ຄວາມຮັກແຫ່ງສະຫວັນໃນແຜນຂອງພຣະບິດາ

ໂດຍ ປະທານດາລິນ ເອັຈ ໂອກສ໌

ທີ່ປຶກສາທີໜຶ່ງໃນຝ່າຍປະທານສູງສຸດ

ຈຸດປະສົງຂອງຄຳສອນ ແລະ ນະໂຍບາຍຂອງສາດສະໜາຈັກທີ່ຖືກຟື້ນຟູນີ້ ແມ່ນເພື່ອຕຽມລູກໆຂອງພຣະເຈົ້າສຳລັບຄວາມລອດໃນອານາຈັກຊັ້ນສູງ ແລະ ສຳລັບຄວາມສູງສົ່ງໃນລະດັບສູງສຸດຂອງມັນ.

ແຜນພຣະກິດຕິຄຸນສະແດງເຖິງຄວາມຮັກຂອງພຣະບິດາເທິງສະຫວັນທີ່ມີຕໍ່ລູກໆທຸກຄົນຂອງພຣະອົງ. ເພື່ອຈະເຂົ້າໃຈສິ່ງນີ້, ເຮົາຕ້ອງສະແຫວງຫາທີ່ຈະເຂົ້າໃຈແຜນ ແລະ ພຣະບັນຍັດຂອງພຣະອົງ. ພຣະອົງຮັກລູກໆຂອງພຣະອົງຫລາຍຈົນວ່າພຣະອົງໄດ້ປະທານພຣະບຸດອົງດຽວທີ່ຖືກຳເນີດຂອງພຣະອົງ, ພຣະເຢຊູຄຣິດ, ໃຫ້ເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ເພື່ອທົນທຸກທໍລະມານ ແລະ ສິ້ນພຣະຊົນເພື່ອເຮົາ. ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍທີ່ຖືກຟື້ນຟູ, ເຮົາມີຄວາມເຂົ້າໃຈສະເພາະກ່ຽວກັບແຜນຂອງພຣະບິດາເທິງສະຫວັນ. ສິ່ງນີ້ເຮັດໃຫ້ເຮົາມີວິທີທີ່ແຕກຕ່າງໃນການເບິ່ງຈຸດປະສົງຂອງຊີວິດມະຕະ, ການພິພາກສາອັນສູງສົ່ງທີ່ຕິດຕາມມາ, ແລະ ຈຸດໝາຍປາຍທາງອັນສະຫງ່າລາສີສູງສຸດຂອງລູກໆທຸກຄົນຂອງພຣະເຈົ້າ.

ຂ້າພະເຈົ້າຮັກທ່ານ, ອ້າຍເອື້ອຍນ້ອງທັງຫລາຍ. ຂ້າພະເຈົ້າຮັກລູກໆທຸກຄົນຂອງພຣະເຈົ້າ. ເມື່ອພຣະເຢຊູຖືກຖາມວ່າ, “ອາຈານເອີຍ, ໃນກົດບັນຍັດ ແມ່ນຂໍ້ໃດທີ່ເປັນຂໍ້ໃຫຍ່ສຳຄັນທີ່ສຸດ?” ພຣະອົງໄດ້ສິດສອນວ່າ ການຮັກພຣະເຈົ້າ ແລະ ເພື່ອນບ້ານແມ່ນພຣະບັນຍັດຂໍ້ໃຫຍ່ ແລະ ຂໍ້ຕົ້ນຂອງພຣະເຈົ້າ.¹ ພຣະບັນຍັດເຫລົ່ານັ້ນແມ່ນຂໍ້ໃຫຍ່ ແລະ ຂໍ້ຕົ້ນ ເພາະວ່າມັນເຊື້ອເຊີນໃຫ້ເຮົາເຕີບໂຕທາງວິນຍານ ໂດຍການສະແຫວງຫາທີ່ຈະຮຽນແບບຄວາມຮັກຂອງພຣະເຈົ້າທີ່ມີຕໍ່ເຮົາ. ຂ້າພະເຈົ້າຫວັງວ່າເຮົາທຸກຄົນຈະມີຄວາມເຂົ້າໃຈຫລາຍຂຶ້ນກ່ຽວກັບຄຳສອນ ແລະ ນະໂຍບາຍທີ່ເຕັມໄປດ້ວຍຄວາມຮັກ ຊຶ່ງພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ສ້າງຕັ້ງຂຶ້ນໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ສິ່ງທີ່ຂ້າພະເຈົ້າກ່າວໃນທີ່ນີ້ ແມ່ນພະຍາຍາມຊີ້ແຈງວ່າຄວາມຮັກຂອງພຣະເຈົ້າອະທິບາຍຄຳສອນນັ້ນ ແລະ ນະໂຍບາຍທີ່ດົນໃຈຂອງສາດສະໜາຈັກແນວໃດ.

