“ວັນທີ 8–14 ເດືອນມັງກອນ: ‘ເຮົາຈະໄປ ແລະ ເຮັດ.’ 1 ນີໄຟ 1–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)
“ວັນທີ 8–14 ເດືອນມັງກອນ. 1 ນີໄຟ 1–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)
Lehi Traveling Near the Red Sea [ລີໄຮກຳລັງເດີນທາງຢູ່ໃກ້ທະເລແດງ], ໂດຍ ແກຣີ ສະມິດ
ວັນທີ 8–14 ເດືອນມັງກອນ: “ເຮົາຈະໄປ ແລະ ເຮັດ”
1 ນີໄຟ 1–5
ພຣະຄຳພີມໍມອນເລີ່ມຕົ້ນດ້ວຍເລື່ອງລາວຂອງຄອບຄົວທີ່ແທ້ຈິງຄອບຄົວໜຶ່ງ ທີ່ໄດ້ປະເຊີນກັບບັນຫາຫຍຸ້ງຍາກແທ້ໆ. ມັນໄດ້ເກີດຂຶ້ນ 600 ປີ ກ່ອນ ຄ.ສ., ແຕ່ອາດມີບາງສິ່ງຢູ່ໃນເລື່ອງນີ້ ທີ່ອາດເບິ່ງຄ້າຍຄືກັນກັບຄອບຄົວໃນທຸກວັນນີ້. ຄອບຄົວນີ້ໄດ້ມີຊີວິດຢູ່ໃນໂລກທີ່ມີຄວາມຊົ່ວຮ້າຍ, ແຕ່ພຣະຜູ້ເປັນເຈົ້າໄດ້ສັນຍາກັບເຂົາເຈົ້າວ່າ ຖ້າຫາກເຂົາເຈົ້າຈະຕິດຕາມພຣະອົງ, ແລ້ວພຣະອົງຈະນຳພາເຂົາເຈົ້າໄປຫາບ່ອນທີ່ປອດໄພ. ໃນລະຫວ່າງການເດີນທາງນັ້ນ ບາງເວລາກໍດີ ແລະ ບາງເວລາກໍບໍ່ດີ; ໄດ້ຮັບພອນ ແລະ ການມະຫັດສະຈັນທີ່ຍິ່ງໃຫຍ່, ແຕ່ເຂົາເຈົ້າກໍເຄີຍມີການໂຕ້ຖຽງ ແລະ ການຂັດແຍ້ງກັນ. ໜ້ອຍເທື່ອທີ່ພຣະຄຳພີຈະກ່າວຢ່າງລະອຽດກ່ຽວກັບຄອບຄົວທີ່ພະຍາຍາມດຳລົງຊີວິດຕາມພຣະກິດຕິຄຸນ: ພໍ່ແມ່ພະຍາຍາມດົນໃຈຄອບຄົວຂອງຕົນໃຫ້ມີສັດທາ ແລະ ຫ່ວງໃຍກ່ຽວກັບຄວາມປອດໄພຂອງເຂົາເຈົ້າ, ລູກໆຕັດສິນໃຈເອງວ່າຈະເຊື່ອຄຳຂອງພໍ່ແມ່ຂອງຕົນຫລືບໍ່, ແລະ ອ້າຍນ້ອງກັນມີຄວາມອິດສາບັງບຽດ ແລະ ຄວາມຂັດແຍ້ງກັນ—ແລະ ບາງເທື່ອໄດ້ໃຫ້ອະໄພກັນແລະກັນ. ໂດຍລວມແລ້ວ, ມັນມີພະລັງໃນຕົວຢ່າງແຫ່ງສັດທາຂອງຄອບຄົວທີ່ບໍ່ສົມບູນນີ້.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະຄຳຂອງພຣະເຈົ້າ “ມີຄຸນຄ່າຫລາຍ” ຕໍ່ເຮົາ.
ຂ່າວສານໜຶ່ງທີ່ໂດດເດັ່ນໃນພຣະຄຳພີມໍມອນຄື ຄວາມ “ມີຄຸນຄ່າຫລາຍ” ຂອງພຣະຄຳຂອງພຣະເຈົ້າ (1 ນີໄຟ 5:21). ຂະນະທີ່ທ່ານອ່ານ 1 ນີໄຟ 1–5, ໃຫ້ຊອກຫາວິທີທີ່ພຣະຄຳຂອງພຣະເຈົ້າໄດ້ເປັນພອນໃຫ້ແກ່ຄອບຄົວຂອງລີໄຮໂດຍກົງ ຫລື ທາງອ້ອມແນວໃດ (ສຳລັບຕົວຢ່າງ, ໃຫ້ເບິ່ງ 1:11–15; 3:19–20; 5:10–22). ບົດເຫລົ່ານີ້ສິດສອນທ່ານຫຍັງແດ່ກ່ຽວກັບພຣະຄຳຂອງພຣະເຈົ້າ? ທ່ານພົບເຫັນຫຍັງແດ່ທີ່ດົນໃຈທ່ານໃຫ້ຄົ້ນຄວ້າພຣະຄຳພີ?
