງຫລວງຫລາຍເພື່ອບັນລຸວຽກງານອັນຍິ່ງໃຫຍ່ ແລະ ອັດສະຈັນຂອງພຣະອົງ. … ມັນກວ້າງໄກເກີນໄປ, ລຳບາກເກີນໄປ, ສຳລັບຄົນໃດຄົນໜຶ່ງ.”⁴ ໃນຖານະສະມາຊິກຂອງສາດສະໜາຈັກທີ່ຖືກຟື້ນຟູ, ເຮົາຕ້ອງຮູ້ຈັກ ແລະ ເຫັນຄຸນຄ່າຂອງການຮັບໃຊ້ຂອງຄົນອື່ນຫລາຍຂຶ້ນ.

ສາດສະໜາຈັກຂອງພຣະເຢຊູຄຣິດມຸ່ງໝັ້ນທີ່ຈະ ຮັບໃຊ້ ຄົນຂັດສົນ, ແລະ ມຸ່ງໝັ້ນທີ່ຈະ ຮ່ວມມື ກັບຄົນອື່ນໃນຄວາມພະຍາຍາມນັ້ນ. ເມື່ອບໍ່ດົນມານີ້ ພວກເຮົາໄດ້ມອບຂອງຂວັນຊິ້ນໃຫຍ່ໃຫ້ກັບໂຄງການອາຫານໂລກສະຫະປະຊາຊາດ. ເປັນເວລາຫລາຍທົດສະວັດຂອງວຽກງານຊ່ວຍເຫລືອມະນຸດສະທຳຂອງພວກເຮົາ, ມີສອງອົງການສຳຄັນທີ່ເປັນຜູ້ທຳງານຫລັກຂອງພວກເຮົາ: ໂຄງການຕ່າງໆຮ່ວມກັບສະພາກາແດງ ແລະ Red Crescent [ສະພາຈັນແດງ] ໃນຫລາຍສິບປະເທດ ໄດ້ໃຫ້ຄວາມຊ່ວຍເຫລືອລູກໆຂອງພຣະເຈົ້າ ໃນຊ່ວງທີ່ເກີດໄພທຳມະຊາດ ແລະ ການຂັດແຍ້ງ. ໃນທຳນອງດຽວກັນ, ພວກເຮົາມີປະຫວັດການຊ່ວຍເຫລືອບັນເທົາທຸກກັບໂບດກາໂຕລິກຢ່າງຍາວນານ. ອົງການເຫລົ່ານີ້ໄດ້ສິດສອນພວກເຮົາຢ່າງຫລວງຫລາຍກ່ຽວກັບການບັນເທົາທຸກລະດັບໂລກ.

ພວກເຮົາກໍຍັງໄດ້ຮັບຄວາມຮ່ວມມືກັບອົງການອື່ນໆ, ລວມທັງ Muslim Aid [ມຸດສະລິມຊ່ວຍອາສາ], ນ້ຳສຳລັບຜູ້ຄົນ, ແລະ IsraAID [ອິດສະຣາຊ່ວຍອາສາ], ເປັນຕົ້ນ. ເຖິງແມ່ນວ່າໂຄງການຊ່ວຍເຫລືອມະນຸດສະທຳມີຄວາມຊ່ຽວຊານສະເພາະດ້ານນີ້, ແຕ່ພວກເຮົາກໍມີເປົ້າໝາຍຮ່ວມກັນໃນການບັນເທົາທຸກໃນບັນດາລູກໆຂອງພຣະເຈົ້າ. ທັງໝົດນີ້ແມ່ນພາກສ່ວນໜຶ່ງໃນວຽກງານຂອງພຣະເຈົ້າສຳລັບລູກໆຂອງພຣະອົງ.

ການເປີດເຜີຍສະໄໝໃໝ່ສິດສອນວ່າ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ຄື “ຄວາມສະຫວ່າງທີ່ແທ້ຈິງ ທີ່ໃຫ້ຄວາມສະຫວ່າງແກ່ມະນຸດທຸກຄົນທີ່ມາສູ່ໂລກ.”⁵ ໂດຍການນີ້, ລູກໆທຸກຄົນຂອງພຣະເຈົ້າຈຶ່ງຖືກດົນໃຈໃຫ້ຮັບໃຊ້ພຣະອົງ ແລະ ກັນແລະກັນຢ່າງສຸດຄວາມຮູ້ ແລະ ຄວາມສາມາດຂອງພວກເຂົາ.

