ມໍລະດົກຂອງການໃຫ້ກຳລັງໃຈ
ຂ້າພະເຈົ້າຊຸກຍູ້ທ່ານໃຫ້ສືບຕໍ່ພະຍາຍາມ ເພື່ອໃຫ້ເໝາະສົມທີ່ຈະກັບຄືນໄປຫາພຣະບິດາເທິງສະຫວັນ ແລະ ພຣະເຢຊູຄຣິດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າມີຄວາມກະຕັນຍູຫລາຍ ທີ່ໄດ້ມາເຕົ້າໂຮມຮ່ວມກັບທ່ານໃນກອງປະຊຸມໃຫຍ່ສາມັນນີ້ ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ພວກເຮົາຮູ້ສຶກເຖິງສັດທາຂອງທ່ານ ແລະ ຄວາມຮັກຂອງທ່ານ ບໍ່ວ່າທ່ານຈະຢູ່ໃສກໍຕາມ. ພວກເຮົາໄດ້ຮັບຄວາມຮູ້ໂດຍການສິດສອນທີ່ດົນໃຈ, ປະຈັກພະຍານທີ່ມີພະລັງ, ແລະ ເພງທີ່ສະຫງ່າຜ່າເຜີຍ.
ຂ້າພະເຈົ້າຊຸກຍູ້ທ່ານໃຫ້ສືບຕໍ່ພະຍາຍາມ ເພື່ອໃຫ້ເໝາະສົມທີ່ຈະກັບຄືນໄປຫາພຣະບິດາເທິງສະຫວັນ ແລະ ພຣະເຢຊູຄຣິດ. ບໍ່ວ່າທ່ານຈະຢູ່ໃສໃນເສັ້ນທາງແຫ່ງພັນທະສັນຍາ, ທ່ານຈະພົບກັບການດີ້ນລົນຈາກການທົດລອງທາງຮ່າງກາຍຂອງຊ່ວງມະຕະ ແລະ ການຕໍ່ຕ້ານຂອງຊາຕານ.
ດັ່ງທີ່ແມ່ຂອງຂ້າພະເຈົ້າໄດ້ບອກຂ້າພະເຈົ້າເວລາຂ້າພະເຈົ້າເວົ້າຈົ່ມກັບສິ່ງໃດສິ່ງໜຶ່ງທີ່ຍາກຫລາຍ, “ໂອ, ຮາລ໌, ແນ່ນອນ ມັນຈະຍາກ. ມັນຄວນຈະຍາກ. ຊີວິດເປັນການທົດສອບ.”
ເພິ່ນສາມາດເວົ້າໄດ້ຢ່າງສະຫງົບ, ແມ່ນແຕ່ດ້ວຍຮອຍຍິ້ມ, ເພາະເພິ່ນຮູ້ສອງຢ່າງ. ບໍ່ວ່າການດີ້ນລົນຈະເປັນແນວໃດ, ສິ່ງທີ່ສຳຄັນທີ່ສຸດຄືກັບບ້ານໄປຢູ່ກັບພຣະບິດາເທິງສະຫວັນຂອງເຮົາ. ແລະ ເພິ່ນຮູ້ວ່າ ເພິ່ນສາມາດເຮັດໄດ້ຜ່ານທາງສັດທາໃນພຣະຜູ້ຊ່ວຍໃຫ້ລອດ.
ເພິ່ນຮູ້ສຶກວ່າ ພຣະອົງຢູ່ໃກ້ເພິ່ນ. ໃນວັນທີ່ເພິ່ນຮູ້ວ່າ ເພິ່ນກຳລັງຈະຕາຍ, ເພິ່ນເວົ້າກັບຂ້າພະເຈົ້າກ່ຽວກັບພຣະຜູ້ຊ່ວຍໃຫ້ລອດ ຂະນະທີ່ເພິ່ນນອນຢູ່ໃນຫ້ອງນອນຂອງເພິ່ນ. ມັນມີປະຕູໜຶ່ງໄປຫາອີກຫ້ອງໜຶ່ງໃກ້ກັບຕຽງນອນຂອງເພິ່ນ. ເພິ່ນຍິ້ມ ແລະ ຫລຽວເບິ່ງທີ່ປະຕູ ເມື່ອເພິ່ນເວົ້າຢ່າງສະຫງົບວ່າ ເພິ່ນຈະເຫັນພຣະອົງໃນໄວໆນັ້ນ. ຂ້າພະເຈົ້າຍັງຈື່ຈຳຫລຽວເບິ່ງປະຕູ ແລະ ຈິນຕະນາການເຫັນຫ້ອງຢູ່ຂ້າງຫລັງ.
