ແຕ່ພວກເຮົາບໍ່ໄດ້ຫົວຊາພວກເຂົາເລີຍ

ໂດຍ ແອວເດີ ເດວິດ ເອ ແບ໊ດນາ

ແຫ່ງກຸ່ມອັກຄະສາວົກສິບສອງ

ພັນທະສັນຍາ ແລະ ພິທີການຂອງເຮົາ ຊີ້ໃຫ້ເຮົາເຫັນ ແລະ ຊ່ວຍເຮົາໃຫ້ຈື່ຈຳການເຊື່ອມໂຍງຂອງເຮົາກັບອົງພຣະເຢຊູຄຣິດເຈົ້າສະເໝີ ຂະນະທີ່ເຮົາກ້າວໄປຕາມເສັ້ນທາງແຫ່ງພັນທະສັນຍາ.

ຊູແຊນ ພັນລະຍາຂອງຂ້າພະເຈົ້າ, ລູກຊາຍສາມຄົນຂອງພວກເຮົາ ກັບພັນລະຍາຂອງເຂົາເຈົ້າ, ຫລານທຸກຄົນຂອງພວກເຮົາ, ແລະ ແອວເດີ ຄວິນຕິນ ແອວ ຄຸກ, ເພື່ອນນັ່ງຄູ່ກັບຂ້າພະເຈົ້າໃນກຸ່ມອັກຄະສາວົກສິບສອງມາເປັນເວລາເກືອບ 15 ປີ, ທັງໝົດຈະຢືນຢັນໄດ້ວ່າ ຂ້າພະເຈົ້າຮ້ອງເພງບໍ່ເກັ່ງ. ແຕ່ເຖິງແມ່ນຂ້າພະເຈົ້າຍັງຂາດພອນສະຫວັນທາງສຽງ, ແຕ່ຂ້າພະເຈົ້າກໍຍັງມັກຮ້ອງເພງສວດແຫ່ງການຟື້ນຟູຢູ່. ການປະສົມປະສານຂອງເນື້ອເພງທີ່ໄດ້ຮັບການດົນໃຈ ແລະ ທຳນອງທີ່ສະຫງ່າງາມ ຊ່ວຍໃຫ້ຂ້າພະເຈົ້າຮຽນຮູ້ຫລັກທຳພຣະກິດຕິຄຸນທີ່ຈຳເປັນ ແລະ ກະຕຸ້ນຈິດວິນຍານຂອງຂ້າພະເຈົ້າ.

ເພງສວດເພງໜຶ່ງທີ່ເປັນພອນໃຫ້ແກ່ຊີວິດຂອງຂ້າພະເຈົ້າຢ່າງໜ້າປະຫລາດແມ່ນ “ຂໍໃຫ້ເຮົາເດີນໄປ.” ເມື່ອບໍ່ດົນມານີ້ ຂ້າພະເຈົ້າໄດ້ໄຕ່ຕອງ ແລະ ຮຽນຮູ້ກ່ຽວກັບວະລີສະເພາະໃນບົດເພງສວດນັ້ນ. “ຢ່າຫູເບົາເຊື່ອ ເມື່ອຄົນຊົ່ວເວົ້າບອກເຮົາ, ແຕ່ພຣະເຈົ້າເທົ່ານັ້ນ ເຮົາຈະເຊື່ອຟັງ.”¹

ຢ່າຫູເບົາເຊື່ອ.