I.

ຄວາມເຂົ້າໃຈຜິດທີ່ເຫັນຢູ່ເລື້ອຍໆກ່ຽວກັບການພິພາກສາ ທີ່ຕິດຕາມຊີວິດມະຕະໃນທີ່ສຸດຄື ຄົນດີຈະໄປຫາບ່ອນທີ່ເອີ້ນວ່າ ສະຫວັນ ແລະ ຄົນຊົ່ວຈະໄປຫາບ່ອນບໍ່ມີວັນສິ້ນສຸດທີ່ເອີ້ນວ່າ ນະລົກ. ການສັນນິຖານທີ່ຜິດໆເຖິງຈຸດໝາຍສຸດທ້າຍພຽງສອງແຫ່ງ ບົ່ງບອກວ່າຜູ້ທີ່ບໍ່ສາມາດຮັກສາພຣະບັນຍັດທັງໝົດທີ່ຈຳເປັນສຳລັບສະຫວັນ ຈະຕ້ອງຖືກສົ່ງໄປຫານະລົກຕະຫລອດໄປ.

ພຣະບິດາເທິງສະຫວັນທີ່ຊົງຮັກມີແຜນທີ່ດີກວ່າສຳລັບລູກໆຂອງພຣະອົງ. ຄຳສອນທີ່ຖືກເປີດເຜີຍຂອງສາດສະໜາຈັກຂອງພຣະເຢຊູຄຣິດທີ່ຖືກຟື້ນຟູສິດສອນວ່າ ລູກໆທຸກຄົນຂອງພຣະເຈົ້າ—ໂດຍມີຂໍ້ຍົກເວັ້ນຫລາຍກວ່າທີ່ຈະພິຈາລະນາໃນນີ້—ໃນທີ່ສຸດຈະໄດ້ໄປຫາອານາຈັກແຫ່ງ ລັດສະໝີພາບ.² “ໃນຜາສາດຂອງພຣະບິດາຂອງເຮົາມີຜາສາດຫລາຍບ່ອນ,”³ ພຣະເຢຊູຄຣິດໄດ້ສິດສອນ. ຈາກການເປີດເຜີຍສະໄໝໃໝ່ ເຮົາຮູ້ວ່າຜາສາດເຫລົ່ານັ້ນມີສາມອານາຈັກແຫ່ງລັດສະໝີພາບທີ່ແຕກຕ່າງກັນ. ໃນການພິພາກສາຄັ້ງສຸດທ້າຍ ເຮົາແຕ່ລະຄົນຈະຖືກພິພາກສາອີງຕາມການກະທຳຂອງເຮົາ ແລະ ຄວາມປາດຖະໜາຂອງໃຈເຮົາ.⁴ ກ່ອນໜ້ານັ້ນ, ເຮົາຈະຕ້ອງທົນທຸກກັບບາບທີ່ບໍ່ໄດ້ກັບໃຈຂອງເຮົາ. ພຣະຄຳພີແມ່ນແຈ່ມແຈ້ງໃນເລື່ອງນີ້.⁵ ແລ້ວການພິພາກສາທີ່ຊອບທຳຂອງເຮົາ ຈະອະນຸຍາດໃຫ້ເຮົາໄດ້ຢູ່ໃນອານາຈັກແຫ່ງລັດສະໝີພາບແຫ່ງໃດແຫ່ງໜຶ່ງເຫລົ່ານັ້ນ. ດັ່ງນັ້ນ, ດັ່ງທີ່ເຮົາຮູ້ຈາກການເປີດເຜີຍສະໄໝໃໝ່, ທຸກຄົນ “ຈະຖືກພິພາກສາ … , ແລະ ທຸກໆຄົນຈະໄດ້ຮັບຕາມວຽກງານຂອງຕົນ, ຕາມການຄອບຄອງຂອງຕົນ, ໃນຜາສາດຊຶ່ງໄດ້ຈັດຕຽມໄວ້ແລ້ວ.”⁶