ພຣະຄຳພີມໍມອນສິດສອນວ່າ “ທຸກສິ່ງທຸກຢ່າງທີ່ເຊື້ອເຊີນ ແລະ ຊັກຈູງໃຫ້ເຮັດຄວາມດີ, ແລະ ໃຫ້ຮັກພຣະເຈົ້າ ແລະ ໃຫ້ຮັບໃຊ້ພຣະອົງ, ແມ່ນມາຈາກການດົນໃຈຈາກພຣະເຈົ້າ.”⁶

ຕື່ມດ້ວຍ:

“ເພາະຈົ່ງເບິ່ງ, ພຣະວິນຍານຂອງພຣະຄຣິດໄດ້ຖືກມອບໃຫ້ແກ່ມະນຸດທຸກຄົນ, ເພື່ອເຂົາຈະຮູ້ຈັກຄວາມດີຈາກຄວາມຊົ່ວ; ດັ່ງນັ້ນ, ຂ້າພະເຈົ້າຈຶ່ງຂໍສະແດງວິທີທີ່ຈະຕັດສິນໃຫ້ແກ່ທ່ານ ເພາະວ່າທຸກສິ່ງທຸກຢ່າງທີ່ເຊື້ອເຊີນໃຫ້ເຮັດຄວາມດີ, ແລະ ຊັກຊວນໃຫ້ເຊື່ອໃນພຣະຄຣິດ, ຖືກສົ່ງມາໂດຍອຳນາດ ແລະ ຂອງປະທານຂອງພຣະຄຣິດ. …

“ແລະ ບັດນີ້, ພີ່ນ້ອງຂອງຂ້າພະເຈົ້າ, … ທ່ານຮູ້ຈັກຄວາມສະຫວ່າງຊຶ່ງໂດຍຄວາມສະຫວ່າງນັ້ນ ທ່ານຈະຕັດສິນ ຊຶ່ງຄວາມສະຫວ່າງນັ້ນຄື ຄວາມສະຫວ່າງຂອງພຣະຄຣິດ, ຈົ່ງເບິ່ງວ່າທ່ານຈະບໍ່ຕັດສິນຜິດ.”⁷

ຕໍ່ໄປນີ້ແມ່ນບາງຕົວຢ່າງຂອງລູກໆຂອງພຣະເຈົ້າທີ່ຊ່ວຍເຫລືອລູກໆຄົນອື່ນໆຂອງພຣະເຈົ້າ ໃນຄວາມຕ້ອງການທີ່ຈຳເປັນດ້ານອາຫານ, ການດູແລທາງດ້ານການແພດ, ແລະ ການສິດສອນ:

ເມື່ອສິບປີກ່ອນ, ຄອບຄົວກັນຫາຣີ, ສາມີພັນລະຍາຊາວຊິກ ໃນສະຫະລັດອາຣັບເອມິເຣດ, ໄດ້ລິເລີ່ມຄວາມພະຍາຍາມທີ່ໜ້າປະທັບໃຈ ໃນການລ້ຽງອາຫານຜູ້ຫິວໂຫຍ. ຜ່ານທາງ Guru Nanak Darbar Sikh temple [ວັດກູຣູ ນານາກ ດາບາ ຊິກ], ປະຈຸບັນເຂົາເຈົ້າໄດ້ລ້ຽງອາຫານເຈ ຫລາຍກວ່າ 30,000 ຄາບເຂົ້າທຸກທ້າຍອາທິດ ສຳລັບທຸກຄົນທີ່ຜ່ານເຂົ້າມາໃນປະຕູຂອງເຂົາເຈົ້າ, ໂດຍບໍ່ຄຳນຶງເຖິງສາດສະໜາ ຫລື ເຊື້ອຊາດ. ດຣ. ກັນຫາຣີ ອະທິບາຍວ່າ, “ພວກເຮົາເຊື່ອວ່າທຸກຄົນເປັນໜຶ່ງດຽວກັນ, ພວກເຮົາເປັນລູກຂອງພຣະເຈົ້າອົງດຽວກັນ, ແລະ ພວກເຮົາຢູ່ທີ່ນີ້ເພື່ອຮັບໃຊ້ມະນຸດຊາດ.”⁸