ຕອນນີ້ເພິ່ນຢູ່ໃນໂລກວິນຍານ. ເພິ່ນສາມາດຈັບຕາເບິ່ງລາງວັນທີ່ເພິ່ນຕ້ອງການເຖິງແມ່ນຈະຜ່ານການທົດລອງທາງຮ່າງກາຍ ແລະ ສ່ວນຕົວເປັນເວລາຫລາຍປີ.
ມໍລະດົກຂອງການໃຫ້ກຳລັງໃຈທີ່ເພິ່ນປະໄວ້ໃຫ້ພວກເຮົາ ບັນຍາຍໄດ້ດີທີ່ສຸດໃນ ໂມໂຣໄນ 7, ຊຶ່ງມໍມອນໄດ້ຊຸກຍູ້ໂມໂຣໄນ ລູກຊາຍຂອງເພິ່ນ ແລະ ຜູ້ຄົນຂອງເພິ່ນ. ມັນເປັນມໍລະດົກຂອງການໃຫ້ກຳລັງໃຈແກ່ລູກຫລານ ເຊັ່ນດຽວກັນກັບທີ່ແມ່ຂອງຂ້າພະເຈົ້າມີໃຫ້ແກ່ຄອບຄົວຂອງເພິ່ນ. ມໍມອນໄດ້ສົ່ງຕໍ່ມໍລະດົກຂອງການໃຫ້ກຳລັງໃຈເຖິງທຸກຄົນທີ່ຕັ້ງໃຈໃຫ້ເໝາະສົມ, ຜ່ານທາງການທົດສອບທຸກຢ່າງໃນຊ່ວງມະຕະ, ເພື່ອຊີວິດນິລັນດອນ.
ມໍມອນເລີ່ມຕົ້ນຂໍ້ທຳອິດຂອງ ໂມໂຣໄນ 7 ດ້ວຍປະຈັກພະຍານເຖິງພຣະເຢຊູຄຣິດ, ເຖິງເຫລົ່າທູດ, ແລະ ເຖິງພຣະວິນຍານຂອງພຣະຄຣິດ, ຊຶ່ງອະນຸຍາດໃຫ້ເຮົາຮູ້ຈັກຄວາມດີຈາກຄວາມຊົ່ວ ແລະ ເພື່ອຈະສາມາດເລືອກສິ່ງທີ່ຖືກຕ້ອງໄດ້.
ເພິ່ນໃຫ້ພຣະເຢຊູຄຣິດມາກ່ອນ, ເຊັ່ນດຽວກັບທຸກຄົນທີ່ປະສົບຄວາມສຳເລັດໃນການໃຫ້ກຳລັງໃຈຜູ້ທີ່ດີ້ນລົນ ຂຶ້ນໄປເທິງເສັ້ນທາງສູ່ບ້ານສະຫວັນຂອງພວກເຂົາ:
“ເພາະຕາມພຣະຄຳຂອງພຣະຄຣິດແລ້ວ, ບໍ່ມີຜູ້ໃດຈະລອດໄດ້ນອກຈາກເຂົາຈະມີສັດທາໃນພຣະນາມຂອງພຣະອົງ; ດັ່ງນັ້ນ, ຖ້າຫາກສິ່ງເຫລົ່ານີ້ໝົດໄປ, ແລ້ວສັດທາກໍໝົດໄປຄືກັນ; ແລະ ສະພາບຂອງມະນຸດຈະເປັນຕາຢ້ານຫລາຍຂະໜາດໃດ, ເພາະເຂົາຈະເປັນຄືກັນກັບວ່າບໍ່ມີການໄຖ່ກະທຳຂຶ້ນເລີຍ.