ພຣະຜູ້ເປັນເຈົ້າໄດ້ເລືອກເປີດເຜີຍພຽງເລັກນ້ອຍກ່ຽວກັບສອງອານາຈັກແຫ່ງລັດສະໝີພາບເຫລົ່ານີ້. ກົງກັນຂ້າມ, ພຣະຜູ້ເປັນເຈົ້າໄດ້ເປີດເຜີຍຢ່າງຫລວງຫລາຍກ່ຽວກັບອານາຈັກແຫ່ງລັດສະໝີພາບທີ່ສູງສຸດ, ຊຶ່ງພຣະຄຣິສຕະທຳຄຳພີບັນຍາຍວ່າເປັນ “ລັດສະໝີພາບຂອງດວງຕາເວັນ.”⁷

ໃນລັດສະໝີພາບຂອງ “ຊັ້ນສູງ”⁸ ມີສາມລະດັບ, ຫລື ສາມຊັ້ນ.⁹ ລະດັບສູງສຸດເຫລົ່ານີ້ແມ່ນຄວາມສູງສົ່ງໃນອານາຈັກຊັ້ນສູງ, ຊຶ່ງໃນນັ້ນເຮົາອາດກາຍເປັນເໝືອນພຣະບິດາຂອງເຮົາ ແລະ ພຣະບຸດຂອງພຣະອົງ, ພຣະເຢຊູຄຣິດ. ເພື່ອຊ່ວຍເຮົາໃຫ້ພັດທະນາຄຸນລັກສະນະຂອງພຣະເຈົ້າ ແລະ ການປ່ຽນແປງທຳມະຊາດທີ່ຈຳເປັນ ຕໍ່ການບັນລຸສັກກະຍະພາບແຫ່ງສະຫວັນຂອງເຮົາ, ພຣະຜູ້ເປັນເຈົ້າໄດ້ເປີດເຜີຍຄຳສອນ ແລະ ແຕ່ງຕັ້ງພຣະບັນຍັດອີງຕາມກົດນິລັນດອນ. ນີ້ຄືສິ່ງທີ່ເຮົາສິດສອນໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເພາະວ່າຈຸດປະສົງຂອງຄຳສອນ ແລະ ນະໂຍບາຍຂອງສາດສະໜາຈັກທີ່ຖືກຟື້ນຟູນີ້ ແມ່ນເພື່ອຕຽມລູກໆຂອງພຣະເຈົ້າສຳລັບຄວາມລອດໃນລັດສະໝີພາບຊັ້ນສູງ ແລະ, ໂດຍສະເພາະຢ່າງຍິ່ງ, ສຳລັບຄວາມສູງສົ່ງໃນລະດັບສູງສຸດຂອງມັນ.

ພັນທະສັນຍາທີ່ໄດ້ເຮັດ ແລະ ພອນທີ່ສັນຍາໄວ້ກັບຜູ້ທີ່ຊື່ສັດໃນພຣະວິຫານຂອງພຣະເຈົ້າ ເປັນຂໍກະແຈສຳຄັນ. ສິ່ງນີ້ອະທິບາຍການສ້າງພຣະວິຫານທົ່ວໂລກຂອງພວກເຮົາ, ຊຶ່ງກຸ່ມນັກຮ້ອງໄດ້ຮ້ອງກ່ຽວກັບຢ່າງມ່ວນອອນຊອນ. ບາງຄົນກໍງົງກັບການເນັ້ນເລື່ອງນີ້, ບໍ່ເຂົ້າໃຈວ່າພັນທະສັນຍາ ແລະ ພິທີການຂອງພຣະວິຫານຈະນຳພາເຮົາໄປສູ່ການບັນລຸຄວາມສູງສົ່ງໄດ້ແນວໃດ. ສິ່ງນີ້ສາມາດເຂົ້າໃຈໄດ້ພຽງແຕ່ໃນຄວາມໝາຍຂອງຄວາມຈິງທີ່ເປີດເຜີຍກ່ຽວກັບລັດສະໝີພາບຂອງສະຫວັນ ສາມ ລະດັບ. ເພາະຄວາມຮັກອັນຍິ່ງໃຫຍ່ຂອງພຣະບິດາເທິງສະຫວັນສຳລັບລູກໆທຸກຄົນຂອງພຣະອົງ, ພຣະອົງຈຶ່ງໄດ້ຈັດຕຽມອານາຈັກແຫ່ງລັດສະໝີພາບອື່ນໆໄວ້—ດັ່ງທີ່ແອວເດີ ຄວິນຕິນ ແອວ ຄຸກ ໄດ້ອະທິບາຍມື້ວານນີ້—ຊຶ່ງທັງໝົດແມ່ນດີກວ່າທີ່ມະນຸດຈະເຂົ້າໃຈໄດ້.¹⁰