ຂະນະທີ່ຂ້າພະເຈົ້າຮ້ອງເພງ “ຂໍໃຫ້ເຮົາເດີນໄປ,” ຂ້າພະເຈົ້າມັກຈະຄິດເຖິງຜູ້ຄົນໃນພາບນິມິດຂອງລີໄຮ ມຸ້ງໜ້າໄປຕາມທິດທາງທີ່ນຳໄປສູ່ຕົ້ນໄມ້ແຫ່ງຊີວິດ ທີ່ບໍ່ພຽງແຕ່ “ກອດຮາວເຫລັກ”² ແຕ່ “ຈັບຮາວເຫລັກໄວ້ໃຫ້ແໜ້ນຢູ່ຕະຫລອດເວລາ, ຈົນມາເຖິງແລ້ວລົ້ມລົງ ແລະ ຮັບສ່ວນໝາກໄມ້ຈາກຕົ້ນນັ້ນ.”³ ລີໄຮໄດ້ບັນຍາຍຝູງຊົນໃນອາຄານໃຫຍ່ ແລະ ກວ້າງຂວາງທີ່ຊີ້ “ມືເຍາະເຍີ້ຍ [ເພິ່ນ] ກັບຜູ້ທີ່ກຳລັງຮັບສ່ວນໝາກໄມ້.”⁴ ການຕອບຮັບຂອງເພິ່ນຕໍ່ການເຍາະເຍີ້ຍ ແລະ ການດູຖູກເປັນໜ້າປະທັບໃຈ ແລະ ໜ້າຊົງຈຳ: “ແຕ່ພວກເຮົາບໍ່ໄດ້ຫົວຊາພວກເຂົາເລີຍ.”⁵

ຂ້າພະເຈົ້າອະທິຖານວ່າ ພຣະວິນຍານບໍລິສຸດຈະປະທານພອນ ແລະ ໃຫ້ຄວາມຮູ້ແກ່ພວກເຮົາແຕ່ລະຄົນ ຂະນະທີ່ພວກເຮົາພິຈາລະນານຳກັນ ກ່ຽວກັບວິທີທີ່ພວກເຮົາຈະສາມາດເສີມກຳລັງ ທີ່ຈະ “ບໍ່ຫົວຊາ” ອິດທິພົນຊົ່ວຮ້າຍ ແລະ ສຽງເຍາະເຍີ້ຍຂອງໂລກປະຈຸບັນທີ່ພວກເຮົາອາໄສຢູ່ນີ້.

ບໍ່ຫົວຊາ

ຄຳວ່າ ຫົວຊາ ໝາຍເຖິງການສັງເກດເບິ່ງ ຫລື ໃຫ້ຄວາມສົນໃຈຕໍ່ບາງຄົນ ຫລື ບາງສິ່ງ. ດັ່ງນັ້ນ, ເນື້ອເພງຂອງເພງສວດ “ຂໍໃຫ້ເຮົາເດີນໄປ” ຈຶ່ງເຕືອນເຮົາໃຫ້ຕັດສິນໃຈຢ່າງແນ່ວແນ່ ທີ່ຈະບໍ່ເອົາໃຈໃສ່ “ເມື່ອຄົນຊົ່ວເວົ້າບອກເຮົາ.” ແລະ ລີໄຮກັບຜູ້ຄົນທີ່ຢູ່ກັບເພິ່ນ ຜູ້ຮັບສ່ວນໝາກໄມ້ຈາກຕົ້ນນັ້ນ ໄດ້ໃຫ້ຕົວຢ່າງທີ່ດີຂອງການບໍ່ເອົາໃຈໃສ່ກັບການເຍາະເຍີ້ຍ ແລະ ດູຖູກ ທີ່ມັກມາຈາກອາຄານໃຫຍ່ ແລະ ກວ້າງຂວາງ.