ເບິ່ງ “ຈາລຶກທອງຄຳ,” ເພງສວດ ແລະ ເພງຂອງເດັກນ້ອຍ, 71; “Scriptures Legacy” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ເຮົາສາມາດໄດ້ຮັບ ແລະ ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຮົາ ເມື່ອເຮົາຫັນມາຫາພຣະຜູ້ເປັນເຈົ້າ.
ນີໄຟເປັນທີ່ຮູ້ຈັກຍ້ອນສັດທາອັນມີພະລັງຂອງເພິ່ນໃນພຣະຜູ້ເປັນເຈົ້າ, ແຕ່ເພິ່ນຕ້ອງໃຊ້ຄວາມພະຍາຍາມເພື່ອໃຫ້ໄດ້ປະຈັກພະຍານ—ຄືກັນກັບເຮົາທຸກຄົນ. ທ່ານອ່ານຫຍັງໃນ 1 ນີໄຟ 2 ທີ່ສະແດງໃຫ້ເຫັນວ່າ ນີໄຟໄດ້ຮັບປະຈັກພະຍານວ່າ ຖ້ອຍຄຳຂອງບິດາຂອງເພິ່ນເປັນຄວາມຈິງ? ເປັນຫຍັງເລມັນກັບເລມູເອນຈຶ່ງບໍ່ໄດ້ຮັບປະຈັກພະຍານນີ້? (ເບິ່ງ 1 ນີໄຟ 15:2–11 ນຳອີກ). ທ່ານຮູ້ສຶກວ່າພຣະຜູ້ເປັນເຈົ້າເຮັດໃຫ້ໃຈຂອງທ່ານອ່ອນລົງເມື່ອໃດ?
ເບິ່ງ “The Lord Commands Lehi’s Family to Leave Jerusalem” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ພຣະເຈົ້າຈະຕຽມທາງໃຫ້ເຮົາເພື່ອເຮັດຕາມພຣະປະສົງຂອງພຣະອົງ.
ເມື່ອພຣະຜູ້ເປັນເຈົ້າໄດ້ບັນຊາພວກລູກຊາຍຂອງລີໄຮໃຫ້ໄປເອົາແຜ່ນຈາລຶກທອງເຫລືອງ, ພຣະອົງບໍ່ໄດ້ໃຫ້ຄຳແນະນຳໃດໜຶ່ງໂດຍສະເພາະ ເຖິງວິທີທີ່ຈະເຮັດມັນໄດ້. ສ່ວນຫລາຍນີ້ເປັນຄວາມຈິງກັບການຊີ້ນຳທີ່ເຮົາໄດ້ຮັບຈາກພຣະເຈົ້າ, ແລະ ສິ່ງນີ້ອາດເຮັດໃຫ້ຮູ້ສຶກວ່າ ພຣະອົງຮຽກຮ້ອງ “ເລື່ອງຍາກ” (1 ນີໄຟ 3:5). ສິ່ງໃດທີ່ດົນໃຈທ່ານກ່ຽວກັບການຕອບຮັບຂອງນີໄຟ ຕໍ່ພຣະບັນຊາຂອງພຣະຜູ້ເປັນເຈົ້າໃນ 1 ນີໄຟ 3:7, 15–16?
ຂະນະທີ່ທ່ານອ່ານ 1 ນີໄຟ 3–4, ໃຫ້ຊອກຫາຄວາມຫຍຸ້ງຍາກຫລາຍຢ່າງທີ່ນີໄຟໄດ້ປະເຊີນ. ພຣະຜູ້ເປັນເຈົ້າໄດ້ “ຕຽມທາງ” ໃຫ້ນີໄຟເພື່ອ “ສຳເລັດໃນສິ່ງທີ່ພຣະອົງ [ໄດ້ບັນຊາ]” ແນວໃດ? ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້ວ່າ ພຣະຜູ້ເປັນເຈົ້າໄດ້ເຮັດສິ່ງໃດເພື່ອນີໄຟ?