ການຊົດໃຊ້ຂອງພຣະເຢຊູຄຣິດເຮັດໃຫ້ທັງໝົດນີ້ເປັນໄປໄດ້. ພຣະອົງໄດ້ເປີດເຜີຍວ່າ ພຣະອົງ “ສັນລະເສີນພຣະບິດາ, ແລະ ຊ່ວຍໃຫ້ວຽກງານທຸກຢ່າງໃນພຣະຫັດຂອງພຣະອົງລອດ.”¹¹ ຄວາມລອດນັ້ນໄດ້ຮັບໃນອານາຈັກແຫ່ງລັດສະໝີພາບທີ່ແຕກຕ່າງກັນ. ເຮົາຮູ້ຈາກການເປີດເຜີຍສະໄໝໃໝ່ວ່າ “ອານາຈັກທັງໝົດມີກົດໃຫ້ໄວ້.”¹² ທີ່ສຳຄັນ:

“ຄົນທີ່ບໍ່ສາມາດປະຕິບັດຕາມກົດຂອງອານາຈັກຊັ້ນສູງ ຈະທົນກັບລັດສະໝີພາບຂອງຊັ້ນສູງບໍ່ໄດ້.

“ແລະ ຄົນທີ່ບໍ່ສາມາດປະຕິບັດຕາມກົດຂອງອານາຈັກຊັ້ນກາງ ຈະທົນກັບລັດສະໝີພາບຂອງຊັ້ນກາງບໍ່ໄດ້.

“ແລະ ຄົນທີ່ບໍ່ສາມາດປະຕິບັດຕາມກົດຂອງອານາຈັກຊັ້ນຕ່ຳ ຈະທົນກັບລັດສະໝີພາບຂອງຊັ້ນຕ່ຳບໍ່ໄດ້.”¹³

ໃນອີກຄຳໜຶ່ງ, ອານາຈັກແຫ່ງລັດສະໝີພາບທີ່ເຮົາໄດ້ຮັບໃນການພິພາກສາຄັ້ງສຸດທ້າຍຖືກກຳນົດໂດຍກົດທີ່ເຮົາເລືອກຮັກສາ ໃນແຜນແຫ່ງຄວາມຮັກຂອງພຣະບິດາເທິງສະຫວັນ. ພາຍໃຕ້ແຜນນັ້ນມີຫລາຍອານາຈັກ ເພື່ອວ່າລູກໆຂອງພຣະອົງຈະຖືກມອບໝາຍໃຫ້ໄປຫາອານາຈັກບ່ອນທີ່ເຂົາເຈົ້າສາມາດ “ຢູ່ໄດ້.”

II.

ຄຳສອນ ແລະ ນະໂຍບາຍຂອງສາດສະໜາຈັກທີ່ຖືກຟື້ນຟູຂອງພຣະຜູ້ເປັນເຈົ້າ ນຳໃຊ້ຄວາມຈິງນິລັນດອນເຫລົ່ານີ້ໃນວິທີທາງທີ່ສາມາດເຂົ້າໃຈຢ່າງເຕັມສ່ວນໃນຄວາມໝາຍຂອງແຜນແຫ່ງຄວາມຮັກຂອງພຣະບິດາເທິງສະຫວັນສຳລັບລູກໆ ທຸກຄົນ ຂອງພຣະອົງ.