ຄຳສອນຂອງພຣະຄຣິດຂຽນວ່າ “ດ້ວຍພຣະວິນຍານຂອງພຣະເຈົ້າ [ທີ່ຊົງພຣະຊົນຢູ່] … ໄດ້ຂຽນໃສ່ [ຫົວໃຈຂອງເຮົາ]”⁶ ເພີ່ມຄວາມສາມາດຂອງເຮົາໃນການ “ບໍ່ຫົວຊາ” ກັບສິ່ງລົບກວນຢ່າງຫລວງຫລາຍ, ການເກາະແກະ, ແລະ ການປ່ຽນແປງໃນໂລກທີ່ເສື່ອມໂຊມຂອງເຮົາ. ຍົກຕົວຢ່າງ, ສັດທາທີ່ເອົາໃຈໃສ່ໃນ ແລະ ກັບອົງພຣະເຢຊູຄຣິດເຈົ້າ ຈະປົກປ້ອງເຮົາດ້ວຍຄວາມເຂັ້ມແຂງທາງວິນຍານ. ສັດທາໃນພຣະຜູ້ໄຖ່ເປັນຫລັກທຳຂອງການກະທຳ ແລະ ພະລັງ. ເມື່ອເຮົາເຮັດຕາມຄວາມຈິງຂອງພຣະກິດຕິຄຸນຂອງພຣະອົງ, ເຮົາໄດ້ຮັບພອນດ້ວຍຄວາມສາມາດທາງວິນຍານ ທີ່ຈະກ້າວໄປໜ້າຜ່ານການທ້າທາຍຂອງຄວາມເປັນມະຕະ ໃນຂະນະທີ່ເອົາໃຈໃສ່ກັບຄວາມຊື່ນຊົມທີ່ພຣະຜູ້ຊ່ວຍໃຫ້ລອດສະເໜີມອບໃຫ້ເຮົາ. ແທ້ຈິງແລ້ວ, “ຖ້າເຮົາເຮັດຄວາມດີບໍ່ຕ້ອງມີຄວາມຫວາດຫວັ່ນ, ເພາະພຣະເຈົ້າຜູ້ຊ່ວຍຈະຢູ່ດ້ວຍຊົ່ວນິລັນ.”⁷

ການເຊື່ອມຕໍ່ສ່ວນຕົວຜ່ານທາງພັນທະສັນຍາ

ການເຂົ້າໃນພັນທະສັນຍາທີ່ສັກສິດ ແລະ ການຮັບເອົາພິທີການຖານະປະໂລຫິດຢ່າງມີຄ່າຄວນ ຈະທຽມແອກເຮົາ ແລະ ຜູກມັດເຮົາໄວ້ກັບອົງພຣະເຢຊູຄຣິດເຈົ້າ ແລະ ພຣະບິດາເທິງສະຫວັນ.⁸ ນີ້ໝາຍຄວາມວ່າເຮົາໄວ້ວາງໃຈໃນພຣະຜູ້ຊ່ວຍໃຫ້ລອດ ໃນຖານະຜູ້ວິງວອນແທນເຮົາ⁹ ແລະ ຜູ້ເປັນກາງ¹⁰ ແລະ ເພິ່ງອາໄສຄຸນຄວາມດີ, ຄວາມເມດຕາ, ແລະ ພຣະຄຸນ¹¹ ຂອງພຣະອົງໃນລະຫວ່າງການເດີນທາງຂອງຊີວິດ. ເມື່ອເຮົາໝັ້ນຄົງໃນການມາຫາພຣະຄຣິດ ແລະ ທຽມແອກກັບພຣະອົງ, ແລ້ວເຮົາຈະໄດ້ຮັບການຊຳລະລ້າງ, ການປິ່ນປົວ, ແລະ ເພີ່ມຄວາມເຂັ້ມແຂງໃຫ້ແກ່ພອນຂອງການຊົດໃຊ້ອັນເປັນນິດ ແລະ ນິລັນດອນຂອງພຣະອົງ.¹²