ການໃຫ້ບໍລິການທາງການແພດ ແລະ ຝ່າຍແຂ້ວ ໃຫ້ກັບຄົນຂັດສົນ ກໍເປັນຕົວຢ່າງໜຶ່ງອີກ. ໃນເມືອງຊິຄາໂກ, ຂ້າພະເຈົ້າໄດ້ພົບກັບໝໍສຸກເສີນຊາວຊີເຣຍ-ອາເມຣິກັນ, ດຣ. ຊາເຮີ ຊາລູນ. ເພິ່ນເປັນຜູ້ໜຶ່ງໃນຜູ້ກໍ່ຕັ້ງ MedGlobal [ອົງການແພດທົ່ວໂລກ], ຊຶ່ງຈັດຜູ້ຊ່ຽວຊານດ້ານການແພດ ໃຫ້ອາສາສະໝັກເວລາ, ທັກສະ, ຄວາມຮູ້, ແລະ ການເປັນຜູ້ນຳ ເພື່ອຊ່ວຍຄົນອື່ນໃນຍາມວິກິດ, ດັ່ງເຊັ່ນໃນສົງຄາມຊີເຣຍ, ບ່ອນທີ່ ດຣ. ຊາລູນ ໄດ້ສ່ຽງຊີວິດຂອງເພິ່ນໃນການຮັກສາພະຍາບານແກ່ປະຊາຊົນ. ອົງການແພດທົ່ວໂລກ ແລະ ອົງການທີ່ຄ້າຍຄືກັນນີ້ (ລວມທັງຜູ້ຊ່ຽວຊານໄພ່ພົນຍຸກສຸດທ້າຍ) ສະແດງໃຫ້ເຫັນວ່າ ພຣະເຈົ້າກຳລັງສົ່ງມືອາຊີບແຫ່ງສັດທາ ໃຫ້ນຳການບັນເທົາທຸກໄປໃຫ້ຄົນຍາກຈົນທົ່ວໂລກ.⁹

ລູກໆຂອງພຣະເຈົ້າຢ່າງຫລວງຫລາຍທີ່ບໍ່ເຫັນແກ່ຕົວ ໄດ້ມີສ່ວນຮ່ວມໃນວຽກງານການສິດສອນ, ໃນທົ່ວໂລກເຊັ່ນກັນ. ຕົວຢ່າງໜຶ່ງທີ່ດີ, ທີ່ພວກເຮົາຮູ້ຈັກຜ່ານທາງໂຄງການຊ່ວຍເຫລືອມະນຸດສະທຳ, ແມ່ນກິດຈະກຳຂອງຊາຍຄົນໜຶ່ງຊື່ ເກບບຣຽວ, ຊຶ່ງເຄີຍເປັນຊາວອົບພະຍົບຈາກການຂັດແຍ້ງຕ່າງໆຫລາຍເທື່ອ. ເມື່ອບໍ່ດົນມານີ້ລາວໄດ້ສັງເກດເຫັນວ່າ ເດັກນ້ອຍຊາວອົບພະຍົບຫລາຍກວ່າຮ້ອຍພັນຄົນໃນອາຟຣິກາ ຕາເວັນອອກ ຕ້ອງການຄວາມຊ່ວຍເຫລືອ ເພື່ອຮັກສາຄວາມຫວັງ ແລະ ຈິດໃຈຂອງພວກເຂົາໃຫ້ເຂັ້ມແຂງ. ລາວໄດ້ຈັດລະບຽບນາຍຄູຄົນອື່ນໆໃນກຸ່ມຊາວອົບພະຍົບອອກເປັນສິ່ງທີ່ພວກເຂົາເອີ້ນວ່າ “ໂຮງຮຽນຕົ້ນໄມ້,” ບ່ອນທີ່ພວກເດັກນ້ອຍໄປເຕົ້າໂຮມເພື່ອຮ່ຳຮຽນຢູ່ກ້ອງຕົ້ນໄມ້. ລາວບໍ່ໄດ້ລໍຖ້າໃຫ້ຄົນອື່ນຈັດລະບຽບ ຫລື ຊີ້ນຳ ແຕ່ໄດ້ນຳພາໂຄງການດ້ວຍຕົວເອງ ທີ່ໃຫ້ໂອກາດການຮຽນຮູ້ແກ່ເດັກນັກຮຽນຊັ້ນປະຖົມຫລາຍພັນຄົນ ລະຫວ່າງຫລາຍປີທີ່ພັດຖິ່ນເຫລົ່ານັ້ນ.