ດັ່ງນັ້ນ, ເຮົາໃຫ້ກຽດອຳເພີໃຈສ່ວນຕົວ. ຫລາຍຄົນກໍຮັບຮູ້ຄວາມພະຍາຍາມອັນກວ້າງໄກຂອງສາດສະໜາຈັກນີ້ ແມ່ນທີ່ຈະສົ່ງເສີມເສລີພາບທາງສາດສະໜາ. ຄວາມພະຍາຍາມເຫລົ່ານີ້ສົ່ງເສີມແຜນຂອງພຣະບິດາເທິງສະຫວັນຂອງເຮົາ. ເຮົາສະແຫວງຫາທີ່ຈະຊ່ວຍລູກໆ ທຸກຄົນ ຂອງພຣະອົງ—ບໍ່ແມ່ນພຽງແຕ່ສະມາຊິກຂອງເຮົາເອງ—ໃຫ້ຊື່ນຊົມກັບອິດສະລະພາບອັນລ້ຳຄ່າທີ່ຈະເລືອກ.

ຄ້າຍຄືກັນ, ບາງເທື່ອເຮົາກໍຖືກຖາມວ່າ ເປັນຫຍັງເຮົາຈຶ່ງສົ່ງຜູ້ສອນສາດສະໜາອອກໄປຫາຫລາຍໆປະເທດ, ແມ່ນແຕ່ໃນທ່າມກາງປະຊາຊົນທີ່ເປັນຊາວຄຣິດ. ເຮົາກໍຖືກຖາມອີກວ່າ ເປັນຫຍັງເຮົາຈຶ່ງຊ່ວຍໂຄງການມະນຸດສະທຳຢ່າງຫລວງຫລາຍ ໃຫ້ຜູ້ຄົນທີ່ບໍ່ໄດ້ເປັນສະມາຊິກຂອງສາດສະໜາຈັກຂອງເຮົາ ໂດຍທີ່ບໍ່ເຊື່ອມໂຍງການຊ່ວຍເຫລືອນີ້ເຂົ້າກັບວຽກງານການເຜີຍແຜ່ຂອງເຮົາ. ເຮົາເຮັດສິ່ງນີ້ເພາະວ່າພຣະຜູ້ເປັນເຈົ້າໄດ້ສິດສອນເຮົາໃຫ້ຮັບຮູ້ລູກໆທຸກຄົນຂອງພຣະອົງວ່າ ເປັນອ້າຍເອື້ອຍນ້ອງຂອງເຮົາ, ແລະ ເຮົາຢາກແບ່ງປັນຄວາມອຸດົມສົມບູນທາງວິນຍານ ແລະ ທາງໂລກຂອງເຮົາກັບທຸກໆຄົນ.

ຄຳສອນນິລັນດອນກໍຍັງໃຫ້ມຸມມອງທີ່ແຕກຕ່າງກ່ຽວກັບເດັກນ້ອຍນຳອີກ. ຜ່ານທາງມຸມມອງນີ້ ເຮົາເຫັນການເກີດລູກ ແລະ ການລ້ຽງດູລູກ ເປັນພາກສ່ວນໜຶ່ງໃນແຜນແຫ່ງສະຫວັນ. ມັນເປັນໜ້າທີ່ອັນຊື່ນຊົມ ແລະ ສັກສິດຂອງຜູ້ທີ່ຖືກມອບອຳນາດນີ້ໃຫ້ເພື່ອມີສ່ວນຮ່ວມໃນນັ້ນ. ສະນັ້ນ, ເຮົາຈຶ່ງຖືກບັນຊາໃຫ້ສິດສອນ ແລະ ຕໍ່ສູ້ເພື່ອຫລັກທຳ ແລະ ພາກປະຕິບັດທີ່ໃຫ້ມີບັນຍາກາດທີ່ດີທີ່ສຸດສຳລັບການພັດທະນາ ແລະ ຄວາມສຸກຂອງເດັກນ້ອຍ ພາຍໃຕ້ແຜນຂອງພຣະເຈົ້າ.

III.