ການດຳລົງຊີວິດ ແລະ ການມີຄວາມຮັກຕໍ່ຄຳໝັ້ນສັນຍາໃນພັນທະສັນຍາ ຈະສ້າງຄວາມສຳພັນກັບພຣະຜູ້ເປັນເຈົ້າ ທີ່ມີພະລັງສ່ວນຕົວ ແລະ ທາງວິນຍານຢ່າງເລິກເຊິ່ງ. ເມື່ອເຮົາໃຫ້ກຽດແກ່ເງື່ອນໄຂຂອງພັນທະສັນຍາ ແລະ ພິທີການສັກສິດ, ເຮົາຈະຄ່ອຍຫຍັບເຂົ້າໃກ້ພຣະອົງຫລາຍຂຶ້ນເລື້ອຍໆ¹³ ແລະ ປະສົບກັບຜົນກະທົບຂອງຄວາມສັກສິດຂອງພຣະອົງ ແລະ ຄວາມເປັນຈິງໃນຊີວິດຂອງເຮົາ. ແລ້ວພຣະເຢຊູຈະກາຍເປັນຫລາຍກວ່າບຸກຄົນໃນຈຸດສູນກາງ ໃນເລື່ອງລາວພຣະຄຳພີ; ຕົວຢ່າງ ແລະ ຄຳສອນຂອງພຣະອົງ ຈະມີອິດທິພົນຕໍ່ຄວາມປາດຖະໜາ, ຄວາມຄິດ, ແລະ ການກະທຳທັງໝົດຂອງເຮົາ.

ຂ້າພະເຈົ້າບອກຕາມຕົງໄດ້ວ່າ ບໍ່ສາມາດບັນຍາຍໄດ້ພຽງພໍເຖິງລັກສະນະ ແລະ ອຳນາດທີ່ຊັດເຈນຂອງການເຊື່ອມໂຍງພັນທະສັນຍາຂອງເຮົາກັບພຣະບຸດຂອງພຣະເຈົ້າທີ່ຟື້ນຄືນພຣະຊົນ ແລະ ຊົງພຣະຊົນຢູ່. ແຕ່ຂ້າພະເຈົ້າເປັນພະຍານວ່າ ຄວາມສຳພັນກັບພຣະອົງ ແລະ ພຣະບິດາເທິງສະຫວັນມີຈິງ ແລະ ເປັນແຫລ່ງສູງສຸດຂອງການຮັບຮອງ, ສັນຕິສຸກ, ຄວາມຊື່ນຊົມ, ແລະ ຄວາມເຂັ້ມແຂງທາງວິນຍານ ທີ່ເຮັດໃຫ້ເຮົາ “[ບໍ່] ຢ້ານ, ແມ້ສັດຕູກ່າວປະນາມ.”¹⁴ ໃນຖານະສານຸສິດຂອງພຣະເຢຊູຄຣິດທີ່ໄດ້ເຮັດ ແລະ ຮັກສາພັນທະສັນຍາ, ເຮົາສາມາດໄດ້ຮັບພອນ ເພື່ອໃຫ້ “ກ້າ, ເພາະວ່າພຣະເຈົ້າຢູ່ຂ້າງເຮົາ”¹⁵ ແລະ ບໍ່ຫົວຊາອິດທິພົນທີ່ຊົ່ວຮ້າຍ ແລະ ການເຍາະເຍີ້ຍທາງໂລກ.

ເມື່ອຂ້າພະເຈົ້າໄປຢ້ຽມຢາມສະມາຊິກຂອງສາດສະໜາຈັກຕະຫລອດທົ່ວໂລກ, ຂ້າພະເຈົ້າມັກຖາມເຂົາເຈົ້າໃນຄຳຖາມນີ້: ແມ່ນຫຍັງຊ່ວຍທ່ານໃຫ້ “ບໍ່ຫົວຊາ” ກັບອິດທິພົນທາງໂລກ, ການເຍາະເຍີ້ຍ, ແລະ ການດູຖູກ? ຄຳຕອບຂອງເຂົາເຈົ້າມີປະໂຫຍດຫລາຍທີ່ສຸດ.