ແນ່ນອນ, ສາມຕົວຢ່າງເຫລົ່ານີ້ບໍ່ໄດ້ໝາຍຄວາມວ່າ ທຸກສິ່ງທີ່ເວົ້າ ຫລື ກະທຳໂດຍອົງການ ຫລື ບຸກຄົນ ອ້າງວ່າດີ ຫລື ເປັນຂອງພຣະເຈົ້າ ແນວນັ້ນແທ້ໆ. ຕົວຢ່າງເຫລົ່ານີ້ສະແດງໃຫ້ເຫັນວ່າ ພຣະເຈົ້າດົນໃຈຫລາຍອົງການ ແລະ ຫລາຍຄົນໃຫ້ເຮັດຄວາມດີຫລາຍຂຶ້ນ. ມັນກໍຍັງສະແດງໃຫ້ເຫັນວ່າ ພວກເຮົາຫລາຍຄົນຄວນຮັບຮູ້ຄວາມດີທີ່ຄົນອື່ນເຮັດ ແລະ ສະໜັບສະໜູນ ເມື່ອເຮົາມີເວລາ ແລະ ມີວິທີທີ່ຈະເຮັດເຊັ່ນກັນ.

ຕໍ່ໄປນີ້ແມ່ນບາງຕົວຢ່າງຂອງການຮັບໃຊ້ທີ່ສາດສະໜາຈັກສະໜັບສະໜູນ ແລະ ສະມາຊິກຂອງພວກເຮົາ ແລະ ຜູ້ຄົນ ແລະ ອົງການທີ່ດີອື່ນໆກໍສະໜັບສະໜູນ ດ້ວຍການບໍລິຈາກເວລາ ແລະ ເງິນເປັນສ່ວນບຸກຄົນ:

ຂ້າພະເຈົ້າຈະເລີ່ມຕົ້ນດ້ວຍເສລີພາບທາງສາດສະໜາ. ໃນການສະໜັບສະໜູນເລື່ອງນີ້, ພວກເຮົາເຮັດໄປເພື່ອຜົນປະໂຫຍດຂອງພວກເຮົາເອງ, ແຕ່ກໍເພື່ອຜົນປະໂຫຍດຂອງສາດສະໜາອື່ນນຳອີກ. ດັ່ງທີ່ປະທານຄົນທຳອິດ, ໂຈເຊັບ ສະມິດ, ໄດ້ສິດສອນວ່າ, “ພວກເຮົາເຊື່ອຖືສິດທິແຫ່ງການນະມັດສະການພຣະເຈົ້າ ຜູ້ມີລິດທານຸພາບຕາມການບອກຂອງຄວາມຮູ້ສຶກຜິດ ຫລື ຖືກຂອງເຮົາເອງ ແລະ ຍອມໃຫ້ຄົນທັງປວງມີສິດທິເຊັ່ນດຽວກັນ ໃຫ້ເຂົານະມັດສະການຢ່າງໃດ, ທີ່ໃດ, ຫລື ສິ່ງໃດທີ່ເຂົາຈະນະມັດສະການ.”¹⁰