ສຸດທ້າຍ, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ກໍເປັນທີ່ຮູ້ຈັກຢ່າງຖືກຕ້ອງວ່າ ເປັນສາດສະໜາຈັກທີ່ມີຄອບຄົວເປັນສູນກາງ. ແຕ່ສິ່ງທີ່ບໍ່ເຂົ້າໃຈກັນດີກໍຄື ຄວາມຈິງທີ່ຄອບຄົວຂອງເຮົາເປັນສູນກາງ ບໍ່ໄດ້ເຈາະຈົງໃສ່ແຕ່ຄວາມສຳພັນໃນຊ່ວງມະຕະເທົ່ານັ້ນ. ຄວາມສຳພັນນິລັນດອນກໍສຳຄັນຕໍ່ຄວາມເຊື່ອທາງສາດສະໜາຂອງເຮົາຄືກັນ. ພາລະກິດຂອງສາດສະໜາຈັກທີ່ຖືກຟື້ນຟູແມ່ນເພື່ອຊ່ວຍລູກໆຂອງພຣະເຈົ້າໃຫ້ເໝາະສົມກັບສິ່ງທີ່ພຣະເຈົ້າປາດຖະໜາໃຫ້ເປັນຈຸດໝາຍປາຍທາງສູງສຸດຂອງພວກເຂົາ. ໂດຍການໄຖ່ທີ່ຈັດຕຽມໄວ້ຜ່ານທາງການຊົດໃຊ້ຂອງພຣະຄຣິດ, ທຸກຄົນຈະໄດ້ຮັບຊີວິດນິລັນດອນ (ໄດ້ຮັບຄວາມສູງສົ່ງໃນອານາຈັກຊັ້ນສູງ), ຊຶ່ງມານດາເອວາໄດ້ປະກາດວ່າ “ພຣະເຈົ້າມອບໃຫ້ແກ່ທຸກຄົນທີ່ເຊື່ອຟັງ.”¹⁴ ນີ້ແມ່ນຫລາຍກວ່າຄວາມລອດ. ປະທານຣະໂຊ ເອັມ ແນວສັນ ໄດ້ເຕືອນເຮົາວ່າ “ໃນແຜນນິລັນດອນຂອງພຣະເຈົ້າ, ຄວາມລອດເປັນເລື່ອງສ່ວນຕົວ; [ແຕ່] ຄວາມສູງສົ່ງເປັນເລື່ອງຄອບຄົວ.”¹⁵

ພື້ນຖານສຳລັບເຮົາຄືການເປີດເຜີຍຂອງພຣະເຈົ້າວ່າ ຄວາມສູງສົ່ງສາມາດບັນລຸໄດ້ພຽງແຕ່ຜ່ານທາງຄວາມຊື່ສັດຕໍ່ພັນທະສັນຍາຂອງການແຕ່ງງານນິລັນດອນ ລະຫວ່າງຊາຍ ແລະ ຍິງເທົ່ານັ້ນ.¹⁶ ຄຳສອນແຫ່ງສະຫວັນນັ້ນຄືສາເຫດທີ່ເຮົາສິດສອນວ່າ “ເພດເປັນສິ່ງສຳຄັນຫລາຍ ຕໍ່ການຈຳແນກບອກໃຫ້ຮູ້ເຖິງບຸກຄະລິກລັກສະນະຂອງແຕ່ລະຄົນ ໃນໂລກກ່ອນເກີດ, ໃນໂລກນີ້, ແລະ ໃນນິລັນດອນ ແລະ ເຖິງຈຸດມຸ້ງໝາຍ.”¹⁷

ນັ້ນຄືສາເຫດທີ່ພຣະຜູ້ເປັນເຈົ້າໄດ້ຮຽກຮ້ອງສາດສະໜາຈັກທີ່ຖືກຟື້ນຟູຂອງພຣະອົງໃຫ້ຕໍ່ຕ້ານຄວາມກົດດັນທາງສັງຄົມ ແລະ ທາງກົດໝາຍທີ່ໃຫ້ຖອຍຫ່າງຈາກຄຳສອນຂອງພຣະອົງເລື່ອງການແຕ່ງງານລະຫວ່າງຊາຍ ແລະ ຍິງ ແລະ ໃຫ້ຕໍ່ຕ້ານການປ່ຽນແປງທີ່ເຮັດໃຫ້ຄວາມແຕກຕ່າງລະຫວ່າງຊາຍ ແລະ ຍິງກາຍເປັນແບບດຽວກັນ ຫລື ສັບສົນ ຫລື ປ່ຽນແປງເພດ.