ສະມາຊິກຜູ້ກ້າຫານມັກຈະເນັ້ນເຖິງຄວາມສຳຄັນຂອງການເຊື້ອເຊີນອຳນາດຂອງພຣະວິນຍານບໍລິສຸດໃຫ້ເຂົ້າມາໃນຊີວິດຂອງເຂົາເຈົ້າ ຜ່ານທາງການສຶກສາພຣະຄຳພີທີ່ມີຄວາມໝາຍ, ການອະທິຖານຢ່າງຈິງຈັງ, ແລະ ການກະກຽມທີ່ເໝາະສົມ ເພື່ອມີສ່ວນຮ່ວມໃນພິທີການສິນລະລຶກ. ພ້ອມນີ້ ທີ່ກ່າວເຖິງເລື້ອຍໆແມ່ນການສະໜັບສະໜູນທາງວິນຍານຂອງສະມາຊິກຄອບຄົວທີ່ຊື່ສັດ ແລະ ໝູ່ເພື່ອນທີ່ໄວ້ວາງໃຈໄດ້, ບົດຮຽນທີ່ສຳຄັນຜ່ານທາງການປະຕິບັດສາດສະໜາກິດ ແລະ ການຮັບໃຊ້ໃນສາດສະໜາຈັກທີ່ຖືກຟື້ນຟູຂອງພຣະຜູ້ເປັນເຈົ້າ, ແລະ ຄວາມສາມາດໃນການຫລິງເຫັນຄວາມວ່າງເປົ່າຢ່າງແທ້ຈິງຂອງສິ່ງໃດໆ ທີ່ຢູ່ໃນ ຫລື ອອກມາຈາກອາຄານໃຫຍ່ ແລະ ກວ້າງຂວາງນັ້ນ.

ຂ້າພະເຈົ້າໄດ້ສັງເກດເຫັນໃນຄຳຕອບຂອງສະມາຊິກເຫລົ່ານີ້ ເຖິງຮູບແບບໃດໜຶ່ງທີ່ມີຄວາມສຳຄັນໂດຍສະເພາະ. ທຳອິດ ແລະ ກ່ອນອື່ນໝົດ, ສານຸສິດເຫລົ່ານີ້ມີປະຈັກພະຍານທີ່ໝັ້ນຄົງກັບແຜນແຫ່ງຄວາມສຸກຂອງພຣະບິດາເທິງສະຫວັນ ແລະ ບົດບາດຂອງພຣະເຢຊູຄຣິດ ໃນຖານະພຣະຜູ້ໄຖ່ ແລະ ພຣະຜູ້ຊ່ວຍໃຫ້ລອດຂອງເຮົາ. ແລະ ທີສອງ, ຄວາມຮູ້ທາງວິນຍານ ແລະ ຄວາມເຊື່ອໝັ້ນຂອງເຂົາເຈົ້າແມ່ນສ່ວນບຸກຄົນ, ສ່ວນຕົວ, ແລະ ສະເພາະ; ມັນບໍ່ແມ່ນທົ່ວໄປ ແລະ ຂາດຕົວຕົນ. ຂ້າພະເຈົ້າໄດ້ຮັບຟັງຜູ້ຄົນທີ່ອຸທິດຕົນເວົ້າເຖິງພັນທະສັນຍາທີ່ໃຫ້ຄວາມເຂັ້ມແຂງ ເພື່ອເອົາຊະນະການຕໍ່ຕ້ານ ແລະ ການເຊື່ອມໂຍງຂອງເຂົາເຈົ້າກັບພຣະຜູ້ເປັນເຈົ້າທີ່ຊົງພຣະຊົນຢູ່ ທີ່ສະໜັບສະໜູນເຂົາເຈົ້າ ຜ່ານທາງເວລາ ທັງດີ ແລະ ບໍ່ດີ. ສຳລັບບຸກຄົນເຫລົ່ານີ້, ພຣະເຢຊູຄຣິດເປັນພຣະຜູ້ຊ່ວຍໃຫ້ລອດສ່ວນຕົວແທ້ໆ.