“ແຕ່ຈົ່ງເບິ່ງ, ພີ່ນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຕັດສິນສິ່ງທີ່ດີກວ່ານີ້ຈາກທ່ານ, ເພາະຂ້າພະເຈົ້າຕັດສິນວ່າ ທ່ານມີສັດທາໃນພຣະຄຣິດເພາະຄວາມອ່ອນໂຍນຂອງທ່ານ ເພາະຖ້າຫາກທ່ານບໍ່ມີສັດທາໃນພຣະອົງແລ້ວ, ທ່ານກໍບໍ່ເໝາະສົມທີ່ຈະຖືກນັບເຂົ້າຢູ່ໃນບັນດາຜູ້ຄົນຂອງສາດສະໜາຈັກຂອງພຣະອົງ.”1
ມໍມອນໄດ້ເຫັນຄວາມອ່ອນໂຍນວ່າເປັນຫລັກຖານຂອງຄວາມເຂັ້ມແຂງຂອງສັດທາຂອງພວກເຂົາ. ເພິ່ນໄດ້ເຫັນວ່າ ພວກເຂົາຮູ້ສຶກເພິ່ງພາພຣະຜູ້ຊ່ວຍໃຫ້ລອດ. ເພິ່ນຊຸກຍູ້ພວກເຂົາໂດຍການສັງເກດເບິ່ງສັດທາ ນັ້ນ. ມໍມອນໄດ້ສືບຕໍ່ເປັນກຳລັງໃຈໃຫ້ພວກເຂົາໂດຍການຊ່ວຍພວກເຂົາໃຫ້ເຫັນວ່າ ສັດທາ ແລະ ຄວາມອ່ອນໂຍນຂອງພວກເຂົາ ຈະສ້າງຄວາມເຊື່ອໝັ້ນ ແລະ ຄວາມໝັ້ນໃຈໃນຄວາມສຳເລັດຂອງພວກເຂົາ ໃນການຕໍ່ສູ້ດີ້ນລົນຂອງພວກເຂົາ:
“ແລະ ອີກຢ່າງໜຶ່ງ, ພີ່ນ້ອງທີ່ຮັກຂອງຂ້າພະເຈົ້າ, ຂ້າພະເຈົ້າຂໍເວົ້າກັບທ່ານກ່ຽວກັບຄວາມຫວັງ. ທ່ານຈະບັນລຸເຖິງສັດທາໄດ້ແນວໃດຖ້າຫາກທ່ານບໍ່ມີຄວາມຫວັງ?
“ແລະ ແມ່ນອັນໃດທີ່ທ່ານຈະຫວັງ? ຈົ່ງເບິ່ງ ຂ້າພະເຈົ້າກ່າວກັບທ່ານວ່າ ທ່ານຈະມີຄວາມຫວັງໂດຍທາງການຊົດໃຊ້ຂອງພຣະຄຣິດ ແລະ ໂດຍອຳນາດຂອງການຟື້ນຄືນພຣະຊົນຂອງພຣະອົງ, ເພື່ອຖືກຍົກຂຶ້ນສູ່ຊີວິດນິລັນດອນ, ແລະ ນີ້ເພາະສັດທາຂອງທ່ານທີ່ມີໃນພຣະອົງຕາມສັນຍາ.
“ດັ່ງນັ້ນ, ຖ້າຫາກຜູ້ໃດມີສັດທາກໍຈຳຕ້ອງມີຄວາມຫວັງ; ເພາະວ່າປາດສະຈາກສັດທາຈະມີຄວາມຫວັງບໍ່ໄດ້ເລີຍ.