ຕຳແໜ່ງຂອງສາດສະໜາຈັກທີ່ຖືກຟື້ນຟູຢູ່ເທິງພື້ນຖານເຫລົ່ານີ້ ມັກຈະກະຕຸ້ນການຕໍ່ຕ້ານ. ພວກເຮົາເຂົ້າໃຈດີ. ແຜນຂອງພຣະບິດາເທິງສະຫວັນຂອງເຮົາ ອະນຸຍາດໃຫ້ມີ “ການກົງກັນຂ້າມໃນທຸກຢ່າງ,”¹⁸ ແລະ ຊາຕານຈະມຸ້ງໃສ່ສິ່ງໃດກໍຕາມທີ່ສຳຄັນທີ່ສຸດຕໍ່ແຜນນັ້ນ. ດ້ວຍເຫດນີ້, ມັນຈຶ່ງພະຍາຍາມຕໍ່ຕ້ານຄວາມກ້າວໜ້າໄປສູ່ຄວາມສູງສົ່ງ ໂດຍການບິດເບືອນການແຕ່ງງານ, ຂັດຂວາງການເກີດລູກ, ຫລື ເຮັດໃຫ້ເພດສັບສົນ. ເຖິງຢ່າງໃດກໍຕາມ, ເຮົາຮູ້ວ່າໃນໄລຍະຍາວ, ຈຸດປະສົງແຫ່ງສະຫວັນ ແລະ ແຜນຂອງພຣະບິດາເທິງສະຫວັນທີ່ຊົງຮັກຂອງເຮົາ ຈະບໍ່ປ່ຽນແປງ. ສະຖານະການສ່ວນຕົວອາດປ່ຽນແປງ, ແລະ ແຜນຂອງພຣະເຈົ້າຮັບຮອງວ່າໃນໄລຍະຍາວ, ຄົນທີ່ຊື່ສັດຜູ້ຮັກສາພັນທະສັນຍາຂອງຕົນ ຈະມີໂອກາດທີ່ຈະເໝາະສົມກັບພອນທຸກປະການທີ່ສັນຍາໄວ້.¹⁹

ຄຳສອນສະເພາະອັນລ້ຳຄ່າເພື່ອຊ່ວຍເຮົາກຽມພ້ອມສຳລັບຊີວິດນິລັນດອນ, “ຂອງປະທານອັນຍິ່ງໃຫຍ່ທີ່ສຸດໃນຂອງປະທານທັງໝົດຂອງພຣະເຈົ້າ,”²⁰ ແມ່ນການປະກາດໃນປີ 1995 ກ່ຽວກັບຄອບຄົວ.²¹ ຂໍ້ປະກາດເຫລົ່ານັ້ນ, ແນ່ນອນ, ແຕກຕ່າງຈາກກົດບາງຂໍ້, ການປະຕິບັດ, ແລະ ການສົ່ງເສີມໃນປະຈຸບັນ, ດັ່ງເຊັ່ນ ການຢູ່ນຳກັນໂດຍບໍ່ແຕ່ງງານ ແລະ ການແຕ່ງງານກັບເພດດຽວກັນ. ຜູ້ທີ່ບໍ່ເຂົ້າໃຈຢ່າງເຕັມສ່ວນເຖິງແຜນທີ່ຊົງຮັກຂອງພຣະບິດາສຳລັບລູກໆຂອງພຣະອົງ ອາດພິຈາລະນາການປະກາດກ່ຽວກັບຄອບຄົວນີ້ ວ່າບໍ່ມີຄວາມໝາຍຫລາຍໄປກວ່າຄຳຖະແຫລງນະໂຍບາຍທີ່ປ່ຽນແປງໄດ້. ກົງກັນຂ້າມ, ພວກເຮົາຢືນຢັນວ່າ ການປະກາດກ່ຽວກັບຄອບຄົວ, ສ້າງຕັ້ງຂຶ້ນໃນຄຳສອນທີ່ຖອນຄືນບໍ່ໄດ້, ກຳນົດປະເພດຂອງຄວາມສຳພັນໃນຄອບຄົວ ທີ່ພາກສ່ວນສຳຄັນທີ່ສຸດຂອງການພັດທະນານິລັນດອນຂອງເຮົາສາມາດເກີດຂຶ້ນໄດ້.

ນັ້ນແມ່ນຄວາມໝາຍສຳລັບຄຳສອນ ແລະ ນະໂຍບາຍສະເພາະຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍທີ່ຖືກຟື້ນຟູ.