ພັນທະສັນຍາ ແລະ ພິທີການຂອງພຣະກິດຕິຄຸນປະຕິບັດໃນຊີວິດຂອງເຮົາ ແມ່ນຄືກັບເຂັມທິດ. ເຂັມທິດແມ່ນອຸປະກອນທີ່ໃຊ້ເພື່ອບອກທິດທາງທີ່ສຳຄັນຂອງເໜືອ, ໃຕ້, ຕາເວັນອອກ, ແລະ ຕາເວັນຕົກ ເພື່ອຈຸດປະສົງການນຳທາງ ແລະ ທິດທາງພູມສາດ. ໃນທາງທີ່ຄ້າຍຄືກັນ, ພັນທະສັນຍາ ແລະ ພິທີການຂອງເຮົາ ຊີ້ໃຫ້ເຮົາເຫັນ ແລະ ຊ່ວຍເຮົາໃຫ້ຈື່ຈຳການເຊື່ອມໂຍງຂອງເຮົາກັບອົງພຣະເຢຊູຄຣິດເຈົ້າສະເໝີ ຂະນະທີ່ເຮົາກ້າວໄປຕາມເສັ້ນທາງແຫ່ງພັນທະສັນຍາ.

ທິດທາງທີ່ສຳຄັນສຳລັບເຮົາທຸກຄົນໃນຊ່ວງມະຕະ ແມ່ນການມາຫາ ແລະ ເປັນຄົນດີພ້ອມໃນພຣະຄຣິດ.¹⁶ ພັນທະສັນຍາ ແລະ ພິທີການທີ່ສັກສິດ ຊ່ວຍເຮົາໃຫ້ຮັກສາຈຸດສຸມຂອງເຮົາຢູ່ທີ່ພຣະຜູ້ຊ່ວຍໃຫ້ລອດ ແລະ ພະຍາຍາມ, ດ້ວຍພຣະຄຸນຂອງພຣະອົງ,¹⁷ ເພື່ອກາຍເປັນເໝືອນດັ່ງພຣະອົງຫລາຍຂຶ້ນ. ແນ່ນອນທີ່ສຸດ, “ອຳນາດລຶກລ້ຳຈະຄ້ຳເຈົ້າ ແລະ ເຮົາ ໃນອຸດົມການທີ່ຊັດຈິງ.”¹⁸

ຈັບຮາວເຫລັກໄວ້ໃຫ້ແໜ້ນ

ພັນທະສັນຍາຂອງເຮົາທີ່ເຊື່ອມໂຍງເຮົາເຂົ້າກັບພຣະເຈົ້າ ແລະ ພຣະເຢຊູຄຣິດເປັນຊ່ອງທາງທີ່ເຮົາຈະໄດ້ຮັບຄວາມສາມາດ ແລະ ຄວາມເຂັ້ມແຂງໃນການ “ບໍ່ຫົວຊາ.” ແລະ ພັນທະນີ້ແຂງແກ່ນຂຶ້ນເມື່ອເຮົາສືບຕໍ່ຈັບຮາວເຫລັກໄວ້ໃຫ້ແໜ້ນ. ແຕ່ດັ່ງທີ່ພວກອ້າຍຂອງນີໄຟໄດ້ຖາມວ່າ, “ຮາວເຫລັກທີ່ບິດາຂອງພວກເຮົາເຫັນ … ນັ້ນ ໝາຍຄວາມວ່າແນວໃດ?

ແລະ [ນີໄຟ] ຕອບພວກເຂົາ, ນັ້ນຄື ພຣະຄຳຂອງພຣະເຈົ້າ; ແລະ ຜູ້ໃດທີ່ຈະເຊື່ອຟັງ ພຣະຄຳຂອງພຣະເຈົ້າ, ແລະ ຈະ ຈັບມັນໄວ້ໃຫ້ແໜ້ນ, ພວກເຂົາຈະບໍ່ຕາຍເລີຍ; ທັງສິ່ງລໍ້ລວງ ແລະ ລູກສອນໄຟຂອງຜູ້ປໍລະປັກກໍຈະບໍ່ອາດເອົາຊະນະໂດຍຈະເຮັດໃຫ້ພວກເຂົາຕາບອດ ເພື່ອຈະນຳພວກເຂົາໄປສູ່ຄວາມພິນາດໄດ້.”¹⁹