“ແລະ ອີກຢ່າງໜຶ່ງ, ຈົ່ງເບິ່ງຂ້າພະເຈົ້າກ່າວກັບທ່ານວ່າ ມະນຸດຈະມີສັດທາ ແລະ ຄວາມຫວັງບໍ່ໄດ້, ນອກຈາກວ່າເຂົາຈະມີໃຈອ່ອນໂຍນ ແລະ ຕ່ຳຕ້ອຍ.”2
ແລ້ວມໍມອນໄດ້ຊຸກຍູ້ພວກເຂົາໂດຍການເປັນພະຍານວ່າ ພວກເຂົາກຳລັງຈະໄດ້ຮັບຂອງປະທານແຫ່ງໃຈຂອງພວກເຂົາ ທີ່ເຕັມໄປດ້ວຍຄວາມຮັກອັນບໍລິສຸດຂອງພຣະຄຣິດ. ເພິ່ນສານຄວາມສຳພັນແຫ່ງສັດທາໃນພຣະເຢຊູຄຣິດ, ຄວາມອ່ອນໂຍນ, ຄວາມຖ່ອມຕົວ, ພຣະວິນຍານບໍລິສຸດ, ແລະ ຄວາມຫວັງອັນໝັ້ນຄົງໃນການຈະໄດ້ຮັບຊີວິດນິລັນດອນ ໃຫ້ແກ່ພວກເຂົາ. ເພິ່ນຊຸກຍູ້ພວກເຂົາໃນທາງນີ້:
“ເພາະວ່າຄົນເຊັ່ນນັ້ນຈະບໍ່ເປັນທີ່ຍອມຮັບຕໍ່ພຣະພັກຂອງພຣະເຈົ້າ, ນອກຈາກຜູ້ທີ່ມີໃຈອ່ອນໂຍນ ແລະ ຕ່ຳຕ້ອຍ, ແລະ ຖ້າຫາກຜູ້ໃດມີໃຈອ່ອນໂຍນ ແລະ ຕ່ຳຕ້ອຍ, ແລະ ສາລະພາບໂດຍອຳນາດຂອງພຣະວິນຍານບໍລິສຸດວ່າພຣະເຢຊູຄື ພຣະຄຣິດ, ຜູ້ນັ້ນຕ້ອງມີຄວາມໃຈບຸນ, ເພາະຖ້າຫາກເຂົາບໍ່ມີຄວາມໃຈບຸນ ເຂົາກໍບໍ່ເປັນອັນໃດເລີຍ; ດັ່ງນັ້ນ ເຂົາຕ້ອງມີຄວາມໃຈບຸນ.”3
ເມື່ອເບິ່ງຄືນຫລັງ, ບັດນີ້ຂ້າພະເຈົ້າເຫັນວ່າ ຂອງປະທານແຫ່ງຄວາມໃຈບຸນ—ຄວາມຮັກອັນບໍລິສຸດຂອງພຣະຄຣິດ—ໄດ້ເສີມສ້າງ, ນຳພາ, ຄ້ຳຈູນ, ແລະ ປ່ຽນແປງແມ່ຂອງຂ້າພະເຈົ້າໃນການຕໍ່ສູ້ດີ້ນລົນລະຫວ່າງທາງກັບບ້ານຂອງເພິ່ນແນວໃດ.
“ແລະ ຄວາມໃຈບຸນອົດທົນໄດ້ດົນນານ, ແລະ ມີຄວາມເມດຕາ, ແລະ ບໍ່ອິດສາບັງບຽດ, ແລະ ບໍ່ອວດອົ່ງ, ແລະ ບໍ່ສະແຫວງຫາເພື່ອຕົນເອງ, ບໍ່ຄຽດງ່າຍ, ບໍ່ຄິດຊົ່ວ, ແລະ ບໍ່ປິຕິຍິນດີໃນຄວາມຊົ່ວຮ້າຍ ແຕ່ປິຕິຍິນດີໃນຄວາມຈິງ, ທົນແບກຫາບທຸກສິ່ງ, ເຊື່ອທຸກສິ່ງ, ຫວັງທຸກສິ່ງ, ອົດທົນທຸກສິ່ງ.