ວິທີໜຶ່ງທີ່ມີພະລັງທີ່ພຣະເຈົ້າໄດ້ຕຽມເຮົາໃຫ້ຮັກສາພຣະບັນຍັດຂອງພຣະອົງຄືການສົ່ງພຣະເຢຊູຄຣິດມາເປັນພຣະຜູ້ຊ່ວຍໃຫ້ລອດຂອງເຮົາ. ໃຫ້ຄິດທີ່ຈະອ່ານຂ່າວສານຂອງປະທານດາລິນ ເອັຈ ໂອກສ໌ “What Has Our Savior Done for Us?” (Liahona, May 2021, 75–77). ພຣະເຢຊູຄຣິດໄດ້ຕຽມທາງໃຫ້ເຮົາແຕ່ລະຄົນແນວໃດ? ເມື່ອຮູ້ວ່າພຣະອົງໄດ້ເອົາຊະນະທຸກສິ່ງເພື່ອທ່ານ, ທ່ານຮູ້ສຶກປະທັບໃຈໃຫ້ “ໄປ ແລະ ເຮັດ” ສິ່ງໃດ?
ເບິ່ງ “Nephi Is Led by the Spirit to Obtain the Plates of Brass” (ວິດີໂອ), ຫ້ອງສະໝຸດພຣະກິດຕິຄຸນ; Gospel Topics, “Obedience,” ຫ້ອງສະໝຸດພຣະກິດຕິຄຸນ ນຳອີກ.
ໃຊ້ເລື່ອງເລົ່າ ແລະ ຕົວຢ່າງເພື່ອສິດສອນຫລັກທຳພຣະກິດຕິຄຸນ. ຂະນະທີ່ທ່ານກະກຽມທີ່ຈະສິດສອນ, ໃຫ້ຄິດກ່ຽວກັບປະສົບການສ່ວນຕົວທີ່ສາມາດຕື່ມປະຈັກພະຍານຢ່າງທີສອງໃສ່ກັບເລື່ອງລາວໃນພຣະຄຳພີ. ຍົກຕົວຢ່າງ, ພຣະຜູ້ເປັນເຈົ້າໄດ້ຕຽມທາງໃຫ້ທ່ານເພື່ອເຮັດຕາມພຣະປະສົງຂອງພຣະອົງເມື່ອໃດ?
Their Joy Was Full [ພວກເພິ່ນເຕັມໄປດ້ວຍຄວາມປິຕິຍິນດີ], ໂດຍ ວາວເຕີ ເຣນ
ການຈື່ຈຳວຽກງານຂອງພຣະເຈົ້າ ສາມາດເຮັດໃຫ້ເຮົາມີສັດທາທີ່ຈະເຊື່ອຟັງພຣະບັນຍັດຂອງພຣະອົງ.
ເມື່ອເລມັນ ແລະ ເລມູເອນ ຮູ້ສຶກຢາກຈົ່ມ ຫລື ຟ້ອງ, ຕາມປົກກະຕິແລ້ວ ເຂົາເຈົ້າມີນີໄຟ ແລະ ລີໄຮຢູ່ໃກ້ ເພື່ອດົນໃຈ ແລະ ສະໜັບສະໜູນເຂົາເຈົ້າ. ເມື່ອທ່ານຮູ້ສຶກຢາກຈົ່ມ, ການອ່ານຖ້ອຍຄຳຂອງນີໄຟ ແລະ ລີໄຮຈະຊ່ວຍໄດ້ຫລາຍ. ນີໄຟ ແລະ ລີໄຮໄດ້ພະຍາຍາມຊ່ວຍຄົນອື່ນສ້າງສັດທາໃນພຣະເຈົ້າ ແນວໃດແດ່? ເບິ່ງ 1 ນີໄຟ 4:1–3; 5:1–8; ເບິ່ງ 1 ນີໄຟ 7:6–21) ນຳອີກ. ທ່ານຮຽນຮູ້ຫຍັງແດ່ທີ່ສາມາດຊ່ວຍທ່ານ ເມື່ອທ່ານຄິດຢາກຈົ່ມ ຫລື ຟ້ອງ?
“ພຣະວິນຍານໄດ້ນຳຂ້າພະເຈົ້າໄປ.”