ກະລຸນາສັງເກດວ່າ ຄວາມສາມາດໃນການຕ້ານທານການລໍ້ລວງ ແລະ ລູກສອນໄຟຂອງຜູ້ປໍລະປັກ ຖືກສັນຍາໄວ້ກັບຄົນທີ່ “ຈັບ [ພຣະຄຳຂອງພຣະເຈົ້າ] ໄວ້ໃຫ້ແໜ້ນ” ແທນທີ່ຈະພຽງແຕ່ “ກອດ [ພຣະຄຳຂອງພຣະເຈົ້າ] ໄວ້” ເທົ່ານັ້ນ.

ໜ້າສົນໃຈ, ອັກຄະສາວົກໂຢຮັນໄດ້ບັນຍາຍເຖິງພຣະເຢຊູຄຣິດ ວ່າເປັນພຣະທຳ.²⁰

“ເມື່ອຕົ້ນເດີມນັ້ນ ພຣະທຳ, ຊົງເປັນຢູ່ແລ້ວ ພຣະທຳ ນັ້ນຊົງສະຖິດຢູ່ກັບພຣະເຈົ້າ, ແລະ ພຣະທຳ ນັ້ນແຫລະ ຊົງເປັນພຣະເຈົ້າ. …

“ພຣະອົງໄດ້ຊົງສ້າງທຸກສິ່ງຂຶ້ນໂດຍທາງພຣະທຳ; ໃນບັນດາສິ່ງທີ່ເປັນມານັ້ນ ບໍ່ມີສິ່ງໜຶ່ງສິ່ງໃດທີ່ເປັນມາໂດຍນອກຈາກພຣະທຳ. …

“ແລະ ພຣະທຳ ໄດ້ຊົງບັງເກີດເປັນມະນຸດ, ແລະ ອາໄສຢູ່ທ່າມກາງເຮົາທັງຫລາຍ, (ແລະ ພວກເຮົາທັງຫລາຍໄດ້ເຫັນລັດສະໝີພາບຂອງພຣະອົງ, ຄືລັດສະໝີພາບຂອງພຣະອົງດຽວທີ່ຖືກຳເນີດຂອງພຣະບິດາ,) ເຕັມໄປດ້ວຍພຣະຄຸນ ແລະ ຄວາມຈິງ.”²¹

ດັ່ງນັ້ນ, ໜຶ່ງໃນພຣະນາມຂອງພຣະເຢຊູຄຣິດແມ່ນ “ພຣະທຳ.”²²

ນອກເໜືອຈາກນັ້ນ, ຫລັກແຫ່ງຄວາມເຊື່ອຂໍ້ທີແປດ ລະບຸວ່າ, “ພວກເຮົາເຊື່ອວ່າ ພຣະຄຣິສຕະທຳຄຳພີເປັນ ພຣະຄຳຂອງພຣະເຈົ້າ ຕາບໃດທີ່ແປມັນຖືກຕ້ອງ; ພວກເຮົາເຊື່ອອີກວ່າ ພຣະຄຳພີມໍມອນເປັນ ພຣະຄຳຂອງພຣະເຈົ້າ.”²³

ດັ່ງນັ້ນ, ຄຳສອນຂອງພຣະຜູ້ຊ່ວຍໃຫ້ລອດ, ດັ່ງທີ່ມີບັນທຶກຢູ່ໃນພຣະຄຳພີສັກສິດ, ແມ່ນ “ພຣະທຳ.”