“ດັ່ງນັ້ນ, ພີ່ນ້ອງທີ່ຮັກແພງຂອງຂ້າພະເຈົ້າ, ຖ້າຫາກທ່ານບໍ່ມີຄວາມໃຈບຸນ, ທ່ານກໍບໍ່ມີຄ່າອັນໃດເລີຍ, ເພາະຄວາມໃຈບຸນດຳລົງຢູ່ຕະຫລອດໄປ. ດັ່ງນັ້ນ, ຈົ່ງຍຶດໝັ້ນຢູ່ກັບຄວາມໃຈບຸນ, ຊຶ່ງເປັນສິ່ງທີ່ຍິ່ງໃຫຍ່ທີ່ສຸດໃນທຸກສິ່ງ, ເພາະວ່າທຸກສິ່ງຕ້ອງໝົດສິ້ນໄປ—
“ແຕ່ຄວາມໃຈບຸນຄືຄວາມຮັກອັນບໍລິສຸດຂອງພຣະຄຣິດ, ແລະ ມັນອົດທົນຕະຫລອດການ; ແລະ ຜູ້ໃດຖືກພົບວ່າມີມັນໃນວັນສຸດທ້າຍ, ຍ່ອມຈະເປັນການດີກັບຜູ້ນັ້ນ.
“ດັ່ງນັ້ນ, ພີ່ນ້ອງທີ່ຮັກຂອງຂ້າພະເຈົ້າ, ຈົ່ງອະທິຖານຫາພຣະບິດາດ້ວຍສຸດພະລັງແຫ່ງໃຈ, ເພື່ອທ່ານຈະເຕັມໄປດ້ວຍຄວາມຮັກນີ້, ຊຶ່ງພຣະອົງປະທານໃຫ້ທຸກຄົນ ຊຶ່ງເປັນຜູ້ຕິດຕາມທີ່ແທ້ຈິງຂອງພຣະເຢຊູຄຣິດ, ພຣະບຸດຂອງພຣະອົງ; ເພື່ອທ່ານຈະໄດ້ກາຍມາເປັນບຸດຂອງພຣະເຈົ້າ; ເມື່ອພຣະອົງສະເດັດມາ ເຮົາຈະເປັນເໝືອນດັ່ງພຣະອົງ, ເພາະວ່າເຮົາຈະເຫັນພຣະອົງຢ່າງທີ່ພຣະອົງເປັນຢູ່ນັ້ນ, ເພື່ອເຮົາຈະມີຄວາມຫວັງນີ້; ຄືເຮົາຈະຖືກເຮັດໃຫ້ບໍລິສຸດຄືກັນກັບພຣະອົງທີ່ບໍລິສຸດ.”4
ຂ້າພະເຈົ້າກະຕັນຍູສຳລັບການໃຫ້ກຳລັງໃຈ ແລະ ການສິດສອນຂອງມໍມອນ. ຂ້າພະເຈົ້າໄດ້ຮັບພອນເຊັ່ນກັນ ຈາກມໍລະດົກຂອງແມ່ຂອງຂ້າພະເຈົ້າ. ສາດສະດາທັງຫລາຍນັບຈາກອາດາມເຖິງປະຈຸບັນ, ຜ່ານທາງການສິດສອນ ແລະ ຕົວຢ່າງ, ໄດ້ເສີມກຳລັງຂອງຂ້າພະເຈົ້າ.
ດ້ວຍຄວາມເຄົາລົບຕໍ່ຜູ້ທີ່ຂ້າພະເຈົ້າຮູ້ຈັກເປັນສ່ວນຕົວ ແລະ ຄອບຄົວຂອງພວກເພິ່ນ, ຂ້າພະເຈົ້າໄດ້ເລືອກທີ່ຈະບໍ່ສະແຫວງຫາການກວດສອບລາຍລະອຽດຂອງການຕໍ່ສູ້ດີ້ນລົນຂອງພວກເພິ່ນ ຫລື ເວົ້າເຖິງຂອງປະທານອັນຍິ່ງໃຫຍ່ຂອງພວກເພິ່ນໃນທີ່ສາທາລະນະ. ແຕ່ສິ່ງທີ່ຂ້າພະເຈົ້າໄດ້ເຫັນໄດ້ຊຸກຍູ້ຂ້າພະເຈົ້າ ແລະ ປ່ຽນແປງຂ້າພະເຈົ້າໃຫ້ດີຂຶ້ນ.