ໃນ 1 ນີໄຟ 4:5–18, ແມ່ນຫຍັງທີ່ປະທັບໃຈທ່ານກ່ຽວກັບຄວາມສາມາດຂອງນີໄຟ ໃນການຮັບຮູ້ ແລະ ເຮັດຕາມພຣະວິນຍານ? ທ່ານອາດຢາກສຶກສາຂ່າວສານຂອງປະທານຣະໂຊ ເອັມ ແນວສັນ “Revelation for the Church, Revelation for Our Lives” (Liahona, May 2018, 93–96) ເພື່ອຮຽນຮູ້ຕື່ມກ່ຽວກັບການຮັບການເປີດເຜີຍຈາກພຣະຜູ້ເປັນເຈົ້າ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເຮົາສາມາດມີປະຈັກພະຍານຂອງຕົວເອງໄດ້.
-
ນີໄຟຮູ້ໄດ້ແນວໃດວ່າ ສິ່ງທີ່ບິດາຂອງເພິ່ນສິດສອນເປັນຄວາມຈິງ? ຊ່ວຍລູກໆຂອງທ່ານຊອກຫາຄຳຕອບໃຫ້ກັບຄຳຖາມຂໍ້ນີ້ໃນ 1 ນີໄຟ 2:16, 19. ພວກເຂົາອາດມັກຂຽນການກະທຳຂອງນີໄຟໃສ່ທ່ອນໄມ້ ຫລື ສິ່ງຂອງຢ່າງອື່ນນຳອີກ ແລະ ແລ້ວສ້າງບາງສິ່ງຂຶ້ນດ້ວຍສິ່ງຂອງເຫລົ່ານັ້ນ. ສິ່ງນີ້ອາດນຳໄປສູ່ການສົນທະນາກ່ຽວກັບວິທີທີ່ການກະທຳເຫລົ່ານີ້ຊ່ວຍໃຫ້ເຮົາສ້າງປະຈັກພະຍານຂອງເຮົາແນວໃດ.
-
ທ່ານສາມາດສະແດງຮູບ ຫລື ສິ່ງຂອງທີ່ເປັນຕົວແທນໃຫ້ກັບບາງສິ່ງທີ່ພວກເຂົາສະແຫວງຫາເພື່ອຈະມີປະຈັກພະຍານ, ດັ່ງເຊັ່ນປຶ້ມພຣະຄຳພີມໍມອນ ຫລື ຮູບພາບພຣະເຢຊູຄຣິດ, ພຣະວິຫານ, ຫລື ສາດສະດາທີ່ມີຊີວິດຢູ່. ເຊື້ອເຊີນພວກເຂົາໃຫ້ຈັບເອົາອັນໜຶ່ງ ແລະ ແບ່ງປັນປະຈັກພະຍານຂອງພວກເຂົາເຖິງສິ່ງນັ້ນ. ທ່ານກໍຍັງສາມາດບອກລູກໆຂອງທ່ານເຖິງວິທີທີ່ທ່ານໄດ້ຮັບປະຈັກພະຍານຂອງທ່ານແນວໃດ. ເປັນຫຍັງເຮົາຈຶ່ງຕ້ອງການມີປະຈັກພະຍານຂອງຕົວເອງ?
ພຣະເຈົ້າຈະຊ່ວຍໃຫ້ເຮົາຮັກສາພຣະບັນຍັດຂອງພຣະອົງ.
-
ໃຫ້ຄິດທີ່ຈະໃຊ້ແຫລ່ງຊ່ວຍເຫລືອແຫລ່ງໜຶ່ງ ຫລື ຫລາຍກວ່ານັ້ນເຫລົ່ານີ້ ເພື່ອຊ່ວຍລູກໆຂອງທ່ານໃຫ້ເວົ້າກ່ຽວກັບວິທີທີ່ພຣະເຈົ້າໄດ້ຊ່ວຍນີໄຟໃຫ້ໄດ້ແຜ່ນຈາລຶກທອງເຫລືອງແນວໃດ: 1 ນີໄຟ 3–4; ໜ້າກິດຈະກຳຂອງອາທິດນີ້; “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70); ແລະ “ບົດທີ 4: ແຜ່ນຈາລຶກທອງເຫລືອງ” (ໃນ ເລື່ອງພຣະຄຳພີມໍມອນ, 8–12).