ຂ້າພະເຈົ້າຂໍແນະນຳວ່າ ການຈັບພຣະຄຳຂອງພຣະເຈົ້າໄວ້ໃຫ້ແໜ້ນແມ່ນຮ່ວມດ້ວຍ (1) ການລະນຶກເຖິງ, ການໃຫ້ກຽດ, ແລະ ການເສີມສ້າງຄວາມສຳພັນສ່ວນຕົວທີ່ເຮົາມີກັບພຣະຜູ້ຊ່ວຍໃຫ້ລອດ ແລະ ພຣະບິດາຂອງພຣະອົງ ຜ່ານທາງພັນທະສັນຍາ ແລະ ພິທີການຂອງພຣະກິດຕິຄຸນທີ່ຖືກຟື້ນຟູ ແລະ (2) ການໃຊ້ພຣະຄຳພີສັກສິດ ແລະ ຄຳສອນຂອງສາດສະດາ ແລະ ອັກຄະສາວົກທີ່ມີຊີວິດຢູ່ດ້ວຍການອະທິຖານ, ຢ່າງພາກພຽນ, ແລະ ຢ່າງສະໝ່ຳສະເໝີ ໃຫ້ເປັນແຫລ່ງທີ່ແນ່ນອນຂອງຄວາມຈິງທີ່ຖືກເປີດເຜີຍ. ຂະນະທີ່ເຮົາຖືກຜູກມັດ ແລະ “ຍຶດໝັ້ນ” ທີ່ພຣະຜູ້ເປັນເຈົ້າ ແລະ ຖືກປ່ຽນແປງໂດຍການດຳລົງຊີວິດຕາມຄຳສອນຂອງພຣະອົງ,²⁴ ຂ້າພະເຈົ້າສັນຍາວ່າ ເຮົາຈະໄດ້ຮັບພອນເປັນສ່ວນບຸກຄົນ ແລະ ເປັນກຸ່ມໃຫຍ່ ເພື່ອ “ຢືນຢູ່ໃນສະຖານທີ່ສັກສິດ, ແລະ ບໍ່ຫວັ່ນໄຫວ.”²⁵ ຖ້າຫາກເຮົາຢູ່ນຳພຣະຄຣິດ, ແລ້ວພຣະອົງຈະສະຖິດຢູ່ນຳເຮົາ ແລະ ເດີນໄປກັບເຮົາ.²⁶ ແນ່ນອນ, “ໃນວັນໂສກເສົ້າອົງພຣະເຈົ້າຈະປອບໂຍນ, ເພີ່ມຜົນອຸດົມການຊັດຈິງ.”²⁷

ປະຈັກພະຍານ

ເດີນໄປ. ຍຶດໝັ້ນ. ຢ່າຫົວຊາ.

ຂ້າພະເຈົ້າເປັນພະຍານວ່າ ຄວາມຊື່ສັດຕໍ່ພັນທະສັນຍາ ແລະ ພິທີການຂອງພຣະກິດຕິຄຸນທີ່ຖືກຟື້ນຟູຂອງພຣະຜູ້ຊ່ວຍໃຫ້ລອດ ຈະຊ່ວຍໃຫ້ເຮົາ ເດີນໄປ ໃນວຽກງານຂອງພຣະຜູ້ເປັນເຈົ້າ, ເພື່ອ ຍຶດໝັ້ນ ຢູ່ທີ່ພຣະອົງໃນຖານະພຣະທຳຂອງພຣະເຈົ້າ, ແລະ ບໍ່ຫົວຊາ ສິ່ງທີ່ລໍ້ໃຈຂອງຜູ້ປໍລະປັກ. ໃນການຕໍ່ສູ້ເພື່ອຄວາມຖືກຕ້ອງ, ຂໍໃຫ້ເຮົາແຕ່ລະຄົນຈົ່ງແກວ່ງດາບ, ແມ່ນແຕ່ “ດາບແຫ່ງຄວາມຈິງ,”²⁸ ໃນພຣະນາມອັນສັກສິດຂອງອົງພຣະເຢຊູຄຣິດເຈົ້າ, ອາແມນ.