ໃນການສ່ຽງຕໍ່ການບຸກລຸກຄວາມເປັນສ່ວນຕົວຂອງນາງ, ຂ້າພະເຈົ້າຈະເພີ່ມການລາຍງານສັ້ນໆ ກ່ຽວກັບການໃຫ້ກຳລັງໃຈຂອງພັນລະຍາຂອງຂ້າພະເຈົ້າ. ຂ້າພະເຈົ້າຈະເຮັດດ້ວຍຄວາມລະມັດລະວັງ. ນາງເປັນຄົນງຽບໆ ຜູ້ບໍ່ສະແຫວງຫາ ຫລື ຊື່ນຊົມກັບການສັນລະເສີນ.
ພວກເຮົາໄດ້ແຕ່ງງານກັນມາໄດ້ 60 ປີແລ້ວ. ເປັນເພາະປະສົບການນັ້ນ ທີ່ບັດນີ້ ຂ້າພະເຈົ້າຈຶ່ງເຂົ້າໃຈຄວາມໝາຍຂໍ້ຄວາມຂອງພຣະຄຳພີເຫລົ່ານີ້: ສັດທາ, ຄວາມຫວັງ, ຄວາມອ່ອນໂຍນ, ຄວາມອົດທົນ, ບໍ່ສະແຫວງຫາເພື່ອຕົນເອງ, ການປິຕິຍິນດີໃນຄວາມຈິງ, ບໍ່ຄິດຊົ່ວ, ແລະ ເໜືອສິ່ງອື່ນໃດ, ຄວາມໃຈບຸນ.5 ເທິງພື້ນຖານຂອງປະສົບການນັ້ນ, ຂ້າພະເຈົ້າສາມາດສະແດງປະຈັກພະຍານວ່າ ມະນຸດທຳມະດາສາມາດນຳອຸດົມການທີ່ຍອດຍ້ຽມທັງໝົດເຫລົ່ານັ້ນມາສູ່ຊີວິດປະຈຳວັນຂອງພວກເຂົາ ເມື່ອພວກເຂົາລຸກຂຶ້ນຜ່ານຄວາມຍາກລຳບາກຂອງຊີວິດ.
ພວກທ່ານຫລາຍລ້ານຄົນທີ່ກຳລັງຟັງຢູ່ ຮູ້ຈັກຄົນເຫລົ່ານີ້. ພວກທ່ານຫລາຍຄົນກໍ ເປັນ ຄົນແບບນີ້. ເຮົາທຸກຄົນຕ້ອງການຕົວຢ່າງທີ່ໃຫ້ກຳລັງໃຈ ແລະ ໝູ່ເພື່ອນທີ່ຮັກເຊັ່ນນັ້ນ.
ເມື່ອພວກທ່ານນັ່ງກັບບາງຄົນໃນຖານະເອື້ອຍນ້ອງ ຫລື ອ້າຍນ້ອງຜູ້ປະຕິບັດສາດສະໜາກິດຂອງເຂົາເຈົ້າ, ພວກທ່ານເປັນຕົວແທນຂອງພຣະຜູ້ເປັນເຈົ້າ. ໃຫ້ຄິດວ່າພຣະອົງຈະເຮັດສິ່ງໃດ ແລະ ກ່າວສິ່ງໃດ. ພຣະອົງຈະເຊື້ອເຊີນເຂົາເຈົ້າໃຫ້ມາຫາພຣະອົງ. ພຣະອົງຈະຊຸກຍູ້ເຂົາເຈົ້າ. ພຣະອົງຈະສັງເກດເຫັນ ແລະ ຍົກຍ້ອງຈຸດເລີ່ມຕົ້ນຂອງການປ່ຽນແປງທີ່ເຂົາເຈົ້າຈະຕ້ອງເຮັດ. ແລະ ພຣະອົງຈະເປັນຕົວຢ່າງທີ່ດີພ້ອມສຳລັບເຂົາເຈົ້າເພື່ອຮຽນແບບ.