ຕົວຢ່າງອື່ນອີກຂອງໂຄງການຊ່ວຍເຫລືອມະນຸດສະທຳ ແລະ ການຊ່ວຍເຫລືອອື່ນໆຂອງສາດສະໜາຈັກທີ່ຖືກຟື້ນຟູ ທີ່ໄດ້ຮັບການສະໜັບສະໜູນໂດຍຄວາມສະໝັກໃຈຂອງສະມາຊິກຂອງພວກເຮົາເຊັ່ນກັນ ໄດ້ແກ່ ໂຮງຮຽນ, ວິທະຍາໄລ, ແລະ ມະຫາວິທະຍາໄລທີ່ມີຊື່ສຽງຂອງພວກເຮົາ ແລະ ເງິນບໍລິຈາກຈຳນວນຫລວງຫລາຍຂອງພວກເຮົາທີ່ຜູ້ຄົນບໍ່ຄ່ອຍຮູ້ຈັກ ແຕ່ເວລານີ້ພວກເຮົາເຜີຍຂໍ້ມູນການບໍລິຈາກຈຳນວນຫລວງຫລາຍເພື່ອການບັນເທົາທຸກໃຫ້ແກ່ຜູ້ທຸກທໍລະມານຈາກການທຳລາຍ ແລະ ການອົບພະຍົບໜີໄພທຳມະຊາດ ເຊັ່ນພະຍຸທໍນາໂດ ແລະ ແຜ່ນດິນໄຫວ.

ກິດຈະກຳການກຸສົນອື່ນໆທີ່ສະມາຊິກຂອງພວກເຮົາສະໜັບສະໜູນ ໂດຍການບໍລິຈາກດ້ວຍຄວາມສະໝັກໃຈ ແລະ ຄວາມພະຍາຍາມຂອງເຂົາເຈົ້າແມ່ນມີຫລາຍກວ່າທີ່ຈະລະບຸໄດ້, ແຕ່ການກ່າວເຖິງພຽງໜ້ອຍດຽວເຫລົ່ານີ້ຈະບົ່ງບອກເຖິງຄວາມຫລາກຫລາຍ ແລະ ຄວາມສຳຄັນຂອງກິດຈະກຳ: ການຕໍ່ຕ້ານການຈຳແນກເຊື້ອຊາດ ແລະ ອະຄະຕິອື່ນໆ; ການວິເຄາະວິທີປ້ອງກັນ ແລະ ຮັກສາໂຣກພະຍາດ; ການຊ່ວຍເຫລືອຜູ້ພິການ; ການສະໜັບສະໜູນໂຄງການດົນຕີ; ແລະ ການປັບປຸງສະພາບແວດລ້ອມທາງສິນທຳ ແລະ ກາຍຍະພາບສຳລັບທຸກຄົນ.

ໂຄງການຊ່ວຍເຫລືອມະນຸດສະທຳທັງໝົດຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ສະແຫວງຫາທີ່ຈະເຮັດຕາມຕົວຢ່າງຂອງຜູ້ຄົນທີ່ຊອບທຳຢູ່ໃນພຣະຄຳພີມໍມອນ ທີ່ວ່າ: “ແລະ ໃນສະພາບອັນຈະເລີນຮຸ່ງເຮືອງຂອງພວກເຂົາແບບນີ້, ພວກເຂົາບໍ່ໄດ້ປະໃຫ້ຜູ້ໃດເປືອຍເປົ່າ, ຫລື ຫິວໂຫຍ, ຫລື ກະຫາຍນ້ຳ, ຫລື ເຈັບປວດ, … ແລະ ພວກເຂົາ … ແຈກຢາຍໃຫ້ແກ່ທຸກຄົນທັງຜູ້ເຖົ້າ ແລະ ຜູ້ໜຸ່ມ, ທັງຂ້າທາດ ແລະ ຜູ້ເປັນອິດສະລະ, ທັງຊາຍ ແລະ ຍິງ, ບໍ່ວ່າຈະຢູ່ນອກສາດສະໜາຈັກ, ຫລື ຢູ່ໃນສາດສະໜາຈັກກໍຕາມ.”¹¹

ຂ້າພະເຈົ້າເປັນພະຍານເຖິງພຣະເຢຊູຄຣິດ, ຜູ້ຊຶ່ງຄວາມສະຫວ່າງ ແລະ ພຣະວິນຍານຂອງພຣະອົງນຳພາລູກໆຂອງພຣະອົງທຸກຄົນ ໃນການຊ່ວຍເຫລືອຄົນຍາກຈົນ ແລະ ຜູ້ເດືອດຮ້ອນ ຕະຫລອດທົ່ວໂລກ. ໃນພຣະນາມຂອງພຣະເຢຊູຄຣິດ, ອາແມນ.