-
ທ່ານ ແລະ ລູກໆຂອງທ່ານອາດມັກຫລິ້ນລະຄອນກ້ອມ 1 ນີໄຟ 3:2–7. ບາງທີທ່ານອາດທຳທ່າເປັນລີໄຮ ແລະ ຂໍໃຫ້ລູກໆຂອງທ່ານກັບຄືນໄປເຢຣູຊາເລັມ ເພື່ອໄປເອົາແຜ່ນຈາລຶກທອງເຫລືອງ. ເຊື້ອເຊີນພວກເຂົາໃຫ້ຕອບໃນຄຳເວົ້າຂອງຕົວເອງ ຄືກັບວ່າພວກເຂົາເປັນເລມັນກັບເລມູເອນ ຫລື ນີໄຟ. ມີບາງສິ່ງໃດແດ່ທີ່ພຣະເຈົ້າໄດ້ບັນຊາເຮົາໃຫ້ເຮັດ? (ເບິ່ງ ຮູບ 103–15 ໃນ ປຶ້ມຮູບພຣະກິດຕິຄຸນ ຫລື ໂມໄຊຢາ 18:8–10 ສຳລັບແນວຄິດ). ເຮົາຈະສາມາດເປັນຄືກັນກັບນີໄຟໄດ້ແນວໃດ?
ພຣະຄຳພີແມ່ນຊັບສົມບັດອັນຍິ່ງໃຫຍ່.
-
ພຣະຄຳພີມີຄວາມສຳຄັນຫລາຍຕໍ່ຄອບຄົວຂອງລີໄຮ. ເພື່ອສາທິດສິ່ງນີ້, ທ່ານສາມາດເຊື້ອເຊີນລູກໆຂອງທ່ານໃຫ້ຊ່ວຍທ່ານເລົ່າ ຫລື ສະແດງຕາມສິ່ງທີ່ນີໄຟ ແລະ ພວກອ້າຍຂອງເພິ່ນໄດ້ເຮັດ ເພື່ອຈະໄດ້ແຜ່ນຈາລຶກທອງເຫລືອງ: ເຂົາເຈົ້າໄດ້ເດີນທາງໄກ, ຍອມສະລະຄຳ ແລະ ເງິນຂອງເຂົາເຈົ້າ, ແລະ ລີ້ຢູ່ໃນຖ້ຳເພື່ອເອົາຕົວລອດ. ແລ້ວທ່ານສາມາດອ່ານ 1 ນີໄຟ 5:21 ແລະ ເວົ້າກ່ຽວກັບວ່າ ເປັນຫຍັງພຣະຄຳພີຈຶ່ງມີຄ່າຫລາຍຕໍ່ຄອບຄົວຂອງລີໄຮ. ເປັນຫຍັງມັນຈຶ່ງມີຄ່າຕໍ່ເຮົາ? ເຮົາຈະປະຕິບັດຕໍ່ພຣະຄຳພີຄືກັບວ່າເປັນຊັບສົມບັດໄດ້ແນວໃດ?
ນີໄຟ ແລະ ຄອບຄົວຂອງເພິ່ນເຫັນຄຸນຄ່າຂອງພຣະຄຳພີ.
ພຣະວິນຍານບໍລິສຸດຈະນຳພາເຮົາ ຂະນະທີ່ເຮົາສະແຫວງຫາທີ່ຈະເຮັດຕາມພຣະປະສົງຂອງພຣະຜູ້ເປັນເຈົ້າ.
-
ຫລັງຈາກທົບທວນນຳກັນໃນ 1 ນີໄຟ 3 ເຖິງວິທີທີ່ນີໄຟ ແລະ ພວກອ້າຍຂອງເພິ່ນພະຍາຍາມເອົາແຜ່ນຈາລຶກທອງເຫລືອງໃຫ້ໄດ້, ໃຫ້ອ່ານ 1 ນີໄຟ 4:6 ກັບລູກໆຂອງທ່ານ ເພື່ອຈະໄດ້ຮູ້ວ່າ ນີໄຟໄດ້ເຮັດຫຍັງ ທີ່ຊ່ວຍໃຫ້ເພິ່ນປະສົບຄວາມສຳເລັດໃນທີ່ສຸດ. ແລ້ວລູກໆຂອງທ່ານສາມາດຂຽນບາງສິ່ງທີ່ພຣະເຈົ້າຢາກໃຫ້ພວກເຂົາເຮັດ. ພຣະວິນຍານບໍລິສຸດສາມາດຊ່ວຍເຮົາໃນສະຖານະການເຫລົ່ານີ້ແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
I Did Obey the Voice of the Spirit [ເຮົາເຊື່ອຟັງສຸລະສຽງຂອງພຣະວິນຍານ], ໂດຍ ວາວເຕີ ເຣນ