ບໍ່ມີໃຜສາມາດເຮັດແນວນັ້ນໄດ້ທັງໝົດ, ແຕ່ໂດຍການຟັງກອງປະຊຸມນີ້, ທ່ານຈະສາມາດຮູ້ວ່າ ທ່ານກຳລັງເຮັດຢູ່. ພຣະຜູ້ຊ່ວຍໃຫ້ລອດຮູ້ການຕໍ່ສູ້ດີ້ນລົນຂອງທ່ານຢ່າງລະອຽດ. ພຣະອົງຮູ້ຈັກສັກກະຍະພາບອັນຍິ່ງໃຫຍ່ຂອງທ່ານ ທີ່ຈະເຕີບໂຕໃນສັດທາ, ຄວາມຫວັງ, ແລະ ຄວາມໃຈບຸນ.
ພຣະບັນຍັດ ແລະ ພັນທະສັນຍາທີ່ພຣະອົງສະເໜີມອບໃຫ້ທ່ານ ບໍ່ແມ່ນການທົດສອບເພື່ອຄວບຄຸມທ່ານ. ທັງສອງຢ່າງເປັນຂອງປະທານເພື່ອຍົກທ່ານຂຶ້ນໃຫ້ຮັບເອົາຂອງປະທານທັງໝົດຂອງພຣະເຈົ້າ ແລະ ກັບຄືນໄປບ້ານຫາພຣະບິດາເທິງສະຫວັນຂອງທ່ານ ແລະ ພຣະຜູ້ເປັນເຈົ້າ, ຜູ້ຮັກທ່ານ.
ພຣະເຢຊູໄດ້ຊົດໃຊ້ແທນບາບຂອງເຮົາ. ເຮົາສາມາດທວງເອົາພອນນັ້ນຂອງຊີວິດນິລັນດອນ ຖ້າຫາກເຮົາຈະມີສັດທາໃນພຣະອົງພຽງພໍທີ່ຈະກັບໃຈ ແລະ ກາຍເປັນເໝືອນດັ່ງເດັກນ້ອຍ, ບໍລິສຸດ ແລະ ພ້ອມທີ່ຈະຮັບເອົາຂອງຂວັນທີ່ຍິ່ງໃຫຍ່ທີ່ສຸດຂອງພຣະເຈົ້າ.
ຂ້າພະເຈົ້າອະທິຖານວ່າ ທ່ານຈະຮັບເອົາຄຳເຊື້ອເຊີນຂອງພຣະອົງ ແລະ ວ່າທ່ານຈະສະເໜີມອບມັນໃຫ້ກັບລູກໆຄົນອື່ນໆຂອງພຣະບິດາເທິງສະຫວັນຂອງເຮົາ.
ຂ້າພະເຈົ້າອະທິຖານເພື່ອຜູ້ສອນສາດສະໜາຂອງເຮົາຕະຫລອດທົ່ວໂລກ. ຂໍໃຫ້ເຂົາເຈົ້າຈົ່ງໄດ້ຮັບການດົນໃຈເພື່ອຊຸກຍູ້ແຕ່ລະຄົນໃຫ້ຕ້ອງການ ແລະ ເຊື່ອວ່າຄຳເຊື້ອເຊີນນັ້ນມາຈາກພຣະເຢຊູຄຣິດ ຜ່ານທາງຜູ້ຮັບໃຊ້ຂອງພຣະອົງ ທີ່ໄດ້ຮັບເອົາພຣະນາມຂອງພຣະອົງ.
ຂ້າພະເຈົ້າເປັນພະຍານວ່າ ພຣະອົງຊົງພຣະຊົນຢູ່ ແລະ ນຳພາສາດສະໜາຈັກຂອງພຣະອົງ. ຂ້າພະເຈົ້າເປັນພະຍານຂອງພຣະອົງ. ປະທານຣະໂຊ ເອັມ ແນວສັນ ເປັນສາດສະດາທີ່ມີຊີວິດຢູ່ຂອງພຣະເຈົ້າ ສຳລັບທຸກຄົນຢູ່ໃນໂລກ. ຂ້າພະເຈົ້າຮູ້ວ່ານັ້ນເປັນຄວາມຈິງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.