IV.

ໃນຄວາມສຳພັນ ແລະ ສະຖານະການຢ່າງຫລວງຫລາຍໃນຊີວິດມະຕະ, ເຮົາແຕ່ລະຄົນຈະຕ້ອງດຳລົງຊີວິດກັບຄວາມແຕກຕ່າງ. ໃນຖານະຜູ້ຕິດຕາມພຣະຄຣິດ ຜູ້ຄວນຮັກເພື່ອນບ້ານຂອງເຮົາ, ເຮົາຄວນດຳລົງຊີວິດຢ່າງສະຫງົບສຸກກັບຜູ້ທີ່ບໍ່ເຊື່ອຄືເຮົາ. ເຮົາທຸກຄົນເປັນລູກຂອງພຣະບິດາເທິງສະຫວັນທີ່ຊົງຮັກ. ສຳລັບເຮົາທຸກຄົນ, ພຣະອົງໄດ້ກຳນົດຊີວິດຫລັງຈາກຄວາມຕາຍ ແລະ, ໃນທີ່ສຸດ, ອານາຈັກແຫ່ງລັດສະໝີພາບ. ພຣະເຈົ້າປາດຖະໜາໃຫ້ເຮົາທຸກຄົນພະຍາຍາມເພື່ອພອນສູງສຸດທີ່ເປັນໄປໄດ້ຂອງພຣະອົງ ໂດຍການຮັກສາພຣະບັນຍັດ, ພັນທະສັນຍາ, ແລະ ພິທີການສູງສຸດຂອງພຣະອົງ, ຊຶ່ງທັງໝົດສູງສຸດໃນພຣະວິຫານທີ່ສັກສິດຂອງພຣະອົງ ທີ່ຖືກສ້າງຂຶ້ນທົ່ວໂລກ. ເຮົາຕ້ອງສະແຫວງຫາທີ່ຈະແບ່ງປັນຄວາມຈິງເຫລົ່ານີ້ກັບຄົນອື່ນ. ແຕ່ດ້ວຍຄວາມຮັກທີ່ເຮົາມີຕໍ່ເພື່ອນບ້ານຂອງເຮົາ, ເຮົາຈຶ່ງຮັບຮູ້ການຕັດສິນໃຈຂອງເຂົາເຈົ້າສະເໝີ. ດັ່ງທີ່ສາດສະດາໃນພຣະຄຳພີມໍມອນໄດ້ສິດສອນ, ເຮົາຕ້ອງມຸ້ງໜ້າ, ໂດຍມີ “ຄວາມຮັກຂອງພຣະເຈົ້າ ແລະ ຂອງມະນຸດທັງປວງ.”²²

ດັ່ງທີ່ປະທານຣະໂຊ ເອັມ ແນວສັນ ໄດ້ປະກາດໃນກອງປະຊຸມໃຫຍ່ເທື່ອແລ້ວນີ້ວ່າ: “ບໍ່ເຄີຍມີຊ່ວງເວລາໃດໃນປະຫວັດສາດຂອງໂລກ ເມື່ອຄວາມຮູ້ເຖິງພຣະຜູ້ຊ່ວຍໃຫ້ລອດຂອງເຮົາ ມີຄວາມສຳຄັນສ່ວນຕົວ ແລະ ກ່ຽວຂ້ອງກັບ ຈິດວິນຍານຂອງມວນມະນຸດ ຫລາຍໄປກວ່າໃນເວລານີ້. … ຄຳສອນທີ່ບໍລິສຸດຂອງພຣະຄຣິດມີພະລັງຫລາຍ. ມັນປ່ຽນຊີວິດຂອງທຸກຄົນທີ່ເຂົ້າໃຈ ແລະ ສະແຫວງຫາທີ່ຈະນຳໃຊ້ມັນໃນຊີວິດຂອງຕົນ.”²³

ຂໍໃຫ້ເຮົາທຸກຄົນຈົ່ງນຳໃຊ້ຄຳສອນທີ່ສັກສິດນັ້ນໃນຊີວິດຂອງເຮົາເອງ, ຂ້າພະເຈົ້າອະທິຖານໃນພຣະນາມຂອງພຣະເຢຊູຄຣິດ, ອາແມນ.